Ikpa Okikpa Nkween̄mkpọ Ugwem Mè Ikwaan̄ Kiji Kubọk Ebi Eyi Karais
ONYAN̄ GO 3-9
INU UNYE OTU EWE OKUP ME USEM AWAJI | OTU IFUK 27-29
“Kaan̄ Eru Kè Jioba Ogwu Ikakigobo Ene Isi”
w13 6/15 10 ¶14
Riọọn̄ Ubọk Kinwọọn̄ Eru Echi Jioba Okaan̄be
14 Ebi ngwan̄ ebibaan̄ go cha ejeje isi lek kè Mosis mè ido ọmọ ibe: “Ìre erieen̄ nte kiji ìbojeje inan̄a me etete ebi owot iman kiban̄ ichep ikeya, mije ikakaan̄ge gwun̄ enerieen̄?” Ema ebebeek ibe: “Ikaan̄ uche ìrot òrere nte kiji lek me etete ebi ngwan̄ kan̄, ìsa ìnyi eji.” Ire Mosis itumu inyi ema ibe, ‘Mbet inu keya ikpokọt ibọkọ irek nje’? In̄-in̄, isasa ‘ikọ kiban̄ inu me isi Jioba.’ (Ifuk. 27:2-5) Keke ore ufọọk-otu? Jioba itumu inyi Mosis ibe: “Inu bọn ebibaan̄ kè Jelofeyadi ekitumu ìre unen. Me atikọ, owu mônyi ema uche ìrot me etete ebi ngwan̄ nte kiban̄, mè isa me ikeya iyaka ìrot eyi nte kiban̄ isa ikana inyi ema.” Jioba osasa inu yi eyi mebe ke ikagbe isa irọ ikan, mè iteme Mosis ibe: Ire “ikaan̄ ogwu enerieen̄ geelek òkwukwu, mè ìkakaan̄ gwun̄ enerieen̄ geege, ke mêsa ìrot kan̄ ikana inyi ogwu gwun̄ enenwaan̄.” (Ifuk. 27:6-8; Jos. 17:1-6) Bene me usen ya, otutuuk ebibaan̄ ebi Ijeren ebi ikakaan̄ mbet ufiak keya ire ebi ekebinyi irot nte kiban̄.
w13 6/15 11 ¶15
Riọọn̄ Ubọk Kinwọọn̄ Eru Echi Jioba Okaan̄be
15 Kpọ nu ntumumfiek eyi ikakaan̄ge mfeen̄ geege me emen! Jioba imọnọ ebibaan̄ chi ebi irek kiban̄ ikanwọnge ibene kubọk imọnọbe si ebi Ijeren ebi irek onwọnbe. (Itọn̄. 68:5) Eyi ire ge me lek ogbogbo mfufuk Baibul echi okijeen̄ mbet atikọ okisiki ene ejit: Jioba ikikpọ chieen̄ me lek otutuuk ebi eyi kan̄ ikike ikike.—1 Sam. 16:1-13; Ikwaan̄ 10:30-35, 44-48.
w13 6/15 11 ¶16
Riọọn̄ Ubọk Kinwọọn̄ Eru Echi Jioba Okaan̄be
16 Ike owa ke eji ebekọt isa ikaan̄ eru kè Jioba ogwu ikakigobobe ene isi? Riọọn̄ ibe ke igogobo ene isi ikup irek iba. Ire gaalek ibe ke eji ire ebi kpekebigobo ene isi ke eji ebekọt ikirọ mkpọ me lek ebi ofifi ife me kpegobobe ema isi. Ire atikọ ibe ke otutuuk kiji mekọt ikikeek me lek kiji ibe ke eji kpekigobo ene isi, ke ejit kiji ikibọbọkọ otutuuk ene itap. Omokọt ichieek ijaan̄ ibe ke ikakimalek ifet ibe eji gaalek ekọt ewọlọ lek kiji ekpọ me eriọọn̄ mbet ene eji erebe. Eya orọ, keke ke eji ebekọt irọ ufuna eji eweek eriọọn̄ mè ire eji kpekaan̄ eru ikekigobo ene isi? Me ike mgbọ Jisọs oweekbe irọriọọn̄ ogwu ebi ene ekitumu ibe ke ọmọ ochubọk ire, ido ebi unene kan̄ itoon̄be ejit me lek ibe: “Ìre ebi ene ekitumu ibe ke emi Gwun̄ Ebilene ìre ekene?” (Mat. 16:13, 14) Ire kpomonwọn ni ibe orọ ike Jisọs orọbe? Omokọt ido usini ebi unene kwun̄ otoon̄be ejit me lek ibe eriọọn̄ ubọk ekpọ mè ire okaan̄ eru ikekigobo ene isi? Ire itumu inyi owu ibe ke okaan̄ sọọn̄ eru ikekigobo ene isi igọọk me lek ere ene onan̄abe, ogwu irebe, mè iyaka ire irek iluk ugwem, oboyaka irọrọ? Sa me otutuuk ejit kwun̄ riaak uriaak mè kpa nkeek kwun̄ nyi Jioba, beek ogọt ibe itap ubọk irọ ufuna okọt onwene eru kwun̄ kisi okọt okojeen̄ eru Jioba ikakebigobo ene isi ojaan̄.—Mat. 7:7; Kọl. 3:10, 11.
Week Inu Unye Otu Ewe Okup Me Usem Awaji
it-2 528 ¶5
Ngwugwa
Ngwugwa Miin̄. Ngwugwa miin̄ ire eyi ekigbaan̄ igwa me lek ofifi ofifi chieen̄ ngwugwa, ogakge me mgbọ ebi Ijeren ekabe inu me Ijọn̄ eyi Echieekbe Use. (Ifuk 15:2, 5, 8-10) Eyi ire miin̄ (“miin̄ okisasa ene”) eyi ekigwook me inyọn̄ ntook. (Ifuk 28:7, 14; kpọ si Isis 30:9; Ifuk 15:10.) Ogwu ikwaan̄ Pọọlu ige ikpa ijet ebi ebi eyi Karais ikup me Filipai: The apostle Paul wrote to the Christians at Philippi: “Usini mgbọ, ugwem n̄a obore kubọk miin̄ ebesa itọkọ ikwook me lek ngwugwa ya. Ìrere ikeya ke ìbokup, emi mâbele ejit.” Me ekeyi isa ngwugwa miin̄ irọ mkpọ, ikisa ikpa olilọk kan̄ me isasa lek kan̄ isi ikwaan̄ me ibot ebi ebi eyi Karais ogbo kan̄. (Filip 2:17) Sabum ikwube, ige ikpa ijet Timoti ibe: “Mîwuuk lek isa emi igwa ngwugwa kubọk miin̄ egwookbe me ijọn̄. Mgbọ mbatele ugwem keyi îra ikem.”—2 Tim 4:6.
