Ikpa Okikpa Nkween̄mkpọ Ugwem Mè Ikwaan̄ Kiji Kubọk Ebi Eyi Karais
ONYAN̄ JEETA 5-11
INU UNYE OTU EWE OKUP ME USEM AWAJI | Timoti Eyi Òso Iba 1-4
‘Awaji Ìkanyi Eji Ekwukwu Eyi Ukpook Owot’
(Timoti Eyi Òso Iba 1:7) Mije, Awaji ìkanyi eji Ekwukwu eyi môrọbe inyi eji ere ebi ukpook owot. Awaji ìnyi eji Ekwukwu eyi mônyibe eji unye mè imumechieen̄, mè irọ inyi eji ekekọt etet lek kiji ekaan̄.
w09 5/15 15 ¶9
Ebi Ijija—Irọ Me Nje-Nnyi-Isi Kinyi Isibi Utoon̄
9 Pọọlu itap ubọk inyi Timoti sa me ikekeek ọmọ ibe: ‘Awaji ìkanyi eji Ekwukwu eyi môrọbe inyi eji ere ebi ukpook owot. Awaji ìnyi eji Ekwukwu eyi mônyibe eji unye mè imumechieen̄, mè irọ inyi eji ekekọt etet lek kiji ekaan̄.’ (2 Tim. 1:7) ‘Itetet lek ikaan̄’ igọbọ ikọkọt ikisa me iriọọn̄-inu ikikeek inu mè ikigwu nkeek ikom me lek. Igọbọ si ikọkọt ikirọ inu igọọk me ubọk ikupbe—ikare ike oweekbe ibe ikup. Usini ebi asasa kpekaan̄ iriọọn̄-inu, ekijeen̄ ekwukwu eyi ukpook owot mè ekeweek ifafala irek sasaak sa me ikekilaak ilaak ilọ mgbọ, ikikpọ TV, ikinwọ ijọ ugwun̄ mè iyaka ire ikinwọ miin̄ isa, ikiinwọọn̄ lek mgbọ geelek, mè ikibubat. Eteme ebi eyi Karais ibe “ejit ugwem ekariọọn̄ge Awaji, mè ejit si ijo ulọk eyi utop linyọn̄, mè nkeek onwọnwọn, mè ekeluk ugwem òtatat mè ikinyi Awaji umin me linyọn̄ keyi”—Taitọs 2:12.
(Timoti Eyi Òso Iba 1:8) Eya orọ, kalibi esip me itutumu ikọ ofolek Okaan̄ kiji, kalibi si esip mije n̄a ogwu òkup me mkpọn mije kan̄. Sa me unye Awaji gọọk emi mun̄ ufialek mije ata etip eyi Awaji.
w03 3/1 9 ¶7
‘Tet Lek Nye mè Kat Ejit!’
7 Mgbọ Pọọlu ogebe ikpa ijet Timoti, ibe: “Awaji ìkanyi eji Ekwukwu eyi môrọbe inyi eji ere ebi ukpook owot, Awaji ìnyi eji Ekwukwu eyi mônyibe eji unye . . . Eya orọ, kalibi esip me itutumu ikọ ofolek Okaan̄ kiji.” (Timoti Eyi Òso Iba 1:7, 8; Mak 8:38) Eyi eji efukbe usem chi isan̄a, eji mekọt ido lek kiji ibe: ‘Ire nkitet esip me lek ichechieek n̄a ni, sa ire nkaan̄ unye-ejit ni? Me ere nkisi ikwaan̄ (mè iyaka ire uwu ikpa n̄a), ire ebi melek n̄a miriọọn̄ ibe ke emi ire ogwu Ata-Ikọ Jioba, sa ire nkilelet ogwu nrebe ni? Ire esip ikitetet emi, sa ire ikekibele emi ejit ikukup esese me eden̄ ebi ofifi ife mije mgbaan̄ nje n̄a melek Jioba ni?’ Ire ikaan̄ ogwu ikekilook ata etip miya ire iluluk me oniin̄ oje esese me lek otutuuk ene okiyọt me lek, ene ya ikeek nteme Jioba onyibe Josuwa: “Tet lek nye mè kat ejit.” Kawuuk ibe ke, ikare mkpọ ebi ere ikwaan̄ mè iyaka ire uwu ikpa kiji ekitumu okup me ufiak, ire ike Jioba melek Jisọs Karais ekimun̄ mkpọ.—Ebi Galesia 1:10.
Week Inu Unye Otu Ewe Okup Me Usem Awaji
(Timoti Eyi Òso Iba 2:3, 4) Gọọk eji kat ejit bọkọ ufialek kubọk ata ogwu akọn̄ kè Jisọs Karais. 4 Ogwu akọn̄ geelek òkup me akọn̄ ìkakitap lek kan̄ me lek inu ebi ekarege ebi akọn̄ ekirọ. Ulọk kan̄ mgbọ geelek ìre ikekirọ inu òbokibele ogwu ibot kan̄ ejit.
w17.07 10 ¶13
Iweweek Atata Mkpọ Ubọọn̄
13 Timoti ire ogwu okakaan̄ ichechieek. Pọọlu igwenbe Timoti “ata ogwu akọn̄ kè Jisọs Karais” mè itumu inyi ọmọ ibe: “Ogwu akọn̄ geelek òkup me akọn̄ ìkakitap lek kan̄ me lek inu ebi ekarege ebi akọn̄ ekirọ. Ulọk kan̄ mgbọ geelek ìre ikekirọ inu òbokibele ogwu ibot kan̄ ejit.” (2 Tim. 2:3, 4) Ebi udun̄ Jisọs me chereyi igọgọbọ ebi ikisi ikwaan̄ ojot mgbọ ibebelek ebi akọn̄ mè iwa iraka efie ene ge, ekitap nteme Pọọlu onyibe me ikwaan̄ igọọk me lek ike irek kiban̄ ochieekbe ibe ema erọ. Ema ekekijit olilọk mkpọ nkaan̄ melek ukeme okinan̄a me inyọn̄ okup ikana ema mije ema kpekiwuuk ibe ke: “ogwu urieek ìre usun̄ inyi ogwu ufọọk” (Urọk 22:7) Setan moma ibe eji ekesa otutuuk mgbọ mè efuuk kiji ekenyi mbubek inyọn̄ kan̄ yi kubọk ebi usun̄. Mije usini ntumu-mfieek eji merọbe, eji mekọt ikana ebi urieek mè ikup me irek usun̄ inyi ebi eji ekaan̄be urieek me owuwa acha. Ikpele uwu mè iyaka ire uji ebọkọbe ikikpe ikpoko me lek okpọkọ okpọkọ, ikpoko bọn uwu ikpa efọọkbe mè ikikpe okpọkọ okpọkọ, ikerere ido-nwa efiatbe uga ikpọkọ me lek mokọt ikana ukeme ilile. Eji esikiluk mfufet ugwem mè igele urieek melek mfufiat me ibot kiji, ikijeen̄ ibe ke eji mekisa iriọọn̄-inu irọ inu, mè ikirọ lek kiji usun̄ inyi Awaji kpan̄asi ikekire usun̄ inyi mbubek eyi linyọn̄ yi.—1 Tim. 6:10.
