Ikpa Okikpa Nkween̄mkpọ Ugwem Mè Ikwaan̄ Kiji Kubọk Ebi Eyi Karais
ONYAN̄ JAABA 5-11
INU UNYE OTU EWE OKUP ME USEM AWAJI | IKAN ÒSO MGBỌ IBA 11-12
“Ubọk Jioba Oweekbe Ibe Eketọbọ Ebum Enyi Ọmọ”
it-2 1007 ¶4
Ibot Ejit
Ikekisa Otutuuk Ejit Ene Isi Ikwaan̄. “Ibot ejit” ichubọk isibi otutuuk ugwem ene, kubọk ike ejeen̄be. Ire usini ere Baibul ikiteme eji ibe ekeweek, ekaan̄ ima, mè ekesi ikwaan̄ enyi Awaji me ‘otutuuk ejit kiji melek otutuuk ibot ejit kiji’ (Ikan 4:29; 11:13, 18), me mgbọ Ikan Òso Mgbọ Iba 6:5 okibe: “Ìma Jioba Awaji kinyi me otutuuk ejit kinyi, mè otutuuk ibot ejit kinyi, mè otutuuk unye kinyi.” Jisọs ibe ke ikup me ufiak ibe esi ikwaan̄ enyi Awaji me otutuuk ibot ejit ene mè unye ene, isọkọ me lek si, “mè otutuuk ekiket kwun̄.” (Mak 12:30; Luk 10:27) Idodo mgbọ keyi ire, eke orọ otutuuk mkpọ kechi oyakabe inan̄a isibi isọkọ me lek ibot ejit me mgbọ ibot ejit ogbaan̄be iben otutuuk inu cha. Inyi esa inu yi etọt me lek mkpọ: Ene mokọt inyam lek kan̄ (ibot ejit kan̄) itap me usun̄ inyi ofifi ene, mè ikana mkpọ nkaan̄ isa inyi nte uwu kan̄. Ire ikpobokisa otutuuk ejit kan̄ isi ikwaan̄ inyi nte uwu kan̄, mè ikaan̄ me ulọk kan̄ ikekirọ inu iweekbe, sa me ikeya ikpobokisa me otutuuk unye kan̄ mè iyaka ire me otutuuk iriọọn̄-inu kan̄ ikisa irọ inu nte uwu kan̄ okebiweek. (Kpọ si Efes 6:5; Kọl 3:22.) Eya orọ ebak lek igo echichi igbaalek ufuna eji ekalọlọ ikekikeek me mgbọ eji ekisi ikwaan̄ inyi Awaji, ogwukaan̄ kiji, melek ogwu Gwun̄, ogwu onyinyi ugwem kan̄ me ibot kiji. Isasa “otutuuk ibot ejit” isi ikwaan̄ inyi Awaji igọbọ otutuuk lek ene, kpunu nruru lek geege, unye mè efuuk, mè iyaka ire olilọk eyi ikakupge me lek.—Kpọ si Mat 5:28-30; Luk 21:34-36; Efes 6:6-9; Filip 3:19; Kọl 3:23, 24.
it-1 84 ¶3
Ntook
Miteme ebi Ijeren ibe egbugbọ otutuuk ntook mè ewuuk mfaka melek si uti yọk kiban̄ cha ema ekigwugwuun̄ igbaalek egwook. (Isis 34:13; Ikan 7:5, 6; 12:1-3) Ema kpeberọ mbet eru ife chi mè iyaka ire iwọp nsabọn kiban̄ me ukan̄ kubọk ike ebi Kenan ekebirọ. (Ikan 12:30, 31; 16:21) Kpan̄asi ebenama ogbogbo ntook, ebi Ijeren ebenama ntook ge gaalek ikisa itọbọ ebum inyi ata Awaji ge, ebenama eyi si me ere eyi Awaji obonyi ida ibe enama. (Ikan 12:2-6, 13, 14, 27; ije ntikwo me lek eyi ebi Babilọn, ebi inanama ntook 180 ikisa itọbọ ebum inyi awaji enenwaan̄ ekigwen Ishtar gaalek.) Edasi iteme ema ibe mè esa ewuuk ile cha enama ntook ge me mgbọ ema isisaba Okwaan̄ Jodan (Ikan 27:4-8), Josuwa ore ogwu onanama eyi me inyọn̄ Ogoon̄ Eban. (Jos 8:30-32) Me mgbọ echebe ijọn̄ ema ebọkọbe ya, ebi otoko kè Ruben mè Gad melek okpọkọ me lek otoko kè Manasi enanama ntook ilile ge me agba okwaan̄ Jodan ya, eyi orọrọ ibe ebi otoko kechilọ ekaan̄ gọlọgọlọ me eden̄ kiban̄ me sọntitiik mgbọ mege eweekbe iriọọn̄ ibe ke kpenama ntook ya inyi atataak awaji geege ire ke enama ikekisa ikeek ubọk Jioba ata Aawji osabe igbe utoon̄-ejit inyi ema.—Jos 22:10-34.
Week Inu Unye Otu Ewe Okup me Usem Awaji
it-1 925-926
Gerijim, Ogoon̄
Igọọk me lek nteme Mosis onyibe, ebi uwu Ijeren etitiin̄ me inyọn̄ Ogoon̄ Gerijim melek Eban igọọk me ntọ-ubọk kè Josuwa me sọntitiik mgbọ ema etimbe igak ebi ama Ai. Me ere ya ema minọ efukbe isibi ugbana ema ebekaan̄ mè ire ema isiki ibot inyi Jioba melek osusut ema ebebọkọ ire ema ikpaka ibot inyi ogọt. Ebi otoko kè Simiọn, Libai, Juda, Isaka, Josefu melek Benjamin ekup me inyọn̄ Ogoon̄ Gerijim. Ebi otoko kè Libai melek okop inyan̄a ibot ekup me iteke ijọn̄, ebi otoko gweregwen kechilọ ekup me inyọn̄ Ogoon̄ Eban. (Ikan 11:29, 30; 27:11-13; Jos 8:28-35) Kpolọlọ ibe ke ebi otoko ikup me inyọn̄ Ogoon̄ Gerijim mirọ eru igọọk me lek ugbana efukbe isibi me agan̄ kiban̄, me mgbọ ebi otoko kechilọ merọbe eru igọọk me lek ogbo echi efukbe isibi me agan̄ kiban̄ me inyọn̄ Ogoon̄ Eban. Me mgbọ ekitumu ibe ke efuk ugbana isibi me agan̄ Ogoon̄ Gerijim mije ubọk isabe ijaan̄ mè ikisibi mfut eyi ojeje ntikwọ me lek ikpele ewuuk ewuuk Ogoon̄ Eban eyi ikakitibi mkpọ, Baibul ikatumu mkpọ geege ofo me lek usem yi. Efuk ikan ya isibi “me isi otutuuk ebi Ijeren, ike ema etitiin̄be, melek ebibaan̄, mè asa nsabọn, melek ebi ichen ebi ìgọgọọk ema iluk.” (Jos 8:35) Uwa urum ebi ene chi mikọt inọ usem cha me ere ema ekupbe ikana me inyọn̄ ogoon̄ iba cha. Mokọt ire ibe eyi ifet sa me ubọk ere ya osabe ikup eyi okirọ ibe ida ikọt ikitaan̄ ijọn̄ọ ere.—Kpọ si EBAN, OGOON̄.