ONYAN̄ GO 10-16
INU UNYE OTU EWE OKUP ME USEM AWAJI | OTU IFUK 30-31
“Kalọlọ Irọrọ Inyan̄a-ibot Iwun̄ Iso”
it-2 1162
Inyan̄a-ibot
Ekirọ Inan̄a Me Ejit, Ire, Ire Inu Ekitetet Inye Me Mgbọ Geelek Erọbe. Inyan̄a-ibot ire eyi ekisa otutuuk ejit ene irọ. Ire ikan Awaji ibe mè mgbọ geelek ene onyan̄abe ibot mè ene ya ikalọlọ irọrọ inyan̄a-ibot kan̄ iso. Ọmọrọ etumu mkpọ ofo me lek inyan̄a-ibot kubọk ire mkpọ ‘ene osabe ibọp lek kan̄,’ eyi osibi ibe ke ire ikarọ ikọ otu kan̄ iso, ke ibokwukwu. (Ifuk 30:2; kpọ si Rom 1:31, 32.) Eyi irere ibe ke igọbọ ugwem, eji mekọt igobo itet mkpọ orọrọ Ikpa Mbuban okebitap ene efuuk me owot ibe eriọọn̄ ubọk ekeek inu edọk sabum enenyan̄a ibot, mè eriọọn̄ ubọk ekeek mbet akpan ikwaan eji ebebọkọ. Ikan̄ ya itumu ibe: ‘Ire owu ònyan̄a ibot, inyi Jioba. . . Awaji kwun̄ ìkpolọlọ inenido owu inyan̄a-ibot ya. Eya mônenikana ijo inu me ibot kwun̄. Ire, ire owu otet otu kwun̄ ikaan̄ okanyan̄a ibot, ikan ijo inu geege ìkabọp owu.’—Ikan 23:21, 22.
it-2 1162
Inyan̄a-ibot
Use eyi ene ochieekbe Awaji mè imọnọ isun̄ ufiak irọrọ ikwaan̄, igwa ngwugwa mè iyaka ire inyi inyinyi, igbaan̄ nchieek me lek usini inu mè iyaka ire irek, mè isan̄a lek kan̄ me lek usini inu ikerere ibe ke inu cha ikakeke ikeme ikan. Inyan̄a-ibot ire inu eyi ene osabe ejit kan̄ gaalek isibi ifieek. Kubọk ire use eyi okukup me ufiak, usem inyan̄a-ibot (orere vow) ire chieen̄ yaage me lek (oath mè iyaka ire swearing), usini mgbọ si me emen Baibul, usem iba chi ikigbagbaan̄ ije. (Ifuk 30:2; Mat 5:33) “Vow” ikimalek ire itutumu nkeek ene isibi, ire “oath” ire usem ekisa irọ mkpọ me isi ebi mkpulu ikisa ijeen̄ ibe ke usem ene okebitumu ire atikọ. Oaths, ekimalek isa irọ usem inyan̄a-ibot (covenant) ijot.—Ibeb 26:28; 31:44, 53.
w04 8/1 27 ¶3
Ikpakpa Isibi Inu Okup Me Emen Ikpa Otu Ifuk
30:6-8—Ire ogwu eyi Karais mokọt igwak inyan̄-ibot ogwu nwa onyan̄abe nje? Ofo me lek inyan̄a-ibot, Jioba ikirọ inu me lek ebi eyi kan̄ me ene me ene. Kubọk mkpọ njeen̄, isasa lek inyi Jioba ire mkpọ ene ge ge okirọ. (Galesia 6:5) Olom ikakaan̄ unen igwagwak mbet inyan̄a-ibot keya. Eya orọ, nwa kpobokinyan̄a ibot oboje ntikwo me lek Usem Awaji mè iyaka ire eyi obogban ogọt me ikekikpọ chieen̄ me lek ogwu olom kubọk ire nwa.
Week Inu Unye Otu Ewe Okup Me Usem Awaji
it-2 28 ¶1
Jefita
Mekọt isa ene inyi irọrọ ikwaan̄ inyi Jioba me ere mbuban kan̄. Uga mè ute mikaan̄ unen irọrọ eyi. Samien ire ene ge ogwu Ana ogwu uga onyan̄abe ibot mè ichieek use isasa inyi ibe ikigọọk isi ikwaan̄ me akpatan̄ mbuban sabum enimaman ogọt. Inyan̄a-ibot ire eyi Elikana ogwu olom obieen̄be inye. Ibaban Samien ebe, Ana osasa ogọt ijet me uwu mbuban. Ana isa ngwugwa anam igbaalek kan̄ inu. (1 Sam 1:11, 22-28; 2:11) Samsin ire ofifi gwun̄ ogwu echubọk isa inyi me lek ikwaan̄ Awaji kubọk ire ogwu okup me inyan̄a-ibot eyi isusun̄ lek esese inyi Awaji.—Oyer 13:2-5, 11-14; kpọ nu unye eyi ute okaan̄be me lek gwun̄ kan̄ ogwu enenwaan̄ kubọk ikupbe me ikpa Ifuk 30:3-5, 16.
ONYAN̄ GO 17-23
INU UNYE OTU EWE OKUP ME USEM AWAJI | OTU IFUK 32-33
“Irieen̄ Otutuuk Ebi Iluk me Inyọn̄ Ijọn Ya Isan̄a Kpai”
w10 8/1 23
Ire Oriọọn̄ Ni?
Echi owa ire “isi-ijọn̄” echi emabelek ichak otu me lek me agan̄ Ikpa usem Iburu?
Me mgbọ ebi Ijeren ebenin̄ inyọn̄ Ijọn̄ eyi echieekbe me Use, Jioba otutumu inyi ema ibe mè ema ejijaka otutuuk ere ebi Kenan iluk me ijọn̄ ya ekebitọbọ ebum. “Ijijaka . . . otutuuk mkpọ mfaka kiban̄ cha geelek, echi ekọkọ mè echi etọtọkọ, mè ijijaka si otutuuk isi-ijọn̄ kiban̄ cha geelek ìgbaalek,” Eyi ore inu Awaji otumube. (Otu Ifuk 33:52) Ere ataak ntọbọ ebum cha mokọt ire me inyọn̄ ogoon̄ mè iyaka ire echi enamabe me ofifi ofifi ere, kubọk ire irak uti ile mè iyaka ire me emen uga ama. (1 Ebi Ubọọn̄ 14:23; 2 Ebi Ubọọn̄ 17:29; Ijikien 6:3) Mokọt ire ntook, ogbugboon̄, mkpọ ekọkọ mè ibot, ngugọọn̄ nsensi, melek ofifi ofifi asabọn mkpọ echi ema ekisa igbaalek itọbọ ebum.
w08 2/15 27 ¶5-6
Kween̄ Mkpọ Nan̄a me lek Nrọnlọ ebi Ijeren
Me chereyi, eji mikikaan̄ ogbogbo rumurumun̄ kubọk mbet echi ebi Ijeren echichinibe. Ebi inyọn̄ yi me cherekeyi mikaan̄ mkpọ mfaka eyi kiban̄ si. Echi igọbọ ikpoko, inwọọn̄ lek, uwọlek eyi ifit ikpọk lek, rumurumun̄ mkpulu, usini ebi ibot uwu uriaak, melek ebi owu ene. Ge me lek inu chi mokọt ikana ufiak me ugwm kiji. Ikakaan̄ mgbaan̄je orariaak me lek ebi kpemage Jioba mokọt irọ ibe eji enan̄a erọn̄ me irek emen ekwukwu.
