Ikpa Okikpa Nkween̄mkpọ Ugwem Mè Ikwaan̄ Kiji Kubọk Ebi Eyi Karais
ONYAN̄ ITA 7-13
INU UNYE OTU EWE OKUP ME USEM AWAJI | SAMIEN EYI ADASI 12-13
“Sonson Lek Ikisa Esip Ijet Ene”
w00 8/1 13 ¶17
Sonson Lek Ikisa Esip Ijet Ene
17 Mokọt ikup kubọk inu Sọọlu orọbe itat, mije ‘ike mgbọ ya ukot akọn̄ ebi Filisia îlobo igak eyi ebi Ijeren.’ Ema ekpọkpọ ikifieek owot mè ikilibi isi ilet. (Samien Eyi Adasi 13:6, 7) Usini mgbọ, ikalọ ene irọrọ inu ikpọ me lek irek imun̄be lek kan̄. Ire, kawuuk ibe ke Jioba mokọt imun̄ mè iriọọn̄ inu okup eji me ejit melek inu okibieen̄ eji ibe ekerọ inu. (Samien Eyi Adasi 16:7) Eya orọ, Jioba ira iriọọn̄ usini mkpọ ofolek Sọọlu echi ekagebe me emen Baibul. Kubọk inu njeen̄, Jioba ira imun̄ ibe ke ire ugumulek orọ inyi Sọọlu ikakaan̄ ime. Sọọlu ira ikikeek ibe—emi ogwu ubọọn̄ otutuuk ebi Ijeren—mbanikikup ikpọ ogwu ugane ogwu nriran okikukọbọ yi! Sọọlu ikikeek ibe ke ọmọ ikaan̄ unen igwagwa ngwugwa ya mije ibe ke Samien ikagwat lek inu, mè ikpọ chieen̄ ilọ me lek ntọ-ubọk enyibe ogọt. Keke ke eyi osan̄a isibi? Samien ikatọn̄ Sọọlu me lek inu ya irọbe. Kpan̄asi ikeya, ọmọ inanaan̄ ejit inyi Sọọlu, mè itumu inyi ibe: “Owu òkpoyaka ikpulu ebi Ijeren igak ikeya . . . mije, owu òkarọ inu [Jioba NW ] Awaji kwun̄ onyibe ida ibe owu òrọ.” (Samien Eyi Adasi 13:13, 14) Eya orọ, sonson lek ikisa esip ijet ene.
w07 6/15 27 ¶8
Jioba Imọnọ Nsiki-Ibot Kwun̄ Ibene
8 Mfufuk Baibul ofolek ogwu Ubọọn̄ Sọọlu ikijeen̄ eji ubọk isisiki ibot osabe ikup ufiak ire. Sọọlu ijeen̄ usikilek mgbọ ibenebe ikikpulu, ‘imun̄ lek kan̄ kubọk ogwu osisip.’ Ire, ike mgbọ okije, ibebene ikigumu lek mè ikisa lọlọ nkeek irọ ntumu-mfieek. (Samien Eyi Adasi 10:21, 22; 15:17) Me ike mgbọ ge, Sọọlu ibosi itim akọn̄ me lek ebi Filisia. Samien otutumu inyi Sọọlu ibe ikup ikpọ mgbọ ọmọ obonu inigwa ngwugwa mè iyaka inyi si ntọ-ubọk ibogọọk. Ire, bak lek Samien ikagwatbe lek inu, ebi Ijeren ebebene ikilibi isi ilet. Mije keyi, Sọọlu “oneniben ngwugwa ewọwọp iriọk ya igwa.” Jioba ikabele ejit me lek inu ya irọbe. Mgbọ Samien onube, ogwu ubọọn̄ ya otutumu ikọ isasa ibeek lek me lek mkpaka-ibot kan̄. Itumu ibe ke ire mije Samien ikagwatbe lek inu, ‘orọ mè ọmọ’ isi igwa ngwugwa ewọwọp iriọk ya isasa ibeek ntap-ubọk kè Jioba. Me lek ogwu Ubọọn̄ Sọọlu, igwagwa ngwugwa ya okup ufiak igak isisiki ibot igọọk ntọ-ubọk enyibe ọmọ ibe ikup ikpọ Samien inyi inigwa ngwugwa ya. Samien otutumu inyi ogọt ibe: “Owu orọ inu ebi burubut! Owu òkarọ inu [Jioba NW ] Awaji kwun̄ onyibe ida ibe owu òrọ.” Sọọlu ichep irek ubọọn̄ kan̄ mije ikasikibe ibot inyi Jioba.—Samien Eyi Adasi 10:8; 13:5-13.
Week Inu Unye Otu Ewe Okup Me Usem Awaji
w11 7/15 13 ¶15
Ire Omogọọk Ntọ-Ubọk Jioba Okisa Mè Ima Inyi?
