Ikpa Okikpa Nkween̄mkpọ Ugwem Mè Ikwaan̄ Kiji Kubọk Ebi Eyi Karais

ONYAN̄ ONAAN̄GE 2-8

INU UNYE OTU EWE OKUP ME USEM AWAJI OKWA ITỌN̄ 79-81

Jeen̄ Ima me lek Erieen̄ Jioba Eyi Okaan̄ Umin

w17.02 9 ¶5

Mkpenwene​—Ire “Uche Ònwọnwọn Isan̄a” Onan̄a me Ubọk Nte Kiji

⁵ Ike owa ke eji ebesa ijeen̄ ibe ke eji mima erieen̄ Jioba ni? Ire sa me eru kiji. Jioba iweek ibe eji ekup me mbuban. (Fuk Pita Eyi Adasi 1:​15, 16.) Eyi isibi ibe ke eji ebekitọbọ ebum inyi Jioba gaalek mè ikisa me otutuuk ejit kiji ikisiki ibot inyi ọmọ. Ikerere me mgbọ ekitutuku eji, eji ekitatap otutuuk efuuk kiji isasa ikiluk igọọk onineen̄ mè ikan Awaji. Sa me ikekisi ata ikwaan̄, eji ekitele ibe utoon̄ kiji ikitoon̄ mè ikisa itọn̄ ijet erieen̄ Jioba. (Mat 5:​14-16) Kubọk ebi ikup me mbuban, eji ekijeen̄ inan̄a me lek ubọk eji ekiluk ugwem kiji ibe ke ikan Jioba inwọnwọn, ke usem Setan otumube ikeme Awaji ire ataak. Mgbọ geelek eji esirọ ilọ ike otutuuk kiji ekirọ, eji ekigwugwu ikom inan̄a me ijọn̄ ijọn̄ ejit kiji, mè esan̄a lek me lek mkpọ echi ikpobosa itọn̄ ijet Jioba.​—Itọn̄ 79:9.

ijwbv 3 ¶4-5

Ebi Rom 10:13​—“Gwen Erieen̄ Okaan̄-Ene”

Me emen Baibul, usem ‘igwegwen erieen̄ Jioba’ ikasibi gaalek irọriọọn̄ erieen̄ Awaji mè ikekisa irọ mkpọ me ntọbọ ebum kiji. (Okwa Itọn̄ 116:​12-14) Igọbọ itotoon̄ ejit me lek Awaji mè ikekiweek ntap-ubọk kan̄.​—Okwa Itọn̄ 20:7; 99:6.

Erieen̄ Awaji ikup ufiak enenen isa inyi Jisọs Karais. Adasi mbeek me emen uriaak Nte ibe: “Nte kiji ogwu òkup me emen inyọn̄, erieen̄ kwun̄ ikup me mbuban.” (Matiyu 6:9) Jisọs ijeen̄ si ibe ke eji eberọrọọn̄, isiki ibot inyi mè ima Ogwu okichieek erieen̄ ya ire eji iweek ikakaan̄ ugwem ikakaan̄ge itata.​—Jọn 17:​3, 6, 26.

Week Inu Unye Otu Ewe Okup Me Usem Awaji

it-2 111

Josefu

Minọnọ Erieen̄ Josefu Imin. Mije ikpele irek Josefu okaan̄be me etete bọn kè Jekọp, ichubọk igbe ibe ke usini mgbọ mikisa erieen̄ kan̄ irọ mkpọ mgbọ geelek esikitumu mkpọ ofolek otutuuk otoko ebi Ijeren (Itọn̄ 80:1) mè iyaka ire ebi ama ubọọn̄ agan̄ inyọn̄. (Itọn̄ 78:67; Emọs 5:​6, 15; 6:6) Misa erieen̄ kan̄ irọ mkpọ me nriran Baibul. Me emen ilaak ọkpọchieen̄ kè Ijikien, irot eyi kè Josefu ire irek iba (Ijik 47:13), ge me lek otunchit ama “Jioba Me Ere Ya” ikaan̄ erieen̄ Josefu (Ijik 48:​32, 35), ofolek irọrọ ibe ebi eyi Jioba egbaan̄ ere ge, etumu mkpọ ofolek Josefu kubọk ogwu ibot ido agan̄ ge, mè Juda kubọk ogwu ibot ido agan̄ keyilọ. (Ijik 37:​15-26) Nriran kè Obidaya ijeen̄ ibe ke “ebi uwu kè Josefu” megọọk ijijaka “ebi uwu kè Isọ” (Obid 18), nriran kè Jekaraya si itumu mkpọ ofolek Jioba inyanyan̄a “ebi uwu kè Josefu.” (Jek 10:6) Kpan̄asi Iferem, ire erieen̄ Josefu ke egwen me lek otoko Ijeren emen ekwukwu.​—Ichi 7:8.

Eyi irebe ibe ke ire erieen̄ Josefu ke esa irọ mkpọ me ikpa Ichichili 7:8 ikijeen̄ ibe ke nriran Jekọp obenebe sabum ikwube ikaan̄ mgbaan̄ me lek Ijeren emen ekwukwu. Ikup ufiak ibe eji eriọọn̄ ibe ke ire Jioba Awaji Ilile kè Jekọp, oria Jisọs Karais kubọk Ata Ogwu Òkpukpo Arọọn̄ ogwu osasa ugwem kan̄ inyi me ibot “arọọn̄.” (Jọn 10:​11-16) Jisọs Karais si ore ewuuk irak ijọn̄ enyi enamabe uwu mbuban Awaji eyi ogọbọ ebi Ijeren emen ekwukwu me inyọn̄. (Efes 2:​20-22; 1 Pita 2:​4-6) Ogwu Òkpukpo Arọọn̄, mè Ewuuk yi ikup me lek Awaji Ogwu Òkaan̄ Unye Geelek.​—Jọn 1:​1-3; Ikwaan̄ 7:56; Iburu 10:12; sa tọt me lek Ibeb 49:​24, 25.

ONYAN̄ ONAAN̄GE 9-15

INU UNYE OTU EWE OKUP ME USEM AWAJI OKWA ITỌN̄ 82-84

Mọnọ Irek Ilile Okaan̄be Bene

wp16.6 8 ¶2-3

Inu Eji Ekween̄be Inan̄a Me Lek Unọn Owulu Me Inyọn̄

Ebi ikiluk me Jeruselem miriọọn̄ lek agagawaji kubọk unọn okimalek inama uwu kan̄ ikam me akpalek uwu. Usini agagawaji chi ekinama uwu kiban̄ me emen uwu mbuban kè Solomọn. Usini mgbọ agagawaji echi okinama uwu kiban̄ me lek uwu mbuban acha geelek mikimun̄ ibe ke ere ya inwọn mè ire ere ema ebekikpukpo nsabọn kiban̄ me kpunu ene geege obosisaak ema.

Ogwu ogege ikpa Okwa Itọn̄ 84​—ire ene ge me lek bọn kè Kora, ogwu okisi ikwaan̄ me uwu mbuban nde ge me onyan̄ gweregwen geelek. itaba imaan̄ me lek uwu ofut cha okup me emen uwu mbuban mè iweek ikukup kubọk agagawaji enyi oluluk ibia me emen uwu Jioba, itumu ibe: “Jei Jioba Ogwukaan̄ Inyọn̄ mè Ijọn̄, uwu kwun̄ îjaan̄ uja enenen! Me atikọ, òkilọk emi, iin̄, ìkisoson emi lek irere Uwu Mbuban Jioba . . . Kpọ, ebi kè agagawaji ikike mîweek uwu kiban̄ imun̄; ebi kè ùyọrọ mînama uwu kiban̄ me agba ntook kwun̄, ere ema mêkibọọk bọn kiban̄; Jei Jioba, Ogwukaan̄ Inyọn̄ mè Ijọn̄, owu ore ogwu Ubọọn̄ n̄a, mè ire si Awaji n̄a.” (Okwa Itọn̄ 84:​1-3) Ire eji melek nsabọn kiji mikijeen̄ mbet lek ulọk mè unwọọn̄ yaage ikekigọọk ebi enyi Awaji igbaan̄ ititiin̄ ni?​—Okwa Itọn̄ 26:​8, 12.

w08 7/15 30 ¶3-4

Kikup Okem Okem, mè Kikaan̄ Unwọọn̄

Ukan mè ire orukan mokọt irọ ibe eji ekayaka ikirọ usini mkpọ me ikwaan̄ Jioba. Ire owu ire ute mè ire uga omokọt ikikeek ibe ke okayaka ikikaan̄ oruru ojot ojot inan̄a me lek nkween̄mkpọ agaga mè ire nkween̄mkpọ ntitiin̄ mije okifiat owuwa mgbọ mè efuuk kwun̄ ikisa ikpọ chieen̄ me lek asasa nsabọn̄ kwun̄. Ire, mokọt ire ibe ke ikekito chieen̄ me lek inu echi okpobokọt irọ okigban owu ibe okayaka ikimun̄ inu echi obokọt irọ ni?

