Ikpa Okikpa Nkween̄mkpọ Ugwem Mè Ikwaan̄ Kiji Kubọk Ebi Eyi Karais

Ikpa Okikpa Nkween̄mkpọ Ugwem Mè Ikwaan̄ Kiji Kubọk Ebi Eyi Karais

AKỌP ONYAN̄ 7-13

INU UNYE OTU EWE OKUP ME USEM AWAJI | JEMIS 3-5

“Kijeen̄ Iriọọn̄-inu Awaji Okinyi”

(Jemis 3:17) Ire, ata iriọọn̄-inu eyi Awaji okinyi ene, ìkup esese. Ogwu geelek òkakaan̄ iriọọn̄-inu keyi môtana me ejit kan̄, mè ikima iluluk me esuuk melek ebi ene, mè ikikaan̄ ata ejit [‘ata nkeek’ NW ], mè ikisiki lek [‘ibem lek isisiki ibot’ NW ], mè ikikaan̄ ejit nsan me lek ebi ene, mè ikirọ ata inu mgbọ geelek. Ìkpokigobo isi ene. Ofiaan̄ geege ìkpokup si me emen kan̄.

cl 221-222 ¶9-10

“Ire Iriọọn̄-inu eyi Awaji Okinyi” Okisi Ikwaan̄ me Ugwem Kwun̄ Ni?

⁹ ‘Itatana me ejit.’ Itatana me ejit isibi ikukup me mbuban mè ekakaan̄ge okpa geege me ejit mè nkeek, ikare gaalek me anam akpalek. Me Baibul, iriọọn̄-inu ikaan̄ mgbaan̄ me lek ejit ene, ire, iriọọn̄-inu Awaji okinyi ikpokọt inin̄ ejit ikatanage, eyi okaan̄ ijọ nkeek, ulọk mè otitọt me emen. (Urọk 2:10; Matiyu 15:19, 20) Ire ejit kiji itana—orere, ike ebilene ekasoge mekọtbe itana ire—eji mesan̄a “lek me lek ijo inu” mè ikirọ “inu ònwọnwọn.” (Okwa Itọn̄ 37:27; Urọk 3:7) Ire ikagbe ibe ke itatana me ejit ore adasi me lek eru iriọọn̄-inu egobe ni? Ire eji kpetana me nkeek, eru mè emen ekwukwu, eji ebejeje ikọt ijeen̄ eru iriọọn̄-inu kechilọ Awaji okinyi ni?

¹⁰ ‘Iluluk me Esuuk.’ Iriọọn̄-inu Awaji okinyi ikibieen̄ eji ibe ekerọ mkpọ esuuk esuuk, eyi orere eru ge ekwukwu Awaji okinyi ene. (Ebi Galesia 5:22) Eji ekitap efuuk me ijijit inu geelek obojijaka “esuuk eyi ògbagbaan̄” ebi usun̄ Jioba ibọp. (Ebi Efesọs 4:3) Eji si metap otutuuk efuuk kiji inyi ekpọk ekaan̄ esuuk ire ikayaka ikup. Ijeje ikup ufiak ibe eji erọ ikeya ni? Baibul ibe: “Iluk me esuuk. Awaji ogwu imumechieen̄ mè esuuk môkup melek kinyi.” (Ebi Kọrint Eyi Òso Iba 13:11) Ire eji ekweek inye ikiluk me esuuk, Awaji ogwu esuuk môkup melek kiji. Ubọk eji ekisa irọ eru me lek ebi melek kiji ekupbe me ichechieek ikaan̄ mgbaan̄ me lek mgbaan̄ nje kiji melek Jioba. Kpa ubọk ke eji ebekọt ikijeen̄ ibe ke eji ire ebi imama esuuk? Kpọ-nu inu njeen̄ ge.

cl 223-224 ¶12

“Ire Iriọọn̄-inu eyi Awaji Okinyi” Okisi Ikwaan̄ me Ugwem Kwun̄ Ni?

¹² ‘Ata nkeek.’ Ikakaan̄ ata nkeek isibi keke ni? Ebi ikikween̄ mkpọ idọk etumu ibe ke usem Grik esabe ikaba ‘ata nkeek’ me ikpa Jemis 3:17 iyọt ikakaba. Ebi ikikaba usem misa “itọtọọk me ejit,” “ikakaan̄ ime,” mè “ikekijeen̄ njijin” isa irọ mkpọ. Me New World Translation, footnote ge ibe ke mkpọ ichubọk isibi ire “imemen̄e igọọk.” Kpa ubọk ke eji ebejeen̄ ibe ke eru yi, eyi iriọọn̄-inu Awaji okinyi, okisi ikwaan̄ me emen kiji?

cl 224-225 ¶14-15

Ire “Iriọọn̄-inu eyi Awaji Okinyi” Okisi Ikwaan̄ me Ugwem Kwun̄ Ni?

¹⁴ ‘Ibem lek isisiki ibot.’ Usem Grik esabe ikaba ‘ibem lek isisiki ibot’ kpunu me ofifi ere me Agan̄ Esabe Usem Grik Ige me Baibul. Ene ge okikween̄ mkpọ idọk ibe ke “ebi akọn̄ ekimalek isa usem ya irọ mkpọ.” Isibi “ikekigwat lek ikichieek” mè “isisiki ibot.” Ene geelek ochechieek ibe iriọọn̄-inu Awaji okinyi ikisi ikwaan̄ me ugwem kan̄ ibokigwagwat lek irọ inu Baibul otumube. Kperiọọn̄ ọmọ kubọk ogwu okirọ ntumu-mfieek mè ojit ibe inu ojeje ntikwo me lek ntumu-mfieek irọbe ya inwene ejit kan̄. Kpan̄asi ikeya, ikigwat lek inwene nkeek kan̄ mè ire esa Baibul ijeen̄ ọmọ ibe ke nkeek kan̄ ilọ. Ire ikeya ke ebi ene eriọọn̄ owu ni?

‘Ikakaan̄ Ejit Nsan mè Ikirọ Ata Inu’

¹⁵ ‘Ikakaan̄ ejit nsan mè ikirọ ata inu.’ Nsan ire agọọk ge me lek iriọọn̄-inu Awaji okinyi, mije Baibul ibe ke iriọọn̄-inu ya ‘ikikaan̄ ejit nsan.’ Taba imaan̄ ibe ke egbagbaan̄ ichak otu me lek “ejit nsan” mè irọrọ “ata inu.” Eyi igbe, mije me Baibul, ekimalek isa nsan itọt me lek ata ulọk ene okaan̄be me lek ebi ofifi ife, njijin eyi okisan̄a owuwa ata inu isibi. Ikpa ge ibe ke nsan ire “ikakaan̄ njijin me lek ijo irek ene okupbe me emen mè itatap ubọk inyi ene ya.” Ọmọ orọ, iriọọn̄-inu Awaji okinyi ikare eyi okikpọ ene chieen̄ ilọ me lek, ikakitet ejit inye, ikare si eyi ekikaan̄ me ibot gaalek. Kpan̄asi ikeya, ikijeen̄ ulọk me lek ene, ikijeen̄ njijin, mè ikikpọk mbum si me irọrọ kiji. Kpa ubọk ke eji ebekijeen̄ ibe ke eji mikaan̄ ejit nsan?

cl 226-227 ¶18-19

Ire “Iriọọn̄-inu eyi Awaji Okinyi” Okisi Ikwaan̄ me Ugwem Kwun̄ Ni?

