Ikpa Akpalek Okikpọ Ntitiin̄ Ogebe

Bọn Ute Irieen̄ mè Ibaan̄:

Kubọk ebi ikitọbọ ebum inyi Jioba, eji mima Usem kan̄ Baibul. Eji michieek inye ibe ke Baibul iben mfufuk otatat, ntọ-ubọk isasa iluk ugwem eyi ebekọt itoon̄ ejit me lek, mè inu okijeen̄ ibe ke Jioba ima ototun̄ ukan̄ kan̄ okup me isijọn̄ yi. (Okwa Itọn̄ 119:105; Luk 1:3; Jọn Eyi Adasi 4:19) Eji michubọk ikaan̄ ulọk itatap ubọk inyi ebi ofifi ife ibe enekween̄ atikọ okup me unye otu ewe okup me emen Baibul. Eya orọ, eji mibele ejit isasan̄a ikpa yi Inu Obokọt Ikween̄ me Emen Baibul isibi. Kè eji ekpa enyi enyi-nu sọntiik mkpọ ofolek ikpa yi.

Ekaan̄ nsabọn me nkeek isa ineen̄ agan̄ ilile me lek ikpa yi. Ire, mekọt isa itap ubọk inyi ebi ugane ikakaan̄ ulọk ikwekween̄ Baibul igbaalek. Eyi irebe si ibe ke Baibul ire ikpa okup inyi otutuuk ene, kpunu cheche ibe ke otutuuk kiji mekaan̄ oruru inan̄a me lek inu nkween̄ okup me ikpa yi, echi obotap ubọk irọ inyi eji ekekaan̄ ata ubelejit.

Ikpa yi iben ukpatu ofolek ebilene bene me ibebene inyi isi igọọk me lek mfufuk okup me Baibul. Mitap efuuk ikpa mfufuk Baibul chi me oniin̄ osisibi utoon̄ ijaan̄ mè ikup me mfufet, mikpa si ubọk isabe ibọkọ irek.

Ikare mfufuk Baibul gaalek ke ikpa yi oben. Usem mè ogugo echi esabe irọ mkpọ me ikpa yi irọ inyi mfufuk Baibul isibi utoon̄ mè ijeen̄ si ubọk inu osabe ikup me lek ebi ekikpa mkpọ ofolek.

Ikpa yi ikikpa mkpọ ofolek ebi ene me Baibul​—ebi isisiki ibot inyi Jioba mè ebi kpesiki ibot inyi ọmọ. Ikpa si mkpọ eji ebekọt ikween inan̄a me lek akpat ukot kiban̄. (Ebi Rom 15:4; Ebi Kọrint Eyi Adasi 10:6) Eche ikpa yi itap me akọp mè okpọkọ ini. Me ibebene okpọkọ chi ge ge, mikpa me mgbidim usini inu nkween̄ eji ebekọt ikween̄.

Ire owu ire ute mè iyaka ire uga, omokọt ifuk inu nkween̄ ge mè ikpa ogugo okup me inu nkween̄ ya melek gwun̄ kwun̄. Enyi mekọt ifuk ere Baibul ebenbe inu nkween̄ ya. Tap ubọk rọ inyi gwun̄ kwun̄ imun̄ ubọk inu ifukbe me Baibul osabe ikaan̄ mgbaan̄ me lek inu nkween̄ ya. Ubọk yaage si ke ebesa itap ubọk inyi ebi ugane ibe ekween̄ etip okup me Baibul.

Ire ikpọchieen̄ kiji ibe ke ikpa yi motap ubọk inyi nsabọn mè ebi ugane ebi ikakaan̄ ata ejit ekọt ekween̄ mkpọ enan̄a me Usem Awaji mè etap inu nkween̄ cha me ikwaan̄ me ugwem kiban̄. Sa me ikeya, ema si mekọt ikitọbọ ebum inyi Awaji kubọk ebi ototun̄ ukan̄ kan̄ imabe.