Ikpa Okikpa Nkween̄mkpọ Ugwem Mè Ikwaan̄ Kiji Kubọk Ebi Eyi Karais
© 2024 Watch Tower Bible and Tract Society of Pennsylvania
AKỌP MÈ ONYAN̄ GE 4-10
INU UNYE OTU EWE OKUP ME USEM AWAJI OKWA ITỌN̄ 105
“Ìkikekeek Inyan̄a-Ibot Înyan̄abe Ire Mgbọ Geelek”
w23.04 28 ¶11-12
Ike Owa Ke Eji Ebesa Irọ Inyi Ichechieek Kiji Melek Use Jioba Ofolek Aya Inyọn̄ Inye?
11 Kpọ-nu usini use Jioba ochieekbe ebi kan̄ me mgbọ oraraka echi okup kubọk ikpobofet irọrọ iso. Itumu inyi Ebereyam mè Sera ibe ke ema mekaan̄ gwun̄ enerieen̄ me acha ukan. (Ibeb 17:15-17) Itumu si inyi Ebereyam ibe ke ọmọ mosa ijọn̄ Kenan inyi ebi owot iman kan̄. Me owuwa acha eyi bọn Ebereyam irere ebi Ijeren erebe usun̄ me Ijipiti, mokọt ikup kubọk use ya ikpobokọt irọ iso. Ire, irọ iso. Ike mgbọ ojebe, Jioba itumu ibe ke Elisabet ogwu oniniin̄ ugane moman gwun̄. Itumu si inyi Meri enenwaan̄ ikariọọn̄ge enerieen̄ ibe ke ogwu moman gwun̄ Kan̄, gwun̄ ogwu Jioba otumube mkpọ ofolek inunu kan̄ obop obop acha oraraka me uko Iden. Nriran keyi si irọ iso!—Ibeb 3:15.
12 Eji ekirọ ibe ichechieek kiji me lek unye Jioba okaan̄be isasa aya inyọn̄ inu inye sa me ikekigwu nkeek ikom me lek ubọk ikisa ichieek use mè okorọ use cha oso. (Fuk Josuwa 23:14; Asaya 55:10, 11.) Eyi morọ ibe eji ekup me mbem lek itatap ubọk inyi ebi ofifi ene enemun̄ ibe ke use Jioba ofolek aya inyọn̄ ikare inu ekimun̄ me ilaak mè iyaka ire inu ekpọkpọ ikeek itumu. Ofolek ayaya emen̄ inyọn̄ mè ayaya isijọn̄ Jioba me lek kan̄ itumu ibe: “Ikọ chi ìre ikọ ògbegbe ibe etoon̄ ejit me lek, mè ire si atikọ.”—Ichi 21:1, 5.
it-2 1201 ¶2
Usem
Otutuuk inu nrom echi okiluk ugwem mè echi kpekiluk ugwem ebekisisiki ibot inyi usem Awaji, Awaji si mokọt isa ema isa irọ nkeek kan̄. (Itọn̄ 103:20; 148:8) Usem kan̄ ire mkpọ ebekọt iyaka lek imaan̄ me lek; inu geelek Awaji ochieekbe me use, ikakiwuuk irọrọ. (Ikan 9:5; Itọn̄ 105:42-45) Ike ọmọ me lek kan̄ gaalek otumube, usem kan̄ “ìbokukup ire mgbọ geelek”; ikpobogwu ikom inu ọmọ me lek itata irọrọ nkeek kan̄ iso.—Asaya 40:8; 55:10, 11; 1 Pita 1:25.
