Jonatan Ogwu Okakaan̄ Unye-Ejit mè Igbe Utoon̄-Ejit

Jonatan adasi gwun̄ enerieen̄ Sọọlu ire ogwu onyenye ejit. Debit itumu ibe ke Jonatan ikigwat kubọk igo mè inye lek igak egbe atat. Usen ge, Jonatan imun̄ akọp ebi akọn̄ Filisia iba me inyọn̄ ogoon̄, mè itumu inyi ogwu okiben akpa igọọk ọmọ ibe: ‘Ire Jioba inyi eji inu oriọọn̄, eji mesi itim etim melek kiban̄, orere, ire ebi Filisia igwen eji ibe eji enu, eji meriọọn̄ ibe ke eji mesi itim akọn̄ melek kiban̄.’ Ebi Filisia etataan̄ ukpo itumu ibe: ‘Inu me eji etim etim!’ Jonatan mè ogwu melek kan̄ enenene inyọn̄ ogoon̄ ya isi igọọk ebi akọn̄ cha itim etim mè itim igak ema.

Mije Jonatan orebe adasi gwun̄ enerieen̄ Sọọlu, ke ore ọmọ mobọkọ irek ubọọn̄ ogwu ute. Jonatan iriọọn̄ ibe ke Jioba igobo Debit ibe ire ubọọn̄, ire, ikakaan̄ mba-ejit me lek Debit. Jonatan mè Debit mikana ata unene mè ichieek lek kiban̄ use ikekibem ge ge. Jonatan inyi Debit ofọnti, oge akọn̄, ogbaan̄ mè fanti kan̄ kubọk ire mkpọ oriọọn̄ inyi unene kiban̄.

Mgbọ Debit okilibi inan̄a me lek Sọọlu, Jonatan osisi lek kan̄ mè itumu inyi ọmọ ibe: ‘Tet lek nye, mè kat ejit. Jioba igobo owu ibe ore ubọọn̄. Sọọlu nte n̄a iriọọn̄ eyi ijaan̄ si.’ Ire omoma ikakaan̄ ata unene obet lek Jonatan ni?

Jonatan itap ugwem kan̄ me ufe owuwa mgbọ isasa itap ubọk inyi Debit ogwu unene kan̄. Iriọọn̄ ibe ke ogwu ubọọn̄ Sọọlu ikiweek ikpakpan̄ Debit, ọmọ orọ, itutumu inyi ogwu ute ibe: ‘Ikanwọn ibe okpan̄ Debit mije, ikarọ owu inu geege ilọ.’ Sọọlu onanaan̄ ejit enenen inyi Jonatan. Acha inen mè inen iraraka, Sọọlu mè Jonatan ekwukwu me akọn̄.

Mgbọ Jonatan okwube iraka, Debit okekiweek Mefiboset gwun̄ Jonatan. Mgbọ imun̄be, itutumu inyi Mefiboset ibe: ‘Mije nte kwun̄ orebe ata ogwu unene n̄a, makpọ owu chieen̄ me lek me otutuuk usen ugwem kwun̄. Owu moluk me uwu ubọọn̄ n̄a mè ikigọọk emi irie inorie me lek ikasi n̄a.’ Debit ikawuuk Jonatan ogwu unene kan̄.