Ikpa Okikpa Nkween̄mkpọ Ugwem Mè Ikwaan̄ Kiji Kubọk Ebi Eyi Karais
© 2023 Watch Tower Bible and Tract Society of Pennsylvania
OKPA ONYAN̄ 1-7
INU UNYE OTU EWE OKUP ME USEM AWAJI | JOBU 32-33
Kat Ejit Ebi Ikikaan̄ Sasaak
it-1 710
Eliyu
Eliyu ikagobo ene isi, ikanyi si ene geege erieen̄ ngugo isasa ikitọn̄ ene ya. Iriọọn̄ ibe ke kubọk Jobu, ke ire arika ke ọmọ onan̄a me lek, ke Ogwu Okakaan̄ Unye Ichit si orom ọmọ. Eliyu ikakaan̄ me nkeek irọrọ ibe ukpook itet Jobu, ire, itumu usem melek kan̄ kubọk ata unene, igwen erieen̄ Jobu, mkpọ eyi Elifaji, Bilidadi, mè Sofari kperọ.—Jobu 32:21, 22; 33:1, 6.
w14 6/15 25 ¶8-10
Ire Okekimun̄ Iwọwọ Ebilene Ike Jioba Okimun̄ Ni?
8 Eji esikikeek ibe ke ijo irek kubọk orukan̄, ufialek ototun̄ ukan̄, mè iyaka ire uga ufieejit mokọt irọ ibe bọn Nte kiji irieen̄ mè ibaan̄ ewọ, mobieen̄ eji ibe eji ekaan̄ njijin me lek kiban̄ egbaalek. Usini mgbọ, eji si mekọt imun̄ lek kiji me mbet lek irek okup ikeya usen ge. Sabum ema enin̄be Ama Echieekbe Me Use, ebi Ijeren, ebi iwuuk lek ire ebi ugbọọn̄ mè iwọ me Ijipiti, ire ebi etemebe ibe ekatet ejit inye me lek ebi ngwan̄ kiban̄ ebi ikup me una. Jioba iweek ibe ema etap ubọk enyi ebi ugbọọn̄.—Ikan 15:7, 11; Lib 25:35-38.
9 Kpan̄asi ikekifieek ema oyerebet, igbe ibe eji ekekat ejit ebi ikup me ijo irek. (Jobu 33:6, 7; Mat 7:1) Kubọk inu njeen̄: Ire esa ogwu okikọp bike osasak unan mije mfufiat orọrọ me oniin̄ inu me uwu ugwun̄, ire ebi ikisi ikwaan̄ me ere ya medasi iweek irọriọọn̄ mè ire ọmọ orọ ibe mfufiat ya irọ ni? In̄-in̄, kpan̄asi ikeya, ema ebegwagwat lek itap ubọk inyi ọmọ. Ubọk yaage si, ire gwun̄ ute ge iwọ mije ufialek kan̄, inu okukup ufiak ichit ire itatap ubọk inyi ọmọ me irek emen ekwukwu.—Fuk Ebi Teselonaika Eyi Adasi 5:14.
10 Ire eji iriọọn̄ ubọk ikeek mkpọ ofolek irek ebi bọn Nte kiji, eji mekọt imun̄ iwọwọ kiban̄ me esese oniin̄. Keek-nu mkpọ ofolek bọn ute ibaan̄ ebi imeme ukeme me ubọk ebi ototun̄ ukan̄ kiban̄ me owuwa acha. Usini kiban̄ mekọt ikup kubọk ewọwọ me anam akpalek, ire, ema mikaan̄ mè ikijeen̄ ichechieek onyenye. Osimun̄ uga ge okikpukpo nsabọn kan̄ ọmọ gaalek mè ikisa ema ikinu nkween̄mkpọ mgbọ geelek, ire ikakitop owu me lek imumun̄ mbet lek ichechieek mè ntumu-mfieek ikebijeen̄ ni? Ire ikeya si ke ikikup owu me lek osimun̄ ebi ijija ikukup inye me emen atikọ ikerere ibe ke ebi uwu ikpa kiban̄ kpekijeen̄ ata akpat ukot ni? Me atikọ, eji miriọọn̄ ibe ke ebi ikup kubọk ewọwọ chi, mikaan̄ ichechieek onyenye kubọk ebi irek kiban̄ onwọnbe.—Jemis 2:5.
w20.03 23 ¶17-18
Kpa Mgbọ Ogbe Itutumu Usem?
17 Ogwu òso ene ini onikpọ Jobu ire Eliyu, ngwan̄ kè Ebereyam. Igban̄ ike Jobu mè ebirieen̄ ita kechilọ ekitumu usem. Iriọọn̄ ubọk igban̄ utọn̄ me lek inu ema etumube mije, isa me njijin inyi Jobu nteme echi okukup ufiak isasa itap ubọk inyi ọmọ inen̄e nkeek kan̄ isun̄. (Jobu 33:1, 6, 17) Inu okukup ufiak ichit inyi Eliyu ire imimin Jioba, ikare lek kan̄ mè iyaka ire ofifi ene. (Jobu 32:21, 22; 37:23, 24) Akpat ukot Eliyu ikijeen̄ eji ibe ke ikaan̄ mgbọ eberiaan̄ ere mè mgbọ ebetumu usem. (Jemis 1:19) Ikijeen̄ eji si ibe mgbọ geelek eji ekinyi ene nteme, inu obokup eji ufiak ichit ire imimin Jioba, ikare lek kiji.
18 Eji mekọt ijeen̄ ibe ke eji mimọnọ inyinyi isasa itumu usem ibene sa me igọgọọk nteme Baibul ofolek mgbọ mè ubọk ebetumu usem. Inan̄a me unye ekwukwu mbuban, Ogwu Ubọọn̄ Solomọn ogwu okakaan̄ iriọọn̄-inu ige ibe: “Nteme enyibe me ata mgbọ, ìjaan̄ kubọk ujuja asi ebek alata araran̄ esabe alata okuket ikpa ikana.” (Urọk 25:11) Eji esiriọọn̄ ubọk igban̄ utọn̄ me lek inu ebi ofifi ene ekitumu mè ikikeek mkpọ ijaan̄ sabum eji etumu usem, usem kiji mokup kubọk asi ebek alata araran̄—okukup me unye otu ewe mè ijaan̄. Me mgbọ ya, mè ire usem kiji iwawa sa ikawa, eji mekọt inama ema ibene, mè irọ inyi Jioba ikibele ejit me lek kiji. (Urọk 23:15; Efes 4:29) Eyi ichubọk ire oniin̄ onwọnwọn eji ebekọt isa ijeen̄ ibe ke eji minwọọn̄ uche yi onan̄a me ubọk Awaji!
