Ikpa Okikpa Nkween̄mkpọ Ugwem Mè Ikwaan̄ Kiji Kubọk Ebi Eyi Karais
© 2022 Christian Congregation of Jehovah’s Witnesses
OKPA ONYAN̄ 2-8
INU UNYE OTU EWE OKUP ME USEM AWAJI | EBI UBỌỌN̄ EYI ÒSO IBA 22-23
“Keke Orọ Eji Ebekisiki Lek?”
w00 9/15 29-30
Josaya Ogwu Osisiki Lek Ikaan̄ Nnwọn-Isi Kè Jioba
Bene me otu ewelegwe, ebi ikirọ ikwaan̄ me lek uwu mbuban mikitap efuuk ikisi ikwaan̄. Kpunu cheche ibe ke Josaya itọn̄ Jioba enenen bak lek ibe ke ebi ikwaan̄ cha mekisi ikwaan̄ me lek ere usini ebi nte nte kan̄ ebi mkpikpak etelebe ibe igbugbọ me uwu Awaji. Ike ikwaan̄ ya okebije inyi isi, Safan osasa etip ge inu. Keke ire eya? Ikaan̄ ikpa ekakat ge me ubọk. Safan ikpa ibe ke Ilikiya Ogwu Ibot ebi ngwugwa imun̄ “Ikan Jioba eyi òje me ubọk kè Mosis.” (Mfufuk Eyi Òso Iba 34:12-18) Eyi ichubọk ire mkpọ ubelejit, mokọt ire adasi ikpa Ikan eyi Mosis ogebe!
Josaya ichubọk ikaan̄ ulọk inọnọ usem okup me emen ikpa ya. Ike Safan okifuk ikpa ya, Josaya isa imumun̄ ubọk ikan cha ge ge osabe igbaan̄ me lek kan̄ melek ebi kan̄. Ichubọk ikaan̄ ulọk enenen me lek ubọk ikpa ya osabe ikpa mkpọ ofolek ata ntọbọ-ebum mè ufialek oborọn̄ itet ema ire ema etap lek me lek ataak ntọbọ-ebum. Mgbọ keyi inimun̄ ibe ke ikare otutuuk ikan Awaji ke ema ekisun̄, Josaya igwak ofọnti kan̄ mè inyi Ilikiya, Safan, mè ebi ofifi ife ida ibe: “Ìsi ìdo ida Jioba me ibot n̄a mè ibot ebi ìsisik me Ijeren melek Juda òfo me lek inu òkup me emen ikpa yi eyi emun̄be. Mije, unaan̄-ejit Jioba îmin enenen me lek kiji bak me lek ebi nte kiji kperọ ikọ Jioba, kubọk egebe me emen ikpa yi.”—Ebi Ubọọn̄ Eyi Òso Iba 22:11-13; Mfufuk Eyi Òso Iba 34:19-21.
w00 9/15 30 ¶2
Josaya Ogwu Osisiki Lek Ikaan̄ Nnwọn-Isi Kè Jioba
Ebi Josaya oriabe isi lek ogwu nriran enenwaan̄ Uluda me Jeruselem miyaka isa etip Jioba inu. Etip yi ikijeen̄ ibe ke otutuuk ufialek ekpabe mkpọ ofolek me emen ikpa emun̄be ya iborọrọn̄ itet ema mije, ema mitele ata ntọbọ-ebum. Bak lek isikibe lek me isi Jioba, Josaya ikposa chieen̄ kan̄ imun̄ ufialek cha. Mokwu igọọk ebi nte nte kan̄, mefuun̄ ọmọ si me esuuk.—Ebi Ubọọn̄ Eyi Òso Iba 22:14-20; Mfufuk Eyi Òso Iba 34:22-28.
Week Inu Unye Otu Ewe Okup Me Usem Awaji
w01 4/15 26 ¶3-4
Omokọt Irọ Ijaan̄ Mè Ekakpọge Chieen̄ Me Lek Ubọk Esabe Ikpukpo Owu
Mè ekakpọge chieen̄ me lek ufialek Josaya ojebe itibi mgbọ irebe sọn̄ gwun̄, irọ mkpọ onwọnwọn me chieen̄ Jioba. Mkpulu kan̄ ije ijaan̄ ire lek Baibul otumube ibe: “Sabum ukot kè Josaya, kpunu ogwu ubọọn̄ geege òbet lek kan̄, ogwu òsasa me otutuuk ejit kan̄, mè otutuuk efuuk kan̄, mè otutuuk unye kan̄ igwu ikom igọọk Jioba igọọk me lek otutuuk Ikan kè Mosis. Karake ukot kan̄ orakabe si, kpunu ogwu ubọọn̄ geege òbet lek kan̄.”—Ebi Ubọọn̄ Eyi Òso Iba 23:19-25.
Josaya ichubọk ire ata akpat ukot isa inyi ebi ijeje itibi owuwa ufialek mgbọ ema erebe nsabọn! Keke ke eji ebekọt ikween̄ inan̄a me lek mfufuk kan̄ ni? Keke otap ubọk inyi Josaya ibe igobo irọrọ mkpọ otatat mè ikup inye ikirọ ikeya ni?
OKPA ONYAN̄ 9-15
INU UNYE OTU EWE OKUP ME USEM AWAJI | EBI UBỌỌN̄ EYI ÒSO IBA 24-25
“Kawuuk Okike Mgbọ Eji Ekiluk Me Emen”
w01 2/15 12 ¶2
Usen Oyerebet Kè Jioba Okigbet!