ONYAN̄ JAABA 12-18
INU UNYE OTU EWE OKUP ME USEM AWAJI | IKAN ÒSO MGBỌ IBA 13-15
“Ubọk Ikan Osabe Ijeen̄ Ulọk Jioba Okaan̄be me lek Ebi Ugbọọn̄ri”
it-2 1110 ¶3
Irek Ge Me Akọp Irek
Ibet lek ikaan̄ ofifi irek ge me akọp irek, eyi òso iba, ekisan̄a isun̄ me acha geelek eyi ikachubọk ire ibe ke ekisa itap ubọk inyi ebi ngwugwa uwu Libai, ubọk geelek ibe ke ebi uwu Libai ekekigọọk ikaan̄ uche me lek. Ichubọk ire eyi ebi uwu Ijeren ekigbaan̄ inwọọn̄ me irek omimin me mgbọ esigbaan̄ ititiin̄ ikirie ijọk okikpulu otutuuk ido. Mire ere ebesa irek ge me akọp irek yi ije inu me Jeruselem ijọn̄ọ ere enenen, menwenwene inu ya mè inyi me lek ikpoko, ikpoko yi ke ekisa ikpọ chieen̄ me lek mkpọ me uwu me Jeruselem mè esa enwọọn̄ lek si me mgbọ esikaan̄ chinichini ilile eyi mbuban. (Ikan 12:4-7, 11, 17, 18; 14:22-27) Me ota acha ita mè gweregwen geelek eyi òso acha jaaba ekisa itap efuuk, kpan̄asi ebesa irek ge me akọp irek yi ichit uchit mfufiat efiatbe me lek chinichini okpulu otutuuk ido, ekisan̄a isun̄ inyi ebi uwu Libai, ebi ichen, ebi nwakpa, melek ebi bọn kpante ikiluk me emen ama kiban̄.—Ikan 14:28, 29; 26:12.
it-2 833
Acha Eyi Utelelek
Acha isiki-efuuk ire eyi ekigwen “acha ekifuk urieek ichep [hash·shemit·tahʹ].” (Ikan 15:9; 31:10) Me acha ya ijọn̄ ikekikup me utelelek, kpekiwop mkpọ geege me lek. (Isis 23:11) Ekekikaan̄ si utelelek mè iyaka ire ijuuk urieek ene okaan̄be itele. Mgbọ ya “ìre mgbọ Jioba ofieekbe ibe efuk urieek echep,” me isasa imin ogọt. Ubọk geelek ibe usini ebi ene kpemun̄lek ikeya, usini ebi ikikpa mkpọ ofolek, ebe ke kpekifufuk urieek ya ichep isige, ire, ke ogwu ekaan̄be urieek ikpobodo ogwu Iburu ogbo kan̄ urieek unye unye, mije ibe ke ebi ikiwop uko kpebekaan̄ ikpoko me acha ya; ire, ke ogwu ekaan̄be urieek mokọt ido ogwu ichen urieek unye unye. (Ikan 15:1-3) Usini ebi ijejeen̄ ekibe ke inu efọọkbe isa itap ubọk inyi ebi ugbọọn̄ ire eyi ekifuk ichep, ire, ke urieek echi ekaan̄be mije mbubek ene orọbe ire esese me lek eya. Ema etumu ibe, me adasi ukot ebi eyi Karais, ke ogwu ekigwen Hillel osan̄a onineen̄ ge isibi eyi ogwu ofọfọọk mkpọ mokọtbe isi uwu oyerebet isi ido ikpoko kan̄ me ubọk ebi ijijit ikpekpe ogọt sa me itutumu usini inu isibi.—The Pentateuch and Haftorahs, eyi J. Hertz, okpọkbe ige, London, 1972, pp. 811, 812.
it-2 978 ¶6
Usun̄
Ikan okikpulu mgbaan̄je eyi usun̄ melek nte uwu. Me eden̄ ebi Ijeren irek ogwu Iburu orere usun̄ ikup esese me lek eyi ogwu ichen. Me mgbọ ogwu usun̄ ikarege ogwu Iburu mokupbe ibia me lek ogwu nte uwu kan̄ mè ire si ogwu mokọtbe inan̄a me ubọk ute inin̄ ubọk gwun̄ (Lib 25:44-46), ogwu usun̄ orere ogwu Iburu ire ogwu ebetele isikup me usun̄ iso acha jaaba mè iyaka ire acha Ijọk Utelelek, igọọk me lek eyi odadasi ire. Me oke acha ikupbe me usun̄, ogwu usun̄ orere ogwu Iburu ire ogwu ebekikpọ chieen̄ me lek kubọk ire ogwu ebọkọbe me ikwaan̄. (Isis 21:2; Lib 25:10; Ikan 15:12) Ogwu Iburu onyanyam lek kan̄ itap me usun̄ isa inyi ogwu ichen ire ogwu mekọtbe ikpe ewe mè iyaka ilep me mgbọ geelek, mokọt ire ọmọ gaalek me lek kan̄ mè iyaka ire ofifi ene ogwu okakaan̄ unen ikpọkpọ ilep ogọt. Ebekpe ewe kan̄ igọọk me lek otu ifuk acha osisik eyi acha Ijọk Utelelek morebe mè iyaka ire mokupbe me usun̄ iso acha jaaba. (Lib 25:47-52; Ikan 15:12) Me mgbọ geelek ebejuuk ogwu usun̄ orere ogwu Iburu itele, ogwu nte uwu kan̄ ibocheche mkpọ inyi ogọt ufuna isa isi ibene ugwem kan̄ kubọk ire ogwu enyibe nkaan̄-lek. (Ikan 15:13-15) Ire ogwu usun̄ ya isa nwa igbaan̄lek inu, ogwu nwa mogọọk ogọt ifo. Ire, ire ogwu nte uwu onyi ogọt nwa (mokọt ire ogwu enenwaan̄ ogwu ichen ogwu kpetelebe ibe ikaan̄ lek kan̄ me òso acha jaaba ibokup me usun̄), ogwu enenwaan̄ ya melek nsabọn geelek imaan̄be ebekup inyi ogwu nte uwu kan̄. Me irek okup ikeya ogwu usun̄ orere ogwu Iburu ya mokọt igobo ikukup ibia me lek ogwu nte uwu kan̄ ya. Me mgbọ ya metitibi ogọt utọn̄ ikisa ijeen̄ ibe ke ibokukup me usun̄ me otutuuk usen ugwem kan̄.—Isis 21:2-6; Ikan 15:16, 17.
Week Inu Unye Otu Ewe Okup me Usem Awaji
w06 4/1 31
Idodo Ebi Ene Edobe
Keke ke eji ebekọt ikween̄ inan̄a me lek ikan okup me emen ikpa Isisibi 23:19: “Ikatem gwun̄ ebot me emen mun̄ ebe ogwu uga”?