¹⁸ ‘Ikakebigobo isi ene.’ Iriọọn̄-inu Awaji okinyi ikakisaka ido ene, mè iya ire ikpọ ere ene onan̄abe isiki chieen̄. Ire eji michieek ibe irọọn̄-inu ya isi ikwaan̄ me ugwem kiji, eji mesan̄a ikekigobo ene isi me ejit kiji. (Jemis 2:9) Eji kpebekimọnọ ene ibene mije okike ere ifukbe ikpa ire, ikpoko ikaan̄be, mè irek ikaan̄be me ntitiin̄; mè iyaka ire ikpọ ebi melek kiji ekupbe me ichechieek isiki chieen̄ ikerere ibe ke ema ekup kubọk ebi esisip. Ire Jioba ima ema, eji si mejeen̄ ema ima.

¹⁹ ‘Ikakaan̄ge ofiaan̄ geege.’ Me usem Grik, ‘ofiaan̄’ ire usem ekisa itumu ikọ ofolek “ogwu okigọọk irọ drama.” Me ukot ikaan̄, ebi Grik mè ebi Rom ikigọọk irọ drama ekitap mkpọ isa chit isi kiban̄ ekisi ifit ifit kiban̄. Ọmọrọ, usem ya ‘ofiaan̄’ ire usem ekisa itumu ikọ ofolek ogwu okifiaan̄ mè iyaka ire ogwu okirọ kubọk ọmọ ire mkpọ ikarege. Iriọọn̄-inu yi Awaji okinyi ikaan̄ mgbaan̄ me lek ubọk eji ekimun̄ ebi melek kiji ekupbe me ichechieek, ikare gaalek ubọk eji ekirọ eru me lek kiban̄.

Week Inu Unye Otu Ewe Okup Me Usem Awaji

(Jemis 4:5) Ìre enyi ekimọnọ ibe ke ikọ egebe me Ikpa Mbuban ibe ke Ekwukwu eyi Awaji otapbe me emen kiji îkaan̄ ikpele ulọk me lek kiji ìre ataak?

w08 11/15 20 ¶6

Inu Ekpabe Ofolek Ikpa Jemis mè Pita

4:5—Ere Baibul owa ke Jemis okitumu ikọ ibak? Jemis ikachubọk ikitumu ikọ ibak okpọkpọ ere Baibul ge. Ire, mokọt ire ibe ke usem cha itumube inan̄a me unye ekwukwu mbuban iyaka imaan̄ me lek nkeek esabe ige ere Baibul chi, Ibebene 6:5; 8:21; Urọk 21:10; mè Ebi Galesia 5:17.

(Jemis 4:11, 12) Bọn Nte n̄a, ikatumu lek kinyi ìfiat. Mije, ene geelek òtutumu gwun̄ Nte kan̄ ifiat, mè ifieek gwun̄ Nte kan̄ ikọ, îtumu Ikan Awaji ifiat, mè ifieek Ikan ya si ikọ. Ire owu ofieek Ikan Awaji ikọ, owu òkayaka ìre ogwu òkisun̄ Ikan ya. Owu okana ire ogwu òmọmọnọ ibe ke ọmọ îmin igak Ikan ya. ¹² Awaji gaalek okaan̄ inyinyi ene Ikan. Ọmọ gaalek si ore ogwu òbofieek oyerebet inyi ene. Ọmọ gaalek obokọt inyan̄a ene, mè ifiat si ugwem ene. Ìre owu ìre ekene, eyi obonikifieek gwun̄ Nte kwun̄ ikọ?

w97 11/15 20-21 ¶8

Ichechieek Ikirọ me Eji Ekeme mè Ekweek Enye Ekebeek Uriaak

⁸ Itutumu ogwu melek kiji okupbe me ichechieek ifiat ire ijo inu. (Jemis 4:11, 12) Ire, usini ene ekimun̄ ebi melek kiban̄ ekupbe me ichechieek kubọk ebi ijo, mokọt ire bak lek ema ekebimun̄ lek kiban̄ kubọk ebi ata irọrọ mè iyaka ire bak lek eweekbe ibebene lek kiban̄ sa me ikpọkpọ ebi ofifi ife isiki chieen̄. (Okwa Itọn̄ 50:20; Urọk 3:29) Me Grik, usem esabe ikaba ‘itutumu ifiat’ isibi isasa me ochicha ejit itumu mkpọ imin igak ubọk ikupbe mè iyaka ire itotoon̄ ene uraman. Eyi isibi ibe ke okisisibi oyerebet inyi gwun̄ nte kwun̄. Ike owa ke eyi osa ire ‘îtutumu Ikan Awaji ifiat, mè ifefieek Ikan ya si ikọ’? Ebi ijeen̄ Ikan mè ebi Farisi ‘ejujuuk ikan Awaji itele’ mè ikisa onineen̄ eyi kiban̄ ifieek oyerebet. (Mak 7:1-13) Me oniin̄ yaage, ire eji ifieek gwun̄ ute ge ikọ, me mgbọ Jioba ikafefieek ene ya ikọ, ire eji ‘kpefieek ikan Awaji ikọ’ mè isa me ikeya ikitumu ibe ke ikan ya ikanwọn ni? Ikekifieek ebi bọn ute ikọ me lek inu ekarọge, isibi ibe ke eji kpekisun̄ ikan eyi ima.—Ebi Rom 13:8-10.

