Ikpa Okikpa Nkween̄mkpọ Ugwem Mè Ikwaan̄ Kiji Kubọk Ebi Eyi Karais
ONYAN̄ JAABA 4-10
INU UNYE OTU EWE OKUP ME USEM AWAJI | SAMIEN EYI ÒSO IBA 18-19
“Bajilai Ijeen̄ Ata Akpat Ukot Eyi Usikilek”
w07 7/15 14 ¶5
Bajilai Irọriọọn̄ Inu Ibokọt Irọ Mè Echi Ikpokọtbe Irọ
Isibi utoon̄ ibe ke Debit ichubọk inwọọn̄ ntap-ubọk kè Bajilai enenen. Ikakup kubọk ke Debit ogwu ubọọn̄ ikpọkpọk iweek ikpekpe Bajilai useen̄ ata inu irọbe inyi ọmọ sa me ikpọkpọ chieen̄ me lek ufiak anam akpalek kan̄. Bajilai ire ogwu obọbọọn̄ ubọọn̄, ọmọ orọ, ikaweek ntap-ubọk kè Debit. Usini mgbọ, Debit iweek ibe Bajilai inigọọk ọmọ iluk bak lek ata eru kan̄. Ke ore mkpọ umin isa inyi Bajilai more ibe ke ọmọ ichieek iluluk me uwu ogwu ubọọn̄ ibia, eyi oborọ inyi ọmọ inwọọn̄ usini mkpọ kubọk ogwu une ogwu ubọọn̄.
w07 7/15 14 ¶7
Bajilai Irọriọọn̄ Inu Ibokọt Irọ Mè Echi Ikpokọtbe Irọ
Mokọt ire ibe ke Bajilai ikachieek igọgọọk Debit ije bak lek irebe ogwu oninin̄ ugane mè ikikaan̄ ufialek acha ukan okisa inu. Bajilai ira ikikeek si ibe ke acha osisik inyi ọmọ me ugwem ikayaka iwa. (Okwa Itọn̄ 90:10) Bajilai itap ubọk inyi Debit ike efuuk kan̄ okọtbe, ire, iriọọn̄ ibe ke acha ukan ikpochieek ibe ọmọ irọ usini inu. Bajilai ikachieek ibe olilọk ikakaan̄ umin mè isisibi isi irọ mè ọmọ ikariọọn̄ inu echi ibokọt irọ mè echi ikpokọtbe irọ. Kubọk ogwu okakaan̄ iriọọn̄-inu, Bajilai ikarọ mkpọ echi ikpokọtbe irọ, ikabet lek Abusolọm ogwu ugumulek.—Urọk 11:2.
w07 7/15 15 ¶1-2
Bajilai Irọriọọn̄ Inu Ibokọt Irọ Mè Echi Ikpokọtbe Irọ
Mfufuk ofolek Bajilai ikijeen̄ ibe ke ikup ufiak ibe eji ekeriọọn̄ inu eji ebekọt ikirọ mè echi eji kpekọtbe irọ. Eji kpebejit itatap efuuk inyi eji ekọt emin esoon̄ mè ebọkọ akpan ikwaan̄ me ntitiin̄ bak lek eji ekaweekge sasaak me ugwem mè iyaka ire bak lek eji ekakeekge ibe ke eji mekọt irọ itet. Awaji mokọt itap ubọk inyi eji mè ire eji iyaka lek imaan̄ me lek kan̄ ibe inyi eji unye mè iriọọn̄-inu.—Ebi Filipai 4:13; Jemis 4:17; Pita Eyi Adasi 4:11.
Ire, ikup ufiak ibe eji eriọọn̄ inu echi eji kpekọtbe irọ. Kubọk inu njeen̄, mokọt ire ibe ke Ogwu Eyi Karais ge ikaan̄ owuwa ikwaan̄ ikebirọ me ntitiin̄. Ire, ene ya iriọọn̄ ibe ke ire ọmọ ibọkọ ofifi ofifi akpan ikwaan̄ igbaalek, ke eya mokọt irọ ibe ikikpọ chieen̄ ilọ me lek usini inu echi ogbegbe ibe ikirọ ike Baibul otumube, kubọk, ikpọkpọ chieen̄ me lek ufiak ebi ototun̄ ukan̄ kan̄. Me mbet irek okup ikeya, ire ene ya ijit ibọbọkọ ofifi ofifi akpan ikwaan̄ igbaalek, ire ikpojeen̄ ibe ke ikaan̄ iriọọn̄-inu mè ikirọ mkpọ me okem-okem ni?—Ebi Filipai 4:5; Timọti Eyi Adasi 5:8.
Week Inu Unye Otu Ewe Okup Me Usem Awaji
w20.04 30 ¶19
‘Libi Ekot Si Re Ota’
19 Ire okaan̄ usini rumurumun̄ mè ikikeek si ibe ke ebi ene kpegobo owu itet, omokọt ikween̄ mkpọ inan̄a me lek akpat ukot Mefiboset. (2 Sam 4:4) Ikaan̄ rumurumun̄ kubọk ogwu orere akọọk. Ikaan̄ mgbọ Debit ogobobe ọmọ itet ilọ si. Ikare Mefiboset osa ufialek chi ijet lek kan̄. Ire, ikachieek ibe eya irọ inyi ibene ikikeek mkpọ me oniin̄ olọlọ, kpan̄asi ikeya, inwọọn̄ ata inu echi orọrọ me ugwem kan̄. Ijeen̄ itọn̄ me lek ata ejit Debit ojeen̄be ogọt me mgbọ oraraka. (2 Sam 9:6-10) Ọmọ orọ, mgbọ Debit orọbe ọmọ ilọ, Mefiboset isa ikọkọt igobo inu orọrọ itet. Ikachieek ibe nrọ-nlọ Debit irọ inyi ọmọ ikaan̄ uduk me ejit. Ikafieek Jioba ikọ me lek inu Debit orọbe si. Mefiboset itoto chieen̄ me lek inu ibokọt irọ isasa itap ubọk inyi ogwu ubọọn̄ Jioba ogobobe. (2 Sam 16:1-4; 19:24-30) Jioba itap ata akpat ukot kè Mefiboset me emen Usem Kan̄ inyi eji ekọt ekween̄ mkpọ enan̄a me lek.—Rom 15:4.
