Ikpa Okikpa Nkween̄mkpọ Ugwem Mè Ikwaan̄ Kiji Kubọk Ebi Eyi Karais
© 2023 Watch Tower Bible and Tract Society of Pennsylvania
ONYAN̄ ITA 4-10
INU UNYE OTU EWE OKUP ME USEM AWAJI | OKWA ITỌN̄ 16-17
“Jioba Okinyi Emi Ata Inu Geelek”
w18.12 26 ¶11
Ebi Ijija, Enyi Mekọt Ikaan̄ Ugwem Onwọnwọn
KAAN̄ ATA UNENE
11 Fuk Okwa Itọn̄ 16:3. Debit iriọọn̄ ubọk ebesa ikaan̄ ata unene. Ikikaan̄ “ubelejit” me eden̄ ebi imama Jioba. Ema ire “ebi ata ife,” ema ekukup me utana me eru, mè ikirọ mkpọ otatat. Ofifi ogwu okwa ige ofolek ebi igobobe kubọk ebi unene kan̄ ibe: “Emi ìre unene melek ebi geelek ìkimin owu, mè ebi geelek ìkirọ inu owu otọbe.” (Itọn̄ 119:63) Ike eji emun̄be me ibot usem oraraka, eji si mekọt ikaan̄ owuwa ata unene me etete ebi ikitet ukpook mè ikisiki ibot inyi Jioba. Eyi igọbọ ebi ikup esese esese acha.
w14 2/15 29 ¶4
“Kimun̄ Uja Jioba”
Debit ikọt ibe Jioba, “owu ke ngobo inyi lek n̄a; ònu-me-isi ugwem n̄a ìkup me ubọk kwun̄. Owu orọ ugwem n̄a ijaan̄; owu onyi emi ata inu geelek nsabe ikiluk ugwem òtotop.” (Itọn̄ 16:5, 6) Debit ijeen̄ itọn̄ me lek inu ikaan̄be, orere, ata mgbaan̄je kan̄ melek Jioba mè irek ilile ikaan̄be ikekitọbọ ebum inyi ọmọ. Kubọk Debit, eji mekọt ikibọkọ ukwook, ire, eji mikaan̄ owuwa ugbana me irek emen ekwukwu! Eya orọ, kè eji ekup enye ekekaan̄ unwọọn̄ me ata ntọbọ-ebum mè ekekpọ uwu mbuban eyi emen ekwukwu kè Jioba me lek unwọọn̄ mgbọ geelek.
w08 2/15 3 ¶2-3
To Jioba Me Isi Kwun̄ Mgbọ Geelek
2 Otutuuk kiji mekọt ikween̄ mkpọ inan̄a me lek mfufuk ebi emalek itumu mkpọ ofolek me emen Baibul, kubọk Ebereyam, Sera, Mosis, Rufu, Debit, Esita, ogwu ikwaan̄ Pọọlu mè ebi ofifi ene. Ire, mfufuk ebi kpemalek itumu mkpọ ofolek si mokọt irọ eji oruru. Ikekigwu nkeek ikom me lek inu Baibul otumube mokọt itap ubọk inyi eji erọ mkpọ ike ogwu okwa otumube: “Chieen̄ n̄a ìgwuun̄ me lek Jioba mgbọ geelek; eyi ọmọ okukup me agan̄ ubọk ulom n̄a, ukot n̄a ìnyenye me ijọn̄.” (Itọn̄ 16:8) Ike owa ke eji ebesa igobo usem chi itet?
3 Ogwu akọn̄ ikimalek isa ubọk agan̄ ulom kan̄ itet oge akọn̄, eyi ikirọ ibe agbọ ibenbe me ubọk agan̄ ujit kan̄ ikachit agan̄ ulom ya. Ire, mokaan̄ mbem ire ogwu unene kan̄ ikitim akọn̄ me agba lek kan̄. Ire eji ikikaan̄ Jioba me nkeek kiji mè ikirọ nkeek kan̄, ọmọ mobem eji. Ọmọ orọ, kè eji ekpọ-nu ubọk ikwekween̄ mfufuk Baibul obokọt irọ ibe ichechieek kiji inye, inyi eji mekọt ikito Jioba me isi kiji mgbọ geelek.
Week Inu Unye Otu Ewe Okup Me Usem Awaji
it-2 714
Ukwuuk Chieen̄
Esi isa usem Iburu ʼi·shohnʹ (Ikan 32:10; Urọk 7:2), irọ mkpọ melek usem ʽaʹyin (chieen̄), ikisibi “sontiik gwun̄ enerieen̄ okup me chieen̄”; ubọk yaage si, misa bath (gwun̄ enenwaan̄) irọ mkpọ me ikpa Okwa Ito 2:18 eyi osibi “sontiik gwun̄ enenwaan̄ okup me chieen̄,” usem iba chi ikitumu mkpọ ofolek ukwuuk chieen̄ ene. Esa ema igbaan̄ irọ mkpọ me ikpa Okwa Itọn̄ 17:8 isa igon aban me lek mkpọ ekitumu (ʼi·shohnʹ bath-ʽaʹyin), isibi “sontiik gwun̄ enerieen̄, enenwaan̄ okup me chieen̄” (“pupil of the eyeball,” NW ). Usini mgbọ, mokọt ire ibe ikitumu mkpọ ofolek sọntiik ogugo ene okijeen̄ me ere ya me chieen̄ ofifi ene.
Chieen̄ ire mkpọ okup ufen ufen, ikigwat lek iriọọn̄ mgbọ mkpọ onin̄be emen kan̄; ikirọriọọn̄ si mgbọ sọntiik ijeek mè iyaka ire mfuun̄ onin̄be emen kan̄. Agan̄ okup okwuket me lek chieen̄ (ekigwen cornea) okichit ukwuuk chieen̄ ire eyi ebegbagbala chieen̄ ikpọ, mije, ire unan ge ire lek mè iyaka ire ikayaka ikitoon̄ mije orukan̄, mokọt irọ ibe ene ikayaka ikimọọn̄ inu ijaan̄ mè iyaka ire ikana nnaan̄. Ire mije ubọk chieen̄ osa ikup ufiak ire ke Baibul osa usem “ukwuuk chieen̄ kwun̄” irọ mkpọ me mgbọ ikitumu mkpọ ofolek inu eji ebekisa me ugbalachieen̄ ibem. Ubọk eji ebekimọnọ ikan Awaji ire eya si. (Urọk 7:2) Ofolek ubọk Jioba okisa ikpọ chieen̄ me lek ebi Ijeren kubọk ire ute, ikpa Ikan Òso Mgbọ Iba 32:10 itumu ibe ke Jioba ikibem ema kubọk “ukwuuk chieen̄ kan̄.” Debit ibeek ibe Awaji ibem ọmọ ike ikibem “ukwuuk chieen̄” kan̄. (Itọn̄ 17:8) Ikiweek ibe Jioba igwat lek irọ mkpọ isa itap ubọk inyi ọmọ mgbọ geelek ebi ochicha esinu ọmọ me lek. (Kpọ si Jek 2:8; ere esabe usem Iburu ba·vathʹ ʽaʹyin, “ukwuuk chieen̄,” irọ mkpọ.)—Kpọ EYE.
ONYAN̄ ITA 11-17
INU UNYE OTU EWE OKUP ME USEM AWAJI | OKWA ITỌN̄ 18
“Jioba Ore . . . Ogwu Òkinyan̄a Emi Isibi”
w09 5/1 14 ¶4-5
Ire Ogobo Itet Usem Echi Okekeke Ichit Chieen̄ Mkpọ Esabe Irọ Mkpọ Me Emen Baibul Ni?