Week Inu Unye Otu Ewe Okup Me Usem Awaji
w13 1/15 19 ¶10
Kweek Nye Kitaba Lek Riaak Me Lek Jioba
10 Ubọk yaage si, igbe ibe eji ekekpọ ubọk akpalek kiji okupbe. Ire, ikakup ufiak ibe eji esa isasan̄a otutuuk inu geelek okijeen̄ ibe ke eji mekikan. Inu chi mokọt ikijeen̄ ibe ke eji mekimin inin̄ ene, mikaan̄ umin, mè ikaan̄ ata eru. Kubọk inu njeen̄, Baibul ibe: “Isọọn̄ ìre okpibot ubọọn̄ eyi umin; îre ebi ìluluk ugwem ata irọrọ ekikaan̄.” (Urọk 16:31) Ikeya ke Jioba okimun̄ eji, igbe si ibe eji ekemun̄ lek kiji ikeya. (Fuk Pita Eyi Adasi 3:3, 4.) Eya orọ, ire mojeen̄ iriọọn̄-inu ire eji ibe ogwu ofia ebeke isi ikwaan̄ me lek kiji mè iyaka ire inyi eji ugwun̄ eyi mokọtbe isak eji unan me lek mije eji ekiweek ijajaan̄ uja ni? ‘Unwọọn̄ kè Jioba’ ore inu okinyi eji ata uja me ekakpọge chieen̄ me lek acha kiji, mè iyaka ire ubọk akpalek kiji osabe ikup. (Neyem 8:10) Ire gaalek me emen aya inyọn̄ ke eji ebekaan̄ akpalek ososo mè iyaka ikaan̄ uja mgbọ ijija kiji. (Jobu 33:25; Asaya 33:24) Mege ire mgbọ ya, iriọọn̄-inu mè ichechieek motap ubọk inyi eji ekup eriaak lek Jioba ike eji ekisa irek eji emun̄be lek kiji mgbọ keyi ikirọ inu onwọnwọn ichit.—1 Tim 4:8.
OKPA ONYAN̄ 8-14
INU UNYE OTU EWE OKUP ME USEM AWAJI | JOBU 34-35
Mgbọ Ikikup Kubọk Ijo Inu Ikirọ Ebi Ata Ife
wp19.1 8 ¶2
Ike Owa Ke Awaji Okup?
Awaji ikirọrọ inu otatat mgbọ geelek. Me atikọ, “Awaji ìkabokọkọt irọ inu ikpak, Ogwu Òkaan̄ Unye Geelek ìkpokọkọt irọ ijo inu.” (Jobu 34:10) Oyerebet kan̄ ikitatat, ofolek Jioba, ogwu okọt itumu ibe: “Awaji îsibi unen oyerebet inyi ebi ido geelek.” (Okwa Itọn̄ 67:4) Bak lek ibe ke Jioba “ìkikpọ ene me ejit,” eji kpebekọt ifiaan̄ ọmọ sa me iluluk ugwem isi iba, mije ikirọriọọn̄ atikọ mè osibi unen oyerebet. (Samien Eyi Adasi 16:7) Isọkọ me lek si, Awaji iriọọn̄ otutuuk inu ikpak mè mfeen̄ okibọkọ irek me inyọn̄ ijọn̄, ichieek use ibe ke sọnja mgbọ, ke “ebi ikpak mêkwaan̄ ita me linyọn̄.”—Urọk 2:22.
w17.04 10 ¶5
Keke Obonan̄a Ama Ubọọn̄ Awaji Isinu?
5 Keke ke Jioba oborọ? Me mgbọ keyi, Jioba okinyi ebi mkpikpak irek ibe enwene. (Asaya 55:7) Kpefieek ota oyerebet inyi ema ge ge. Ire ijo ukot keyi ke efieek oyerebet inyi. Ire, keke oborọ ebi geelek kpeweek inwenwene, mè ikup inye ikibieen̄ ukot keyi inye mege ire mgbọ uga ufialek ni? Jioba ichieek use ibe ke ọmọ mosan̄a otutuuk ebi mkpikpak me inyọn̄ ijọn̄ yi ire mgbọ geelek. (Fuk Okwa Itọn̄ 37:10.) Ebi mkpikpak mekọt ikikeek ibe ke oyerebet ya ikpobore ema lek. Owuwa me lek kiban̄ mikween̄ ilelet ijo inu ema ekirọ, me ukot keyi, ikikup kubọk ema mekinwọnọ oyerebet mè mkpukpe ijo inu kiban̄. (Jobu 21:7, 9) Ire, Baibul ikeek eji ibe: “Chieen̄ kan̄ ìkikpọkpọ oniin̄ ugwem ene; ọmọ ìkimumun̄ otutuuk akpat ukot ije kan̄ geelek. Kpunu ekpuk udun geege, kpunu si ufieejit mkpa, ere ebi ìkirọ inu ikpak ebekọt ilet lek.” (Jobu 34:21, 22) Kpunu ogwu obokọt ilet me chieen̄ Jioba. Kpunu ogwu ifiọk geege obokọt ifiaan̄ ọmọ; kpukpunu si ere geege odọdọk mè iyaka ire idun ire lek chieen̄ Awaji eyi okimun̄ inu geelek ikpobokọt imun̄. Akọn̄ Amagedọn isiraka, eji meweek ebi mkpikpak me ere ema ewuuk lek ikikup, ire, eji kpebemun̄ ema. Ema mekwaan̄ isan̄a!—Itọn̄ 37:12-15.
w21.05 7 ¶19-20
Ire Omokaan̄ Ntọbọ-Ukot Bak Me Lek Jisọs Ni?
19 Ire eji mekimun̄ mbet lek ufialek yaage me chereyi ni? Iin̄. Owuwa ebi ene mekikaan̄ ntọbọ-ukot mije ibe ke eji kpekimọnọ agan̄ me lek rumurumun̄ mkpulu. Ema ekiweek ibe eji ekegọọk ekeme ubọk me mgbọ ekigobo ebi mkpulu. Ire, eji miriọọn̄ ibe ke me chieen̄ Jioba, ire eji igobo ogwu ebilene ibe ikpulu eji, isibi ibe ke eji mijit Ọmọ. (1 Sam 8:4-7) Ebi ene mekọt ikikeek ibe ke igbe ibe eji ekenama uwu ikpa mè uwu ugwun̄ mè iyaka ire, ekesi ofifi ofifi ikwaan̄ ekisa itap ubọk inyi ebilene. Ema mekọt ikikaan̄ ntọbọ-ukot mije eji etobe chieen̄ kiji me lek ilolook ata kpan̄asi iweweek isasan̄a ufialek ebilene isan̄a me mgbọ keyi.
20 Keke ke eji eberọ inyi eji ekakaan̄ ntọbọ-ukot? (Fuk Matiyu 7:21-23.) Inu obokup eji me ufiak ichit ire irọrọ ikwaan̄ Jisọs obe mè eji erọ. (Mat 28:19, 20) Eji kpebechieek ibe rumurumun̄ mkpulu melek ofifi ofifi ufialek okibọkọ irek me linyọn̄ yi isan̄a chieen̄ kiji me lek ikwaan̄ yi. Eji mima ebilene mè iweek itatap ubọk inyi ema, ire, eji miriọọn̄ ibe ke oniin̄ onwọnwọn ichit eji ebekọt isa itap ubọk inyi ebi ene ire ijejeen̄ ema mkpọ ofolek Ama Ubọọn̄ Awaji mè itatap ubọk inyi ema ekaan̄ ata mgbaan̄je melek Jioba.
Week Inu Unye Otu Ewe Okup Me Usem Awaji
w17.04 29 ¶3
Kè Ekwukwu Nsan̄a-Lek-Nsibi Kwun̄ Isa Itọn̄ Ijet Jioba!