Week Inu Unye Otu Ewe Okup Me Usem Awaji
w86 11/1 19 ¶15
Ebi Ijija—Irek Kiny Me Ototun̄ Ukan̄ Eyi Ubelejit Mè Obọp Ge
15 ‘Mîgon [Josefu] mkpọn me ukot, ukot kan̄ obebeek, mikwaan̄ ọmọ mkpọn okwukwut me ebek, mege, inu ya ọmọ obe ke môrọ, orọbe si; ikọ Jioba orọrọ ibe Josefu ikana ata ene.’ (Okwa Itọn̄ 105:17-19) Me akọp mè acha ita, Josefu ibọkọ ugwook kubọk ogwu usun̄ mè ogwu mkpọn mege use Jioba orọbe iso. Inan̄a me lek inu echi ijebe itibi, Josefu ikana ata ene. Ubọk geelek ikare Jioba okirọ ibe ọmọ ikibọkọ ugwook, ikaan̄ inu orọrọ ijuukbe itele. Ire Josefu mokup inye me emen ikpochieen̄ kan̄ orere “ikọ Jioba” ekakpọge chieen̄ me lek ikpele ufialek ikije itibi ni? Ire motele ibe ata eru kan̄ isibi utoon̄ mè ikpukpo isibi ime, nsikilek, unye mè ntumu-mfieek iweekbe isasa irọ ikwaan̄ oyọyọt ni? Josefu inan̄a isibi me emen ufialek chi kubọk alata araran esabe ukan̄ irọ ibe ikitoon̄—ata eru kan̄ isibi utoon̄ igbaalek, Jioba si imọnọ ọmọ ikup me unye otu ewe mè isa ọmọ isi ikpele ikwaan̄ mgbọ inu chi orọbe iraka.—Ibebene 41:14, 38-41, 46; 42:6, 9.
AKỌP MÈ ONYAN̄ GE 11-17
INU UNYE OTU EWE OKUP ME USEM AWAJI OKWA ITỌN̄ 106
“Ema Mîwuuk Owu Awaji Ogwu Ònyanyan̄a Ema”
w18.07 20 ¶13
‘Ire Ekene Okup Me Agan̄ Jioba?’
13 Ebi Ijeren mifieek owot mije ekpuk udun, omumen inyọn̄ mè ofifi ofifi inu ukpook onan̄a me ubọk Awaji. Mije ema ebeekbe, Mosis ochechieek irere ogwu okitumu otu kiban̄ me lek otutuuk usem geelek Jioba obotumu melek kiban̄ me inyọn̄ Ogoon̄ Sina. (Isis 20:18-21) Mosis ikup me inyọn̄ ogoon̄ ya ifiin̄. Eyi ema kpeyaka imun̄ ogwu isi kiban̄, mokọt ire ibe ke ema kpeyaka iriọọn̄ inu ema eberọ me emen ewe ya. Mokọt ire ibe ke ema mimalek ito chieeen̄ me lek ogwu ibot ogwu ema ekisa chieen̄ imun̄ kubọk Mosis. Ema ebebene ikikaan̄ saasaak me itumu inyi Erọn ibe: “Na na rọ awaji nyi eji echi òbokije me isi kiji me oniin̄ ije kiji, mije, Mosis ogwu òsasa eji inan̄a me Ijipiti isibi, eji kperiọọn̄ inu òsisibi inyi me inyọn̄ ogoon̄ ere îsibe.”—Isis 32:1, 2.
Week Inu Unye Otu Ewe Okup Me Usem Awaji
w06 7/15 13 ¶9
Inu Ekpabe Ofolek Ikpa Okwa Itọn̄ Eyi Òso Ita Mè Òso Ini
106:36, 37. Ere Baibul yi itumu mkpọ ofolek itọtobọ ebum inyi mkpọmfaka kubọk igwagwa ngwugwa inyi ebi ijọ ekwukwu. Eyi ikijeen̄ ibe ke ene geelek okisa mkpọmfaka irọ mkpọ, mokọt ikana ogwu ebi ijo ekwukwu ebekisa irọ mkpọ. Baibul itumu inyi eji ibe: “Ìsan̄a lek kinyi me lek mkpọmfaka.”—1 Jọn 5:21.
