Ikpa Okikpa Nkween̄mkpọ Ugwem Mè Ikwaan̄ Kiji Kubọk Ebi Eyi Karais
© 2024 Watch Tower Bible and Tract Society of Pennsylvania
ONYAN̄ GO 6-12
INU UNYE OTU EWE OKUP ME USEM AWAJI OKWA ITỌN̄ 36-37
“Kasisaak Lek Kwun̄ Bak Me Lek Ebi Ikpak”
w17.04 10 ¶4
Keke Obonan̄a Me Mgbọ Ama Ubọọn̄ Awaji Isinu?
4 Ike owa ke ebi mkpikpak ekisa ikaan̄ mgbaan̄ me lek kiji me mgbọ keyi? Eyi itumube isan̄a ibe ke “me mgburudun̄ mgbọ, ufialek òmimin enenen môkup,” ogwu ikwaan̄ Pọọlu ige inan̄a me ekwukwu mbuban ibe: “Ebi ikpak mè ebi ofiaan̄ cha merọriọọn̄ ikifiat igak ubọk ema ekupbe.” (2 Tim 3:1-5, 13) Ire omun̄ usem nriran chi okirọ iso ni? Owuwa kiji miwuuk lek irọn̄ inin̄ me ubọk ebi mkpikpak chi, kubọk ebi nnaan̄, ebi ochicha ejit, mè ebi inọ afa. Usini kiban̄ ire ebi ikirọ mkpikpak ikpọk mbum, mè mgbọ usini kiban̄ ekirọrọ ilet mè ekefiaan̄ erọ kubọk ema ire ata ife. Ikerere ibe ke kperọrọ nnaan̄ me lek kiji, inu ebi mkpikpak cha ekirọ ikikaan̄ mgbaan̄ me lek kiji. Ikifieek eji ejit enenen mgbọ geelek eji esinọ inu ikpak ema ekirọ. Ike ema ekirọ nnaan̄ me lek asasa nsabọn, ebi inin̄ ugane mè ebi kpekaan̄ unye, ikitap eji ukpook me emen. Ebi mkpikpak ekirọ mbet lek eru anam, mè eyi ebi ijo ekwukwu. (Jemis 3:15) Ejit ibele eji ibe ke Usem kè Jioba iben ata etip isasa itim igak ijo etip cha.
w22.06 10 ¶10
Jioba Ikigbana Ebi Ikitele Inyi Ene
10 Itetet unaan̄-ejit me ejit mokọt isak eji unan. Jioba iweek ibe eji ekaan̄ utelelek eyi okinan̄a me lek isasan̄a unaan̄-ejit me ejit. (Fuk Ebi Efesọs 4:31, 32.) Itumu inyi eji ibe: “Kpebe lek me lek unaan̄-ejit, mè tele uyok uyok unaan̄-ejit.” (Itọn̄ 37:8) Iriọọn̄-inu ọmọ owa me lek igọgọọk nteme ya. Itetet unaan̄-ejit me ejit mokọt isak eji unan me anam akpalek mè nkeek kiji. (Urọk 14:30) Eji itetet unaan̄-ejit me ejit ikpobokaan̄ mgbaan̄ geege me lek ogwu orọrọ eji ijo inu ya, kubọk ire eji enwọ mkpọ okikpan̄ ene ikpobokaan̄ mgbaan̄ me lek ogwu orọrọ eji ilọ. Kpan̄asi ikeya, mgbọ geelek eji esitele inyi ebi ofifi ene, eji ekirọ lek kiji ata inu. (Urọk 11:17) Eji mekaan̄ esuuk me ejit, mè ikup inye me ikwaan̄ kiji isa inyi Jioba.
w03 12/1 13 ¶20
“Tele Jioba Ire Ibot Ibot Inu Òkibele Owu Ejit”
20 Mgbọ ya, “ebi ìkirọ inu esuuk esuuk ebekaan̄ ijọn̄.” (Itọn̄ 37:11a) Ire ebi owa ere “ebi ìkirọ inu esuuk esuuk”? Usem ekababe “esuuk esuuk” isibi “ebi ekirọ ikeme, ebi ikisiki lek, ebi ekirọ inu esip.” Iin̄, “ebi ìkirọ inu esuuk esuuk” ire ebi ikisiki lek ikikup ikpọ Jioba ibe inen̄e ijo inu ekirọ ema isun̄. Ema meluk “me esuuk ikirie utop.” (Itọn̄ 37:11b) Ikerere me mgbọ keyi, ema mekinwọọn̄ ikpele esuuk me emen paradais eyi emen ekwukwu orere, ntitiin̄ ata ebi eyi Karais.
Week Inu Unye Otu Ewe Okup Me Usem Awaji
it-2 445
Ogoon̄
Ikekeke inye, ibabia ifiin̄, mè iyaka ire ubene. Ekimalek itumu mkpọ ofolek ogoon̄ kubọk inu okikeke inye mè ibia ifiin̄. (Asaya 54:10; Abak 3:6; sa tọt me lek Itọn̄ 46:2.) Ọmọ orọ, mgbọ ogwu okọt okitumu ibe ke ata irọrọ Jioba ibet lek “ikpele ogoon̄” (Itọn̄ 36:6) mokọt ire ibe ke ikitumu ubọk ata irọrọ Jioba okisa ikeke inye. Mè iyake ire, eyi irebe ibe ke ogoon̄ ikibebene, mokọt ikijeen̄ ibe ke ata irọrọ kè Jioba ibene enenen igak eyi ebilene. (Sa tọt me lek Asaya 55:8, 9.) Ofolek igwogwook inu okup me emen okwa jaaba eyi unaan̄-ejit Awaji, ikpa Ichichili 16:20 itumu ibe: “Otutuuk ikpele ogoon̄ geelek onininiin̄ ita isan̄a kpai, kpeyaka imun̄ geege.” Eyi ikijeen̄ ibe ikerere mkpọ echi obebene kubọk ogoon̄ ikpobokọt ilibi inwọnọ unaan̄-ejit Awaji.—Sa tọt me lek Jeri 4:23-26.
ONYAN̄ GO 13-19
INU UNYE OTU EWE OKUP ME USEM AWAJI OKWA ITỌN̄ 38-39
Kayaka Imalek Ifieek Ejit Iraka Ubọk
w20.11 27 ¶12-13
“Tet Chieen̄ Kwun̄ Tat” me lek Mgbọ Okup Me Isi
12 Fuk Jọn Eyi Adasi 3:19, 20. Ene ifefieek ejit mije ijo inu irọbe ikalọ. Kubọk inu njeen̄, usini ene mikifieek ejit mije inu ema erọbe sabum ema enikween̄ atikọ. Ebi ofifi ene ekekifieek ejit mije inu ema erọbe eyi ema ekaan̄be ntap-me-mun̄ isan̄a. Ene mokọt ifieek ejit mije inu chi. (Rom 3:23) Atikọ ibe ke eji mikiweek irọrọ mkpọ otatat. Ire, “otutuuk kiji mîkirọ ilọ me owuwa oniin̄.” (Jemis 3:2; Rom 7:21-23) Ikerere ibe ke eji kpekinwọọn̄ ikekifieek ejit mije ijo inu eji erọbe, irọrọ ikeya mokọt irọ eji ata mkpọ. Ike owa ni? Ifefieek ejit mije ijo inu eji erọbe ikalọ, mokọt ibieen̄ eji ibe enen̄e inu eji erọbe ya esun̄ mè etumu efieek ibe ke eji kpebeyaka irọ ijo inu ya.—Iburu 12:12, 13.