ONYAN̄ JAABA 11-17
INU UNYE OTU EWE OKUP ME USEM AWAJI | SAMIEN EYI ÒSO IBA 20-21
“Jioba Ire Awaji Ogwu Unen Oyerebet”
it-1 932 ¶1
Gibiọn
Ogwu Ubọọn̄ Sọọlu iweek ikpakpan̄ otutuuk ebi Gibiọn, ire, ikakọt. Ire, ebi Gibiọn mikaan̄ ime ikikup ikpọ mgbọ Jioba obokpọk mbum nnaan̄ Sọọlu orọbe ema. Jioba irọ eyi inan̄a me lek itetele ibe akan̄ inin̄ ido Ijeren acha ita me ukot mkpulu kè Debit. Mgbọ Debit odobe ida Jioba mè iniriọọn̄ ibe ke ire bak lek eje ebi uwu Sọọlu efiatbe, idodo ebi Gibiọn inu iborọ inyi ema me useen̄ inu Sọọlu orọbe ema. Ebi Gibiọn efọfọọk ibe ke ikare “alata okuket mè ìre alata araran̄” ke ebesa irọ esuuk bak lek, Ikan ibe ke kpebebọkọ inu inwene-ibot geege me useen̄ ogwu òkpan̄-ene, ogwu ògbe mkpa. (Ifuk 35:30, 31) Ema migobo itet si ibe ke ema kpekaan̄ unen ikpakpan̄ ogwu Ijeren geege. Ọmọ orọ, ire mgbọ Debit okpọkbe ido ema, ke ebi Gibiọn ebe mè enyi ema “ene jaaba” me etete ebi owot iman kè Sọọlu inyi ekpan̄. Mokọt ire Sọọlu oje me isi mè ikpakpan̄ ebi Gibiọn, ire, bọn ebirieen̄ kan̄ mira igọọk nte kiban̄ ikpan̄ ife cha mè iyaka ire ibieen̄ inu ya irọbe inye mije, Baibul igwegwen Sọọlu melek ebi uwu kan̄ ebi ifiat eje ene. (2 Sam 21:1-9) Ọmọ orọ, kpebekọt itumu ibe ke bọn SọọIu eraraka mkpa ibot nte kiban̄ ikwu. (Ikan 24:16) Kpan̄asi ikeya, ire inu unen oyerebet odobe ire eya mije, ikan ibe: “Ogwu ikpan̄ ene, ekpan̄ ene ya me useen̄.”—Ikan 19:21.
Week Inu Unye Otu Ewe Okup Me Usem Awaji
w13 1/15 31 ¶14
Ebi Ugane Ntitiin̄ ‘Ekigọọk Eji Isi Ikwaan̄ Inyi Eji Ekekaan̄ Unwọọn̄’
14 Mè ekakpọge chieen̄ me lek otutuuk inu echi Setan mè ebi melek kan̄ ekirọ ikeme eji, ebi eyi Jioba ekpọkpọk ikup inye ikilook ata etip me otutuuk linyọn̄. Usini me lek kiji mikwek isi me lek ikpele ufialek, ire, eji mikọt itim igak ema ike Debit otimbe igak Golayat bak lek eji eyakabe lek imaan̄ me lek Jioba. Ire, usini mgbọ, efuuk ikekita eji me owot, lek ikekiwọ eji si ike eji ekitim ikeme rumurumun̄ echi eji ekikwek isi me lek. Me mgbọ eji ewọbe lek, ufialek echi eji mekọtbe itim igak mokọt iyaka inikeme eji. Me irek okup ikecha, usem ukarajit ogwu ugane ntitiin̄ ge obonyi eji mokọt irọ inyi eji eyaka ekaan̄ unwọọn̄ mè unye ike irọbe inyi owuwa ene. Gwun̄ ute enenwaan̄ ge okigbọ oniin̄, ogwu oraraka akọp acha gweregwen ibe: “Mgbọ ge, mgbọ lek n̄a ikanyege, isisibi uko ikiwọwọ emi lek. Ogwu ugane ntitiin̄ ge omumun̄ ubọk efuuk okita emi me owot mè inu me lek n̄a. Mè isa inu okup me ere Baibul ge itap emi efuuk me owot. Ntap mkpọ itumube inyi emi me ikwaan̄, mè ikaan̄ oruru inan̄a me lek.” Gwun̄ ute ya itumu si ibe: “Mbele ejit enenen ibe ke ogwu ugane ntitiin̄ ya itaba iman̄ me lek irek n̄a mè itap ubọk inyi emi!” Me atikọ, ikekibele eji ejit ibe ke eji mikaan̄ ebi ugane ntitiin̄, ebi ikisa me ima ikitap ubọk inyi eji ike Abisai otapbe ubọk inyi Debit.