15 Ire ebi Ijeren ekikeek ibe ke ema mekọt iyaka lek imaan̄ me lek ogwu ubọọn̄ ekisa chieen̄ imun̄ igak Jioba ni? Ire ikeya, ichubọk ire inu ikike ke ema ekilibi igọọk! Eyi mokọt irọ inyi ema ekelibi egọọk ofifi ofifi inu ikike echi Setan okisa ifiaan̄ ene si. Ebi ubọọn̄ ebilene chi mekọt irọ ufuna ema ebene ekeriaak mkpọmfaka. Ebi ikiriaak mkpọmfaka ekikeek ibe ke inu echi ema ekisa chieen̄ imun̄, orere—awaji echi erombe me ubọk—minwọn, mè ire mkpọ mekọtbe iyaka lek imaan̄ me lek, igak Awaji ogwu kpekisa chieen̄ ikike imun̄, orere, Jioba ogwu ororom otutuuk inu. Ire, nkeek kiban̄ ilọ, ike ogwu ikwaan̄ Pọọlu ogebe, “ìkakaan̄ inu geege eyi mkpọmfaka orebe.” (1 Kọr 8:4) Ema kpebekọt imọọn̄ inu, inọ ikọ, itumu ikọ mè iyaka ire irọ inu geege. Omokọt imun̄ lek kiban̄ mè ichak ubọk me lek kiban̄, ire, ire otọbọ ebum inyi ema, ibore inu ikike ke okilibi igọọk—inu ikike eyi obosa unan ijet owu.—Itọn̄ 115:4-8.
ONYAN̄ ITA 14-20
INU UNYE OTU EWE OKUP ME USEM AWAJI | SAMIEN EYI ADASI 14-15
“Isisiki Ibot Onwọn Igak Igwagwa Ngwugwa”
w07 6/15 26 ¶4
Jioba Imọnọ Nsiki-Ibot Kwun̄ Ibene
4 Kubọk Ogwu Orom, Jioba okaan̄ otutuuk inu-nkaan̄ geelek eji ekaan̄be. Ire, ire ikaan̄ inu eji ebekọt inyi ogọt ni? Iin̄, eji mekọt inyi ogọt inu onyenye otu ewe enenen. Keke ore inu ya? Eji mekọt ikaan̄ ufọọk-otu inan̄a me lek nteme yi: “Gwun̄ n̄a, riọọn̄ inu, inyi ejit ibele emi, ufuna ǹkọt m̀fọọk ikọ ogwu òkisọ otu inyi emi.” (Urọk 27:11) Eji mekọt inyi Awaji nsiki-ibot kiji. Ikere ibe ke eji enan̄a me esese esese ere mè ikaan̄ esese esese irek, ire eji ikisiki ibot inyi Jioba, eji ge ge mekọt ifọọk otu isọ-otu eyi Setan ogwu ore Yọk okitumu ibe ke ebilene kpebekọt igbe utoon̄-ejit inyi Awaji me mgbọ ema ekikaan̄ ufialek. Eyi ichubọk ire irek omimin enenen!
it-2 521 ¶2
Isisiki Ibot
Kpunu inu geege ebekọt isa inwene nsiki-ibot, ene ikpokaan̄ nnwọn-isi Awaji mè ire ikakisiki ibot inyi ọmọ. Kubọk Samien otumube inyi ogwu Ubọọn̄ Sọọlu: “Ìre eyi owa ke [Jioba NW ] okiweek, ìre ngwugwa ewọwọp iriọk melek ofifi chieen̄ ngwugwa geelek, sà ìre igbagban̄ utọn̄ [form of sha·maʽʹ] me ida [Jioba NW ]? Kpọ, isisiki ibot [igbagban̄ utọn̄], ọmọ onwọn igak igwagwa ngwugwa.” (1 Sam 15:22) Ire ene ikasiki ibot, isibi ibe ke ene ya ijit usem kè Jioba, isibi si ibe ke ene ya ikachubọk ichieek mè itoon̄ ejit me lek usem ya melek Ogwu otutumu. Eya orọ, kpunu esese okukup inyi ogwu ojijit isisiki ibot melek ogwu okido ido-inu mè iyaka ire, ogwu okiriaak mkpọmfaka. (1 Sam 15:23; kpọ si Rom 6:16.) Ire inu ikike ene ikpọkpọ ikitumu ibe ke ọmọ ichieek me lek mkpọ, ire, ikakirọ inu igọọk me lek usem kan̄; ene ijijit irọrọ inu ekiteme ọmọ ikijeen̄ ibe ke ene ya ikachubọk ichieek mè iyaka ire ikaan̄ ulibi me lek ogwu onyinyi nteme ya. (Mat 21:28-32) Ebi ikinọ usem Awaji mè echieek ibe ire atikọ gaalek ire, kpekirọ inu itumube, ekifafiaan̄ lek kiban̄ inan̄a me lek lọlọ nkeek, ema si kpebekaan̄ ugbana geege. (Jemis 1:22-25) Gwun̄ Awaji itumu ikpọk mbum ibe ke ikerere ebi ikirọ mbet lek inu echi enyibe me ikan, ire, me oniin̄ olọlọ mè iyaka ire me nkeek olọlọ, kpebenin̄ Ama Ubọọn̄ Awaji, ebejijit ema.—Mat 7:15-23.
Week Inu Unye Otu Ewe Okup Me Usem Awaji
it-1 493
Ijejeen̄ Nsan
Ijejeen̄ ene nsan eyi ikajege igọọk me lek nkeek Awaji bak lek ukeme mokọt isa ikpele ufialek ijet ene. Eyi ikpọk mbum inan̄a me lek inu orọrọ ogwu Ubọọn Sọọlu. Ire mgbọ Awaji obotip ebi Amalek oyerebet kubọk adasi ebi ibenitim akọn̄ me lek ebi Ijeren me mgbọ ema enan̄abe me Ijibit isibi. Minyi Sọọlu ikan ibe ikajeen̄ ema nsan geege. Inan̄a me lek ukeme ebi ọmọ okikpulu enyibe ogọt, Sọọlu ikakọt isun̄ otutuuk ikan Jioba onyibe ogọt. Eya orọ, Jioba obọbọkọ irek ubọọn̄ isan̄a me ubọk Sọọlu. (1 Sam 15:2-24) Ire ene ikaan̄ udọk udọk ulibi me lek onineen̄ ata-ubọk irọrọ kè Jioba mè ikigbe utoon̄-ejit inyi Ogọt, ene ya mokijit ikekirọ ijo inu, ike Sọọlu orọbe mè ichep nnwọn-isi Awaji.