13 Me ofifi ubọk, ene mokọt iyaka ifieek ejit iraka ubọk—eyi isibi ene ikukup inye ikifieek ejit me lek ijo inu ikerere me mgbọ igwube ikom, Jioba ojejeen̄ si ibe ke itele inyi ọmọ. Mbet lek ufieejit okup ikeya mokọt isak ene unan. (Itọn̄ 31:10; 38:3, 4) Kpa ubọk ni? Kpọ-nu mfufuk gwun̄ ute enenwaan̄ ge ogwu okifieek ejit mije ijo inu irọbe me mgbọ oraraka. Itumu ibe: “Ikikup emi me lek kubọk mkpabakọt itap lek ojot ojot me lek ikwaan̄ Jioba, mije ke mgbọ iraka isa inyi emi.” Mokọt ikikup me lek owuwa kiji ike ikupbe me lek gwun̄ ute enenwaan̄ ya. Ikup ufiak ibe eji ebem lek kiji me lek ufe ifefieek ejit iraka ubọk. Keek-nu ubọk Setan obosa ibele ejit ire ire eji ewọ lek ikerere ibe ke Jioba ikawọ lek me lek kiji!—Sa tọt me lek Ebi Kọrint Eyi Òso Iba 2:5-7, 11.
w02 11/15 20 ¶1-2
Ike Owa Ke Eji Ebekisa Ugwem Kiji Irọ Mkpọ Me Oniin̄ Obokibele Jioba Ejit?
USEN ugwem kiji ikikup kubọk ikawa mè ogwat lek ota si. Ogwu okọt Debit ikeek mkpọ ofolek ubọk ugwem osa igbidim ire mè iriaak uriaak ibe: “Jioba, jeen̄ emi mgbọ okputut ugwem n̄a obore; rọ inyi ǹriọọn̄ mgbọ ugwem n̄a obokup ire—kpa nyi emi otu ifuk usen ugwem n̄a òsisik! Kpọ, ugwem onyibe emi ìkajọn̄ọ ìgak uwele akajit ubọk; okike mgbọ ugwem n̄a me isi kwun̄ ìre inu ikike.” Inu okup Debit me ufiak ire ubọk ibokiluk ugwem me oniin̄ oborọ ibe ejit Awaji ikibele inan̄a mè usem kan̄ mè inu ikirọ. Isasa ijeen̄ ibe ke ọmọ iyaka lek imaan̄ me lek Awaji, itumu ibe: “Utoon̄-ejit n̄a ìbieen̄ me lek kwun̄.” (Itọn̄ 39:4, 5, 7) Jioba igban̄ ọmọ. Imun̄ inu Debit okirọ mè ikpe ọmọ mkpukpe ikpọ me lek.
Ifet ibe ke eji mekọt ikaan̄ inu eji eberọ me mgbọ geelek me ugwem kiji mè itele ibe inu okibọkọ irek me inyọn̄ keyi ibọkọ otutuuk mgbọ kiji. Eyi mokọt irọ ibe eji ekekaan̄ sasaak, ogak ge eyi eji ekaan̄be owuwa mkpọ eji eberọ, ire, mgbọ ebesa irọ ikawa. Ire mbet lek inu okukup Debit me ufiak okup eji me ufiak ni, orere, iluluk ugwem me oniin̄ oborọ ibe eji ekaan̄ nnwọn-isi Awaji ni? Me atikọ, Jioba ikikpọkpọ mè ikiwọlọ eji ge ge ikpọ. Jobu ogwu enerieen̄ otetet ukpook me lek Awaji mkpọ obet lek obop acha ita mè efit acha gweregwen oraraka iriọọn̄ ibe ke Jioba ikimumun̄ otutuuk inu geelek ọmọ okirọ mè oniin̄ ije kan̄ geelek. Jobu ido ibe: “Ìre keke ke mbafọọk mgbọ isido emi ibot inu nrọbe?” (Jobu 31:4-6, 14) Ifet ibe ke eji mekọt isa otutuuk ugwem kiji isa itọbọ ebum inyi Jioba sa me ikekirọ inu echi obokitaba eji iriaak me lek Jioba mgbọ geelek, ikekisiki ibot inyi ikan Awaji, mè ikekisa mgbọ kiji irọ inu me oniin̄ onwọnwọn. Kè eji eriọọn̄ ubọk ekpa inu chi nu.
w21.10 15 ¶4
Yaka Nama Mgbaan̄je Kwun̄ Melek Jioba
Kigọọk Jioba kpa usem mgbọ geelek. Nte kwun̄ iriọọn̄ ibe ke ufieejit okikaan̄ mije ijo inu orọbe mokọt irọ ibe ikafet inyi owu irariaak uriaak inyi ọmọ. (Rom 8:26) Ikerere ikeya, kiriaak “uriaak mgbọ geelek,” tumu nyi Jioba ubọk osabe iweek irere unene kan̄. (Rom 12:12) Andrej itumu ibe: “Nkifieek ejit mè ikitet esip enenen. Ire, mgbọ geelek nsiriaak uriaak, ufieejit mè esip ya ira igele. Nkikaan̄ esuuk me ejit.” Ire okariọọn̄ mkpọ oboriaak uriaak ofolek, kpọ uriaak Ogwu Ubọọn̄ Debit oriaakbe me mgbọ igwube ikom okup me ikpa Okwa Itọn̄ 51 mè 65.
Week Inu Unye Otu Ewe Okup Me Usem Awaji
w22.09 13 ¶16
Jeen̄ Ibe Ke Ogbe Ogwu Ebetoon̄ Ejit Me Lek
16 Itetet lek ikaan̄ ikup ufiak enenen ire ebi ofifi ene ebetoon̄ eji ejit me lek. Eru yi motap ubọk inyi eji etet alọm kiji ekaan̄ me itutumu mkpọ ekpabe inyi eji me nlelet. (Fuk Urọk 10:19.) Ntet-lek-nkaan̄ kiji mokọt inin̄ me ntọ-mkpọ me mgbọ eji ekirọ mkpọ me emen efet. Ire eji kpegbala chieen̄, eji mekọt ikitumu mkpọ echi ikagbe ibe ebi ene enọ isa inyi owuwa ene me ekariọọn̄ge. Mgbọ geelek eji esitap inu ge me emen efet, eji kpeyaka ikaan̄ unye me lek ubọk ebesa inu ya irọ mkpọ mè iyaka ire mbet lek unan ibotap. Itetet lek ikaan̄ motap ubọk inyi eji eriaan̄ ere me mgbọ ebi ochicha kiji ekisa me ifiọk ikiweek ibe eji ekpa enyi ema mkpọ echi obotap ebi bọn nte kiji me unan. Eyi mokọt irọ me mgbọ ebi police ekido eji ikọ me ido ere echitbe mè iyaka ire ikput ikwaan̄ kiji. Eji mekọt isa onineen̄ obe eji ‘ekpaak otu kiji echit’ isa irọ mkpọ me mbet lek irek yi mè ofifi ofifi irek. (Itọn̄ 39:1) Ire eji ekirọ mkpọ melek ebi ototun̄ ukan̄ kiji, ebi unene kiji, bọn ute irieen̄ mè ibaan̄, mè iyaka ire ebi ofifi ene, igbe ibe eji ere ebi ebekọt itoon̄ ejit me lek. Inyi eji ere ebi ebekọt itoon̄ ejit me lek, ikup ufiak ibe eji eketet lek ekaan̄.
ONYAN̄ GO 20-26
INU UNYE OTU EWE OKUP ME USEM AWAJI OKWA ITỌN̄ 40-41
Keke Orọ Eji Ebekitap Ubọk Inyi Ebi Ofifi Ife?
w18.08 22 ¶16-18
Ebi Ikichili Ubọk Inyi Inu Ekibebele Ejit
16 Ebi ikichubọk ichili ubọk kpekinyi me nkeek ibe ke meyaka inyi ema me useen̄. Ire inu Jisọs okaan̄be me ejit ire eya me mgbọ ijeen̄be ibe: “Ire oto ijọk, gwen ebi ugbọọn̄, mè ebi ngọm, mè ebi akọọk, mè ebi ǹnàan̄. Osirọ ikeya, Awaji môgbana owu. Mije, ubọk geelek ife cha kpebekọt ikpe owu useen̄ inorie ema eriebe me uwu kwun̄, Awaji mônyi owu useen̄ mkpukpe kwun̄.” (Luk 14:13, 14) Ogwu Ubọọn̄ Solomọn ige ibe: “Ugbana môkup inyi ogwu òkichili ubọk.” Ofifi ene ige ibe: “Kpọ-nu uga ubelejit òkup inyi ogwu òkitap ubọk inyi ebi irek osikibe.” (Urọk 22:9; Itọn̄ 41:1) Eji ekenyi mije ibe ke eji mikaan̄ unwọọn̄ ikekitap ubọk inyi ebi ofifi ife.