ONYAN̄ JAABA 18-24
INU UNYE OTU EWE OKUP ME USEM AWAJI | SAMIEN EYI ÒSO IBA 22
“Yaka Lek Maan̄ Me Lek Jioba Ibe Itap Ubọk Inyi Owu”
cl 19 ¶11
Ire Omokọt “Ìtaba Lek Ìriaak Me Lek Awaji” Ni?
11 Eji mifuk mkpọ ofolek ‘ikpele unye oguga’ Awaji okaan̄be. (Asaya 40:26) Eji mifuk si ubọk isabe inyan̄a ebi Ijeren me Okwaan̄ Anyiaan̄ mè isa ema ije itibi emen ewe me otuuk kè akọp acha ini. Keek nu ubọk mun̄ okwaan̄ ya ochebe irek iba. Keek nu ubọk ebi ido Ijeren, ebi mekọtbe iso efie ene ita (3,000,000) ekije me nchat ijọn̄ isaba okwaan̄ ya, ike mun̄ okwekbe ema kubọk mgban me agan̄ ulom mè agan̄ ujit. (Isisibi 14:21; 15:8) Omokọt imun̄ inu okijeen̄ ibe ke ire Awaji obem mè ikpọ chieen̄ me lek kiban̄ me emen ewe ya. Mudim igbuk isibi me emen ewuuk. Inorie, otatana okuket mè ikup ibot kpiri kpiri kpiri igwogwook ichit ijọn̄. (Isisibi 16:31; Otu Ifuk 20:11) Jioba ikakpọkpọ ijeen̄ ibe ke ọmọ ikaan̄ unye, ire, ikisa unye kan̄ irọ inu inyi ebi eyi kan̄. Ire ikakikat eji ejit irọriọọn̄ ibe ke eji ekibeek uriaak inyi Awaji ogwu orere “unye kiji mè ere nlet kiji; ogwu ntap-ubọk òkikup melek kiji mgbọ geelek uyọrọlek otetbe eji” ni?—Okwa Itọn̄ 46:1.
w10 6/1 26 ¶4-6
Okigbe Utoon̄-Ejit Inyi Ebi Kwun̄
Kè eji eriọọn̄ ubọk ekpọ nu usem Debit otumube. Usem Iburu ekanabe itap ‘igbegbe utoon̄-ejit’ mokọt ire si ‘ijejeen̄ ata ejit.’ Ire ima okibieen̄ ene ibe ekegbe ata utoon̄-ejit. Jioba ikisa me ima ikikup ibia melek ebi ikigbe utoon̄-ejit inyi ọmọ.
Ofifi mkpọ eji eberiọọn̄ si ire ke igbegbe utoon̄-ejit ikachubọk ire inu ene obokikeek me ejit, ire inu okikpọk mbum me eru ene. Bak lek mkpọ ijebe itibi, Debit iniriọọn̄ ijaan̄ ibe ke Jioba ire ogwu okigbegbe utoon̄-ejit. Me mgbọ oyọyọt ichit me ugwem kan̄, Jioba itap ubọk inyi Debit, ikup ibia melek kan̄ mè ibem mè iban ọmọ si bak lek igbegbe utoon̄-ejit inyi ọmọ. Debit ijeen̄ itọn̄ me lek inu Jioba orọbe inyi ọmọ me mgbọ inyan̄abe ọmọ “isibi me ubọk otutuuk ebi ochicha kan̄.”—Samien Eyi Òso Iba 22:1.
Keke ke usem Debit otumube okijeen̄ eji? Jioba ikakinwene. (Jemis 1:17) Ikirọrọ inu igọọk me lek ata ubọk irọrọ kan̄ mè ikirọ use kan̄ iso. Me ofifi ere Baibul, Debit ige ibe ke Jioba “ìkabojit ebi ìkekeke inye me lek kan̄ mgbọ geege.”—Okwa Itọn̄ 37:28.
Week Inu Unye Otu Ewe Okup Me Usem Awaji
w12 11/15 17 ¶7
Kirọ Inu Kubọk Ogwu Osisiki Lek
7 Eru isiki-lek Awaji ikaan̄ ata mgbaan̄ me lek Debit. Me okwa ikọtbe inyi Jioba, itumu ibe: “Owu onyi emi agbọ kwun̄ eyi nkisa itim ikpan̄; owu ogele isiki inirọ emi m̀min ene.” (2 Sam 22:36) Debit ichieek ibe ke ọmọ ikọt ikana ikpele ene bak usikilek kè Jioba mè iyaka ire bak lek igelebe isiki itap ubọk inyi ogọt. (Itọn̄ 113:5-7) Ire ikare inu yaage okirọ inyi eji ni? Mè ire eru, iriọọn̄-inu sa ire irek ikwaan̄ me ntitiin̄, “ìre îkaan̄ inu owu okaan̄be eyi ikarege Awaji onyi owu?” (1 Kọr 4:7) Mgbọ Jisọs otumube ibe ke ogwu okirọ inu kubọk ogwu òsisip ichit ore ogwu “òmimin ichit,” ikitumu ibe ke ire ene ya ke Jioba obosa isi ikwaan̄. (Luk 9:48, ftn.) Kè eji ekeek nu ubọk eyi osabe ire atikọ.