Me obop obop acha oraraka, ogwu otoko kè Libai ge itumu inu ge okukup ọmọ me ejit enyi ikafet ọmọ ikọkọt irọ. Ikaan̄ irek ilile ikekisi ikwaan̄ nde iba me acha ge me emen uwu mbuban. Ire, itumu ulọk ọmọ okaan̄be ikekikup iriaak me agba lek ntook Jioba mgbọ geelek. (Itọn̄ 84:​1-3) Keke otap ubọk inyi ogwu enerieen̄ yi okigbe utoon̄-ejit ibe ikaan̄ ujot-owot ni? Iriọọn̄ ibe ke ikukukp egwe ge me oyet egep uwu Jioba ire irek ilile. (Itọn̄ 84:​4, 5, 10) Ubọk yaage si, kpan̄asi ikekito chieen̄ me lek mkpọ enyi eji kpebekọt irọ, eji esa ekemun̄ mè ekenwọọn̄ echi eji ebekọt irọ.

w20.01 17 ¶12

Jioba Awaji Kwun̄ Imọnọ Owu Ibene!

¹² Ire okikweek isi me lek orukan ge, riọọn̄ ibe ke Jioba iriọọn̄ mkpọ okije itibi. Beek ọmọ ibe itap ubọk inyi owu ufuna okomun̄ irek kwun̄ me oniin̄ onwọnwọn. Osibeek uriaak isan̄a, fuk Baibul inyi omun̄ ata usem echi Jioba okaan̄be inyi owu. To chieen̄ me lek ere echi okikpa ubọk Jioba osa imọnọ ebi usun̄ kan̄ ibene ire. Ike okifuk, omomun̄ ibe ke Jioba inwọn isa inyi otutuuk ebi ikigbe utoon̄-ejit ikitọbọ ebum inyi ọmọ.​—Itọn̄ 84:11.

Week Inu Unye Otu Ewe Okup Me Usem Awaji

it-1 816

Bọn Kpà-Nte

Eyi irebe ibe ke ikifet ikekikpọ chieen̄ ilọ me lek ebi ene kiban̄ okwube mè iyaka ire ebi kpekaan̄ unye, Jioba isa usem “bọn kpà-nte” ikisa irọ mkpọ isikitumu mkpọ ofolek ata irọrọ ebi Ijeren mè ire ubọk ema esabe ida lek ibọkọ me lek kan̄ ire. Mgbọ geelek mgbaan̄je ebi Ijeren me lek Jioba isinye, bọn kpà-nte ire ebi ekikpọ chieen̄ ijaan̄ me lek. Ire, mgbọ geelek mfeen̄ isiwa me ido ya bọn kpà-nte ire ebi ekikpọ chieen̄ ilọ me lek. (Itọn̄ 82:3; 94:6; Asaya 1:​17, 23; Jeri 7:​5-7; 22:3; Ijik 22:7; Jek 7:​9-11; Mal 3:5) Ufieek-otu Jioba ọmọ owa me lek ebi geelek ikitutuku bon kpà-nte. (Ikan 27:19; Asaya 10:​1, 2) Jioba igwen lek kan̄ Ogwu Unyan̄a (Urọk 23:​10, 11), Ogwu Ntap-Ubọk (Itọn̄ 10:14), mè Ute (Itọn̄ 68:5) isa inyi ebi ikup ikeya. Ire Ọmọ okitumu ikọ me ibot kiban̄ (Ikan 10:​17, 18), ikito ema njijin (Osia 14:3), ikitap ubọk inyi ema (Itọn̄ 146:9), mè ikisun̄ ema me ugwem.​—Jeri 49:11.

Ge me lek mkpọ ebesa iriọọn̄ ata ebi eyi Karais ire ubọk ema ekisa ijeen̄ ijijin me lek ebi ichchep nlom kiban̄ mè ire nte kiban̄ mè nga kiban̄ me mkpa. Jemis ogwu udun̄ Jisọs ige ibe: “Me isi Awaji ogwu òre Nte kiji, atata irọriọọn̄ Awaji, eyi ikakaan̄ge wọlọwọlọ inu geege me emen, ìre ene ikpọkpọ chieen̄ me lek ebi nwakpa mè ebi kpà-nte me emen ufialek kiban̄, mè ene ya itetet lek kan̄, inyi ijo inu eyi linyọn̄ ikakọt ìfiat ọmọ.”​—Jemis 1:27.

ONYAN̄ ONAAN̄GE 16-22

INU UNYE OTU EWE OKUP ME USEM AWAJI OKWA ITỌN̄ 85-87

Uriaak Okitap Ubọk Inyi Eji Ekọt Ekeme

w12 5/15 25 ¶10

Ire Umin Kè Jioba Okijeen̄ Me Ugwem Kwun̄ Ni?

¹⁰ Ufana umin kè Jioba ikijeen̄ me ugwem kiji, eji ebekirariaak “uriaak mgbọ geelek.” (Rom 12:12) Eji ekebeek Jioba ibe itap ubọk inyi eji eketọbọ ebum enyi ọmọ me oniin̄ otatat. Eyi isibi ibe ke eji ebekibebeek ọmọ ekwukwu mbuban, ichechieek onyenye, unye isasa ikikọt ijit ntọ-mkpọ mè ‘ikekijeen̄ atikọ kan̄ me oniin̄ òtatat.’ (2 Tim 2:15; Mat 6:13; Luk 11:13; 17:5) Ike gwun̄ okiyaka lek imaan me lek nte kan̄, ikup ufiak si ibe eji ekeyaka lek emaan me lek Jioba Nte kiji ogwu okup me emen inyọn̄. Ire eji ibeek ọmọ ibe itap ubọk inyi eji etọbọ ebum enyi ọmọ ejaan̄, ejit kiji inye ibe ke motap ubọk inyi eji. Eji ekakekeek mgbọ geege ibe ke eji ekisisisaak ọmọ! Kpan̄asi ikeya, me emen uriaak kiji, eji ekemin ọmọ, eketọn̄ ọmọ, ekeweek ntọ-ubọk kan̄ ogak ge me mgbọ eji ekikweek isi me lek ufialek mè ekebeek omọ ibe itap ubọk inyi eji eketọbọ ebum enyi ọmọ me oniin̄ obokimin erieen̄ mbuban kan̄.​—Itọn̄ 86:12; Jemis 1:​5-7.

w23.05 13 ¶17-18

Ubọk Jioba Okisa Ifọọk Otu Uriaak Kiji

¹⁷ Fuk Okwa Itọn̄ 86:​6, 7. Ogwu okwa Debit iriọọn̄ ibe ke Jioba monọ mè ifọọk otu uriaak kan̄. Owu si mokọt ikaan̄ mbet lek utoon̄-ejit yaage. Mfufuk eji etumube mkpọ ofolek me ibot usem keyi irọ ibe eji eriọọn̄ ibe ke Jioba monyi eji iriọọn̄-inu mè unye eji eweekbe isasa ikime. Mokọt isa bọn ute irieen̄ mè ibaan̄ mè ire ebi kpekitọbọ inyi ọmọ me mgbọ keyi isa itap ubọk inyi eji.