AKỌP MÈ ONYAN̄ GE 18-24
INU UNYE OTU EWE OKUP ME USEM AWAJI OKWA ITỌN̄ 107-108
“Ìbe Jioba onirọ, mije, Ọmọ Înwọn”
w07 4/15 20 ¶2
Kè Ebi Ntitiin̄ Etọn̄ Jioba
2 Ntitiin̄ ikakpọkpọ ire ere ebi ogbo ge etitiin̄be. Ikare mgbaan̄ ntitiin̄ ama mè iyaka ire ogbo ebi inan̄a me irek yaage mè iyaka ire ikaan̄ ulọk me lek inu yaage igbagban̄ ititiin̄. Kpan̄asi ikeya, okpan okpan inu orọrọ ekaan̄be ntitiin̄ ire isasa ikitọn̄ Jioba. Ubọk ikupbe ire ya me ujọnọ ujọnọ mgbọ ike ikpa Okwa Iton̄ ogonbe aban me lek. Me Okwa Itọn̄ 35:18, itumu ibe: “Mâtọn̄ owu me emen ntitiin̄ ile ebi eyi kwun̄; mâtọn̄ owu me ere urum ebi ilile enin̄be ijot.” Ubọk yaage si Okwa Itọn̄ 107:31, 32 itumu ibe: “Tele ema etọn̄ Jioba bak me lek imumechieen̄ mgbọ geelek kan̄, mè bak me lek ikwaan̄ ukechieen̄ îkirọ inyi ebilene. Tele ema etumu umin kan̄ esib me emen ntitiin̄ ebi eyi kan̄.”
w15 1/15 9 ¶4
Kitọn̄ Jioba mè Kaan̄ Ugbana
4 Ire eji iweek ikakaan̄ ejit itọn̄ mè itet inye, eji ebekimumun̄ mè ikigwu nkeek ikom me lek ubọk Jioba okisa igbana eji. Eji ebekirọriọọn̄ ubọk ikikeek si mkpọ ofolek imumechieen̄ kan̄ eyi okikup ire mgbọ geelek. Mgbọ ogwu okọt orọbe ikeya, owuwa ikpele inu Jioba orọbo itet ọmọ ukpook enenen.—Fuk Okwa Itọn̄ 40:5; 107:43.
Week Inu Unye Otu Ewe Okup Me Usem Awaji
it-2 420 ¶4
Mowabu
Ike mgbọ ojebe, mgbọ Debit okikpulu kubọk ogwu ubọọn̄, akọn̄ ikibọkọ irek me etete ebi Ijeren mè ebi Mowabu. Ebi Mowabu ire ebi etimbe igak, ema ebebene ikikpe otitip mkpulu inyi Debit. Usini mgbọ me ota etim ya irek iba me lek irek ita ebi akọn̄ Mowabe ire ebi ekpan̄be. Ibet lek Debit ibe ema elaak me ijọn̄ me urum me urum me initọ irek iba me lek irek ita ebi ọmọ obokpan̄ mè irek ge me lek irek ita ebi ọmọ obosun̄ me ugwem. (2 Sam 8:2, 11, 12; 1 Mfuf 18:2, 11) Mokọt ire si me emen akọn ya ke Benaya gwun̄ kè Jeyoyada “okpan̄ ebi akọn̄ Mowabu iba eriọọn̄be erieen̄.” (2 Sam 23:20; 1 Mfuf 11:22) Ntim-ngak yi Debit otimbe igak ebi Mowabu irọ isọ nriran Balam obenbe mkpọ oraraka efit acha ini: “Ntoronyan̄ ge mônan̄a isibi me owot kè Jekọp, okuba ge môsibi ikeke me owot kè Ijeren. Ọmọ môkpukpuku okwut-isi ebi Mowabu , mè ijijaka otutuuk bọn kè Set.” (Ifuk 24:17) Usini mgbọ si mokọt ire ofolek ntim-ngak yi, ke ogwu okwa otumu ibe ke Awaji itumu mkpọ ofolek Mowabu kubọk ebi ikisi ikwaan̄ inyi ọmọ.—Itọn̄ 60:8; 108:9.