Ifufuk Baibul

(Jemis 3:1-18) Bọn Nte n̄a, owuwa ene me etete kinyi ekaweek irere ebi ijejeen̄, mije, ike enyi eriọọn̄be, oyerebet Awaji mônye me lek kiji ebi ijejeen̄ igak otutuuk ene. ² Otutuuk kiji mîkirọ ilọ me owuwa oniin̄. Ire, ikaan̄ ogwu ikarọge ìlọ me otu itumu-ikọ, ene ya înwọn isan̄a. Ogwu òkup ikeya si obokọt ikpulu otutuuk lek kan̄. ³ Eji isiberọ inyi inyinya ikirọ inu eji ekiweek, eji ekimọnọ mgbidim okwukwut itap isaba otu kan̄, mè itobo ikaan̄. Sa me ikeya, eji mîra ikikọt iwumu anam ya ikana, inyi isa eji isi ere geelek eji eweekbe isisi. ⁴ Ikeya si ke îkup me lek uji ile etapbe awala me lek. Unye efet isinin̄ emen awala cha, îra ikiben uji ya ikọp ije. Ubọk geelek uji ya ominbe iyaka, îre sọntiik uran̄ òkikup me edim uji ya gaalek ke ogwu òkikọkọp okisa igọbọ uji ya ikana isi agan̄ geelek îweekbe isisi. ⁵ Ubọk yaage si ke alọm ukan̄ okup. Sọntiik gwun̄ alọm ukan̄ môkọt isak, mè itaka nga oron ile isan̄a kpai. Ikeyi ke alọm ene okup. Mimin, ìkamin. Ire, îkaan̄ unye enenen me emen ugwem ene, mè ikitumu ikpele ikọ. ⁶ Alọm ene ìkup kubọk ukan̄. Me etete otutuuk nriro geelek òkup me lek ene, alọm obokọt irọ ijo inu ichit. Otutuuk ijo inu geelek òkup me linyọn̄ îso ifuk me otu alọm ene. Ijo inu înan̄a me lek alọm iso otutuuk akpalek ene. Alọm môkọt itap ukan̄ itaka otutuuk ugwem ene ifiat isan̄a kpai, bene me usen iman re usen mkpa ene ya. Ama yọk me lek kan̄ ke ukan̄ yi òkup ene me otu alọm onan̄a. ⁷ Ebilene mîkikeme owuwa esese inu geelek Awaji orombe isiki, mè ijeen̄ inu, bene me lek anam oron, mè unọn òwulu me inyọn̄, mè inu geelek òkinyinyọnọ me ijọn̄, re lek irin̄ òkup me mun̄. ⁸ Ire, kpunu ene geege òkikọt ikeme alọm òkup me otu ene isiki, mè ijeen̄ inu. Alọm ìkup kubọk ogbuuruk ere ijo inu okpọkpọ ikigbuk inan̄a isibi. Kpekikọt ikeme itet ikaan̄. Inu geelek môkọtbe ikpan̄ ene òwa me otu alọm ene ojotbe. ⁹ Alọm yaage eji ekisa itọn̄ Ogwukaan̄ kiji òrere Nte kiji Awaji, ọmọ si ke eji ekisa igbo ebilene ogbo kiji, ebi Awaji orombe me mbet kan̄. ¹⁰ Itọn̄ mè ogbo ìkinan̄a me otu yaage isibi. Bọn Nte n̄a, ìkagbe ibe ikup ikeya! ¹¹ Ìre ala mè ata mudim môkọt ikinan̄a me emen ogbuuruk yaage ikigbuk isibi? ¹² Bọn Nte n̄a, uti figi ìkakito mfut olifu, olik gerep si ìkakito mfut figi. Ikeya si, kpebekọt ichibi ata mudim me emen ogbuuruk ere ala okinan̄a isibi. ¹³ Ìre ekene me etete kinyi oriọọn̄ inu, mè ikigobo inu itet? Ene ya isiki lek kan̄ me ijọn̄, mè ikirọ ata inu. Ikeya ke ebi ene ebesa iriọọn̄ ibe ke ene ya ìre ogwu òriọọn̄ inu. ¹⁴ Enyi me lek kinyi, ire enyi ikaan̄ chieen̄ ile mè njijọ ejit me emen ejit kinyi, mè ikikeek lek kinyi gaalek, kpekikeek ebi ofifi ene, ikagugo lek ibe ke enyi mîriọọn̄ inu, mè ìsa me ikeya ìkan̄ ataak ìkeme atikọ. ¹⁵ Mije, ojelek ugwem keya, eyi usini ene ekibe ke îre iriọọn̄-inu, ìkanan̄a me ubọk Awaji, ìkanan̄a si me ubọk Ekwukwu Awaji. Ìnan̄a me linyọn̄ keyi, me ubọk Yọk. ¹⁶ Mije, ere chieen̄ ile mè njijọ ejit okupbe, ere ya si, wọlọwọlọ mè otutuuk ijo inu geelek môkup. ¹⁷ Ire, ata iriọọn̄-inu eyi Awaji okinyi ene, ìkup esese. Ogwu geelek òkakaan̄ iriọọn̄-inu keyi môtana me ejit kan̄, mè ikima iluluk me esuuk melek ebi ene, mè ikikaan̄ ata ejit, mè ikisiki lek, mè ikikaan̄ ejit nsan me lek ebi ene, mè ikirọ ata inu mgbọ geelek. Ìkpokigobo isi ene. Ofiaan̄ geege ìkpokup si me emen kan̄. ¹⁸ Ebi geelek ìdedeke ugwem, mè ikitap esuuk me etete ebi ene, ife cha mêrie oruru ikpele unwọọn̄ eyi ònan̄a me lek ata ubọk ikwaan̄ kiban̄.

AKỌP ONYAN̄ 14-20

INU UNYE OTU EWE OKUP ME USEM AWAJI | PITA EYI ADASI 1-2

“Ikup me Mbuban”

(Pita Eyi Adasi 1:14, 15) Enyi kubọk bọn Awaji ebi ìkigban̄ utọn̄ inyi Awaji, ikayaka ìgwu ìkom ìfo lek ijo ulọk cha enyi ekikaan̄ me adasi mgbọ ya enyi ekariọọn̄ge inu geege. ¹⁵ Kpan̄asi ikeya, ìkup me mbuban me emen inu geelek enyi ekirọ, kubọk Awaji ogwu ògwegwen enyi okupbe me mbuban.

w17.02 9 ¶5

Ngwugwa Mkpenwene—‘Uche Ososo Ikup’ Onan̄a me Ubọk Nte Kiji

⁵ Kpa ubọk ke eji ebejeen̄ ibe ke eji mima erieen̄ Jioba? Ire inan̄a me eru kiji. Jioba iweek ibe eji ekup me mbuban. (Fuk Pita Eyi Adasi 1:15, 16.) Eyi isibi ibe ke eji metọbọ ebum inyi Jioba gaalek mè ikisa otutuuk ejit kiji ikisiki ibot inyi ọmọ. Ikerere me mgbọ ekitutuku eji, eji metap otutuuk efuuk kiji ikiluk igọọk onineen̄ ata ubọk irọrọ kan̄ mè ikan kan̄. Sa me ikekirọ ata inu, eji ekirọ inyi utoon̄ kiji ikitoon̄ mè ikisa me ikeya imin erieen̄ Jioba. (Mat 5:14-16) Ubọk eji ekiluk ugwem kubọk ebi itatana ikijeen̄ ibe ke ikan Jioba inwọn mè ikijeen̄ si ibe ke uraman kè Setan ire ataak. Eji esirọ ilọ, ike otutuuk kiji ekebirọ, eji ekisa otutuuk ejit kiji inwene mè ijit irọrọ echi mosabe ochak ijet Jioba.—Itọn̄ 79:9.

(Pita Eyi Adasi 1:16) Mije, ege me Ikpa Mbuban ibe, “Ìkup me mbuban, mije emi ǹkup me mbuban.”

lvs 77 ¶6

Ubọk Ebekisa Igobo Inwọọn̄ Lek

⁶ Jioba itumu inyi eji ibe: “Ìkup me mbuban, mije emi ǹkup me mbuban.” (Pita Eyi Adasi 1:14-16; Pita Eyi Òso Iba 3:11) Jioba mobọkọ ntọbọ ebum kiji itap gaalek mè ire itana mè iyaka ire ikup me mbuban. (Ikan Òso Mgbọ Iba 15:21) Ntọbọ ebum kiji ikpobotana ire eji ekirọ inu Jioba ochabe, kubọk ikekibubat, ikekirọ mkpọ afa afa, mè iyaka ire ikakaan̄ mgbaan̄ me lek ebi ijo ekwukwu. (Ebi Rom 6:12-14; 8:13) Jioba ikpobele ejit si ire eji ekisa mbet inu okup ikecha inwọọn̄ lek. Eyi mokọt ififila ntọbọ ebum kiji mè irọ inyi Jioba ikabọkọ itap, mokọt ifiat si mgbaan̄ nje kiji melek kan̄.