3 Jioba ikakan̄ inu inyi Eliyu me mgbọ idobe Jobu ibe: ‘Ire owu ore ogwu ata irọrọ, keke ke onyi ọmọ? Sà ìre keke ke Awaji obọkọ owu me ubọk?’ (Jobu 35:7) Ire Eliyu ikitumu ibe ke efuuk ebilene ekitap isasa ikisi ikwaan̄ inyi Awaji ire me ikike ni? In̄-in̄. Kpan̄asi ikeya, usem kan̄ isibi ibe ke Jioba ikayaka lek imaan̄ me lek ntọbọ-ebum kiji. Jioba isoso. Eji kpebekọt irọ ibe ọmọ ibọọn̄ mè iyaka ire inye lek igbaalek. Kpan̄asi ikeya, ata inu geelek, uka geelek mè iyaka ire efuuk geelek eji ekaan̄be ire uche onan̄a me ubọk Awaji, ikaan̄ ulọk si me lek ubọk eji ekisa inu chi irọ mkpọ.
OKPA ONYAN̄ 15-21
INU UNYE OTU EWE OKUP ME USEM AWAJI | JOBU 36-37
Inu Orọrọ Obotoon̄ Ejit Me Lek Use Awaji Ofolek Ugwem Ikakaan̄ge Itata
w15 10/1 13 ¶1-2
Ire Eji Mekọt Ichubọk Iweek Awaji Imun̄ Ni?
AWAJI IKILULUK IRE MGBỌ GEELEK: Baibul ijeen̄ ibe ke Awaji ikukup “bene me mgbọ ikakaan̄ge itata si re mgbọ ikakaan̄ge itata.” (Okwa Itọn̄ 90:2) Eyi isibi ibe ke Awaji ikakaan̄ ibebene, ikpobokaan̄ si itata. Ebilene “kpebekọkọt si iweek otu ifuk acha kan̄ iriọọn̄.”—Jobu 36:26.
Ubọk eyi obosa irọ owu oruru: Awaji ichieek use inyinyi owu ugwem ikakaan̄ge itata ire ochubọk iriọọn̄ ọmọ. (Jọn 17:3) Ire omotoon̄ ejit me lek use ya ire Awaji ikakiluk ire mgbọ geelek ni? Ire “ogwu òrere Ubọọn̄ eyi mgbọ geelek” gaalek obokọt irọ use yi iso.—Timọti Eyi Adasi 1:17.
w20.05 22 ¶6
Ire Omọnọ Inyinyi Awaji Onyibe Owu Ibene Ni?
6 Mun̄ ikikup me inyọn̄ ijọn̄ mije inyọn̄ ijọn̄ ikup me ere odada ibọkọ ikem me lek ura. Ire inyọn̄ ijọn̄ ijuuk iriaak me lek ura sọntik, otutuuk mun̄ okup me inyọn̄ ijọn̄ yi mochiaak ita, ibore ewuuk gaalek obokup me emen. Ire, ire inyọn̄ ijọn̄ yi ida ibọkọ me lek ura sọntik, otutuuk mun̄ okup me emen ibobobot, inyọn̄ ijọn̄ yi iboyaka inikup kubọk okpukpuk mun̄. Mije Jioba otobe inyọn̄ ijọn̄ me ere ogbegbe, ubọk mun̄ okisa ije me inyọn̄ ijọn̄ ikirọ ibe iluluk ugwem ifet. Ura ikitaba mun̄ oboso mkpọ obet lek 120,000 cubic miles (500,000 cu km) ifo inyọn̄. Mun̄ chi monenikup me inyọn̄ mkpọ obet lek akọp usen sabum monirep kubọk ibot mè iyaka ire ibot awo. Isirep, mun̄ cha monenifo okwaan̄ mè ofifi ofifi ere mun̄ okikup, ura si moneniyaka itaba ifo inyọn̄. Ubọk mun̄ okisa ije yi ikijeen̄ ibe ke Jioba ikaan̄ iriọọn̄-inu melek unye.—Jobu 36:27, 28; Etip 1:7.
w22.10 28 ¶16
Tet Ikpọchieen̄ Kwun̄ Kubọk Ogwu Eyi Karais Nye
16 Ikpọchieen̄ ugwem ikakaan̄ge itata eyi eji ekaan̄be ire uche onan̄a me ubọk Awaji. Eji ekikukup ikpọ mgbọ ya, mije eji miriọọn̄ ibe ke ibonunu. Ikpọchieen̄ yi ikup kubọk iloma eyi okitet eji inye inyi eji ekọt ekeke enye mgbọ geelek eji esichichini ukeme, tukutuku mè iyaka ire mkpa. Ikup si kubọk okpibot akọn̄ eyi okibem ekiket kiji inyi eji ejit inu olọlọ mè etet eyi otatat enye. Ikpọchieen̄ kiji yi oyaka lek imaan̄ me lek Baibul ikitaba eji iriaak me lek Awaji mè ikijeen̄ eji ubọk isabe ima eji ire. Eji ekikaan̄ oruru enenen ike eji ekirọ inyi ikpọchieen̄ kiji ikinye.
Week Inu Unye Otu Ewe Okup Me Usem Awaji
it-1 492
Ikpakpa Usem
Ebi ene ekinọ etip mè mkpọ okibọkọ irek me esese oniin̄ me ido egebe Baibul me ukot ikaan̄. Owuwa mgbọ, ebi ene ekinọ mkpọ okibọkọ irek me emen ama mè iyaka ire me ofifi ido inan̄a me otu ebi ene. (2 Sam 3:17, 19; Jobu 37:20) Ebi ikikọp uran̄, ebi ikimalek ije me urum melek anam kiban̄ ekikpa inu okibọkọ irek me ujọn̄ọ ere mgbọ geelek ema esigba ama ilile ge mè iyaka ire gwun̄ ama ibelep inorie, mun̄ mè ofifi ofifi mkpọ me oniin̄ ije kiban̄. Bak lek ere ikupbe, ebi ene inan̄a me ujọn̄ọ ere kubọk Asia, Africa, mè Europe, ekekikọp uran̄ inu me ido Palestine. Eya orọ, ebi iluk me ido ya mekọt ikinọ ukpatu echi okibọkọ irek me ofifi ido. Ebi ene si mekọt inọ mkpọ okirọ me ido kiban̄ mè iyaka ire me ofifi ido me emen ewe.
OKPA ONYAN̄ 22-28
INU UNYE OTU EWE OKUP ME USEM AWAJI | JOBU 38-39
Ire Okekisan̄a Mgbọ Isibi Ikisa Ikpọ Inu Nrom Ni?
w21.08 9 ¶7
Ire Okup Me Mbem-Lek Ikukup Ikikpọ Jioba Ni?