Baibul si ikisa Jioba itọt me lek mkpọ echi ikakiluk ugwem. Etumu mkpọ ofolek kan̄ kubọk “Ewuuk ebi Ijeren,” “ewuuk,” mè “uwu mgban akọn̄.” (Samien Eyi Òso Iba 23:3; Okwa Itọn̄ 18:2; Ikan Òso Mgbọ Iba 32:4) Ike owa ke Jioba osa ibet lek inu chi? Ike ikpele ewuuk okikeke inye, ikakisisik, ikeya si ke Jioba obokọt ire ere ikput-lek onyenye isa inyi owu.
5 Ikpa Okwa Itọn̄ ijojot me lek usem okijeen̄ esese esese eru kè Jioba. Kubọk inu njeen̄, Okwa Itọn̄ 84:11 itumu mkpọ ofolek Jioba kubọk ura mè agbọ mije, ire ọmọ ke utoon̄, ugwem, efuuk, mè mbem okinan̄a me ubọk. Okwa Itọn̄ 121:5 ibe ke Jioba “ore ogwu òkibem owu; ọmọ ìkukup me agba lek kwun̄ ikikwek owu lek.” Ike ere ekiniin̄ ikwek lek obokọt ibem owu inan̄a me lek ura, Jioba mokọt ibem ebi ikitọbọ ebum inyi ọmọ me mgbọ ufialek, mè ilet ema me irak “ubọk” mè iyaka ire “uwop” kan̄.—Asaya 51:16; Okwa Itọn̄ 17:8; 36:7.
it-2 1161 ¶7
Ida
Awaji ikinọ ida ebi usun̄ kan̄. Ebi geelek ikitọbọ ebum inyi Awaji me ekwukwu mè atikọ mekọt igwen Awaji me unye-ejit ibe ke ikekinọ ida kiban̄ me ekakpọge chieen̄ me lek ida usem ema ekisa igwen ọmọ. Ofifi si, ikerere ibe ke ene ikatumu usem isibi me mgbọ ikiriaak uriaak inyi Awaji, Awaji ogwu orọriọọn̄ mkpọ okup ene me ejit, ikinọnọ. (Itọn̄ 66:19; 86:6; 116:1; 1 Sam 1:13; Neyem 2:4) Awaji ikinọnọ ida ebi ikifieek ejit ikitaan̄ ukpo iweek ntap-ubọk kan̄, ikinọ si ida mè ikiriọọn̄ nkeek ebi ikikup ikeme ọmọ mè ikitọt ijo inu ikeme ebi usun̄ kan̄.—Ibeb 21:17; Itọn̄ 55:18, 19; 69:33; 94:9-11; Jeri 23:25.
w22.04 3 ¶1
Ubọk Obokọt Ikime Sasaak
2. Gwu nkeek kom. Ike okikeek mkpọ ofolek ugwem kwun̄ me mgbọ oraraka, ire omokọt ikeek ufialek ge okọtbe ime mije Jioba otapbe ubọk inyi owu ni? Eji esikikeek ubọk Jioba okisa ikpọ eji chieen̄ me lek, mè ubọk isabe ikpọ chieen̄ me lek ebi usun̄ kan̄ me mgbọ oraraka, eji mikikaan̄ unye me emen kiji mè ikikaan̄ si utoon̄-ejit onyenye me lek kan̄. (Itọn̄ 18:17-19) Ogwu ugane ntitiin̄ ge ekigwen Joshua itumu ibe: “Nkaan̄ ikpa nkisa ige uriaak n̄a echi Jioba ofọọkbe. Eyi ikirọ ibe nkekeek mgbọ mbeekbe Jioba ọkpọkpọ inu ge eyi inyibe emi inu nweekbe.” Iin̄, mgbọ geelek eji esikikeek mkpọ echi Jioba owuuk lek irọ inyi eji, eji ekekikaan̄ aya efuuk isasa itim igak sasaak.
Week Inu Unye Otu Ewe Okup Me Usem Awaji
it-1 432 ¶2
Ogwu mbem emen inyọn̄ (Cherub)
Ema kpere ubọk ikwaan̄ osasak mè ikaan̄ uwop ike inu ekọkọ ebi ido kpekitọbọ ebum inyi Awaji ikukup ikana ebi Ijeren ekiriaak ike usini ene ekitumu. Igọọk me lek inu otutuuk ebi Ju me ukot ikaan̄ echieekbe (Baibul ikatumu inu geege ofolek inu yi) ebi mbem emen inyọn̄ chi ekup kubọk ebilene. Ema ire inu esabe ubọk irọ ojajaan̄ okekeke ichit chieen̄ ebi osat Jioba ikakaan̄ umin mè uja, erọ ema si “igọọk” me lek ubọk Jioba ojeen̄be Mosis. (Isis 25:9) Ogwu ikwaan̄ Pọọlu ikpa mkpọ ofolek kiban̄ kubọk ebi mbem emen inyọn̄ iba ikakaan̄ umin iwele uwop kiban̄ ichit ogboon̄ nsan. Ekimalek itumu mkpọ ofolek ebi mbem emen inyọn̄ (cherubs) esikitumu mkpọ ofolek isi kè Jioba: “Îre me inyọn̄ ogboon̄ nsan ya, me etete ebi mbem iba cha, ke mâkikup ichichini melek kwun̄.” (Isis 25:22; Ifuk 7:89) Ọmọ orọ, ekitumu mkpọ ofolek Jioba kubọk ikwekweek “irek me inyọn̄ [mè iyaka ire, me etete] ebi mbem emen inyọn̄.” (1 Sam 4:4; 2 Sam 6:2; 2 Ubọọn̄ 19:15; 1 Mfuf 13:6; Itọn̄ 80:1; 99:1; Asaya 37:16) Ebi cherub ekeke ichit chieen uji akọn̄ eyi Jioba okikọp (1 Mfuf 28:18), uwop kiban̄ si ikibem mè ikirọ ibe iwulu ugwat ugwat. Ọmọ orọ, me okwa kan̄, Debit ikpa ubọk Jioba okisa igwat lek itap ubọk inyi ọmọ kubọk “ebi mbem emen inyọn̄ eben ọmọ iwulu inu” mè iyaka ire ke ire “efet ore uwop òkikọp ọmọ iwulu ije.”—2 Sam 22:11; Itọn̄ 18:10.
ONYAN̄ ITA 18-24
INU UNYE OTU EWE OKUP ME USEM AWAJI | OKWA ITỌN̄ 19-21
“Akpabin Inyọn̄ Òkitumu Ibe Awaji Mimin”
w04 1/1 8 ¶1-2
Kè Otutuuk Ene Etumu Umin Jioba Esibi
DEBIT, gwun̄ kè Jesi imin isibi kubọk ogwu okpukpo arọọn̄ me agba lek Beteleyem. Owuwa mgbọ, ira ikikpọ emen inyọn̄ ntoronyan̄ ojotbe me ejit eririeen̄ ike ikikpọ chieen̄ me lek arọọn̄ ogwu ute me ere arọọn̄ cha ekitaka mbubet! Me kpunube cheche, ira ikikeek inu cha mgbọ igebe ata utop okwa okup me ikpa Okwa Itọn̄ ibot akọp mè onaan̄ge inan̄a me unye ekwukwu mbuban. Ige ibe: “Akpabin inyọn̄ òkitumu ibe Awaji mimin; akpa isinyọn̄ òkijeen̄ ubọk ikwaan̄ kan̄ isibi utoon̄. Ire, ida kiban̄ îtaan̄ iso otutuuk linyọn̄; enọnọ ikọ kiban̄ me ntutun̄ ere geelek me linyọn̄.”—Okwa Itọn̄ 19:1, 4.
