Jioba Igobo Josuwa

Mosis isa ebi Ijeren ije me ogbogbo acha, ire, mgbọ mkpa kan̄ okigbet. Jioba otutumu inyi Mosis ibe: ‘Ikare owu obosa ebi Ijeren isi lek ijọn̄ echieekbe me use. Ire, masa owu ijeen̄ ijọn̄ ya.’ Mosis obebe me Jioba igobo ofifi ogwu obokpọ chieen̄ me lek ebi Ijeren. Jioba otutumu inyi ọmọ ibe: ‘Si tumu nyi Josuwa ibe ke ire ọmọ obosa ebi Ijeren ije.’

Mosis otutumu inyi ebi Ijeren ibe ke ọmọ mokwu sọnja mgbọ, ke Jioba igobo Josuwa ibe isa ema ije isi lek ijọn̄ echieekbe me use ya. Mosis otutumu inyi Josuwa ibe: ‘Katet ukpook, ke Jioba motap ubọk inyi owu.’ Sọnja mgbọ iraraka, Mosis onenene isi inyọn̄ ogoon̄ Nebo, Jioba osasa ọmọ ijeen̄ lek ijọn̄ ichieekbe use isasa inyi Ebereyam mè Ajiki mè Jekọp. Mosis iluk efit acha ge mè akọp iba mè ikwu.

Jioba otutumu inyi Josuwa ibe: ‘Saba okwaan̄ Jodan, mè je si Kenan. Ke matap ubọk inyi owu ike ntapbe ubọk inyi Mosis. Kifuk ikan n̄a usen geelek, mè katet ukpook. Kaan̄ unye-ejit, mè je si rọ inu geelek mbe me owu orọ.’

Josuwa oraria ene iba ibe esi ekpọ ama Jeriko. Me ofifi ibot usem, eji mekween̄ inu obọbọkọ irek igbaalek. Mgbọ ema egwube ikom ika, ema etutumu ibe ke inwọn isisi Kenan me mgbọ ya. Me ofit iwele kan̄, Josuwa otutumu inyi ebi Ijeren ibe ekpulu otutuuk mkpọ kiban̄. Inenitumu inyi ebi ngwugwa ikiben okop inyan̄a-ibot ibe eje me isi enin̄ emen okwaan̄ Jodan. Mun̄ okwaan̄ ya ikibabaak. Ire, mgbọ yaage ebi ngwugwa cha ejiin̄be ukot me emen mun̄ ya, mun̄ ya okekeke, mè ibene ikita. Ebi ngwugwa cha ejeje ire eden̄ okwaan̄ ya mè ikeke, otutuuk ebi Ijeren ejeje isaba okwaan̄ ya. Ire okeek ibe ke inu ukechieen̄ yi mokeek ema inu orọrọ me okwaan̄ Anyiaan̄ ni?

Me ota kan̄, mgbọ owuwa acha orakabe, ebi Ijeren erere lek ijọn̄ echieekbe me use ya. Ema mekọt inama uwu mè iwop chieen̄ mfut uti geelek. Ijọn̄ ya ire ata ijọn̄ okisibi anam mè mfut uti.