(Timoti Eyi Òso Iba 2:23) Je nan̄a me lek burubut igbini-ikọ ikakaan̄ge ifuk-ibot geege me emen, mije, owu oriọọn̄ ibe ke ìkisa ibaak mè etim inu.
w14 7/15 14 ¶10
Ebi eyi Jioba ‘Esan̄a Lek Kiban̄ Me Lek Ijo Inu’
10 Me chereyi, ebi eyi Jioba kpekimalek ikaan̄ ebi ikijeen̄ nlilọ ijejeen̄ me emen ntitiin̄. Ire, me mgbọ geelek eji enọbe ijejeen̄ ikajege ikike me lek Baibul, ikakaan̄ ogwu okijeen̄, more ntumu-mfieek kiji ijijit ijejeen̄ cha. Ikpojeen̄ iriọọn̄-inu ire eji ikigọọk ebi ataak ijejeen̄ igbini-ikọ, mè ire me isi mè isi, ikekifọọk otu ikọ kiban̄ me ntaneti, mè iyaka ire igọgọọk ema itumu ikọ me ofifi oniin̄. Ikerere ibe ke ire me nkeek isasa itap ubọk inyi ene ya, igọgọọk ene itumu mbet usem ya ikpoje ikike me lek ntọ-ubọk eji efukbe me emen Baibul. Kpan̄asi ikeya, kubọk ebi eyi Jioba, eji ebejijit ebi ijejeen̄ ataak.
Ifufuk Baibul
(Timoti Eyi Òso Iba 1:1-18) Emi Pọọlu, ogwu òrere ogwu otuchieen̄ kè Jisọs Karais inan̄a me nkeek Awaji, nge ikpa etip yi. Emi ìre ogwu otuchieen̄ kè Jisọs Karais bak me lek inenilook ebi ene etip ofolek ugwem eyi òkup me emen kè Jisọs Karais, eyi Awaji ochieekbe use inyinyi ebi ene. 2 Emi nge ikpa yi inyi owu Timọti, gwun̄ n̄a ogwu mmabe. Atata nnwọn mè nsan mè esuuk eyi Awaji Ute mè Okaan̄ kiji Jisọs Karais ikup inyi owu! 3 Ntọn̄ Awaji ogwu nkisa otutuuk ejit n̄a isi ikwaan̄ inyi, kubọk ebi nte nte n̄a esibe inyi me ukot ikaan̄. Nkitọn̄ ọmọ mgbọ nkitap owu me uriaak, eririeen̄ mè ikarek. 4 Ǹkiweek imumun̄ owu, inyi ǹkaan̄ unwọọn̄, mije, ǹkawuuk ito ya otobe me mgbọ mbanan̄a. 5 Ǹkawuuk ata ichechieek okaan̄be me lek kè Jisọs Karais. Lọis nga nga kwun̄ odasi ikaan̄ ojelek ichechieek yi, Yunais nga kwun̄ oyayaka inikaan̄. Mgbọ yi, nriọọn̄ ibe, me atikọ, ke ojelek ichechieek yi si òwa me emen kwun̄ okupbe. 6 Mije keyi, ǹkitap owu me ejit ibe owu òkosa uche eyi Awaji onyibe owu mgbọ ntoon̄be owu ubọk me ibot ya òsi ikwaan̄. Kachieek ibe ikpọkpọ ikup ikeya, 7 mije, Awaji ìkanyi eji Ekwukwu eyi môrọbe inyi eji ere ebi ukpook owot. Awaji ìnyi eji Ekwukwu eyi mônyibe eji unye mè imumechieen̄, mè irọ inyi eji ekekọt etet lek kiji ekaan̄. 8 Eya orọ, kalibi esip me itutumu ikọ ofolek Okaan̄ kiji, kalibi si esip mije n̄a ogwu òkup me mkpọn mije kan̄. Sa me unye Awaji gọọk emi mun̄ ufialek mije ata etip eyi Awaji, 9 ogwu ònyanyan̄a eji, mè igwen eji ibe eji eneluk ugwem òkup me mbuban. Igwen yi Awaji ogwenbe eji, ìkare mije inu geege eji erọbe. Ire, Awaji ìgwen eji mije nkeek eyi îkaan̄be me lek kiji, melek atata nnwọn kan̄ eyi înyibe eji inan̄a me lek kè Jisọs Karais, sabum enirom linyọn̄. 10 Mgbọ yi, atata nnwọn yi îsibi utoon̄ inan̄a me lek inunu ogwu Unyan̄a kiji Jisọs Karais, ogwu ònunu inikpan̄ mkpa, mè isa me ata etip kan̄ ichili ugwem ikakaan̄ge itata ibook inyi ebilene eluk, mè ekayaka ìkwu mkpa. 11 Mgbọ yi, Awaji îgobo emi kubọk ogwu ulook, mè ogwu otuchieen̄, mè ogwu ijejeen̄, ibe emi ǹkensa ata etip yi ǹkana ere. 12 Îre mije ilolook ata etip yi ikana ke nkibọkọ otutuuk ufialek chi geelek. Ire, esip geege ìkatet emi, mije, nriọọn̄ ogwu Awaji ogwu nchieekbe me lek orebe. Ejit n̄a si înye ibe ke Awaji môgbala chieen̄ ikpọ inu nsabe itap ọmọ me ubọk mege ire mgbọ òta usen ya môrebe. 13 Tet atikọ cha njeen̄be owu nye, mè kikpọ me lek sa kijeen̄ ebi ofifi ene, mè keke nye me ichechieek mè imumechieen̄ eyi eji ekaan̄be me emen kè Jisọs Karais. 14 Sa unye eyi Ekwukwu Mbuban ogwu òluk me emen kiji tet atalek inu ya eyi Awaji otapbe owu me ubọk kaan̄ nye. 15 Owu oriọọn̄ ibe ke otutuuk ebi ntitiin̄ Awaji ìkup me agan̄ Esia mîyat itele emi isan̄a kpai. Faigelọs mè Amọganis si mîgọọk ilibi iyaak emi. 16 Kè Awaji irọ ebi uwu kè Onesiferọs nsan, mije, ọmọ înu owuwa mgbọ inikpọ emi, mè inyi emi ukarajit! Ìkalibi esip ibe ke emi ǹkup me mkpọn. 17 Ire, mgbọ yaage îrebe Rom, ibebene ikijijen̄e ikana ikiweek emi, mè iniweek emi imun̄. 18 Kè Okaan̄-ene ikaan̄ nsan me lek kan̄ me òta usen ya! Owu oriọọn̄ ijaan̄ lek ubọk îsabe isi owuwa ikwaan̄, mè itap ubọk inyi emi me Efesọs.
ONYAN̄ JEETA 12-18
INU UNYE OTU EWE OKUP ME USEM AWAJI | TAITỌS 1–FILIMỌN
“Gobo Ebi Ugane Ntitiin̄”
(Taitọs 1:5-9) Ǹtele owu me achọ Keret, inyi owu òneen̄ inu geelek eji erọbe isik òsun̄ me irek. Gobo ebi ugane ntitiin̄ me ama geelek ere ntitiin̄ Awaji okupbe me achọ ya, kubọk ntumube inyi owu. 6 Ogwu ugane ntitiin̄ geelek môre ogwu ikakaan̄ge nrọ-nlọ geege me emen, mè ire si ogwu òkaan̄ nwa ge gaalek. Ebi bọn mêre ebi ìchechieek me lek kè Jisọs Karais, kpebere nsabọn unye-ibot, ebi ìkirọ inu afa afa. 7 Ofifi si, ogwu òkpọ chieen̄ me ntitiin̄ Awaji, môre ogwu ikakaan̄ge nrọ-nlọ geege me emen, mije, ọmọ ìre ogwu Awaji okanabe uwu kan̄ itap me ubọk. Ìkpore ogwu òkigumu lek, ìkpore si ogwu òkigwat lek inaan̄ ejit. Ìkpore ogwu òkinwọ miin̄ isa, ìkpore ogwu òkirọ inu afa afa. Ìkpore si ogwu òkima ikpoko ngan. 8 Kpan̄asi ikeya, ọmọ môre ogwu òkima ibọbọkọ ene itap, mè ire si ogwu òkima nnwọn. Ọmọ môre ogwu òkikọt itet lek kan̄ ikaan̄, mè ikiluk ugwem òtatat mè ikup me mbuban me isi Awaji, mè ikikọt itọ ikọ inyi lek kan̄. 9 Ọmọ môre si ogwu òtetet ikọ Awaji yi ògbegbe utoon̄-ejit inye, kubọk ejeen̄be ọmọ. Sa me ikeyi, ọmọ môkọt ikisa ata ijejeen̄ yi itap ebi ene efuuk me owot, mè ikikọt si ikeke ifaan̄ ikọ geelek ebi ìkije ikeme ijejeen̄ yi ekitumu ikeme ijejeen̄ yi.