ONYAN̄ JAABA 25-31
INU UNYE OTU EWE OKUP ME USEM AWAJI | SAMIEN EYI ÒSO IBA 23-24
“Inyinyi Kwun̄ Ire Ngwugwa Nje?”
it-1 146
Arawuna
Arawuna inyi Debit ere, eriembuuk, uti mè ofifi ififi inu ibosa igwa ngwugwa, ire, Debit ibe ke ọmọ ibolelep inu cha mè ikpe ewe. Ikpa Samien Eyi Òso Iba 24:24 ikpa ibe ke Debit ilelep ere igen̄ akpa ya melek eriembuuk ya me akọp ikpoko alata okuket go ($110). Ire, ikpa Mfufuk Eyi Adasi 21:25 ibe ke Debit ikpekpe efit ikpoko alata araran̄ gweregwen me ibot ijọn̄ ya (c. $77,000). Ogwu ogege ikpa Samien Eyi Òso Iba itumu ikọ ofolek ikpoko ekpebe me lek ijọn̄ ere enamabe ntook ngwugwa mè inu echi esabe igwa ngwugwa ya, ibet lek otu ewe inu cha gaalek ke ichak otu me lek. Ire, ogwu ogege ikpa Mfufuk Eyi Adasi ikpa mkpọ ofolek uwu mbuban eyi eyaka ininama me ere yaage orere, ikpoko itumube ikọ ofolek ire eyi esabe ilep otutuuk ijọn̄ ya mgbọ enamabe uwu mbuban. (1 Ubọọn̄ 22:1-6; 2 Mfuf 3:1) Debit inanama ntook ngwugwa me sọntiik ere me lek ijọn̄ ya, ire, ere enamabe uwu mbuban me ijọn̄ yaage imimin. Ọmọ orọ, ibet lek efit ikpoko alata araran̄ gweregwen ire otu ewe otutuuk ijọn̄ ya, ikare gaalek ere Debit osabe inama ntook ngwugwa ya.
w12 1/15 18 ¶8
Kween̄ Mkpọ Nan̄a Me Lek ‘Ikan Kè Mosis’
8 Ire ogwu Ijeren ibogwa ngwugwa isa itọn̄ Jioba inan̄a me ijọn̄ ijọn̄ ejit kan̄, mè iyaka ire, ire ibogwa ngwugwa ewọwọp iriọk isa iweek nnwọn-isi kan̄, isasa anam ogbegbe igwa ngwugwa ya ikpoyọt me lek ene ya. Ene ya mosa me ubelejit inyi Jioba inu onwọnwọn ichit me lek inu echi ikaan̄be. Ebi eyi Karais me chereyi kpekigwa ngwugwa anam ike Ikan kè Mosis odobe, ire, ema mikigwa ngwugwa mije ibe ke ema ekisa mgbọ, efuuk mè mkpọ nkaan̄ kiban̄ ikisa itọbọ ebum inyi Jioba. Ogwu ikwaan̄ Pọọlu itumu ibe ke eji ekigwa ngwugwa okibele Awaji ejit me mgbọ eji ‘ekitumu erieen̄ kan̄ isibi, ikirọ ata inu mè ikiche mkpọ inyi ebi ekakaan̄ge.’ (Iburu 13:15, 16) Ebi eyi Jioba ekisa otutuuk ejit kiban̄ irọ ata inu chi mije ibe ke ema mima mè ikinwọọn̄ otutuuk inu echi Jioba okirọ inyi ema. Ọmọ orọ, kubọk ebi Ijeren isasa otutuuk ejit kiban̄ igwa ngwugwa me ukot ikaan̄, kè eji ekewọlọ lek kiji ekpọ mè ekeriọọn̄ mbet ejit eji ekisa itọbọ ebum inyi Jioba mè inu okibieen̄ eji ibe eji erọ ikeya.
Week Inu Unye Otu Ewe Okup Me Usem Awaji
w05 5/15 19 ¶6
Ikpakpa Isibi Inu Okup Me Ikpa Samien Eyi Òso Iba
23:15-17. Debit ikaan̄ udọk udọk ulibi me lek ikan Awaji onyibe ofolek ugwem mè eje mè ijit irọrọ inu eyi obokup kubọk ke ọmọ irọrọn̄ ikan me irek keyi. Ire mbet eru yi ogbe ibe eji ekaan̄ ofolek otutuuk ikan Awaji onyibe eji.
ONYAN̄ JEETA 1-7
INU UNYE OTU EWE OKUP ME USEM AWAJI | EBI UBỌỌN̄ EYI ADASI 1-2
“Ire Okekikween̄ Mkpọ Inan̄a Me Lek Nrọ-Nlọ Kwun̄ Ni?”
it-2 987 ¶4
Solomọn
Me mgbọ Adonija mè otutuuk ebi melek kan̄ enọbe ida okwa ekikọt melek ida ukpo ekitaan̄ me Giyọn ikibe: “Ogwu ubọọn̄ Solomọn, luk ugwem jọn̄ọ,” ema esasa me ukpook ilibi mè irọn̄ inin̄ wọlọwọlọ. Solomọn ijeen̄ ibe ke mkpulu kan̄ ibore eyi esuuk, ọmọ orọ ikarọbe useen̄ inu me mgbọ inenebe ogboon̄ ubọọn̄. More ibe ke ire Adonija ore ubọọn̄, ke okọt okpan̄ Solomọn. Adonija olilibi isigọbọ iko okup me ntook ngwugwa ikam ikiweek ikput lek me ubọk kè Solomọn, ire, Solomọn oraria ikwaan̄ ibe esa Adonija enu me isi kan̄. Solomọn otutumu inyi Adonija ibe ke kpunu inu geege obore ogọt lek itata me irọrọ ijo inu, mè itele ibe ifo uwu kan̄.—1 Ubọọn̄ 1:41-53.