Week Inu Unye Otu Ewe Okup Me Usem Awaji

(Pita Eyi Adasi 1:10-12) Ebi nriran ukot ikaan̄ ebi ìbeben nriran ofolek atata nnwọn Awaji eyi enyi ebekaan̄ mîfiat mgbọ, mè igwuun̄ chieen̄ iweek irọriọọn̄ inu ofolek unyan̄a yi. ¹¹ Ema eweek irọriọọn̄ mgbọ unyan̄a yi obonu, mè ike ìbosa inu, kubọk Ekwukwu kè Karais òkup me emen kiban̄ otumube inyi ema me mgbọ îtumube ikọ ofolek ufialek eyi Karais obobọkọ, mè ujamgbugbo eyi ìbokaan̄ mgbọ ufialek cha isiraka. ¹² Awaji îchili ijeen̄ ebi nriran cha, ibe ke ìkare lek kiban̄ ke ema ekisi ikwaan̄ inyi; ke îre enyi ke ema ekisi ikwaan̄ inyi. Awaji ìtumu ikọ ya mgbọ ema cha ekitumu ikọ ofolek inu ebi ìlolook enyi ata etip etumube inyi enyi. Ife cha esa me unye eyi Ekwukwu Mbuban ogwu eriabe inan̄a me emen inyọn̄ ijet ema ilook enyi ata etip ya. Ebi osat Awaji me lek kiban̄ si mîweek irọriọọn̄ inu chi.

w08 11/15 21 ¶10

Inu Ekpabe Ofolek Ikpa Jemis mè Pita

1:10-12. Ebi osat miweek irọriọọn̄ mè igobo itet udọk udọk atikọ echi ebi nriran Awaji me ukot ikaan̄ egebe ofolek ntitiin̄ ebi eyi Karais ekenbe aran̄. Ire, inu chi isibi utoon̄ mgbọ Jioba obene ikisa ntitiin̄ ya irọ mkpọ. (Efes 3:10) Ire ikanwọn ibe eji egọọk akpat ukot ebi osat mè etap efuuk ekeweek “nlelet udọk udọk inu òkup Awaji me ejit”?—1 Kọr 2:10.

(Pita Eyi Adasi 2:25) Mije, me mgbọ òraraka, enyi ekup kubọk arọọn̄ òlọlọ oniin̄. Ire, me mgbọ keyi, enyi mîyaka igwu ikom ika inu me lek ogwu Òkpukpo Arọọn̄ ya, Ogwu Òkikpọ Chieen̄ me lek ibot ejit kinyi.

it-2 565 ¶3

Ogwu Òkikpọ Eji Chieen̄ Me Lek

Ogwu Obebene Ichit Òkikpọ Eji Chieen̄ Me Lek. Ikpa Pita Eyi Adasi 2:25 ikikpa mkpọ okup me ikpa Asaya 53:6 ofolek ‘ebi ijeje ilọ kubọk arọọn̄.’ Pita onenitumu ibe: “Ire, me mgbọ keyi, enyi mîyaka igwu ikom ika inu me lek ogwu Òkpukpo Arọọn̄ ya, Ogwu Òkikpọ Chieen̄ me lek ibot ejit kinyi.” Kpolọlọ ibe ke ogwu echakbe otu me lek me ere yi ire Jioba, eyi irere ibe ke ebi Pita okitumu ikọ yi ibak kpejeje ilọ inan̄a me lek Jisọs Karais, ire, ire inan̄a me lek kan̄ ke ema egwu ikom inu me lek Jioba, ogwu orere Ogwu Okpukpo Arọọn̄ Obebene Ichit. (Itọn̄ 23:1; 80:1; Jeri 23:3; Ijik 34:12) Jioba ire si ogwu òkikpọ chieen̄ me lek kiji, ogwu okiwọlọ ene ikpọ. (Itọn̄ 17:3) Iwọwọlọ ikpọ yi (Gr., e·pi·sko·peʹ) mokọt ikaan̄ mgbaan̄ me lek ifefieek oyerebet kan̄, kubọk eyi irọbe ebi kpetabage imaan̄ me lek mgbọ ‘inube inikpọ ema [Gr., e·pi·sko·pesʹ]’ me Jeruselem, me adasi ukot ebi eyi Karais. (Luk 19:44) Mè iyaka ire, mokọt isan̄a nnwọn mè oruru isibi, ike ibokup inyi ebi ikimin erieen̄ Awaji me usen ‘ibonu inikpọ ebilene [Gr., e·pi·sko·pesʹ].’—1 Pita 2:12.

Ifufuk Baibul

(Pita Eyi Adasi 1:1-16) Emi Pita, ogwu otuchieen̄ kè Jisọs Karais, nge ikpa etip keyi ijet enyi ebi Awaji ogobobe inyi lek kan̄, ebi ichen me linyọn̄, ebi ìyiyiyala ikana otutuuk ido Pọntọs, mè Galesia, mè Kapadosia, mè Esia, mè Bitinia. ² Kè Awaji Ute ìdadasi iriọọn̄ enyi isan̄a, mè inigobo enyi igọọk me lek irọriọọn̄ îriọọn̄be enyi. Awaji ìsa me unye eyi Ekwukwu Mbuban irọ inyi enyi ekup me mbuban, mè ekesiki ibot enyi Jisọs Karais, inyi eje kan̄ igwọk enyi itana me isi Awaji. Atata nnwọn mè esuuk imumana inyi enyi òjot òjot. ³ Itọn̄ ikup inyi Awaji, òrere Nte Okaan̄ kiji Jisọs Karais! Îsa me ikpele nsan kan̄ ikpọk eji iman, mè inyi eji ikpọchieen̄ eyi òkup me ugwem, inan̄a me lek ijojomo me mkpa eyi Jisọs Karais ojomobe. ⁴ Awaji înyi si eji ìrot eyi ìkpochep, ìk pofiat, ìkpogwọk ita si. Awaji ìsun̄ ìrot yi me emen inyọn̄ iban enyi. ⁵ Mije ichechieek kinyi, Awaji òkisa unye kan̄ ichit enyi iban òta mgbọ, mgbọ îbembe lek isasan̄a unyan̄a kan̄ isibi me chieen̄ ene. ⁶ Ìnwọọn̄ unwọọn̄ mije keyi. Ubọk geelek, enyi mêkọt ikifieek ejit sọnja mgbọ, mije owuwa ntọ-mkpọ òkup esese esese echi enyi ekije itibi mgbọ keyi. ⁷ Kubọk ukan̄ okikala alata araran̄, òrere inu òkifafiat, inyi okpa ita me lek, mè ikitoon̄, ikeya si ke ntọ-mkpọ cha okirọ me lek ichechieek kinyi, eyi ònyenye otu ewe igak alata araran̄. Ititim ikpan̄ ntọ-mkpọ cha ìkirọ inyi ichechieek kinyi ikana eyi atata, mè itọn̄ mè umin mè ulibi ikup inyi enyi mgbọ Jisọs Karais môkpọkbe inu. ⁸ Ubọk geelek enyi kperarak isa chieen̄ kinyi imun̄ Jisọs Karais, enyi mîkaan̄ imumechieen̄ me lek kan̄. Ubọk geelek enyi kpemun̄ ọmọ mgbọ keyi, enyi mîchieek me lek kan̄. Îre mije keyi ke enyi ekinwọọn̄ unwọọn̄ enenen. Unwọọn̄ yi ìre unwọọn̄ eyi kpebekọt itumu isibi, mè ire si unwọọn̄ eyi ujamgbugbo Awaji okupbe me emen. ⁹ Inu ya enyi ebak me lek ikaan̄ ichechieek îre enyi ubọk. Inu ya ìre unyan̄a eyi Awaji onyan̄abe ibot ejit kinyi isibi. ¹⁰ Ebi nriran ukot ikaan̄ ebi ìbeben nriran ofolek atata nnwọn Awaji eyi enyi ebekaan̄ mîfiat mgbọ, mè igwuun̄ chieen̄ iweek irọriọọn̄ inu ofolek unyan̄a yi. ¹¹ Ema eweek irọriọọn̄ mgbọ unyan̄a yi obonu, mè ike ìbosa inu, kubọk Ekwukwu kè Karais òkup me emen kiban̄ otumube inyi ema me mgbọ îtumube ikọ ofolek ufialek eyi Karais obobọkọ, mè ujamgbugbo eyi ìbokaan̄ mgbọ ufialek cha isiraka. ¹² Awaji îchili ijeen̄ ebi nriran cha, ibe ke ìkare lek kiban̄ ke ema ekisi ikwaan̄ inyi; ke îre enyi ke ema ekisi ikwaan̄ inyi. Awaji ìtumu ikọ ya mgbọ ema cha ekitumu ikọ ofolek inu ebi ìlolook enyi ata etip etumube inyi enyi. Ife cha esa me unye eyi Ekwukwu Mbuban ogwu eriabe inan̄a me emen inyọn̄ ijet ema ilook enyi ata etip ya. Ebi osat Awaji me lek kiban̄ si mîweek irọriọọn̄ inu chi. ¹³ Eya orọ, ìsan̄a wọlọwọlọ ekiket geelek me ejit kinyi, mè ìkaan̄ ifuk-ibot òsoso ifuk. Ìkaan̄ òjot òjot ikpọchieen̄ ònyenye me lek atata nnwọn Awaji, eyi mênyibe enyi me mgbọ mêchilibe Jisọs Karais ijeen̄ enyi. ¹⁴ Enyi kubọk bọn Awaji ebi ìkigban̄ utọn̄ inyi Awaji, ikayaka ìgwu ìkom ìfo lek ijo ulọk cha enyi ekikaan̄ me adasi mgbọ ya enyi ekariọọn̄ge inu geege. ¹⁵ Kpan̄asi ikeya, ìkup me mbuban me emen inu geelek enyi ekirọ, kubọk Awaji ogwu ògwegwen enyi okupbe me mbuban. ¹⁶ Mije, ege me Ikpa Mbuban ibe, “Ìkup me mbuban, mije emi ǹkup me mbuban.”