2 Me kpunube cheche, nriran kè Jefanaya ira irọ inyi Josaya iriọọn̄ ufiak irebe isasan̄a ataak ntọbọ-ebum isan̄a me Juda. Ire, efuuk Josaya otapbe isasa irọ eyi ikasan̄a otutuuk mkpikpak isan̄a me emen ebi eyi kan̄, ikachit si ijo inu Ogwu Ubọọn̄ Manasi nte nte kan̄ orọbe mije, “Manasi îkpan̄ owuwa ebi ekalọge inu geege, eje ife cha orereke otutuuk Jeruselem.” (Ebi Ubọọn̄ Eyi Òso Iba 24:3, 4; Mfufuk Eyi Òso Iba 34:3) Ọmọ orọ, usen Jioba obofieek oyerebet inyi ema ikpolọlọ inunu.
w07 3/15 11 ¶10
Inu Ekpabe Ofolek Ikpa Jerimaya
Ire me acha 607 B.C.E. orere, òso akọp mè acha ge me lek mkpulu kè Jedikaya ke Nebukadineja Ogwu Ubọọn̄ Babilọn okpa mbin akọn̄ ikana Jeruselem me mkpọ ososo akọp mè onyan̄ jeeta. Me òso usen jaaba me emen onyan̄ go me òso akọp mè acha onaan̄ge me lek mkpulu kè Nebukadineja, Nebujaradan ogwu ibot ebi akọn̄ ikibem ogwu ubọọn̄ “onunu Jeruselem.” (Ebi Ubọọn̄ Eyi Òso Iba 25:8) Usini mgbọ, Nebujaradan ira ikup me ere ọmọ mè ebi akọn̄ kan̄ etitiin̄be me udun̄ Jeruselem ikikpọ irek ama ya mè ikitọt inu ọmọ oborọ. Mgbọ egwe ita orakabe me lek, orere, me òso akọp usen me onyan̄ ya, ‘ininin̄’ Jeruselem mè itap ukan̄ iwọp ama ya.—Jerimaya 52:12, 13.
Week Inu Unye Otu Ewe Okup Me Usem Awaji
w05 8/1 12 ¶1
Inu Ekpabe Ofolek Ikpa Ebi Ubọọn̄ Eyi Òso Iba
24:3, 4. Mije Manasi ofiatbe owuwa eje, Jioba “ìkakọt ìtele ìnyi ebi Juda.” Awaji imọnọ eje ebi ekalọge ibene. Eji mikaan̄ utoon̄-ejit ibe ke Jioba modo useen̄ eje kiban̄ sa me ijijijaka ebi ikpakpan̄ ema.—Okwa Itọn̄ 37:9-11; 145:20.
OKPA ONYAN̄ 16-22
INU UNYE OTU EWE OKUP ME USEM AWAJI | MFUFUK EYI ADASI 1-3
“Ukpatu Okup Me Emen Baibul Ire Atikọ, Ikare Urọk Ikike”
w09 9/1 14 ¶1
Adam mè Îfu—Ire Ema Michubọk Iluk Ugwem Ni?
Kpọ nu mfufuk owot iman ebi Ju okup me Baibul, me ikpa Mfufuk Eyi Adasi, ibot 1 ire lek 9 mè Luk ibot 3. Mfufuk chi iben erieen̄ ebi iluluk me mkpọ ososo akọp ukot ini mè ukot jeeta mè akọp ukot jaaba mè ukot go. Ikpa Mfufuk iben mfufuk owot iman ebi ubọọn̄ mè ebi ngwugwa me ido Ijeren. Luk ikpa mkpọ ofolek owot iman kè Jisọs Karais. Mfufuk iba chi iben erieen̄ ebi ene ebi eriọọn̄be ijaan̄, kubọk Solomọn, Debit, Jekọp, Ajiki, Ebereyam, Nuwa mè Adam. Otutuuk erieen̄ okup me emen mfufuk iba chi ire erieen̄ ebi ichuchubọk iluk ugwem, Adam ore adasi ogwu ochuchubọk iluk ugwem me emen mfufuk chi ge ge.
w08 6/1 3 ¶4
Mfufuk Nuwa melek Mun̄ Ile Ya—Ire Atikọ, Ikare Urọk Ikike
Mfufuk owot iman iba me emen Baibul ijeen̄ ibe ke Nuwa ire ogwu ochuchubọk iluk ugwem. (Mfufuk Eyi Adasi 1:4; Luk 3:36) Ejira mè Luk, ebi igege mfufuk chi ire ebi ikisa me ugbalachieen̄ ikikween̄ mkpọ. Luk ige ibe ke Jisọs Karais ire ogwu owot iman kè Nuwa.
w09 9/1 14-15
Adam mè Îfu—Ire Ema Michubọk Iluk Ugwem Ni?
Ijejeen̄ Baibul ge owuwa ebi ikisi church emabe ire ijejeen̄ mkpenwene. Igọọk me lek ijejeen̄ yi, Jisọs Karais isa ugwem kan̄ ososo isa igwa ngwugwa ufuna ọmọ ikọt inyan̄a ebilene isibi me emen ijo kiban̄. (Matiyu 20:28; Jọn 3:16) Ike eji erioọn̄be, mkpenwene ire inu ekikpe isasa iyaka ilep inu ochechep. Baibul igwen Jisọs “ogwu òsasa lek kan̄ irọ inu inwene ibot inyi otutuuk ebilene.” (Timọti Eyi Adasi 2:6) Bak lek keke ni? Baibul ifọọk ibe: “Ike otutuuk ebilene ekikwaan̄ mije ema enan̄abe me owot iman kè Adam, ikeya si ke Awaji môjomo otutuuk ebilene me mkpa inin̄ me ugwem, mije ema echieekbe me lek kè Karais.” (Ebi Kọrint Eyi Adasi 15:22) Ugwem ososo eyi Jisọs osabe igwa ngwugwa isasa inyan̄a ebilene ebi isisiki ibot ije ikike me lek ugwem ososo eyi Adam ochepbe me mgbọ irọbe ijo inu me uko Iden. (Ebi Rom 5:12) Ọmọ orọ, ikpọk mbum ibe ke ire Adam ikachubọk iluk ugwem, ke ngwugwa mkpenwene kè Jisọs Karais ire inu ikike.