Ntọ-ubọk keyi okup me emen Ikan̄ kè Mosis, eyi osibi mgbọ ita me emen Baibul, mokọt itap ubọk irọ ufuna eji enwọọn̄ ubọk Jioba okisa imun̄lek irọrọ kiji, nsan ejit kan̄, melek ejit ata irọrọ kan̄. Ikpa si ubọk isabe icha ataak ntọbọ ebum.—Isis 34:26; Ikan 14:21.
Itetem gwun̄ ebot mè iyaka ire ofifi ofifi anam me emen mun̄ ebe ogwu uga moje ntikwo me lek onineen̄ ubọk irọ inu eyi Jioba oneen̄be. Awaji inyi uga ebe ufuna isa ikpukpo gwun̄ kan̄ mè imin. Itetem gwun̄ me emen mun̄ ebe ogwu uga, igọọk me lek usem ogwu ge okwekween̄ mkpọ ofolek, ikijeen̄ “ikukup ikeme ata mgbaan̄je eyi Awaji otapbe mè isun̄ me mbuban me eden̄ uga mè gwun̄.”
Isọkọ me lek si, usini ene ebe ke ikekitem gwun̄ anam me emen mun̄ ebe ogwu uga mokọt ire ngwugwa ebi kperiọọn̄ge Awaji ekirọ ikisa ito ibot. Ire ikeya, more ibe etap ikan ya ufuna esa ebem ebi Ijeren esan̄a me lek orọmijọn̄ echi ido kperiọọn̄ge Awaji iluluk ikana ema cha ekebirọ. Ikan kè Mosis ichuchubọk ituun̄-isi igban ebi Ijeren ibe ekaje igọọk me ubọk ebi ido cha ekebirọ inu.—Libitikọs 20:23.
Me ota kan̄, eji mimun̄lek me emen ikan yi nsan ejit kè Jioba. Me atikọ, Ikan iben ogbogbo mbet ntọ-ubọk okup ikeya echi okukup ikeme irọrọ nnaan̄ me lek anam mè ikibem si ikekirọ inu ntikwo me lek ubọk Awaji osun̄be. Kubọk mkpọ njeen̄, Ikan iben si ntọ-ubọk ogbagban isasa anam igwa ngwugwa itata mè igọgọọk ogwu uga ikup iso ukpukpọlek usen jaaba, igbagbaan̄ anam mè ogwu gwun̄ ikpan̄ me usen yaage, melek itetet ofut mè igbaan̄ nkwa mè iyaka ire nsabọn kan̄ ikpulu si me emen uwu ofut.—Libitikọs 22:27, 28; Ikan Òso Mgbọ Iba 22:6, 7.
Ikpọk mbum ibe ke Ikan ikakpọkpọk ire gaalek ntọ-ubọk melek ogban echi oyọyọt. Ogakge, onineen̄ kan̄ itap olilọk ikekiluk utana ugwem echi okikpọk mbum ata ukama eru echi Jioba okaan̄be.—Okwa Itọn̄ 19:7-11.
ONYAN̄ JAABA 19-25
INU UNYE OTU EWE OKUP ME USEM AWAJI | IKAN ÒSO MGBỌ IBA 16-18
“Onineen̄ Isasa Isibi Unen Oyerebet”
it-1 343 ¶5
Nnaan̄ Chieen̄
Ebi oyerebe ibọbọkọ ikpoko udun̄ mè inwunwunu oyerebet ire eyi nnaan̄ chieen̄ okekebe ichit chieen̄, Ikan si iben ogbogbo nteme okukup ikeme ikekibọkọ ikpoko udun̄, inyinyi, mè iyaka ire ikekimọnọ agan̄, mije inu cha mokọt irọ ufuna ogwu oyerebet ikayaka isibi oyerebet igọọk me lek ndọmọ eyi unen oyerebet. “Ikpoko udun̄ ìkitap ebi chieen̄ ochilibe ǹnàan̄.” (Isis 23:8) “Ikpoko ngan ìkitap ebi ìriọọn̄ inu ǹnàan̄.” (Ikan 16:19) Ubọk geelek ogwu oyerebet osabe inwọn ire, iriọọn̄ inu ire, inyinyi ebi ikirọ ikọ ya enyibe ogọt mokaan̄ mgbaan̄ me lek kan̄ mè ire irọriọọn̄ sa ire ikariọọn̄. Ikan Awaji iriọọn̄ ubọk ikpa ibe ke ikare gaalek inyinyi obokọt itap ogwu oyerebet nnaan̄ ire ke imọmọnọ agan̄ si, me eyi itumube ibe: “Kasa me ejit njijin ìfieek oyerebet ìnwọn ogwu ugbọọn̄. Kasa me ulibi-chieen̄ ìfieek oyerebet ìnwọn ogwu ilile.” (Lib 19:15) Eya orọ, ogwu oyerebet ikpobotip ogwu obọbọọn̄ oyerebet mije ibe ke ibọọn̄ ufuna ọmọ ikaan̄ unwọn isi me lek urum uwa ebi ene.—Isis 23:2, 3.
it-2 511 ¶7
Otu Ifuk,
Iba. Mikimaalek isa otu ifuk iba irọ mkpọ me uwu oyerebet. Ebi ata-ikọ iba isigbaan̄ itumu chieen̄ mkpọ yaage, ikirọ ibe ata-ikọ ya inye ebon. Miweek ibe ebi ata-ikọ iba mè iyaka ire ita enekeke ata-ikọ me isi ebi oyerebet. Onineen̄ yi si ke ekisa irọ mkpọ me emen ntitiin̄ ebi eyi Karais. (Ikan 17:6; 19:15; Mat 18:16; 2 Kọr 13:1; 1 Tim 5:19; Iburu 10:28) Awaji isa onineen̄ yi irọ inu me iraria Gwun̄ kan̄ inu kubọk ire Ogwu Unyan̄a isa nyi ebilene. Jisọs ibe: “Me emen Ikan kinyi, ege ibe, ire ene iba ikeke ata-ikọ me ibot inu ge, ke inu ya ìre atikọ. Ubọk geelek nkikeke ata-ikọ inyi lek n̄a, nkaan̄ ofifi ogwu ata-ikọ. Ogwu ata-ikọ ya ìre Nte n̄a ogwu òraria emi inu.”—Jọn 8:17, 18.