AKỌP ONYAN̄ 21-27

INU UNYE OTU EWE OKUP ME USEM AWAJI | 1 PITA 3-5

“Mgburudun̄ Inu Geelek Îgbet”

(Pita Eyi Adasi 4:7) Mgburudun̄ inu geelek îgbet. Eya orọ, ìtet lek ìkaan̄, ikachieek ibe inu geege iwuwọlọ enyi ibot. Ìgwọk chieen̄, inyi enyi ekọt ekeriaak uriaak.

w13 11/15 3 ¶1

“Ìgwọk Chieen̄, Inyi Enyi Ekọt Ekeriaak Uriaak”

Ene ge owuwuuk lek ikisi ikwaan̄ me eririeen̄ ibe ke “mgbọ oyọyọt ichit ikukup me ugwọk chieen̄ me eririeen̄ ire agan̄ egwe.” Ebi eyi Karais me chereyi ekikaan̄ mbet rumurumun̄ yaage mije mgbọ keyi oyọt ichit me mfufuk ijo inyọn̄ kè Setan. (Rom. 13:12) Mosak enenen ire eji ilaak me mgbọ okup ikeyi! Ikup ufiak ibe eji ekachieek “ibe inu geege iwuwọlọ” eji ibot mè egban̄ utọn̄ me lek nteme Baibul yi: “igwọk chieen̄, inyi enyi ekọt ekeriaak uriaak.”—1 Pita 4:7.

(Pita Eyi Adasi 4:8) Ògak ge, ìmun̄ lek kinyi me chieen̄ enenen, mije, imumechieen̄ ìkekichit ogbogbo ijo inu.

w99 4/15 22 ¶3

Ubọk Ebesa Iriọọn̄ mè Itim Igak Iwọwọ Geelek Echi Emen Ekwukwu

Me nkana ngwook, kawuuk nteme Pita osabe me ima inyi, ibe: “Mgburudun̄ inu geelek îgbet. Eya orọ, ìtet lek ìkaan̄, ikachieek ibe inu geege iwuwọlọ enyi ibot. Ìgwọk chieen̄, inyi enyi ekọt ekeriaak uriaak. Ògak ge, ìmun̄ lek kinyi me chieen̄ enenen, mije, imumechieen̄ ìkekichit ogbogbo ijo inu.” (Pita Eyi Adasi 4:7, 8) Ifet ichechieek ibe ekasoge—ebi ofifi ife mè eyi kiji—ikana mkpọ mgban mè iyaka ire mkpọ ntọbọ ukot. Setan iriọọn̄ ijaan̄ lek iwọwọ ebilene yi. Icheche ebi ene mè itim igak ema ore ge me lek ifiọk kan̄. Eya orọ, eji kpelọlọ igwagwat lek ikisa me ima odọdọk eji ekaan̄be me lek ge ge ikichit nrọ-nlọ ebi ene mè ekanyige “Yọk irek geege.”—Ebi Efesọs 4:25-27.

(Pita Eyi Adasi 4:9) Ìkibọkọ ebi melek kinyi ìtap me uwu kinyi ubọk ògbegbe, mè ikakinunuun̄

w18.03 14-15 ¶2-3

Ata Eru Mbọkọ-Ntap—Ikup Ufiak Enenen!

² Igbaalek ofifi inu itumube, Pita itumu inyi ebi bọn ute ibe: “Ìkibọkọ ebi melek kinyi ìtap.” (1 Pita 4:9) Usem ‘ibọbọkọ ene itap’ me Grik isibi “imama ebi ichen mè iyaka ire irọrọ ata inu inyi ema.” Ire, taba imaan̄ ibe ke Pita iteme bọn ute irieen̄ mè ibaan̄ ibe ekebọkọ “ebi melek” kiban̄ etap, ebi ema eriọọn̄be mè ikigọọk igbaan̄ irọ inu. Kpa ubọk ke ibọbọkọ ene itap obosa itap ubọk inyi ema ni?

³ Motaba ema iriaak me lek ge ge. Keek inu ochichinibe. Ire owuuk lek inwọọn̄ ogwen ene ogwenbe owu inu me uwu kan̄ ni? Osikikeek mkpọ ofolek ogwen ochieekbe ya, ire okakibele ejit ni? Mgbọ otetbe usini ene me ntitiin̄ kwun̄ ichen, ire ikanama mgbaan̄ nje kinyi inye ni? Sa me ikekibọkọ ene itap, eji ekekiriọọn̄ ebi bọn ute irieen̄ mè ibaan̄ ijaan̄ lek, igak ubọk eji mekọtbe iriọọn̄ ema me ofifi irek. Ikup ufiak ibe ebi eyi Karais me usen kè Pita ekup eriaak me lek ge ge ike inu okpọkpọk ikifieek. Ikeya si ke ikup inyi ebi eyi Karais ikiluk me “mgburudun̄ mgbọ” yi. —2 Tim 3:1.

