INU NKWEEN̄ 10
Ike Owa Ke Obosa Iriọọn̄ Ata Uwu Uriaak?
1. Ire uwu uriaak ge gaalek ore ata ni?
“Iriọọn̄ lek kinyi me lek ebi nriran̄ ataak.”—MATIYU 7:15.
Jisọs ijeen̄ ebi udun̄ kan̄ gaalek uwu uriaak ge, ata uwu uriaak. Ikup kubọk oniin̄ okisa ene ifolek ugwem ikakaan̄ge itata. Jisọs ibe ke: Ibot ene inen mè inen gaalek “ekikọt iweek otunchit yi mè oniin̄ yi imun̄.” (Matiyu 7:14) Ire gaalek ntọbọ ebum eyi oje ikike me lek Baibul ke Awaji okibọkọ itap. Otutuuk ebi ikitọbọ ebum me oniin̄ otatat ebegbaan̄ ibọp me nchieek ge.—Fuk Jọn 4:23, 24; 14:6; Ebi Efesọs 4:4, 5.
Ikpọ fidio Does God Accept All Forms of Worship?
2. Keke ke Jisọs otumu ofolek ebi kperege Ebi Eyi Karais?
“Ema ekitumu ibe ke ema miriọọn̄ Awaji, ire, irọrọ kiban̄ ikijeen̄ ibe ke mijit Awaji.”—TAITỌS 1:16.
Jisọs itaba ene ubọk me utọn ibe ke ebi nriran̄ ataak mefiat ntitiin̄ kè Karais. Okikpọ ema, ekibelek ata Ebi Eyi Karais. Uwu uriaak kiban̄ ekibe ke ema ire Ebi Eyi Karais. Ire, omokọt iriọọn̄ inu ife chi echubọk ire. Kpa ubọk ni? Gaalek ata uwu uriaak okisan̄a isibi ata Ebi Eyi Karais ikakaan̄ ata eru mè ikiluk ata ugwem.—Fuk Matiyu 7:13-23.
3. Kpa ubọk ke obosa iriọọn̄ ata Ebi Eyi Karais?
Kpọ nu iman̄ oriọọn̄ go chi:
Ata Ebi Eyi Karais ekijeen̄ ulibi me lek Baibul kubọk ire Usem Awaji. Ema ekisa ikekiluk igọọk onineen̄ kan̄. Eya orọ, ata uwu uriaak ikup esese me lek uwu uriaak eyi oyaka lek imaan̄ me lek nkeek eyi ebilene. (Matiyu 15:7-9) Ata Ebi Eyi Karais kpekitumu inu ge mè iyaka ikirọ ofifi inu.—Fuk Jọn 17:17; Timoti Eyi Oso Iba 3:16, 17.
Ata Ebi Eyi Karais ekimin erieen̄ Awaji, Jioba. Jisọs imin erieen̄ Awaji sa me irọrọ ibe ebi ene eriọọn̄ erieen̄ Awaji. Itap ubọk irọ inyi ebi ene eriọọn̄ Awaji mè ijeen̄ ema ubọk ebekibeek me uriaak ibe erieen̄ Awaji ikup me mbuban. (Matiyu 6:9) Me ere olukbe, uwu uriaak owa okirọ ibe eriọọn̄ erieen̄ Awaji?—Fuk Jọn 17:26; Ebi Rom 10:13, 14.
Ata Ebi Eyi Karais ekitumu mkpọ ofolek Ama Ubọọn̄ Awaji. Awaji iria Jisọs ibe inilook ata etip ofolek Ama Ubọọn̄. Ama Ubọọn̄ gaalek ore ukpọchieen̄ ebilene. Ire etip Jisọs otetbe lek inye ikilook mege ikwube. (Luk 4:43; 8:1; 23:42, 43) Ibe ke ebi udun̄ kan̄ si melook etip Ama Ubọọn̄ yi. Ire ikaan̄ ogwu onu me lek kwun̄ mè ikinikpa inu ofolek Ama Ubọọn̄, uwu uriaak eyi owa ke okeek ibe ke inan̄a?—Fuk Matiyu 24:14.
Ata Ebi Eyi Karais kpere okpọkọ ge me lek inyọn̄ ikpak keyi. Omokọt iriọọn̄ ema mije ema kpekitap lek me lek rumurumun̄ mkpulu miya ire inu afa. (Jọn 17:16; 18:36) Isọkọ me lek si, kpekiluk ugwem kiban̄ igọọk me lek ubọk inyọn̄ yi okiweek.—Fuk Jemis 4:4.
Ata Ebi Eyi Karais ekikaan̄ ima osisibi esese me lek ge ge. Inan̄a me emen Baibul, ke ema ekikween̄ ijejeen̄ ulibi me lek ebi ife geelek. Ubọk geelek irebe ibe ke uwu uriaak ataak ikukup me mgbọ geelek ikigọọk ibieen̄ akọn̄ me ido geelek inye, ata Ebi Eyi Karais mijit ikekigọọk irọ ikeya. (Maika 4:1-3) Kpan̄asi ikeya, ata Ebi Eyi Karais ekisa mgbọ mè mkpọ nkaan̄ kiban̄ ikisa itap ubọk inyi ebi ufi ife mè ikisa itap ebi ene efuuk me emen.—Fuk Jọn 13:34, 35; Jọn Eyi Adasi 4:20.
4. Ire omokọt iriọọn̄ ata uwu uriaak yi ni?
Ire uwu uriaak owa okijeen̄ inu inan̄a me emen Usem Awaji, ikimin erieen̄ Awaji, mè ikijeen̄ ibe ke Ama Ubọọn̄ Awaji gaalek obonyan̄a ebilene? Ebi owa ekijeen̄ ima mè ikijit akọn̄? Nkeek kwun̄ ye?—Fuk Jọn Eyi Adasi 3:10-12.