Mbet lek ilaak olom mè nwa eyi ikagbege ochubọk ire ge me lek ntọbọ ebum eyi Bali eyi otataba ulọk owuwua ebi Ijeren. Ebi eyi Awaji si mekirọn̄ mbet lek ufe okup ikeya. Kubọk mkpọ njeen̄, ikekeme ere ge gaalek me okwukwut nden̄ me mgbọ ene okupbe ọmọ gaalek me uwu kan̄ mokọt ire gaalek mkpọ obofiat unye nkeek ogwu keya otetet lek inye mè ikaan̄ ata nkeek. More inu ufiejit enenen mire ogugo njak ekitap me ntaneti ikọt ikọlọ ebek ogwu eyi Karais!
it-1 404 ¶2
Kenan
Inan̄a me iriọọn̄-inu, Josuwa ‘ìkasan̄a inu geege me lek otutuuk inu Jioba onyibe Mosis ida ibe erọ’ ofo me lek ijijijaka ebi Kenan. (Jos 11:15) Ire ebi Ijeren kpechieek igọgọọk ata akpat ukot kan̄ me isasan̄a ebi ikififila inyọn̄ ijọn̄ ya isan̄a. Mije ibe ke ebi Kenan egbaan̄ iluk si me eden̄ ebi Ijeren, eyi irọ ibe ebi Ijeren ebene ekerọ mbet lek eru kiban̄ eyi osasa mkpa inu inyi ema me mgbọ mgbọ ojebe me lek, (ikanin̄ me lek mfiat ikan, barabat, mè irariaak mkpọ mfaka) eyi kpomobọkọ irek mè ire ibe ema merọ igọọk me ubọk enyibe ida ibe ekpan̄ otutuuk ebi Kenan esan̄a. (Ifuk 33:55, 56; Oyer 2:1-3, 11-23; Itọn̄ 106:34-43) Jioba itaba ebi Ijeren ubọk me utọn̄ ibe ke ọmọ ikposa unen oyerebet melek isisibi oyerebet kan̄ igobo ene isi, eya orọ mè ire ebi Ijeren ikigọọk ebi Kenan imuman̄a, ikikaan̄ mbat olom me lek kiban̄, ikigọọk iche ichechieek kiban̄, mè ikirọ mbet orọmijọn̄ ema ekebirọ me ntọbọ ebum kiban̄ melek ten̄ten̄ irọrọ kiban̄ cha, ke kpolọlọ ema si ikakaan̄ osusut yaage eyi ifafiat ene, eyi isibi ibe ke ‘mesan̄a ema isan̄a me inyọn̄ ijọn̄ ya.’—Isis 23:32, 33; 34:12-17; Lib 18:26-30; Ikan 7:2-5, 25, 26.
Week Inu Unye Otu Ewe Okup Me Usem Awaji
it-1 359 ¶2
Okike Ijọn̄
Esiroon̄ nriroon̄ isa iriọọn̄ okike ere otoko ge obokup isan̄a, iyaka ikup me ufiak si irọriọọn̄ okike uwele ijọn̄ ya igọọk me lek òso mkpọ iba: uwele ogbegbe igọọk me uwa ene. “Ìroon̄ nriroon̄ ìsa ìche ijọn̄ cha ìnyi lek kinyi me ìrot, ìgọọk me ikeke otoko geelek. Otoko òmimin môkaan̄ ijọn̄ òmimin, otoko òsisip môkaan̄ ijọn̄ òsisip. Okike ijọn̄ geelek òrọrọn̄ inyi otoko geelek, eya obore eyi kiban̄.” (Ifuk 33:54) Ntumumfiek eyi ìroroon̄ nriroon̄ isa iche ijọn̄ ire eyi kpenwenwenebe, ire mekọt irọ unwene me lek ikeke uwele ìrot ijọn̄ otoko ge obokaan̄. Omọrọ, me mgbọ ijọn̄ ebi otoko kè Juda omaabelek imin, mikpọkọ ijọn̄ ya igele mè iyaka isa usini me lek inyi ebi otoko kè Simiọn.—Jos 19:9.
ONYAN̄ GO 24-30
INU UNYE OTU EWE OKUP ME USEM AWAJI | OTU IFUK 34-36
‘Tap Ibot me Irak Ubọk kè Jioba’
w17.11 9 ¶4
Ire Okakitap Ibot me Irak Ubọk kè Jioba ni?
4 Ike owa ke ebi Ijeren ekisa ikpọ chieen̄ me lek ebi ilọlọ ubọk ikpan̄ ene? Ikerere ibe ke ilọlọ ubọk, ikan mkpan̄ ene itet si ogwu okpakpan̄ ene me mfiat. (Gen. 9:5) Ire, inan̄a me nsan, mitele ibe ilibi inwọnọ ebi ebekpan̄ ọmọ me useen̄ mè ifo ge me lek ama itap-ibot cha. Ọmọ mokọt ikaan̄ ikput lek me emen ama ya. Ogwu olọlọ ubọk ikpan̄ ene mokup me emen ama itap-ibot ya mege ogwu oban Awaji môkwube.—Ifuk. 35:15, 28.
w17.11 9 ¶6
Ire Okakitap Ibot me Irak Ubọk kè Jioba ni?
6 Me mgbọ ilọbe ubọk ikpan̄ ene, ọmọ ibodasi “ikpa inu ọmọ orọbe inyi ebi ugane ema ya enọ” me otunchit ama itap-ibot eyi ilibibe inin̄ ya. Mebọkọ ogọt itap kubọk ene ge me ama ya. (Jos. 20:4) Mgbọ isiraka me lek, meraria ọmọ ijet ebi ugane me ama ere ikpan̄be ene ya, ebi ugane cha mefefiek oyerebet ya. (Fuk Otu Ifuk 35:24, 25.) Ire gaalek mgbọ efiekbe ibe ke ilọlọ ubọk ikpan̄ ene ya ke ogwu okpan̄ ene ya obogwu ikom ifo ama itap-ibot ya.
w17.11 11 ¶13
Ire Okakitap Ibot me Irak Ubọk kè Jioba ni?