¹⁸ Ikerere ibe ke usini mgbọ Jioba ikpobofọọk otu uriaak kiji ike eji eweekbe, eji miriọọn̄ ibe ke mofọọk eji otu. Monyi eji mkpo eji echubọk iweek me mgbọ eji echubọk iweek. Eya orọ kweek nye kiriaak uriaak, mè chieek nye ibe ke Jioba mokpọ owu chieen̄ me lek me mgbọ keyi mè iche “uche òjot òjot inyi inu geelek òkaan̄ ugwem, ubọk îweekbe” me emen aya inyọn̄ okinu.​—Itọn̄ 145:16.

Week Inu Unye Otu Ewe Okup Me Usem Awaji

it-1 1058 ¶5

Ejit

“Sa Otutuuk Ejit Kwun̄” Tọbọ Ebum Inyi Jioba. Ufuna ejit okup me emen akpalek kiji ikisi ikwaan̄ ijaan̄, otutuuk nriro okup me emen ibososo, ire, ejit eji ekisa itobo ebum inyi Jioba mokọt iche. Debit ibeek Jioba ibe: “Rọ mè ǹsa ejit ge ǹkemmin erieen̄ kwun̄,” eyi ikijeen̄ ibe ke usini mgbo ke ene ikpobokima mè ikitet ukpook me lek Awaji me lek ejit ososo. (Itọn̄ 86:11) Mbet ogwu okup ikeya ikakisa me uyok uyok ejit ikisa itọbọ ebum inyi Awaji. (Itọn̄ 119:113; Ichi 3:16) Ene si mokot ikaan̄ ejit iba, orere ikisa ikekisi ikwaan̄ inyi nte uwu iba mè iyaka ire ikifiaan̄ ikitumu mkpọ ge me mgbọ ikikeek ofifi mkpọ. (1 Mfuf 12:33; Itọn̄ 12:2) Jisọs ichuchubọk itumu ikeme mbet lek eru yi.​—Mat 15:​7, 8.

ONYAN̄ ONAAN̄GE 23-29

INU UNYE OTU EWE OKUP ME USEM AWAJI OKWA ITỌN̄ 88-89

Mkpulu Jioba Onwọn Ichit

w17.06 28 ¶5

Bieen̄ Mkpulu Jioba Nye!

⁵ Ofifi mkpọ ọmọ owa si orọrọ ibe Jioba igbe ogwu obokikpulu. Ikikpulu melek unen oyerebet. Itumu ibe: “Emi ìre Jioba ogwu ata ejit, mè ogwu unen oyerebet, mè ogwu òkirọ ata irọrọ me linyọn̄. Irọriọọn̄ inu chi ore inu òkibele emi ejit.” (Jeri 9:24) Ikakisa ikan ebilene ebi ekasoge egebe isa ikitumu ifieek inu otatat mè eyi ọlọlọ. Ikirọrọ mkpọ onenen̄e mgbọ geelek, eyi irọ ibe ọmọ ikọt ikinyi ebilene ikan echi ema ebekiluk igọọk. “Ata irọrọ mè unen oyerebet ore inu [isabe] itọbọ ọdọ mkpulu [kan̄],” eya orọ, eji mekọt ikaan̄ utoon̄-ejit ibe ke otutuuk ikan, onineen̄ mè ntumu-mfieek kan̄ itatat. (Itọn̄ 89:14; 119:128) Me ntikwo kan̄, ikerere ibe ke itumu ibe ke ubọk Jioba okikpulu ikanwọn, Setan ikakọt irọ ibe inyọn̄ yi ire ere unen oyerebet obokikup.

w17.06 29 ¶10-11

Bieen̄ Mkpulu Jioba Nye!

¹⁰ Ubọk Jioba okikpulu ikakup gban, ikakitet ene me unye ubọk si ibe esiki ibot enyi ọmọ. Mkpulu kan ikinyi ene utelelek mè unwọọn̄. (2 Kọr 3:17) Debit itumu ibe: “Òrirọ mè umin ubọọn̄ ìkakana [Awaji] okokop; unye melek unwọọn̄ ìjojot me Uwu Mbuban kan̄.” (1 Mfuf 16:​7, 27) Ubọk yaage si, ogwu okọt Etan ige ibe: “Ikpele ubelejit òwa inyi ebi ìkigọọk ikọt okwa unwọọn̄ isa itọn̄ owu; Jioba, isi kwun̄ môtoon̄ me lek kiban̄. Mije kwun̄, ema ekinwọọn̄ unwọọn̄ otutuuk usen, mè ikitọn̄ owu enenen me ata irọrọ kwun̄.”​—Itọn̄ 89:​15, 16.

¹¹ Ikekigwu nkeek ikom mgbọ geelek me lek ubọk Jioba osabe inwọn ire morọ ibe eji echieek enye ibe ke ire mkpulu Jioba onwọn ichit. Ibokup me lek kiji ike ikupbe me lek ogwu okọt ogwu otumu ibe: “Ikukup me uwu kwun̄ egwe ge gaalek îgak ikukup obop usen me ofifi ere!” (Itọn̄ 84:10) Ubọk igbebe ibe ikup ire ya. Eyi irebe ibe ke ire Jioba orom eji, iriọọn̄ mkpọ eji eweekbe isasa ikaan̄ ubelejit. Inyi eji si mkpọ eji eweekbe isasa ikaan̄ ubelejit. Inu geelek iweekbe eji me ubọk ire me unwọn kiji, mè ire si mkpọ obosa ikpele unwọọn̄ ijet eji. Ubọk ikupbe ire ya ikerere ibe ke inu iweekbe eji me ubọk moweek ibe eji egwa usini ngwugwa.​—Fuk Asaya 48:17.

w14 10/15 10 ¶14

Kan Ichechiek Onyenye Me Lek Ama Ubọọn̄

¹⁴ Kpọ nu use Jioba ochieekbe Debit Ogwu Ubọọn̄ Ijeren ukot ikaan inan̄a me lek inyan̄a-ibot kè Debit. (Fuk Samien Ey Òso Iba 7:​12, 16.) Jioba irọ inyan̄a-ibot keyi melek Debit me mgbọ ikikpulu me Jeruselem. Ichieek Debit use ibe ke ogwu Mesaya ibonan̄a me owot iman kan̄. (Luk 1:​30-33) Sa me lek use yi, Jioba irọ ibe eriọọn̄ owot iman gwun̄ echieekbe me use ya obonan̄a, mè itumu ibe ke gwun̄ Debit ge obore “ogwu îrebe unen kan̄” irere Ogwu Ubọọṉ Ama Ubọọn̄ Awaji. (Ijik 21:​25-27) Inan̄a me ubọk Jisọs, ogboon̄ ubọọn̄ kè Debit “môkup ire mgbọ geelek.” Me atikọ, gwun̄ kè Debit “môkup ire mgbọ geelek, kubọk ura òkup me isinyọn̄.” (Itọn̄ 89:​34-37) Iin, mkpulu ogwu Mesaya ikpobojijaka, inu geelek irọbe si ibobabia isire mgbọ geelek!

Week Inu Unye Otu Ewe Okup Me Usem Awaji

w93 1/1 p.32

“Inu Ijejeen̄ Ògbegbe Ibe Etoon̄ Ejit Me Lek”

ME UJỌNỌ ujọnọ mgbọ sabum enirorom ebilene me inyọn̄ ijọn̄ yi, onyan̄ ikitotoon̄ me isi inyọn̄ me eririeen̄. Me okike mgbọ ge owuwa ebi ene ekitọtọbọ ebum inyi kubọk ire awaji. Ogwu Giris ge okige mkpọ ibe ke ire onyan̄ ore ota ere ibot ejit ebi ata irọrọ okifo mgbọ geelek ema esikwu. Me urọk ebi Baltic ge, ebe ke onyan̄ ire enerieen̄ mè ire nlom ura. Ke ema ekakaan̄ ufialek me mbat-olom kiban̄ enyi orọrọ ibe onyan̄ ilibi inan̄a me lek nwa kan̄ mè ikakigọọk nwa kan̄ orere ura ikisibi owuwa mgbọ!