ONYAN̄ ITA 21-27
INU UNYE OTU EWE OKUP ME USEM AWAJI | SAMIEN EYI ADASI 16-17
“Akọn̄ Yi Ire Eyi Jioba”
wp16.5 11 ¶2-3
“Akọn̄ Yi Ire Eyi Jioba”
Debit ikpa inyi Sọọlu ubọk isabe ikpan̄ egbe atat melek ibo nriọk. Ire ikigugo lek nje? In̄-in̄. Debit iriọọn̄ ogwu otatap ubọk inyi ọmọ ikọt ikpan̄ anam cha. Itumu ibe: “[Jioba NW ] ogwu ònyanyan̄a emi isibi me otu egbe àtat mè otu ibo nriọk mônyan̄a emi isibi si me ubọk ogwu Filisia yi.” Sọọlu ofọfọọk ogọt ibe: “Je! [Jioba NW ] ikup melek kwun̄!”—Samien Eyi Adasi 17:37.
Ire omoma ikakaan̄ ichechieek kubọk Debit ni? Ire ikeya, riọọn̄ ibe ke ichechieek kè Debit ikare ekiket ejit ikike. Debit iriọọn̄ Awaji ijaan̄, ire bak lek eyi mè inu ijebe itibi ke ikaan̄ ichechieek me lek Awaji. Ọmọ iriọọn̄ ibe ke Jioba ire ogwu Okibem ebi eyi kan̄ inan̄a me ima mè ogwu Okirọ use kan̄ si iso. Ire eji iweek ikakaan̄ mbet ichechieek keya, eji mekup inye ikikween̄ mkpọ ofolek Awaji ogwu Okakaan̄ Baibul. Ire eji ikitap mkpọ eji ekween̄be me ikwaan̄, eji memun̄ ibe ke oruru ibokinyi eji mokinama ichechieek kiji inye.—Ebi Iburu 11:1.
wp16.5 11-12
“Akọn̄ Yi Ire Eyi Jioba”
Mege inire chereyi, ebi ene mikimun̄ ufọọk-otu kè Debit kubọk inu okijeen̄ atalek ichechieek. Kpọ nu ubọk sọn̄ gwun̄ enerieen̄ yi osabe ikitumu inyi Golayat ibe: “Eyi kwun̄, oge akọn̄ mè otunwa mè otubọ ke owu osa inu akọn̄ me lek n̄a. Ire, emi ǹnu akọn̄ me lek kwun̄ me erieen̄ [Jioba NW ] Ogwukaan̄ Inyọn̄ mè Ijọn̄, òrere Awaji ebi urum akọn̄ ebi Ijeren ebi owu okitọ ubọk me isi.” Debit iriọọn̄ ibe ke unye eyi ebilene melek mkpọ akọn̄ kiban̄ ikakaan̄ ikwaan̄. Golayat ikajeen̄ ulibi me lek Jioba, eya orọ, Jioba mojeen̄ ogọt unye kan̄. Ike Debit otumube, ebi ene meneniriọọn̄ ibe ke “akọn̄ yi ìre eyi [Jioba NW ].”—Samien Eyi Adasi 17:45-47.
Debit imun̄ ubọk Golayat ominbe ire mè imun̄ si mkpọ akọn̄ kan̄. Ire, Debit ikachieek ibe inu cha itap ogọt ukpook me emen. Ọmọ ikarọ mbet inu eyi Sọọlu mè ebi urum akọn̄ kan̄ erọbe. Debit ikasa Golayat itọ me lek kan̄. Kpan̄asi ikeya, isa Golayat itọ me lek Jioba. Golayat ijọn̄ọ iso ejit ge mè agbagba otubọk go mè iyaka ire mkpọ oboso mita ita (2.9 m), ijọn̄ọ isaba otutuuk ene. Ire, ike owa ke imin ire mè ire esa ọmọ itọ me lek Ogwu Okakaan̄ otutuuk linyọn̄ yi? Me atikọ, ibet lek otutuuk bọn ebilene, Golayat isip ikup kubọk atat ikike—ogwu Jioba obokpakpan̄!
wp16.5 12 ¶4
“Akọn̄ Yi Ire Eyi Jioba”
Me chereyi, ebi usun̄ Awaji kpekitim akọn̄ eyi anam lek. Mgbọ keya iraka. (Matiyu 26:52) Ire, ikup ufiak ibe eji ekaan̄ mbet lek ichechieek Debit okaan̄be. Ibet lek kan̄, eji mechieek ijaan̄ ibe ke Jioba omaan̄ me atikọ—ke ọmọ gaalek ore Awaji ogwu eji ebekitọbọ ebum inyi mè ikikaan̄ ukpook me lek. Usini mgbọ, mokọt ikup kubọk ufialek kiji imimin igak eji, ire, ufialek cha ire sọntitiik mè ire esa itọ me lek ikpele unye kè Jioba. Ire eji igobo Jioba kubọk Awaji kiji mè ikaan̄ ichechieek me lek kan̄ kubọk Debit, eji kpebekifieek owot me lek ufialek mè ntọ-mkpọ geege. Kpunu inu geege omimin igak Jioba!