7 Mgbọ ikikpa ubọk Jioba osabe irom inyọn̄ ijọn̄ yi, Baibul ikitumu mkpọ ofolek itatap “okike,” irereen̄ “ewuuk ibot usọk,” mè itọtọbọ “ọdọ.” (Jobu 38:5, 6) Jioba isan̄a mgbọ si isa igwu nkeek ikom me lek ikwaan̄ isibe. (Ibeb 1:10, 12) Keek-nu ubọk ibokup me lek ebi osat ike ema ekikpọ ubọk Jioba okirom mkpọ sọnja sọnja! Eya mochubọk itop ema me lek enenen! Me ike mgbọ ge, ema ebebene ikitaan̄ “ukpo unwọọn̄.” (Jobu 38:7) Keke ke eyi okijeen̄ eji? Inu Jioba orombe iben ọmọ obop obop acha isasa irom isan̄a, ire, mgbọ Jioba oriọọn̄ ubọk ikpọ otutuuk inu cha, “imun̄ ibe ke îjaan̄ enenen.”—Ibeb 1:31.
w20.08 14 ¶2
Ijojomo Me Mkpa Ikijeen̄ Ima, Iriọọn̄-Inu, mè Ime Awaji
2 Adasi, Jioba irom ogwu melek kan̄ ebegbaan̄ ikwaan̄ isi. Mgbọ irombe ọmọ isan̄a, isasa adasi Gwun̄ yi isa “irom otutuuk inu geelek,” eyi igọbọ efie efie ebi osat. (Kọl 1:16) Jisọs ikinwọnwọọn̄ irek ikaan̄be igọgọọk ogwu Ute igbaan̄ isi ikwaan̄. (Urọk 8:30) Ebi osat si mikaan̄ mkpọ eyi oborọ ibe ema enwọọn̄ unwọọn̄. Ema mimun̄ ubọk Jioba mè Ogwu Usọ Ikwaan̄ kan̄, Jisọs, ekirom inyọn̄ mè ijọn̄. Keke ke ema erọ ofolek inu ema emun̄ ni? Ema etataan̄ “ukpo unwọọn̄” mgbọ erombe inyọn̄ ijọn̄, me kpunube cheche, ema mikup inye ikitaan̄ ukpo unwọọn̄ me lek otutuuk inu geelek Jioba orombe, eyi igọbọ ota inu irombe orere, ebilene. (Jobu 38:7; Urọk 8:31) Inu nrom chi ge ge ikijeen̄ ibe ke Jioba ikaan̄ ima melek iriọọn̄-inu.—Itọn̄ 104:24; Rom 1:20.
w23.03 17 ¶8
Kween̄ Mkpọ Ofolek Jioba Gbaalek Inan̄a Me Lek Inu Irombe
8 Jioba igbe ogwu eji ebetoon̄ ejit me lek. Jioba itap ubọk inyi Jobu ibe irọ inyi utoon̄-ejit ikaan̄be me lek Kan̄ imin igbaalek. (Jobu 32:2; 40:6-8) Me usem igọọkbe Jobu ikpa, Awaji itumu mkpọ ofolek esese esese inu irombe kubọk ntoronyan̄, oduku inyọn̄ mè omumen inyọn̄. Jioba itumu si mkpọ ofolek anam, kubọk eriembuuk oron mè inyinya. (Jobu 38:32-35; 39:9, 19, 20) Ikare unye Awaji gaalek ke otutuuk inu chi okijeen̄, ire, ema ekijeen̄ si ima mè ikpele iriọọn̄-inu kan̄. Inan̄a me lek usem chi Awaji ogọọkbe ọmọ ikpa, Jobu initoon̄ ejit me lek Jioba igak mgbọ oraraka. (Jobu 42:1-6) Ubọk yaage si, mgbọ geelek eji esikween̄ mkpọ ofolek inu nrom, ikikeek eji ibe ke Jioba iriọọn̄ inu mè ikaan̄ unye igak eji. Ọmọ mokọt itap uyaka me lek otutuuk ufialek kiji. Irọriọọn̄ eyi motap ubọk irọ inyi utoon̄-ejit kiji me lek kan̄ inye.
Week Inu Unye Otu Ewe Okup Me Usem Awaji
it-2 222
Ogwu Okinyi Ikan
Jioba kubọk Ogwu Okinyi Ikan. Jioba ochubọk ire Ogwu Okinyi Ikan me inyọn̄ mè ijọn̄. Ire ọmọ onyi ikan echi okikpulu inu echi ikakiluk ugwem (Jobu 38:4-38; Itọn̄ 104:5-19), mè anam. (Jobu 39:1-30) Kubọk ge me lek inu irombe, ebilene si ebekisisiki ibot inyi ikan chi. Mije ebilene ebekọt ikikeek mkpọ mè ikitọbọ ebum, ema si mekisiki ibot inyi ikan Awaji ofolek eru. (Rom 12:1; 1 Kọr 2:14-16) Ire ikan Jioba si okikpulu ebi osat ikup me emen inyọn̄.—Itọn̄ 103:20; 2 Pita 2:4, 11.
Kpunu ene geege obokọt ijijaka ikan Jioba otapbe ito me lek inyọn̄. (Jeri 33:20, 21) Me inyọn̄ mè ijọn̄ ere ebilene ebekọt imun̄, ikan chi ibabia ikeya mè ire si mkpọ ebekọt itoon̄ ejit me lek. Ebi science mikisa inu ema eriọọn̄be ofolek ikan chi ikisa ifuk ubọk onyan̄, ntoronyan̄ mè ofifi ofifi mkpọ echi okup me inyọn̄ okisa ije me oniin̄ otatat. Ene geelek ojeje ikeme ikan Awaji otapbe ito ibe ikipulu linyọn̄ yi ikibọbọkọ osusut oje me lek mgbọ yaage. Ubọk yaage si ke ikup me lek ikan Awaji ofolek eru, kpebekọt inwene, ene geelek ogwu ikasiki ibot inyi ibobọbọkọ osusut oje me lek si. Ike ene obobọkọ osusut ire ikasiki ibot inyi ikan Awaji otapbe ito ibe ikipulu linyọn̄, ikeya si ke ibobọkọ osusut ire ikasiki ibot inyi ikan Awaji ofolek eru ikerere ibe ke ikare mgbọ yaage. “Kpunu ogwu òbokọt ifeen̄ Awaji. Inu geelek ene owopbe, eya ke ìborọkọ.”—Gal 6:7; 1 Tim 5:24.
OKPA ONYAN̄ 29–ONYAN̄ IBA 4
INU UNYE OTU EWE OKUP ME USEM AWAJI | JOBU 40-42
Inu Eji Ebekọt Ikween̄ Inan̄a Me Lek Inu Orọrọ Jobu
w10 10/15 3-4 ¶4-6
“Ìre Ekene Oriọọn̄ Inu Òkup Me Ejit Jioba?”
4 Ike eji ekigwu nkeek ikom me lek inu Jioba orọbe, ikagbe ibe eji ekesa ubọk eji ekimun̄ mkpọ esa ekefieek Awaji oyerebet. Ire eru yi ke etumu mkpọ ofolek me ikpa Okwa Itọn̄ 50:21: “Enyi ekekikeek ibe ke emi ǹkup kire (kubọk) enyi.” Ire mbet lek inu yaage ke ogwu okikween̄ Baibul ge otumu me mkpọ oraraka efit acha ge mè akọp acha jaaba mè go, ibe: “Ebi ene ekisa ubọk ema ekimun̄ mkpọ ikisa ifieek Awaji oyerebet, ema ekikeek ibe ke Awaji ibokisiki ibot inyi ikan yaage okikpulu ema.”