Me chereyi ebi ijija mè ebi ikimin iniin̄ ene, ekibebene chieen̄ ikpọ onyan̄ mè ekekeek mkpọ ofolek ima. Me mkpọ obet lek akọp acha ita oraraka, ebi Science mifiat owuwa ikpoko isasa iria ebi ene isi lek onyan̄ ema mika me isa usini okpọkọ ewuuk inu ifuna esa ekween̄mkpọ. Ikaan̄ mkpọ ge eji eriọọn̄ ijaan̄ ofolek onyan̄. Egwe geelek me mgbọ otatat ibokisisibi, mè ochep. Ikisisibi itat me ibot mgbọ kan̄ ire lek mekọt ifuk ubọk isabe ije mè usini mkpọ orọrọ me lek kan̄ owuwa acha oraraka.

Mgbọ geelek ebi Ijeren isikpọ onyan̄, ikikeek ema inu ge okukup uyeke uyeke. Use Awaji ocheekbe Ogwu Ubọọn̄ Debit ibe ke ogboon̄ ubọọn̄ kan̄ ibobabia isire mgbọ geelek. Awaji itumu inyi ọmọ ibe: “Ike onyan̄ obiabe ikam me akpabin inyọn̄ kubọk inu ijejeen̄ ògbegbe ibe etoon̄ ejit me lek, ikeya si ke ogboon̄ ubọọn̄ [gwun̄ kè Debit] obobia ire mgbọ ikakaan̄ge itata.” (Okwa Itọn̄ 89:​35-37) Nriran yi irọ iso me lek Jisọs, “Gwun̄ kè Debit.” (Luk 18:38) Me mgbọ ikwube, mijomo Jisọs me mkpa kubọk ekwukwu eyi ikakikwu, ifofo emen inyọn̄. (Ikwaan̄ 2:​34-36) Ike mgbọ ojebe erọrọ ọmọ ubọọn̄ kubọk Ogwu Ubọọn̄ Ama Ubọọn̄ Awaji enyi okup me emen inyọn̄. (Ichichili 12:10) Ama Ubọọn̄ ya okikpulu me mgbọ keyi, mokeke “inye ire mgbọ geelek.” (Danien 2:44) Me oniin̄ okup ikeyi, Jisọs ogwu okeke ichit chieen̄ owot iman kè Debit ogwu ikpoboyaka ikwu, ibobabia kubọk onyan̄ enyi orere “inu ijejeen̄ ògbegbe ibe etoon̄ ejit me lek.”

Eya orọ, mgbọ geelek osikimun̄ onyan̄ okitoon̄ me eririeen̄, kikeek use Awaji ochieekbe Debit, mè kitọn̄ ọmọ me lek Ama Ubọọn̄ ya enyi okikpulu me mgbọ keyi mè ikup si isire mgbọ geelek. Ama Ubọọn̄ yi mosa itọn̄ ijet Awaji mè ugbana mgbọ ikakaan̄ge itata isa ijet ebilene ebi ikigbe utoon̄-ejit.​—Ichichili 11:15.

ONYAN̄ ONAAN̄GE 30–AKỌP ONYAN̄ 6

INU UNYE OTU EWE OKUP ME USEM AWAJI OKWA ITỌN̄ 90-91

Toon̄ Ejit Me Lek Jioba Inyi Oluk Ujọnọ Ugwem

wp19.3 5 ¶3-5

Efuuk Ebilene Ekitap Isasa Iluk Ujọnọ Ugwem

Ikare otutuuk ebi science echieek ibe ke ugwuun ekinwo isasa irọ ibe ene ekakan mokọt irọ ibe ene eluk ejọnọ egak ubọk ekiluk me chereyi. Ikerere ibe ke me mkpọ obet lek efit acha iba oraraka ke ebilene mekiluk ugwem ijọnọ, eyi ire bak me lek ke ema mekisun̄ lek kiban̄ me utana, mekirọ ugwuun si echi obokọt igwa usini orukan. Usini ebi ikikween̄ mkpọ ofolek akpalek ebilene echieek ibe ke ugwem ebilene ire acha enyi ibokọt ire.

Me mkpọ oraraka obop acha ita mè efit acha go Mosis ige ibe: “Otu ifuk acha ugwem kiji ìre akọp acha jaaba gaalek; ogwu ònyenye lek oluk iso akọp acha jeeta. Ire, otutuuk mgbọ ya ìre ufialek mè kwulukwulu; sọnja mgbọ, ugwem îra ita, eji mîra ijibi wup.” (Okwa Itọn̄ 90:10) Ekakpọge chieen̄ me lek efuuk ebi ene ekitap isasa irọ ibe ugwem ijọnọ, ugwem ikpọkpọ ibia ikeya ike Mosis okpabe.

Ire, usini mkpọ Awaji orombe kubọk eyi ekigwen red sea urchin mè eyi ekigwen quahog clam (abaka mbuk) mokọt iluk efit acha iba. Usini uti kubọk eyi ekigwen giant sequoia mokọt iluk obop obop acha. Ire isa ujọnọ ugwem inu chi isa itọ me lek echi ebilene eji mekọt ikido ibe: ‘Ire akọp acha jaaba mè iyaka ire akọp acha jeeta gaalek ore otutuuk ugwem eji ekaan̄ iluluk ni?’

wp19.1 5, box

Keke Ore Erieen̄ Awaji?

Owuwa ebi ene mikikeek mkpọ ofolek idodo yi. Usini mgbọ owu si ora ikikeek mkpọ ofolek. Mekọt ido mbet lek idodo yi: Ire Awaji orom inyọn̄ mè ijọn̄, ere owa ke Awaji onan̄a?

Owuwa ebi science michieek ibe ke otutuuk inu geelek okup me inyọn̄ mè ijọn̄ ikaan̄ mbene. Eyi ije ikike me lek adasi usem okup me emen Baibul eyi obe: “Me ibebene, Awaji îrom isinyọn̄ mè linyọn̄.”​—Ibebene 1:1.

Inyọn̄ mè ijọn̄ ikpobokọt irom lek kiban̄; kpebekọt isibi me lek kiban̄ gaalek. Mkpo ikpobokọt inan̄a isibi me lek mkpọ ikakup. Ire kpunu inu geege okukup sabum inyọn̄ mè ijọn̄ onisibi, inyọn̄ mè ijọn̄ kpomokup me chereyi. Ikerere ibe ke mokọt iyọt igogobo itet, mokaan̄ ogwu ikakaan̄ ibebene mè itatat ogwu ororom otutuuk inu chi. Ire Jioba Awaji ogwu orere ekwukwu me ikaan̄ unye mè iriọọn̄-inu ore Ene Ya.​—Jọn 4:24.

Ofolek Awaji Baibul ibe: “Sabum owu onirorom ogoon̄; sabum owu onirorom lek ijọn̄ mè otutuuk linyọn̄; bene me mgbọ ikakaan̄ge itata si re mgbọ ikakaan̄ge itata; owu ore Awaji.” (Okwa Itọn̄ 90:2) Eya orọ, Awaji ikakaan̄ ibebene. Ire “me ibebene” ke irom inyọn̄ mè ijọn̄.​—Ichichili 4:11.

w22.06 18 ¶16-17

Ubọk Ima Okisa Itap Ubọk Inyi Eji Etim Egak Ukpook

¹⁶ Setan iriọọn̄ ibe ke eji mima ugwem kiji. Ibe ke eji minyi inu geelek eji ekaan̄be ikerere mgbaan̄je kiji me lek Jioba isasa ibem ugwem kiji. (Jobu 2:​4, 5) Eya ire ataak! Ire, enyi irebe ibe ke ire ọmọ ore “ogwu òkakaan̄ unye eyi mkpa,” Setan ikisa isasa ukpook mkpa okup me emen kiji isa irọ ibe eji ejit Jioba. (Iburu 2:​14, 15) Me usini mgbọ, ebi ikirọ nkeek Setan mekọt itumu ibe ke mekpan̄ ebi usun̄ Jioba me ire ema kpetele Jioba. Me ofifi irek Setan mokọt iweek isasa orukan ge eji ekaan̄be isa irọ ibe eji efiat ikan Awaji. Ebi ofia ebeke, mè iyaka ire ebi uwu kiji ebi kpekup me ntitiin̄ mekọt ikinyi eji ukeme ibe ebọkọ eje, mkpọ eyi ojeje ikeme ikan Awaji. Mè iyaka ire ene ge mokọt ibe me eji ebọkọ ngwagwa ge enyi ojeje ikeme onineen̄ Baibul.