Week Inu Unye Otu Ewe Okup Me Usem Awaji
it-2 871-872
Sọọlu
Jioba iria Samien ibe isi itọkọ aran̄ me ibot Debit kubọk ogwu obokana ogwu ubọọn̄ mije Sọọlu ikasikibe ibot inyi ọmọ. Ire mgbọ ya ke ekwukwu Jioba otele Sọọlu, ‘ijo erumun̄ onan̄a me ubọk Jioba okekisisaak ogọt.’ Jioba isan̄a ekwukwu kan̄ me emen Sọọlu, itele si ibe ijo ekwukwu inin̄ emen Sọọlu. Ijo erumun̄ ya irọ ufuna Sọọlụ ikakaan̄ esuuk me ejit mè ibene ikikaan̄ lọlọ nkeek. Sọọlu ikasiki ibot inyi Jioba, eyi okijeen̄ ibe ke ejit kan̄ ikatana. Eyi irọ inyi ikayaka ikaan̄ ekwukwu Awaji eyi obokitap ubọk inyi ọmọ ikijit lọlọ nkeek. Ire, mije ibe ke Jioba itele ibe “ijo erumun̄” ya inin̄ emen Sọọlu mè ikinyinya ogọt, mekọt itumu ibe ke ire ‘ijo erumun̄ onan̄a me ubọk kè Jioba,’ ire eya orọ si ibe ebi usun̄ kè Sọọlu etumu ibe ke “îre ijo erumun̄ ònan̄a me ubọk Awaji okisisaak” Sọọlu. Mgbọ ogwu ikwaan̄ Sọọlu otumube mkpọ ofolek Debit inyi ogọt, iraria ikwaan̄ igwen Debit ibe inikifit uneen̄ inyi ogọt ufuna lek kan̄ ikisuuk mgbọ geelek “ijo erumun̄” ya isibene ikisisaak ogọt.—1 Sam 16:14-23; 17:15.
ONYAN̄ ITA 28–ONYAN̄ INI 3
INU UNYE OTU EWE OKUP ME USEM AWAJI | SAMIEN EYI ADASI 18-19
“Kisiki Lek Ikerere Me Mgbọ Okikaan̄ Nje-Nnyi-Isi”
w04 4/1 15 ¶4
Kiyaka Lek Maan̄ Me Lek Ekwukwu Mbuban Awaji Ike Irek kwun̄ Okinwene
4 Sọnja mgbọ, erieen̄ ogwu okpukpo arọọn̄ yi mobene ikitaan̄ etip me otutuuk ido. Migwen ogọt ibe ikinisi ikwaan̄ inyi ogwu ubọọn̄ mè ikifit uneen̄ inyi ogọt. Ọmọ ikpan̄ Golayat, ogwu ujọn̄ọ ile ogwu ebi Ijeren irọriọọn̄ ukot akọn̄ ekitet ukpook me lek. Kubọk ogwu isi akọn̄, Debit itim igak ebi Filisia. Ebi Ijeren mima ogọt. Ema mikọt okwa ikisa imin ogọt. Sabum mgbọ ya, ogwu ikwaan̄ ogwu Ubọọn Sọọlu iwuuk lek itumu ibe ke Debit ire “ogwu òrọriọọn̄ ifit uneen̄ ijaan̄ enenen” mè “ogwu ìkakitet ukpook, mè ire si ogwu ònyenye lek enenen, mè ogwu usọ akọn̄,” ogwu okiriọọn̄ “itumu ikọ enenen, mè ire si ogwu òjajaan̄ uja enenen.”—Samien Eyi Adasi 16:18; 17:23, 24, 45-51; 18:5-7.
w18.01 28 ¶6-7
Kikpọ Esese Okup Me Lek Ebi Ene
6 Usini ebi ene ekigumu lek mije ibe ke erieen̄ kiban̄ ikitaan̄ etip, ema mijaan̄ uja, miriọọn̄ chieen̄ okwa, minye lek, mè iyaka ire ikaan̄ irek omimin. Debit ikaan̄ otutuuk inu chi; ire, ijejeen̄ usikilek me otutuuk usen ugwem kan̄. Mgbọ ogwu Ubọọn̄ Sọọlu onyibe ogọt gwun̄ enenwaan̄ kan̄ me lek nwa mije ikpan̄be Golayat, Debit itumu ibe: “Iyak! Ìre emi ìre ekene? Sà ìre ugwem n̄a ìkup me lek keke, sà uwu nte n̄a ìkup me lek keke me etete ebi Ijeren, eyi emi mbanire nlom gwun̄ ogwu ubọọn̄?” (1 Sam 18:18) Keke otap ubọk inyi Debit ikọt ikaan̄ usikilek? Inu orọrọ Debit okaan̄be ata eru, unye, melek irek chi ire mije ibe ke Awaji ‘igegele chieen̄ isiki ikpọ,’ mè iyaka ire isisiki lek igọọk Debit irọ inu. (Itọn̄ 113:5-8) Debit iriọọn̄ ibe ke ire Jioba onyi ogọt ata inu geelek ikaan̄be.—Kpọ si Ebi Kọrint Eyi Adasi 4:7.