it-2 685 ¶6
Ogwu Ngwugwa
Ebi ngwugwa echubọk ikaan̄ akpan ikwaan̄ ikekikpa ikan Awaji iwele, ema si mikaan̄ atalek unye me eden̄ ebi oru ebi Ijeren. Me emen ama echebe inyi ema ebi ngwugwa ikitap ubọk inyi ebi oyerebet owa, ema si ekigọọk ebi oyerebet ikpọ chieen̄ me lek ikọ echi omamaalek iyọt echi kpekọtbe ifieek me uwu oyerebe okup me emen ama ya. (Ikan 17:8, 9) Miweek ibe ema ekegọọk ebi ugane ama egbaan̄ ekpọ chieen̄ me lek ikọ echi ogọgọbọ mkpan̄-ene, kisi emun̄lek ibe ke migọọk onineen̄ ekisa isan̄a ikan eje me emen ama. (Ikan 21:1, 2, 5) Ire olom okimin ejit me lek nwa kan̄ itoon̄ ogwu nwa oramọn ibe ke ilet isi ene, mesa ogwu nwa inu me emen ere okup mbuban, ogwu ngwugwa monenirọ orọmijọn̄ eyi ebesa iweek irọọn̄ atikọ me ubọk Jioba ike ibọnyi unen oyerebet mè ire ogwu enenwaan̄ ya igan sa ire ikagan. (Ifuk 5:11-31) Me lek ikọ geelek, oyerebet geelek ogwu ngwugwa mè iyaka ire ogwu oyerebet egobobe ofieekbe ire eyi ekijejeen̄ ulibi; ogwu ogengen ibak inye ibot mè iyaka ire ikajeen̄ ulibi ire ogwu ebekpakpan̄.—Ifuk 15:30; Ikan 17:10-13.
Week Inu Unye Otu Ewe Okup me Usem Awaji
it-1 787
Ilalap Ene
Me emen Ikan, ufuna enyi ene osusut mkpa, menọ ikọ me otu ebi ata-ikọ iba mè iyaka ire iwa iraka eyi oborọ ikọ ya inye. (Ikan 19:15) Ire ebi ata-ikọ chi ere ebi ibedasi ikitọbọ ogwu orọrọn̄ ikan ya me ewuuk. (Ikan 17:7) Eyi obokijeen̄ olilọk kiban̄ me lek ikan Awaji mè isusun̄ ido ebi Ijeren me utana mè ire si ogban isa inyi ikekigwat lek ikeke atataak ata-ikọ.
ONYAN̄ JAABA 26–ONYAN̄ JEETA 1
INU UNYE OTU EWE OKUP ME USEM AWAJI | IKAN ÒSO MGBỌ IBA 19-21
“Ugwem Ebilene Inye Otu Ewe Enenen me Chieen̄ kè Jioba”
w17.11 14 ¶4
Gọọk Akpat Ukot Unen Oyerebet Melek Nsan kè Jioba
4 Ama itap-ibot gweregwen ire eyi ofefet iweweek imun̄. Jioba inyi ebi Ijeren ntọ-ubọk ibe enama ama cha ikike ikike me agba Okwaan̄ Jodan agan̄ iba. Bak lek keke? Ufuna ene geelek okililibi mogwat lek imun̄lek mè ilibi inin̄. (Ifuk. 35:11-14) Oniin̄ ekije isi ama itap-ibot ire eyi ekikpọkpọ chieen̄ me lek mgbọ geelek. (Ikan. 19:3) Igọọk me lek orọmijọn̄ ebi Ju, migwugwuun̄ mkpọ me agba oniin̄ ya ufuna ogwu okililibi ya mokikpọ me lek ikilibi ifo ama cha. Eyi irere ibe ke ama itap-ibot cha omowa, ogwu olọlọ ubọk ikpan̄ ene ikpoboyaka ilibi ifo ofifi ido, ere mokọtbe iyaka ibene ikitọbọ ebum inyi atataak awaji.
w17.11 15 ¶9
Gọọk Akpat Ukot Unen Oyerebet Melek Nsan kè Jioba
9 Ibot ibot mkpọ orọrọ enamabe ama itap-ibot ire kisi esa ebem ogwu Ijeren me lek ikan mkpan̄ ene. (Ikan. 19:10) Jioba ima ugwem, mè icha “ubọk òkifiat eje ogwu ǹkalọ.” (Urọk. 6:16, 17) Awaji ata oyerebet mè ogwu mbuban, ikakikpọ chieen̄ ilọ me lek ifafiat eje ikerere me mfiat. Me atikọ, ogwu olọlọ ubọk ikpan̄ ene ire ogwu ejeen̄be nsan. Ikerere ikeya, mosa ikọ kan̄ inu me isi ebi ugane ama, ire mifieek ikọ kan̄ ibe ke ire me mfiat, ọmọ mokup me ama itap-ibot ya mege ogwu ibot ngwugwa ya mokwube. Eyi mokọt isibi iluluk otutuuk ugwem kan̄ me ama ya. Mkpukpe omimin yi irọ ibe otutuuk ebi Ijeren emun̄lek ubọk ugwem ebilene osabe ikup me mbuban ire. Ufuna ema ekemin Ogwu Onyinyi ema Ugwem, ema ire ebi ibekisan̄a lek me lek irọrọ geelek echi mokọtbe isak unan me lek ugwem ogwu ebilene ogbo kiban̄.
it-1 344
Eje
Ogwu ebilene ire ogwu ogbegbe inwọnwọọn̄ ugwem eyi Awaji onyibe ogọt, Awaji modo ugwem kan̄ me ubọk ene geelek orọrọ ufuna ikanwọọn̄ ugwem. Eyi ikpọk mbum me mgbọ Awaji otumube inyi Ken ogwu okpan̄ ene ibe: “Ida ito eje kè ngwan̄ kwun̄ òkinan̄a me emen ijọn̄ inire emi utọn̄.” (Ibeb 4:10) Ikerere ene ichacha ogwu ngwan̄, mè ikiweek ibe ikwu, mè iyaka ire ikitumu ogọt ifiat mè iyaka ire ikiben ata-ikọ ataak ikeme ogọt, mè isa me ikeya ikitap ugwem kan̄ me mkpọ unan, mokaan̄ mfieek-ikọ mije eje ogwu ebilene ogbo kan̄.—Lib 19:16; Ikan 19:18-21; 1 Jọn 3:15.
Week Inu Unye Otu Ewe Okup me Usem Awaji
it-1 518 ¶1
Uwu Oyerebet, Ebi Oyerebet
Uwu oyerebet ire eyi okikup me otunchit ama. (Ikan 16:18; 21:19; 22:15, 24; 25:7; Rufu 4:1) Ibebe “otunchit” isibi ere owewele me emen ama ya mè ikup iriaak me otunchit. Otunchit ire ere echi ekifuk Ikan̄ isibi inyi ebi itititiin̄ mè ire si ere ekikup inyi ikan melek ntọ-ubọk. (Neyem 8:1-3) Me otunchit ya ifet ikakaan̄ ogwu obokọt isibi ata-ikọ me lek inu obọbọkọ irek, kubọk inyanyam mkpọ, mè mbet inu okup ikeya, mije owuwa ebi ene meje inin̄ mè isibi me otunchit egwe isiwele. Isọkọ me lek si, mije ibe ke owuwa ebi ene mekup me otunchit igọọk igban̄ ikọ ya morọ ufuna ebi oyerebet esa atikọ erọ mkpọ mè esibi unen oyerebet. Kpolọlọ ibe ke ikaan̄ ere me otunchit ya eyi ebi oyerebet ebekọt ikup ikikpọ chieen̄ me lek ikọ cha. (Jobu 29:7) Samien ikọp uran̄ ikana isi Beten, Giligan, melek Mijipa mè “ikisibi oyerebet inyi ebi Ijeren me otutuuk ama chi,” melek Rama, ere uwu kan̄ okupbe.—1 Sam 7:16, 17.