AKỌP MÈ ONYAN̄ GE 25–AKỌP MÈ ONYAN̄ IBA 1
INU UNYE OTU EWE OKUP ME USEM AWAJI OKWA ITỌN̄ 109-112
Bieen̄ Ogwu Ubọọn̄ Jisọs Nye!
w06 9/1 13 ¶6
Inu Ekpabe Ofolek Ikpa Okwa Itọn̄ Eyi Òso Go
110:1, 2—Keke ke Jisọs Karais ogwukaan̄ Debit orọ me mgbọ ikupbe me agan̄ ubọk ulom Awaji? Eyi ijomobe me mkpa, Jisọs inene ifo emen inyọn̄ mè ikup me agan̄ ubọk ulom Awaji mege acha 1914 sabum ibenebe ikikpulu kubọk Ubọọn̄. Me okike mgbọ ya, Jisọs ikikpulu ebi udun̄ kan̄ ebi ekenbe aran̄ mè ikinyi ema ntọ-ubọk me ikwaan̄ ilolook ata etip mè irọrọ ene ebi udun̄ kan̄ mè ikineen̄ ema inyi megọọk ọmọ ikpulu me Ama Ubọọn̄ kan̄.—Matiyu 24:14; 28:18-20; Luk 22:28-30.
w00 4/1 18 ¶3
Akọn Mofieek Ebi Ikitim Etim Ikeme Awaji!
3 Ebi eyi Jioba ire ebi ekirọ ikeme karake mkpọ obet lek efit acha ge oraraka. Me owuwa ido, ebi ene ebi mkpikpak mikisa igbagban mè iyaka ire ichit ikwaan̄ ilolook ata etip Ama Ubọọn̄. Ire Yọk, okpan okpan ogwu ochicha kiji, ogwu “òkinya ikana, mè ikigbin kubọk egbe àtat ikiweek ogwu ìbochim itaka” okibieen̄ ema ibe ekerọ inu chi (Pita Eyi Adasi 5:8) Me mgbọ mgbọ “ebi ekarege ebi Ju” otabe me acha 1914, Awaji ito ogwu Gwun̄ kubọk ire aya Ogwu Ubọọn̄ obokikpulu inyọn̄ ijọn̄ yi, me inyi ọmọ ida ibe: ‘Je mokitim kpan̄ me etete ebi ochicha kwun̄.’ (Luk 21:24; Okwa Itọn̄ 110:2) Jisọs isa unye kan̄ irọ mkpọ me ilap Setan isibi me emen inyọn̄ ito me inyọn̄ ijọn̄. Eyi iriọọn̄be ibe ke mgbọ osisiki inyi ọmọ ire sọntiik, Yọk ikpọkpọ iben unaan̄-ejit kan̄ ikeme ebi eken̄be aran̄ mè ebi ofifi arọọn̄. (Ichichili 12:9, 17) Keke okinan̄a isibi me lek ukeme chi okinan̄a me ubọk ebi ikitim etim ikeme Awaji ni?