Week Inu Unye Otu Ewe Okup Me Usem Awaji
it-1 911 ¶3-4
Mfufuk Owot Iman
Erieen̄ Ebibaan̄. Usini mgbọ, ekekige erieen̄ ebibaan̄ igbaalek me mfufuk owot iman mè ire ikup ufiak ibe erọ ikeya. Me ikpa Ibebene 11:29, 30, mibak erieen̄ Serayi (Sera) mije, Gwun̄ echieekbe me use ya ibonan̄a me owot iman kan̄, ikare ofifi nwa kè Ebereyam. Mokọt ire bak lek Milika orebe nga nte kè Ribeka, nwa kè Ajiki ke ebak erieen̄ kan̄ igbaalek si me ere ya. Eyi ikijeen̄ ibe ke Ribeka ire ogwu owot iman ngwan̄ kè Ebereyam eyi irebe ibe ke Ajiki ikpokaan̄ nwa me ofifi ido. (Ibeb 22:20-23; 24:2-4) Me ikpa Ibebene 25:1, mibak erieen̄ Ketura, ofifi nwa kè Ebereyam. Eyi ikijeen̄ ibe ke Ebereyam iyaka ido ofifi nwa mgbọ Sera okwube iraka. Ikijeen̄ si ibe ọmọ ikọt ibon gwun̄ ikerere ibe ke akọp acha ini iraka me lek mgbọ Jioba orọbe ibe ikọt ibon adasi gwun̄ kan̄. (Rom 4:19; Ibeb 24:67; 25:20) Ofifi si, ikijeen̄ ubọk ebi Midian melek ofifi ofifi ebi Arabu mè ebi Ijeren esabe ire ngwan̄.
Mibak si erieen̄ Lia, Rechen, ebi ugan kè Jekọp melek bọn ebirieen̄ ema emaan̄be. (Ibeb 35:21-26) Eyi itap ubọk inyi eji egobo etet ubok Awaji osabe iro mkpọ me lek bọn ebirieen̄ cha me mgburudun̄. Echichi ore ibot ibot inu orọrọ etapbe erieen̄ ofifi ofifi ebibaan̄ si me emen mfufuk owot iman. Etap usini erieen̄ ebibaan̄ si mije, ire ema ke enyi irot owot iman kiban̄. (Ifuk 26:33) Eyi kè Tema, Reyabu mè Rufu isibi esese. Ikaan̄ mkpọ osisibi esese ofolek ubọk ema ge ge esabe inikana nga nga Jisọs Karais, Ogwu Mesaya. (Ibeb 38; Rufu 1:3-5; 4:13-15; Mat 1:1-5) Ofifi ere si ebakbe erieen̄ ebibaan̄ me emen mfufuk owot iman ire me ikpa Mfufuk Eyi Adasi 2:35, 48, 49; 3:1-3, 5.
OKPA ONYAN̄ 23-29
INU UNYE OTU EWE OKUP ME USEM AWAJI | MFUFUK EYI ADASI 4-6
“Keke Ke Uriaak N̄a Okijeen̄ Ofolek N̄a?”
w10 10/1 23 ¶3-7
Ogwu “Okinọ Uriaak”
Jabeji ire ogwu enerieen̄ omama ikekiriaak uriaak. Ibene uriaak kan̄ sa me ibebeek ibe Awaji igbana ọmọ. Ibeek mkpọ ita echi okijeen̄ ibe ke ọmọ ichubọk ire ogwu okakaan̄ ichechieek.
Adasi, Jabeji ibeek Awaji ibe: “Rọ inyi oke ijọn̄ n̄a iwele!” (Agba Eyi 10) Ogwu enerieen̄ yi okakaan̄ umin ikare ogwu okiweek ibọbọkọ ijọn̄ ofifi ene, ikakaan̄ chieen̄ ile me lek mkpọ ofifi ene si. Mokọt ire ibe ke ichubọk ikibeek mkpọ ofolek ene kpan̄asi ijọn̄. Mokọt ire ibe ke ikibeek Awaji ibe itap ubọk irọ mè okike ijọn̄ kan̄ iwele me esuuk inyi mokọtbe ita owuwa ebi ikitọbọ ebum inyi ata Awaji.
Òso iba, Jabeji ibeek Awaji ibe ikeke inyi ọmọ. Awaji ikisa unye kan̄ itap ubọk inyi ebi usun̄ kan̄. (Mfufuk Eyi Adasi 29:12) Jabeji ibeek ntap-ubọk Awaji inyi ọmọ ikọt ikaan̄ mkpọ okup ọmọ me ejit mije, ubọk Awaji ikagbidim iraka isasa itap ubọk inyi ebi ikakaan̄ ichiechieek me lek kan̄.—Asaya 59:1.