ONYAN̄ JEETA 2-8
INU UNYE OTU EWE OKUP ME USEM AWAJI | IKAN ÒSO MGBỌ IBA 22-23
“Ubọk Ikan Osabe Ijeen̄ Olilọk kè Jioba Me Lek Anam”
it-1 375-376
Akpan
Me ukot ikaan̄ ekimalek isa anam ibeme ulobo mkpọ, mitumu si inyi ebi Ijeren ibe mè ire ema imun̄lek inyinya akpan ogwu ochacha ema onan̄abe irọn̄ me irak ulobo efit inu îbemebe, ene ya ikakpọkpọ ìje ìraka, igọọk itap “ubọk san̄a anam ya me irak ulobo akpan kan̄.” (Isis 23:5) Otu ifuk mkpọ eyi amam mokọtbe iben ke ekigwen akpan, kubọk mbet “eyi inyinya mgbidim ukot iba môkọtbe iben.”—2 Ubọọn̄ 5:17.
it-1 621 ¶1
Ikan Òso Mgbọ Iba
Me emen ikpa Ikan Òso Mgbọ Iba mijeen̄ anam si ima. Migban ebi Ijeren ibe mè ekatet ofut okikwuun̄ nkwa, mije ke ikup me uwu ya ikibem ebibọọn̄ orọ ikawulube. Mejuuk ofut ya itele ibe ifo, ire ebi Ijeren mekọt ikpulu nsabọn kan̄ isa irọ eyi kiban̄. Nga kiban̄ ikaan̄ irek ikpọkpọk isa imaan̄ ofifi nsabọn. (Ikan 22:6, 7) Ogwu uko ikakaan̄ irek isasa igbaan̄ eriembuuk melek inyinya akpan ibọp isa irọ ikwaan̄, ufuna anam eyi ikanyege lek ikamalek ibọkọ ukwook. (Ikan 22:10) Kpebebọp otu eriembuuk me mgbọ ikebisi ikwaan̄ ufuna urafiọọn̄ ikaweek ogọt lek me mgbọ inorie ya me agbalek kan̄, mije ikisa unye kan̄ isa isi ikwaan̄.—Ikan 25:4.
w03 10/15 32 ¶1-2
“Ikasa Lek Kinyi Ìchim Ìriaak Me Lek”
KUBỌK IKE omokọtbe imun̄lek me ere yi, aligọ melek eriembuuk ekigbaan̄ isi ikwaan̄ kpekikaan̄ utelelek. Ogbugboon̄ esabe igbaan̄ ema ibọp—ire eyi erọbe isa inyi anam iba imimiin̄ mè ikaan̄ ikike unye yaage—eyi irọ anam iba cha ebọkọ ukwook. Mije ulọk ikaan̄be me lek mbet anam cha, Awaji itumu inyi ebi Ijeren ibe: “Kagbaan̄ orie eriembuuk melek inyinya akpan, òrere chieen̄ anam iba, ìgban.” (Ikan Òso Mgbọ Iba 22:10) Onineen̄ yaage si okup inyi eriembuuk melek aligọ.
Me ubọk ikupbe, ogwu uko ikpobonyi aman kan̄ mbet lek ukwook keya. Ire, ire ke ikakaan̄ eriembuuk iba mokọt igbaan̄ ìgban anam iba echi ikaan̄be. Me atikọ, ichubọk ire mkpọ ogwu uko me òso akọp mè ukot onange me emen inu ntọt ya otumube ifieek irọrọ reya. Mije ibe ke umin mè unye kiban̄ ikare ikike, anam eyi ikanyege lek mokiweek ubọk ibokigọọk eyi onyenye lek igbaan̄ ije, eyi onyenye lek mobeme agan̄ ilile me lek ulobo akpan ya.
Week Inu Unye Otu Ewe Okup me Usem Awaji
it-1 600
Urieek, Ogwu Urieek
Urieek ire inu keya eyi ekaan̄be ene, inu keya eyi ebekpekpe mè iyaka ire irọ. Me ama Ijeren me ukot ikaan̄, ekimalek ikaan̄ urieek mije una ikpoko. Ogwu Ijeren ikakaan̄ urieek ichubọk ire inu nsan; ogwu okakaan̄ urieek ibokana usun̄ inyi ogwu ofọfọọk inyi ogọt. (Urọk 22:7) Eya orọ miteme ebi eyi Awaji ibe ema ekechili ubọk efọọk mkpọ enyi ebi Ijeren ogbo kiban̄ mè ekaweek nnwọn eyi lek kiban̄, mè ikiweek oruru me ijo irek eyi ema ekupbe sa me itotoon̄ orot me lek inyi ema. (Isis 22:25; Ikan 15:7, 8; Itọn̄ 37:26; 112:5) Ire mekọt itoon̄ orot me inyọn̄ inyi ebi irere ebi ichen. (Ikan 23:20) Ebi Ju ikitumu mkpọ ofolek inu yi migobo itet ibe ke eyi ikup isa inyi ikpoko efọọkbe isa inyam ewe, ke ikare mgbọ ene ya okupbe me una. Me atikọ, ebi ichen me ama Ijeren ire ebi ikikup me mgbidim mgbidim mgbọ gaalek, ikimalek ire ebi ikinyam ewe, omọrọ igbebe ibe etoon̄ orot me inyọn̄ ikpoko enyi ema, ogakge eyi irere ibe ke ema si ebekitotoon̄ orot me inyọn̄ ikpoko inyi ebi ofifi ife.
ONYAN̄ JEETA 9-15
INU UNYE OTU EWE OKUP ME USEM AWAJI | IKAN ÒSO MGBỌ IBA 24-26
“Ubọk Ikan Osabe Ijeen̄ Olilọk kè Jioba Me Lek Ebibaan̄”
it-2 1196 ¶4
Ebibaan̄
Ikerere ikan okikpulu ebi akọn̄ ikpọ si chieen̄ me lek olom mè nwa sa me ibebe mè ogwu enerieen̄ okakaan̄ nwa ayaya ikasi akọn̄ me acha ge. Eyi inyi olom mè nwa yi irek isasa ikaan̄ gwun̄ eyi obochubọk ikikat ogwu uga ejit me mgbọ ogwu olom isigwu ikom isi akọn̄, ogakge ire ke mikpan̄ ogọt me akọn̄.—Ikan 20:7; 24:5.
it-1 963 ¶2
Ìrọrọọn̄ Akpa
Ikpọk mbum ibe ke ata onineen̄ yi esan̄abe isibi isa inyi ebi ugbọọn̄ me ama Ijeren, me mgbọ ekebiteme ene ibe ekechili ubọk, ekakikaan̄ olilọk lek ene gaalek, mè ikekiyaka lek imaan̄ me lek ugbana kè Jioba, ikabebieen̄ ugbek inye mgbọ geege. Itap utoon̄ me lek usem Debit otumube ibe: “Ǹkamun̄-nu Jioba ojitbe ogwu ata irọrọ itele, mè ìre itele ibe bọn ene ya ekebeek inorie.” (Itọn̄ 37:25) Sa me ililibi igọọk ndọmọ keyi eyi Ikan onyibe ema, ikerere ebi ugbọọn̄, mire ema kpere ebi ugbek, kpeberak ọfiọọn̄, ema melek nsabọn kiban̄ kpebekibeek inorie.
w11 3/1 23
Ire Oriọọn̄ Ni?