5 Igbe ibe eji egbala chieen̄ inyi ubọk eji ekimun̄ inu Jioba okirọ ikare me ubọk eji ekimun̄ mkpọ mè ubọk inu okikup eji me lek. Keke orọ eyi okupbe ufiak? Ike eji ekikween̄ Baibul, usini me lek mkpọ Jioba orọbe mokọt ikup kubọk ikatat ire eji esa ubọk eji ekimun̄ mkpọ isa ikpọ. Ebi Ijeren me ukot ikaan̄ mikaan̄ mbet lek lọlọ nkeek okup ikeya ofolek ubọk Jioba osa irọ mkpọ melek kiban̄. Kpọ-nu inu Jioba otumu inyi ema: “Ire, enyi ekibe, ‘Oniin̄ Ogwukaan̄-ene (Jioba) okirọ inu kan̄ ìkatat.’ Jei, ebi uwu kè Ijeren, ìgban̄-nu: Ìre oniin̄ emi nkirọ inu ikatatge? Ìre ìkare oniin̄ enyi ekirọ inu ore eyi ikatatge?”—Ijik 18:25.
6 Inu ge eyi obotap ubọk inyi eji ekarọn̄ inin̄ me ufe isasa ubọk eji ekimun̄ mkpọ ifieek Jioba oyerebet ire irọriọọn̄ ibe ke ubọk eji ekimun̄ igele, usini mgbọ si, ikilọlọ. Jobu ikween̄ eyi si. Me mgbọ ikibọkọ ukwook, Jobu ikifieek ejit mè ibene ikito chieen̄ me lek kan̄ gaalek. Ikayaka ito chieen̄ me lek mkpọ eyi okukup ufiak ichit. Ire, Jioba isa me ima itap ubọk inyi ọmọ ibe ikimun̄ mkpọ me esese oniin̄. Sa me idodo Jobu mkpọ oraraka akọp idodo jaaba eyi Jobu ikakọt ifọọk geege, Jioba irọ inyi Jobu iriọọn̄ ibe ke iriọọn̄-inu kan̄ igele. Jobu isiki lek kan̄ mè inwene ubọk ikimun̄ mkpọ.—Fuk Jobu 42:1-6.
w17.06 25 ¶12
To Chieen̄ Me Lek Inu Okukup Ufiak Ichit
12 Ire, ubọk Jioba osa inyi Jobu nkan̄-nu ikup unye unye eyi irebe ibe ke Jobu ije itibi owuwa ufialek ni? In̄-in̄, ikare ikeya, Jobu si ikamun̄ ikeya. Me ekakpọge chieen̄ me lek otutuuk ufialek kan̄, Jobu ibene ikitumu usem okijeen̄ itọn̄. Itumu ibe: “Nnwene otu, mè ikup me emen achiaan̄ mè ntọn̄ igwu ikom.” Mgbaan̄ nkan̄-inu Jioba eyi okisiki ene lek okaan̄be me lek Jobu ire eya. (Jobu 42:1-6) Eliyu si iwuuk lek inyi Jobu nkan̄-inu isasa inen̄e nkeek kan̄ isun̄. (Jobu 32:5-10) Mgbọ Jobu obọkọbe nkan̄-inu Awaji itap mè inwene ubọk ikimun̄ mkpọ, Jioba itumu inyi ebi ofifi ene ubelejit kan̄ me lek igbegbe utoon̄-ejit kè Jobu me irak ntọ-mkpọ.—Jobu 42:7, 8.
w22.06 25 ¶17-18
“Ìkup Ìkpọ Jioba”
17 Jobu ire ge me lek ebi usun̄ Jioba ebi itetet lek inye mgbọ ekije itibi owuwa ufialek. Me emen ikpa igebe ijet ebi Iburu, ogwu ikwaan̄ Pọọlu itumu mkpọ ofolek owuwa ene, igwen ema “ogbogbo ebi ata-ikọ.” (Iburu 12:1) Ema mije itibi owuwa ufialek, ire, ema ekukup inye ikigbe utoon̄-ejit inyi Jioba. (Iburu 11:36-40) Ire ukarajit mè efuuk kiban̄ ichechep me ikike ni? In̄-in̄! Ikerere ibe ke ema kpemun̄ nrọ-nso otutuuk use Awaji mgbọ ema ekupbe me ugwem, ema mikup inye ikikup ikpọ Jioba. Mije ibe ke ema miriọọn̄ ibe ke ema mikaan̄ nnwọn-isi Awaji, ema mikaan̄ unye-ejit ibe ke ema memun̄ nrọ-nso use cha. (Iburu 11:4, 5) Akpat ukot kiban̄ mokọt itap ubọk inyi eji ekup enye ekekup ekpọ Jioba.
18 Me chereyi, eji ekiluk me inyọn̄ eyi okpọkpọ ikisak igbaalek. (2 Tim 3:13) Setan ikukup inye ikitọ ebi usun̄ Awaji ikpọ. Ire, me ekakpọge chieen̄ me lek rumurumun̄ geelek eji ebechichini me mgbọ okup me isi, kè eji etumu efieek itatap efuuk ikisi ikwaan̄ inyi Jioba, mije, ikpọchieen̄ kiji ikup me lek “Awaji ogwu òkup me ugwem.” (1 Tim 4:10) Riọọn̄ ibe ke inu Awaji orọbe inyi Jobu me ota kan̄ ikijeen̄ ibe ke “ejit njijin, mè ejit nsan eyi Jioba okaan̄be me lek ebi kan̄ îmin enenen.” (Jemis 5:11) Kè eji si ekup enye ekegbe utoon̄-ejit enyi Jioba, me unye-ejit ibe ke “môkpe mkpukpe inyi ebi geelek ìkisa otutuuk ejit iweek ọmọ.”—Fuk Ebi Iburu 11:6.
Week Inu Unye Otu Ewe Okup Me Usem Awaji
it-2 808
Ochak
Jobu ire ogwu ata irọrọ okukup inye ikigbe utoon̄-ejit me ekakpọge chieen̄ me lek ochak. Ire, ibene ikikaan̄ lọlọ nkeek mè irọ inu ikatatge eyi oweweek ibe enen̄e ọmọ esun̄. Eliyu itumu inyi ọmọ ibe: “Ìre ekene enerieen̄ obet lek kè Jobu, ogwu òkibọkọ ochak kubọk ìkinwọ mudim?” (Jobu 34:7) Jobu iyaka ikito chieen̄ me lek ata irọrọ kan̄ igak eyi Awaji, mè ikimọnọ ata irọrọ kan̄ ibene igak eyi Awaji. (Jobu 35:2; 36:24) Me mgbọ ataak ataak ebi unene kan̄ ekirọ ogọt mkpọ ochak, Jobu ikimun̄ ibe ke ire ọmọ ke ekirọ ochak ya kpan̄asi Awaji. Ọmọ iyaka inikup kubọk ogwu otetele ibe ekerọ ọmọ inu esip mè ikinwọọn̄ ochak ekirọ ọmọ kubọk ikinwọ mudim isa ikisiki lek. Ike mgbọ ojebe, Awaji irọ ibe Jobu iriọọn̄ ibe (me ota kan̄) ke ire Ọmọ ke ebi ochak cha ekikan̄ ataak ikeme. (Jobu 42:7) Ubọk yaage si, me mgbọ ebi Ijeren ekido ubọọn̄, Jioba itumu inyi ogwu nriran Samien ibe: “Ìkare owu ke ema ejit. Îre emi ke ema ejit, ibe emi nkayaka ìkikpulu ema.” (1 Sam 8:7) Jisọs si itumu inyi ebi udun̄ kan̄ ibe: “Ebi ido geelek mêcha enyi [ikare mije kinyi, ire,] mije enyi echieekbe me lek n̄a.” (Mat 24:9) Ikakaan̄ inu chi me nkeek motap ubọk inyi ogwu eyi Karais ibe ikime ochak me ata ejit mè ibọkọ mkpukpe onan̄a me lek ime kan̄.—Luk 6:22, 23.