Week Inu Unye Otu Ewe Okup Me Usem Awaji

(Pita Eyi Adasi 3:19, 20) Îje si me ekwukwu isi ama ekwukwu, isi itumu ikọ Awaji inyi ebi ekwukwu ebi ìkup me mkpọn. ²⁰ Ebi ekwukwu chi ìre ebi ìjijit isisiki ibot inyi Awaji me ukot ikaan̄, me mgbọ Awaji omebe ejit ikup, ibene me mgbọ Nuwa obenebe inama uji ọfọ kan̄ ire mgbọ înamabe isan̄a. Ene inen mè inen gaalek enin̄ emen uji ya. Îre ene jeeta gaalek ebi ìninin̄ emen uji ya ke esa mun̄ ya inyan̄a isibi.

w13 6/15 23

Idodo Ebi Ene Edobe

Baibul ibe ke Jisọs “itumu ikọ Awaji inyi ebi ekwukwu ebi ìkup me mkpọn.” (1 Pita 3:19) Isibi keke?

▪ Ogwu ikwaan̄ Pita ikpa ibe ke ebi ekwukwu chi ire “ebi ìjijit isisiki ibot inyi Awaji me ukot ikaan̄, me mgbọ Awaji omebe ejit ikup, . . . me mgbọ Nuwa.” (1 Pita 3:20) Ikpọk mbum ibe ke Pita ikitumu ikọ ofolek ebi ekwukwu ikwaan̄ igọgọọk Setan ikpaka ibot. Judu ichak otu me lek ubọk “ebi osat Awaji esabe me unye-ibot imọnọ irek unye eyi Awaji ikanyige ema, mè itele ere Awaji osun̄be ema,” mè itumu si ibe ke “Awaji ìtatap ema mkpọn ire mgbọ ikakaan̄ge itata, mè ikpulu ema itap me emen ikpele udun ere ema ebekup mege ire òta Usen, òrere uga Usen mgbọ Awaji obosibi oyerebet me ibot otutuuk linyọn̄.”—Judu 6.

Me oniin̄ okukup ke ebi osat chi esa ikpaka ibot me usen kè Nuwa? Sabum Mun̄ Ile ya, ebi ijo ekwukwu cha minwene lek kiban̄ ikana ebilene —inu keya eyi ikarege nkeek Awaji inyi ema. (Ibeb 6:2, 4) Isọkọ me lek, ebi osat cha mirọ inu olọlọ sa me igọgọọk ebibaan̄ ilaak. Awaji ikarom ema ibe ekegọọk ebibaan̄ elaak. (Ibeb 5:2) Awaji mofiat ebi ijo osat cha ikpakpaka ibot inyi ọmọ me enen mgbọ. Ire, mgbọ keyi, ike Judu otumube, ema ekup me “ikpele udun”—irek mkpọn emen ekwukwu.

Kpa mgbọ mè ike owa ke Jisọs osa itumu ikọ Awaji inyi “ebi ekwukwu ebi ìkup me mkpọn”? Pita ige ibe ke eyi irọ mgbọ Awaji orọbe inyi ikpọk “iluk ugwem me emen Ekwukwu.” (1 Pita 3:18, 19) Taba imaan̄ si ibe ke Pita itumu ibe ke Jisọs “itumu ikọ Awaji.” Usem Pita osabe irọ mkpọ me ere yi ikijeen̄ ibe ke itutumu ikọ Awaji ya imọnọ irek sabum Pita ogebe adasi ikpa etip kan̄. Ikup kubọk ire mgbọ Jisọs ojomobe me mkpa iraka, ke isilook ebi ijo ekwukwu cha unen osusut eyi ema mebọkọbe. Ikare etip eyi onyinyi ema ikpọchieen̄ geege. Ire etip oyerebet. (Jona 1:1, 2) Jisọs ijeen̄ ibe ke Yọk ikakaan̄ unye geege me lek kan̄—sa me ijejeen̄ ichechieek mè igbe utoon̄-ejit mege ikwube mè ijomo me mkpa,—eya orọ igbebe ibe ọmọ isilook etip oyerebet ya. —Jọn 14:30; 16:8-11.

Me mgbọ okup me isi, Jisọs mobọp mè itọp Setan mè ebi osat cha itap me udọn̄ ikakaan̄ge okputut. (Luk 8:30, 31; Ichi 20:1-3) Mege ire mgbọ ya, ebi osat ikpakpaka ibot chi ekup me irek ikpele udun eyi emen ekwukwu, ota mfiat kiban̄ ikpolọlọ inunu.—Ichi 20:7-10.

(Pita Eyi Adasi 4:6) Îre mije keyi ke elook ebi ìkwakwaan̄ ata etip me mgbọ ema ekupbe me ugwem, inyi esibi ema oyerebet me ibot me akpalek, kubọk ebilene, mè ema eluk ugwem me emen Ekwukwu, kubọk Awaji okiluk.

w08 11/15 21 ¶8

Inu Ekpabe Ofolek Ikpa Jemis mè Pita

4:6—Ebi owa ere “ebi ikwakwaan̄” elookbe “ata etip”?

Ema ire ebi ‘ikwukwu me emen ijo kiban̄’ mè iyaka ire ebi ikwukwu me irek emen ekwukwu, sabum enọbe ata etip. (Efes 2:1) Mgbọ ema echieekbe me lek ata etip, ke ema ebene ‘íkiluk’ ugwem me emen ekwukwu.