w14 11/15 28-29
Idodo Ebi Ene Edobe
Ubọk geelek ibe ke Baibul ikakpa otutuuk ubọk ekebisa igobo ene me ike mgbọ ya, eji mimun̄ usini inu okijeen̄ ike ekebisa irọ. Erọ ibe eji eriọọn̄ ibe ke mgbọ Pọọlu mè Banabas ekebinan̄a ika me ikwaan̄ ikọkọp uran̄ ikana ikisilook ata etip eyi adasi, ‘ema mîra ikigobo ebi ugane ntitiin̄ ito ibe ekekpọ chieen̄ me lek ntitiin̄ ya, mè isa me uriaak mè ijin-otu ibene ife cha itap me ubọk Okaan̄-ene ogwu ema etoon̄be ejit me lek’ (Ikwaan̄ 14:23) Acha acha iraka, Pọọlu ogege ikpa inyi Taitọs ogwu melek kan̄ egbaan̄be ikọp uran̄ ibe: “Ǹtele owu me achọ Keret, inyi owu òneen̄ inu geelek eji erọbe isik òsun̄ me irek. Gobo ebi ugane ntitiin̄ me ama geelek ere ntitiin̄ Awaji okupbe me achọ ya, kubọk ntumube inyi owu” (Taitọs 1:5) Ikeya si, minyi Timoti, ogwu melek Pọọlu ekọpbe uran̄ isi owuwa ere, mbet unye yaage. (1 Tim. 5:22) Eyi ijeen̄ ibe ke ire ebi ikikọp uran̄ ikana isikpọ ntitiin̄ ekigobo ene, ke ikare ebi ugane melek ebi otuchieen̄ ikup me Jeruselem ekigobo ene.
Igọọk me lek akpat ukot keyi okup me emen Baibul, Akpalek Okikpọ Ntitiin̄ Ebi Ata-Ikọ Jioba me irọ unwene me ubọk ekisa igobo ebi ugane ntitiin̄ mè ebi ikitap ubọk inyi ebi ugane. Bene me adasi usen me Onyan̄ Onaan̄ge, me acha 2014, ikeyi ke eyaka ikisa igobo ene me ntitiin̄: Ogwu sekut mogbala chieen̄ ikpọ ebi ebi ugane ntitiin̄ enyibe erieen̄ me sekut ikisi ikwaan̄. Isinikpọ ntitiin̄, mosa mè iriọọn̄ ebi enyibe erieen̄ cha, ire ifet, mogọọk ema igbaan̄ isibi uko. Isigọọk ebi ugane ntitiin̄ ikpa mkpọ ofolek ebi enyibe erieen̄ cha isan̄a, ogwu sekut obogobo ebi ibere ebi ugane ntitiin̄ melek ebi ikitap ubọk inyi ema. Sa me ikeyi, onineen̄ yi inikup kubọk mbet eyi ebi adasi ukot.
Ekene okikpọ chieen̄ me lek esese esese irek okup ikeyi? Ike iwuukbe lek ikikup, ire “usun̄ ya ogwu orọriọọn̄ inu mè igbe utoon-ejit” ochubọk ikaan̄ akpan ikwaan̄ ikpukpukpo arọọn̄. (Mat. 24:45-47) Eyi igọbọ ikekiwọlọ Baibul ikpọ inan̄a me ntap-ubọk eyi ekwukwu mbuban, Inyi ekọt enyi nto-ubok ofolek ubọk ebekitap onineen Baibul me ikwaan mikikpọ chieen̄ me lek ntitiin̄ me otutuuk linyọn̄ yi. Usun̄ ogbegbe utoon̄-ejit okigobo otutuuk ebi sekut melek ebi ikikpọ chieen̄ me otu agọọk ikwaan̄. Ikeya si ke otu agọọk ikwaan̄ ge ge okitap ubọk irọ me ekọt ekegọọk ntọ-ubọk geelek enyibe. Ebi ugane ntitiin̄ ekaan̄ akpan irọriọọn̄ ubọk ikisa Baibul iwọlọ ikpọ ogwu ema enyibe erieen̄ ibe egobo me emen ntitiin̄ Awaji. Ogwu sekut okaan̄ akpan igbagbala chieen̄ iriak uriaak mè iwọlọ ebi enyibe erieen̄ ikpọ mè igobo ebi imimiin̄ isoon̄.
Week Inu Unye Otu Ewe Okup Me Usem Awaji
(Taitọs 1:12) Ògak ge, ene ge me etete ebi nriran ebi Keret îsa otu kan̄ itumu ibe ke ebi Keret ìre ife ìkikan̄ ataak mgbọ geelek; ke ema ìre ijo anam afa, mè ire si ebi ugbek, mè ebi ebek ile ìkigbaan̄ ubọk iba itap me otu.
w89 5/15 31 ¶5
Idodo Ebi Ene Edobe
Pọọlu ikagọọk isaka ebe Keret mije ibe ke ema ere ebi ofifi ido. Eji mekọt ichieek eyi ijaan̄, mije ke Pọọlu iriọọn̄ ibe ke usini ata ebi eyi Karais, ebi Awaji osabe ekwukwu mbuban kan̄ itọkọ aran̄ me ibot owa me etete ebi Keret. (Ikwaan̄ 2:5, 11, 33) Ogbogbo ebi eyi Karais owa ebi ibe kana ntitiin̄ me ‘esese esese ama ile.’ Ikerere ibe ke ebi eyi Karais chi ire ebi kpeso, eji mekọt ichieek ijaan̄ ibe ke ema kpere ebi ataak mè ebi ugbek, mè ebi ìkigbaan̄ ubọk iba itap me otu; morebe ikeya, ke ema kpemekikaan̄ nnwọn-isi kè Jioba (Ebi Filipai 3:18, 19; Ichichili 21:8) Kubọk eji ekimun̄ me otutuuk ido me chereyi, ebi ikakaan̄ ata ejit omowa me Keret, ebi ikifieek ejit mije ijo irọrọ ema ekebimun̄ mè ibem lek iluluk igọọk ata etip ema enọbe.—Ijikien 9:4; kpọ si ikpa Ikwaan̄ 13:48.