ONYAN̄ IBA 5-11
INU UNYE OTU EWE OKUP ME USEM AWAJI | OKWA ITỌN̄ 1-4
Gobo Agan̄ Ama Ubọọn̄ Awaji
w21.09 15 ¶8
“Mâsisik Otutuuk Ido Geelek”
8 Ike owa ke ebi ene erọ eru ofolek etip yi ni? Owuwa ene kpebọkọ itap. (Fuk Okwa Itọn̄ 2:1-3.) Ebi ido ekinanaan̄ ejit. Ema mijit ibọbọkọ ogwu Jioba ogobobe ibe ire Ogwu Ubọọn̄ itap. Ema kpemun̄ etip ofolek Ama Ubọọn̄ kubọk “ata etip.” Usini ebi mkpulu michit ikwaan̄ ilolook ata etip! Ikerere ibe ke owuwa kiban̄ ekitumu ibe ke ema michieek me lek Awaji, ema kpeweek ijeje inan̄a lek unye ntọ-ikọ kiban̄. Ọmọ orọ, ike ebi mkpulu me mgbọ Jisọs okupbe me inyọn̄ ijọn̄ yi erọbe, ebi mkpulu me chereyi ekikeke ikeme Ogwu Jioba Otọkọbe Aran̄ sa me ikekitutuku ebi udun̄ kan̄ ikigbe utoon̄-ejit.—Ikwaan̄ 4:25-28.
w16.04 29 ¶11
Kamọnọ Agan̄ me Inyọn̄ Ojojot Me Lek Nche Lek
11 Ulọk inu nkaan̄. Ire eji imalek ima mkpọ nkaan̄ kiji, eji mekọt inan̄a irọn̄ mgbọ geelek ekamọnọge agan̄ kiji isinin̄ me ntọ-mkpọ. Ruth, ogwu onan̄a me Malawi imun̄ mkpọ usini ebi bọn ute erọbe me mgbọ etutukube ema me mkpọ obet lek acha 1970. Itumu ibe: “Ema kpeweek itetele ubene ugwem ema ekiluk. Usini kiban̄ migọọk eji inan̄a me ama me mgbọ elapbe eji me ama, ire, ema miyaka inu me ama mè inigọọk itap lek me lek ogbo mkpulu mije, ema kpeweek iluluk ugwem oyọyọt eyi ebi ikup me ere ebi ililibi ekot akọn̄ ekiluk. Ire, owuwa ebi eyi Awaji kpemọnọ agan̄ ikerere ibe ke mkpọ iyọt me lek kiban̄ mè iyaka ire, ke ema michep otutuuk mkpọ kiban̄. —Iburu 10:34.
Week Inu Unye Otu Ewe Okup Me Usem Awaji
it-1 425
Mfufe
Mfufe ire ikpọk okikup me lek akpa, kubọk akpa bali mè wit. Baibul isitumu mkpọ ofolek mfufe, ikire me oniin̄ okeke ichit chieen̄ mkpọ, ire, ikijeen̄ ikwaan̄ isasan̄a mfufe me lek akpa ekirọ me ukot ikaan̄. Mgbọ geelek erọkọbe akpa me uko, ekisan̄a ikpọk chi me lek akpa mije ema kpekup me lek inu geege, kpekirie ema si, ema ire mkpọ ebesasan̄a isan̄a me lek akpa mè iben ifiin̄.
Adasi, mebọn̄ ikpọk chi isan̄a me lek akpa. Esirọ isan̄a, menenikpulu ema itọp ifo inyọn̄, efet moneniben ikpọk cha iwut kubọk ntọn̄. (Kpọ WINNOWING.) Eyi ikijeen̄ ubọk Jioba okisan̄a ebi ataak ijejeen̄ isan̄a me etete ebi usun̄ kan̄ mè ubọk ikisa ijijaka ebi mkpikpak mè ido ebi ikikeke ikeme ọmọ. (Jobu 21:18; Itọn̄ 1:4; 35:5; Asaya 17:13; 29:5; 41:15; Osia 13:3) Ama Ubọọn̄ Awaji mokọk ebi ochicha kan̄ ikpukpuku ire lek efet mokọt iben ema iwut kubọk mfufe akpa.—Dan 2:35.
Mfufe echi ikakup me lek inu geege cha ire echi ekititiin̄ mè ewọp inyi ikayaka iwut igwook me lek akpa echi etitiin̄be. Ubọk yaage si, Jọn ogwu okitap ene me mun̄ itumu mkpọ ofolek mfiat eyi okinu inyi ataak uwu uriaak—Jisọs Karais, Ogwu Okisan̄a Mfufe Me Lek Akpa, motitiin̄ akpa kan̄ itap me uwu isun̄-akpa, “mè ikpulu mfufe cha isi iwọp me emen ukan̄ eyi ìkakiniin̄.”—Mat 3:7-12; Luk 3:17; kpọ THRESHING.
ONYAN̄ IBA 12-18
INU UNYE OTU EWE OKUP ME USEM AWAJI | OKWA ITỌN̄ 5-7
Kweek Nye Kigbe Utoon̄-Ejit Me Ekakpọge Chieen Me Lek Inu Ebi Ofifi Ife Erọbe
w21.03 15 ¶7-8
Ubọk Obosa Ikaan̄ Unye Inan̄a me Ikpa Mbuban
7 Ire ogwu unene kwun̄ mè iyaka ire ogwu ototun̄ ukan̄ kwun̄ iwuuk lek itọbọ owu ilọ ni? Ire ikeya, omokọt ikaan̄ oruru inan̄a me lek igwugwu nkeek ikom me lek Abusolọm gwun̄ Ogwu Ubọọn̄ Debit ogwu oleleke ogwu ute mè iweek ibọbọkọ mkpulu isan̄a ọmọ me ubọk.—2 Sam 15:5-14, 31; 18:6-14.