17 Mgbọ Pọọlu okitumu mkpọ ofolek usem Jisọs obe “inyinyi îkaan̄ ugbana me lek igak ibọbọkọ,” ikare inu nkaan̄ gaalek ke ikitumu mkpọ ofolek, ire, ikitumu mkpọ ofolek si itatap ene efuuk me owot, inyinyi ene ntọ-ubọk mè itatap ubọk inyi ebi ikup me una. (Ikwaan̄ 20:31-35) Inan̄a me lek inu itumube mè irọ, ogwu ikwaan̄ Pọọlu ijeen̄ eji ubọk eji ebekọt ikinyi ebi ofifi ife mgbọ, efuuk, mè ima kiji.
18 Ebi ikikween̄ mkpọ mimun̄ ibe ke ikekinyi mkpọ ikirọ ibe ebi ene ekebele ejit. Mfufuk ge itumu ibe, “ebi ene mikikaan̄ ubelejit mgbọ geelek ema esirọ ata mkpọ inyi ebi ofifi ene.” Ebi ikikween̄ mkpọ etumu ibe ke itatap ubọk inyi ebi ofifi ene ikup ufiak enenen me iluluk “ata ugwem okakaan̄ ibot me lek mije ikitap ubọk inyi eji erọ inu ge okukup ufiak me ugwem ebilene.” Eya orọ, ebi ikikween̄ mkpọ mikiteme ebi ikiweek ikakaan̄ unye akpalek mè ubelejit ibe ekesan̄a lek esibi ekerọ mkpọ echi obotap ubọk inyi ebi ofifi ife. Eyi ikake chieen̄ ebi ibọbọkọ Baibul itap kubọk ire Usem Ogwu Orom okakaan̄ ima, Jioba.—2 Tim 3:16, 17.
w15 12/15 24 ¶7
Jioba Mokpọ Owu Chieen̄ Me Lek
7 Ire lek kiji ikanye, eji mekọt ikpọ chieen̄ ibe ke Awaji mokat eji ejit, inyi eji iriọọn̄-inu mè itap ubọk inyi eji ike irọbe ebi usun̄ kan̄ me mgbọ oraraka. Ogwu Ubọọn̄ Debit ige ibe: “Kpọ-nu uga ubelejit òkup inyi ogwu òkitap ubọk inyi ebi irek osikibe; Jioba mônyan̄a ọmọ me mgbọ uyọrọlek. Jioba môbem ọmọ, mè isun̄ ọmọ ugwem.” (Itọn̄ 41:1, 2) Eji miriọọn̄ ibe ke ogwu oluluk me usen kè Debit mè itap ubọk inyi ogwu irek kan̄ osikibe ikpobokup inye ikiluk ire mgbọ geelek. Eya orọ, usem kè Debit ikasibi ibe ke mesun̄ ogwu otatap ubọk inyi ene ya me ugwem me oniin̄ okup uyeke uyeke, orere ke ikaan̄ ugwem ikakaan̄ge itata. Eji mekọt igobo usem yi itet ibe ke Awaji motap ubọk inyi ogwu okitap ubọk inyi ebi ikup me ijo irek ya. Ike owa ni? Debit ige ibe: “Jioba môtap ubọk inyi ọmọ me inyọn̄ mkpilaak orukan̄ kan̄, mè irọ ibe lek kan̄ inye.” (Itọn̄ 41:3) Iin̄, ene geelek ogwu okitap ubọk inyi ebi irek kiban̄ osikibe moriọọn̄ ibe ke Awaji okimun̄ ọmọ mè ata inu ọmọ okirọ. Unye Awaji otapbe me emen ene okirọ ibe lek ene inye mgbọ geelek ene isifiak orukan̄ mokọt irọ ibe lek ene ya inye.
w17.09 12 ¶17
Gọọk Akpat Ukot Njijin Kè Jioba
17 Irọriọọn̄ ibe ke ikekikaan̄ njijin mokọt irọ eji oruru ikpore ibot ibot inu oborọ ibe eji eweek ikakaan̄ eru yi. Ibot ibot inu obobieen̄ eji ire ulọk eji ekaan̄be isasa itọn̄ ijet Ogwu ima mè njijin onan̄abe me ubọk, Jioba. (Urọk 14:31) Ire ọmọ ojeen̄ akpat ukot onwọnwọn ichit isa inyi eji. Kè eji erọ inu geelek eji ebekọt isasa igọọk akpat ukot kan̄—me ijejeen̄ ima isa inyi ebi bọn nte kiji mè ikukup ijaan̄ me lek ebi mburuuk kiji sa me ikekijeen̄ njijin.—Gal 6:10; Jọn Eyi Adasi 4:16.
Week Inu Unye Otu Ewe Okup Me Usem Awaji
it-2 16
Jioba
Otutuuk inu okup me emen Baibul ikat ikana me lek ibeben unen Jioba kubọk ogwu ogbegbe ikpukpulu igwuun̄, eyi orọ ibe okpan okpan inu Jioba okaan̄be me nkeek isibi utoon̄ orere, isusun̄ erieen̄ kan̄ me mbuban. Isusun̄ erieen̄ Awaji me mbuban isibi itutuku erieen̄ ya isan̄a me lek otutuuk ataak geelek etumube ikeme. Ire, eyi okukup ufiak igak eya ire, iweweek ibe otutuuk inu geelek okup me emen inyọn̄ mè isijọn̄ yi ekemin erieen̄ ya kubọk inu okup me mbuban. Eyi isibi ibe ke ema otutuuk mekisa me ejit kiban̄ ibọkọ itap mè ikijeen̄ ulibi me lek irek Jioba okaan̄be ikpukpulu ema. Ema meweek itọtọbọ ebum inyi ọmọ mè ikirọ nkeek kan̄ inan̄a me ima. Uriaak kè Debit isa inyi Jioba okup me ikpa Okwa Itọn̄ 40:5-10 ikpa mbet lek eru okup ikeya mè mkpọ isusun̄ erieen̄ Jioba me mbuban osibi. (Kpọ ubọk Pọọlu osabe ere yi me ikpa Okwa Itọn̄ isa irọ mkpọ ofolek Jisọs me ikpa Ebi Iburu 10:5-10.)
ONYAN̄ GO 27–ONYAN̄ GWEREGWEN 2
INU UNYE OTU EWE OKUP ME USEM AWAJI OKWA ITỌN̄ 42-44
Sa Kpokpo Okibọkọ Inan̄a Me Ubọk Jioba Sa Rọ Inu Jaan̄
w06 6/1 9 ¶4
Inu Ekpabe Ofolek Ikpa Okwa Itọn̄ Agan̄ Òso Iba
42:4, 5, 11; 43:3-5. Ire eji kpekọt ikigọọk bọn ute ikigbaan̄ irọ mkpọ me okike mgbọ ge bak me lek inu ge eyi eji kpekaan̄ unye isasa inwene, ikekikeek unwọọn̄ eji ekaan̄be me mgbọ eji ekigọọk ema irọ mkpọ motap ubọk inyi eji. Ikerere ibe ke me adasi mgbọ unan ikukup agaga mokọt inye, irek ya mokeek eji si ibe ke ire Awaji kiji ore ere ikput-lek isa inyi eji, ke igbe si ibe eji ekekup ekpọ ọmọ ibe inwene irek kiji.