(Filimọn 15, 16) Kpọkpọ mọnọ ibe, usini mgbọ, ke Onesimọs ìnan̄a itele owu sọnja mgbọ, inyi owu òyaka òkpọk òkaan̄ ọmọ òre mgbọ geelek. 16 Mgbọ keyi, ọmọ ìkayaka ìre usun̄ ofifi, ọmọ îbene igak usun̄. Me mgbọ yi, ọmọ îkana atata gwun̄ Nte me emen kè Karais. Ọmọ îkaan̄ oruru inyi emi enenen. Ire, môkaan̄ oruru igak ikeya inyi owu, kubọk ogwu usun̄, mè ikaan̄ si oruru inyi owu kubọk atata gwun̄ Nte me emen Okaan̄-ene.
w08 10/15 31 ¶4
Inu Okup me Ikpa Egebe Ijet Taitọs, Filimọn, melek Ebi Iburu
15, 16—Keke orọ Pọọlu ikabe me Filimọn itele Onesimọs inyi ikaan̄ lek kan̄? Pọọlu iweek igwugwuun̄ chieen̄ me lek ikwaan̄ ‘ilolook ata etip ama ubọọn̄ Awaji mè ijejeen̄ ebi ene inu ofolek Okaan̄-ene Jisọs Karais’. Eya orọ, ikaweek itatap lek me lek inu okimọnọ irek, kubọk inu osilek ebi usun̄.—Ikwaan̄ 28:31.
Ifufuk Baibul
(Taitọs 3:1-15) Keek otutuuk ebi ntitiin̄ Awaji ibe ekesiki ibot enyi ebi ibot geelek ema ekupbe me irak, mè ekesiki ibot si enyi ebi ibot mkpulu eyi ido kiban̄. Tumu nyi ema ibe ekegban̄ utọn̄ enyi ebi ibot chi, mè ekekup me mbem-lek irọrọ inu geelek ònwọnwọn. 2 Teme ema ibe ekatumu ene geege ìfiat, eluk me esuuk melek ene geelek. Keek ema si ibe ekekaan̄ ukarajit me emen inu geelek, mè ekesiki lek me atikọ me isi otutuuk ene. 3 Me mgbọ òraraka, eji me lek kiji si mîbubut, mè ikinye ibot. Ebi ene ekekifiaan̄ eji ifiin̄, eji ekekinin̄ usun̄ inyi utop linyọn̄ keyi mè ijo ulọk geelek òkup esese esese. Me etete mgbọ ya si, usen geelek, eji ekirọrọ ene nnaan̄, mè ikikeek ene ijo me ekarọge eji inu geege ìlọ. Mgbọ ya si, eji ekekikaan̄ njijọ ejit me lek ebi ene, mè ikicha ene. Ebi ene ekekicha eji si. 4 Ire, mgbọ mgbọ okembe, Awaji Ogwu Unyan̄a kiji onenisan̄a ata ejit kan̄ mè imumechieen̄ kan̄ isibi inyi eji, 5 mè inyan̄a eji. Unyan̄a yi înyan̄abe eji, ìkare mije owuwa ata inu eji erọbe. Îre sa me ejit nsan kan̄. Awaji ìnyan̄a eji inan̄a me lek igwọgwọk eyi Ekwukwu Mbuban ogwọkbe eji, mè isa me ikeya ikpọk eji iman ayaya, mè inyi eji ayaya ugwem. 6 Inan̄a me lek kè Jisọs Karais Ogwu Unyan̄a kiji, Awaji îchili ubọk inyi eji Ekwukwu Mbuban kan̄ òjot òjot. 7 Mije keyi, mgbọ Awaji owuwuuk lek isa me lek atata nnwọn kan̄ ifeme itip-oyerebet isan̄a eji me ibot, eji mîkaan̄ ikpọchieen̄ ibe ke eji mêkaan̄ ugwem ikakaan̄ge itata me ìrot. 8 Ikọ chi ntumube inyi owu ìre atalek atikọ. Eya orọ, tet otu nye jeen̄ inu chi, inyi ebi ìchechieek me lek Awaji ekesa me otutuuk ejit kiban̄ ekerọ ata inu mgbọ geelek. Inu chi înwọn enenen, mè inin̄ oruru inyi ene geelek. 9 Ire, san̄a lek kwun̄ me lek owuwa burubut ifan̄a, mè ibaak, mè ujọn̄ọ mfufuk owot iman ebi nte nte. Kakigọọk ìwut ifan̄a ofolek Ikan kè Mosis, mije, ojelek ifan̄a chi geelek ìre inu ikike ikasibige oruru geege. 10 Ire ikaan̄ ogwu òkitap icheche lek me emen ntitiin̄, taba ene ya ubọk me utọn̄ mgbọ ge, mè taba si òso mgbọ iba. Ire ene ya ìkagwu ìkom, tele ọmọ, mè ikayaka ìgọọk enyi ìgbaan̄ ìrọ inu geege. 11 Me atikọ, ojelek ene òkup ikeya îfiat isan̄a, mije, îriọọn̄ ibe ọmọ gwa òkirọ ijo inu, mè ikpọkpọ ikirọ si ifo isi. Sa me ikeyi, ọmọ gaalek îsa ubọk kan̄ itip lek kan̄ oyerebet. Òta nteme Pọọlu onyibe Taitọs 12 Mgbọ geelek nriabe Atemas mè ìre Taikikọs inu me lek kwun̄, gwat lek na na mun̄ emi me Nikopolis, mije, ǹkiben me ejit ibe ke mâkup me ama ya me mgbọ utọọk. 13 Jenas ogwu usọ ikan, mè Apọlọs isibene ije kiban̄, mun̄ ibe ke otap ubọk inyi ema, inyi ema ekaan̄ inu geelek ema mêweekbe me oniin̄ ije kiban̄. 1 4 Jeen̄ ebi kiji geelek ibe ekesi ata ikwaan̄, mè ekesa me ikeya ekekaan̄ inorie mè inu geelek òkup ema me uyọt me usen me usen, mè ekaluk ugwem una ubọk ikwaan̄. 15 Otutuuk ebi melek n̄a ekupbe mîtọp owu amọn. Tọp otutuuk ebi unene kiji me emen ichechieek amọn nyi emi. Atata nnwọn eyi Awaji ikup inyi enyi otutuuk ene.
ONYAN̄ JEETA 19-25
INU UNYE OTU EWE OKUP ME USEM AWAJI | EBI IBURU 1-3
“Ma Irọrọ Ata Inu mè Cha Inu Ikpak”
(Ebi Iburu 1:8) Ire, Gwun̄ kan̄ ke îtumu inu ofolek ibe, “Owu Awaji, ogboon̄ ubọọn̄ kwun̄ môkup ire mgbọ ikakaan̄ge itata! Unen oyerebet ore okuba ubọọn̄ owu obokisa ikpulu ebi kwun̄.
w14 2/15 5 ¶8
Min Karais, Ogwu Ubọọn̄ Okukup Mgbugbo!
8 Me acha 1914 ke Jioba oto ogwu Gwun̄ kubọk ire Ogwu Ubọọn̄ eyi Aya Inyọn̄ me emen inyọn̄ ‘Unen oyerebet ore okuba ubọọn̄ owu obokisa ikpulu ebi kwun̄,’ eya orọ, ata ubọk irọ inu melek ubọk mkpulu kan̄ ire eyi oborọrọ iso. Ntọ ikọ kan̄ ire eyi onenen, mije ‘Awaji ore ogboon̄ ubọọn̄ kan̄.’ Eyi isibi ibe ke, Jioba otọbọ ọdọ mkpulu kan̄. Isọkọ me lek, ogboon̄ ubọọn̄ kè Jisọs “môkup ire mgbọ ikakaan̄ge itata.” Ire ikabele owu ejit ibe ke okitọbọ ebum inyi Jioba me irak Ogwu Ubọọn̄ okakaan̄ unye Awaji ogobobe ni?