be 76 ¶2
Ro Inyi Nje-Nyi-Isi Kwun̄ Isibi Utoon̄
Nteme isasa inyinyi kiji irọ mkpọ igọbọ ikekisa nkeek kiji irọ mkpọ me kpetumube inyi eji. Ire okekisan̄a lek isibi igọgọọk ebi ofif ene isibi uko ni? Ire okekiweek irek obosa itap ubọk inyi ebi inu ayaya, ebi ijija mè iyaka ire ebi ininiin̄ ugane me ntitiin̄ kwun̄ ni? Ire okekisan̄a lek isibi ikisun̄ Uwu Ntitiin̄ Ama Ubọọn̄ me utana mè iyaka ire igọọk itap ubọk me esese esese oniin̄ me chinichini ilile mè chinichini sekut ni? Ire omọkot ikigbọ oniin̄ eyi igbidim mgbọ inan̄a mè mgbọ ire mgbọ ni? Ire omokọt igbọ oniin̄ ojot mgbọ mè iyaka ire itap ubọk me ntitiin̄ ere ufiak ominbe ni? Ire owu ire gwun̄ ute enerieen̄, ire omokọt isan̄a lek isibi mè imin isoon irere ogwu okitap ubọk inyi ebi ugane ntitiin̄ mè iyaka ire ogwu ugane ntitiin̄ ni? Owu ikukup me mbem lek itatap ubọk mè ibọbọkọ akpan ikwaan̄ itap ire inu ge okijeen̄ ibe ke okakije inyi isi.—Itọn̄ 110:3.
Week Inu Unye Otu Ewe Okup Me Usem Awaji
it-1 524 ¶2
Inyan̄a-Ibot
Inyan̄a-Ibot Irere Ogwu Ngwugwa Kubọk Melikisedek. Inyan̄a-ibot yi ire eyi ekpabe me ikpa Okwa Itọn̄ 110:4, ogwu ogege ikpa Ebi Iburu si isa irọ mkpọ ofolek Jisọs me ikpa Ebi Iburu 7:1-3, 15-17. Ire inyan̄a-ibot Jioba orọbe melek Jisọs Karais gaalek. Mokọt ire inyan̄a-ibot keyi ke Jisọs okitumu mkpọ ofolek me mgbọ ikinyan̄a ibot melek ebi udun̄ kan̄. (Luk 22:29) Inan̄a me lek inyan̄a-ibot kè Jioba, Jisọs Karais, Gwun̄ Awaji me emen inyọn̄ more ogwu ngwugwa kubọk Melikisedek orebe. Melikisedek ire ogwu ubọọn̄ mè ogwu ngwugwa isa inyi Awaji me inyọn̄ ijọn̄ yi. Jisọs Karais ibore Ogwu Ubọọn̄ mè Ogwu Ngwugwa ikare me inyọn̄ ijọn̄ yi, ire, me emen inyọn̄. Erọ ọmọ Ogwu Ngwugwa me mgbọ ifobe emen inyọn̄. (Iburu 6:20; 7:26, 28; 8:1) Inyan̄a-ibot yi ibokukup ire mgbọ geelek, eyi irebe ibe ke Jisọs ibokisisi ikwaan̄ kubọk Ogwu Ubọọn̄ mè Ogwu Ibot Ngwugwa isire mgbọ geelek me irak ntọ-ubọk kè Jioba.—Iburu 7:3.
AKỌP MÈ ONYAN̄ IBA 2-8
INU UNYE OTU EWE OKUP ME USEM AWAJI OKWA ITỌN̄ 113-118
Keke Ke Eji Ebesa Iyaka Ikpe Jioba?
w01 1/1 11 ¶13
Kè Ima Ikinama Owu Ibene
13 Inan̄a me lek usem Jisọs, isibi utoon̄ ibe ke eji ebema Jioba me adasi. Ire, kpegbaan̄ eji me lek imama Jioba iman. Ire mkpọ eji ebekwekween̄. Adasi mgbọ eji enọbe mkpọ ofolek kan̄, inu eji enọbe ya otataba eji iriaak me lek kan̄. Sọnja sọnja eji enenikween̄ ubọk isabe ineen̄ inyọn̄ ijọn̄ yi inyi ebilene. (Ibebene 2:5-23) Eji mikween̄ ubọk isabe irọ melek bọn ebilene, ikatop ema ifiin̄ me mgbọ ijo inu oniin̄be ototun̄ ukan̄ ebilene, ire, irọ mkpọ isasa inyan̄a eji. (Ibebene 3:1-5, 15) Ikisa ata-ejit irọ mkpọ melek ebi ikigbe utoon̄-ejit inyi ọmọ, ike mgbọ ojebe iraria ibot Gwun̄ ge ikaan̄be ufuna mesa me lek kan̄ itele ijo kiji inyi eji. (Jọn 3:16, 36) iriọọn̄-inu chi eji ekikaan̄ okirọ ibe ejit itọn̄ eji ekaan̄be me lek Jioba ikimin. (Asaya 25:1) Ogwu Ubọọn̄ Debit ibe ke ọmọ ima Jioba mije ikisa me ima ikikpọ ọmọ chieen̄ me lek. (Okwa Itọn̄ 116:1-9) Me chereyi, Jioba ikikpọkpọ eji chieen̄ me lek, ikibem eji, ikitap eji efuuk me owot mè ikikat eji ejit. Ike eji ekikween̄ mkpọ ofolek Jioba igbaalek, ikeya ke ima eji ekaan̄be me lek kan̄ obokinye.—Okwa Itọn̄ 31:23; Jefanaya 3:17; Ebi Rom 8:28.