13 Me emen ama itap-ibot, kpunu mkpọ geege obore lek ogwu olọlọ ubọk ikpan̄ ene ya. Ofo me lek ama cha, Jioba itumu ibe: “Ama ya monenire ere itap-ibot inyi ene ya.” (Jos. 20:2, 3) Jioba ikaweek ibe ekpọk esibi oyerebet me ibot ene ya me lek ikọ yaage; ogwu okisan̄a useen̄ eje ikpobonin̄ emen ama ya si isikpan̄ ene ya. Ogwu okpan̄ ene ya ikpobotet ukpook ibe ke menirọ ọmọ nnaan̄ me useen̄ ene ikpan̄be. Me emen ama ya, ikaan̄ utelelek melek mban kè Jioba. Eyi ikare emen uwu mkpọn. Ama yi ibook ire inyi ogọt isisi ikwaan, itap ubọk inyi ebi ofifi ife, mè ikọt ikitọbọ ebum inyi Jioba si mè ikaan̄ esuuk. Ọmọ mokọt iluk mè inwọọn̄ ugwem kubọk otutuuk ene ekebiluk!
Week Inu Unye Otu Ewe Okup Me Usem Awaji
w91 2/15 13 ¶13
Mkpenwene Okekem Isa Inyi Otutuuk Ene
13 Adam melek Îfu kpebekaan̄ oruru me lek mkpenwene. Ikan kè Mosis iben onineen̄ okup ikeyi: “Kpebebọkọ mkpọ inwene-ibot geege me useen̄ ogwu òkpan̄-ene, ogwu ògbe mkpa.” (Otu Ifuk 35:31) Kpefian̄ Adam, omọrọ ijo kan̄ ire eyi igenbe ibak irọ. (1 Timoti 2:14) Eyi irọ ibe nsabọn kan̄ ekekwaan̄, mije ema eyaka ibọkọ ekasoge kan̄ me ìrot, mè isa me ikeya ibọkọ mkpukpe mkpa. Me atikọ, igbe ibe Adam ikwu, mije kubọk ire ogwu ososo, ọmọ igegen ibak ije ikeme ikan̄ Awaji. Moje ikeme onineen̄ ata ubọk irọ inu ke Jioba mè ire mkpenwene mokup si inyi Adam. Ikpekpe mkpukpe me ibot ijo kè Adam, ore inu onyanyan̄a nsabọn Adam isibi me ubọk mkpa! (Ebi Rom 5:16) Igọọk me lek ikan, misan̄a unye eyi ijo inu okebisa ifiat ene isan̄a. Ogwu okpekpe mkpenwene yi ‘ikwu mkpa mije otutuuk ebilene,’ mè ibeme mkpukpe ijo inu okup inyi otutuuk nsabọn Adam.—Ebi Iburu 2:9; Ebi Kọrint Eyi Òso Iba 5:21; Pita Eyi Adasi 2:24.
ONYAN̄ GO 31–ONYAN̄ GWEREGWEN 6
INU UNYE OTU EWE OKUP ME USEM AWAJI | IKAN ÒSO MGBỌ IBA 1-2
“Ire Awaji Obosibi Oyerebet”
w96 3/15 23 ¶1
Jioba—Ogwu Omama Ata Ubọk Irọ-inu mè Unen Oyerebet
Ebi irere ebi ugane ntitiin̄ mikaan̄ akpan ikwaan̄ ikekisibi oyerebet me mgbọ ene orọbe ijo inu omimin. (Ebi Kọrint Eyi Adasi 5:12, 13) Ema isikisibi oyerebet, ema kpebewuuk ibe ke unen oyerebet Awaji ire eyi okijeen̄ si nsan me mgbọ igbebe. Ire ke ikagbe ibe ejeen̄ nsan—kubọk mbet ogwu ikachieekge igwugwu ikom—kpebekọt ijeen̄ ene ya nsan. Ire ebi ugane kpebesan̄a ogwu orọrọ ijo inu ya me ntitiin̄ kubọk ire ogwu orọrọn̄ ikan. Ema metoon̄ ejit ibe ke isasan̄a ogọt me ntitiin̄ morọ ibe iyaka igwu ikom. (Kpọ si Ijikien 18:23.) Ebi ugane ntitiin̄ kubọk ire ebi ikup me irak mkpulu kè Karais, ema ekinyi unen oyerebet, eyi igọbọ ema ikukup kubọk ire “ere ilet-lek me isi efet.” (Asaya 32:1, 2) Eya orọ ema mere ebi kpebekisa oyerebet iriọọn̄ ene isi mè ikaan̄ si iriọọn̄-inu.—Ikan Òso Mgbọ Iba 1:16, 17.
w02 8/1 9 ¶4
Sa me Usikilek Kisiki Ibot Nyi Ntọ-ikọ kè Jioba
4 Irọriọọn̄ Ikan ikasibi irọriọọn̄ isibi oyerebet. Kubọk ire ebi kpesoge, ebi ininin̄ ugane mekup me ugbalachieen̄ mè imun̄ ibe ke ema misan̄a ijo olilọk kiban̄ geelek isan̄a—kubọk olilọk lek ene, igogobo ene isi, melek umin-ejit—eya mokọt igban oyerebet kiban̄. Mosis itumu inyi ema ibe: “Ikasa oyerebet ìriọọn̄ ene geege isi. Ike enyi enọbe ikọ me otu ogwu sọntiik, ìnọ si ikeya me otu ogwu ilile. Ikalibi si ene geege chieen̄, mije, oyerebet geelek ìre eyi Awaji.” Me atikọ, ebi oyerebet me Ijeren ekisibi oyerebet inyi Awaji. Eya ichubọk ire irek omimin enenen!—Ikan Òso Mgbọ Iba 1:16, 17.