it-1 49
Adonija
Ire, mgbọ Debit okwube iraka, Adonija osasa me ifiọk isi lek Batiseba mè ibe mè ọmọ isi ibeek Solomọn ibe inyi ọmọ Abisagi, gwun̄ enenwaan̄ okpọkpọ chieen̄ me lek Debit, ibe ire nwa kan̄. Adonija itumu inyi Batiseba ibe: “Owu oriọọn̄ ijaan̄ ibe ke irek mkpulu yi ìkup inyi emi, ke chieen̄ otutuuk ebi Ijeren ìkup me lek n̄a kubọk ogwu òbonire ogwu ubọọn̄ kiban̄.” Eyi ikijeen̄ ibe ke Adonija ikimun̄ ibe ke ebọbọkọ irek ubọọn̄ isan̄a ọmọ me ubọk, ikerere ibe ke itumu isibi ibe ke ire Awaji orọ inyi inu ya ikup ikeya. (1 Ubọọn̄ 2:13-21) Mokọt ire ibe ke Adonija ikido inu yi me useen̄ irek ubọọn̄ ichepbe, ire, inu idobe ikijeen̄ ibe ke ikaan̄ me ejit ibọbọkọ irek ubọọn̄ ya, mije, me mgbọ ya, ebi nwa mè ugan ogwu owuwuuk lek ikpulu ekikana eyi ene geelek ubọọn̄ otatbe me lek, ogwu obọbọkọ irek ubọọn̄ ya. (Kpọ si 2 Sam 3:7; 16:21.) Ikeya si ke Solomọn omun̄ inu yi Adonija odobe itibi me ubọk nga kan̄. Ọmọ orọ, inyinyi ida ibe ekpan̄ Adonija, Benaya okpakpan̄ ọmọ si.—1 Ubọọn̄ 2:22-25.
Week Inu Unye Otu Ewe Okup Me Usem Awaji
w05 7/1 30 ¶1
Ikpakpa Isibi Inu Okup Me Ikpa Ebi Ubọọn̄ Eyi Adasi
2:37, 41-46. Ibore mkpọ unan inyi eji ire eji ikikeek ibe ke eji mekọt ikpaka otu Jioba mè ekabọkọge mkpukpe ijo inu kiji! Ebi geelek igegen̄ ibak itele ‘oniin̄ osisip, eyi okisa ene itap me ugwem’ mebọkọ ijo mkpukpe bak lek ijo ntumu-mfieek erọbe.—Matiyu 7:14.
ONYAN̄ JEETA 8-14
INU UNYE OTU EWE OKUP ME USEM AWAJI | EBI UBỌỌN̄ EYI ADASI 3-4
“Oruru Eyi Iriọọn̄-Inu”
w11 12/15 8 ¶4-6
Solomọn Ire Ata Akpat Ukot Inyi Owu Sa Ire Ntaba-Ubọk Me Utọn̄?
4 Me mgbọ Solomọn obenebe ikikpulu, Awaji itumu inyi ogọt me emen ilaak ibe ido mkpọ iweekbe me ubọk kan̄. Mije iriọọn̄be ibe ke ọmọ ikariọọn̄ ubọk ibosa ikpulu ebi Ijeren, Solomọn obebeek iriọọn̄-inu. (Fuk Ebi Ubọọn̄ Eyi Adasi 3:5-9.) Mije ibe ke Solomọn ido iriọọn̄-inu kpan̄asi ibọbọọn̄ ubọọn̄ melek ujọn̄ọ ugwem, Awaji onyinyi ọmọ “ejit iriọọn̄-inu mè ngobo-ntet” mè irọ inyi ibọọn̄ ubọọn̄ si. (1 Ubọọn̄ 3:10-14) Ike Jisọs otumube, iriọọn̄-inu kè Solomọn itaan̄ etip ire lek eyi ogwu ubọọn̄ enenwaan̄ ama Sieba onọbe mè ije ujọn̄ọ ije inu inyi ọmọ isa chieen̄ kan̄ gaalek imun̄ lek.—1 Ubọọn̄ 10:1, 4-9.
5 Eji miriọọn̄ ibe ke Jioba ikponyi eji iriọọn̄-inu me oniin̄ okup uyeke uyeke. Solomọn itumu ibe ke ire “[Jioba NW ] okinyi ene iriọọn̄-inu,” ire, ige si ibe mè eji etap efuuk onyenye ufuna eji ekọt ekaan̄ iriọọn̄-inu Awaji. Ige ibe: ‘Sa utọn̄ kwun̄ nyi iriọọn̄-inu, mè sa ejit kwun̄ nyi ngobo-ntet.’ Isọkọ me lek, itumu mbet usem okup ikeyi “ire otaan̄ ukpo iweek” iriọọn̄-inu mè iyaka ire “ire oweek” iriọọn̄-inu. (Urọk 2:1-6) Me atikọ, eji mekọt ikaan̄ iriọọn̄-inu.
6 Monwọn ibe eji edo lek kiji ibe, ‘Ire nkakigọọk akpat ukot Solomọn me imọmọnọ iriọọn̄-inu Awaji ibene ni?’ Uyọt mkpọ irọ ibe ogbogbo ene eketo chieen̄ me lek ikwaan̄ melek ikpoko mè iyaka ire, mbet uwu ikpa ebesi melek ere ebesi ire. Owu melek ebi uwu kwun̄ ye? Ire ntumu-mfieek kinyi okijeen̄ ibe ke enyi mikiweek mè ikimọnọ iriọọn̄-inu Awaji ibene ni? Ire enyi irọ unwene me lek inu enyi etobe me isi, ire eya morọ ufuna enyi ekaan̄ iriọọn̄-inu egbaalek ni? Me atikọ, ikakaan̄ mè ikekisa iriọọn̄-inu itap me ikwaan̄ mosibi oruru inyi owu me otutuuk ugwem kwun̄. Solomọn ige ibe: “Mgbọ ya ke owu môgobo inu òtatat, mè eyi ònenen, mè eyi ònwọnwọn, mè oniin̄ geelek òjajaan̄ itet.”—Urọk 2:9.