(Ebi Iburu 1:9) Owu oma ata irọrọ mè icha inu ikpak. Mije keyi ke Awaji ogwu òrere Awaji kwun̄ otoon̄ owu ubọk me ibot, mè inyi owu ikpele unwọọn̄, mè inyi owu ìrek umin òbebene igak eyi otutuuk ebi melek kwun̄.”
w14 2/15 4-5 ¶7
Min Karais, Ogwu Ubọọn̄ Okukup Mgbugbo!
7 Fuk Okwa Itọn̄ 45:6, 7. Mije ibe ke Jisọs ima ata irọrọ mè icha inu geelek eyi kponyige Nte kan̄ umin, Jioba itọkọ ọmọ aran̄ me ibot kubọk ire Ogwu Ubọọn̄ Eyi Aya Inyọn̄. Jisọs ire ogwu ‘etoon̄be ubọk me ibot mè inyi umin’ igak ebi “melek” kan̄, eyi orere ebi ubọọn̄ Juda inan̄a me owot iman kè Debit. Irọrọ ire ikeya? Ibot inu ge ire ke Jioba me lek kan̄ otoon̄ Jisọs ubọk me ibot. Isọkọ me lek, Jioba itoon̄ ọmọ ubọk me ibot kubọk ire Ogwu Ubọọn̄ mè Ogwu Ibot Ngwugwa. (Itọn̄. 2:2; Iburu. 5:5, 6) Ofifi si, Jioba ikasa aran̄ itọkọ me ibot Jisọs, ire, isa ekwukwu mbuban itoon̄ ọmọ ubọk me ibot, mkpulu kan̄ si ikare me isi ijọn̄ ire, ikup me emen inyọn̄.
Week Inu Unye Otu Ewe Okup Me Usem Awaji
(Ebi Iburu 1:3) Ujamgbugbo eyi òkitoon̄ me lek Gwun̄ yi ìre ujamgbugbo eyi Awaji. Inu geelek Awaji orebe ke ọmọ ore, kpesan̄a, kpetap. Ọmọ ìkisa ikọ kan̄ eyi òkaan̄ unye ibeme otutuuk linyọn̄, inyi ikup ike îkupbe. Mgbọ îgwọkbe ijo otutuuk ebilene isan̄a, ifofo emen inyọn̄, mè isiki ikweek me irek umin mè unye, me agan̄ ubọk ulom eyi Awaji ogwu òkakaan̄ unye òchichit otutuuk unye geelek.
it-1 1185 ¶1
Image
Ire Jisọs Ichubọk Ikijeen̄ Mbet Ene Ogwu Ute Orebe Me Mgbọ Geelek Ni?
Gwun̄ okpan Awaji, ogwu oyaka inire Jisọs, ire ogwu okup me mbet ogwu ute. (2 Kọr 4:4) Eyi irere ibe ke Gwun̄ ya ke Awaji okitumu inye ibe, “Eji enerom ebilene me mbet kiji,” Gwun̄ yi ibebet lek ogwu Ute, ogwu Orom, ibene me karake mgbọ erombe Gwun̄ ya. (Ibeb 1:26; Jọn 1:1-3; Kọl 1:15, 16) Mgbọ ikupbe me inyọn̄ ijọn̄ yi kubọk ire ogwu òsoso, ijeen̄ mbet lek ene ogwu Ute orebe me oke ubọk igbebe, igọọk me irek eyi ebilene, eya orọ itumube ibe “Ene geelek òmumun̄ emi îmun̄ si Nte n̄a.” (Jọn 14:9; 5:17, 19, 30, 36; 8:28, 38, 42) Ibebet lek yi ire eyi ochubọk ikpọk mbum me mgbọ Jisọs ojomobe me mkpa mè iya ikaan̄ ugwem eyi ekwukwu mè mgbọ ogwu Ute, Jioba Awaji onyibe ọmọ “unye me lek otutuuk inu geelek òkup me emen inyọn̄, mè echi okup me linyọn̄ keyi.” (1 Pita 3:18; Mat 28:18) Eyi Awaji obebene Jisọs ifo inyọn̄ mè isun̄ ọmọ me “irek òbebene ichit,” Gwun̄ Awaji me mgbọ keyi okijeen̄ ujamgbugbo ogwu Ute me oniin̄ eyi omimin igak mgbọ ikupbe me emen inyọn̄ sabum inube me inyọn̄ ijọn̄. (Filip 2:9; Iburu 2:9) Me mgbọ keyi, “inu geelek Awaji orebe ke ọmọ ore.”—Iburu 1:2-4.
(Ebi Iburu 1:10-12) Awaji îtumu si ibe, “Bene me ibebene, owu Okaan̄-ene me lek kwun̄ otọbọ ọdọ otutuuk linyọn̄, mè isa ubọk kwun̄ irom otutuuk isinyọn̄. 11 Otutuuk inu chi mêjijaka ita kpai, ire, owu òbokpọkpọ ikup ubọk owu okupbe. Otutuuk kiban̄ mêkana oka, mè igwak ita kubọk ekwut. 12 Owu môkat ema kubọk ekwut, mè inwene ema kubọk ekinwene ofọnti. Ire, owu òkup ubọk owu okupbe, òkakinwenwene, òkakikan, òkakikwu.”
it-1 1063 ¶7
Inyọn̄
Usem okup me ikpa Okwa Itọn̄ 102:25, 26 ikup inyi Jioba Awaji, ire ogwu ikwaan̄ Pọọlu iya ikisa usem cha ikisa itumu ikọ ibak Jisọs Karais. Ire mije ibe ke okpọkpọ Gwun̄ ge Awaji okaan̄be ore Ogwu ikwaan̄ Awaji osabe irom otutuuk linyọn̄ yi. Pọọlu ijeen̄ ibe Gwun̄ ya mokup ire mgbọ geelek ire, Awaji mokọt ikat inu nrom kechilọ kubọk ute igba me agba ge, ire iweek irọrọ ikeya.—Iburu 1:1, 2, 8, 10-12; kpọ si 1 Pita 2:3, ftn.