Week Inu Unye Otu Ewe Okup Me Usem Awaji
w13 9/15 9 ¶9
Nyaka-nkeek kè Jioba Ire Eyi Ogbegbe Utoon̄-ejit
9 Mgbọ ebi Ijeren esabe akọp acha ini (40) ije itibi emen èwê “eyi òkpọkpọ iwele mè ikaan̄ ukpook,” Jioba ikawuuklek itumu inyi ema okpọkpọ inu eyi ọmọ oborọ ofo me lek ubọk ibokisa ema ije, ibem, mè ikikpọ ema chieen̄ me lek. Ire, inan̄a me mgbọ ire me mgbọ, ọmọ ikpọkpọ ikijeen̄ ibe ke ema mekọt itoon̄ ejit me lek kan̄ melek nteme kan̄. Sa me isasa oduku inyọn̄ irọ mkpọ me ikarek melek ukan̄ me eririeen̄, Jioba ikikeek ebi Ijeren ibe ke ọmọ omọwa me lek kiban̄ okisa ema ije itibi emen ere ukpukpook ya. (Ikan. 1:19; Isis. 40:36-38) Ọmọ si ikinyi ema inu okukup ema me ufiak. “Ofọnti kiban̄ ìkagwak, ukot kiban̄ si ìkayiki.” Me atikọ, “inu geege ìkanan ema.”—Neyem. 9:19-21.
ONYAN̄ GWEREGWEN 7-13
INU UNYE OTU EWE OKUP ME USEM AWAJI | IKAN ÒSO MGBỌ IBA 3-4
“Ikan̄ kè Jioba ire eyi okakaan̄ iriọọn̄-inu mè inen”
it-2 1140 ¶5
Ngobo-ntet
Irọriọọn̄ ubọk ikikween̄ Baibul mè ikisa onineen̄ kan̄ itap me ikwaan̄ mokọt irọ ufuna ene iriọọn̄ inu igak ebi ijejeen̄ kan̄ mè ikaan̄ si ngobo-ntet igak ebi ininin̄ ugane. (Itọn̄ 119:99, 100, 130; kpọ si Luk 2:46, 47.) Eyi ibofet mije iriọọn̄-inu melek ngobo-ntet ire eyi ekikaan̄ inan̄a me lek onineen̄ melek ikan Awaji onyibe; eyi mọrọ mè ebi ofifi ido ikukup ikana ebi Ijeren ekimun̄lek ebi Ijeren igbegbe utoon̄-ejit mè ikisun̄ ikan chi kubọk ebi ‘ikakaan̄ iriọọn̄-inu, mè ikaan̄ si ngobo-ntet.’ (Ikan 4:5-8; Itọn̄ 111:7, 8, 10; kpọ si 1 Ubọọn̄ 2:3.) Ogwu okakaan̄ ngobo-ntet ikekiriọọn̄ ibe ke Usem Awaji ikpokọt inwene, okoweek ikekirọ mkpọ igọọk me lek usem Awaji, mè okobeek si ntap-ubọk Awaji. (Itọn̄ 119:169) Ikekichieek ibe usem Awaji ikije idọk me emen kan̄ (Mat 13:19-23), oge me inyọn̄ akpa ewuuk okup me ejit kan̄ (Urọk 3:3-6; 7:1-4), mè oyaka ocha “inu ofiaan̄ geelek” (Itọn̄ 119:104). Gwun̄ Awaji ijeen̄ ngobo-ntet me irek okup ikeyi me mgbọ ikupbe me inyọn̄ ijọn̄, mè ijit ililibi inwọnọ mkpa eyi ebekpan̄ ọmọ me inyọn̄ uti mije ire me ọmọ ikwukwu ikeya ke Ikpa Mbuban obosa irọ iso.—Mat 26:51-54.
w99 11/1 20 ¶6-7
Me Mgbọ Ekisa Otutuuk Ejit Inyi Inu
Inu ogwu ubọọn̄ enenwaan̄ onọbe mè imun̄lek ike ọmọ chieen̄ enenen, omọrọ ikpisa me usikilek itumu ibe: “Kpọ uga ubelejit òkup inyi ebi ikwaan̄ kwun̄ chi ebi ìkisi ikwaan̄ me isi kwun̄ mgbọ geelek, mè ikinọ iriọọn̄-inu kwun̄!” (Ebi Ubọọn̄ Eyi Adasi 10:4-8) Ọmọ ikabe ke ebi ikwaan̄ kè Solomọn ebekaan̄ ubelejit mije ubọk ema esabe ibale lek kiban̄ ijaan̄—ikerere ibe ema mijaan̄. Kpan̄asi ikeya, igbana ebi usun̄ kè Solomọn mije ibe ke ema ekigban̄ iriọọn̄-inu Awaji onyibe Solomọn me mgbọ geelek. Ichubọk ire ata akpat ukot ke ogwu ubọọn̄ enenwaan̄ Sieba ore isa inyi ebi eyi Jioba me chereyi, ebi ikinwọọn̄ iriọọn̄-inu ogwu Orom me lek kan̄ melek Gwun̄ kan̄, Jisọs Karais!
Ofifi inu ebetaba iman̄ me lek si ire usem ogwu ubọọn̄ enenwaan̄ ya oyakabe itumu inyi Solomọn: ‘Itọn̄ ikup inyi Jioba Awaji kwun̄.’ (Ebi Ubọọn̄ Eyi Adasi 10:9) Eyi ikijeen̄ ibe, ke imun̄ ibe ke ire Jioba onyi Solomọn iriọọn̄-inu melek mkpọ ubọọn̄ cha. Eyi ije ikike me lek use Jioba owuukbelek ichieek ebi Ijeren. Itumu ibe, ‘ìgwuun̄ chieen̄ ikisun̄ ikan n̄a,’ “mije, isusun̄ ikan chi obokijeen̄ ebi ofifi ido ibe ke enyi mîkaan̄ irọọn̄-inu mè ikaan̄ si ngobo-ntet. Ema isikinọ inu ofolek ikan chi, ema mênenikibe, ‘Me atikọ, ebi ikpele ido keyi mikaan̄ iriọọn̄-inu mè ikaan̄ si ifuk-ibot’.’ ”—Ikan Òso Mgbọ Iba 4:5-7.
w07 8/1 29 ¶13
Ire Obọọn̄ Ubọọn̄ “Me Emen Awaji Ni”?
13 Jioba isigbana ebi eyi kan̄, ikinyi ema inu onwọnwọn ichit. (Jemis 1:17) Kubọk mkpọ njeen̄, mgbọ Jioba onyibe ebi Ijeren ere ebeluk, inyi ema “ijọn̄ ya òkisibi anam mè mfut uti.” Ikere ibe ikeya si ke etumu mkpọ ofo me lek ijọn̄ Ijipiti, ijọn̄ eyi Jioba onyibe ebi Ijeren ije esese me lek eya mije ibot inu ge okukup me ufiak. Mosis itumu inyi ebi Ijeren ibe: ‘Îre ijọn̄ eyi Jioba Awaji kinyi gaalek okikpọ chieen̄ me lek.” Eyi osisibi ibe ke inu mokije ijaan̄ ema me lek, mije Jioba obokikpọ ema chieen̄ me lek. Me mgbọ ebi Ijeren esikigbe utoon̄-ejit inyi Jioba, ọmọ ikekigbana ema enenen, ira isibi utoon̄ ibe ke ema mekinwọọn̄ ugwem onwọnwọn igak eyi otutuuk ebi ido iluluk ikana ema. Me atikọ, ire ugbana kè Jioba “okitap ene ebọọn̄”!—Otu Ifuk 16:13; Ikan Òso Mgbọ Iba 4:5-8; 11:8-15.