7 Ibet lek Debit, ebi eyi Jioba me chereyi ekitap efuuk ikijeen̄ usikilek. Ikike eji chieen̄ enenen irọriọọn̄ ibe ke Jioba, Ogwu omimin ichit me inyọn̄ mè ijọn̄ ikijeen̄ eru usikilek. (Itọn̄ 18:35) Eji kpekiwuuk nteme yi: “Ìmun̄ lek kinyi me chieen̄ enenen, ìkikaan̄ njijin mè ata ejit me lek ene. Ìkisiki lek kinyi, mè ìkirọ inu esuuk esuuk, mè ìkikaan̄ ukarajit.” (Kọl 3:12) Eji si miriọọn̄ ibe ke ogwu okakaan̄ ima “ìkakitumu otu ile, ìkakigumu si lek.” (1 Kọr 13:4) Eji isikijeen̄ usikilek, eyi mokọt ikitaba ebi ene inu me lek Jioba. Eru ebi irere nwa mokọt itaba nlom kiban̄ inu me lek Jioba me ekatumube usem geege, ikeya si, ebi ofifi ife mekọt iniriọọn̄ Awaji mije usikilek ebi eyi kan̄ ekebijeen̄.—1 Pita 3:1.
Week Inu Unye Otu Ewe Okup Me Usem Awaji
it-2 695-696
Ogwu Nriran
Ikerere ibe ke Jioba isa ekwukwu mbuban kan̄ igobo ema, eyi ikasibi ibe ke ebi nriran ekitumu ikọ inan̄a me unye enyi ekwukwu mbuban me mgbọ geelek. Kpan̄asi ikeya, ikikaan̄ mgbọ eyi ekwukwu Awaji ‘okinin̄ ema emen’ mè okpọk mbum etip ema ebelook ojeen̄ ema. (Ijik 11:4, 5; Maika 3:8) Eyi ikikaan̄ unye me lek kiban̄ enenen, mè orọ ufuna ema ekeben nriran. (1 Sam 10:10; Jeri 20:9; Emọs 3:8) Kpolọlọ, ema mira ikitumu usem mè ikirọ inu me oniin̄ okup nke nke. Eyi ire inu ge obotap ubọk inyi eji ekọt egobo etet mkpọ isibibe ibebe ke ebi ene ekigọọk “ikiben nriran.” (1 Sam 10:6-11; 19:20-24; Jeri 29:24-32; kpọ si Ikwaan̄ 2:4, 12-17; 6:15; 7:55.) Ike ubọk ema ekisa me uyok uyok ejit mè unye-ejit ikilook etip kiban̄ mokọt irọ ibe irọrọ kiban̄ ikikup nke nke me chieen̄ ebi ene, ike ebi ibot akọn̄ emun̄be ogwu nriran ge, ogwu otọtọkọ aran̄ me ibot kè Jewu. Ire, ebi ibot akọn̄ cha mimọnọ etip kan̄ kubọk inu okukup ufiak mgbọ ema eweekbe iriọọn̄ ibe ke ene ya ire ogwu nriran. (2 Ubọọn̄ 9:1-13; kpọ si Ikwaan̄ 26:24, 25.) Mgbọ Sọọlu okigọọk Debit, ibene “ikiben nriran,” iwọọk ofọnti isan̄a me lek kan̄ mè ilaak “njak ikeya me ijọn̄ otutuuk usen ya mè otutuuk eririeen̄ ya,” eyi onyinyi Debit irek isasa ilibi inwọnọ. (1 Sam 19:18–20:1) Eyi ikasibi ibe ke ebi nriran ekije njak mgbọ geelek, mije mfufuk Baibul ikajeen̄ ikeya. Ofifi mgbọ iba echi ebi nriran ejebe njak, ikaan̄ ibot inu orọrọ ibe ema eje njak, erọ ikeya isasa ijeen̄ usini me lek usem nriran kiban̄. (Asaya 20:2-4; Maika 1:8-11) Eji kperiọọn̄ ibot inu orọrọ erọbe inyi Sọọlu ije njak—mè ire isasa ijeen̄ ibe ke ogọt ire ebilene ikike, ogwu esan̄abe irek ubọọn̄ me ubọk, mè ogwu ikakaan̄ge unye geege ire esa itọt me lek Jioba, Ogwu Ubọọn̄ okakaan̄ unye mè ikitọ ikọ, sa ire ofifi ofifi ibot inu—kpetumu isibi.
ONYAN̄ INI 4-10
INU UNYE OTU EWE OKUP ME USEM AWAJI | SAMIEN EYI ADASI 20-22
“Ubọk Obosa Ire Ata Unene”
w19.11 7 ¶18
Kaan̄ Ata Unene Sabum Ota Mgbọ Onore
18 Me chereyi, ebi bọn ute ibaan̄ mè ireen̄ mikikaan̄ esese esese rumurumun̄. Kubọk mkpọ njeen̄, mfufiat irọn̄ itet owuwa kiban̄. Usini mfufiat cha inan̄a me ubọk ene, usini ikanan̄a me ubọk ene. Mfufiat isirọ, usini kiji mekọt ibọkọ bọn ute chi itap me uwu kiji. Usini ene mekọt itap ubọk sa me inyinyi ikpoko. Ire, otutuuk kiji mekọt ibeek Jioba ibe itap ubọk inyi ebi ngwan̄ kiji ebibaan̄ mè ebirieen̄. Ire eji inọ ibe ke gwun̄ ute ge ikaan̄ sasaak, usini mgbọ eji kpeberiọọn̄ mkpọ eji ebetumu mè iyaka ire mkpọ eji eberọ. Ire, otutuuk kiji mikaan̄ owuwa inu eji mekọtbe irọ. Kubọk mkpọ njeen̄, eji mekọt isan̄a mgbọ isibi mè isikpọ ogwu unene kiji ya. Eji mekọt ikisa me nsan ejit ikigban̄ ogọt me mgbọ ikitumu usem. Eji mekọt igọọk ogọt iche nkeek si me lek ere Baibul echi okikat eji ejit. (Asaya 50:4) Inu okukup ufiak ichit ire ke owu ogọọk ebi unene kwun̄ ikup me mgbọ eweekbe owu.—Fuk Urọk 17:17.
