Keke Orọ Obobaalek Ikup Inye?

1. Ike owa ke obosa ikaan̄ oruru sa me ikukup inye ikikween̄ Baibul?

Kpunu che che, ibe ke okpan okpan ijejeen̄ echi Baibul chi eji ejebe itibi irọ inyi ima kwun̄ me lek Jioba inye. Omotet lek inye mè ikisisaak ikwaan̄ ifuna ima kwun̄ ikinye. (Pita Eyi Adasi 2:2) Ukpọchieen̄ kwun̄ me lek ugwem ikakaan̄ge itata iyaka imaan̄ me lek ubọk okisa ijuuk lek iriaak me lek Awaji sa me ikekifuk Baibul.—Fuk Jọn 17:3; Judu 21.

Ike okikaan̄ iriọọn̄-inu iwa melek Awaji, ichechieek kwun̄ moriọọn̄ ikinye si. Ichechieek motap ubọk inyi owu ifuna okorọ ejit Jioba ikibele. (Ebi Iburu 11:1, 6) Motap ubọk irọ ogwu okom mè onwene ubọk iluk ugwem kwun̄ eyi obosibi owu oruru.—Fuk Ikwaan̄ Ebi Otuchieen̄ 3:19.

2. Kpa ubọk ke iriọọn-inu okaan̄be ofolek Awaji obosa isibi oruru inyi ebi ufi ife?

Me atikọ, omoma ikpakpa inu okween̄be inyi ebi ufi ife​—otutuuk kiji ekekinwọọn̄ ilolook ebi ene ata etip. Ike otetbe lek inye ikikween̄ Baibul, omokween̄ ubọk obokisa atikọ echi okup me Baibul ikisa ikpa nchieek kwun̄ me lek Jioba mè ata etip iwele.—Fuk Ebi Rom 10:13-15.

Owuwa ene ekibene ilook ebi unene miya ire ebi ototun̄ ukan̄ kiban̄ ata etip.Kpan̄asi obotumu inyi ema ibe inu ema echieekbe me lek ilọ, sa me iriọọn̄-inu, kpa inu ofolek use Awaji ochieekbe nyi ema. Isọkọ me lek si, kawuuk ibe owuwa mgbọ eru kwun̄ okinin̄ chieen̄ ebi ene igak inu okebitumu.—Fuk Timọti Eyi Òso Iba 2:24, 25.

3. Mbet lek mgbaan̄je okukup ke obokọt inwọọn̄ melek Awaji?

Ikekikween̄ Usem Awaji motap ubọk irọ me onye me irek emen ekwukwu. Ike okirọ ikeya, mgbaan̄je kwun̄ melek Jioba mokinye. Omokana ge melek ebi ototun̄ ukan̄ kan̄.—Fuk Ebi Kọrint Eyi Òso Iba 6:18.

4. Ike owa ke obokọt ikup inye ikikaan̄ nje inyi-isi?

Omokọt ikikaan̄ nje inyi-isi me irek emen ekwukwu sa me ikekikween̄ Usem Awaji. (Ebi Iburu 5:13, 14) Be ogwu Ata-Ikọ Jioba ge inikisa ikpa What Can the Bible Teach Us? Isa ikigọọk owu isun̄ nkween̄mkpọ Baibul. Ike okebikween̄ Usem Awaji idọk, ikeya si ke obokirọ inu itet me ugwem kwun̄.—Fuk Okwa Itọn̄ 1:1-3; 73:27, 28.

Ata etip yi inan̄a me ubọk Jioba, Awaji okibebele ejit. Omokọt itaba lek iriaak me lek Awaji sa me itataba lek iriaak me lek ebi eyi kan̄. (Ebi Iburu 10:24, 25) Sa me ikekitap efuuk ikirọ me ejit Jioba ikibele, omokaan̄ ugwem ikakaan̄ge itata. Ijujuuk lek iriaak me lek Awaji ore inu onwọnwọn ichit obokọt irọ.—Fuk Timọti Eyi Adasi 1:11; 6:19.