w09 7/15 29 ¶4-5
Sa Me Ejit Itọn̄ Bọkọ, mè Sa Otutuuk Ejit Nyi
Ogwu okwa ido ibe: “Ìre keke ke mbasa inyi Jioba me lek otutuuk ata inu kan̄ îrọbe inyi emi?” (Itọn̄ 116:12) Kpasi ata inu ke Jioba orobe inyi ọmọ? Jioba okpọ ọmọ chieen̄ me lek me mgbọ ikupbe me emen ufialek mè ufieejit. Ogak ge ire Jioba orọ ‘inyi inwọno mkpa.’ Mgbọ keyi ikiweek iyayaka ikpe Jioba. Keke ke ogwu okwa oborọ? Itumu ibe: “Mbanyi Jioba inu nchieekbe ọmọ use.” (Itọn̄ 116:3, 4, 8, 10-14) Itumu ifieek irọrọ otutuuk use geelek ichieekbe Jioba mè otutuuk ikwaan̄ geelek ọmọ okaan̄ irọrọ inyi Ọmọ.
Owu si mokọt irọ inu yaage. Kpa ubọk ni? Sa me ikekiluk ugwem igọọk ikan mè onineen̄ Awaji mgbọ geelek. Eya orọ, mun̄ ibe ke ire ntọbọ ebum kwun̄ isa inyi Jioba ore mkpọ okukup ufiak ichit me ugwem kwun̄ mè tele ibe ekwukwu mbuban Awaji ikibem owu me inu geelek okirọ. (Etip 12:13; Gal. 5:16-18) Itutumu atikọ, okpobokọt iyaka ikpe Jioba me lek otutuuk ata inu geelek irọbe inyi owu. Ire, ikirọ ibe ejit Jioba ikibele imun̄mun̄ ibe ke okakisa otutuuk lek kwun̄ inyi me ikwaan̄ kan̄. (Urọk 27:11) Kpọ-nu mbet lek irek ilile eji ekaan̄be ikekirọ ibe ejit Jioba ikibele me oniin̄ okup ikeyi!
w19.11 22-23 ¶9-11
Inu Eji Ebekọt Ikween̄ Inan̄a Me Ikpa Libitikọs
9 Inu nkween̄ eyi òso iba: Eji ekitọbọ ebum inyi Jioba mije ejit kiji ikibebele me lek inu irọbe inyi eji. Isasa ikpa eyi iwele, eji ekpa mkpọ ofolek ngwugwa esuuk, inu ge okukup ufiak me ntọbọ ebum ebi Ijeren me ukot ikaan. Me ikpa Libitikọs, eji mikween̄ ibe ke ogwu Ijeren mokọt igwa ngwugwa esuuk “isasa ibe Jioba onirọ.” (Lib 7:11-13, 16-18) Ene ya ibogwa ngwugwa yi ikare kubọk ire inu iborọrọ, ire, ikigwa mije, ire inu iweekbe irọrọ. Ngwugwa yi ire ngwugwa ene okgwa inan̄a me ejit kan̄ mije ima ikaan̄be me lek Jioba. Ogwu okigwa ngwugwa ya, ebi ototun̄ ukan̄ kan̄, mè ebi ngwugwa megbaan̄ itaka anam ngwugwa ya. Ire, ikaan̄ usini ere me lek anam esabe igwa ngwugwa ya enyi okukup inyi Jioba gaalek. Ere owa ire cha?