2 Akpabin inyọn̄ okup uyeke uyeke eyi Jioba orombe ikitumu umin kan̄ isibi ikarek mè eririeen̄ geelek ikerere ibe ke ikakitumu usem, ikakisan̄a amọn, kpekinọnọ ida kan̄ si. Inu nrom ikukup inye ikitumu umin Awaji isibi, ikekikeek ubọk ida kiban̄ okitaan̄ “iso otutuuk linyọn̄” inyi otutuuk ene emun̄ ikirọ ibe eji esiki lek. Ire, ata-ikọ inu nrom eyi kpekisa utọn̄ inọ chi ikaso. Mitap efuuk me owot ebilene igbegbe utoon̄-ejit ibe egọọk esa ida kiban̄ eketumu umin Jioba esibi. Inan̄a me unye eyi ekwukwu mbuban, ogwu okọt ge kpebak erieen̄ itumu inyi ebi ikigbe utoon̄-ejit ikitọbọ ebum inyi Awaji ibe: “Ìnyi Jioba umin; ìtumu ìnyi Jioba ibe ke unye ìre eyi kan̄. Ìnyi Jioba umin ògbegbe erieen̄ kan̄.” (Okwa Itọn̄ 96:7, 8) Ebi geelek ikakaan̄ ata mgbaan̄je melek Jioba ekisa me ubelejit ikirọ eyi. Keke ke inyinyi Jioba umin ogọbọ?
w04 6/1 11 ¶8-10
Inu Nrom Ikitumu Umin Awaji Isibi!
8 Debit ikpa ofifi inu Awaji orombe eyi okukup uyeke uyeke. Ige ibe: “Me akpa isinyọn̄ ke Awaji osun̄ uwu inyi ura olukbe, inyi ikinan̄a isibi me ewelegwe me ubelejit, kubọk ogwu òdo nwa ayaya okinan̄a me agwut isibi, mè ikibele ejit kubọk ogwu ifan̄a ekot òbolibi ekot kan̄. Ura ìkibum me agba isinyọn̄ agan̄ ge, mè ikije isaba itoon̄ me agan̄ keyilọ; kpunu inu geege uyok kan̄ ìkakire lek.”—Okwa Itọn̄ 19:4-6.
9 Ire esa itọt me lek owuwa ntoronyan̄, ura ikamalek imin. Ire, ikup uyeke uyeke enenen, imin igak otutuuk inu okigba iyak ikana ọmọ. Ikpa ge itumu ibe ke ura ilobo igak inyọn̄ ijon̄ yi mkpọ oraraka efit obop ita mè akọp obop ita. Eyi isibi ke ura olobo ichit me lek otutuuk mkpọ okigba iyak ikana ọmọ! Unye okinan̄a me lek kan̄ ikitele ibe inyọn̄ ijọn̄ yi ikigba iyak ikana ọmọ me mkpọ ojọjọn̄ọ ere iso akọp efie mile onaan̄ge mè ita [orere, efit efie kilometer ge mè akọp go] me ikponan̄a me ere ikupbe. Ire eche unye okinan̄a me lek ura itap me ego irek, ire okpọkọ me lek irek ge gaalek okire inyọn̄ ijọn̄ yi, ire, eya ikem isasa irọ ibe ugwem ikije inyi isi.
10 Ogwu okọt itumu mkpọ ofolek ura kubọk “ogwu ifan̄a ekot” okilibi inan̄a me agan̄ ge me ewelegwe mè otap efuuk me eririeen̄ me emen “agwut.” Mgbọ geelek ura isikinin̄, isa inyi ogwu okup me inyọn̄ ijọn̄ yi ikikpọ, ikup kubok ikinin̄ emen “agwut,” kubọk ibosi itap efuuk. Me ewelegwe, ikikup kubọk ikinan̄a isibi me ubelejit “kubọk ogwu òdo nwa ayaya okinan̄a me agwut isibi.” Kubọk ogwu okpukpo arọọn̄, Debit iriọọn̄ ubọk eririeen̄ okisa itọọk ire. (Ibebene 31:40) Ikikeek si ubọk utoon̄ ura okisa iyok ọmọ lek mè ijọn̄ okukup ikana ọmọ. Isibi utoon̄ ibe ke lek ikawọ ọmọ mije ije ijebe inan̄a mè agan̄ mbum-ura isi ire agan̄ ichep-ura, ire, kubọk “ogwu ifan̄a ekot,” ikukup me mbem-lek iyayaka ibene ije kan̄.
g95 11/8 7 ¶3
Ogwu Ororom Mkpọ Ekpọbe Chieen̄ Ilọ Me Lek Ichit me Mgbọ Kiji
Ikekijeen̄ itọn̄ me lek ujuja mkpọ eji ekimun̄ ikana eji motap ubọk inyi eji eneriọọn̄ Ogwu Orom kiji, ogwu ororom si otutuuk inu geelek okup ikana eji. Me mgbọ ge, Jisọs itumu inyi ebi udun̄ kan̄ ibe ekpọ ajakajak otu oron okitibi me Galili. Ibe: “Ìkpọ-nu ubọk ajakajak otu oron okitibi, mè ikijaan̄ lek. Ema kpekisi ikwaan̄, kpekilọk ekwut. Ire, ǹkitumu inyi enyi ibe ke ogwu ubọọn̄ Solomọn me lek kan̄, me otutuuk òrirọ kan̄, ìkakọt ìbala lek ìsoon̄ ge me lek ajakajak otu oron chi, ubọk geelek îminbe mè ibọọn̄ ubọọn̄ enenen.” (Matiyu 6:28, 29) Ubọk ajakajak otu oron ikike okisa ijaan̄ ire mokọt ikeek eji ibe ke Awaji ikaan̄ ulọk me lek ufialek ebilene.
Week Inu Unye Otu Ewe Okup Me Usem Awaji
it-1 1073
Iburu, II
Ire, ikaan̄ ubọk ekisa ige okwa eyi osisibi esese eyi agan̄ òso iba ikakpọkpọ ikitumu chieen̄ mkpọ yaage okup me agan̄ adasi mè iyaka ire itumu eyi ntikwo kan̄. Kpan̄asi ikeya, ikikpakpa iwele mè otap ayaya mkpọ me lek. Ikpa Okwa Itọn̄ 19:7-9 ire inu njeen̄ ge:
Ikan Jioba ìjajaan̄ isan̄a;
ìkinyi ene aya efuuk me emen.
Ata-ikọ Jioba îgbe inu etoon̄be ejit me lek;
ìkirọ ogwu ikakaan̄ge iriọọn̄-inu ikana ogwu òriọọn̄ inu.
Ikọ Jioba otọbe, ìtatat ikup;
ìkisa unwọọn̄ ijet ebi ìkirọ inu cha;
Inyinyi ida Jioba onyibe, ìnenen;
ìkigwuku ene chieen̄.
Itetet ukpook me lek Jioba, ìkakaan̄ okpa me lek,
ìbokukup ire mgbọ geelek;
Oyerebet Jioba okifieek, ìkikekeke,
ìkinenen isan̄a kpai.
Taba iman̄ ibe ke ire agan̄ òso iba me lek usem cha okirọ ibe nkeek okup me ere cha iso; otutuuk ere Baibul cha ire isasa esese mkpọ iba igbaan̄ ichọk. Ire agan̄ òso iba kubọk “ìkinyi ene aya efuuk me emen” mè “ìkirọ ogwu ikakaan̄ge iriọọn̄-inu ikana ogwu òriọọn̄ inu,” okirọ ibe ogwu okifuk iniriọọn̄ ike ‘ikan ya osabe ijaan̄ isan̄a’ mè ubọk ‘Ata-ikọ Jioba ogbe inu etoon̄be ejit me lek.’ Me usem Ebeke, ekigwen inu yi rhythmic break. Ọmọ orọ, ikerere ibe ke okwa ya ikaan̄ agan̄ iba, ekineneen̄ otutuuk usem cha ubọk yaage, ogwu okifuk si mogobo itet mkpọ inu ọmọ okifuk ya osibi. Bak lek eyi, usini mgbọ, me usem Ebeke, ekigwen ubọk ekisa ineen̄ usem cha formal or constructive parallelism.