w08 2/15 8 ¶7
Kije Me Oniin̄ Kè Jioba
7 Awaji iweek ibe eji ere ata ebi unene mekọtbe itoon̄ ejit me lek. (Urọk 17:17) Jonatan gwun̄ ogwu Ubọọn̄ Sọọlu itet unene me lek Debit. Me mgbọ Jonatan onọbe ibe ke Debit ikpan̄ Golayat, “Jonatan onyanyan̄a ibot melek kè Debit mije îmabe Debit kubọk akpalek kan̄.” (1 Sam 18:1, 3) Mgbọ Sọọlu oweekbe ikpakpan̄ Debit, Jonatan ololook ogọt otitọt nte kan̄. Eyi Debit olibibe, Jonatan osisi isi imun̄ ogọt mè inyan̄a ibot melek kan̄. Sọntitiik Sọọlu mokpan̄ ogwu gwun̄ Jonatan mije ikpabe ntọt kan̄ inyi Debit, ire, ebi unene iba chi mikpọk imun̄ lek kiban̄ mè irọ inyi unene kiban̄ inye ebon. (1 Sam 20:24-41) Me ota mgbọ ema egbaan̄be ikup, Jonatan itap Debit efuuk me emen ibe “itoon̄ ejit me lek Awaji.”—1 Sam 23:16-18.
w09 10/15 19 ¶11
Irọrọ Unene Me Inyọn̄ Eyi Kpunube Ima
11 Kigbe utoon̄-ejit. Solomọn ige ibe: ‘Unene ìkima ene mgbọ geelek, mè ore si ngwan̄ me mgbọ uyọrọlek.’ (Urọk 17:17) Me mgbọ Solomọn okitumu usem cha, mokọt ire ibe ke ikikeek mbet lek unene eyi Debit nte kan̄ melek Jonatan erebe. (1 Sam 18:1) Ogwu Ubọọn̄ Sọọlu iweek ibe Jonatan gwun̄ kan̄ ire ogwu ubọọn̄ me Ijeren. Ire, Jonatan ichieek ibe ke Debit ire ogwu Jioba ogobobe ibe ire ogwu ubọọn̄. Jonatan ikakaan̄ mba-ejit me lek Debit kubọk Sọọlu okaan̄be. Ọmọ ikanaan̄ ejit me mgbọ ekitọn̄ Debit, ikabọkọ itap ijo usem Sọọlu otumube ibak Debit si. (1 Sam 20:24-34) Ire eji mibet lek Jonatan nje? Ire eji ekekibele ejit me lek ebi unene kiji me mgbọ ema esikaan̄ irek ni? Ema esikaan̄ ufialek, ire eji mikikat ema ejit mè ikitap ubọk inyi ema ni? Ire eji inọ ekitumu ijo usem ibak ogwu unene kiji, ire eji ekekigwat lek ichieek ni? Sa ire eji ekekigbini ikọ me ibot ogwu unene kiji ibet lek Jonantan?
Week Inu Unye Otu Ewe Okup Me Usem Awaji
w05 3/15 24 ¶4
Ikpakpa Isibi Inu Okup Me Ikpa Samien Eyi Adasi
21:12, 13. Jioba iweek ibe eji esa iriọọn̄-inu melek unye nkeek kiji esa erọ inu me mgbọ eji ekupbe me irek oyọyọt. Ọmọ inyi eji Ikọ kan̄, eyi okinyi eji iriọọn̄-inu, mè orọ ibe eji ekekeek inu ejaan̄. (Urọk 1:4) Ebi ugane ntitiin̄ si mekọt itap ubọk inyi eji.
ONYAN̄ INI 18-24
INU UNYE OTU EWE OKUP ME USEM AWAJI | SAMIEN EYI ADASI 23-24
“Kaan̄ Ime Mè Kikup Kpọ Jioba”
w04 4/1 16 ¶8
Kiyaka Lek Maan̄ Me Lek Ekwukwu Mbuban Awaji Ike Irek kwun̄ Okinwene
8 Debit ijit isasak Sọọlu unan me lek. Ijeen̄ ichechieek melek ime, mè itele ufialek kan̄ me ubọk Jioba. Me mgbọ ogwu ubọọn̄ ya onan̄abe me emen nkororok ya isibi, Debit otataan̄ ukpọ itumu inyi ogọt ibe: “Kè [Jioba NW ] me lek kan̄ isibi oyerebet keyi me etete kiji ene iba! Kè [Jioba NW ] gaalek isa ubọk kan̄ ikpe owu useen̄ ijo inu geelek okirọ emi. Ire, emi m̀kpabene ubọk n̄a isa ichak owu me lek.” (Samien Eyi Adasi 24:12) Ikere ibe ke iriọọn̄ ibe ke Sọọlu irọ inu olọlọ, Debit ikasa unye kan̄ irọ useen̄ inu; ọmọ si ikatumu ijo usem ibak Sọọlu. Me ofifi ofifi mgbọ si, Debit itet lek kan̄ ikaan̄ me irọrọ useen̄ inu. Kpan̄asi ikeya, ọmọ iyayaka lek imaan̄ me lek Jioba mè itoon̄ ejit ibe ke ọmọ monen̄e inu geelek isun̄.—Samien Eyi Adasi 25:32-34; 26:10, 11.
w04 6/1 22-23
Ire Irek Kwun̄ Okitọ Ikọ Inyi Owu Ni?