Ifufuk Baibul

(Pita Eyi Adasi 3:8-22) Me ikakana ikọ n̄a igwook, m̀be enyi, ìluk me ejit ge, mè ìkaan̄ ejit nsan me lek ebi melek kinyi. Ìmun̄ lek kinyi me chieen̄ kubọk ngwan̄ mè ngwan̄. Ìkaan̄ njijin me lek ebi melek kinyi, mè ìkisiki lek. ⁹ Ikasa ijo inu ìkpe ijo inu ebi ene erọbe enyi. Ikaan̄ ogwu itiik enyi, ikatiik useen̄. Ire, ìkigbana ebi ìkirọ enyi ijo inu, mije, ikeyi ke Awaji ogwen enyi ibe enyi enerọ, inyi enyi ebọkọ ugbana me ìrot. ¹⁰ Mije, ege me Ikpa Mbuban ibe: “Ogwu geelek òmama iluluk ugwem, mè iweek si imumun̄ ata inu me ugwem kan̄, ene ya itele itutumu ijo ikọ, mè itele si ikakan̄ ataak. ¹¹ Ene ya itele ijo inu, mè ikirọ ata inu. Ene ya ikiweek esuuk, mè ikaan̄ ulọk me itatap esuuk. ¹² Mije, chieen̄ Okaan̄-ene ìkup me lek ebi ata irọrọ. Utọn̄ kan̄ ìkup òbook ikigban̄ uriaak kiban̄. Ire, Okumugwem ìkakinyi ebi ìkirọ ijo inu isi.” ¹³ Ire enyi ikaan̄ ulọk irọrọ ata inu mgbọ geelek, ìre ekene obotap enyi unan me lek? ¹⁴ Ire, ìrere enyi ebọbọkọ ufialek mije ata inu enyi ekirọ, Awaji môgbana enyi. Ikachieek ibe ukpook ebilene itet enyi, ikachieek si ibe ejit isisaak enyi. ¹⁵ Ire, ìkinyi Karais umin me emen ejit kinyi, mè ìmọnọ ọmọ kubọk Okaan̄-ene ogwu òkup mbuban. Ìkup me mbem lek mgbọ geelek, inyi, ire ene geelek inido enyi inu òrọrọ mè enyi ekaan̄ ikpọchieen̄ enyi ekaan̄be, enyi mêkọt inyi ene ya ufọọk-otu. ¹⁶ Ire, ìsisiki lek ìkpa ìnyi ene ya me irak umin. Ikakaan̄ okpa geege me ejit, inyi esip itet ebi geelek ìkitumu ata ubọk irọrọ kinyi ifiat, mije ijo ikọ ema ekitumu ikeme enyi. ¹⁷ Ene ibọbọkọ ufialek mije ata inu îrọbe, ire ke îre nkeek Awaji ibe ikup ikeya, ọmọ onwọn igak ibọbọkọ ufialek mije ijo inu ene orọbe. ¹⁸ Mije, Karais ìkwu mkpa mgbọ yaage gaalek mije ijo inu otutuuk ebilene erọbe. Ọmọ ogwu ata irọrọ okwu mkpa me ibot ebi ijo irọrọ, inyi ọmọ inan̄a me ikeya isa enyi ijet Awaji. Ebilene ekpan̄ ọmọ me akpalek, ire, Awaji onenirọ inyi ọmọ iluk ugwem me emen Ekwukwu. ¹⁹ Îje si me ekwukwu isi ama ekwukwu, isi itumu ikọ Awaji inyi ebi ekwukwu ebi ìkup me mkpọn. ²⁰ Ebi ekwukwu chi ìre ebi ìjijit isisiki ibot inyi Awaji me ukot ikaan̄, me mgbọ Awaji omebe ejit ikup, ibene me mgbọ Nuwa obenebe inama uji ọfọ kan̄ ire mgbọ înamabe isan̄a. Ene inen mè inen gaalek enin̄ emen uji ya. Îre ene jeeta gaalek ebi ìninin̄ emen uji ya ke esa mun̄ ya inyan̄a isibi. ²¹ Mun̄ ya ìkeke inyi igwook-mun̄ eyi ekisa inyan̄a enyi isibi mgbọ keyi. Igwook-mun̄ yi ìkare igwọgwọk okpa isan̄a me akpalek ikike. Îre use eyi enyi esabe otutuuk ejit kinyi ichieek inyi Awaji, me okpa geege ikakupge enyi me ejit. Ekisa igwook-mun̄ yi inyan̄a ene isibi bak me lek ijojomo me mkpa eyi Jisọs ojomobe. ²² Mgbọ keyi, Karais ìkup me emen inyọn̄, mè isiki ikweek irek me agan̄ ubọk ulom Awaji. Me ere ya îkupbe, otutuuk ebi osat Awaji, mè otutuuk ebi ibot mkpulu geelek, mè ebi unye geelek ìkikpulu me linyọn̄ eyi eji kpesa chieen̄ imun̄, ekisiki ibot inyi ọmọ, ọmọ okekikpulu ema.

AKỌP ONYAN̄ 28–AKỌP MÈ ONYAN̄ GE 3

INU UNYE OTU EWE OKUP ME USEM AWAJI | 2 PITA 1-3

“Ìkikup Ìkpọ Inunu Eyi Usen Jioba”

(Pita Eyi Òso Iba 3:9, 10) Ìkare kubọk Okaan̄-ene ìkifafiat mgbọ me irọrọ use eyi îchieekbe ibe ke ọmọ môgwu ikom inu iso, kubọk usini ene ekimọnọ ibe ke îfiat mgbọ. Ire, ìsa mije ukarajit îkaan̄be me lek kinyi itaba mgbọ ya ijọn̄ọ, mije, ìkiweek ibe otutuuk ene egwu ekom. Ìkaweek ibe ene geege ichep. ¹⁰ Ire, Usen Okaan̄-ene obonu ìbokana isibi me uwuuk-lek kubọk ogwu inọ. Me usen ya, akpabin inyọn̄ môsa me ida uga okput ininiin̄ ita, ìkpoyaka ikup. Ukan̄ môkala inu geelek òkup me isinyọn̄, mè itaka ema otutuuk iriọk. Linyọn̄ keyi mè otutuuk ikwaan̄ geelek esibe me emen kan̄ môkpọk mbum, mè ikup njak.

w06 12/15 27 ¶11

Jioba “Môsibi Unen Oyerebet”

¹¹ Kpa ubọk ke eji ebegobo itet usem ukarajit Jisọs otumube, ibe ke Jioba mosibi unen oyerebet ‘ugwat ugwat’? Usem Awaji ikijeen̄ ibe ‘ikerere ibe ke Jioba ikekime mkpọ ifiin̄,’ ikpofiat mgbọ isisibi unen oyerebet mgbọ isikem. (Luk 18:7, 8; Pita Eyi Òso Iba 3:9, 10) Me usen kè Nuwa, mgbọ Mun̄ Ile ya onube, mifiat ebi mkpikpak mè ekafiatge mgbọ. Ikeya si, me usen kè Lọt, mgbọ ukan̄ onanan̄a me emen inyọn orepbe igwook, ebi ikpak mikwaan̄ isan̄a. Jisọs ibe: “Ikeyi si ke ìbokup me usen Gwun̄ Ebilene môyakabe ikpọk inu.” (Luk 17:27-30) Ofifi, “mfiat mè mkpa” ibonunu inyi ebi ikpak “me uwuuk-lek.” (Ebi Teselonaika Adasi 5:2, 3) Me atikọ, eji mekọt itoon̄ ejit ojot ojot ibe ke Jioba ikpochieek ibe inyọn̄ Setan yi ikup usen ge iraka mgbọ iweekbe.

(Pita Eyi Òso Iba 3:11, 12) Eyi Awaji obofiat otutuuk inu geelek isan̄a ikeyi, ìre kpasi ugwem ogbe ibe enyi eluk? Îgbe ibe enyi eluk ugwem eyi òkukup me mbuban, mè ikinyi Awaji umin. ¹² Ìkiluk ojelek ugwem òkup ikeya ìsa ìkikup ìkpọ inunu eyi Usen Awaji obosibi oyerebet me ibot linyọn̄, mè ìsa ìkirọ si inyi Usen ya igwat lek inu. Usen ya ke akpabin inyọn̄ obotaka iriọk me ukan̄, otutuuk inu òkup me isinyọn̄ môkakala, mè itaka iriọk me ukan̄ ya si.

w06 12/15 19 ¶18

‘Ikpele Usen Oyerebet kè Jioba Igbet’

¹⁸ Ọmọ orọ Pita otumube ibe: “ìkikup ìkpọ inunu eyi usen Awaji obosibi oyerebet me ibot linyọn̄.” Kpa ubọk ke eji ebekọt irọ eyi? Oniin̄ ge ire sa me iluluk “ugwem eyi òkukup me mbuban, mè ikinyi Awaji umin.” (Pita Eyi Òso Iba 3:11, 12) Itatap lek me lek mbet inu okup ikecha motap ubọk irọ me eji ekesa me uyọk uyok ejit ekekup ekpọ ‘ikpele usen oyerebet kè Jioba.’ Usem Grik esabe ikaba “ìkikup ìkpọ” ire “irọrọ me mkpọ igwat.” Eji kpekọt ichubọk irọ inyi mgbọ osisik sabum usen Jioba obonu igwat. Ire, ike eji ekup ikikpọ usen ya, ibokukup kubọk mgbọ ikigwagwat lek iraka ire eji mitap lek me ikwaan̄ Awaji. —Ebi Kọrint Eyi Adasi 15:58.