Òso ita, Jabeji ibeek ibe: “Chit emi san̄a me ubọk ijo inu, inyi unan ikare emi lek.” Usem yi “inyi unan ikare emi lek” ikijeen̄ ibe ke Jabeji ikakpọkpọ ikibeek ibe ọmọ ikachichini ufialek. Mokọt ire ibe ke Jabeji ikibeek ibe Awaji ikachieek ibe ọmọ imalek ifieek ejit mè iyaka ire itele Ọmọ bak lek ufialek.
Uriaak kè Jabeji ijeen̄ ulọk ikaan̄be me lek ata ntọbọ-ebum mè ichiechieek melek utoon̄-ejit ikaan̄be me lek Awaji, Ogwu Okinọ Uriaak. Ire Jioba ifọọk ọmọ ni? Baibul ibe: “Awaji orọrọ otutuuk inu îbeekbe inyi.”
Week Inu Unye Otu Ewe Okup Me Usem Awaji
w05 10/1 9 ¶7
Inu Ekpabe Ofolek Ikpa Mfufuk Eyi Adasi
5:10, 18-22. Mgbọ Ogwu Ubọọn Sọọlu okebikpulu, ebi otoko kè Ijeren ikup me agan̄ mbum-ura me okwaan̄ Jodan mitim igak ebi Aga ikerere ibe ke ebi Aga cha miwa igak ema mgbọ iba. Eyi ifet mije, ebi usọ akọn̄ cha mitoon̄ ejit me lek Jioba mè iweek ntap-ubọk kan̄. Kè eji ekaan̄ utoon̄-ejit onyenye me lek Jioba ike eji ekitim etim emen ekwukwu kiji ikeme ebi ochicha inyenye lek.—Ebi Efesọs 6:10-17.
OKPA ONYAN̄ 30–ONYAN̄ IBA 5
INU UNYE OTU EWE OKUP ME USEM AWAJI | MFUFUK EYI ADASI 7-9
“Jioba Motap Ubọk Inyi Owu Okọt Osi Ikwaan̄ Oyọyọt”
w05 10/1 9 ¶8
Inu Ekpabe Ofolek Ikpa Mfufuk Eyi Adasi
9:26, 27. Ebi otoko kè Libai ikibem otunchit mikaan̄ atalek akpan ikwaan̄ omimin. Ire ema ke enyi atafi isotu ere okukup me mbuban me emen uwu mbuban. Ema ekichichili otunchit cha egwe geelek. Eji mikaan̄ akpan ikwaan̄ itatap ubọk inyi ebi ikup me ere eji ekilook ata etip ibe enetọbọ ebum eyi Jioba. Ire ikagbe ibe eji ere ebi ebekọt itoon̄ ejit me lek kubọk ebi otoko kè Libai ikibem otunchit cha ni?
w11 9/15 32 ¶7
Ire Omokọt Ikup Kubọk Fineyas Me Mgbọ Okikwek Isi Me Lek Rumurumun̄ Ni?
Fineyas ikaan̄ ikpan ikwaan̄ omimin me Ijeren ukọt ikaan̄. Ire, sa me unye-ejit, iriọọn̄-inu mè iyayaka lek imaan̄ me lek Jioba, Fineyas ikọt itim igak rumurumun̄ geelek mè irọ otutuuk ikwaan̄ enyibe ọmọ ijaan̄. Jioba si ibele ejit me lek otutuuk efuuk Fineyas otapbe isasa ikpọ chieen̄ me lek ntitiin̄ kan̄. Me mkpọ oraraka obop acha ge, Ejira ige inan̄a me unye ekwukwu mbuban ibe: “Îre Fineyas gwun̄ kè Elieja ore ogwu ibot inyi ebi ìkibem otunchit, Jioba okukup melek kan̄.” (1 Mfuf 9:20) Kè Jioba ikup melek otutuuk ebi ikije me isi me etete ebi eyi kan̄, kè ikup si melek otutuuk ebi ikigbe utoon̄-ejit inyi ọmọ.
Week Inu Unye Otu Ewe Okup Me Usem Awaji
w10 12/15 21 ¶6
Kọt Okwa Nyi Jioba!
6 Inan̄a me otu ebi nriran kan̄, Jioba itumu inyi ebi usun̄ kan̄ ibe ekekọt okwa esa eketọn̄ ọmọ. Kpekinyi ebi otoko kè Libai ikikọt okwa ofifi ikwaan̄ ufuna ema ekaan̄ owuwa mgbọ ekesa ege mè ekekween̄ okwa cha.—1 Mfuf 9:33.
ONYAN̄ IBA 6-12
INU UNYE OTU EWE OKUP ME USEM AWAJI | MFUFUK EYI ADASI 10-12
“Kirọ Inyi Ulọk Okaan̄be Irọrọ Nkeek Awaji Ikimin”
w12 11/15 6 ¶12-13
“Jeen̄ Emi Ubọk Mâkirọ Inu Oweekbe”
12 Debit igobo itet onineen̄ okup me emen Ikan Awaji, ikaan̄ si ulọk iluluk igọọk onineen̄ cha. Igbe ibe eji egọọk akpat ukot kan̄. Kpọ nu mkpọ obọbọkọ irek me mgbọ Debit okinina lek ibe “Jei, mudim ònan̄a me udọn̄ mun̄ òkup me agba lek otunchit ama Beteleyem ke manwọ mgbọ keyi isiki ebek!” Ebi usọ akọn̄ ita kè Debit ebubum inin̄ ama ya, ere ebi Filisia ekupbe me mgbọ ya, mè isi ichibi mudim ya ijet ọmọ. Ire, Debit ìkachieek inwọnwọ. Kpan̄asi ikeya, “ibeben igwook me ijọn̄ inyi Jioba, kubọk ngwugwa miin̄ egwogwook.” Keke orọ ni? Debit itumu ibe: “Awaji n̄a gwak fiin̄! Kachieek ibe emi ǹrọ ojelek inu òkup ikeya! Emi m̀kpakọt inwọ mbet lek mudim keyi! Eyi ìre eje ebi ife chi ebi ìchechieek mkpa isi ichibi mudim yi! Me atikọ, ife cha echechieek mkpa isi ichibi mun̄ ya isa inu.”—1 Mfuf 11:15-19.