Week Inu Unye Otu Ewe Okup Me Usem Awaji
w98 2/1 11 ¶15
Jioba Ire Awaji Okisun̄ Inyan̄a-Ibot Kan̄
15 Bọn bọn kè Ebereyam mikana ido ge, ebi Jioba onyibe Ikan mè igbana si igọọk me lek use ichieekbe Ebereyam. Me acha 1473 B.C.E., Josuwa ogwu obọbọkọ irek kè Mosis osa ebi Ijeren isinin̄ inyọn ijọn̄ Kenan. Use Jioba ochieekbe isasa ijọn̄ ya inyi bọn owot iman kè Ebereyam irọrọ iso me mgbọ echebe ijọn̄ ya inyi esese esese otoko. Me mgbọ ebi Ijeren egbebe utoon̄-ejit, Jioba irọ use kan̄ iso me irọrọ ibe ema etim ekpan̄ ebi ochicha kiban̄. Eyi ichubọk irọ iso me mgbọ Ogwu Ubọọn̄ Debit okebikpulu. Ire mgbọ Solomọn gwun̄ kè Debit obenebe ikikpulu, ke òso irek ita me lek use Awaji ochieekbe Ebereyam orọ iso. Baibul ibe: “Ebi Juda mè ebi Ijeren ewa kubọk achiaan̄ agba awaji. Ema ekekirie inorie, mè ikinwọ miin̄, mè ikibele ejit.”—Ebi Ubọọn̄ Eyi Adasi 4:20.
ONYAN̄ JEETA 15-21
INU UNYE OTU EWE OKUP ME USEM AWAJI | EBI UBỌỌN̄ EYI ADASI 5-6
“Misa Otutuuk Ejit mè Efuuk Kiban̄ Inama Uwu Jioba”
w11 2/1 15
Ire Oriọọn̄ Ni?
Emalek iriọọn̄ uti olik echi oron Lebanọn kubọk uti okifuk, ijaan̄ uja, mè ikidun̄u utop olu, ikwut ikakikọt itaka si. Eyi isibi ibe ke Solomọn isa uti onwọnwọn ichit inama uwu mbuban. Me cherekeyi, uti olik ikayaka iwa me oron Lebanọn ike ikupbe me mgbọ ya.
it-1 424
Uti Olik
Obop obop ebi ikwaan̄ efieek uti olik cha, ikpulu isi ito me Taya mè iyaka ire Sidọn me agba okwaan̄ Mediterenia, mè ibọp mè igwook ema me isi mun̄ inyi ikite ire Jọpa mè iyaka ire ofifi ere. Enenikpulu uti cha ije me inyọn̄ ijọn̄ ifo Jeruselem. Eyi ire ikwaan̄ eyi Solomọn melek Iram egbaan̄be ichieek irọrọ. (1 Ubọọn̄ 5:6-18; 2 Mfuf 2:3-10) Me ike mgbọ ojebe, ekpọkpọk ikisa uti olik cha inu me Jeruselem, ọmọ orọ Baibul otumube ibe ke Solomọn irọ inyi “uti olik iwa ijot ere kubọk uti sikamọ” me mgbọ ikpulube.—1 Ubọọn̄ 10:27; kpọ si Asaya 9:9, 10.
it-2 1077 ¶1
Uwu Mbuban
Ufuna erọ ikwaan̄ ya ejaan̄, Solomọn iteen̄ akọp obop ene ita me Ijeren, mè ikiria ema isi Lebanọn me urum me urum. Ukpa ge, orere, akọp obop ene ekikup onyan̄ ge me Lebanon mè ikika inisiki efuuk onyan̄ iba me uwu kiban̄. (1 Ubọọn̄ 5:13, 14) Kubọk ogwu omọmọnọ ikwaan̄ ya isun̄ ufiak, Solomọn igobo akọp obop ene jaaba me eden̄ “ebi kpere bọn owot Ijeren” kubọk ebi ibekibeme nroon̄ ikwaan̄ mè akọp obop ene jeeta kubọk ebi ibekifieek ewuuk. (1 Ubọọn̄ 5:15; 9:20, 21; 2 Mfuf 2:2) Solomọn igobo efit ene go mè akọp go ito ibe ekekpọ chieen̄ me lek ebi ikirọ ikwaan̄ cha mè isa obop ene ita mè efit ita ipala ema. (1 Ubọọn̄ 5:16; 9:22, 23) Mokọt ire ibe ke efit ene iba mè akọp go me lek ife chi ire ebi Ijeren, akọp obop ene ita mè efit gweregwen ire “ebi kpere bọn owot Ijeren.”—2 Mfuf 2:17, 18.
Week Inu Unye Otu Ewe Okup Me Usem Awaji
g 5/12 17, box
Baibul Iben Nriran Okirọ Iso Ubọk Itumube, Okpọkọ 1
MGBỌ KAN̄ IKITATAT
Inu okup me ikpa Ebi Ubọọn̄ Eyi Adasi 6:1 ire ge me lek inu okijeen̄ ibe ke mgbọ mè acha esabe irọ mkpọ me emen Baibul itatat. Ere ya itumu ikọ ifolek mgbọ Ogwu Ubọọn̄ Solomọn obenebe ikwaan̄ me lek uwu mbuban me Jeruselem. Ere ya ibe: “Me òso efit acha ini mè jeeta [orere, ojot ojot acha 479] karake ebi Ijeren enan̄abe isibi me Ijipiti, me òso acha ini me lek mkpulu kè Solomọn me Ijeren, me onyan̄ Jifu, òrere òso onyan̄ iba me acha, Solomọn obebene ikwaan̄ inanama Uwu Mbuban inyi [Jioba, NW ].”