ONYAN̄ ITA 25-31
INU UNYE OTU EWE OKUP ME USEM AWAJI | OKWA ITỌN̄ 22
Baibul Ikpa Mkpọ Ofolek Mkpa kè Jisọs
w11 8/15 15 ¶16
Ema Mimun̄ Ogwu Mesaya!
16 Ebi ene mekikeek ibe ke Awaji ijujuuk ogwu Mesaya itele. (Fuk Okwa Itọn̄ 22:1.) Igọọk me lek nriran yi, “mgbọ òfuk-mgbọ osulube ita ya, Jisọs otataan̄ ukpo ibe, ‘Elọi Elọi, lama sabatani?’ eyi osisibi, ‘Awaji n̄a, Awaji n̄a, ìre keke orọ ojitbe emi itele?’ ” (Mak 15:34) Ikare ibe ke Jisọs ikaya ikaan̄ ichechieek me lek Nte kan̄ ogwu okup me emen inyọn̄. Awaji ijuuk Jisọs itele inyi ebi ochicha kan̄ sa me isasan̄a mbem Kan̄ inyi etọ igbegbe utoon̄-ejit Karais ekpọ me ojot ojot. Sa me itataan̄ ukpo ikeya, Jisọs irọ iso inu okup me ikpa Okwa Itọn̄ 22:1.
w11 8/15 15 ¶13
Ema Mimun̄ Ogwu Mesaya!
13 Debit iben nriran ibe ke metumu ijo usem inyi ogwu Mesaya. (Fuk Okwa Itọn̄ 22:7, 8.) Mitumu ijo usem inyi Jisọs mgbọ ikisak ofara me inyọn̄ uti, Matiyu ige ibe: “Ebi ìkije iraka me ere ya ekekitọp ibot, mè ikichak ọmọ, mè ikitumu ibe: ‘Owu ogwu òbe ke ọmọ môgbugbọ Uwu Mbuban ito, mè isa egwe ita gaalek ikpọk inama isan̄a, nyan̄a lek kwun̄ ma! Nan̄a me inyọn̄ uti . . . ya sibi ijọn̄ nu, ire me atikọ ke owu ìre Gwun̄ Awaji.’ ” Ubọk yaage si ebi ibot ngwugwa, ebi ijeen̄ ikan mè ebi ugane ama misa ọmọ irọ ochak mè itumu ibe: “Înyan̄a ebi ofifi ife, ire, ìkakọt inyan̄a lek kan̄. Ọmọ ogwu òrere ogwu ubọọn̄ ebi Ijeren, inan̄a me inyọn̄ uti . . . isibi ijọn̄ nu, inyi eji echieek me lek kan̄. Ọmọ ìtoon̄ ejit me lek Awaji. Awaji ya îtoon̄be ejit me lek ininyan̄a ọmọ ma, ire Awaji iweek ọmọ. Ke ọmọ ìkigugo lek ibe, ‘Emi ìre Gwun̄ Awaji.’ ” (Mat 27:39-43) Ire, Jisọs ikat ejit ime otutuuk inu chi. Eyi ichubọk ire ata akpat ukot isa inyi eji!
w11 8/15 15 ¶14
Ema Mimun̄ Ogwu Mesaya!
14 Meroon̄ nriroon̄ me lek ofọnti ogwu Mesaya. Ogwu okọt ige ibe: “Ema mîche ekwut ichit-lek n̄a inyi lek kiban̄, mè iroon̄ nriroon̄ me lek ofọnti n̄a.” (Itọn̄ 22:18) Mkpọ orọrọ ire eya si, mije “mgbọ [ebi akọn̄ Rom] egonbe ọmọ [Jisọs] isan̄a, ema eneniroon̄ nriroon̄ isasa iriọọn̄ ubọk ebesa iche ofọnti kan̄ cha inyi lek kiban̄, mè isa me ikeya iche ofọnti kan̄ isan̄a.”—Mat 27:35; fuk Jọn 19:23, 24.
Week Inu Unye Otu Ewe Okup Me Usem Awaji
w06 11/1 29 ¶7
Ikekijeen̄ Ulibi me lek Mgbaan̄-Ntitiin̄ Kiji Okup Me Mbuban
7 Owuwa oniin̄ ọmọ owa echi eji ebekisa ijeen̄ ulibi me lek mgbaan̄-ntitiin̄ kiji. Oniin̄ ge ire ikukup me mgbọ ekikọt okwa. Owuwa me lek okwa cha ire echi egebe kubọk uriaak, igbe si ibe ekekọt me lek ulibi. Me mgbọ ikitumu mkpọ okup me ikpa Okwa Itọn̄ 22, ogwu ikwaan̄ Pọọlu ige ofolek Jisọs ibe: “Emi mâtumu owu isibi inyi ebi ngwan̄ n̄a, mâkọt okwa itọn̄ owu me isi otutuuk ebi ntitiin̄.” (Ebi Iburu 2:12) Eya orọ, eji ekemun̄ ibe ke eji mikweek irek sabum ogwu ibot ikasi onogwen okwa mè eto nkeek kiji me lek mkpọ usem okup me emen okwa cha osibi. Kè ubọk eji ekisa ikọt okwa ikijeen̄ ibe ke ikup me lek kiji ike ikupbe me lek ogwu okwa ogwu ogege ibe: “Emi mâtọn̄ Jioba me otutuuk ejit n̄a; mâtọn̄ ọmọ me ere ebi kan̄, ebi ata irọrọ, etitiin̄be.” (Okwa Itọn̄ 111:1) Iin̄, ikekikọt okwa isa ikitọn̄ Jioba ore ibot ibot inu ge oborọ ibe eji ekenu nkween̄mkpọ me ata mgbọ mè ekup mege ota.
w03 9/1 20 ¶1
Tọn̄ Jioba ‘Me Ere Ebi Eyi Kan̄ Etitiin̄be’
Ike ikupbe me ukot ikaan̄, me chereyi, mikaan̄ ndọmọ eyi ebi eyi Karais ge ge ebekọt isa ikpa ichechieek kiban̄ me emen ntitiin̄. Irek ge eyi okukup inyi otutuuk ene ire inyinyi ufọọk-otu isa inyi idodo ekido ebi ikigban̄. Kakikpọ chieen̄ ilọ me lek ata mkpọ ufọọk-otu chi obokọt isan̄a isibi. Kubọk inu njeen̄, ufọọk-otu eyi okijeen̄ ubọk ebekọt isa itim igak ufialek ikirọ ibe ntumu-mfieek ebi bọn Nte kiji isasa onineen̄ Baibul isa irọ mkpọ inye. Ufọọk-otu okikpa iwele mkpọ okup me Baibul okup me ere ekikween̄ ire, kpege isibi mè iyaka ire okikpa mkpọ ene omun̄be mgbọ ikikween̄ mkpọ agaga motap ebi ofifi ife efuuk me owot ibe ekaan̄ ata eru ikwekween̄ mkpọ.