Week Inu Unye Otu Ewe Okup Me Usem Awaji
w04 9/15 25 ¶3
Ikpakpa Isibi Inu Okup Me Emen Ikpa Ikan Òso Mgbọ Iba
4:15-20, 23, 24—Ire ikan obe ekafaka mkpọ ekọkọ geege isibi ibe ke ilọ ikọkọ mè iyaka ire igwook mkpọ isa ibala ere? In̄-in̄. Ikan yi ikup inyi ikọkọ mkpọ ikisa itọbọ ebum—ikup ikeme ‘ikekitọbọ ebum inyi mkpọ mfaka.’ Ikpa Mbuban ikakup ikeme ikọkọ mkpọ mè iyaka ire igwogwook mkpọ isa ibala ere.—Ebi Ubọọn̄ Eyi Adasi 7:18, 25.
ONYAN̄ GWEREGWEN 14-20
INU UNYE OTU EWE OKUP ME USEM AWAJI | IKAN ÒSO MGBỌ IBA 5-6
“Kpukpo Nsabọn Kwun̄ Ufuna Ema Jioba”
w05 6/15 20 ¶11
Uga mè Ute, Inyi ebi Ototun̄ Ukan̄ Kinyi Inu ema Eweekbe
11 Me lek ibot usem keyi, ere Baibul ekimalek isa irọ mkpọ ire ikpa Ikan Òso Mgbọ Iba 6:5-7. Soso chili Baibul kwun̄ mè fuk ere Baibul cha. Riọọn̄ ibe ke uga mè ute ke edasi itumu inyi ibe enama irek emen ekwukwu kiban̄ enye, ekaan̄ ima me lek Jioba mè ekaan̄ usem kan̄ si me ejit. Me atikọ, owu omomọnọ Usem Awaji isun̄ ufiak, ikifuk Baibul mgbọ geelek mè ikigwu nkeek ikom melek ufuna okaan̄ ata ngono-ntet mè oma oniin̄ kè Jioba, oninieen̄, melek ikan kan̄. Eyi morọ ibe onoriọọn̄ atalek atikọ echi Baibul eyi oborọ mè okaan̄ unwọọn̄, okimin mè oma si Jioba. Enyi mekaan̄ ogbogbo ata inu enyi ebesa ijeen̄ nsabọn kinyi.—Luk 6:45.
w07 5/15 15-16
Ike Owa Ke Mbasa Inyi Nsabọn N̄a Ata Kpokpo?
Inu oweekbe irọrọ, inu okaan̄be me nkeek, inu omabe enenen, melek olilọk kwun̄ mokpọk mbum inan̄a me lek inu okitumu melek irọrọ kwun̄. (Ebi Rom 2:21, 22) Nsabọn ekibene ikween̄ mkpọ karake mgbọ ema ekupbe sọntitiik sa me irọriọọn̄ ubọk ikikpọ ebi nga kiban̄ mè nte kiban̄. Nsabọn ekekimun̄ mkpọ okukup me ufiak inyi nga kiban̄ mè nte kiban̄, ikimalek ire inu ya si ke nsabọn ekimọnọ isun̄ ufiak. Ire ochubọk ima Jioba, nsabọn kwun̄ meriọọn̄. Kubọk mkpọ njeen̄, ema memun̄ ibe ke ikekifuk mè ikikween̄ Baibul ikup owu me ufiak. Ema meneniriọọn̄ ibe ke owu oto irọrọ nkeek Awaji kubọk adasi inu me ugwem kwun̄. (Matiyu 6:33) Owu ikekisi Ntitiin̄ mgbọ geelek mè ikigọọk isilook ata etip Ama Ubọọn̄ mokijeen̄ ema ibe ke isisi ikwaan̄ eyi okup me mbuban inyi Jioba ore okpan okpan inu me ugwem kwun̄.—Matiyu 28:19, 20; Ebi Iburu 10:24, 25.
w05 6/15 21 ¶14
Uga mè Ute, Inyi ebi Ototun̄ Ukan̄ Kinyi Inu ema Eweekbe
14 Kubọk ike ikpa Ikan̄ Òso Mgbọ Iba 6:7 ojeen̄be, ogbogbo irek owa echi enyi mekọtbe ikigọọk nsabọn kinyi ikpa inu echi emen ekwukwu. Mè ire enyi ikigbagbaan̄ ikọp uran̄, igbaan̄ irọ ikwaan̄, mè iyaka ire ikigbaan̄ itap efuuk, omokọt iweek irek obosa inyi nsabọn kwun̄ inu echi emen ekwukwu okukup ufiak inyi ema. Ire atikọ ibe ke ikakpọkpọ ire mgbọ geelek ke obokisa “ijeen̄” nsabọn kwun̄ atikọ echi Baibul. Kpan̄asi ikeya, nyelek sa ufuna usem enyi ebekikpa me emen uwu kinyi more eyi obokinama ene ibene me irek emen ekwukwu. Kubọk mkpọ njeen̄, ikpa Awake! iben ogbogbo ibot usem echi okikpa esese esese inu. Ibot usem cha mokọt ibọọk irek isasa ikpa mkpọ ofo me lek anam echi Jioba orombe, esese esese ere chi Awaji orombe ojajaan̄ me linyọn̄ yi, mè esese esese orọmijọn̄ mè ubọk iluk ugwem ebilene. Mbet ukpatu okup ikeya mokọt irọ ufuna ebi asasa ebene ekefuk ogbogbo ikpa echi usun̄ ogbe utoon̄-ejit mè iriọọn̄ inu ogebe.—Matiyu 24:45-47.
Week Inu Unye Otu Ewe Okup Me Usem Awaji
w19.02 22 ¶11
Ima mè Unen Oyerebet me ama Ijeren Eyi Ukot Ikaan̄
11 Inu ekween̄be: Ikare anam akpalek gaalek ke Jioba okimun̄lek. Ikekimun̄ ene eji echubọk ire me ugwem kiji, me emen ejit kiji. (1 Sam. 16:7) Kpenu nkeek, olilọk, melek irọrọ geege eyi obokọt ilet me chieen̄ kan̄. Ọmọ ikikpọ agan̄ eji ekebirọ inwọn mè òkotap eji efuuk me owot ibe ekerọ efo isi. Ire, ọmọ ikiweek ibe eji ekeriọọn̄ eyi orere ijo ekiket mè ekọt ekesan̄a esan̄a me ejit sabum merọbe inyi erọ inu olọlọ.—2 Ikan. 16:9; Mat. 5:27-30.