13 Debit iriọọn̄ ibe ke ikan Jioba ibe mè ekegwook eje me ijọn̄ enyi ọmọ mè ekakinwọ. Iriọọn̄ si inu orọrọ ebekirọ ikeya. Debit iriọọn̄ ibe ke “ugwem inu geelek òkifuuk efuuk ìkup me emen eje.” Ire, eyi ikare eje, ire mun̄. Keke orọ Debit ikachieekge inwọnwọ ni? Debit igobo itet onineen̄ okup me emen ikan Awaji. Isa inyi Debit, mudim ya inye otu ewe ike eje ebirieen̄ ita cha onyebe otu ewe. Ọmọ orọ, ikachieek inwọnwọ mudim ya. Kpan̄asi ibonwọ, igwogwook me ijọn̄.—Lib 17:11; Ikan 12:23, 24.
w18.06 17 ¶5-6
Kisa Ikan mè Onineen̄ Awaji Kikpukpo Nkeek Kwun̄
5 Inyi eji ekaan̄ oruru enan̄a me lek ikan Awaji, ikup ufiak ibe eji ekakpọkpọk ikifuk mè iyaka ire iriọọn̄ mkpọ okup me emen gaalek, eji ebemama mè ikaan̄ ulibi me lek. Usem Awaji ibe: “Ìcha ijo inu, mè ìma ata inu.” (Emọs 5:15) Ire, ire ike owa ke eji ebesa irọ eyi ni? Mkpọ ge okukup ufiak ire ikwekween̄ ikekimun̄ mkpọ ike Awaji okimun̄. Kubọk inu njeen̄, mọnọ nu ibe ke okakikọt ilaak ijaan̄. Ogwu ofia ebeke kwun̄ otutumu inyi owu mbet inorie obokirie, inu ikpọk-lek obokirọ melek usini unwene oborọ me ugwem kwun̄. Me mgbọ orọbe inu cha, mè imun̄ ibe ke ntọ-ubọk cha isibi owu oruru, omotọn̄ ogwu ofia ebeke ya enenen mije itapbe ubọk inyi owu ufuna okọt okoluk ugwem onwọnwọn.
6 Ubọk yaage si, Ogwu Ororom eji inyi eji ikan echi obokọt ibem eji inyi eji ekarọ ijo inu mè irọn̄ inin̄ emen ufialek mè ekọt ekeluk ugwem onwọnwọn. Keek nu ubọk eji ekisa ikaan̄ oruru inan̄a me lek igọgọọk ikan Awaji ofolek ikakan̄ ataak, itọtọt irọrọ ene ijo inu, ichichiin̄ inọ, irọrọ barabat, irọrọ afa mè igọgọọk ebi ijo ekwukwu irọ mkpọ. (Fuk Urọk 6:16-19; Ichi 21:8) Eji esikimun̄ oruru okinan̄a me lek irorọ mkpọ ike Jioba oweekbe, ima eji ekaan̄be me lek Jioba mè ikan kan̄ mokimin.
Week Inu Unye Otu Ewe Okup Me Usem Awaji
it-1 1058 ¶5-6
Ejit
Kisa “Otutuuk Ejit” Kwun̄ Kitọbọ Ebum Nyi Jioba. Inyi ejit eyi okup me emen akpalek kiji ikọt ikisi ikwaan̄ ijaan̄, ibososo. Ire, ejit eji ekisa itọbọ ebum inyi Jioba mokọt iche. Debit ibeek Awaji me uriaak ibe: “Rọ mè ǹsa ejit ge ǹkemmin erieen̄ kwun̄.” Usem yi ikijeen̄ ibe ke ifet ibe ene ikayaka isa otutuuk ejit kan̄ ima mè iyaka ire itet ukpook me lek Jioba. (Itọn̄ 86:11) Ogwu okup ikeya mokọt ikitọbọ ebum inyi Awaji, ire, ikare me ‘otutuuk ejit kan̄.’ (Itọn̄ 119:113; Ichi 3:16) Ene si mokọt ire ogwu “isi iba” mè iyaka ire ejit iba ire ikiweek isisi ikwaan̄ inyi nte uwu iba me mgbọ yaage, mè iyaka ire ikisa me ifiọk ikitumu mkpọ ge me mgbọ ikaan̄be ofifi mkpọ me ejit. (1 Mfuf 12:33; Itọn̄ 12:2) Jisọs ichubọk icha mbet lek isi iba yi.—Mat 15:7, 8.
Ogwu okiweek irọrọ ibe ejit Awaji ibele ikpobore ogwu ikakebisa otutuuk ejit itọbọ ebum inyi Awaji mè iyaka ire ogwu isi iba, ire, ibosasa otutuuk ejit kan̄ ikitọbọ ebum inyi Awaji. (1 Mfuf 28:9) Eyi iweek efuuk eyi irebe ibe ke ejit ene iwa ofiaan̄ me lek mè ikibieen̄ ene ibe erọ ijo inu. (Jeri 17:9, 10; Ibeb 8:21) Inu echi obokọt itap ubọk inyi eji ufuna eji ekọt ekesa otutuuk ejit kiji ekeriaak Awaji ire: ikekibeek uriaak (Itọn̄ 119:145; Ito 3:41), ikekikween̄ Usem Awaji usen geelek (Ejira 7:10; Urọk 15:28), ikekisa me uyok uyok ejit ikitap lek me ilolook ata etip (kpọ si Jeri 20:9), mè ikekigọọk ebi ikisa otutuuk ejit ikitọbọ ebum inyi Jioba ikigbaan̄ mkpọ irọ.—Kpọ si 2 Ubọọn̄ 10:15, 16.