Ifufuk Baibul
(Ebi Iburu 1:1-14) Me ukot ikaan̄, Awaji îtumu ikọ inyi ebi nte nte kiji owuwa mgbọ, me oniin̄ òkup esese esese, sa me otu ebi nriran. 2 Ire, me mgburudun̄ usen chi, Awaji ìyaka initumu ikọ inyi eji inan̄a me otu Gwun̄ kan̄, ogwu îgobobe ibe ikana ogwukaan̄ otutuuk inu geelek me ìrot. Sa me ubọk Gwun̄ kan̄ yi si ke îrom otutuuk linyọn̄ keyi. 3 Ujamgbugbo eyi òkitoon̄ me lek Gwun̄ yi ìre ujamgbugbo eyi Awaji. Inu geelek Awaji orebe ke ọmọ ore, kpesan̄a, kpetap. Ọmọ ìkisa ikọ kan̄ eyi òkaan̄ unye ibeme otutuuk linyọn̄, inyi ikup ike îkupbe. Mgbọ îgwọkbe ijo otutuuk ebilene isan̄a, ifofo emen inyọn̄, mè isiki ikweek me irek umin mè unye, me agan̄ ubọk ulom eyi Awaji ogwu òkakaan̄ unye òchichit otutuuk unye geelek. Gwun̄ Awaji îmin igak ebi osat Awaji. 4 Gwun̄ Awaji îmin enenen igak ebi osat Awaji, mije, erieen̄ eyi Awaji onyibe ọmọ, eyi òrere “Gwun̄,” îmin enenen igak eyi ebi osat. 5 Mije, ìre kpasi ogwu osat ke Awaji otumu inyi ibe, “Owu ìre Gwun̄ n̄a, cherekeyi ke emi nkana Nte kwun̄”a? Sà ìre kpasi ogwu osat ke Awaji otumu ikọ ofolek ibe, “Emi mâre ogwu Ute, ọmọ môre Gwun̄ n̄a”b? 6 Ofifi si, mgbọ Awaji oboria adasi Gwun̄ enerieen̄ kan̄ inu me linyọn̄, îtumu ibe, “Ebi osat Awaji etọbọ ebum enyi ọmọ.” 7 Inu Awaji otumube ofolek ebi osat ìre ikeyi, “Awaji îrọ inyi ebi osat kan̄ ekegwat kubọk efet, mè isa ema si irọ ebi ikwaan̄ ìkakaan̄ unye kubọk alọm ukan̄.” 8 Ire, Gwun̄ kan̄ ke îtumu inu ofolek ibe, “Owu Awaji, ogboon̄ ubọọn̄ kwun̄ môkup ire mgbọ ikakaan̄ge itata! Unen oyerebet ore okuba ubọọn̄ owu obokisa ikpulu ebi kwun̄. 9 Owu oma ata irọrọ, mè icha inu ikpak. Mije keyi ke Awaji, ogwu òrere Awaji kwun̄ otoon̄ owu ubọk me ibot, mè inyi owu ikpele unwọọn̄, mè inyi owu irek umin òbebene igak eyi otutuuk ebi melek kwun̄.” 10 Awaji îtumu si ibe, “Bene me ibebene, owu Okaan̄-ene me lek kwun̄ otọbọ ọdọ otutuuk linyọn̄, mè isa ubọk kwun̄ irom otutuuk isinyọn̄. 11 Otutuuk inu chi mêjijaka ita kpai, ire, owu òbokpọkpọ ikup ubọk owu okupbe. Otutuuk kiban̄ mêkana oka, mè igwak ita kubọk ekwut. 12 Owu môkat ema kubọk ekwut, mè inwene ema kubọk ekinwene ofọnti. Ire, owu òkup ubọk owu okupbe, òkakinwenwene, òkakikan, òkakikwu.” 13 Ìre kpasi ogwu osat ke Awaji otumu inyi ibe, “Siki kweek irek me agan̄ ubọk ulom n̄a, mege ire mgbọ mâsabe ebi ochicha kwun̄ irọ inu ibene ukot inyi owu?” 14 Ire ikeya, ìre keke ke ebi osat Awaji ere? Ema ìre ekwukwu ìkisi ikwaan̄ inyi Awaji, ebi Awaji oriabe inu ibe enesi ikwaan̄ enyi ebi mêbọkọbe unyan̄a eyi Awaji.
ONYAN̄ JEETA 26–ONAAN̄GE 1
INU UNYE OTU EWE OKUP ME USEM AWAJI | EBI IBURU 4-6
“Tap Efuuk sọkọ Efuuk inyi Onin̄ Isiki-efuuk Eyi Awaji”
(Ebi Iburu 4:1) Awaji îchieek eji use ibe ke eji mênin̄ isiki-efuuk kan̄. Use ya ìkekeke si mege inire chereyi. Eya orọ, eji egwuun̄ chieen̄ eluk ugwem me ukpook, inyi otutuuk kinyi egọọk enin̄ emen isiki-efuuk ya, mè ene geege ikalọ ininin̄.
(Ebi Iburu 4:4) Mîge inu ofolek òso egwe jaaba me ere ge me Ikpa Mbuban ibe, “Òso egwe jaaba, Awaji osisiki efuuk me lek ikwaan̄ kan̄.”
w11 7/15 24-25 ¶3-5
Isiki-efuuk eyi Awaji—Ire Keke?
3 Inu iba orọ ibe eji ekana egwook ibe ke òso usen jaaba ikukup mege ire adasi ukot Ebi eyi Karais. Adasi, gban̄ usem Jisọs otumube inyi ebi ikukup ikeme ogọt mije ibe ke igwa ene me usen Mbuban, eyi ema ebe ke ire isisi ikwaan̄ si. Okaan̄-ene itumu inyi ema ibe: “Mege inire cherekeyi, Nte n̄a ìkisisi ikwaan̄ kan̄ mgbọ geelek.” (Jọn 5:16, 17) Ibot ikọ kan̄ ye? Ekitumu ibe ke Jisọs ikisi ikwaan̄ me usen Mbuban. Ufọọk-otu kan̄: “Nte n̄a ikisisi ikwaan̄ kan̄” ofọọk otu idodo ya. Eyi orere, Jisọs ikitumu inyi ebi ikukup ikeme ọmọ ibe: ‘Nte n̄a melek n̄a ekirọ chieen̄ ikwaan̄ yaage. Eyi irere ibe ke Nte n̄a ikpọkpọ ikirọ ikwaan̄ me usen Mbuban̄ kan̄ eyi oben obop obop acha, ikalọ si ibe nkup nnye nkesi ikwaan̄, ikerere me usen Mbuban.’ Eyi orere, Jisọs ikitumu ibe me inyọn̄ ijọn̄, ke usen Mbuban ilile eyi Awaji obosiki efuuk, òso usen jaaba, ikatata me usen kan̄.
4 Òso mkpọ iba, ire inu ogwu ikwaan̄ Pọọlu otumube. Mgbọ ikitumu mkpọ okup me emen ikpa Ibebene 2:2 ofolek isiki-efuuk Awaji, Pọọlu isa me unye ekwukwu mbuban itumu ibe: “Îre eji ebi ìkakaan̄ ichechieek ekinin̄ isiki-efuuk eyi Awaji.” (Iburu. 4:3, 4, 6, 9) Isibi ibe ke òso usen jaaba ya ikup ire ukọt kè Pọọlu. Ujọn̄ọ mgbọ okukup ke usen isiki-efuuk ya obore?
5 Inyi eji efọọk idodo ya, eji mekeek mkpọ orọrọ òso usen jaaba ya obak lek ikup. Ikpa Ibebene 2:3 ikpa iwele inu irebe: “Awaji ogbagbana òso usen jaaba mè isun̄ usen ya me mbuban.” Usen ya ire usen ‘mbuban’—eyi Jioba osun̄be me utana mè iyaka ire isun̄ esese—inyi isa irọ nkeek kan̄ iso. Nkeek ya ire kisi ebirieen̄ mè ebibaan̄ ebi isisiki ibot ibi ibekpọ chieen̄ me lek ijọn̄ mè otutuuk inu oluk ugwem ekaan̄ inyọn̄ ijọn̄ yi. (Ibeb. 1:28) Kisi nkeek yi irọ iso orọ inyi Jioba melek Jisọs Karais, “Ogwukaan̄ Usen Mbuban,” ‘ekup enye ekisi ikwaan̄ ere cherekeyi.’ (Mat. 12:8) Usen isiki-efuuk Awaji ibokukup mege nkeek itọnọlek isun̄ usen ya morọbe iso me mgbọ Obop Acha eyi Mkpulu kè Karais mosobe.
(Ebi Iburu 4:6) Ebi ìdadasi inọ ata etip ya kpenin̄, mije una ichechieek kiban̄. Ire, ebi ene mênin̄ si emen isiki-efuuk ya.
w11 7/15 25 ¶6
Isiki-efuuk eyi Awaji—Ire Keke?