ONYAN̄ INI 1-7
INU UNYE OTU EWE OKUP ME USEM AWAJI | OKWA ITỌN̄ 23-25
“Jioba Ore Ogwu Okikpukpo Emi Kubọk Ekikpukpo Arọọn̄”
w11 5/1 31 ¶3
“Jioba Ore Ogwu Okikpukpo Emi Kubọk Ekikpukpo Arọọn̄”
Jioba okisa arọọn̄ kan̄ ije. Ire kpunu ogwu okikpukpo ema me agba lek kiban̄, arọọn̄ mokọt ichep. Ubọk yaage si, eji miweek ntap-ubọk isasa imun̄ oniin̄ onwọnwọn me ugwem. (Jerimaya 10:23) Debit ibe ke ire Jioba okisa ebi kan̄ isi ere “njijoon̄ mbubet okupbe” mè “ere ukot mun̄ òkekeke.” Ikisa ema ije “me oniin̄ eyi ata irọrọ.” (Agba eyi 2, 3) Mbet lek ere okup ikeyi ikirọ ibe ejit kiji inye ibe ke eji mekọt itoon̄ ejit me lek Awaji. Sa me ikekigọọk ntọ-ubọk ekwukwu mbuban ike ikupbe me emen Baibul, eji mekọt iluk ugwem okinyi ene ujot-owot, isiki-efuuk, mè utelelek.
w11 5/1 31 ¶4
“Jioba Ore Ogwu Okikpukpo Emi Kubọk Ekikpukpo Arọọn̄”
Jioba okibem arọọn̄ kan̄. Ire kpunu ogwu okikpukpo ema me agba lek kiban̄, arọọn̄ ekitetet ukpook, kpekiriọọn̄ si inu ema eberọ. Jioba itumu inyi ebi kan̄ ibe ekatet ukpook ikerere me mgbọ ema ekije me “emen iteke òdudun”—mgbọ okikup kubọk mgbọ odudun̄ ichit me ugwem ene. (Agba eyi 4) Jioba ikikpọkpọ chieen̄ me lek kiban̄, ikikukup me mbem-lek itatap ubọk inyi ema. Mokọt inyi ebi usun̄ kan̄ iriọọn̄-inu mè unye ema eweekbe isasa ije itibi ufialek.—Ebi Filipai 4:13; Jemis 1:2-5.
w11 5/1 31 ¶5
“Jioba Ore Ogwu Okikpukpo Emi Kubọk Ekikpukpo Arọọn̄”
Jioba okinyi arọọn̄ kan̄ inorie. Arọọn̄ ekiyaka lek imaan̄ me lek ogwu okikpukpo ema ibe iweek inorie inyi ema. Eji si mikaan̄ ufiak emen ekwukwu eyi Jioba gaalek obokọt itap ubọk inyi eji ekpọ chieen̄ me lek. (Matiyu 5:3) Inwọn enenen ibe ke Jioba Awaji ogwu okichili ubọk, ineen̄ ibe ebi usun̄ kan̄ ekaan̄ owuwa inorie emen ekwukwu. (Agba eyi 5) Baibul mè ikpa echi okitap ubọk inyi eji egobo Baibul etet, kubọk mbet lek ikpa yi okifuk ire ge me lek inorie emen ekwukwu echi okikpọ chieen̄ me lek ufiak eji ekaan̄be irọriọọn̄ ibot ibot ugwem mè nkeek Awaji isa inyi eji.
Week Inu Unye Otu Ewe Okup Me Usem Awaji
w11 2/15 24 ¶1-3
Sa Otutuuk Ejit Kwun̄ Ma Ata Irọrọ
INAN̄A ME LEK Usem kan̄ mè ekwukwu mbuban kan̄, Jioba ikisa ebi eyi kan̄ ije me “oniin̄ eyi ata irọrọ.” (Itọn̄ 23:3) Ire, bak me lek eji kpeso, eji mekọt ikije ida ibọkọ me oniin̄ ya. Ikọkọt ikiyaka irọ mkpọ otatat iweek efuuk. Keke obotap ubọk inyi eji ekọt erọ ni? Kubọk Jisọs, eji ebemama irọrọ mkpọ otatat.—Fuk Okwa itọn̄ 45:7.
2 Keke ore “oniin̄ eyi ata irọrọ”? Oniin̄ ire ere ebi ene ekije. Ire onineen̄ ata irọrọ Jioba okitap ubọk inyi ebi ene eriọọn̄ oniin̄ ya. Usem Iburu mè Giris ekababe “ata irọrọ” isibi mkpọ “otatat,” orere, iluluk igọọk onineen̄. Mije Jioba orebe “ere nluk eyi ata irọrọ,” ebi usun̄ kan̄ ekisasa me ubelejit ikikpọ ọmọ ibe itumu oniin̄ otatat ema ebegọọk.—Jeri 50:7.
3 Ire gaalek inan̄a me isasa otutuuk ejit kiji ikiluk igọọk onineen̄ ata irọrọ Awaji ke eji eberọ ibe ejit kan̄ ibele. (Ikan 32:4) Eyi ibobene inan̄a me lek ikwekween̄ otutuuk mkpọ geelek eji eriọọn̄be ofolek Jioba inan̄a me emen Usem kan̄ Baibul. Ike eji ekikween̄ mkpọ ofolek kan̄ mè ikitaba lek iriaak me lek kan̄ egwe geelek, ikeya ke eji ebekima ata irọrọ. (Jemis 4:8) Eji si mebọkọ ntọ-ubọk okinan̄a me emen Usem Awaji itap mgbọ geelek eji esiberọ ntumu-mfieek okukup ufiak me ugwem.
ONYAN̄ INI 8-14
INU UNYE OTU EWE OKUP ME USEM AWAJI | OKWA ITỌN̄ 26-28
Ubọk Debit Osa Irọ Inyi Igbegbe Utoon̄-Ejit Kan̄ Inye
w04 12/1 14 ¶8-9
Je me Oniin̄ eyi Igbegbe Utoon̄-Ejit
8 Debit ibeek uriaak ibe: “Jioba, roon̄ emi kpọ, mè jeen̄ ibe ke ǹkarọ ìlọ; wọlọ emen ejit n̄a mè ekiket n̄a si kpọ.” (Okwa itọn̄ 26:2) Ukwuk-anaan̄ ikikup me emen emen akpalek ene. Ikeke ichit chieen̄ mkpọ okup me ijọn̄ ijọn̄ ejit ene mè inu ene okikeek. Ejit ore otutuuk inu ene orebe, eyi igọbọ inu okibieen̄ ene ibe irọ mkpọ, ubọk mkpọ okikup ene me lek mè iriọọn̄-inu ikaan̄be. Me mgbọ Debit obeekbe Jioba ibe iwọlọ ọmọ ikpọ, ikibeek ibe iwọlọ ekiket kan̄ mè ubọk inu okikup ọmọ me lek ikpọ.
9 Debit ibeek ibe Awaji iwọlọ ukwuk-anaan̄ mè ejit kan̄ ikpọ. Ike owa ke Jioba okisa iwọlọ inu okup me emen kiji ikpọ? Debit ikọt ibe: “Mâtọn̄ owu Jioba, ogwu òkinyi emi nteme; ikerere eririeen̄, ejit n̄a ìkinyi emi nteme kwun̄.” (Okwa itọn̄ 16:7) Keke ke eya osibi? Isibi ibe ke nteme Awaji ikirere ijọn̄ ijọn̄ ejit kè Debit mè obia me ere ya, ikineen̄ nkeek kan̄ mè ubọk inu okikup ọmọ me lek isun̄. Mokọt ikup ikeya me lek kiji si ire eji esa me unwọọn̄ ikigwu nkeek ikom me lek nteme echi Awaji okisa Usem kan̄, ebi ikekeke ichit ichieen̄ kan̄, mè ntitiin̄ kan̄ ikinyi eji mè itele ibe nteme cha ibia me ejit kiji. Ikekibeek Jioba me uriaak mgbọ geelek ibe ikiwọlọ eji ikpọ ikeyi motap ubọk inyi eji ekeje me oniin̄ eyi igbegbe utoon̄-ejit.
w04 12/1 15 ¶12-13
Je me Oniin̄ eyi Igbegbe Utoon̄-Ejit
12 Ofolek ofifi mkpọ eyi orọrọ ibe igbegbe utoon̄-ejit kan̄ inye, Debit ibe: “Ǹkakigbaan̄ ìrie melek ebi ofiaan̄; ǹkabagbaan̄ ije si melek ebi isi iba. Ncha igọgọọk ebi ijo irọrọ ije ogbo; m̀baje si agan̄ agan̄ me lek ebi ikpak.” (Okwa itọn̄ 26:4, 5) Ikare gaalek ibe ke Debit ikakigọọk ebi mkpikak ikweek irek. Ichacha ijo mgbaan̄je.