Mfufuk Baibul ijeen̄ ibe ke acha 1034 B.C.E. ore òso acha ini me ukot mkpulu kè Solomọn. Ire obene me acha 1034 B.C.E. ifuk ifo udun̄ isi ire acha 1513 B.C.E., orere acha ebi Ijeren enan̄abe me Ijipiti isibi, omokaan̄ ojot ojot acha 479.
ONYAN̄ JEETA 22-28
INU UNYE OTU EWE OKUP ME USEM AWAJI | EBI UBỌỌN̄ EYI ADASI 7
“Inu Eji Ebekọt Ikween̄ Inan̄a Me Lek Atà Iba”
w13 12/1 13 ¶3
‘Owu Mokirọkọ Ekwe Me Inyọn̄ Ogoon̄’
Ogwu Ubọọn̄ Solomọn isa ogbogbo ekwe ibala uwu mbuban okup me Jeruselem. Owuwa me lek ekwe cha ire echi Debit ogwu ute okpulube mgbọ itimbe akọn̄ igak ebi Siria. (Mfufuk Eyi Adasi 18:6-8) Otin̄ ilile ge eyi ekigwen “Okwaan̄,” eyi ebi ngwugwa ekisa igwọk lek ikiben obop ojọngwu mun̄ go mè efit go (17,500 gallons mè iyaka ire 66,000 L). Ulobo kan̄ si mokọt iso mkpọ obet lek ulobo efit akpa cement gweregwen (30,000kg). (1 Kings 7:23-26, 44-46) Ikaan̄ si ikpele atà ekwe iba eyi okweek me isotu uwu mbuban ya. Ujọn̄ọ kan̄ ge ge ire ejit ini mè okpọkọ (26 ft mè iyaka ire 8 m). Erorom si ejiik iba itoon̄ me inyọn̄ ibot atà cha, eyi ubene kiban̄ ge ge orebe ejit ge mè agbagba otubọk iba (7.3 ft mè iyaka ire 2.2 m). Emen atà cha iwowook, ulobo akpọk kan̄ ire 3 inches (7.5 cm), iwele si ire mkpọ oboso ejit ge (5.6 ft mè iyaka ire 1.7 m) (Ebi Ubọọn̄ Eyi Adasi 7:15, 16; Mfufuk Eyi Òso Iba 4:17). Ikup uyeke uyeke enenen ikekeek otu ifuk ekwe esabe irọ inu chi.
it-1 348
Bowaji II
Me uwu mbuban ilile Solomọn onamabe, egwen ikpele atà ekwe eyi okup me agan̄ inyọn̄ me irak oyet Bowaji, eyi mokọtbe isibi “Sa Me Unye.” Atà eyi okup me agan̄ osiki ke egwen Jakin, eyi mokọtbe isibi “Kè [Jioba] Itọbọ Ọdọ.” Eya orọ, ire egbaan̄ iba cha ito, mè ibene me agan̄ ulom ikifuk inin̄ ujit, ibosibi ‘Kè [Jioba] itọbọ ọdọ [uwu mbuban] sa me unye.’—1 Ubọọn̄ 7:15-21; kpọ si CAPITAL.
Week Inu Unye Otu Ewe Okup Me Usem Awaji
it-1 263
Ikeken Mun̄
Jioba iweek ibe ebi ikinyi ọmọ ata ntọbọ-ebum ekekup me utana me anam akpalek. Eyi isibi utoon̄ me lek ubọk eneen̄be ikwaan̄ me akpatan̄ mbuban melek uwu mbuban enamabe me mgburudun̄. Me mgbọ efakabe ikwaan̄ ngwugwa itap me ubọk Erọn mè ebi bọn, ema migwọk lek kiban̄ sabum enitap ofọnti ikwaan̄ kiban̄. (Isis 29:4-9; 40:12-15; Lib 8:6, 7) Ebi ngwugwa ekisa mun̄ okup me emen okwa esabe ekwe irom me emen oyet egep akpatan̄ mbuban igwọk ubọk mè ukot kiban̄. Ire, me uwu mbuban Solomọn onamabe, ema esa mun̄ eyi okup me emen otin̄ ekwe eyi ekigwen Okwaan̄ igwọk lek. (Isis 30:18-21; 40:30-32; 2 Mfuf 4:2-6) Me Usen Irọ-Esuuk, ogwu ibot ngwugwa moken mun̄ igwọk akpalek kan̄ mgbọ iba. (Lib 16:4, 23, 24) Ebi isasa ebot ikana-ibot iban inyi ije ichep me emen ewe, ebi ibeben anam esabe igwa ngwugwa isik, mè ebi ibeben si eriembuuk araran̄ isibi ifo udun̄ ama, meken mun̄ mè igwọk awuruku kiban̄ sabum ekpọk enin̄ emen ema.—Lib 16:26-28; Ifuk 19:2-10.