Inu nkween̄ eyi òso ita ire, eji eketoon̄ ejit me lek Jioba kpan̄asi eji ebesa me oniin̄ ikatatge me lek Baibul inwene irek kiji. Ogwu ikwaan̄ Jemis ige ibe: “Ìkat ejit ìre òta. Ikanan̄a ìrọn̄ me emen ntọ-mkpọ geege, inyi enyi esa me ikeya emiin̄ esibi, mè eso ifuk me irọrọ kinyi geelek, mè ata irọrọ geege ikanan me emen ugwem kinyi.” (Jemis 1:4) Eji mekaan̄ ime mè “ìkat ejit ìre òta” sa me ijeje itibi ntọ-mkpọ ya me kpesabe me oniin̄ olọlọ igwat lek itap uyaka me lek. Ike eji ekirọ ikeya, ubọk ichechieek kiji osabe inye ire mokikpọk mbum, ichechieek kiji mokinye si. Josefu mè Debit mikaan̄ mbet lek ime keyi. Ema kpeweek isasan̄a ufialek kiban̄ me oniin̄ Jioba ikamage. Kpan̄asi ikeya, ema misa irek kiban̄ ya irọ inu onwọnwọn. Ema mikup ikpọ mgbọ eyi Jioba, mè ikaan̄ si atalek ugbana inan̄a me lek! Jioba isa ema ene iba ikpulu mè inyan̄a ebi eyi kan̄.—Ibebene 41:39-41; 45:5; Samuel Eyi Òsọ Iba 5:4, 5.
Eji si mekọt ichichini irek echi mokọtbe irọ ibe eji eweek isasan̄a ufialek kiji isan̄a me oniin̄ olọlọ. Kubọk inu njeen̄, ire efuuk ita owu me owot mije ibe ke okamun̄ ogwu obodo mè iyaka ire ibat ni? Ire ikeya, jit inu geelek oborọ ufuna oje okeme ikan Jioba onyibe ibe ebat “ogwu òchechieek me lek kè Karais” gaalek. (Ebi Kọrint Eyi Adasi 7:39) Ire ikaan̄ ufialek okikwuun̄ isi me lek me mbat olom kwun̄? Kpan̄asi oborọ inu igọọk me lek ekwukwu inyọn̄ yi eyi okibieen̄ ebi ene ibe ekeche lek mè ekegwak olom, tap efuuk mun̄ ibe ke enyi minen̄e ufialek ya isun̄. (Malakai 2:16; Ebi Efesọs 5:21-33) Ire ikekiyọt owu ikpọkpọ chieen̄ me lek ebi ototun̄ ukan̄ kwun̄ bak lek uyọt mkpọ ni? Ikukup ikpọ Jioba igọbọ ijijit ikekirọ inu echi ojeje ikeme ikan mè iyaka ire inu ikatatge inyi okọt okaan̄ ikpoko. (Okwa Itọn̄ 37:25; Ebi Iburu 13:18) Me atikọ, otutuuk kiji metap efuuk ikirọ inu onwọnwọn me irek geelek eji emun̄be lek kiji ufuna Jioba ikọt igbana eji. Kè ire ntumu-mfieek kiji ikukup ikikpọ Jioba mege ire mgbọ ibotap uyaka me lek ufialek kiji me oniin̄ onwọnwọn ichit.—Maika 7:7.
Week Inu Unye Otu Ewe Okup Me Usem Awaji
w17.11 27 ¶11
Kè Inu Geege Ikagban Owu Me Ikakaan̄ Ugbana Chi
11 Ire eji ikaan̄ ima mè nsan ejit, ikpobofet ibe eji ekemin ejit. Usem Awaji ibe: “Ogwu òmun̄ ene me chieen̄ îkime inu ijọn̄ọ mgbọ, mè ikikaan̄ ata ejit me lek ene. Ìkakikaan̄ chieen̄ ile.” (1 Kọr 13:4) Ufuna eji ekakimin ejit, eji ekemun̄ inu ike ubọk Awaji okimun̄, mè ekemun̄ otutuuk bọn ute ibaan̄ mè irieen̄ kubọk esese nriro ikup me akpalek ge. Eyi motap ubọk inyi eji ekejeen̄ nsan me lek ge ge, igọọk me lek nteme Baibul yi: “Ire ebi ene itọn̄ nriro ge, otutuuk nriro kechilọ mêgọọk nriro keya inwọọn̄ unwọọn̄ si.” (1 Kọr 12:16-18, 26) Eya orọ, kpan̄asi eji ebekimin ejit, eji ebekikakaan̄ unwọọn̄ mè ire ata inu irọ inyi ebi ngwan̄ kiji. Kpọ nu akpat ukot Jonatan gwun̄ ogwu Ubọọn̄ Sọọlu. Ikamin ejit mgbọ egobobe Debit kubọk ogwu obobọkọ irek ubọọn̄ me Ijeren. Kpan̄asi ikeya, itatap Debit efuuk me owot. (1 Sam 23:16-18) Ire eji mekọt ikaan̄ ata ejit melek ima ibet lek Jonatan̄ ni?