13 Eji ye? Ire eji ekekijit igọgọọk ebi ofiaan̄ ikweek irek inan̄a me mkpọ ekirọ me emen TV, fidio, ogugo, emen efet mè iyaka ire ofifi ofifi oniin̄ ni? Ire eji ekekida lek isan̄a me lek ebi isi iba ni? Usini ebi melek kiji ekisi uwu ikpa mè iyaka ire ikwaan̄ mekọt ikiweek irere ebi unene kiji mije mkpọ ikanwọnge. Ire eji michubọk iweek irere unene melek ebi kpekije me oniin̄ atikọ eyi Awaji ni? Ebi ataak ijejeen̄ mekọt ikifiaan̄ irọ kubọk ema ire ata ife mè ikilet inu ema echubọk ire me emen efet me nkeek isasa itaba eji isan̄a me lek ntọbọ-ebum Jioba. Ire usini ebi ikup me ntitiin̄ ekiluk ugwem isi iba ye? Ema si ekilet inu ema erebe. Jayson, ogwu okitap ubọk inyi ebi ugane ntitiin̄, ikaan̄ mbet lek unene okup ikeya me mgbọ ikupbe ijija. Ofolek ene ge me lek ebi unene cha, itumu ibe: “Usen ge, ene ge me lek kiban̄ itumu inyi emi ibe: ‘Inu geelek eji erọbe me mgbọ keyi ikakup ufiak mije mgbọ geelek aya inyọn̄ isinu, eji ebekwakwaan̄ ita. Eji kpeberiọọn̄ mè ire eji mekichep mkpọ ge.’ Mbet lek usem okup ikeya obobook emi chieen̄. Nkaweek ikwukwu mgbọ geelek aya inyọn̄ isinu.” Jayson isa me iriọọn̄-inu itaba lek kan̄ isan̄a me lek ebi ikup ikeya. Ogwu ikwaan̄ Pọọlu itaba eji ubọk me utọn̄ ibe: “Ikachieek ibe ene geege ifiaan̄ enyi, ‘Ijo otu ogbo, ìkekifiat ata ugwem.’ ” (Ebi Korint Eyi Adasi 15:33) Ikup ufiak ibe eji ekejit ijo mgbaan̄je!
w04 12/1 16 ¶17-18
Je me Oniin̄ eyi Igbegbe Utoon̄-Ejit
17 Atanga Chinichini melek ntook ekisa igwa ngwugwa me emen ore okpan okpan ere ekitọbọ ebum inyi Jioba me Ijeren. Me mgbọ ikitumu ubọk ọmọ osabe inwọọn̄ ere ya, Debit itumu ibe: “Jei Jioba, mma Uwu Mbuban kwun̄ ere ujamgbugbo kwun̄ okupbe.”—Okwa itọn̄ 26:8.
18 Ire okekima ikekigọọk igbaan̄ ititiin̄ me ere ekikween̄ mkpọ ofolek Jioba ni? Uwu Ntitiin̄ Ama Ubọọn̄ geelek melek mkpọ ekikween̄ me emen mgbọ geelek ore okpan okpan ere ekitọbọ ebum inyi Jioba me ama geelek. Isọkọ me lek si, eji mikikaan̄ chinichini ilile, chinichini sekut. “Ida ata-ikọ” Jioba ire echi ekikpa me chinichini chi. Ire eji ikween̄ imama ‘ida ata-ikọ chi enenen,’ eji mekikaan̄ uyok uyok ejit isisi nkween̄mkpọ mè ikiriọọn̄ ubọk igban̄ utọn̄ mgbọ eji ekupbe me ere ya. (Okwa itọn̄ 119:167) Ikitop enenen ikukup me etete ebi bọn nte kiji ebi ikakaan̄ ulọk me lek mkpọ okibọkọ irek me ugwem kiji mè ikitap ubọk inyi eji ekup me oniin̄ eyi igbegbe utoon̄-ejit!—Ebi Iburu 10:24, 25.
Week Inu Unye Otu Ewe Okup Me Usem Awaji
w06 7/15 28 ¶15
Jioba Okinyan̄a Ebi Ekirọ Ikeme
15 Ogwu okwa Debit ikọt ibe: “Nte n̄a mè nga n̄a mêkọt ijit emi itele, ire, Jioba mômọnọ emi ikpukpo.” (Okwa itọn̄ 27:10) Ikikat eji ejit enenen irọriọọn̄ ibe ke ima Jioba imin igak ima uga mè ute geelek! Ikerere ibe ke monaan̄ owu ire nga kwun̄ mè nte kwun̄ ejit owu mè iyaka ire erọ owu me lek, eya ikakaan̄ mgbaan̄ me lek ubọk Jioba okisa ikpọ owu chieen̄ me lek. (Ebi Rom 8:38, 39) Kawuuk ibe ke Jioba ikitaba ebi imabe inu me lek kan̄. (Jọn 3:16; 6:44) Me ekakpọge chieen̄ me lek ubọk ebi ene esa irọ owu me lek, Nte kwun̄ ogwu okup me emen inyọn̄ ima owu!
ONYAN̄ INI 15-21
INU UNYE OTU EWE OKUP ME USEM AWAJI | OKWA ITỌN̄ 29-31
Nkan̄-Inu—Ikijeen̄ Ima Awaji
it-1 802 ¶3
Isi
‘Ilelet isi’ mokọt isibi esese esese inu igọọk me lek irek. Jioba ilelet isi kan̄ owuwa mgbọ ikisibi ibe ke ikayaka ikijeen̄ ene nnwọn-isi mè iyaka ire itap ubọk inyi ene ya. Eyi mokọt ire bak me lek mkpaka-ibot ene ya mè iyaka ire ife cha, kubọk ebi Ijeren. (Jobu 34:29; Itọn̄ 30:5-8; Asaya 54:8; 59:2) Usini mgbọ, mokọt isibi ibe ke Jioba ikajeen̄ lek kan̄ sa me irọrọ mkpọ mè iyaka ire ifọfọọk ene otu, ikikup ikpọ mgbọ otatat. (Itọn̄ 13:1-3) Mgbọ Debit obeekbe ibe, “Soso, kpọ chieen̄ lọ me lek otutuuk ijo inu nrọbe,” ikibeek Awaji ibe itele mè iyaka ire ilet isi kan̄ me lek nrọ-nlọ kan̄.—Itọn̄ 51:9; sa tọt me lek Itọn̄ 10:11.