w12 1/15 15 ¶2
Ikekirọ Inyi Mgbọ Eji Ekisa Ikween̄ Mkpọ Ikitop mè Ikisibi Oruru
1 URIAAK: Adasi mkpọ eji eberọ ire irariaak uriaak. (Itọn̄ 42:8) Bak lek eke ni? Igbe ibe eji ekemọnọ ikwekween̄ Usem Awaji kubọk okpọkọ ge me lek ntọbọ-ebum kiji. Eya orọ, ikup ufiak ibe eji ebeek Jioba ibe itap ubọk inyi eji eto nkeek kiji me irek ogbegbe mè inyi eji ekwukwu mbuban kan̄. (Luk 11:13) Barbara, ogwu okilook ata etip me ofifi ido me ujọn̄ọ ujọn̄ọ mgbọ itumu ibe: “Nkibebeek uriaak mgbọ geelek sabum mfuk mè iyaka ire nkween̄ Baibul. Nsirọ ikeya isan̄a, ira inikup emi me lek kubọk Jioba ọmọ owa me agba lek n̄a, ke okibieen̄ mkpọ nkirọ si inye.” Irariaak uriaak sabum eji ekween̄ mkpọ mochili ejit kiji mè ekiket kiji ibọbọkọ itap otutuuk inu geelek eji ebekween̄.
w16.09 5 ¶11-12
“Kachieek Ibe Ubọk Kwun̄ Igbeen̄”
11 Kpokpo eji ekibọkọ inan̄a me ubọk Jioba me nkween̄mkpọ ntitiin̄, chinichini sekut, chinichini ilile mè uwu ikpa ntitiin̄ kiji okirọ ibe eji ekeke enye. Kpokpo cha motap ubọk inyi eji ekaan̄ ata mkpọ obokibieen̄ eji, eto inu emen ekwukwu me isi mè ekerọ otutuuk ikwaan̄ kiji kubọk ebi eyi Karais eso. (Itọn̄ 119:32) Ire okaan̄ uyok uyok ejit ikakaan̄ oruru inan̄a me lek mbet lek kpokpo chi ni?
12 Jioba itap ubọk inyi ebi Ijeren etim egak ebi Amalek mè ebi Etiopia mè inyi Neyemaya mè ebi melek kan̄ unye isasa iyaka inama mgbaan̄ ama Jeruselem. Awaji monyi eji mbet lek unye yaage isasa itim igak ukeme, ekajeen̄ge ulọk me uko, mè sasaak inyi eji ekọt erọ ikwaan̄ ilolook ata etip kiji. (1 Pita 5:10) Eji kpekaan̄ me ejit ibe Jioba irọ ikwaan̄ ukechieen̄ inyi eji. Kpan̄asi ikeya, eji ekerọ eyi eji ebekọt. Eyi igọbọ eji ikekifuk Usem Awaji egwe geelek, ikekineen̄ lek inyi mè ikekisi nkween̄mkpọ ntitiin̄ me nde geelek, ikekirọ nkween̄mkpọ eyi agaga mè nkween̄mkpọ ototun̄ ukan̄, mè ikekiyaka lek imaan̄ me lek Jioba inan̄a me uriaak. Eji ekachieek ibe ofifi inu geelek eji ekirọ ikaan̄ mgbaan̄ me lek oniin̄ echi Jioba okisa itap eji efuuk me owot mè ikisa ikat eji ejit. Ire omun̄ ibe ke okakiwọ me agan̄ ge me lek inu chi, beek Awaji ibe itap ubọk inyi owu. Mè mun̄ ubọk ekwukwu kan̄ obosa itap ubọk inyi owu ‘okaan̄ unye mè ulọk isasa irọ nkeek kan̄.’ (Filip 2:13) Keke ke oborọ isasa irọ ibe ubọk ebi ofifi ife inye?
Week Inu Unye Otu Ewe Okup Me Usem Awaji
it-1 1242
Ibo Oron Afa
Me emen Ikpa Mbuban, mikisa ibo oron afa irọ mkpọ me oniin̄ okeke ichit ichieen̄ mkpọ. Me mgbọ ikitumu mkpọ ofolek ijo irek kan̄, Jobu ibe ke ọmọ ire “ngwan̄ melek ibo oron afa.” (Jobu 30:29) Ofolek ubọk esabe itim igak ebi eyi Awaji, mokọt ire ibe ke ogwu okọt ikitumu mkpọ ofolek oyet akọn̄ ere ebi kè ibo oron afa ekinitaka ebi ekpan̄be me akọn̄ (sa tọt me lek Itọn̄ 68:23), itumu ibe: ‘Owu ojijaka eji me ere ebi kè ibo oron afa ekikup.’ (Itọn̄ 44:19) Mbin akọn̄ ebi Babilọn ekpabe ikana Jeruselem me acha 607 B.C.E. isa uraafiọọn̄ inu eyi orọrọ ibe ebi uga ekpan̄ nsabọn kiban̄. Eya orọ Jerimaya osabe inu ikpak ebi kan̄ erọbe isa itọt me lek ubọk ibo oron afa okisa ikpọ chieen̄ me lek ebi bọn.—Ito 4:3, 10.
ONYAN̄ GWEREGWEN 3-9
INU UNYE OTU EWE OKUP ME USEM AWAJI OKWA ITỌN̄ 45-47
Okwa Ofolek Ido-Nwa Ogwu Ubọọn̄ Ge
w14 2/15 9-10 ¶8-9
Kaan̄ Unwọọn̄ Mije Ido-Nwa Gwun̄ Arọọn̄!
8 Fuk Okwa Itọn̄ 45:13, 14a. Etumu mkpọ ofolek ogwu ebedo kubọk “ikup òrirọ òrirọ” me lek ijọk ido-nwa ogwu ubọọn̄ ya. Me ikpa Ichichili 21:2, esa ogwu ebedo yi isa itọt me lek ama ile orere Ayaya Jeruselem, ebabala ọmọ si “kubọk ekibala ayaya nwa inyi ogwu enerieen̄ òbododo me usen ijọk ido-nwa.” Ama ile yi okup me emen inyọn̄ ikitotoon̄ mije “ujamgbugbo Awaji, mè ikimumen kubọk atalek unye otu ewe ewuuk ekigwen jasipa, mè igen kubọk umọọn̄ mêkọtbe imọọn̄ inu itibi.” (Ichi 21:10, 11) Miriọọn̄ ubọk ikpa ubọk Ayaya Jeruselem yi osa ijaan̄ ire me ikpa Ichichili. (Ichi 21:18-21) Ọmọ orọ ogwu okọt otumube mkpọ ofolek ogwu ebedo yi kubọk iken lek “ikup òrirọ òrirọ”! Ido-nwa ogwu ubọọn̄ yi si ibobọkọ irek me emen inyọn̄.
9 Ogwu Obonido Nwa yi ogwu esabe ogwu enenwaan̄ ya ijet ire Jisọs Karais. Ikineneen̄ lek ogwu enenwaan̄ ya, ‘mè ikisa mun̄ igwọk ọmọ itana me emen ikọ Awaji.’ Ogwu enenwaan̄ ya ‘ikukup me mbuban, ikakaan̄ nrọ-nlọ geege me emen.’ (Efes 5:26, 27) Nwa kan̄ si ibotatap mkpọ ogbegbe me lek orirọ ya. Mkpọ itapbe si igbe! “Ofọnti àwurukù îtapbe, esa alata araran̄ igbaalek ilọk. Ofọnti àwurukù òkikekebe me lek îtapbe; ekekisa ọmọ iban ijet owu ogwu ubọọn̄.” Me lek ido-nwa Gwun̄ Arọọn̄ ya, “mînyi ayaya nwa òbat olom ya ujuja ofọnti okuket òtatana mè itoon̄, ibe isa ibala lek.—Ofọnti okuket ya ìkeke inyi ikwaan̄ ata irọrọ eyi bọn Awaji erọbe.”—Ichi 19:8.
w22.05 17 ¶10-12
Inu Ikpa Ichichili Otumube Ofolek Mgbọ Okup Me Isi Kwun̄
10 Keke ke Jioba oborọ ofolek ukeme yi? Itumu inyi eji ibe: “Môribi emi uyok uyok unaan̄-ejit n̄a.” (Ijik 38:18, 21-23) Ikpa Ichichili 19 ikpa inu oborọ igọọk. Jioba moria Ogwu Gwun̄ ibe inibem ebi eyi Kan̄ mè ijijaka ebi ochicha kiban̄. “Otutuuk urum akọn̄ emen inyọn̄” melek Jisọs ebetim akọn̄ yi—urum akọn̄ emen inyọn̄ yi igọbọ ebi osat igbegbe utoon̄-ejit mè ebi 144,000. (Ichi 17:14; 19:11-15) Keke ke akọn̄ yi oborọ? Mojijaka otutuuk ebilene mè ntitiin̄ echi okukup ikeme Jioba!—Fuk Ichichili 19:19-21.