8 (1) Beek uriaak. Ike okikeek mkpọ ofolek mfufuk yi, tumu nyi Jioba ubọk nnaan̄ erọbe owu ya okupbe owu me lek. (Itọn̄ 6:6-9) Tumu mkpọ echubọk irọ owu. Mè beek Jioba ibe itap ubọk inyi owu omun̄ onineen̄ Baibul echi obokọt itap ubọk inyi owu ike okisa imeme rumurumun̄ yi.
w20.07 8-9 ¶3-4
Chieek Jaan̄ Ibe Ke Owu Okaan̄ Atikọ
3 Ichechieek kiji ikayaka lek imaan̄ me lek ima okup me etete ebi eyi Awaji gaalek. Bak lek keke ni? Mọnọ-nu ibe ke gwun̄ ute ge, mokọt ire ogwu ugane ntitiin̄ mè iyaka ire ogwu okigbọ oniin̄, irọ ijo inu omimin. Mè iyaka ire, gwun̄ ute ge irọ mkpọ onanaan̄ owu ejit. Mè iyaka ire, ene ge inan̄a me ntitiin̄ mè ibene ikitumu ibe ke eji kpekaan̄ atikọ. Ire inu okup ikeya irọ, ire omokaan̄ ntọbọ-ukot mè itele ikekitọbọ ebum inyi Jioba ni? Inu eji ekween̄ ire: Ire ichechieek kwun̄ iyaka imaan̄ me lek mkpọ ebi ofifi ife ekirọ kpan̄asi me lek mgbaan̄je kwun̄ melek Jioba, ichechieek kwun̄ ikponye. Ikare mkpọ echi ikanyege kubọk ubọk mkpọ okikup me lek kwun̄ ke ichechieek kwun̄ eyi okup kubọk uwu oboyaka imaan̄ me lek, ire, iyaka imaan̄ me lek mkpọ onyenye kubọk atikọ mè mkpọ echi ebekọt itet ubọk me lek. Igbe ibe owu gaalek ochieek ojaan̄ ibe ke Baibul iben atikọ ofolek Jioba.—Rom 12:2.
4 Jisọs itumu ibe ke usini ene mebọko atikọ melek “ubelejit,” ire, ema kpebekeke inye mgbọ geelek ichechieek kiban̄ isinin̄ me ntọ-mkpọ. (Fuk Matiyu 13:3-6, 20, 21.) Usini mgbọ, ema kperiọọn̄ ibe ke igọgọọk Jisọs igọbọ ichichichini rumurumun̄ mè uyọt-mkpọ. (Mat 16:24) Mè iyaka ire ema ekikeek ibe ke irere ogwu eyi Karais isibi ibe ke ene ikpobokaan̄ ufialek geege, ke ibokpọkpọ ire ugbana ugbana me kpunube ufialek. Ire, eji mechichini ufialek me ijo inyọn̄ yi. Irek kiji mokọt inwene, eyi obokọt irọ ibe eji ekakaan̄ unwọọn̄ usini mgbọ.—Itọn̄ 6:6; Etip 9:11.
Week Inu Unye Otu Ewe Okup Me Usem Awaji
it-1 995
Udọn̄-ufuun̄
Me ikpa Ebi Rom 3:13, ogwu ikwaan̄ Pọọlu itumu mkpọ ofolek usem okup me ikpa Okwa Itọn̄ 5:9, eyi osa emen ebek ebi mkpikpak isa itọt me lek “udọn̄-ufuun̄ òbobook otu.” Ike ekitap nkwukwu ene mè mkpọ echi ikatanage me emen udọn̄-ufuun̄, ikeya si ke usem obokọt isak ene unan mè usem ikatanage okinan̄a me emen ebek ebi mkpikpak isibi.—Kpọ Mat 15:18-20.
ONYAN̄ IBA 19-25
INU UNYE OTU EWE OKUP ME USEM AWAJI | OKWA ITỌN̄ 8-10
“Jei Jioba, Matọn̄ Owu”!
w21.08 3 ¶6
Mọnọ Irek Kwun̄ me Ototun̄ Ukan̄ Jioba Bene
6 Jioba ineen̄ uwu osisibi esese inyi eji. Ire me ujọn̄ọ ujọn̄ọ mgbọ sabum irombe adasi ogwu enerieen̄ ke Jioba oneen̄ inyọn̄ ijọn̄ yi inyi ebilene. (Jobu 38:4-6; Jeri 10:12) Mije irebe ogwu okakaan̄ ata ejit mè ikichili ubọk, Jioba inyi eji owuwa ata mkpọ ibe eji ekenwọọn̄. (Itọn̄ 104:14, 15, 24) Usini mgbọ, ikigwu nkeek ikom me lek inu irombe ‘mè omun̄ ibe ke inu cha ijaan̄.’ (Ibeb 1:10, 12, 31) Imin ebilene sa me isasa ema “ito me ibot” inu geelek irombe me inyọn̄ ijọn̄. (Itọn̄ 8:6) Nkeek Awaji ire me ebilene ebi isoso ikup enwọọn̄ mè ekekpọ chieen̄ me lek inu echi ọmọ orombe ere mgbọ geelek. Ire okekitọn̄ Jioba mgbọ geelek me lek ata use yi ni?
w20.05 23 ¶10
Ire Omọnọ Inyinyi Awaji Onyibe Owu Ibene Ni?
10 Oniin̄ ge eji ebesa ijeen̄ ibe ke eji mimọnọ inyinyi ikekitumu ikọ ibene ire ikekitumu inu orọrọ eji echieekbe me lek Awaji inyi ebi ikikeek inu orọrọ eji kpechieek me lek njeen̄ obe ke inu geelek ikpọkpọ isibi ikeya. (Itọn̄ 9:1; 1 Pita 3:15) Ebi ikibieen̄ njeen̄ yi inye ekitumu ibe ke inu geelek ikpọkpọ isibi ikeya, ke kpunu ogwu ororom. Eji mekọt isa Baibul mè mkpọ eji ekween̄be me ibot usem keyi isa itumu mkpọ ofolek Nte kiji ogwu okup me emen inyọn̄ inyi ebi iweweek igbagban̄ inu orọrọ eji echieekbe ijaan̄ ibe ke ire Jioba orom inyọn̄ mè ijọn̄.—Itọn̄ 102:25; Asaya 40:25, 26.
w22.04 7 ¶13
Ire Okakijeen̄ Ata Akpat Ukot me “Otu Itumu-Ikọ” Ni?
13 Kisa otutuuk ejit kwun̄ kọt okwa. Mgbọ geelek eji ekikọt okwa me ntitiin̄, okpan okpan inu eji ebekaan̄ me ejit ire itọtọn̄ Jioba. Gwun̄ ute enenwaan̄ ge ekigwen Sara ikimun̄ lek kan̄ kubọk ogwu ikariọọn̄ ikọt okwa. Ire, iweek isasa okwa ikitọn̄ Jioba. Inyi ikọt irọ ikeya, inimun̄ ibe ke ikekineen̄ lek me lek okwa ike ọmọ okineen̄ lek me lek ofifi mkpọ ekikween̄ me nkween̄mkpọ ikitap ubọk inyi ọmọ enenen. Ikikwekween̄ okwa cha, mè osa imumun̄ ubọk usem okup me emen okwa cha osabe itat me lek mkpọ ekitumu mkpọ ofolek. Itumu ibe: Eyi ikitap ubọk inyi emi nketo chieen̄ me lek usem cha kpan̄asi ubọk ida n̄a okitaan̄.