6 Awaji iriọọn̄ ubọk itumu nkeek kan̄ isibi inyi Adam mè Îfu, ire, ema ejijit iluluk igọọk. Me atikọ, Adam mè Îfu ere adasi ebilene ebi ikpakpaka ibot. Karakeya, efie efie ebi ene mikpaka ibot si. Ikerere ebi Awaji ogobobe, ebi Ijeren, mikpaka ibot si. Ikeya si, Pọọlu itaba ebi eyi Karais me adasi ukot ubọk me utọn̄ ibe ke usini kiban̄ mekọt irọ mbet inu yaage kubọk ebi Ijeren me ukot ikaan̄. Ige ibe: “Eya orọ, eji otutuuk ene enye lek ekwukwulu, inyi eji enin̄ isiki-efuuk ya. Ene geege me etete kiji ikanye ibot, mè ìnan̄a ìrọn̄ kubọk ebi nte nte kiji erọbe, mè ilọ ininin̄ isiki-efuuk ya.” (Iburu. 4:11) Riọọn̄ ibe ke Pọọlu isa ikpakpaka ibot itọbọ iriaak me lek ilọlọ ininin̄ isiki-effuk eyi Awaji. Eya isibi keke inyi eji? Ire ke eji mikpaka ibot inyi Awaji me oniin̄ geelek, ire eji mekọt ilọ ininin̄ isiki-efuuk Awaji ni? Me atikọ, ikup me ufiak enenen ibe eji ekaan̄ ufọọk-otu enyi idodo ya, eji mekween̄ igbaan̄ si. Me mgbọ keyi, ke eji ekpọ nu inu eji ebekọt ikween̄ ofolek ininin̄ isiki-efuuk eyi Awaji sa me ikweween̄ ijo akpat ukot ebi uwu Ijeren.
(Ebi Iburu 4:9-11) Eya orọ, ikọ yi ìsibi ibe ke isiki-efuuk òwa si inyi ebi eyi Awaji. Isiki-efuuk ya ìre ojelek eyi Awaji okaan̄be me òso egwe jaaba, mgbọ îrombe otutuuk inu isan̄a. 10 Ene geelek òninin̄ emen isiki-efuuk eyi Awaji môsiki efuuk me lek ikwaan̄ kan̄, kubọk Awaji osikibe efuuk me lek ikwaan̄ kan̄. 11 Eya orọ, eji otutuuk ene enye lek ekwukwulu, inyi eji enin̄ isiki-efuuk ya. Ene geege me etete kiji ikanye ibot, mè ìnan̄a ìrọn̄ kubọk ebi nte nte kiji erọbe, mè ilọ ininin̄ isiki-efuuk ya.
w11 7/15 28 ¶16-17
Isiki-efuuk eyi Awaji—Ire Keke?
16 Usini ebi eyi Karais me cherekeyi ebekibe me ekesun̄ Ikan kè Mosis inyi mekaan̄ unyan̄a. Usem Pọọlu otumube inyi Ebi Efesọs inan̄a me unye eyi ekwukwu mbuban ire eyi ochubọk isibi utoon̄: “Mije, Awaji ìsa me atata nnwọn kan̄ inyan̄a enyi, bak me lek enyi echieekbe me lek kè Karais Jisọs. Awaji ìkanyan̄a enyi mije ebi enyi erebe. Unyan̄a yi ìre uche Awaji oche inyi enyi me ikike. Ìkanan̄a mije ikwaan̄ geege enyi esibe, inyi ene geege ikakọt ìsa ìgugo lek.” (Efes. 2:8, 9) Ebi eyi Karais ininin̄ isiki-efuuk eyi Awaji, isibi keke? Jioba isan̄a òso usen jaaba ya—usen isiki efuuk kan̄—isun̄ esese inyi isa irọ nkeek ikaan̄be inyi inyọn̄ ijọn̄ yi iso me oniin̄ obonyi ọmọ itọn̄. Eji mekọt inin̄ emen isiki-efuuk kè Jioba—mè iyaka ire, igọọk ogọt ikup me isiki-efuuk kan̄—sa me ikekisiki ibot mè ikigọọk irọ nkeek kan̄ iso kubọk ntitiin̄ kan̄ okebikpọk mbum inyi eji.
17 Ofifi, ire eji kpekisa nteme eji ekibọkọ inan̄a me ubọk usun̄ ogbegbe utoon̄-ejit mè iriọọn̄ inu igwen mkpọ, mè igobo ikekirọ mkpọ me lek kiji gaalek, eji mere ebi kperiọọn̄ge nkeek Awaji okebichili ijeen̄ eji. Eyi mokọt ifiat ata mgbaan̄ nje kiji melek Jioba. Me ofifi ibot usem, eji mekween̄ usini irek echi mokọtbe ikaan̄ mgbaan̄ me lek ebi eyi Awaji mè ikpa si ike ntumu-mfieek isisiki ibot mè iyaka ire isasa nkeek kiji irọ inu eji, okijeen̄ me ire eji michubọk inin̄ emen isiki-efuuk eyi Awaji.
Week Inu Unye Otu Ewe Okup Me Usem Awaji
(Ebi Iburu 4:12) Mije, ikọ Awaji ìre ikọ òkup me ugwem, mè ikaan̄ unye. Ikọ Awaji îreke enenen igak oge akọn̄ isi iba geelek, mè ikichim itibi iraka inin̄ emen ene isi ifieek ekwukwu ene isan̄a me lek ibot ejit ene, mè ikifieek ufuk emen ukwuuk isan̄a me lek usọk ukwuuk, mè ikiriọọn̄ ekiket mè ulọk geelek òkup ene me ejit.
w16.09 13
Idodo Ebi Ene Edobe
Keke ore “ikọ Awaji” okup me ikpa Ebi Iburu 4:12 otumube ibe ke “ìre ikọ òkup me ugwem, mè ikaan̄ unye”?
▪ Ereya ikijeen̄ ibe ke Pọọlu ikitumu ikọ ofolek etip Awaji miya ire nkeek kan̄ okup me emen Baibul.
Ekimalek ige me emen ikpa kiji ibe ke ikpa Ebi Iburu 4:12 ikijeen̄ eji ibe ke Baibul ikaan̄ unye isasa inwene ugwem ebi ene, itat ikeya si. Ire, inwọn ibe eji ekemun̄ ikpa Ebi Iburu 4:12 me oniin̄ owewele. Pọọlu ikitap efuuk me owot ebi Iburu irere ebi eyi Karais ibe ekegọọk ebieen̄ nkeek Awaji enye. Owuwa me lek nkeek kan̄ ire echi egebe me emen ikpa mbuban. Pọọlu isa ebi Ijeren ebi enyan̄abe isibi me Ijipiti isa irọ inu ijejeen̄. Ema mikaan̄ irek ininin̄ ijọn̄ eyi echieekbe use, “ata ijọn̄ òkisibi anam mè mfut uti,” ere ema ebechubọk ikaan̄ ata isiki-efuuk.—Isis. 3:8; Ikan. 12:9, 10.
Ichubọk ire nkeek Awaji ire eya. Ire, ebi Ijeren mitet ejit inye mè ijit ijejeen̄ ichechieek me lek Awaji, eya orọ, owuwua kiban̄ kpekọt ikaan̄ isiki-efuuk ya. (Ifuk. 14:30; Jos. 14:6-10) Ire, Pọọlu itumu si ibe ke ‘use ininin̄ isiki-efuuk Awaji’ omowa. (Iburu 3:16-19; 4:1) Ikpọk mbum ibe ke “use” ya ire ge me lek nkeek Awaji okaan̄be. Kubọk ebi Iburu irere ebi eyi Karais erọbe, eji mekọt ikifuk me ikirọ inu igọọk me lek nkeek ya. Inyi isa ibieen̄ inye ibe ke use yi inan̄a me Ikpa Mbuban, Pọọlu ichak otu me lek ikpa Ibebene 2:2 melek Okwa Itọn̄ 95:11.