¹⁷ Ikerere ibe ke eji kpeweek ikwukwu, eji miriọọn̄ ibe ke Jioba ibokukup inye ikima eji ikerere me ire eji ekwu. (Fuk Ebi Rom 8:​37-39.) Mgbọ geelek ebi unene Jioba esikwu, ikisusun̄ ema me nkeek kan̄ kubọk ema ekukup me ugwem. (Luk 20:​37, 38) Ikilọlọk ọmọ iyayaka isa ema inu me ugwem. (Jobu 14:15) Jioba ikpe mkpukpe omimin enenen ufuna eji ekaan̄ “ugwem ikakaan̄ge itata.” (Jọn 3:16) Eji miriọọn̄ ubọk Jioba osa ima mè ikikpọ eji chieen̄ me lek ire. Eya orọ, kpan̄asi itetele Jioba mgbọ geelek lek kiji ikanye mè iyaka ire esibe ke mekpan eji, eji ekisi lek kan̄ ibe inyi eji ukarajit, iriọọn̄-inu mè unye. mkpọ Valérie mè ogwu olom erọbe ire ya.​—Itọn̄ 41:3.

Week Inu Unye Otu Ewe Okup Me Usem Awaji

wp17.5 5

Ire Okaan̄ Ogwu Osat Ogwu Okibem Owu Ni?

Baibul ikajeen̄ ibe ke eji ge ge mikaan̄ ogwu osat ge okibem eji. Atikọ ibe ke itumu ibe: “Ikakpọ ene geege me etete asa nsabọn chi [ebi udun̄ Karais], chieen̄ ìsiki, mije, ǹkitumu inyi enyi ibe, me emen inyọn̄, ebi osat Awaji ìkikpọ chieen̄ me lek nsabọn chi ekikup me isi kè Nte n̄a ogwu òkup me emen inyọn̄ mgbọ geelek.” (Matiyu 18:10) Usem Jisọs ikasibi ibe ke eji ge ge mikaan̄ ogwu osat ge okikpọ eji chieen̄ me lek, kpan̄asi ikeya, Jisọs ikitumu ibe ke ebi osat Awaji mikaan̄ ulọk me lek ebi udun kan̄ ge ge. Eya orọ, ebi usun̄ Awaji kpekigen ibak itap lek kiban̄ me unan me nkeek ibe ke ebi osat Awaji me mbem ema.

Ire eya isibi ibe ke ebi osat kpekitap ubọk inyi ebilene ni? In̄-in̄. (Okwa Itọn̄ 91:11) Usini mikichieek inye ibe ke Awaji isa ebi osat kan̄ isa ibem ema mè inyi ema ntọ-ubọk. Kenneth, ogwu ekpabe mkpọ ofolek me mbene ibot usem keyi ire ene ge okekeek ikeya. Ubọk geelek ibe ke eji kpebekọt iriọọn̄ isan̄a me ire mkpọ Kenneth otumube ire atikọ. Owuwa mgbọ Ebi Ata-Ikọ Jioba mikimun̄ mkpọ okijeen̄ ibe ke ebi osat mitap ubọk inyi ema me ikwaan̄ uko. Ire, eyi irebe ibe ke eji kpekimun̄ ebi osat, eji kpebekọt itumu ubọk Jioba okisa ema ikisa itap ubọk inyi ene ge ge. Ire ikalọ eji itọtọn̄ Jioba me lek ntap-ubọk geelek inyibe eji.​—Ebi Kọlọsi 3:15; Jemis 1:​17, 18.

AKỌP ONYAN̄ 7-13

INU UNYE OTU EWE OKUP ME USEM AWAJI OKWA ITỌN̄ 92-95

Ikekitọbọ Ebum Inyi Jioba Ore Inu Onwọnwọn Ichit Me Ugwem!

w18.04 26 ¶5

Ebi Ijija, Ire Enyi Ekitọ Chieen̄ Me Lek Inu Emen Ekwukwu Ni?

⁵ Okpan okpan inu orọrọ eji ekito inu emen ekwukwu me isi ire isasa ijeen̄ Jioba ubọk eji esabe ibele ejit ire me lek ima kan̄ mè otutuuk inu geelek irọbe inyi eji. Ogwu okọt itumu ibe: “Îjaan̄ ibe ekenyi owu Jioba itọn̄. . . Jei Jioba, ikpele ikwaan̄ owu okisi okirọ ejit ibele emi; bak me lek inu echi owu orọbe ke nkikọt okwa.” (Itọn̄ 92:​1, 4) Kubọk ogwu ijija, kikeek otutuuk mkpọ Jioba onyibe owu. Ugwem kwun̄, ichechiek kwun̄, Baibul, ntitiin̄ kan̄ mè ata ikpọchieen̄ ofolek mgbọ okup me isi. Ikekimọnọ mkpọ emen ekwukwu ikup ufiak ire oniin̄ ge isasa ijeen̄ itọn̄ me lek otutuuk ugbana chi Awaji onyibe owu echi okitaba owu iriaak me lek kan̄.

w18.11 20 ¶8

Ekene Okineen̄ Nkeek Kwun̄?

⁸ Kubọk ata ute mè ire uga, Jioba iweek ibe nsabọn kan̄ eluk ugwem onwọnwọn ichit. (Asaya 48:​17, 18) Eya orọ ikijeen̄ mkpọ echi oborọ ibe eji eluk ugwem onwọnwon ichit mè ubọk eji ebekisa irọ mkpọ me lek ebi ofifi ene. Ikiweek ibe eji ekekeek mkpọ ike ọmọ okikeek mè ekerọ mkpọ si ike ọmọ okikirọ. Ikekiluk ugwem ikeya ikakigban eji ata mkpọ geege, kpan̄asi ikeya ikitap ubọk inyi eji ekekeek mkpọ ejaan̄, mè ere ata ene. (Itọn̄ 92:5; Urọk 2:​1-5; Asaya 55:9) Ikitap ubọk inyi eji erọ ntumu-mfieek echi oborọ ibe eji ekekaan̄ ubelejit mè ekenwọọn̄ ugwem. (Itọn̄ 1:​2, 3) Me atikọ, ikekikeek mkpọ kubọk Jioba inwọn enenen mè ikiro eji si oruru!

w20.01 19 ¶18

Jioba Awaji Kwun̄ Imọnọ Owu Ibene!

¹⁸ Ike eji ekikan, eji miriọọn̄ ibe ke Jioba ikaan̄ ikwaan̄ inyi eji. (Itọn̄ 92:​12-15) Jisọs ijeen̄ eji ibe me ekakpọge chieen̄ me lek ubọk unye kiji mè iyaka ire mkpọ eji erobe osabe isip ire me chieen̄ kiji, ke Jioba ikimọmọnọ inu geelek eji erọbe me ikwaan̄ kan̄ ibene. (Luk 21:​2-4) Eya orọ, to chieen̄ me lek mkpọ echi obokọt irọ. Kubọk inu njeen̄ omokọt itumu mkpọ ofolek Jioba, iriaak uriaak me ibot ebi bọn Nte kwun̄ mè itap efuuk me owot ebi ofifi ene ibe ekup enye ekegbe utoon̄-ejit. Jioba ikimun̄ owu kubọk ogwu melek kan̄ ekigbaan̄ isi ikwaan̄, ikare mije inu orọbe, ire, mije okup me mbem lek ikekisiki ibot inyi ọmọ.​—1 Kọr 3:​5-9.

