Kaan̄ Utoon̄-Ejit Ibe Ke Menyan̄a Eji Me Ota Ukot Keyi

Sọnja mgbọ, ime Jioba okaan̄be me lek linyọn̄ yi moyaka. Mefiat uwu uriaak ataak, urum ebi inan̄a me esese esese ido mekeke ikeme ebi eyi Awaji, Jioba mokpan̄ si otutuuk ebi mkpikpak me akọn̄ Amagedọn. Ebi eyi Karais ekikup ikpọ mgbọ inu chi mobọkọbe irek.

Me atikọ, eji kperiọọn̄ otutuuk inu obobọkọ irek me mgbọ ikpele ujaralek ya. Kubọk inu njeen̄, eji kperiọọn̄ achubọk mgbọ ibobene. Eji kperiọọn̄ mkpọ obobieen̄ ebi mkpulu ibe eweek ijijijaka uwu uriaak. Eji kperiọọn̄ ujọn̄ọ mgbọ ebi ido cha eberọ ikeme ebi eyi Awaji ire mè iyaka ire mkpọ nrọ-nkeme ya obogọbọ. Eji kperioọn̄ si achubọk mkpọ Jioba obosa ifiat ebi mkpikpak me akọn̄ Amagedọn.

Ire, Baibul ikpa inyi eji otutuuk inu eji eweekbe, echi obotap ubọk inyi eji ekaan̄ utoon̄-ejit mè unye-ejit ofolek mgbọ okup me isi. Kubọk inu njeen̄, eji miriọọn̄ ibe ke eji ekiluk me “mgburudun̄ mgbọ.” (2 Tim 3:1) Eji miriọọn̄ ibe ke Awaji morọ me usen eberọ ikeme ebi eyi kan̄ “igbidim” ufuna ekafiat ata ntọbọ-ebum. (Mat 24:22) Eji miriọọn̄ ibe ke Jioba monyan̄a ebi eyi kan̄. (2 Pita 2:9) Eji miriọọn̄ si ibe ke Jisọs, ogwu Jioba onyibe ikwaan̄ ikpakpan̄ ebi mkpikpak mè inyanyan̄a ebi urum arọọn̄ ilile me akọn̄ Amagedọn ire ogwu ata irọrọ onyenye lek.—Ichi 19:11, 15, 16.

Kpolọlọ, inu echi oborọ me isi morọ inyi ukpook itet ebi ene “ire lek ema mêkigak iweek.” Jisọs ibe: “Ìnan̄a ìkeke, mè ìbene ibot kinyi ìfo inyọn̄, mije, mgbọ ebefaka enyi isibi îgbet.” Eji mekọt irọ eyi ire eji ekifuk mè ikigwu nkeek ikom me lek ubọk Jioba osabe inyan̄a ebi eyi kan̄ me mgbọ oraraka mè mkpọ itumube ofolek mgbọ okup me isi.—Luk 21:26, 28.