11 Keek-nu ubọk ibokup me lek ebi igbegbe utoon̄-ejit ikup me inyọn̄ ijọn̄ inwọnwọnọ mfiat otutuuk ebi ochicha Awaji! Mgbọ ya ibore mgbọ unwọọn̄! Ikerere ibe ke mitaan̄ ukpo ikpele unwọọn̄ me emen inyọn̄ me mgbọ ejijakabe Babilọn Ama Ile, ikaan̄ ofifi mkpọ eyi obosa unwọọn̄ omimin igak eya isa inu. (Ichi 19:1-3) Ire inu ya ore nkana-ngwook ikpa Ichichili—“ijọk ido-nwa Gwun̄ Arọọn̄.”—Ichi 19:6-9.
12 Kpa mgbọ ke ido-nwa yi obobọkọ irek? Otutuuk ebi 144,000 ebesoso isi me emen inyọn̄ sabum akọn̄ Amagedọn. Ire, ikare mgbọ ya ke eberọ ido-nwa Gwun̄ Arọọn̄. (Fuk Ichichili 21:1, 2.) Ido-nwa Gwun̄ Arọọn̄ ibobọkọ irek esitim akọn̄ Amagedọn isan̄a mè isan̄a otutuuk ebi ochicha Awaji.—Itọn̄ 45:3, 4, 13-17.
it-2 1169
Akọn̄
Esitim akọn̄ yi isan̄a, esuuk mokup me inyọn̄ ijọn̄ me obop acha ge. Ikpa Okwa Itọn̄ ibe ke “[Jioba] îrọ ibe akọn̄ ita me otutuuk linyọn̄; îfaan̄ ogbaan̄, mè ijijaka otunwa, mè itap ukan̄ iwọp uji akọn̄,” ikaan̄ nrọ-nso eyi adasi me mgbọ Awaji osabe esuuk inu me ido Ijeren sa me ijijijaka mkpọ akọn̄ ebi ochicha kiban̄. Ire, mgbọ geelek Karais isijijaka ebi ikibieen̄ akọn̄ inye me akọn̄ Amagedọn, otutuuk inyọn̄ ijọn̄ keyi monwọọn̄ ata esuuk. (Itọn̄ 46:8-10) Ebi geelek ibekaan̄ ugwem ikakaan̄ge itata ebere ebi ibọbọn̄ “oge akọn̄ kiban̄ ikana orọk mè ibọn̄ otunwa kiban̄ ikana oge ikwaan̄ uko” mè ebi “kpebeyaka ikpọk ikween̄ ukot akọn̄ ofifi” mije, “îre Jioba Ogwukaan̄ Inyọn̄ mè Ijọn̄ me lek kan̄ otumu.”—Asaya 2:4; Maika 4:3, 4.
Week Inu Unye Otu Ewe Okup Me Usem Awaji
w17.04 11 ¶9
Keke Obonan̄a Me Mgbọ Ama Ubọọn̄ Awaji Isinu?
9 Keke obobọkọ irek ijo ntitiin̄? Akọn̄ Amagedọn isiraka, ire ikaan̄ ntitiin̄ obokup me inyọn̄ ijọn̄ yi? Baibul itumu inyi eji ibe: “Ire, eji ekikup ikpọ inu Awaji ochieekbe me use, òrere ayaya isinyọn̄, mè ayaya linyọn̄ ere ebi ata irọrọ ebeluk isun̄ ama kiban̄.” (2 Pita 3:13) Oka isinyọn̄, mè oka linyọn̄, orere ijo ebi mkpulu mè ebi ema ekikpulu, kpebeyaka ikup. Keke obobọkọ irek kiban̄? Usem “ayaya isinyọn̄, mè ayaya linyọn̄” isibi ayaya mkpulu mè ayaya ebi ene ikup me irak mkpulu ya. Ama Ubọọn̄ eyi Jisọs Karais obokikpulu mojeen̄ mbet lek eru Jioba Awaji ogwu okirọ mkpọ me onineen̄ okaan̄be. (1 Kọr 14:33) Eya orọ, “ayaya linyọn̄” ibokukup me onineen̄. Ebirieen̄ ebi ata irọrọ ọmọ owa ebi ibekikpọ chieen̄ me lek inu. (Itọn̄ 45:16) Ire Karais mè ebi 144,000 ebi ibegọọk ọmọ ikpulu ebekinyi ema ntọ-ubọk. Keek-nu mgbọ otutuuk ijo mkpulu geelek ikpoboyaka ikup, kpan̄asi ikeya, ibore mkpulu ata irọrọ ge gaalek obokup!
ONYAN̄ GWEREGWEN 10-16
INU UNYE OTU EWE OKUP ME USEM AWAJI OKWA ITỌN̄ 48-50
Ute mè Uga—Irọ Inyi Utoon̄-Ejit Ebi Ototun̄ Ukan̄ Kinyi Me Lek Ntitiin̄ Jioba Inye
w22.03 22 ¶11
Ata Ntọbọ-Ebum Morọ Ibe Okokaan̄ Ubelejit
11 Eji ekitọbọ ebum inyi Jioba mgbọ geelek eji ekikween̄ Usem kan̄ mè ikijeen̄ nsabọn kiji mkpọ ofolek kan̄. Usen Iwọ Efuuk ikinyi ebi Ijeren irek isasa itele otutuuk inu geelek ema ekirọ egwe geelek mè etọ chieen̄ me lek mgbaaan̄je kiban̄ melek Jioba. (Isis 31:16, 17) Ebi ikigbe utoon̄-ejit me etete kiban̄ mikijeen̄ nsabọn kiban̄ mkpọ ofolek Jioba mè ubọk isabe inwọn ire. Igbe ibe eji ge ge ekaan̄ mgbọ eji ebekisa ifuk mè ikikween̄ usem Awaji. Eyi ire okpọkọ ge me lek ntọbọ-ebum kiji isa inyi Jioba, ikitap ubọk inyi eji etaba lek eriaak me lek kan̄. (Itọn̄ 73:28) Mgbọ geelek eji esikigbaan̄ ikween̄ mkpọ kubọk ototun̄ ukan̄, eji mekọt itap ubọk inyi ebi ayaya ukot, irere nsabọn kiji ekaan̄ ata mgbaan̄je melek Nte kiji ogwu okup me emen inyọn̄ mè ikaan̄ ima.—Fuk Okwa Itọn̄ 48:13.
w11 3/15 19 ¶5-7
Owu Okaan̄ Mkpọ Echi Oborọ Ibe Okobele Ejit
“Ebi eyi Awaji, ìje-nu ìkana Sayọn; ìje ìtibi emen kan̄, mè ìfuk otutuuk uwu-oket kan̄. Ìriọọn̄ ubọk ìkpọ mgban kan̄, mè ìjijen̄e ìkana emen uwu mgban akọn̄ òkup me ama ya, inyi enyi eriọọn̄ inu enyi mêkpabe inyi nsabọn ebi ukot òkinu me isi ofolek ama ya.” (Itọn̄ 48:12, 13) Ogwu okọt ikitap efuuk me owot ebi Ijeren ibe eriọọn̄ ubọk ekpọ Jeruselem. Ire omokọt ikeek mbet lek mkpọ ebi ototun̄ ukan̄ me Ijeren isisi ama mbuban ya me lek ijọk echi ekirọ me acha geelek mè imun̄ ikpele uwu mbuban okup me emen ebekikpa ni? Eyi ira ibieen̄ ema ibe ekpa enyi “nsabọn ebi ukot òkinu me isi.”