Week Inu Unye Otu Ewe Okup Me Usem Awaji

cl 176 ¶18

‘Ìre Ekene Oriọọn̄ Ubọk Iriọọn̄-Inu Awaji Osabe Idọk Iyaka?’

¹⁸ Kpọ nu ubọk ogwu ikwaan̄ Pọọlu osa ikpa ubọk iriọọn̄-inu Jioba osabe ikup esese. Ido ibe: “Ìre ekene oriọọn̄ ubọk Awaji osabe ibọọn̄ ubọọn̄ iyaka? Sà ìre ekene oriọọn̄ ubọk iriọọn̄-inu kan̄ mè ifuk-ibot kan̄ osabe idọk iyaka?” (Ebi Rom 11:33) Usem Pọọlu osabe irọ mkpọ me ere yi ijeen̄ ibe ke inu ya ichubọk itet ọmọ lek. Ijeen̄ ibe ke ichubọk ikaan̄ ukpook mè ulibi me lek iriọọn̄-inu Jioba okaan̄be. Usem Gris isabe irọ mkpo eyi ekababe “osabe idọk iyaka” ire mbet lek usem yaage ekisa irọ mkpọ esikitumu mkpọ ofolek “udọn̄ ikakaan̄ge okputut.” Usem kan̄ itap ubọk inyi eji egobo inu yi etet ejaan̄. Eji esikikeek mkpọ ofolek iriọọn̄-inu Jioba ikup kubọk eji ekikpọ emen udọn̄ ikakaan̄ge okputut, ere odọdọk mè iwele ire lek eji kpekọt igobo itet ubọk isabe idọk mè iwele iyaka. (Okwa Itọn̄ 92:5) Ire eyi ikajeen̄ owu mbet lek ene Jioba orebe ni?

AKỌP ONYAN̄ 14-20

INU UNYE OTU EWE OKUP ME USEM AWAJI OKWA ITỌN̄ 96-99

“Kilook Ata Etip”!

w11 3/1 6 ¶1-2

Keke Ore Ata Etip?

EBI EYI KARAIS ekilook “ata etip eyi ama ubọọn̄” sa me ikekitumu mkpọ ofolek, ema ekijeen̄ ibe ke ire Ama Ubọọn̄ ya obokpulu otutuuk linyọn̄ me mgbọ okup me isi me ata irọrọ. Ire, mikisa usem “ata etip” ikisa irọ mkpọ me owuwa owuwa oniin̄ me emen Baibul. Kubọk inu njeeṅ, mikitumu mkpọ ofolek ata “etip unyan̄a” (Okwa Itọn̄ 96:2); “ata etip . . . eyi Awaji” (Ebi Rom 15:16); mè “ata etip ofolek kè Jisọs Karais.”​—Mak 1:1.

Me mgbidim ata etip yi igobo otutuuk atikọ echi Jisọs otumube mè echi ebi udun̄ kan̄ egebe. Sabum ifobe emen inyọn̄, Jisọs itumu inyi ebi udun̄ kan̄ ibe: “Eya orọ, ìje ìsi ìrọ inyi otutuuk ebi ido geelek me linyọn̄ ekana ebi ìkigọọk emi me udun̄, mè [itap ema me mun̄] me erieen̄ eyi Ute, mè erieen̄ eyi Gwun̄, mè erieen̄ eyi Ekwukwu Mbuban, mè ìjeen̄ ema inu, inyi ema ekerọ otutuuk inu geelek ntumube ibe enyi ekerọ.” (Matiyu 28:​19, 20) Eya orọ, ikwaan̄ ata ebi eyi Karais ikakpọkpọ ire gaalek irọrọ ibe ebi ene eriọọn̄ mkpọ ofolek Ama Ubọọn̄; ema ebetatap efuuk iro inyi ebi ene ekana ebi udun̄ kè Karais.

w12 9/1 16 ¶1

Keke Oborọ Me Usen Oyerebet?

Ike egwookbe me ogugo okup me agan̄ ubọk ulom, owuwa ene ekikeek ibe ke me Usen Oyerebet ke mesa ego ego ebi ene inu me isi ogboon̄ ubọọn̄ Awaji inyi ifieek ema oyerebet igọọk me lek inu ema erọbe iraka​—usini ene mebọkọ mkpukpe ugwem me emen inyọn̄ me mgbọ usini ene ebekibọkọ ufialek me emen ukan̄. Ire, Baibul ijeen̄ ibe ke ibot ibot Usen Oyerebet ire isasa inyayan̄a ebi ene isibi me ubọk ijo oyerebet. (Okwa Itọn̄ 96:13) Awaji igobo Jisọs ibe ire Ogwu Oyerebet ogwu obosa uneen̄ oyerebet ijet bọn̄ ebilene.​—Fuk Asaya 11:​1-5; Ikwaan̄ 17:31.

w12 9/15 12 ¶18-19

Esuuk Mokup Me Obop Acha Ge Mè Isire Mgbọ Geelek

¹⁸ Obọp ge ya ikayaka ikup karake Setan orọbe ibe ebilene akpaka ibot enyi mkpulu Jioba. Ire, karake acha 1914, Jisọs Karais okirọ mkpọ sọnja sọnja isasa imun̄ ibe ke obọp ge mè irọrọ inu me ejit ge iyaka ikup. (Efes 1:​9, 10) Me emen Mkpulu Obop Acha Ge Kè Karais, uyeke uyeke mkpọ echi eji kpemumun̄ me mgbọ keyi morọ iso. Eya isiraka “òta inu geelek,” orere ota Mkpulu Obop Acha Ge Kè Karais monenire. Keke oboro me mgbọ ya ni? Ikerere ibe ke minyi ọmọ “unye me lek otutuuk inu geelek òkup me emen inyọn̄, mè echi òkup me linyọn̄ keyi,” Jisọs ikpobotele ibe unye ya iniin̄ ọmọ ibot. Ikakaan̄ me ejit ibọbọkọ irek mkpulu Jioba. Mosa me nsiki lek ikana “mkpulu kan̄ itap me ubọk Awaji Ute.” Ibosa irek mè unye kan̄ eyi osibi esese isa imin Awaji​—Mat 28:18; Filip 2:​9-11.

¹⁹ Me mgbọ ya, otutuuk ebi ikup me irak mkpulu Ama Ubọọn̄ me inyọn̄ ijọn̄ keyi ire ebi isoso ikup. Ema megọọk akpat ukot Jisọs me isa me nsiki lek me ekatetge ema me ubọk unye ibọkọ Jioba itap kubọk ogwu mkpulu kiban̄. Ema mekaan̄ irek isasa ijeen̄ ulọk ema ekaan̄be irọrọ ikeya sa me inwọnwọnọ ota ntọ-mkpọ. (Ichi 20:​7-10) Eya isiraka, mefiat ebilene mè ebi osat geelek ikeke ikeme mkpulu Jioba isire mgbọ ikakaan̄ge itata. Keek nu mbet lek unwọọn̄ mè ubelejit obokup me mgbọ ya! Otutuuk inu geelek okup me emen inyọn̄ mè inyọn̄ ijọn̄ ebekisa me ubelejit ikitọn̄ Jioba, ogwu obonire “Ogwukaan̄ otutuuk inu geelek, mè ire Ogwu Ibot Mkpulu me inu geelek.”​—Fuk Okwa Itọn̄ 99:​1-3.