Me ama Ijeren ukot ikaan̄, ire ogwu enerieen̄ ikwu me ikakaan̄ge gwun̄ enerieen̄ geege, ogwu ngwan̄ moyaka ikaan̄ nwakpa ya me lek nwa ufuna ibon gwun̄ ogwu obonichieek erieen̄ ogwu ngwan̄ ya. (Ibebene 38:8) Me ike mgbọ orakabe me lek, onineen̄ yi oyakabe isibi me emen Ikan kè Mosis, eyaka iriọọn̄ kubọk ire ngwan̄ olom, mè iyaka ire nwa uwu. (Ikan Òso Mgbọ Iba 25:5, 6) Irọrọ kè Buwaji, eyi ekpabe me emen ikpa Rufu, okijeen̄ ibe ke onineen̄ yi igọbọ si ebirieen̄ irere ulọk inyi owot iman ogwu enerieen̄ okwukwu ya mè ire kpunu ebi ngwan̄ kan̄ geege me ugwem.—Rufu 1:3, 4; 2:19, 20; 4:1-6.
Mije ibe ke ebi Sadusi michak otu me lek usem yi, ikijeen̄ me atikọ ibe ke ngwan̄ olom ire eyi ekebirọ me ukot kè Jisọs kubọk egebe me emen ikpa Mak 12:20-22. Ogwu okige mfufuk me adasi ukot ogwu ekigwen Flavius Josephus ibe ke ikare gaalek ibe ke orọmijọn̄ ikiben owot iman ya ije, ire ke ikirọ si ibe mkpọ nkaan̄ ikanan me uwu ya mè okokpọ si chieen̄ me lek nwakpa ya. Me ukot mgbọ ya, nwa ikakaan̄ unen irot mkpọ akpa ogwu olom. Ire, gwun̄ ogwu emanbe me lek ngwan̄ olom mokaan̄ inu nkaan̄ ogwu okwukwu ya me irot.
Week Inu Unye Otu Ewe Okup me Usem Awaji
it-1 640 ¶5
Iyaak-olom
Ikpa Iyaak-olom. Kpebekana igwook ibe ke ifafiat ikan iyaak-olom ikijeen̄ ibe ke achubọk ikan iyaak-olom eyi Mosis ogebe irọ ibe ikup mfufet isa inyi ogwu Ijeren orere olom ibe iyaak ogwu nwa. Ire iboyaak ogwu nwa, mogọọk ndọmọ eyi ikan̄ obenbe. Ikup okpan okpan ibe ige, ige “ikpa iyaak-olom itap ogwu enenwaan̄ me ubọk.” Olom oboyaak ogwu nwa moge ikpa “itap ogwu enenwaan̄ me ubọk, mè ijit ọmọ, mè irieen̄ ọmọ isibi me uwu.” (Ikan 24:1) Ubọk geelek ibe ke Baibul ikakpa iwele ubọk ebesa igọọk onineen̄, igọgọọk ikan yi igọbọ isisi lek ebirieen̄ ebi ikakaan̄ unye ntọ-ikọ, ebi ibedasi iweek itatap esuuk. Otu ifuk mgbọ ibobọkọ olom isasa ineen̄ ikpa iyaak-olom ya igọọk me lek ikan morọ ibe ogwu enerieen̄ iyaka ikpọk ikeek ntumumfieek kan̄. Mokaan̄ ibot ibot inu oborọ ibe eyaak olom, me mgbọ geelek esisa ikan irọ mkpọ ijaan̄, eyi morọ ibe ekakigwat lek iweek ikekiyaak olom. Sa me ikeyi si, mikikpọ chieen̄ me lek unen melek olilọk ogwu nwa. Baibul ikakpa isibi ntọ-ubọk okup me emen “ikpa iyaak-olom.”
ONYAN̄ JEETA 16-22
INU UNYE OTU EWE OKUP ME USEM AWAJI | IKAN ÒSO MGBỌ IBA 27-28
“Otutuuk Ugbana Chi . . . Monu Inyi Owu”
w10 12/15 19 ¶18
Kaan̄ Ugbana Nan̄a Me Ubọk Ogwu Ubọọn̄ Ogwu Ekwukwu Mbuban Awaji Okiban!
18 Ikekigban̄ utọn̄ igọbọ ikekikaan̄ me ejit mkpọ Usem Awaji okitumu melek inorie eyi emen ekwukwu ikebinyi. (Mat. 24:45) Isibi si ikekisiki ibot inyi Awaji melek Gwun̄ kan̄. Jisọs ibe: “Ìkare ene geelek òkigwen emi Okaan̄-ene, Okaan̄-ene, obonin̄ mkpulu emen inyọn̄. Îre ogwu keya òkirọ nkeek eyi Nte n̄a ogwu òkup me emen inyọn̄ gaalek obonin̄.” (Mat. 7:21) Igbagban̄ utọn̄ me lek Awaji si isibi isasa me olilọk ene ikisiki ibot inyi ndọmọ geelek isun̄be, ntitiin̄ ebi eyi Karais melek ebi ugane ntitiin̄, “uche òkup esese esese inyi ebilene.”—Efes. 4:8.
w01 9/15 10 ¶2
Ire Omokaan̄ Ugbana kè Jioba Nje?
2 Usem Iburu “igban̄ utọn̄” esabe irọ mkpọ me emen ikpa Ikan Òso Mgbọ Iba 28:2 ikijeen̄ ikukup inye ikirọ inu. Ikakpọkpọk ire ibe ke ebi eyi Jioba ebekigban̄ utọn̄ me lek kan̄ me mgbọ me mgbọ; ema ebekpọkpọk ikigban̄ utọn̄ me lek kan̄ kubọk ire oniin̄ eyi ugwem. Ire gaalek mgbọ ya ke ema ebekọt ikaan̄ ugbana eyi Awaji. Usem Iburu eyi ekababe “mekaan̄” ire eyi eriọọn̄be kubọk ire usem ebi ota ekisa irọ mkpọ eyi okimalek isibi “ililibi isoon̄” mè iyaka ire “irere lek.”
w10 9/15 8 ¶4
Sa Me Ijọn̄ Ijọn̄ Ejit Kwun̄ Week Ugbana kè Jioba
4 Me mbet lek eru okukup ke ebi Ijeren ebekisiki ibot? Ikan Awaji ibe ke Awaji mokaan̄ uduk mire ebi eyi kan̄ “kpetọn̄ọ isi isa me ubelejit” isi ikwaan̄ inyi ogọt. (Fuk Ikan Òso Mgbọ Iba 28:45-47.) Jioba ikaweek nsiki-ibot eyi ebekitọtọ inyi ene, kubọk mbet eyi anam mè iyaka ire ebi ijo ekwukwu mekọtbe isiki. (Mak 1:27; Jemis 3:3) Ikekisa me otutuuk ejit isiki ibot inyi Awaji ire eyi okijeen̄ ima. Ekiriọọn̄ eyi inan̄a me lek unwọọn̄ ekikaan̄ me lek ichechieek ibe ke ikan kè Jioba ikayọt isusun̄ ke ọmọ si “môkpe mkpukpe inyi ebi geelek ìkisa otutuuk ejit iweek ọmọ.”—Iburu. 11:6; 1 Jọn 5:3.
