INU NKWEEN̄ 42
Keke Ke Baibul Otumu Ofolek Ikukup Agaga mè Mbat-Olom?
Me usini orọmijọn̄, ebi ene echieek ibe ke ene ibokaan̄ ubelejit gaalek ire ikaan̄ olom mè iyaka ire nwa. Ire, ikare otutuuk ebi ikakaan̄ olom mè iyaka ire nwa ekibele ejit. Ikare si otutuuk ebi ikup agaga kpekibele ejit. Atikọ ire, Baibul igwen mbat-olom mè ikukup agaga uche onan̄a me ubọk Awaji.
1. Keke ore usini oruru okup me lek ikukup agaga?
Baibul ibe: ‘Ogwu òdodo nwa irọ inwọn, ire, ogwu okup agaga orọ inwọn igak.’ (Fuk Ebi Kọrint Eyi Adasi 7:32, 33, 38.) Me oniin̄ okukup ke ogwu okup agaga osa irọ inwọn igak ni? Ebi eyi Karais ikup agaga kpekaan̄ akpan ikwaan̄ ikpọkpọ chieen̄ me lek nlom mè iyaka ire nwa kiban̄. Eya orọ, ema mikaan̄ irek irọrọ owuwa mkpọ. Kubọk inu njeen̄, usini kiban̄ mikiwele owot ikwaan̄ uko kiban̄ me esese esese oniin̄, kubọk ikọkọp uran̄ isi ofifi ere isi ilook ata etip. Eyi ogak otutuuk, ema mekọt ikaan̄ owuwa mgbọ itataba lek iriaak me lek Jioba.
2. Kpasi oruru okup me lek mbat-olom eyi oje igọọk me lek ikan?
Kubọk ikukup agaga, mbat-olom si ikaan̄ oruru eyi kan̄. Baibul ibe ke “iba inwọn igak ge.” (Ogwu Etip 4:9) Eyi ichubọk ire atikọ inyi ebi eyi Karais ikisa onineen̄ Baibul irọ mkpọ me mbat-olom kiban̄. Olom mè nwa ebi ibabat ijaan̄ igọọk me lek ikan michieek imama, ijejeen̄ ulibi, mè ikekikpọ chieen̄ me lek ge ge. Mije ikeya, ema mikikaan̄ utelelek igak ebi ikpọkpọ ikigbaan̄ iluk. Mbat-olom si ikinyi ata irek isasa ikpukpo nsabọn.
3. Ike owa ke Jioba okimun̄ mbat-olom?
Mgbọ Jioba orọbe adasi mbat-olom, itumu ibe: “Enerieen̄ motele ogwu uga mè ogwu ute mè isa lek kan̄ ichim iriaak me lek ogwu nwa.” (Ibebene 2:24) Jioba iweek ibe olom mè nwa ema lek kiban̄ mè egbe utoon̄-ejit enyi ge ge me otutuuk ugwem kiban̄. Itele ibe eyaak gaalek mgbọ ene ge me lek kiban̄ isibubat. Me mbet irek okup ikeya, Jioba inyi olom mè iyaka ire nwa unye itutumu ifieek mè ire ọmọ moyaak sa ikpoyaak.a (Matiyu 19:9) Jioba ikabọkọ itap ibe ebi eyi Karais ekaan̄ nwa mè iyaka ire olom eraka ge.—Timọti Eyi Adasi 3:2.
KWEEN̄ GBAALEK
Kween̄ ubọk obokọt ikaan̄ ubelejit—mè irọ ibe Jioba ibele ejit—mè ire okup agaga sa ire okup me mbat-olom.
4. Kisa uche ikukup agaga rọ mkpọ jaan̄
Jisọs imun̄ irek ikukup agaga kubọk uche. (Matiyu 19:11, 12) Fuk Matiyu 4:23, mè igbaan̄ ikpa idodo yi:
Ike owa ke Jisọs osa irek agaga kan̄ isi ikwaan̄ inyi ogwu Ute mè isa itap ubọk inyi ebi ene ni?
Ebi eyi Karais mekọt ikaan̄ unwọọn̄ mè ire ema esa irek agaga kiban̄ irọ mkpọ ike Jisọs orọbe. Fit FIDIO yi, mè igbaan̄ ikpa idodo yi ogọgọọk.
Me oniin̄ okukup ke ebi eyi Karais ekisa irek agaga kiban̄ irọ mkpọ?
Ire oriọọn̄ ni?
Baibul ikatumu acha ene obokup sabum onokaan̄ olom mè iyaka ire nwa. Ire, itap eji efuuk me owot ibe ekup mege ‘esimin inin̄ ene’ orere, esimin iraka mgbọ olilọk ilaak okimin me emen ene mè ikirọ ufuna ene ikakirọ ata ntumu-mfieek.—Ebi Kọrint Eyi Adasi 7:36.
5. Gobo ogwu obobat jaan̄
Igogobo ogwu obobat ire ge me lek ntumu-mfieek okukup ufiak ichit eyi obokọt irọ. Fuk Matiyu 19:4-6, 9, mè igbaan̄ ikpa idodo yi:
Keke orọ igbebe ibe ogwu eyi Karais ikaran lek inin̄ mbat-olom?