ONYAN̄ JEETA 29–ONYAN̄ ONAAN̄GE 4
INU UNYE OTU EWE OKUP ME USEM AWAJI | EBI UBỌỌN̄ EYI ADASI 8
“Uriaak Solomọn Osabe Me Usikilek Iriaak Me Isi Ogbogbo Ebi Ene”
w09 11/15 9 ¶9-10
Kikween̄ Baibul Ufuna Uriaak Kwun̄ Ikinwọn
9 Uriaak ekiriaak inan̄a me ejit ke Awaji okinọ. Solomọn irariaak uriaak inan̄a me ejit kan̄ me isi ogbogbo ebi ene itititiin̄, me mgbọ echilibe uwu mbuban Jioba me acha 1026 B.C.E. Uriaak yi ikup me ikpa Ebi Ubọọn̄ Eyi Adasi ibot jeeta. Mgbọ ebenbe okop inyan̄a-ibot ito me ere Okup Mbuban Ichit me emen uwu mbuban, oduku inyọn̄ kè Jioba oninin̄ ijot emen uwu ya, ọmọ orọ, Solomọn otọtọn̄ Awaji.
10 Kween̄ uriaak kè Solomọn, mè taba iman̄ me lek inu itumube ofolek ejit. Solomọn itumu ibe ke ire Jioba gaalek okiriọọn̄ ejit ene. (1 Ubọọn̄ 8:38, 39) Uriaak ya ijeen̄ si ibe ke ikpọchieen̄ owa isa inyi ogwu orọrọ ijo inu mè ‘isa otutuuk ejit kan̄ igwu ikom inu me lek Awaji.’ Ire ebi ochicha itet ebi eyi Awaji, Jioba monọ ida uriaak kiban̄ mè ire ema isa otutuuk ejit kiban̄ ibeek ọmọ. (1 Ubọọn̄ 8:48, 58, 61) Ọmọ orọ, igbe ibe uriaak kwun̄ ikinan̄a owu me ejit.
w99 1/15 17 ¶7-8
Kijeen̄ Usikilek Me Mgbọ Okibeek Uriaak
7 Mè ire eji ikup agaga ikiriaak uriaak mè iyaka ire ikiriaak me isi owuwa ene, onineen̄ Baibul ge okukup me ufiak eji ebekaan̄ me nkeek ire ikekijeen̄ usikilek me mgbọ eji ekiriaak uriaak. (Mfufuk Eyi Òso 7:13, 14) Me mgbọ echilibe uwu mbuban Jioba me Jeruselem, Ogwu Ubọọn̄ Solomọn ijeen̄ usikilek me lek uriaak iriaakbe me isi owuwa ebi ene. Solomọn ijeen̄ usikilek ikerere ibe ke ọmọ inama ge me lek uwu omimin ichit enamabe me linyọn̄ yi. Isa me usikilek iriaak ibe: “Ìre Awaji môniluk me linyọn̄ ni? Ikerere emen inyọn̄ ere òbebene ichit, ìkpokọt ita owu. Ire ikeya, ìre Uwu Mbuban keyi nnamabe ìbojeje ita owu?”—Ebi Ubọọn̄ Eyi Adasi 8:27.
8 Ibet lek Solomọn, kè eji ekesiki lek me mgbọ eji ekiriaak uriaak me isi ogbogbo ebi ene. Ubọk geelek ibe ke eji kpeberọ ibe ebi ofifi ife ekemun̄ eji kubọk ebi inwọnwọn igak ema, ida kiji mokijeen̄ ubọk eji esabe isiki lek ire. Ogwu osasa me usikilek ikiriaak uriaak ikpokitumu usem iwa, ikpokitumu usem echi oyọyọt igogobo itet si mè iyaka ire ikisa ida eyi obokitaba ulọk ebi ene inu me lek kan̄. Uriaak usikilek ikisa nkeek ene isi lek Jioba, ogwu ekiriaak inyi, ikara ogwu okirariaak. (Matiyu 6:5) Usikilek si ikikpọk mbum inan̄a me lek mkpọ eji ekitumu me uriaak. Ire eji isa me usikilek iriaak uriaak, eji kpebekitumu usem kubọk eji ekitọ ikọ inyi Awaji ibe irọ inu ike eji eweekbe. Kpan̄asi ikeya, eji ebekibeek Jioba ibe irọ igọọk me lek nkeek kan̄. Ogwu okọt Debit ijeen̄ ata akpat ukot ofolek eru ebekisa iriaak uriaak me mgbọ itumube ibe: “Nyan̄a eji, jei [Jioba NW ], soso nyan̄a eji, mè rọ inu ije ijaan̄ me lek kiji!”—Okwa Itọn̄ 118:25; Luk 18:9-14.
Week Inu Unye Otu Ewe Okup Me Usem Awaji
it-1 1060 ¶4
Emen Inyọn̄
Solomọn ogwu onanama uwu mbuban me Jeruselem, itumu inyi Awaji ibe: “Ikerere emen inyọn̄ ere òbebene ichit, ìkpokọt ita owu.” (1 Ubọọn̄ 8:27) Kubọk Ogwu Ororom emen inyọn̄, emen inyọn̄ agan̄ Jioba okupbe obene ichit. “Erieen̄ kan̄ gaalek omin iraka otutuuk erieen̄; òrirọ kan̄ obene isaba linyọn̄ mè akpabin inyọn̄.” (Itọn̄ 148:13) Ifet me lek Jioba isasa agbagba otubọk kan̄ itọ akpa isinyọn̄ ike ene obokọt isa otubọk kan̄ itọ mkpọ. (Asaya 40:12) Usem Solomọn otumube ikasibi ibe ke Awaji ikakaan̄ okpọkpọ ere ikikup. Ikasibi si ibe ke Awaji ikikukup me emen inu geelek mè ere geelek. Eji eriọọn̄ eyi bak lek usem Solomọn otumube inyi Jioba. Ibe: “Nye lek kup me emen inyọn̄ ere okiluk nọ, mè tele nyi eji,” orere, emen inyọn̄ ere ebi osat ekiluk.—1 Ubọọn̄ 8:30, 39.