w07 3/1 19 ¶1
Kan̄ Ubelejit Ike Okikup Ikpọ Jioba
Mekọt isa ubọk nkan̄-inu Jioba okisa irọ eji oruru itọt me lek ike mfut uti okikan. Ofolek nkan̄-inu okinan̄a me ubọk Awaji, Baibul ibe: “Ebi geelek ìkwekween̄ inu inan̄a me lek osusut cha mîkikaan̄ mkpukpe eyi ugwem ata irọrọ, mè esuuk.” (Ebi Iburu 12:11) Ike ikibọkọ mgbọ sabum mfut uti onoren̄e, ikeya si, mobọkọ mgbọ sabum eji enwene eru kiji ofolek kpokpo Awaji okinyi eji. Kubọk inu njeen̄, ire eji erọ inu ge eyi orọrọ ibe eji echep usini irek me ntitiin̄, eji ikukup me mbem-lek ikukup ikpọ Jioba morọ ibe eji ekachieek ibe efuuk ita eji me owot mè iyaka ire ekawọ lek. Me mbet lek irek okup ikeya, usem Debit ogebe inan̄a me unye ekwukwu mbuban ikitap eji efuuk me owot: “Unaan̄-ejit [Awaji] ìkire mgbidim mgbọ gaalek; ire, ata ejit kan̄ ìkikup ire otutuuk mgbọ me ugwem ene; ene môkọt ito ito me eririeen̄, ire, me ewelegwe kan̄, mônwọọn̄ unwọọn̄.” (Okwa itọn̄ 30:5) Ire eji ikaan̄ eru ikekikup ikpọ mè ikisa nteme onan̄a me emen Usem Awaji mè ntitiin̄ kan̄ irọ mkpọ me ugwem kiji, mgbọ “unwọọn̄” kiji monu.
w21.10 6 ¶18
Keke Ore Ata Ngwu-Nkom?
18 Isasa ijeen̄ ibe ke ọmọ ichubọk igwu ikom, ogwu esan̄abe me ntitiin̄ mokinu nkween̄mkpọ ntitiin̄ mgbọ geelek, mè ikigọọk nteme ebi ugane ntitiin̄ ofolek ikekiriaak uriaak mè ikekikween̄ mkpọ. Motap efuuk si ijijit irek geelek oboyaka isa ọmọ ifo lek ijo inu irọbe ya. Ire ikitap efuuk isasa iyaka ineen̄ mgbaan̄je kan̄ melek Jioba isun̄, mokọt ikaan̄ unye-ejit ibe ke Jioba motele inyi ọmọ, ke ebi ugane ntitiin̄ si meyaka ibọkọ ọmọ itap me ntitiin̄. Mgbọ geelek ema esikigọọk ogwu orọrọ ilọ irọ mkpọ, ebi ugane ntitiin̄ ekirọ igọọk me lek irek ene ya, ema si ekijijit ikekifieek ene oyerebet unye unye.
Week Inu Unye Otu Ewe Okup Me Usem Awaji
w06 5/15 19 ¶13
Inu Ekpabe Ofolek Adasi Ikpa Okwa Itọn̄
31:23—Ike owa ke ekisa ikpe ogwu ugumulek mkpukpe itoon̄ urot? Mkpukpe ekitumu mkpọ ofolek me ere yi ire osusut. Ogwu ata irọrọ ikibọkọ mkpukpe kan̄ me lek ijo inu echi ikagen ibak irọ mgbọ geelek Jioba isinyi ọmọ nkan̄-inu. Eyi irebe ibe ke ogwu ugumulek ikakigwu ikom me lek ijo inu ikirọ, osusut kan̄ ikimimin enenen.—Urọk 11:31; Pita Eyi Adasi 4:18.
ONYAN̄ INI 22-28
INU UNYE OTU EWE OKUP ME USEM AWAJI | OKWA ITỌN̄ 32-33
Keke Orọ Eji Ebekpa Isibi Ijo Inu Eji Erọbe?
w93 3/15 9 ¶7
Nsan Kè Jioba Okinyan̄a Eji Isibi Me Emen Ufieejit
7 Ire eji irọ ijo inu omimin ikeme Awaji, mokọt iyọt eji me lek ikpakpa isibi ikerere isa inyi Jioba. Keke obotap ubọk inyi eji me irek okup ikeya? Me ikpa Okwa Itọn̄ 32, Debit itumu ibe: “Mgbọ nkafukge ijo n̄a, lek n̄a ìtatak ita bak me lek ito nkito egwe geelek. Ikarek mè eririeen̄, osusut [Jioba] îyok emi akpa; unye n̄a ìtata inọọn̄, kubọk inwan̄ ekirika otababe mun̄ ichat me lek.” (Agba eyi 3, 4) Isasa ilelet ijo inu kan̄ mè ikekeme ejit kan̄ okifieek ọmọ ikọ irọ ibe efuuk ita me owot Debit me mgbọ irọbe ilọ. Ufieejit irọ ibe unye kan̄ ita inọọn̄ kubọk uti ekirika otaba mun̄ ichat me lek. Iin̄, usini mgbọ, inu yi mokọt ikikaan̄ mgbaan̄ mè ekiket mè akpalek kan̄. Ubọk geelek irebe, ikayaka ikaan̄ unwọọn̄. Ire ene geelek melek kiji imun̄ lek kan̄ me mbet lek irek okup ikeya, keke ke iborọ?
cl 262 ¶8
Awaji Ogwu Okukup Me “Mbem-Lek Itetele Ijo Inu Inyi Ene”
8 Me mgbọ igwube ikom, Debit ibe: “Ntumu ijo n̄a ikpọk mbum inyi owu, ikeya si, ǹkalet nje-nlọ n̄a me lek kwun̄. . . . Owu otetele otutuuk ijo n̄a inyi emi.” (Okwa itọn̄ 32:5) Usem ekababe “otetele” ire usem Iburu eyi osisibi “ibebene ifo inyọn̄” mè iyaka ire “ibeben.” Ike esabe irọ mkpọ me ere yi, isibi ibeben “ijo inu, mè nrọ-nlọ” isan̄a. Iyaka ibet lek Jioba ibebene ijo inu Debit ifo inyọn̄ mè iben isan̄a. Me kpunube cheche, eyi irọ ibe ufieejit Debit okikaan̄ mije ijo inu irọbe igele. (Okwa itọn̄ 32:3) Eji si mekọt ikaan̄ utoon̄-ejit onyenye ibe ke Awaji ikibeben ijo inu ebi ikiweek ntele-nnyi kan̄ mije ichechieek ema ekaan̄be me lek ngwugwa mkpenwene kè Jisọs isan̄a.—Matiyu 20:28.
w01 6/1 30 ¶1
Ikpakpa Ijo Isibi Ikisa Igwagwa Inu
Mgbọ Debit okpabe ijo kan̄ isibi, ikayaka ikimun̄ lek kan̄ kubọk ogwu ikakup me lek inu geege. Usem kan̄ okup me okwa echi igebe ofolek ikpakpa ijo inu irobe isibi, ijeen̄ utelelek ikaan̄be irọrọ ikeya mè ntumu-mfieek kan̄ ikukup inye ikigbe utoon̄-ejit inyi Jioba. Kpọ-nu inu njeen̄ ge, me ikpa Okwa itọn̄ 32. Agba eyi 1 itumu ibe: “Kpọ-nu uga ubelejit òkup inyi ene ya ogwu Jioba otelebe nje-nlọ kan̄ inyi; ogwu Jioba ochitbe ijo kan̄.” Me ekakpọge chieen̄ me lek ubọk ijo ya osabe imin ire, ene mokaan̄ ubelejit ire ichubọk igwu ikom inan̄a me ijọn̄ ijọn̄ ejit kan̄. Oniin̄ ge ebesa ijeen̄ eyi ire ibọbọkọ itap ibe ke eji mirọ ijo inu, ike Debit orọbe. (Samien Eyi Òso Iba 12:13) Ikasa inwọnwọn lek kan̄ ikọ me isi Jioba mè iyaka ire isa ifefieek ebi ofifi ife ikọ. Agba eyi 5 ibe: “Ntumu ijo n̄a ikpọk mbum inyi owu, ikeya si, ǹkalet nje-nlọ n̄a me lek kwun̄; ǹtutumu ibe ke mâkpa nrọ-nlọ n̄a inyi Jioba, owu otetele otutuuk ijo n̄a inyi emi mè imọnọ si ufieejit òje me lek isan̄a emi me lek.” Isasa otutuuk ejit ene ikpa ijo inu ene orọbe isibi ikinyi ene utelelek, morọ ibe ene ya ikayaka ikifieek ejit mije ijo inu irọbe iraka.