ONYAN̄ IBA 13-19
INU UNYE OTU EWE OKUP ME USEM AWAJI | MFUFUK EYI ADASI 13-16
“Ikekigọọk Ntọ-Ubọk Ikisan̄a Ata Mkpọ Isibi”
w03 5/1 10-11
Ire Okekido Ibe, “Mọmọ Jioba?”
12 Misa okop inyan̄a-ibot inu me Ijeren mè ijuuk itele me Kiriat Jiarim me owuwa acha. Ire, Ogwu Ubọọn̄ Debit iweek isasa okop ya inu me Jeruselem. Igọọk ebi ibot akọn̄ kan̄ itọt mè itumu inyi ema ibe: “Ire môneme enyi, mè ire inire si nkeek Jioba Awaji kiji, mônwọn ibe eji . . . esi eben okop inyan̄a-ibot Awaji kiji esa eka enu.” Ire, ikariọọn̄ ubọk iweek iriọọn̄ nkeek Jioba ofolek inu ya. More ibe ke iweek iriọọn̄, kpeme sa uji ekpirikpo iben Okop Inyan̄a-Ibot ya. Ke ore ebi owot iman kè Koyat me otoko kè Libai meben okop ya me oguga kiban̄ ike Awaji otumube ibe ekerọ. Ikerere ibe ke Debit ikidodo nkeek Jioba ofolek mkpọ owuwa mgbọ, ikarọ ikeya me oniin̄ ogbegbe me mgbọ keyi. Eyi isan̄a uga ufialek isibi. Me mgburudun̄, Debit itumu ibe: “Îre mije ikarege enyi (orere, ebi Libai) eben okop ya me adasi mgbọ ke Jioba Awaji kiji onaan̄ ejit ikeme eji ijo ijo. Eji si kpedodo ida Jioba, inyi eji eriọọn̄ ubọk ebekọt isa okop ya ika.”—Mfufuk Eyi Adasi 13:1-3; 15:11-13; Otu Ifuk 4:4-6, 15; 7:1-9.
w03 5/1 11 ¶13
Ire Okekido Ibe, “Mọmọ Jioba?”
13 Mgbọ ebi otoko kè Libai ebenbe Okop Inyan̄a-Ibot inan̄a me uwu kè Obedi-Edọm inu me Jeruselem, mikọt okwa ge Debit ogebe. Usini me lek inu nyaka-nkeek okup me emen okwa ya ire: “Ìweek Jioba, mè ìweek si unye kan̄; ìkiweek ntap-ubọk kan̄ mgbọ geelek. Ìkeek uyeke uyeke inu cha îrọbe, inu ukechieen̄ kan̄ cha, mè ata oyerebet cha îfieekbe.”—Mfufuk Eyi Adasi 16:11, 12.
Week Inu Unye Otu Ewe Okup Me Usem Awaji
w14 1/15 10 ¶14
Kitọbọ Ebum Nyi Jioba, Ogwu Ubọọn̄ Ire Mgbọ geelek
14 Debit isa okop inyan̄a-ibot inu me Jeruselem. Me mgbọ ubelejit yi, ebi otoko kè Libai mikọt okwa eyi okup me ikpa Mfufuk Eyi Adasi 16:31 isa itọn̄ Awaji. Ge me lek usem osibi esese okup me emen okwa ya ire: ‘Ìkilook ido geelek ibe ke Jioba ibene ikikpulu!’ Ene mokọt ido ibe, ‘Eyi irebe ibe ke Jioba ore Ubọọn̄ ire mgbọ ikakaan̄ge itata, ike owa ke isa ibene ikikpulu me mgbọ ya ni?’ Jioba ikibene ikpulu mgbọ geelek irọbe inu okijeen̄ ibe ke ire ọmọ okikpulu mè iyaka ire, isineen̄ ibe ene ge ikeke ichit ọmọ chieen̄ me mgbọ ge mè iyaka ikpọ chieen̄ me lek ufiak ge. Jioba ikpukpulu me irek okup ikeyi ikup ufiak enenen. Sabum Debit okwube, Jioba ichieek ọmọ use ibe ke mkpulu kan̄ ibobabia ire mgbọ geelek, itumu ibe: “Mâmọnọ ene ge me lek bọn ònan̄a me owot kwun̄, isa irọ ubọọn̄ me irek kwun̄, mè irọ inyi mkpulu kan̄ ikeke inye.” (2 Sam 7:12, 13) ‘Gwun̄’ kè Debit yi inan̄a isibi obop acha ge eyi ikwube iraka. Ekene ore gwun̄ yi, kpa mgbọ ke ibokana Ubọọn̄?