Keek-nu mkpọ ofolek ogwu ubọọn̄ enenwaan̄ Sieba, ogwu ikachieek me lek mkpọ inọbe ofolek ata mkpulu mè ikpele iriọọn̄-inu kè Solomọn me adasi mgbọ. Keke orọ inichieek ibe ke inu inọbe ire atikọ? Itumu ibe: “Ǹkachieek inu cha nnọbe mege ire mgbọ nnube, mè inisa chieen̄ n̄a gaalek imun̄.” (2 Mfuf 9:6) Iin̄, inu eji esabe chieen̄ kiji imun̄ mokọt ikaan̄ mgbaan̄ me lek kiji.
Ike owa ke obokọt isa itap ubọk inyi nsabọn kwun̄ esa chieen̄ kiban̄ emun̄ ikpele inu ntitiin̄ Jioba okirọ ni? Ire otu agọọk ikwaan̄ Ebi Ata-Ikọ Jioba ikup iriaak me lek kwun̄, tap efuuk inyi enyi ekọt esi ere ya. Kubọk inu njeen̄, Mandy mè Bethany, emin isibi me ere ojọjọn̄ọ ere iso mkpọ obet lek 900 miles (1,500 km) inan̄a me Bethel okup me ido kiban̄. Ire, nga kiban̄ mè nte kiban̄ mikineen̄ ikekisa ema isi owuwa mgbọ, ogak ge mgbọ ema ekimin isibi. Ema etumu ibe: “Sabum eji enube inikpọ ere yi, eji ekikeek ibe ke ikare ere ene ebenwọọn̄ isisi ikwaan̄, ke ikup inyi ebi inin̄ ugane si. Ire, eji mimun̄ ebi ijija ikitap efuuk ikisi ikwaan̄ inyi Jioba me lek unwọọn̄! Eji minimun̄ ibe ke ntitiin̄ Jioba ikayaka me sọntiik ere eji elukbe, mgbọ geelek eji esibe Bethel, eji mikikaan̄ efuuk me irek emen ekwukwu.” Imumun̄ ntitiin̄ Awaji me oniin̄ okup ikeya ibieen̄ Mandy mè Bethany ibe ebene ekegbọ oniin̄ ojot mgbọ, migwen ema si ibe enegọọk esi ikwaan̄ me Bethel me mgbidim mgbọ.
w12 8/15 12 ¶5
Kiluk Ugwem Ogbegbe Gwun̄ Owot Ama Ubọọn̄!
5 Kween̄ mfufuk. Ogwu okiweek irere gwun̄ owot me ido ge mokween̄ usini mkpọ ofolek mfufuk ido ya. Ubọk yaage si, ebi geelek ikiweek irere bọn owot Ama Ubọọn̄ Awaji metap efuuk ikwekween̄ inu geelek ema ebekọt ikween̄ ofolek Ama Ubọọn̄ ya. Kpọ-nu akpat ukot nsabọn kè Kora ebi ikisi ikwaan̄ me uwu mbuban me Ijeren me ukot ikaan̄ ejeen̄be. Ema mikaan̄ ikpele ulọk me lek Jeruselem mè ere ekisa itọbọ ebum okup me emen mè ikikpa mfufuk ofolek ama ile ya. Ikare ewuuk mè abọt esabe inama uwu ya otop ema me lek ichit, ire, ire mkpọ ama ile ya mè ere ekisa itọbọ ebum okup me emen okeke ichit chieen̄. Jeruselem ire “ama Ogwu Ubọọn̄ ilile,” Jioba, mije, ire ama ya ore okpan okpan ere ata ntọbọ-ebum okibọkọ irek. Ire ere ya si ke ekijeen̄ Ikan Jioba. Ire ebi ikup me irak mkpulu Ogwu Ubọọn̄ Jeruselem ke Jioba ojeen̄ ima okigbe utoon̄-ejit kan̄. (Fuk Okwa Itọn̄ 48:1, 2, 9, 12, 13.) Kubọk bọn kè Kora, ire okaan̄ ulọk ikwekween̄ mè ikpakpa mfufuk ntitiin̄ Jioba eyi okup me inyọn̄ ijọn̄ ni? Ike okikween̄ mkpọ ofolek ntitiin̄ Awaji mè ubọk ikisa ibieen̄ ebi eyi kan̄ inye, ikeya si ke obokimun̄ Ama Ubọọn̄ Awaji kubọk ire mkpulu. Morọ si ibe ulọk okaan̄be me ilolook ata etip ikimin.—Jeri 9:24; Luk 4:43.
Week Inu Unye Otu Ewe Okup Me Usem Awaji
it-2 805
Inu Ubọọn̄
Kubọk ido obọbọọn̄ ubọọn̄, ebi Ijeren mekọt ikinwọọn̄ inorie mè miin̄ (1 Ubọọn̄ 4:20; Etip 5:18, 19), inu ubọọn̄ kiban̄ si ikibem ema isan̄a me lek ufialek ugbọọri okisa inu. (Urọk 10:15; Etip 7:12) Ire, ikerere ibe ke ire nkeek Jioba ibe ebi Ijeren enwọọn̄ inu ubọọn̄ okinan̄a me lek unye ikwaan̄ kiban̄ (sa tọt me lek Urọk 6:6-11; 20:13; 24:33, 34), imun̄ ibe ke mitaba ema ubọk me utọn̄ ofolek iwuwuuk ogwu inu ubọọn̄ kiban̄ cha onan̄abe me ubọk mè ibene ikitoon̄ ejit me lek inu ubọọn̄ cha. (Ikan 8:7-17; Itọn̄ 49:6-9; Urọk 11:4; 18:10, 11; Jeri 9:23, 24) Mikeek ema ibe ke inu ubọọn̄ cha ikakibia ifiin̄ (Urọk 23:4, 5), ikpobokọt inyi Awaji mkpenwene isasa inyan̄a ene me ubọk mkpa (Itọn̄ 49:6, 7), ke inu ubọọn̄ cha si ikayaka ikup me lek inu geege isa inyi ogwu okwukwu (Itọn̄ 49:16, 17; Etip 5:15). Mijeen̄ ema ibe ke imamalek ima mkpọ nkaan̄ mokọt irọ ibe ene irọ inu ikanwọnge mè ichep nnwọn-isi kè Jioba. (Urọk 28:20; sa tọt me lek Jeri 5:26-28; 17:9-11.) Mitap ema efuuk me owot ibe esa “inu ubọọn̄ [kiban̄ emin Jioba].”—Urọk 3:9.
ONYAN̄ GWEREGWEN 17-23
INU UNYE OTU EWE OKUP ME USEM AWAJI OKWA ITỌN̄ 51-53
Inu Oborọ Isasa Ijit Ijo Inu Omimin
w19.01 15 ¶4-5
Ike Owa Ke Obosa Ibem Ejit Kwun̄?
4 Me ikpa Urọk 4:23, esa usem “ejit” isa irọ mkpọ ofolek inu ene orebe me emen. (Fuk Okwa Itọn̄ 51:6.) Mekọt itumu ibe ke “ejit” ire, inu ene okikeek, ubọk inu okikup ene me lek, inu okibieen̄ ene, mè ulọk ene. Ire inu eji echubọk ire me emen, ikare ubọk ebi ene ekimun̄ ibe eji erebe.