ONYAN̄ GWEREGWEN 21-27
INU UNYE OTU EWE OKUP ME USEM AWAJI | IKAN ÒSO MGBỌ IBA 7-8
“Enyi Kpebere Ugot Melek Kiban̄”
w12 7/1 29 ¶2
Keke Orọ Awaji Obe Me Ebi Eyi Kan̄ Ebat Gaalek Ebi Melek Kiban̄ Ekaan̄be Nchieek Ge?
Jioba iriọọn̄ ijaan̄ ibe ke Setan ikiweek irọrọ inyi ebi eyi kan̄ eketọbọ ebum enyi atataak awaji. Awaji si onyinyi ntataba-ubọk me utọn̄ ibe ke ebi kpekupbe me ichechieek “mêrọ inyi bọn kinyi etele emi, mè ekana egọọk ekesi etọbọ ebum enyi ebi kè ofifi awaji.” Owuwa inu moje ilọ me ere yi. Ire ebi ido Ijeren ikisi itọbọ ebum inyi ofifi awaji, ema mechep nnwọn-isi mè mban kè Jioba, monenifet isa inyi ebi ochicha kiban̄ ititim igak ema. Ike owa si ke ogwu Unyan̄a echieekbe me use obosa isibi me ido yi? Me atikọ, ikaan̄ ibot ibot inu orọrọ Setan okiweek ileleke ebi Ijeren inyi esi ebat ebi kpekaan̄ge nchieek kiban̄.
w15 3/15 30-31
Bat Gaalek “Ogwu Òchechieek me lek kè Karais”—Ichubọk Ire Ikeya Nje?
Jioba itumu si me emen Usem kan̄ mè inyi ntọ-ubọk ibe ebat gaalek ogwu òchechieek me lek kè Karais. Bak lek eke? Mije ọmọ iriọọn̄ mkpọ onwọnwọn inyi ebi eyi kan̄. Ikare gaalek ibe ke ikiweek ibebem ebi usun̄ kan̄ isan̄a me lek unaan̄ okinan̄a isibi me lek irọrọ inu ikanwọnge, ire ikiweek ibe ema ekebele ejit. Me usen kè Neyemaya, mgbọ owuwa ebi Ju ekebibat ebi ichen ebi kpekebitọbọ ebum inyi Jioba, Neyemaya iyaka ikeek ema mkpọ orọrọ inyi Solomọn. Ikerere ibe ke Solomọn ire “ogwu Awaji omun̄be me chieen̄, . . . ebibaan̄ ofifi ido mîrọ inyi irọn̄ inin̄ me ijo inu.” (Neyem. 13:23-26) Ire me unwọn ebi usun̄ kan̄ ke Awaji onyi ntọ-ubọk ibe ekebat gaalek ebi ikup me ata ntọbọ ebum. (Itọn̄. 19:7-10; Asaya. 48:17, 18) Ata ebi eyi Karais ekinwọnwọọn̄ ubọk Awaji okebisa me ima ikpọ ema chieen̄ me lek mè ikiyaka lek imaan̄ me lek ntọ-ubọk kan̄. Ema isisiki ibot inyi ogọt kubọk ire ogwu Okikpulu ema, isibi ibe ke ema miriọọn̄ ibe ke ire ọmọ ore ogwu Okikpulu Otutuuk Inu geelek.—Urọk 1:5.
w15 8/15 26 ¶12
Riọọn̄ Ubọk Kpọ Ebi Okigọọk Igbaan̄ Ije me Ota Use Eyi Mgburudun̄ Mgbọ Yi
12 Ikup me ufiak enenen ibe ebi eyi Karais ebi ikiweek ikakaan̄ mbat olom eriọọn̄ ubọk ekekpọ ebi melek kiban̄ ekebigbaan̄ ije. Usem Awaji iriọọn̄ ubọk inyi nteme ibe: “Ikasa lek kinyi ìchim ìriaak me lek ebi ekachieekge me lek kè Karais. Ìre keke ke ata irọrọ mè ijo inu egbaan̄ ikaan̄? Sà ìre utoon̄ melek udun ebejeje igbaan̄ ije?” (2 Kọr. 6:14) Baibul iteme ebi eyi Awaji ebi ikiweek ikakaan̄ mbat-olom ibe ebat “gaalek ogwu ochechieek me lek kè Karais,” eyi orere, ebat gaalek ogwu osasa lek kan̄ inyi irọrọ nkeek kè Jioba, mè ikaan̄ ntap-me-mun̄ mè ikiluk igọọk me lek ijejeen̄ echi Baibul. (1 Kọr. 7:39) Sa me ibabat ogwu okup me ichechieek, ebi eyi Karais mikikaan̄ ebi isasa lek inyi Jioba ibekitap ubọk irọ inyi ema ekup enye ekegbe utoon̄-ejit enyi Jioba.
Week Inu Unye Otu Ewe Okup Me Usem Awaji
w04 2/1 13 ¶4
Jioba Okinyi Eji Inu Eji Eweekbe me Usen
4 Eji ikekibeek mkpọ eji eberie me usen ikikeek eji ibe ke eji miweek inorie eyi emen ekwukwu si me usen. Ubọk geelek ibe ke urafiọọn̄ okitaka Jisọs me mgbọ ijinbe otu isan̄a me owuwua usen, Jisọs ijit ntọmkpọ kè Setan obe mè irọ inyi ewuuk ikana inorie, mè itumu ibe: “Ege me Ikpa Mbuban ibe,“ ‘Ìkare inorie gaalek ke ene okisa iluk ugwem. Ire, ene ìkisa ikọ geelek ònan̄a me otu Awaji isibi iluk ugwem.’ ” (Matiyu 4:4) Me ere yi, Jisọs itumu mkpọ ogwu nriran Mosis otumube inyi ebi Ijeren ibe: ‘Jioba îrọ ibe enyi esiki ibot, mè iran̄ enyi ọfiọọn̄, mè inisan̄a mana isibi inyi enyi erie, òrere inorie enyi kperarak iriọọn̄, ebi nte nte kinyi si kperarak iriọọn̄, inyi enyi esa eriọọn̄ ibe ke ìkare inorie gaalek ke ene obosa iluk ugwem, ire, ke ene ìbosa otutuuk ikọ geelek ònan̄a me otu Jioba isibi iluk ugwem.’ (Ikan Òso Mgbọ Iba 8:3) Ike ubọk Jioba okebisa inyi mana, irọ ibe ebi Ijeren ekaan̄ inorie eyi anam lek mè ekween̄ mkpọ echi emen ekwukwu esọkọ me lek si. Mkpọ ge ire, otutuuk kiban̄ “ogwu ikup, môsi ikpulu eyi môsobe ọmọ me usen keya.” Ire ema ikpulu iwa igak eyi eberie me usen, echi osisik mobene ikidun̄u olu me itap mkput. (Isis 16:4, 20) Ire, ikakirọ ikeya me òso usen gweregwen eyi ema mebekpulu iwa ire lek eyi mosobe ema ire usen Mbuban. (Isis 16:5, 23, 24) Eya orọ mana ya irọ ibe ema eriọọn̄ ibe ke ema mekisiki ibot mè iriọọn̄ si ibe ke ikare inorie gaalek obokisun̄ ema me ugwem, ire ke ire “ikọ geelek ònan̄a me otu Awaji isibi.”