Week Inu Unye Otu Ewe Okup Me Usem Awaji

it-2 994

Okwa

Ikare me ikpa Okwa Itọn̄ gaalek ke etumu mkpọ ofolek “aya okwa,” Asaya mè ogwu ikwaan̄ Jọn si mige mkpọ ofolek. (Itọn̄ 33:3; 40:3; 96:1; 98:1; 144:9; 149:1; Asaya 42:10; Ichi 5:9; 14:3) Mgbọ ekiwọlọ usem okukup ikana owuwa ere ekisa usem yi “aya okwa” irọ mkpọ, ijeen̄ ibe ke ekikọt okwa chi mije ayaya mkpọ ge orọrọ ofolek ubọk Jioba okisa ijeen̄ unye kan̄ kubọk ogwu ogbegbe ikpukpulu inyọn̄ mè ijọn̄. Ike esabe me unwọọn̄ itumu me ikpa Okwa Itọn̄ 96:10: “Jioba ìre ubọọn̄.” Ibet lek ayaya inu obọbọkọ irek ofolek ubọk Jioba osabe ijeen̄ unye kan̄ kubọk Ogwu Ubọọn̄ mè mkpọ inu ya osibibe me emen inyọn̄ mè inyọn̄ ijọn ore okpan okpan mkpọ ekikọt me emen “aya okwa” yi.​—Itọn̄ 96:​11-13; 98:9; Asaya 42:​10, 13.

AKỌP ONYAN̄ 21-27

INU UNYE OTU EWE OKUP ME USEM AWAJI OKWA ITỌN̄ 100-102

Jeen̄ Itọn̄ Me Lek Ima Jioba Enyi Okikup Ire Mgbọ Geelek

w23.03 12 ¶18-19

Inu Oborọ Ufuna Okọt Okaan̄ Ntap-Me-Mun̄

¹⁸ Ima okaan̄be me lek Jioba ore eru onwọnwọn ichit okaan̄be. (Fuk Urọk 3:​3-6.) Ima onyenye okaan̄be me lek Awaji motap ubọk inyi owu okọt ochichini ufialek geelek. Owuwa mgbọ Baibul ikitumu mkpọ ofolek ima okikup ire mgbọ geelek eyi Jioba okaan̄be me lek ebi usun̄ kan̄ ikigbe utoon̄-ejit. Eyi isibi ibe ke Jioba ibokukup inye ikima ebi usun̄ kan̄, ikpobojuuk ema itele (Itọn̄ 100:5) Awaji irom owu me mbet kan̄. (Ibeb 1:26) Ike owa ke obokọt ijeen̄ mbet lek ima yi ni?

¹⁹ Adasi mkpọ oborọ ire ikekitọn̄ Jioba. (1 Tes 5:18) Egwe geelek kido lek kwun̄ ibe, ‘Ike owa ke Jioba osa ijeen̄ emi ibe ke ọmọ ima emi?’ Osido isan̄a, tọn̄ Jioba me emen uriaak kwun̄, tumu usini mkpọ echi irọbe inyi owu. Mun̄ inu echi Jioba orọbe isasa ijeen̄ ibe ke ima owu, kubọk irọ inyi owu gaalek ike ogwu ikwaan̄ Pọọlu omun̄be. (Fuk Ebi Galesia 2:20.) Do lek ibe, ‘Ire nweek ijejeen̄ Jioba ibe ke nma ọmọ ike imabe emi ni?’ Ima okaan̄be me lek Jioba motap ubọk inyi owu ojit ntọ-mkpọ, mè okọt ochichini ufialek geelek. Motap ubọk inyi owu okup onye okorọ mkpọ echi oborọ ibe mgbaan̄je kwun̄ melek Jioba inye, mè okup onye okijeen̄ Jioba egwe geelek ibe ke oma ọmọ.

w23.02 17 ¶10

“Ìgwọk Chieen̄, mè Ìkup Me Mbem!”

¹⁰ Usini mkpọ unan eji ebejit ire ikekirọ kubọk eji mikaan̄ ulọk idodo mè iyaka ire ibabat ene me mgbọ eji kpekaan̄, ikekinwo uga miin, ikekirie uga inorie, ikekitumu usem obokinaan̄ ene ejit, ikekikpọ ogugo okijeen̄ afa mè njak mè mbet lek inu okup ikeya. (Itọn̄ 101:3) Yọk ogwu ochicha kiji ikiweweek irek ibosa ijijaka mgbaan̄je kiji me lek Jioba. (1 Pita 5:8) Ire eji kpegwọk chieen̄, Setan mokọt itap ijọ mkpọ kubọk ejit-ile, ikakan ataak, chieen̄ ile, ochicha, ugumu mè unaan̄-ejit me ejit kiji. (Gal 5:​19-21) Me adasi mgbọ ijo mkpọ chi mokọt ikup kubọk ikakup unye unye. Ire, me ire eji kpegwat lek irọ mkpọ isasa isan̄a inu chi isan̄a me ejit kiji, mekọt itibi kubọk ijo uti me itap eji unan me lek.​—Jemis 1:​14, 15.

w11 7/15 16 ¶7-8

Ire Omogban̄ Ntaba-Ubọk-Me-Utọn̄ Kè Jioba Ni?

⁷ Ike owa ke eji ebesa ijit ebi ataak ijejeen̄? Eji kpebebọkọ ema itap me uwu kiji mè iyaka ire itọp ema amọn. Eji kpebefuk ikpa kiban̄, ikpọ orirọ kiban̄ me TV, isi mè iyaka ire ige mkpọ me ere ema ekitap mkpọ me emen efet. Keke orọ eji kpeberọ otutuuk inu chi ni? Ire bak me lek ima. Eji mima “Awaji ogwu atikọ,” eya orọ, eji kpekaan̄ mgbọ inyi ataak ijejeen̄ echi ikatat me lek Usem kan̄ eyi orere atikọ. (Itọn̄ 31:5; Jọn 17:17) Eji mima ntitiin̄ Jioba, ire me emen ntitiin̄ yi ke eji ekween̄ owuwa atikọ okitop eji me lek. Kubọk erieen̄ Awaji mè inu erieen̄ ya osibibe, nkeek Awaji isa inyi inyọn̄ ijọn̄ yi, irek ebi ikwukwu, mè ikpọchieen̄ ijojomo me mkpa. Ire omokọt ikeek ubọk ikupbe me lek kwun̄ adasi mgbọ okween̄be atikọ chi mè ofifi ofifi atikọ ni? Keke orọ obotele ibe ene geege inifiaan̄ mè ikan ataak inyi owu ofolek ntitiin̄ yi enyi okween̄be otutuuk atikọ chi me emen̄?​—Jọn 6:​66-69.

⁸ Ekakpọge chieen̄ me lek inu ebi ataak ijejeen̄ ebetumu, eji kpebegọọk ema! Keke orọ eji ebesi lek udọn mun̄ enyi kpunuge mun̄ me emen? Ema ebefafiaan̄ eji, eji kpebekaan̄ ubelejit si. Kpan̄asi ikeya, eji etumu efieek ikukup inye ikigbe utoon̄-ejit inyi Jioba mè ntitiin̄ ere eji ekikaan̄ atikọ onan̄a me emen Usem Awaji okup kubọk mun̄ otatana mè ikisiki ene lek me ujọnọ ujọnọ mgbọ.​—Asaya. 55:​1-3; Mat 24:​45-47.

Week Inu Unye Otu Ewe Okup Me Usem Awaji

w14. 3/15 16 ¶20

Ubọk Obokisa Imun̄ Mkpọ Me Oniin̄ Onwọnwọn

²⁰ Ire, ogwu okọt mokọt isa ugwem kan̄ isa itọn̄ Jioba. (Fuk Okwa Itọn̄ 102:​19-21.) Ike eji emun̄be me ikpa Okwa Itọn̄ 102, ikerere ebi ikup me ichechieek mekọt ikikaan̄ unaan̄ mè ikito chieen̄ me lek ufialek kiban̄ gaalek. Ogwu okọt ikimun̄ lek kan̄ kubọk “unọn ibot ge òsọsọọk me inyọn̄ otoon̄-uwu,” kubọk ire ufialek ufialek okana ọmọ. (Itọn̄ 102:7) Ire ubọk ikikup owu me lek ire ya, kpa ejit kwun̄ sa inyi Jioba me uriaak ike ogwu okọt orọbe. Uriaak kwun̄ mokọt itap ubọk inyi owu otim ogak lọlọ nkeek. Jioba ichieek use ibe ke “ọmọ mônọ uriaak ebi una ubọk, mè irọ mbeek kiban̄ inyi ema.” (Itọn̄ 102:17) Toon̄-ejit me lek use ya.