ONYAN̄ IBA 20-26
INU UNYE OTU EWE OKUP ME USEM AWAJI | MFUFUK EYI ADASI 17-19
“Kikaan̄ Unwọọn̄ Ikerere Me Mgbọ Okaan̄be Ntọbọ-Nlọ”
w06 7/15 19 ¶1
To Chieen̄ Me Lek Ata Mkpọ Echi Jioba Okisa Ntitiin̄ Kan̄ Ikirọ
DEBIT me Ijeren ukọt ikaan̄ ire ene ge me lek ebi isisbi isi ekpabe mkpọ ofolek me Ikpa Mbuban Agan̄ Esabe Usem Iburu Ige. Debit, ogwu orere ogwu okpukpo arọọn̄, ogwu okige mè ikikọt okwa, ogwu nriran, mè ogwu ubọọn̄ si, itoon̄ ejit me lek Jioba. Ire udọk udọk ima Debit okaan̄be me lek Jioba obieen̄ ọmọ ibe iweek inanama uwu isa inyi Awaji. Uwu mbuban ya ibonama obokana ere ebekinyi Jioba ata ntọbọ-ebum me Ijeren. Debit iriọọn̄ ibe ke uwu mbuban ya mè inu ebekirọ me emen mosa unwọọn̄ mè ugbana ijet ebi eyi Awaji. Debit ikọt ibe: “Kpọ uga ubelejit òkup inyi ebi owu [Jioba] ogobobe, mè itaba iriaak ibe eneluk me emen Uwu Mbuban kwun̄; ata inu òkinan̄a me uwu kwun̄ môjot eji owot.”—Okwa Itọn̄ 65:4.
w21.08 22-23 ¶11
Kikaan̄ Unwọọn̄ Nan̄a Me Lek Ikwaan̄ Okirọ Inyi Jioba
11 Eji mekọt irọ ibe unwọọn̄ kiji ikimin sa me itatap lek ojot ojot me lek ikwaan̄ geelek enyibe eji me ntitiin̄ kè Jioba. Sa “otutuuk mgbọ” kwun̄ tap me ikwaan̄ ilolook ata etip mè tap lek ojot ojot me lek ikwaan̄ ntitiin̄. (Ikwaan̄ 18:5; Iburu 10:24, 25) Kineen̄ lek si nkween̄mkpo ntitiin̄ inyi omokọt ikinyi ufọọk-otu obokinama ene ibene. Mọnọ sun̄ ufiak mkpọ irọrọ geelek enyibe owu me nkween̄mkpọ etete nde. Mè ire enyi owu ikwaan̄ ge me ntitiin̄, rọ me enen mgbọ mè re ogwu ebekọt itoon̄ ejit me lek. Kamọnọ ikwaan̄ geege enyibe owu kubọk ikwaan̄ ikagbege ibe ofiat mgbọ kwun̄ onyi. Sa inyi okorọ ikwaan̄ kwun̄ ojaan̄. (Urọk 22:29) Ike okitap lek ojot ojot me lek inu geelek ogbaan̄ me lek ata ntọbọ-ebum mè ikwaan̄ geelek enyibe owu, ikeya ke obokije inyi isi mè ikikaan̄ unwọọn̄ omimin. (Gal 6:4) Mofet me lek kwun̄ si igogọọk ebi ofifi ene inwọọn̄ unwọọn̄ me mgbọ ema ekaan̄be irek me ntitiin̄ eyi omoma ikakaan̄.—Rom 12:15; Gal 5:26.
Week Inu Unye Otu Ewe Okup Me Usem Awaji
w20.02 12, box
Eji Mima Jioba Nte Kiji Enenen
Ire Jioba Ikekimun̄ Emi Ni?
Ire owuuk lek ido lek kwun̄ ibe, ‘Eyi ene ewabe me linyọn̄ yi, ire Jioba mokọt ikimun̄ emi ni?’ Ire owuuk lek ido ikeya, ikare owu gaalek. Ogwu Ubọọn̄ Debit ido ibe: “Jioba, ìre ogwu ebilene ikike ìkup me lek keke ni, eyi osabe ọmọ igwen inu? Sà ìre keke ke gwun̄ ebilene ore, eyi owu okikaan̄ nkeek ibak ọmọ? (Itọn̄ 144:3) Debit ikaan̄ unye-ejit ibe ke Jioba iriọọn̄ ọmọ ijaan̄. (1 Mfuf 17:16-18) Inan̄a me emen Usem kan̄ mè ntitiin̄ kan̄, Jioba irọ ibe eji eriọọn̄ ibe ke ọmọ okimun̄ ubọk eji ekisa ijeen̄ ibe ke eji ima ọmọ. Kpọ nu usini inu okup me emen Baibul echi oborọ ibe ochieek eyi ojaan̄:
• Jioba iriọọn̄ owu sabum enimaman owu.—Itọn̄ 139:16.
• Jioba iriọọn̄ mkpọ okup me ejit kwun̄ mè iriọọn̄ mkpo okikeek.—1 Mfuf 28:9.
• Jioba me lek kan̄ okigban̄ uriaak kwun̄ ge ge.—Itọn̄ 65:2.
• Irọrọ kwun̄ ikikaan̄ igbaan̄ me lek Jioba.—Urọk 27:11.
• Jioba me lek kan̄ otaba owu inu me lek kan̄.—Jọn 6:44.
• Ire okwu, Jioba iriọọn̄ owu ijaan̄ ire lek mokọtbe ijomo owu me mkpa. Ọmọ moyaka irom akpalek kwun̄ mè iyaka irọ ibe okaan̄ eru mè nkeek echi owuukbe lek ikaan̄.—Jọn 11:21-26, 39-44; Ikwaan̄ 24:15.