5 Kpọ-nu ubọk anam akpalek kiji okupbe eyi obokọt ijeen̄ mbet lek ene eji erebe me emen. Adasi, inyi eji ekaan̄ unye akpalek, eji ebekirerie ata inorie, mè ikirọ mkpọ ekisa ikpọk lek. Ubọk yaage si, ufuna eji enye me irek emen ekwukwu, eji ebekirerie inorie emen ekwukwu mgbọ geelek mè ikirọ mkpọ echi obokirọ ibe ichechieek kiji inye. Eyi igọbọ ikekitap inu eji ekikween̄ me ugwem mè ikekitumu mkpọ ofolek ichechieek kiji inyi ebi ofifi ife. (Rom 10:8-10; Jemis 2:26) Òso iba, mije ubọk akpalek kiji okupbe, eji mekọt ikikeek ibe ke lek kiji inye, me mgbọ orukan̄ mokọt ikup eji me emen. Ubọk yaage si, mije eji ekirọ mkpọ echi obotaba eji iriaak me lek Jioba, eji mekọt ikikeek ibe ke ichechieek kiji inye, ire, ijo nkeek mokọt ikimin me emen kiji. (1 Kọr 10:12; Jemis 1:14, 15) Eji ekawuuk ibe ke Setan moma ijijijaka ejit kiji. Ike owa ke ibosa isa irọ eyi ni? Ike owa ke eji ebesa ibem lek kiji?
w15 6/15 14 ¶5-6
Eji Mekọt Ikup Me Utana
5 Oniin̄ ge isasa ijeen̄ ibe ke eji miyaka lek imaan̄ me lek Jioba ire ikekiriaak uriaak inyi ọmọ ibe itap ubọk inyi eji etim egak ijo nkeek. Eji esitaba lek iriaak me lek Jioba me uriaak, motaba lek iriaak me lek kiji. Ikichichili ubọk inyi eji ekwukwu mbuban, eyi okirọ ibe ntumu-mfieek kiji ijijit ijo nkeek mè ikukup me utana inye. Eya orọ, kè eji erọ inyi Awaji iriọọn̄ ulọk eji ekaan̄be ikekirọ ibe ejit ibele ọmọ inan̄a me lek inu eji ekikeek. (Itọn̄ 19:14) Ire eji mikibeek ọmọ ibe iwọlọ eji ikpọ inyi eji mekọt imun̄ “inu ikpak”—orere ijo ulọk mè iyaka ire ekiket—eyi obokọt irọ ibe eji erọ ijo inu ni? (Itọn̄ 139:23, 24) Ire eji mikibeek ọmọ mgbọ geelek ibe itap ubọk inyi eji ekup enye ekegbe utoon̄-ejit me mgbọ eji esichichini ntọ-mkpọ ni?—Mat 6:13.
6 Ubọk esa ikpukpo eji isibi mè iyaka ire inu eji ewuukbe lek irọ mokọt irọ ibe eji ekema irọrọ inu Jioba ochabe. Ikerere ikeya, Jioba mokọt itap ubọk inyi eji erọ unwene okukup ufiak isasa ikup inye ikitọbọ ebum inyi ọmọ me ubọk ogbegbe. Ogwu Ubọọn̄ Debit iriọọn̄ eyi. Me mgbọ irọbe ugan-nwa melek Batiseba isan̄a, Debit ibeek Jioba ibe: “Rom ejit òtatana tap emi me emen, mè nyi emi aya ekwukwu me emen n̄a, inyi ǹkeke ǹnye me lek kwun̄.” (Itọn̄ 51:10, 12) Ijo inu mokọt ikitop me lek akpalek kiji ikasoge, ire, Jioba mokọt irọ inyi eji ekaan̄ ekwukwu irọrọ mkpọ otatat mè ulọk isisiki ibot inyi ọmọ. Ikerere ibe ke ijo ulọk ya inin̄ idọk me emen kiji mè ikirọ ibe eji ekamalek ikikeek mkpọ okukup me utana, Jioba mokọt itap ubọk inyi eji esiki ibot enyi ikan kan̄ mè ekọt ekeluk egọọk ikan cha. Mokọt ikput ibe inu geelek obokọt isak eji unan ikatim igak eji.—Itọn̄ 119:133.
Week Inu Unye Otu Ewe Okup Me Usem Awaji
it-1 644
Dowegi
Dowegi ire ogwu Edọm okisi ikwaan̄ kubọk ogwu okikpọ chieen̄ me lek ebi ikikpukpo anam inyi Ogwu Ubọọn̄ Sọọlu. (1 Sam 21:7; 22:9) Dowegi mokọt ire ogwu obọbọkọ ubọk iriaak Awaji ebi Ju itap. Bak lek “ikifaka mfaka me isi Jioba” me Nọbu, mokọt ire ibe mije nnyan̄a-ibot ge, ikakupge me utana, mè iyaka ire orukan̄ inyakpa. Dowegi imun̄ mgbọ Ayimelek ogwu ibot ebi ngwugwa onyibe Debit fituru mbuban melek oge akọn̄ kè Golayat. Ike mgbọ ojebe, Sọọlu otutumu usem melek ebi usun̄ kan̄ mè itumu ibe ke ema mekitọt ijo otitọt ikeme ọmọ, Dowegi otutumu inu ọmọ omun̄be me Nọbu. Me mgbọ igwenbe ogwu ibot ebi ngwugwa mè ebi ngwugwa ikup me Nọbu mè ido Ayimelek inu osilek ikọ ya, Sọọlu onyinyi ida ibe mè ebi mbem ekpan̄ ebi ngwugwa cha. Mgbọ ema kpechieek irọrọ, Sọọlu obebe mè Dowegi ikpan̄ ebi ngwugwa cha. Me ikafafiat mgbọ, Dowegi okpakpan̄ akọp ebi ngwugwa jeeta mè go. Mgbọ irọbe inu ikpak ya isan̄a, Dowegi okpakpan̄ otutuuk ebi ama Nọbu isan̄a, nsabọn mè ebi ugane melek anam kiban̄.—1 Sam 22:6-20.
Ike egebe me inu okup me agan̄ inyọn̄ ikpa Okwa Itọn̄ 52, Debit ige ofolek Dowegi ibe: “Otu alọm kwun̄ òkitọt ene ijo, ìbet lek akwaan̄ òrereke; owu òkirọ inu ofiaan̄ ofiaan̄. Owu oma ijo inu igak ata inu, mè ima ataak igak ikọ ata irọrọ. Owu oma usem òkitap ene unan me lek; owu ìre ogwu otu alọm iba.”—Itọn̄ 52:2-4.
ONYAN̄ GWEREGWEN 24-30
INU UNYE OTU EWE OKUP ME USEM AWAJI OKWA ITỌN̄ 54-56
Awaji Ọmọ Owa Me Agba Lek Kwun̄
w06 8/1 22 ¶10-11
Kaan̄ Iriọọn̄-Inu—Tet Ukpook Me Lek Awaji!
10 Me mgbọ ge, Debit isi lek Akis ogwu ubọọn̄ ama ebi Filisia ge ekigwen Gat, ama kè Golayat isi ilet lek. (Samien Eyi Adasi 21:10-15) Ebi ikwaan̄ kè Akis ebebene ikitumu mkpọ ofolek Debit kubọk ogwu ochicha ido kiban̄. Keke ke Debit oborọ me irek okukup ufe ufe yi ni? Ikpa ejit kan̄ inyi Jioba me uriaak. (Okwa Itọn̄ 56:1-4, 11-13) Ikerere ibe ke irọ kubọk ọmọ ire ogwu iraak, Debit iriọọn̄ ibe ke ire Jioba ochubọk inyan̄a ọmọ sa me igbagbana inu irọbe. Debit isasa otutuuk ejit kan̄ imaan̄ me lek Jioba mè utoon̄-ejit ikaan̄be me lek kan̄ okijeen̄ ibe ke ọmọ ire ogwu okitet ukpook me lek Awaji.—Okwa Itọn̄ 34:4-6, 9-11.