AKỌP ONYAN̄ 28–AKỌP MÈ ONYAN̄ GE 3

INU UNYE OTU EWE OKUP ME USEM AWAJI OKWA ITỌN̄ 103-104

“Ìkawuuk Ibe Ke Eji Ìre Ntitaak Ijọn̄ Ikike”

w23.07 21 ¶5

Gọọk Akpat Ukot Jioba​—Kilọkọ Lek

⁵ Nsiki lek mè njijin Jioba okaan̄be okibieen̄ ọmọ ibe ikilọkọ lek. Kubọk inu njeen̄ nsiki lek kè Jioba ikpọk mbum me mgbọ ibofiat ebi mkpikak ikup me ama Sodọm. Jioba isa ebi osat kan̄ isa itumu inyi Lọt ibe ilibi ifo inyọn̄ ogoon̄. Ire Lọt ikaweek isisi mije ukpook. Eya orọ ibebeek ibe etele ibe ọmọ mè ebi ototun̄ ukan̄ esekup me Sowari gwun̄ ama ge eyi etumube ifieek ifafiat. Jioba ke okọt obe me irọ mkpọ ọmọ otumube, ire ikarọ ikeya. Irọ inu Lọt obeekbe, ikerere ibe ke eyi isibi ibe ke ikpobofiat Sowari. (Ibeb 19:​18-22) Mgbọ owuwa acha orakabe, Jioba ijeen̄ njijin me lek ebi ama Ninife. Iria ogwu nriran Jona ibe isilook mfiat ama ya mè ebi mkpikpak ikup me emen. Ire, mgbọ ebi ama Ninife egwube ikom, Jioba ikaan̄ nsan me lek kiban̄, ikafiat ama ya.​—Jona 3:​1, 10; 4:​10, 11.

w23.09 6-7 ¶16-18

Yaka Lek Maan̄ Me Lek Jioba Ike Samsin Orọbe

¹⁶ Ikerere ibe ke Samsin ibọkọ ufialek mije nrọ-nlọ kan̄, ikatele ikekirọ nkeek Jioba. Ikerere me mgbọ eji erọbe ilọ enyinyi eji nkaan̄-inu mè iyaka ire eji echechep irek kiji me ntitiin̄ eji ekawọ lek. Riọọn̄ ibe ke Jioba ikakitọp eji ifiin̄ me mgbọ eji erọbe ilọ. (Itọn̄ 103:​8-10) Ekakpọge chieen̄ me lek nrọ-nlọ kiji, eji mekọt ikup me lek inu isa inyi Jioba kubọk Samsin.

¹⁷ Kpọ-nu mkpọ orọrọ gwun̄ ute ijija ke ekigwen Michael. Ire ogwu okitap inyi ebi ugane ntitiin̄ mè ire si ogwu okigbọ oniin̄ ojot mgbọ. Ire, irọ mkpọ ge ilọ enyi orọrọ ibe ọmọ ichep irek chi me ntitiin̄. Itumu ibe “Sabum inu chi orọbe, nkitatap efuuk ikisi ikwaan̄ me ntitiin̄ mè ikitọbọ ebum inyi Jioba ijaan̄. Ire, chit chieen̄ mè bolo ikpọkpọ iyaka ikikup emi me lek kubọk kpabakọt iyaka irọ inu geege me ikwaan̄ Jioba. Nriọọn̄ ibe ke Jioba ikpobotọp emi ifiin̄, ire nkikeek me ire mgbaan̄je n̄a melek kan̄ moyaka ikup ike ikupbe me adasi mgbọ mè iyaka ire me ire makọt iyaka ikirọ otutuuk mkpọ mwuukbe lek ikirọ me ntitiin̄.”

¹⁸ Ata mkpọ orọrọ ire ke Michael ikawọ lek. Itumu ibe: “Nrọ mkpọ isasa iyaka ineen̄ mgbaan̄je n̄a melek Jioba isun̄ sa me ikekiriaak uriaak inyi ọmọ mgbọ geelek, ikikween̄ mkpọ mè ikigwu nkeek ikom.” Ike mgbọ ojebe, Michael iyaka ire ogwu okitap ubọk inyi ebi ugane ntitiin̄ mè ogwu okigbọ oniin̄ ojot mgbọ. Mgbọ keyi ọmọ ire ogwu ugane ntitiin̄ mè ire si ogwu okigbọ oniin̄ ojot mgbọ. Itumu ibe: “Ntap-ubọk mè ntap-efuuk-me-owot nbọkọbe ogak ge inan̄a me ubọk ebi ugane ntitiin̄, itap ubọk inyi emi nmun̄ ibe ke Jioba ikukup inye ikima emi. Mgbọ keyi makọt iyaka ikisi ikwaan̄ me ntitiin̄ melek utọnọ nkeek. Inu yi orọrọ ijeen̄ emi ibe ke Jioba motele inyi ene geelek ochuchubọk igwu ikom.” Eji si mekọt ikaan̄ unye-ejit ibe me ire eji erọ ilọ mè irọ mkpọ isasa ineen̄ nrọ-nlọ kiji isun̄ mè iyaka lek imaan̄ me lek Jioba, ke mosa eji irọ ikwaan̄ mè igbana eji.​—Itọn̄ 86:5; Urọk 28:13.

w23.05 26 ¶2

Omokọt Irọ Inu Emen Ekwukwu Otobe Me Isi Itet

² Ire ikaan̄ inu ge otobe me isi me mgbọ keyi eyi okakakọt irọ itet, riọọn̄ ibe ke eya ikasi ibe ke okpobokọt irọ. Ikerere asabọn mkpọ eji etobe me isi irọrọ ikiweek efuuk. Enyi irebe ibe ke okakitap efuuk isasa irọ inu otobe me isi itet, ikijeen̄ ibe ke omọnọ mgbaan̄je kwun̄ melek Jioba ikup ufiak, ke okiweek inyinyi ọmọ enyi efuuk kwun̄ obokọt. Jioba imọnọ efuuk kwun̄ ibene enenen. Riọọn̄ ibe ke ikaweek ibe owu orọ mkpọ eyi okpokọt irọ. (Itọn̄ 103:14; Maika 6:8) Eya orọ, osikito mkpọ me isi oborọ, mun̄ ibe ke ire mkpọ irek kwun̄ obochieek ibe owu okọt orọ. Ositọt isan̄a, keke obotap ubọk inyi owu okọt orọ otet ni? Eji ekpa nu usini mkpọ obokọt itap ubọk inyi owu.

Week Inu Unye Otu Ewe Okup Me Usem Awaji

cl 55 ¶18

Unye Isasa Irom Mkpọ​—“Ogwu Òrom Inyọn̄ Mè Ijọn̄”

¹⁸ Keke ke eji ekween̄ inan̄a me lek ubọk Jioba osabe unye kan̄ isa irom mkpọ ni? Ikike eji chieen̄ imumun̄ esese esese mkpọ echi irombe. Ogwu okọt ge itumu ibe: “Jei Jioba, ikwaan̄ kwun̄ îwa enenen! . . . Inu owu orombe ìjojot linyọn̄.” (Okwa Itọn̄ 104:24) Eyi ichubọk ire atikọ! Ebi ikikween̄ mkpọ mimun̄ efie efie esese esese inu okiluk ugwem me inyọn̄ ijọn̄ yi; ire, esese esese nkeek ọmọ owa ofolek ofifi efie efie inu oluk ugwem echi kpemumun̄. Usini mgbọ ogwu okirọ mkpọ mokọt imun̄ ibe ke ọmọ ikakaan̄ ayaya mkpọ iboyaka irọ. Ire iriọọn̄-inu mè unye Jioba isasa irom esese esese ayaya mkpọ ikakita.