Week Inu Unye Otu Ewe Okup Me Usem Awaji
w06 5/15 20 ¶1
Inu Ekpabe Ofolek Adasi Ikpa Okwa Itọn̄
33:6—Keke ore “efet” otu kè Jioba? Efet yi ire ekwukwu mbuban Awaji eyi isabe irom akpabin inyọn̄ mè inu echi okup me emen. (Ibebene 1:1, 2) Ekigwen ekwukwu mbuban efet otu kè Jioba mije mokọt iria ibe irọ ikwaan̄ me ere ojọjọn̄ọ ere.
ONYAN̄ INI 29–ONYAN̄ GO 5
INU UNYE OTU EWE OKUP ME USEM AWAJI | OKWA ITỌN̄ 34-35
“Kitọn̄ Jioba Mgbọ Geelek”
w07 3/1 22 ¶11
Kè Eji Egbaan̄ Ekemin Erieen̄ Jioba
11 “Mâkitọn̄ Jioba mgbọ geelek; otu n̄a ìkporiaan̄ ere ikekitọn̄ ọmọ.” (Okwa itọn̄ 34:1) Kubọk ogwu erieen̄be inan̄a me ama, Debit ira ikaan̄ owuwa ufiak eyi anam akpalek, ire, ike usem chi ojeen̄be, ikatele ibe sasaak ofolek mkpọ ibokirie inan̄a me usen ire usen imin igak ntumu-mfieek kan̄ itọtọn̄ Jioba. Eyi ichubọk ire ata akpat ukot isa inyi eji mgbọ geelek eji esikichichini irek oyọyọt! Ire eji ikup me uwu ikpa, ere ikwaan̄, melek ebi bọn ute mè iyaka ire me uko, inu obokup eji me ufiak ichit ire itọtọn̄ Jioba. Keek-nu owuwa inu orọrọ eji ebebak lek irọ ikeya! Kubọk inu njeen̄, kpunu uyaka me lek inu eji ebekọt ikween̄ mè inwọọn̄ me lek inu nrom. Kpọ si inu ikisa ntitiin̄ kan̄ eyi okup me inyọn̄ ijọn̄ irọ! Ikerere ibe eji kpeso, Jioba isa ebi usun̄ kan̄ ikigbe utoon̄-ejit isa ikirọ ikpele ikwaan̄ me mgbọ keyi. Ike owa ke ikwaan̄ Jioba okikup ire esa itọt me lek ikwaan̄ ebi ebi ene ekimin kubọk Awaji me inyọn̄ ni? Ire okagọọk Debit ichieek me mgbọ igebe ibe: “Jioba, kpunu awaji geege ebi ofifi ido ekiriaak òbet lek kwun̄; kpunu si ikwaan̄ ema erọbe òbet lek echi owu orọbe”?—Okwa itọn̄ 86:8.
w07 3/1 22 ¶13
Kè Eji Egbaan̄ Ekemin Erieen̄ Jioba
13 “Mâsa Jioba igugo lek; ebi ekitutuku mênọ, mè ibele ejit.” (Okwa itọn̄ 34:2) Debit ikasa inu geege irọbe isa igugo lek. Kubọk inu njeen̄, ikagugo lek mije ubọk isabe ifiaan̄ ogwu ubọọn̄ Gat. Iriọọn̄ ibe ke ire Jioba obem ọmọ mgbọ ikupbe me Gat, ke ire sa me ntap-ubọk kè Jioba ke ọmọ onwọnọ. (Urọk 21:1) Eya orọ, Debit ikasa lek kan̄ igugo lek, kpan̄asi ikeya, ikisa Jioba igugo lek. Eyi itaba ebi ikisiki lek inu me lek Jioba. Jisọs si imin erieen̄ Jioba, eyi si itaba ebi isisiki lek inu me lek Kan̄. Me chereyi, ebi ikisiki lek inan̄a me otutuuk linyọn̄ yi mekinu ntitiin̄ ebi eyi Karais ebi ekenbe aran̄, ntitiin̄ eyi Jisọs orebe Ogwu Ibot. (Ebi Kọlọsi 1:18) Ejit ebi ikisiki lek chi ikibebele mgbọ geelek ema esinọ erieen̄ Awaji okakaan̄ umin me otu ebi usun̄ kan̄ ikisiki lek mè mgbọ geelek ema esinọ etip onan̄a me emen Baibul, eyi ekwukwu mbuban gaalek obokọt irọ ibe ema egobo etet.—Jọn 6:44; Ikwaan̄ 16:14.
w07 3/1 23 ¶15
Kè Eji Egbaan̄ Ekemin Erieen̄ Jioba
15 “Nriaak ọmọ, inọnọ uriaak n̄a, mè inyan̄a emi me ubọk ebi nkifieek owot me lek.” (Okwa itọn̄ 34:4) Mfufuk yi ikup ufiak inyi Debit enenen. Ọmọ orọ itumube ibe: “Emi ogwu ugbọọn̄ keyi ntaan̄ ukpo igwen Jioba, inọnọ, mè inyan̄a emi isibi me otutuuk uyọrọlek n̄a.” (Okwa itọn̄ 34:6) Eji esikigọọk bọn ute irọ mkpọ, eji mikikaan̄ owuwa irek isasa ikpa mfufuk obokọt itap ene efuuk me owot ofolek ubọk Jioba osabe itap ubọk inyi eji ekọt eme. Eyi morọ ibe ichechieek ebi bọn Nte kiji inye, ike usem Debit orọbe ibe ichechieek ebi ikigọọk ọmọ inye. Isa inyi Debit, ebi ikigọọk ọmọ “ebene chieen̄ ikpọ utoon̄ kan̄ [Jioba] ototoon̄ ikana ema lek; esip geege ìkakup me isi kiban̄.” (Okwa itọn̄ 34:5) Ikerere ibe ema ekilibi ekot mije Ogwu Ubọọn̄ Sọọlu, ema kpetet esip. Ema mikaan̄ unye-ejit ibe ke ire Awaji okibieen̄ Debit inye, isi kiban̄ si ikitotoon̄. Ubọk yaage ge si me chereyi, ebi inu ntitiin̄ ayaya mè ebi itọtọbọ ebum inyi Jioba me owuwa acha, ekikpọ Jioba ibe itap ubọk inyi ema. Eyi irebe ibe ke ema gaalek mimun̄ ubọk Jioba osabe itap ubọk inyi ema, isi kiban̄ echi okitoon̄ ikijeen̄ ntumu-mfieek kiban̄ ikukup inye ikigbe utoon̄-ejit.
Week Inu Unye Otu Ewe Okup Me Usem Awaji
w06 5/15 20 ¶2
Inu Ekpabe Ofolek Adasi Ikpa Okwa Itọn̄
35:19—Keke ke isibi me mgbọ Debit obeekbe ibe Awaji ikachieek ibe ebi ochicha kan̄ ekebe ọmọ? Ikekebe ene mokọt ikijeen̄ ibe ke ebi ochicha Debit mekikaan̄ unwọọn̄ mije ibe ke ijo otitọt kiban̄ ofolek Debit okije ijaan̄. Ọmọ orọ Debit obeekbe ibe mbet lek inu okup ikeya ikarọ.