ONYAN̄ GWEREGWEN 28–ONYAN̄ JAABA 4
INU UNYE OTU EWE OKUP ME USEM AWAJI | IKAN ÒSO MGBỌ IBA 9-10
“Ire Keke ke Jioba Awaji Kinyi Okiweek Me Ubọk Kinyi?”
w09 10/1 10 ¶3-4
Keke ke Jioba Okiweek Eji me Ubọk?
Keke obokọt itap eji efuuk me owot ufuna eji ekesiki ibot enyi Awaji me ejit kiji? Mosis ibak mkpọ ge, ibe: ‘Itet ukpook me lek Jioba Awaji kinyi.’ (Agba eyi 12) Eyi ikare ukpook ekikaan̄ mije ijo mkpukpe obonu inyi ene, ire, ire atalek ulibi ekebikaan̄ me lek Awaji melek ntọ-ubọk kan̄. Ire ke eji mikaan̄ atalek ulibi isa inyi Awaji, eji mekijit ikekirọ mkpọ echi ichabe.
Keke obochubọk ire nkeek kiji me ikekisiki ibot inyi Awaji? Mosis ibe: “Ema ọmọ [Jioba] mè etọbọ ebum enyi ọmọ me otutuuk ejit kinyi, mè otutuuk ibot ejit kinyi.” (Agba eyi 12) Imama Awaji ikare gaalek ubọk ene osabe imọnọ. Ikpa ge okiben ukpatu itumu ibe: “Usem Iburu esabe irọ mkpọ me lek inu yi isibi si irọrọ okinan̄a isibi me lek nkeek yi.” Ikpa yi si ibe ke imama Awaji isibi “ikekisa ima irọ mkpọ” me lek kan̄. Eyi isibi ibe ke ire eji ichubọk ima Awaji me atikọ, ke eji mekirọ mkpọ me oniin̄ echi eji eriọọn̄be ibe ke mokisa itọn̄ ijet ogọt.—Urọk 27:11.
w09 10/1 10 ¶6
Kekek ke Jioba Okiweek Eji me Ubọk?
Eji ikekisa me ejit kiji isiki ibot inyi ogọt mosa ugbana ijet eji. Mosis ige ibe: “Ekerọ otutuuk ikọ îtọbe, . . . echi emi nkinyi enyi me cherekeyi, inyi inu ikije ijaan̄ enyi me lek.” (Agba eyi 13) Ikeya, otutuuk inu Jioba okebitọ—inu geelek ikebiweek eji me ubọk—ire me unwọn kiji. Iborọrọ ije esese ni? Baibul ibe ke “Awaji ìre imumechieen̄.” (Jọn Eyi Adasi 4:8) Eyi orere, ikinyi ntọ-ubọk cha gaalek isasa irọ ufuna mkpọ ikije ijaan̄ me lek kiji mgbọ geelek. (Asaya 48:17) Ikekirọ otutuuk mkpọ Jioba oweekbe ibe eji erọ mosan̄a ogbogbo sasaak eji ekebikaan̄ me mgbọ keyi mè irọ inyi eji ekaan̄ ugbana eyi ikakaan̄ge mgbọ itata me emen Ama Ubọọn̄.
cl 16 ¶2
Ire Omochubọk Ikọt ‘Itaba Lek Iriaak Me Lek Awaji Nje’?
2 Ebereyam me ukot ikaan̄ ire ene ge ogwu onwọnwọọn̄ ata mgbaan̄je okup ikeya. Jioba igwen tete ya “ogwu unene n̄a.” (Asaya 41:8) Me atikọ, Jioba imọnọ Ebereyam kubọk ire ata ogwu unene kan̄. Jioba ibook irek ibe Ebereyam inire ogwu unene kan̄ mije ọmọ “îchieek me lek Awaji.” (Jemis 2:23) Me cherekeyi si, Jioba ikiweek irek eyi ibosa “itọbọ lek iriaak” me lek ebi ikitọbọ ebum inyi ọmọ inan̄a me ima. (Ikan Òso Mgbọ Iba 10:15) Usem kan̄ ikitap eji efuuk me owot ibe: “Ìtaba lek ìriaak me lek Awaji, ke Awaji si môtaba lek iraak me lek kinyi.” (Jemis 4:8) Me emen usem yi, eji mimun̄lek ogwen kan̄ melek use ichieekbe.
Week Inu Unye Otu Ewe Okup Me Usem Awaji
it-1 103
Anak
Urum ebi ene ebi imimiin̄ iraka ubọk ebilene ekimin mè ikiluk me agan̄ ogoon̄ ogoon̄ me Kenan melek usini agba okwaan̄ si, ogakge me agan̄ Osiki kan̄. Me ike mgbọ ge ebirieen̄ ita isisibi isi me Anak, orere, Ayiman, Sesai, melek Talimai, miniluk me Eburọn. (Ifuk 13:22) Ire me ekeyi ke akọp mè ebi Iburu iba ebi eriabe ibe esekpọ inyọn̄ ijọn̄ ya edasi imun̄lek ebi Anak, eyi akọp ene me lek kiban̄ enube inilook etip eyi ufiek-owot, ikitumu ibe ke ife chi ire ebi ido ebi ujọn̄ọ ujọn̄ọ cha eboon̄be sabum Mun̄ Ile usen kè Nuwa mè itumu si ibe ke ebi Iburu esiik kubọk “akaka” me isi ife cha (Ifuk 13:28-33; Ikan 1:28) Ike ubọk ema emiin̄be orọ ibe ema ekesa me lek kiban̄ ekekpọ ebi ibet lek ebi ujọn̄ọ ile ama Eyim melek ebi Refa. Unye kiban̄ orọ ibe eketo urọk ibe: “Ìre ekene obokọt ikeke me isi ebi Anak?”—Ikan 2:10, 11, 20, 21; 9:1-3.