10 Inu nkween̄ eyi òso ita: Mije Ima eji ekaan̄be, eji ekinyi Jioba eyi onwọnwọn ichit. Jioba ikimun̄ okpọn̄ kubọk ere onwọnwọn ichit me lek anam. Jioba si itumu ibe ke ikaan̄ usini ere me lek anam eyi osisibi esese kubọk ukwọọk-anaan̄ iba òkup me ebon anam. (Fuk Libitikọs 3:6, 12, 14-16.) Eya orọ, mgbọ geelek ogwu Ijeren isi isa me ejit kan̄ gaalek isa ere chi osisibi esese mè okpọn̄ igwa ngwugwa inyi Jioba, ikibele ọmọ ejit enenen. Ogwu Ijeren ogwu ogwagwa mbet lek ngwugwa okup ikeya, ikijeen̄ ulọk ọmọ okaan̄be inyinyi Jioba eyi onwọnwọn ichit. Ubọk yaage si, Jisọs inyi Jioba eyi onwọnwọn ichit sa me isasa otutuuk ejit kan̄ isi ikwaan̄ inyi Jioba mije ima. (Jọn 14:31) Isa inyi Jisọs, irọrọ nkeek Awaji ire inu okinyi ọmọ unwọọn̄; ikaan̄ ikpele ima me lek ikan Awaji. (Itọn̄ 40:8) Keek-nu ubọk ibosa ibele Jioba ejit ire ikekimun̄ Jisọs okisa otutuuk ejit kan̄ ikisa isi ikwaan̄ inyi ọmọ!
11 Kubọk ngwugwa esuuk eyi ebi Ijeren ekigwa, ikwaan̄ eji ekisi inyi Jioba ire irek ge eji ekisa ijeen̄ Jioba ubọk eji esabe ima ọmọ ire. Eji ekinyi Jioba eyi onwọnwọn ichit, eji ekirọ ikeya mije eji mima ọmọ inan̄a me otutuuk eji kiji. Keek-nu ubọk ibosa ibele ejit Jioba ikekimun̄ efie efie ebi usun̄ kan̄ ekisa otutuuk ejit kiban̄ ikisa itọbọ ebum inyi ọmọ mije ima ema ekaan̄be melek kan̄ mè oniin̄ kan̄! Eji mekọt ikaan̄ ukarajit sa me ikekikeek ibe ke Jioba okimun̄ mè ikimọnọ ibene ikare gaalek inu eji ekirọ, ire, mkpọ okibieen̄ eji ibe ekerọ inu cha si. Kubọk inu njeen̄ ire owu ire ogwu oniniin̄ ugane ogwu ikayaka ikikọt irọ ubọk omoma ikekiro, riọọn̄ ibe ke Jioba igobo irek kwun̄ itet. Mokọt ikikup owu me lek kubọk mkpọ okinyi ikawa, ire, Jioba imun̄ ikpele ima okaan̄be me ejit kwun̄ eyi okibieen̄ owu ibe orọ eyi obokọt irọ. Jioba ikibebele ejit ibọbọkọ eyi onwọnwọn ichit obokọt inyi.