Week Inu Unye Otu Ewe Okup me Usem Awaji
it-1 360
Ọriọọn̄ Okike Ijọn̄
Ikan kè Jioba ije ikeme isasan̄a ewuuk esabe itap ọriọọn̄ me lek okike ijọn̄. (Ikan 19:14; kpọ si Urọk 22:28.) Me atikọ, ufie-otu òkup inyi “ene geelek òjujujuk ewuuk okike ijọn̄ ogwu melek kan̄.” (Ikan 27:17) Eyi irere ibe ke ebikaan̄ ijọn̄ ekikaan̄ irerie kiban̄ inan̄a me lek mfut okisibi me lek ijọn̄ kiban̄, ijujujuk ewuuk ọriọọn̄ okike ijọn̄ ya isibi ibe ke migban ogọt me lek usini inu ikikaan̄ isa iluk ugwem. Ogwu orọrọ mbet inu yi ire ogwu ekimun̄lek kubọk ire ogwu inọ me ukot ikaan̄. (Jobu 24:2) Ire ikaan̄ ebi ikije ikeme onineen̄ mè ikirọ irọrọ yi, bọọn̄ ebi ubọọn̄ me ama Juda si me ukot kè Osia ire ebi esabe itọt me lek ebi ikijibi oriọọn̄ okike ijọn̄.—Osia 5:10.
ONYAN̄ JEETA 23-29
INU UNYE OTU EWE OKUP ME USEM AWAJI | IKAN ÒSO MGBỌ IBA 29-30
“Itọtọbọ Ebum Inyi Jioba Ikare Inu Omamalek Iyọt”
w09 11/1 31 ¶2
Jioba Inyi Eji Nkeek Isasa Igobo Inu
Ire iyọt irọriọọn̄ mkpọ Awaji oweekbe eji me ubọk mè ikirọ ni? Mosis ibe: “Ikan yi nkinyi enyi cherekeyi ìkamama lek ìyọt me lek kinyi, ìkagagak si inu ebekọt irọ.” (Agba Eyi 11) Jioba ikado mkpọ kpekọtbe irọ. Mkpọ ikiweek ire eyi okakaan̄ iriọọn̄-inu mè ire si eyi ebekọt irọ. Inu cha ire echi eriọọn̄be si. Eji kpebenenene “ifo emen inyọn̄” mè iyaka ire ije ifo “usaba okwaan̄” ufuna ekọt ekween̄ eriọọn̄ mkpọ ikebiweek eji me ubọk. (Agba Eyi 12, 13) Baibul ikpa ikpọk mbum inyi eji ubọk eji ebekiluk.—Maika 6:8.
w09 11/1 31 ¶1
Jioba Inyi Eji Nkeek Isasa Igobo Inu
“NKIKAAN̄ ukpook eyi ikakebijeen̄ iriọọn̄-inu geege ibe ke mkpakọt igbe utoon̄-ejit inyi Jioba.” Eya ire usem ogwu enenwaan̄ ogwu eyi Karais ge okikeek ibe ke mbet inu ọmọ ochichinibe me mgbọ ikupbe ijija morọ ibe ọmọ ikakọt igbe utoon̄-ejit otumube. Ichubọk ire ikeya ni? Ire eji ekekichubọk ikup me irek eyi kpekaan̄ge ntap-ubọk nje? In̄-in̄. Jioba Awaji inyi eji uche eyi ekiket ejit, eya orọ eji mekọt isa nkeek kiji igobo ubọk eji ebeluk ugwem kiji. Jioba iweek ibe eji egobo inu onwọnwọn, Usem kan̄ si orere Baibul itumu inyi eji ubọk eji mekọtbe irọ ikeya. Gban̄ usem kè Mosis, okup me emen ikpa Ikan Òso Mgbọ Iba ibot 30.
w09 11/1 31 ¶4
Jioba Inyi Eji Nkeek Isasa Igobo Inu
Ire Jioba ikekikaan̄ olilọk me lek mkpọ eji egobobe ni? Me atikọ ikekikaan̄! Igọọk me lek unye eyi Awaji, Mosis itumu ibe: “Ìgobo ugwem.” (Agba Eyi 19) Me oniin̄ okukup ke eji ebesa igobo ugwem? Mosis ikpa iwele, ibe: “Ìma Jioba Awaji kinyi. Ìkigban̄ utọn̄ me ida kan̄, mè ìtet ọmọ ìnye.” (Agba Eyi 20) Ire eji ima Jioba, eji mekigban̄ ogọt utọn̄ me lek, mè ikisiki ibot mè ìtet ọmọ ìnye, mkpọ geelek ikemalek irọ. Sa me irọrọ ikeya, eji megobo ugwem—mbet ugwem onwọnwọn ichit me mgbọ keyi melek ikpọchieen̄ iluluk ire mgbọ geelek me emen aya inyọn̄ eyi Awaji okinu me isi.—2 Pita 3:11-13; 1 Jọn 5:3.
Week Inu Unye Otu Ewe Okup me Usem Awaji
it-1 665 ¶3
Utọn̄
Jioba itumu itibi me otu ebi usun̄ kan̄ ofolek ebi Ijeren, ebi ikinye ibot mè ikikpaka ibot kubọk ire ebi ‘utọn̄ ogonbe ichit.’ (Jeri 6:10; Ikwaan̄ 7:51) Ema ebet lek utọn̄ echi mkpọ onwaan̄be ichit ufuna ekakinọ ikọ. Ema ire utọn̄ echi Jioba ikachilige, Jioba ogwu okinyi ebi ikiweek ogọt utọn̄ ekisa igobo inu itet melek nsiki-ibot, ire mè otele ibe utọn̄ ebi ikikpaka ibot eyi emen ekwukwu ikakinọ ikọ. (Ikan 29:4; Rom 11:8) Ogwu ikwaan̄ Pọọlu itumu ibe ke ikaan̄ mgbọ eyi ebi ikibe ke ema ire ebi eyi Karais ebetele ata ijejeen̄, kpebeyaka iweek inọnọ atikọ eyi Usem Awaji, ire ema mekiweek inọnọ mkpọ echi utọn̄ kiban̄ “okison” iweek inọnọ, inu echi okitop ema me lek mè isa me ikeya ikisigban̄ ebi ataak ijejeen̄. (2 Tim 4:3, 4; 1 Tim 4:1) Ikeya si, utọn̄ ene mokọt “igon” sa me ikekinọ ijo etip, ogakge etip ofo me lek akọn̄..—1 Sam 3:11; 2 Ubọọn̄ 21:12; Jeri 19:3.