11 Kubọk Debit, eji mekọt ijeen̄ ibe ke eji mikaan̄ ukpook me lek Awaji sa me itotoon̄ ejit me lek use ichieekbe ibe ke ọmọ motap ubọk inyi eji me mgbọ ufialek. Debit ige ibe: “Yaka lek kwun̄ nyi Jioba, mè toon̄ ọmọ ejit me lek, ke môtap ubọk inyi owu.” (Okwa Itọn̄ 37:5) Eyi ikasibi ibe ke eji ebekpọkpọ iyaka ufialek kiji inyi Jioba me eji kperọ inu geege mè iweek ibe itap ubọk inyi eji. Debit ikakpọkpọ ibeek ibe Awaji itap ubọk inyi ọmọ gaalek mè ibia ikeya. Isa unye mè iriọọn̄-inu Jioba onyibe ọmọ isa irọ mkpọ ofolek ufialek ichichinibe. Ire, Debit iriọọn̄ ibe ke efuuk ebilene gaalek ikpobokọt irọ ibe ene irọ ijaan̄. Inu yaage si ke eji eberọ. Eji esirọ eyi efuuk kiji okọt, eji etele echi osisik me ubọk Jioba. Owuwa mgbọ, kpunu inu eji eberọ ilọ me lek iyayaka lek imaan̄ me lek Jioba. Ire mgbọ ya ke eji ebesa ijeen̄ ibe ke eji mikaan̄ ukpook me lek Awaji me inu geelek eji ekirọ. Eji mekọt ikaan̄ ukarajit inan̄a me lek usem kè Debit: “Jioba ìkitumu nlelet inu kan̄ ijeen̄ ebi ìkimin ọmọ.”—Okwa Itọn̄ 25:14.
cl 243 ¶9
“Kpunu Inu Geege Obokọt Iche Eji Isan̄a Me Lek Imumechieen̄ Awaji”
9 Jioba imọnọ si ime kiji ibene. (Matiyu 24:13) Riọọn̄ ibe ke Setan moweek ibe owu okayaka ikitọbọ ebum inyi Jioba. Egwe geelek ogbebe utoon̄-ejit inyi Jioba, okinyi ọmọ inu ibosa ifọọk otu kè Setan. (Urọk 27:11) Usini mgbọ, ikọkọt ikime ikakifet. Ufialek orukan̄, ufialek ikpoko, sasaak, mè ofifi ofifi ufialek mokọt ikikana ntọ-mkpọ inyi eji usen geelek. Inu eji ebenbe me ejit echi ikarọge iso mokọt ikirọ ibe efuuk ita eji me owot. (Urọk 13:12) Ikekime irek oyọyọt chi ikup me unye otu ewe me chieen̄ Jioba. Ọmọ orọ Ogwu Ubọọn̄ Debit obeekbe Jioba ibe me isun̄ ito kan̄ me emen “iko,” mè isa me unye-ejit ido ibe: “Ìre otu ifuk mun̄ ito n̄a kpunu me ikpa kwun̄ ni?” (Okwa Itọn̄ 56:8) Me atikọ, Jioba imọnọ ibene mè ikikeek ito mè ofara eji ekije itibi ike eji ekigbe utoon̄-ejit inyi ọmọ. Inu chi ikup me unye otu ewe me chieen̄ kan̄ enenen.
w22.06 18 ¶16-17
Ubọk Ima Okisa Itap Ubọk Inyi Eji Etim Egak Ukpook
16 Setan iriọọn̄ ibe ke eji mimọnọ ugwem kiji ibene enenen. Itumu ibe ke eji menyi inu geelek eji ekaan̄be—ikerere mgbaan̄je kiji melek Jioba—isasa ibem ugwem kiji me mgbọ keyi. (Jobu 2:4, 5) Inu Setan otumube ya ire ataak! Ire, eyi irebe ibe ke ire ọmọ ore “ogwu òkakaan̄ unye eyi mkpa,” Setan ikisa isasa ulọk eji ekaan̄be iluluk ugwem isa irọ ibe eji etele Jioba. (Iburu 2:14, 15) Me usini irek, ebi ene ebi ikirọ nkeek kè Setan mekọt itumu ibe ke ema mekpan̄ ebi usun̄ Jioba ire ema kpeyaka ichechieek kiban̄ ito. Usini mgbọ, Setan mokọt isa orukan̄ ge okukup unye unye eji ekaan̄be isa irọ ibe eji erọ mkpọ Jioba ikama. Ebi ofia ebeke mè iyaka ire ebi uwu kiji ebi kpekup me ntitiin̄ mekọt ikinyi eji ukeme ibe ebọkọ eje, eyi ojeje ikeme ikan Awaji. Mè iyaka ire ene ge mokọt ibe eji ebọkọ ubọk igwa-ene ge eyi ikatat me lek onineen̄ Baibul.
17 Ikerere ibe ke eji kpeweek ikwukwu, eji miriọọn̄ ibe ke Jioba ibokukup inye ikima eji ikerere ibe ke eji mikwu. (Fuk Ebi Rom 8:37-39.) Mgbọ geelek ebi unene Jioba esikwu, ikikakaan̄ ema me nkeek kubọk ema ekukup me ugwem. (Luk 20:37, 38) Ikaan̄ ulọk iyayaka isa ema inu me ugwem. (Jobu 14:15) Jioba ikpe mkpukpe omimin inyi eji ekaan̄ “ugwem ikakaan̄ge itata.” (Jọn 3:16) Eji miriọọn̄ ubọk Jioba osa ima eji ire mè ikikpọ eji chieen̄ me lek. Eya orọ, kpan̄asi ijujuuk Jioba itele me mgbọ eji ekifiak orukan̄ mè iyaka ire me mgbọ ekibe ke mekpan̄ eji, eji ekisi lek kan̄ ibe inyi eji ukarajit, iriọọn̄-inu, mè unye. Mkpọ Valérie mè ogwu olom erọbe ire eya.—Itọn̄ 41:3.
Week Inu Unye Otu Ewe Okup Me Usem Awaji
it-1 857-858
Irọriọọn̄ Mkpọ Oborọ Me Isi
Judas Isikariọt ogwu oleleke Jisọs irọ ibe nriran ge okup me Ikpa Mbuban irọ iso, eyi okijeen̄ ibe ke Jioba melek Ogwu Gwun̄ mekọt iriọọn̄ mkpọ oborọ me mgbọ okup me isi. (Itọn̄ 41:9; 55:12, 13; 109:8; Ikwaan̄ 1:16-20) Ire, kpebekọt itumu ibe ke ire Awaji oneen̄ ibe Judas ileke Jisọs. Nriran ya ibe ke ene ge ogwu okukup iriaak me lek Jisọs oboleke ọmọ, ire, kpebak ogwu ene ya obore. Isọkọ me lek si, Baibul ijeen̄ ibe ke Awaji ikpobokọt ineen̄ ibe Judas ileke Jisọs. Onineen̄ Awaji eyi ogwu ikwaan̄ Pọọlu ogebe ire: “Kakigwat lek ìtoon̄ ene ubọk me ibot ìsa ìrọ ogwu ugane ntitiin̄, inyi okamọnọ ogwu ikatatge, mè ìsa me ikeya ìkaan̄ uche me lek ijo inu geelek îrọbe. Sun̄ lek kwun̄ tana me isi Awaji.” (1 Tim 5:22; sa tọt me lek 3:6.) Isasa ijeen̄ ibe ke ọmọ iweek isasa me iriọọn̄-inu igobo ebi akọp ebi otuchieen iba kan̄ me ubọk ogbegbe, Jisọs isasa otutuuk eririeen̄ ge isa iriaak uriaak inyi ogwu Ute sabum igobobe ema. (Luk 6:12-16) Mè ire Awaji oneen̄ ibe Judas ileke Jisọs, eya ikpoje ikike me lek ntọ-ubọk mè onineen̄ Awaji onyibe, isọkọ me lek si, igọọk me lek onineen̄ ya, morọ ibe Jisọs igọọk ikaan̄ uche me lek ijo inu Judas orọbe.
Eya orọ, isibi utoon̄ ibe ke me okike mgbọ eyi egobobe ọmọ kubọk ogwu otuchieen̄, kpunu inu geege me emen ejit Judas okijeen̄ ibe ke ire ọmọ oboleke Jisọs. Ire, itele ibe ‘ujat mfut itibi isibi’ mè ijijaka ọmọ, eyi orọrọ ibe ọmọ itele irek kan̄ mè iyaka ibene ikirọ nkeek Yọk kpan̄asi eyi Awaji, kubọk ichichiin̄ inọ mè ileleke ene. (Iburu 12:14, 15; Jọn 13:2; Ikwaan̄ 1:24, 25; Jemis 1:14, 15; kpọ JUDAS No. 4.) Mgbọ irọbe ijo inu ire okike mgbọ ge, Jisọs ogwu obokọt iriọọn̄ mkpọ okup Judas me ejit otutumu ibe ke ire Judas oboleke ọmọ.—Jọn 13:10, 11.