ONYAN̄ IBA 27–ONYAN̄ ITA 5
INU UNYE OTU EWE OKUP ME USEM AWAJI | MFUFUK EYI ADASI 20-22
“Tap Ubọk Nyi Ebi Ijija Inyi Ema Ekọt Ekekaan̄ Nje-Nnyi-Isi”
w17.01 29 ¶8
“Sa Ikọ Cha Jeen̄ Ebirieen̄ Ebi Ikigbe Utoon̄-Ejit”
8 Fuk Mfufuk Eyi Adasi 22:5. Debit ira ikikeek ibe ke Solomọn ikpobokọt ikpọ chieen̄ me lek ikwaan̄ inanama uwu mbuban mije, uwu mbuban ya ibore “uwu òkakaan̄ ikpele umin.” Me mgbọ ya, Solomọn “ìre sọntiik gwun̄, ìkariọọn̄ inu geege.” Ire, Debit iriọọn̄ ibe ke Jioba motap ubọk inyi Solomọn inyi ikọt irọ ikwaan̄ inyibe ọmọ. Ọmọ orọ, Debit ototo chieen̄ me lek mkpọ ibokọt irọ isasa itap ubọk inyi Solomọn mè ineen̄ si owuwa mkpọ ebesa inama uwu ya.
w17.01 29 ¶7
“Sa Ikọ Cha Jeen̄ Ebirieen̄ Ebi Ikigbe Utoon̄-Ejit”
7 Debit ikatet ikaan̄ mè itatap ubọk inyi Solomọn mije ibe ke ikare ọmọ ke ebetọn̄ kubọk ogwu onanama uwu ya. Ekigwen uwu ya si uwu mbuban Solomọn onamabe ikare Debit. Ubọk geelek ibe ke ira iyọt me lek Debit mije ikakọtge irọ inu ibenbe me ejit irọrọ, isa otutuuk ejit kan̄ ibieen̄ ikwaan̄ uwu mbuban ya inye. Ineen̄ ebi ikwaan̄ mè ititiin̄ alata araran̄, alata okuket, ekwe, okwukwut, mè uti ebesa inama uwu ya. Ofifi si, itap Solomọn efuuk me owot, itumu inyi ogọt ibe: “Gwun̄ n̄a, kè inu ije ijaan̄ me lek kwun̄, inyi owu mônama uwu inyi Jioba Awaji kwun̄, kubọk îtumube ibe ke owu mônama.”—1 Mfuf 22:11, 14-16.
w18.03 11-12 ¶14-15
Ebi Irere Ute mè Uga, Ire Enyi Mekitap Ubọk Inyi Nsabọn Kinyi Inyi Ema Ekọt Emin Esoon̄ Ikakaan̄ Ntap-Me-Mun̄ Ni?
14 Kubọk ebi ikikpọ chieen̄ me lek arọọn̄ Awaji, ebi ugane ntitiin̄ mekọt ikitap ubọk inyi ebi irere ute mè uga ike ekitap efuuk ikikpukpo nsabọn kiban̄ sa me ikekitumu ata mkpọ ofolek itoto mkpọ emen ekwukwu me isi. Gwun̄ ute enenwaan̄ ge ogwu ogbọgbọ oniin̄ ojot mgbọ me inu oraraka akọp acha jaaba itumu mgbaan̄ usem Gwun̄ Ute Charles T. Russell okaan̄be me lek kan̄ mgbọ irebe acha gweregwen. Gwun̄ ute enenwaan̄ ya itumu ibe: “Isa akọp mè nkikek mgbọ go isa igọọk emi ikpa mkpọ osilek inu emen ekwukwu ntobe me isi.” Iin̄, ata usem mè usem ntap-efuuk-me-owot eji ekitumu inyi ebi ene mokọt ikaan̄ ata mgbaan̄ me lek kiban̄ ikerere me mgbọ owuwa acha orakabe. (Urọk 25:11) Ebi ugane ntitiin̄ mekọt itap ebi irere ute mè uga melek nsabọn kiban̄ me lek ikwaan̄ ekisi me Uwu Ntitiin̄, mè inyi nsabọn cha ikwaan̄ ogbegbe igọọk me lek acha mè unye kiban̄.
15 Bọn ute me ntitiin̄ mekọt itap ubọk sa me ijejeen̄ ulọk ogbegbe me lek ebi ijija. Eyi igọbọ ikekitaba iman̄ me lek inu okijeen̄ ibe ke ema mekije inyi isi. Kubọk inu njeen̄, ire ogwu ijija ge inyi ata ufọọk-otu mè iyaka ire, igọọk irọ mkpọ irọrọ me nkween̄mkpọ etete nde ni? Ire ogwu ijija ge ikọt itim igak inu ge otọtọ ichechieek kan̄ ikpọ, sa ire ilook ata etip me uwu ikpa mgbọ irek ge osibibe ni? Kigwat lek tọn̄ ema. Ire omokọt itap efuuk ikigọọk ebi ijija ikpa usem sabum nkween̄mkpọ onobene mè iyaka ire mgbọ esibibe, mè isa me ikeya ikijeen̄ ibe ke ochubọk ikaan̄ ulọk me lek kiban̄ ni? Me oniin̄ okup ikeyi mè ofifi ofifi si, eji mekọt itap ubọk irọ ibe ebi ijija eriọọn̄ ibe ke ema ire okpọkọ ge me lek “ntitiin̄ ile ebi eyi” Awaji.—Itọn̄ 35:18.
Week Inu Unye Otu Ewe Okup Me Usem Awaji
w05 10/1 11 ¶6
Inu Ekpabe Ofolek Ikpa Mfufuk Eyi Adasi
21:13-15. Jioba inyi ogwu osat ge ida ibe itet ubọk ikaan̄ mè isasa ijo orukan̄ ifiat ebi kan̄ mije, ifefieek Ọmọ me lek. Me atikọ, “ejit nsan kan̄ îmin enenen.”