ONYAN̄ JEETA 30–ONYAN̄ ONAAN̄GE 5
INU UNYE OTU EWE OKUP ME USEM AWAJI | IKAN ÒSO MGBỌ IBA 31-32
“Kween̄ Mkpọ Nan̄a Me Lek Mkpọ Okwa Eyi Ekwukwu Mbuban Onyibe Okebijeen̄”
w20.06 10 ¶8-9
“Rọ Mè Ǹsa Ejit Ge Ǹkemmin Erieen̄ Kwun̄”
8 Sabum ebi Ijeren enin̄be Ijọn̄ eyi Echieekbe Use ya, Jioba ijeen̄ Mosis okwa. (Ikan. 31:19) Mosis oboyaka ijeen̄ ebi Ijeren okwa ya. (Fuk Ikan Òso Mgbọ Iba 32:2, 3.) Me mgbọ eji ekebigwu nket ikom me lek agba eyi 2 mè 3, isibi utoon̄ ibe ke Jioba ikaweek ibe erieen̄ kan̄ ilelet, erọ kubọk ire inu omalek ikup mbuban eyi kpekọtbe ikigwen. Iweek ibe otutuuk ebilene eriọọn̄ erieen̄ kan̄! Ichubọk ire irek omimin ebi ene ikekinọ Mosis okijeen̄ ema mkpọ ofo me lek Jioba melek mgbugbo erieen̄ Kan̄! Mkpọ Mosis ojeen̄be ema inyi ema nsek lek ibet lek senesene obot ogwook me lek inwan̄ otu oron. Ike owa ke eji ebesa imun̄ ibe ke ijejeen̄ kiji ikinyi ene nsek lek si?
9 Me mgbọ eji ekije inan̄a me uwu ire uwu mè iyaka ire ikilook ebi ene ata etip, eji mekọt ijeen̄ ebi ene ufulek erieen̄ Awaji, Jioba. Eji mekọt inyi atalek ikpa, ujuja fidio, melek inu echi okup me emen jw.org kiji echi okimin erieen̄ Jioba. Me ere ikwaan̄, me uwu ikpa, mè iyaka ire mgbọ eji ekebikọp uran̄, eji mekọt iweek irek isasa ikpa mkpọ osilek Awaji kiji ogwu okakaan̄ ima melek mbet ogwu irebe. Mgbọ geelek eji esitumu inyi ebi eji echichinibe inu ofolek ata nkeek Jioba okaan̄be inyi ebilene melek inyọn̄ ijọn̄, eji ekirọ inyi ema ekemun̄lek Jioba me ofifi ubọk eyi mokọtbe ikup ema me lek ayaya ayaya. Ike eji ekikpa inyi ebi ene atikọ ofolek Nte kiji ogwu okakaan̄ ima, eji ekigọọk isun̄ erieen̄ Awaji me mbuban. Eji ekituku erieen̄ Jioba itana me lek usini ataak melek mfiat-erieen̄ echi ekebijeen̄ usini ebi ene. Eji ekijeen̄ ebi ene atalek ijejeen̄ echi okinyi ene nsek lek onwọnwọn ichit.—Asaya. 65:13, 14.
w09 5/1 14 ¶4
Mkpọ Usem Okup me Emen Baibul Okebijeen̄—Ire Ogobo Ema Itet Nje?
Baibul isa Jioba itọt si me lek mkpọ echi ikakaan̄ge ugwem me emen. Esa ogọt itọt me lek “Ewuuk ebi Ijeren,” “ewuuk,” mè ire si “uwu mgban akọn̄.” (Samien Eyi Òso Iba 23:3; Okwa Itọn̄ 18:2; Ikan Òso Mgbọ Iba 32:4) Keke ore mgbaan̄ ema ekaan̄be? Ike ubọk ikpele ewuuk ikakisisik, ikakinan̄a me akpat, ikeya si ke Jioba obokọt ire ata Ere ikput lek onyenye isa inyi owu.
w01 10/1 9 ¶7
Kigọọk Akpat Ukot Kè Jioba Osikikpukpo Nsabọn Kwun̄
7 Kpọ-nu mbet lek ima Jioba ojeen̄be mgbọ ikigọọk ebi Ijeren irọ mkpọ. Mosis isa usem eyi okpije ikike isa ikpa mbet lek ima Jioba okaan̄be me lek ido ebi Ijeren eyi okititibi isibi ayaya. Eji efuk ikeyi: “Kubọk igo okijeen̄ ogwu gwun̄ ike ekiwulu, mè ikisisik uwu kan̄, mè ikifufeen̄ ikana me inyọn̄ ikikpọ ogwu gwun̄, mè iyat uwop kan̄ iwele isa ikpebe ọmọ, mè iben ọmọ me inyọn̄ utọn̄ uwop kan̄, inyi ikanan̄a ìrọn̄. Îre Jioba gaalek osa [Jekọp] ije.” (Ikan Òso Mgbọ Iba 32:9, 11, 12) Ufuna ikọt ijeen̄ gwun̄ kan̄ ubọk ekiwulu, nga igo ‘ikisisik uwu kan̄,’ oyat uwop kan̄ owele mè okofufeen̄ okana okosa otap ebi bọn̄ efuuk me owot ufuna ema ekọt ebene ekewulu. Mgbọ geelek gwun̄ igo isinan̄a me emen uwu isibi, eyi ema ekimalek inama me inyọn̄ ogoon̄ obebene, ogwu uga ira “ikifufeen̄ ikana” me lek gwun̄ kan̄ ya. Ire ikup kubọk gwun̄ ya moninan̄a irọn̄ me ijọn̄, ogwu uga ira iwulu ikana irak kan̄ mè oben ogọt me inyọn̄ ‘utọn̄ uwop kan̄.’ Me oniin̄ okup ikeya si ke Jioba osa me ima ikpọ chieen̄ me lek ayaya ido ebi Ijeren. Inyi ema Ikan kè Mosis. (Okwa Itọn̄ 78:5-7) Awaji onenigwuun̄ chieen̄ ikikpọ ebi ido ya, mè ikup mbem inyanyan̄a ema me mgbọ ebi eyi kan̄ isikaan̄ ufialek.
Week Inu Unye Otu Ewe Okup me Usem Awaji
w04 9/15 27 ¶12
Ikpakpa Isibi Inu Okup me Emen Ikpa Ikan Òso Mgbọ Iba
31:12. Nsabọn mekigọọk ebi imimiin̄ igbaan̄ ikup me nkween̄mkpọ me ntitiin̄ mè ikigban̄ utọn̄ mè ikikween̄ mkpọ.