Week Inu Unye Otu Ewe Okup Me Usem Awaji

(Pita Eyi Adasi 1:19) Me lek kiji, inu yi òrọrọ îrọ ikọ ebi nriran etumube me ukot ikaan̄ inye. Eya orọ, îgbe ibe enyi egban̄ utọn̄ me lek ikọ ebi nriran cha, mije, ikọ cha ìkup kubọk mkpukan̄ òkitoon̄ me ere òdudun. Môtoon̄ ikeya mege ire mgbọ egwe môwelebe, ntoronyan̄ otu ewelegwe mônenisibi ikeke me emen ejit kinyi.

w08 11/15 22 ¶2

Inu Ekpabe Ofolek Ikpa Jemis mè Pita

1:19—Ekene ore “ntoronyan̄ otu ewelegwe” ya, kpa mgbọ ke isibi, mè ike owa ke eji esa iriọọn̄ ibe ke eyi ichubọk irọ? Jisọs Karais, ogwu okikpulu Ama Ubọọn̄ Awaji ore “ntoronyan̄ otu ewelegwe” ya. (Ichi 22:16) Me 1914, Jisọs isibi ikeke me isi otutuuk inu nrọm kubọk Ogwu Ubọọn̄ Aya Inyọn̄, eyi okijeen̄ ibe ke aya usen ibene. Nnwene akpalek kè Jisọs ijeen̄ sọnja mbet lek ujamgbugbo mè unye Jisọs okaan̄be kubọk ogwu okikpulu Ama Ubọọn̄ Awaji, eyi okijeen̄ ibe ke usem Awaji inan̄a me otu ebi nriran ire usem ebetoon̄ ejit me lek. Isusun̄ nkeek kiji me lek usem cha ikirọ me eji egobo etet mè eriọọn̄ ibe ke Ntoronyan̄ Otu Ewelegwe ya isibi ikeke.

(Pita Eyi Òso Iba 2:4) Mgbọ ebi osat me lek kiban̄ erọbe Awaji ilọ, Awaji ìkatele ema. Ìkpukpulu ema itọp itap me ama yọk [‘Tatarọs’ NW ], mè itap ema mkpọn me emen udọn̄ uga òdudun. Ere keya ke ema ebekup ire Usen Oyerebet Awaji.

w08 11/15 22 ¶3

Inu Ekpabe Ofolek Ikpa Jemis mè Pita

2:4—Keke ore “Tatarọs,” kpa mgbọ si ke etap ebi osat ikpakpaka ibot me irek ya? Tatarọs ire irek okup kubọk mkpọn—eyi etapbe ebi osat gaalek—ikare ebilene. Ire irek òdodun enenen ofolek nkeek Jioba okitotoon̄. Ebi ikup me Tatarọs kpekaan̄ ikpọchieen̄ geege ofolek mgbọ okup me isi. Awaji itọtọp ebi osat ikpakpaka ibot itap me Tatarọs me usen kè Nuwa, me irek esip ya si ke ema ebekup mege mefiatbe ema.

Ifufuk Baibul

(Pita Eyi Òso Iba 1:1-15) Emi Saimọn Pita, ogwu ikwaan̄ kè Jisọs Karais, mè ogwu otuchieen̄ kè Jisọs Karais, nkige ikpa etip keyi ijet enyi ebi ìsasa me ata irọrọ eyi Awaji kiji mè Ogwu Unyan̄a kiji Jisọs Karais ibọkọ ojelek unye otu ewe ichechieek eji ekaan̄be. ² Atata nnwọn mè esuuk imumana inyi enyi ike enyi ekiriọọn̄ Awaji, mè ikiriọọn̄ si Okaan̄ kiji Jisọs ifo isi. Ubọk bọn Awaji eberọ inyi igwen Awaji ogwenbe ema ikeke inye ³ Awaji îsa me unye kan̄ inyi eji otutuuk inu geelek òkukup me uyọt ibe eji ekaan̄ sabum eji mênikọt iluk ugwem me oniin̄ òbokinyi ọmọ umin. Awaji ìnyi eji inu chi inan̄a me lek eji eriọọn̄be ọmọ ogwu òsasa me umin kan̄ mè nnwọn kan̄ igwen eji. ⁴ Sa me umin mè nnwọn yi ke Awaji onyi eji ikpele unye otu ewe inu cha echi îchieekbe use inyinyi eji. Sa me ikeyi si ke enyi ebekọt inwọnọ filafila ugwem eyi ijo ulọk okisa inu me linyọn̄ keyi, mè igọọk igbaan̄ ikup ubọk Awaji okupbe. ⁵ Mije keyi gaalek, ìkaan̄ ata ugwem ìgbaalek ichechieek enyi ekaan̄be, mè ìkaan̄ ifuk-ibot ebi eyi Awaji ìgbaalek ata ugwem enyi ekaan̄be. ⁶ Ìkitet lek kinyi ìkaan̄ ìgbaalek ifuk-ibot enyi ekaan̄be, mè ìkikaan̄ ujọn̄ọ ukarajit ìgbaalek itetet lek eyi enyi ekitet. Ìkikaan̄ ukpook Awaji me emen kinyi ìgbaalek ujọn̄ọ ukarajit enyi ekikaan̄. ⁷ Ìkikaan̄ ata ejit eyi ngwan̄ mè ngwan̄ ìgbaalek ukpook Awaji eyi enyi ekikaan̄, mè ìkimun̄ ene me chieen̄ ìgbaalek ata ejit eyi ngwan̄ mè ngwan̄ enyi ekikaan̄. ⁸ Mije, ire enyi ikaan̄ ata ugwem chi me emen kinyi, mè ikije inyi isi me emen kiban̄, ema mêrọ inyi efuuk ikakita enyi me emen, mè irọ si inyi enyi ekesi ata ikwaan̄ efo isi inan̄a me lek enyi eriọọn̄be Okaan̄ kiji Jisọs Karais. ⁹ Gwun̄ Nte geelek ikakaan̄ge inu chi me emen ugwem kan̄, gwun̄ Nte ya înin̄ ǹnàan̄, ìkakimọọn̄ inu ìjọn̄ọ ere. Îwuuk ibe ke Awaji îra igwọk oka ijo inu kan̄ isan̄a ọmọ me lek. ¹⁰ Eya orọ, bọn Nte n̄a, ìsa ikpele ulọk ìsi ikwaan̄ ìgak adasi mgbọ, inyi enyi esa me ikeya erọ igwen Awaji ogwenbe enyi mè igogobo eyi Awaji ogobobe enyi enye. Mije, ire enyi ikirọ inu chi, enyi kpebenan̄a irọn̄ me emen ichechieek kinyi kubọk ge. ¹¹ Sa me ikeyi, Awaji mônyi enyi otutuuk unen, inyi enyi eraka enin̄ emen mkpulu eyi Okaan̄ kiji mè Ogwu Unyan̄a kiji Jisọs Karais, eyi môkupbe ire mgbọ ikakaan̄ge itata. ¹² Mije keyi, mâkikeek enyi inu chi mgbọ geelek, ubọk geelek enyi ewuukbe lek iriọọn̄ ema iraka, mè ikeke inye me emen atikọ enyi ekaan̄be. ¹³ Mmun̄ ibe ke îtat ibe emi ǹkenkeek enyi inu chi me mgbọ keyi nkupbe me ugwem me akpalek keyi. ¹⁴ Mije, nriọọn̄ ibe ke mâkwu me ikajọn̄ọge mgbọ, kubọk Okaan̄ kiji Jisọs Karais otumube ikpọk mbum inyi emi. ¹⁵ Ubọk geelek nkọtbe, mârọ mè enyi ekawuuk inu chi, inyi enyi ekekeek ema efo isi mgbọ emi mâkwube iraka.