Kpolọlọ, irọriọọn̄ ibe ke ‘use ininin̄ isiki-efuuk Awaji ìkekeke si mege inire chereyi,’ ire inu eyi morebe eji ejit. Eji mikaan̄ utoon̄-ejit ibe ke ifet ininin̄ isiki-efuuk Awaji ike Baibul otumube, eji si mikirọ inu echi oborọ ufuna eji ekọt enin̄ isiki-efuuk ya. Inu eji ekebirọ ikare isusun̄ Ikan kè Mosis, ikare si ikakaan̄ nnwọn-isi kè Jioba sa me irọrọ ofifi inu. Kpan̄asi ikeya, eji mikisa me ichechieek ikibieen̄ nkeek Awaji okikpọkbe mbum isibi inye. Isọkọ me lek si, obop obop ene me otutuuk linyọn̄ mibene ikikween̄ Baibul mè ikikween̄ si nkeek Awaji. Inu ema ekikween̄ ibieen̄ owuwa ene me lek kiban̄ ibe enwene ugwem kiban̄, ekaan̄ mè ekejeen̄ ichechieek mè ekana ebi eyi Karais ikakaan̄ ntap-me-mun̄. Mbet unwene ebi ene ekebirọ ire inu ge okijeen̄ ibe ke me atikọ “ikọ Awaji ìre ikọ òkup me ugwem, mè ikaan̄ unye.” Nkeek Awaji okup me emen Baibul ira ikaan̄ mgbaan̄ me lek ugwem kiji, ibokukup inye ikikaan̄ unye me ugwem kiji si.
(Ebi Iburu 6:17, 18) Awaji ìweek irọrọ inyi otutuuk ebi ọmọ ochieekbe use eriọọn̄ ejaan̄ lek ibe ke nkeek kan̄ ìkakinwene. Eya orọ înyan̄abe ibot isa irọ use kan̄ inye. 18 Use yi, mè inyan̄a-ibot yi, òrere inu iba echi ìkakinwene, ìkijeen̄ ibe ke Awaji ìkakikan̄ ataak. Inu iba chi ke Awaji osa itap eji efuuk me emen enenen, eji ebi ìlilibi isi itap ibot me irak ubọk kan̄, inyi eji etet ikpọchieen̄ eyi ọmọ onyibe eji ekaan̄ enye.
it-1 1139 ¶2
Ikpọchieen̄
Ugwem ikakaan̄ge itata melek ugwem kpofiatbe okup inyi ebi ikakaan̄ “uche me lek igwen eyi emen inyọn̄” (Iburu 3:1) Ikpọchieen̄ yi ire eyi mekọtbe itoon̄-ejit me lek. Ire inu iba obieen̄ inye, Awaji ikpobokọt ikan̄ ataak me lek use kan̄ mè inyan̄a-ibot kan̄, ikpọchieen̄ ya si ikup me lek Karais, ogwu kpokọtbe iyaka ikwu okup me emen inyọn̄. Eya orọ, ekpabe ibe ke ikpọchieen̄ yi “okigọbọ ibot ejit kiji ikaan̄ kubọk iloma, inyi ikeke inye, mè ikaje ilọ. Ikpọchieen̄ yi okisa eji ije itibi ekwut mgban me emen Uwu Mbuban me emen inyọn̄, mè iraka inin̄ Ere Òkup Mbuban Ichit me udun̄ ekwut ya [ike ogwu ibot ngwugwa onin̄be Ere Òkup Mbuban Ichit me Usen Ngwugwa], Jisọs îdasi ije me isi kiji isi inin̄ emen agwut mbuban ya me ibot kiji. Ọmọ îkana ogwu òban Awaji ire mgbọ ikakaan̄ge itata, igọọk me ọgbọn̄ irek ngwugwa kè Melikisedek.”—Iburu 6:17-20.
Ifufuk Baibul
(Ebi Iburu 5:1-14) Ekigobo ogwu òban Awaji geelek inan̄a me etete ebilene, inyi inikisi ikwaan̄ inyi Awaji me ibot otutuuk ebilene, mè ikinyi Awaji inyinyi, mè ikigwa ngwugwa mije ijo inu ebilene erọbe. 2 Ọmọ môkọt isiki lek irọ inu melek ebilene ebi ìkije ilọ sa me ekariọọn̄ge inu geege, mije, ọmọ me lek kan̄ ìnan̄a me etete ebilene ikike, ebi kpekirọ inu itat otutuuk mgbọ. 3 Mije keyi, ọmọ isibogwa ngwugwa me ibot ebi ene, môgwa si me ibot kan̄ igbaalek. 4 Ìkare ene okisa ubọk kan̄ ito lek kan̄ me irek umin yi. Îre Awaji okigwen ene ito me irek umin ya, kubọk îgwenbe Erọn ito me mgbọ ukot ikaan̄. 5 Ikeya si, ìkare Karais osa ubọk kan̄ ikana ogwu òban Awaji, inyi ọmọ ikaan̄ umin. Îre Awaji otumu inyi ọmọ ibe, “Owu ìre Gwun̄ n̄a, cherekeyi ke nkana Nte kwun̄.” 6 Awaji îtumu si me ofifi ere ibe, “Owu ìre ogwu ngwugwa ire mgbọ ikakaan̄ge itata, igọọk me ọgbọn̄ kè Melikisedek.” 7 Mgbọ Jisọs olukbe me linyọn̄, îtaan̄ ukpo iriaak uriaak, mè isa mun̄ ito me chieen̄ ikibeek mbeek me ubọk Awaji, ogwu môkọtbe inyan̄a ọmọ isibi me ubọk mkpa. Awaji onọnọ ọmọ ida, mije ọmọ osikibe lek, mè isiki ibot inyi Awaji. 8 Ubọk geelek ọmọ orebe Gwun̄ Awaji, ọmọ îkween̄ isisiki ibot sa me owuwa ufialek ọmọ omun̄be. 9 Mgbọ Awaji orọbe inyi ọmọ ijot iso ifuk isan̄a, ọmọ okakana ogbuuruk ere unyan̄a eyi mgbọ ikakaan̄ge itata okinan̄a isibi, inyi otutuuk ebi geelek ìkigban̄ utọn̄ inyi ọmọ. 10 Awaji onenirọ ọmọ ogwu òban Awaji, igọọk me ọgbọn̄ kè Melikisedek. Ìgbala chieen̄, inyi enyi ekanan̄a ìrọn̄ ìtele ichechieek kinyi. 11 Eji mîkaan̄ owuwa ikọ itutumu ofolek irere ogwu ngwugwa eyi Karais orebe igọọk me ọgbọn̄ kè Melikisedek, ire, îyọt itutumu inyi enyi, mije, enyi kpekigwat lek igobo inu itet. 12 Me atikọ, me mgbọ keyi, îre enyi ere ebi mekijeen̄ ebi ofifi ife inu. Ire, enyi eyaka ikiweweek ebi ìbenikpọk ibene ikijeen̄ enyi adasi inu ògbegbe ibe enyi eriọọn̄ ofolek ikọ Awaji. Mun̄ ebe ikike ogbe isasa ikpukpo enyi, ìkare inorie ònyenye. 13 Ene geelek ekisa mun̄ ebe ikpukpo ìre sọntiik gwun̄, ìkariọọn̄ inu geege ofolek ikọ eyi ata irọrọ. 14 Ire, inorie ònyenye ìkup inyi ebi ìmimiin̄ inin̄ ene, mije, ema mîsa ifuk-ibot kiban̄ ikeek ekiket owuwa mgbọ, mè ikween̄ iriọọn̄ esese inu òkup me etete ata inu mè ijo inu.