ONYAN̄ INI 25–ONYAN̄ GO 1
INU UNYE OTU EWE OKUP ME USEM AWAJI | SAMIEN EYI ADASI 25-26
“Ire Okekikeek Inu Sabum Onorọ Ni?”
ia 78 ¶10-12
Isa Iriọọn̄-Inu Irọ Mkpọ
10 Ike owa ke ebi akọn̄ kè Debit esa irọ eru me lek ebi ikpukpọ arọọn̄ kè Naban? Ema ke ekọt ekekpan̄ usini arọọn̄ cha etaka inan̄a me mgbọ ire mgbọ, ire, ema kperọ ikeya. Kpan̄asi ikeya, ema mibem arọọn̄ cha mè ebi usun̄ kè Naban. (Fuk Samien Eyi Adasi 25:15, 16.) Ebi ikpukpo arọọn̄ mè arọọn̄ kiban̄ ekekichichini owuwa mkpọ unan. Anam echi okitaka arọọn̄ iwawa me agan̄ yi mije ikupbe iriaak me lek okike ijọn̄ ebi Ijeren me agan̄ osiki. Ebi inọ si ekekinan̄a me ofifi ido ikinichiin̄ mkpọ mè ikirọ ebi ikpukpo arọọn̄ cha nnaan̄.
11 Isibi utoon̄ ibe ke ikpofet ibe Debit ikọt ikikaan̄ inorie inyi otutuuk ebirieen̄ cha me emen ewe. Ọmọ orọ, usen ge, Debit oraria akọp ene ibe esi ebeek ntap-ubọk me ubọk kè Naban. Debit igobo mgbọ otatat. Ire mgbọ ekirie ijọk mgbọ ekisọp inwọọn̄ me lek anam, mgbọ ebi ene ekichili ubọk mè ekenwọọn̄ lek. Debit si igobo usem onwọnwọn mè ijeen̄ ulibi. Debit itumu inyi ebi iriabe cha ibe elook Naban ibe ke ire ‘ọmọ Debit gwun̄ kan̄’ oria ema inu, usini mgbọ irọ ikeya isasa ijeen̄ ibe ke ọmọ ikaan̄ ulibi me lek Naban kubọk ogwu ugane kan̄. Keke ke Naban oyaka irọ ni?—1 Sam 25:5-8.
12 Naban inanaan̄-ejit! Ogwu onikpa ubọk inu ya osabe ibọkọ irek inyi Abigen ibe ke Naban ‘igagana ere inyi’ ebi Debit oriabe inu. Naban ikaan̄ nunuun̄ ofolek ubọk ọmọ obosa inorie, mudim mè anam kan̄ inyi Debit mè ebi melek kan̄. Itiik Debit ibe ke ikakup me lek inu geege mè isa ọmọ itọt me lek ogwu usun̄ olilibi inan̄a me lek nte uwu kan̄. Mokọt ire ibe ke Naban imun̄ Debit ike Sọọlu ogwu ochacha ọmọ omun̄be ogọt si. Ema ene iba kpemun̄ Debit ike Jioba omun̄be ọmọ. Awaji ima Debit, ikamun̄ ọmọ kubọk ogwu usun̄ unye-ibot ire, imun̄ ogọt kubọk ogwu obore ogwu ubọọn̄ Ijeren me mgbọ okinu me isi.—1 Sam 25:10, 11, 14.
ia 80 ¶18
Isa Iriọọn̄-Inu Irọ Mkpọ
18 Abigen ibe mè Debit ifuk ijo inu Naban orọbe itoon̄ ọmọ me ibot, mè ibeek Debit si ibe itele inyi ọmọ. Itumu si ibe ke nlom kan̄ ire ogwu mbubut ike erieen̄ kan̄ osibibe. Mokọt ire ibe ke ikitumu ibe ke ikanwọn ibe Debit isa lek igọọk mbet ene okup ikeya. Ikpa si ibe ke ọmọ iriọọn̄ ibe ke Debit ire ogwu ikwaan̄ Jioba, ogwu okitim ‘akọn̄ kè Jioba.’ Sa me itutumu ibe ke ‘Jioba . . . mosa ọmọ irọ ogwu mkpulu me Ijeren,’ Abigen ijeen̄ ibe ke ọmọ iriọọn̄ use Jioba ochieekbe Debit ibe ke ọmọ more ubọọn̄. Itumu inyi Debit si ibe ikachieek ibe ifafiat eje ene mè ikpekpe ene useen̄ ijo inu inikana ‘ukput mè inu ubọnọlek me ejit’ kan̄,—orere, inu oborọ mè ọmọ ikakaan̄ utọn̄ọ nkeek. (Fuk Samien Eyi Adasi 25:24-31.) Eyi ichubọk ire ata usem obore ene ejit!
Week Inu Unye Otu Ewe Okup Me Usem Awaji
ia 80 ¶16
Isa Iriọọn̄-Inu Irọ Mkpọ
16 Ire eyi isibi ibe ke Abigen inyenye ibot inyi nlom kan̄ ogwu orere ogwu ibot kan̄ ni? In̄-in̄; kawuuk ibe ke Naban irọrọ inu ikpak ikeme ogwu Jioba okenbe aran̄, mkpọ eyi obosa mkpa ijet owuwa ebi kpelọge inu geege me uwu kè Naban. Ire Abigen ikarọ mkpọ geege, ire ikpokup kubọk ọmọ ibieen̄ ogwu olom inye ni? Inu Abigen orọbe ikijeen̄ ibe ke ọmọ imọnọ isisiki ibot inyi Jioba ibene isaba isisiki ibot inyi ogwu olom.