Baibul mokọt itap ubọk inyi owu oriọọn̄ mkpọ oboweek me emen ogwu obobat. Eyi ogak otutuuk, week ogwu omama Jioba.b Fuk Ebi Kọrint Eyi Adasi 7:39 mè Ebi Kọrint Eyi Òso Iba 6:14. Mè igbaan̄ ikpa idodo chi:
Keke orọ igbebe ibe eji ebat ogwu eyi Karais ogbo kiji gaalek?
Ike owa ke ibokup me lek Jioba ire eji ibat ogwu ikamage Ọmọ?
Ire egbaan̄ esese chieen̄ anam iba ibọp, ema mebọkọ ukwook. Ikeya si, ogwu eyi Karais obabat ogwu ikakupbe me ntitiin̄ mokaan̄ owuwa ufialek
6. Kimun̄ mbat-olom ike Jioba okimun̄
Me Ijeren ukot ikaan̄, usini ebirieen̄ mikiyaak nwa kiban̄ me oniin̄ ikagbege. Fuk Malakai 2:13, 14, 16, mè igbaan̄ ikpa idodo yi:
Keke orọ Jioba ochabe iyayaak olom mè iyaka ire nwa me oniin̄ ikatatge me lek Baibul?
Barabat mè iyayaak ikisa ukwook ijet ogwu erọbe ikeme mè nsabọn kiban̄
Fit FIDIO yi, mè igbaan̄ ikpa idodo yi ogọgọọk.
Ire obat ogwu ikakupge me ntitiin̄, keke ke oborọ inyi mbat-olom kwun̄ ikije ijaan̄?
7. Sa onineen̄ Jioba ofolek mbat-olom sa rọ mkpọ
Ene isasa onineen̄ Jioba irọ mkpọ me mbat-olom iweek unye efuuk.c Ire, Jioba ikigbana ebi ikisa onineen̄ kan̄ irọ mkpọ. Fit FIDIO yi.
Fuk Ebi Iburu 13:4, mè igbaan̄ ikpa idodo chi:
Ire onineen̄ Jioba ofolek mbat-olom ijeen̄ iriọọn̄-inu ni? Keke orọ ofọọkbe ikeya?
Jioba iweek ibe ebi eyi Karais etap mbat-olom mè iyaak-olom kiban̄ me ikpa, me owuwa ido, ire ebi mkpulu ekinyi ikan ofolek ubọk ebesa irọ eyi. Fuk Taitọs 3:1, mè igbaan̄ ikpa idodo yi:
Ire okaan̄ olom mè iyaka ire nwa, ire otap mbat-olom kwun̄ me ikpa me ubọk ebi mkpulu ni?
IRE ENE IDO IBE: “Keke orọ ebedo nwa? Ire ene iba kpekọt igbaan̄ iluk ikeya ni?”
Obofọfọọk?
ME MGBIDIM
Ikukup agaga mè mbat-olom ire uche onan̄a me ubọk Jioba. Geelek me lek kiban̄ mokọt isa unwọọn̄ mè ujot owot ijet ene, mè ire esa irọ mkpọ ike Jioba oweekbe.
Idodo
Ike owa ke ene obokọt isa irek agaga kan̄ irọ mkpọ ijaan̄?
Keke orọ Baibul obe mè eji ebat ogwu eyi Karais ogbo kiji gaalek?
Keke ke Baibul otumu ibe ke ire inu obokọt irọ ibe olom mè nwa eyaak?
WEEK
Keke ke isibi ibabat ogwu “ochechieek me lek kè Karais gaalek”?
Kpọ fidio iba obotap ubọk inyi owu orọ ata ntumu-mfieek ofolek ogwu obogobo ibabat mè ofolek mbat-olom.
Kween̄ inu orọrọ gwun̄ ute ge okikeek ibe ke inu Jioba onyibe ọmọ iwa igak otutuuk inu ijuukbe itele.
Keke ore usini mkpọ ene obokeek mkpọ ofolek sabum onokeek iyayaak mè iyaka ire icheche lek ni?
“Honor ‘What God Has Yoked Together’” (The Watchtower, December 2018)
a Kpọ Inu Egebe Me Agan̄ Ota 4 ofolek icheche lek mgbọ ene geege ikabubat.
b Me usini orọmijọn̄, ire uga mè ute ekigobo nwa mè iyaka ire olom inyi nsabọn kiban̄. Me irek okup ikeya, uga mè ute imama nsabọn kiban̄ kpebesa ulọk ikpoko mè iyaka ire irek ene isa igobo nwa mè iyaka ire olom inyi nsabọn kiban̄, kpan̄asi ikeya, ema megobo ogwu omama Jioba.
c Ire okigọọk ogwu okadobe mè iyaka ire ogwu ikado owu iluk, ire owu obotumu ifieek mè ire omobat ene ya sa omotele ene ya.