Week Inu Unye Otu Ewe Okup Me Usem Awaji
it-1 832
Otubọk
Usini mgbọ, ekekitumu mkpọ ofolek Awaji kubọk ikisa “otubọk” kan̄ irọ ikwaan̄, kubọk mgbọ igebe Akọp Ikan me inyọn̄ akpakpa ewuuk (Isis 31:18; Ikan 9:10), mgbọ irọbe ikwaan̄ ukechieen̄ (Isis 8:18, 19), mè mgbọ ikirom akpabin inyọn̄ (Itọn̄ 8:3). Mfufuk okup me ikpa Ibebene ikijeen̄ ibe ke mgbọ geelek ekitumu mkpọ ofolek “otubọk” Awaji ofolek inu nrom, ke ire ekwukwu mbuban ke ekitumu mkpọ ofolek, kubọk mgbọ etumube ibe ke ekwukwu Awaji (ruʹach, “spirit”) ije me inyọn̄ isi mun̄. (Ibeb 1:2) Ire, Ikpa Mbuban Agan̄ Esabe Usem Giris Ige itap ubọk inyi eji egobo usem yi etet, mfufuk Matiyu itumu ibe ke Jisọs ikisa unye ekwukwu mbuban ikisa ilap ebi ijo ekwukwu isibi me emen ene, me mgbọ eyi Luk obe ke ikisa “[otubọk Awaji, NW ]” irọ ikeya.—Mat 12:28; Luk 11:20.
ONYAN̄ IBA 26–ONYAN̄ ITA 3
INU UNYE OTU EWE OKUP ME USEM AWAJI | OKWA ITỌN̄ 11-15
Kimun̄ Lek Kwun̄ me Aya Inyọn̄ Esuuk Eyi Awaji
w06 5/15 18 ¶3
Ikpakpa Isibi Inu Okup Me Ikpa Okwa Itọn̄
11:3—Atà ijọn̄ echi owa ojijaka isan̄a? Ire atà ijọn̄ eyi ubọk iluk ugwem ebilene okupbe me inyọn̄, orere ikan, ntọ-ubọk mè ubọk ekisa ikaan̄ unen oyerebet. Mgbọ geelek atà chi isijijaka, ufialek ikiwawa me ere, ebi ene si kpeyaka ikikaan̄ unen oyerebet. Me mbet lek irek okup ikeya, “ebi eyi Awaji” metoon̄ ọmọ ejit me lek.—Okwa Itọn̄ 11:4-7.
wp16.4 11
Ire Inyọn̄ Eyi Kpunube Afa Ifet Ni?
Baibul ichieek use ibe ke Awaji mosan̄a afa isan̄a me inyọn̄ ijọn̄ yi sọnja mgbọ. Inyọn̄ keyi ojot me lek afa ikikup ikpọ “Usen Oyerebet Awaji . . . mgbọ ìbokpan̄ ebi ekariọọn̄ge ọmọ.” (Pita Eyi Òso Iba 3:5-7) Ebi afa kpebeyaka ikirọ ibe ebi ofifi ene ekesak ofara. Ike owa ke eji esa iriọọn̄ ibe ke Awaji morọ mkpọ isasa isan̄a afa isan̄a ni?
Baibul ibe ke Awaji ‘íchacha ene geelek okima afa’. (Okwa Itọn̄ 11:5) Ogwu Orom ima esuuk mè unen oyerebet. (Okwa Itọn̄ 33:5; 37:28) Eya orọ, ikpobotele ibe ebi afa ekup ere mgbọ geelek.
w17.08 6 ¶15
Ire Obem Lek Ikakat Ejit Ikikup Ikpọ Ni?
15 Keke orọ Debit okọtbe ikat ejit ikikup ikpọ ni? Inyi ufọọk-otu me emen okwa yaage eyi idobe ibe: “Ìre kpa mgbọ?” mè iyaka ire “Isi ire mgbọ owa?” Itumu ibe: “Utoon̄-ejit n̄a ìkup me lek imumechieen̄ mgbọ geelek kwun̄; ubelejit n̄a ìre ubọk okinyan̄a emi isibi mgbọ geelek. Jioba, mâkọt okwa itọn̄ owu, mije owu orọ inu ijaan̄ me lek n̄a.” (Itọn̄ 13:5, 6) Debit itoon̄ ejit me lek ima Jioba eyi okigbe utoon̄-ejit. Isa me unwọọn̄ ikikup ikpọ unyan̄a kan̄, mè ikikeek ubọk Jioba osabe irọ inu ijaan̄ me lek kan̄. Iin̄, Debit iriọọn̄ ibe ke ime kan̄ ikpochep me ikike.
kr 236 ¶16
Ama Ubọọn̄ Awaji Morọ Nkeek Awaji me Inyọn̄ Ijọn̄
16 Utelelek. Me ota kan̄, usem okup me ikpa Asaya 11:6-9 morọ iso me irek anam akpalek. Ebirieen̄, ebibaan̄, mè nsabọn mekup me utelelek me ere geelek ema esibe me inyọn̄ ijọn̄ yi. Kpunu inu geege, mè ire anam sa ire ebilene oboyaka isak ene geege unan. Keek-nu ubọk ibokup me mgbọ obomun̄ otutuuk ere me linyọn̄ yi kubọk uwu kwun̄, ere obokọt igwọk me emen okwaan̄ mè okolo geelek; ije me ere okup ogoon̄ ogoon̄; mè ije me emen oron geelek me kpunube inu geege obosak owu unan. Mgbọ geelek egwe isifit, okpobofieek owot. Usem okup me ikpa Ijikien 34:25 morọ iso ire lek ebi eyi Awaji ‘melukbe me emen èwê, mè ilaak me oron me utelelek.’
Week Inu Unye Otu Ewe Okup Me Usem Awaji
w13 9/15 19 ¶12
Ire Onwene Ubọk Okisa Ikeek Inu Ni?
12 Ire mkpọ nsan ibe ke ebi ene me chereyi ekirọ mkpọ ike Pọọlu okpabe. Ema ekikeek ibe ke igọgọọk nteme mè ikan ire inu oninin̄ oka mè iyaka ire ikup gban̄. Owuwa ebi ijejeen̄ mè uga mè ute ekikeek mkpọ ubọk yaage mè ikitumu ibe ke ene geelek mokọt irọ mkpọ ike imabe. Ema ekimun̄ ibe ke inyọn̄ ikinwenwene, ke kpunu inu geege obobia ikeya. Ikerere owuwa ebi ikitumu ibe ke ema miriọọn̄ Awaji ekikeek ibe ke ema mikaan̄ unen irọrọ inu geelek ema ekeekbe ibe ke itat, ke ikakup ufiak ibe eji esiki ibot enyi Awaji mè egọọk ikan kan̄. (Itọn̄ 14:1) Eru yi mokọt ikaan̄ mgbaan̄ me lek ata ebi eyi Karais. Ebi kpekup me ugwọk chieen̄ mekọt ibene ikimun̄ ikwaan̄ ntitiin̄ me oniin̄ okup ikeya. Ema kpebema ikekigọọk ntọ-ubọk ntitiin̄ mè ibene ikinunu ofolek mkpọ geelek ema kpema. Mè iyaka ire ema mekọt ibene ikikaan̄ cheche ofolek nteme oyaka lek imaan̄ me lek Baibul ofolek inu ekisa inwọọn̄ lek, ubọk ebekisa irọ mkpọ me emen efet mè isisi uwu ikpa ilile.