Week Inu Unye Otu Ewe Okup Me Usem Awaji
w12 5/15 22 ¶1-2
Idodo Ebi Ikifuk Ikpa Kiji Ekido
Inan̄a me unye eyi ekwukwu mbuban ogwu okwa ikọt ibe: “Mkpa ebi eyi Jioba ìre inu unye otu ewe me lek Jioba.” (Itọn̄ 116:15) Ugwem ene ge ge me lek ebi usun̄ Jioba ire inu unye otu ewe isa inyi ọmọ. Ire, ikare mkpa ene ge gaalek ke ekitumu mkpọ ofolek me ikpa Okwa Itọn̄ 116.
Mgbọ geelek esikinyi usem mkpa-ene ogwu eyi Karais, ikatat ibe esa usem okup me ikpa Okwa Itọn̄ 116:15 erọ mkpọ ofolek ogwu okwukwun̄ ya ikerere ibe ke ikwu kubọk ogwu okigbe utoon̄-ejit inyi Jioba. Bak lek keke ni? Mije usem ogwu okwa iwele owot igak ikeya. Usem ya isibi ibe ke Awaji ikimun̄ mkpa otutuuk ebi usun̄ kan̄ ikigbe utoon̄-ejit kubọk inu okukup unye otu ewe eyi ọmọ ikpbotele ibe irọ.—Kpọ Okwa Itọn̄ 72:14; 116:8.
AKỌP MÈ ONYAN̄ IBA 9-15
INU UNYE OTU EWE OKUP ME USEM AWAJI OKWA ITỌN̄ 119:1-56
“Ìre Gwun̄ Nsabọn Irieen̄ Ìbojeje Ikọt Iluk Ugwem Òtatana?”
w87 11/1 18 ¶10
Ire Okakikup Me Utana Me Irek Geelek Ni?
10 Me ikpa Ebi Efesọs 5:5 Pọọlu itaba eji ubọk me utọn̄ ibe: “Ìriọọn̄ ibe ke ogwu barabat mè ìre ogwu òkiluk ugwem ten̄ten̄, mè ìre ogwu chieen̄ ile, ìkpokaan̄ uche me emen mkpulu eyi Karais melek Awaji. Ikakaan̄ chieen̄ ile ìre si irariaak yọk.” Ire, obop obop ebi ene ire ebi ekikaan̄ inu inyi mè iyaka ire isan̄a isan̄a me ntitiin̄ bak me lek ugwem barabat orere ‘ijo inu ikeme akpalek ene.’ (Ebi Kọrint Eyi Adasi 6:18) Owuwa mgbọ ikire mije ife cha kpeluk “ugwem igọọk me lek ikọ [Awaji].” (Okwa Itọn̄ 119:9) Kubọk inu njeen̄, owuwa bọn ute kpeyaka ikigbala chieen̄ ikpo eru kiban̄ me mgbọ ekisi itap efuuk. Ema kpeyaka ikigọọk bọn ute irọ mkpọ, kpan̄asi ikeya, ema eyaka ikigọọk ebi me lek kiban̄ ekup me ere iwo efuuk ebi kpekup me ntitiin̄ ikirọ unene. Mije ema ekikeek ibe ke ife cha ire ata ife, usini ebi eyi Karais mikigọọk ema irọ usini mkpọ ikanwọnge. Ubọk yaage si usini bọn ute mikimalek igọọk ebi me lek kiban̄ ekisi ikwaan̄ ebi kpekup me ntitiin̄ ikikup iriaak. Ogwu ugane ntitiin̄ ge ikaan̄ ulọk melek ogwu enenwaan̄ ge okisi ikwaan̄ inyi ọmọ ire lek itele ebi ototun̄ ukan̄ kan̄ me ikisi igọọk ogwu enenwaan̄ ya iluk! Eyi irọ ibe esan̄a ọmọ me ntitiin̄. Usem Baibul ichubọk ire atikọ, “Ijo otu ogbo, ìkekifiat ata ugwem”!—Ebi Kọrint Eyi Adasi 15:33.
w06 6/15 25 ¶1
‘Ililibi Igọọk Nyaka-Nkeek Kwun̄ Okitop Emi Me Lek’
JIOBA ikinyi ebi kan̄ nyaka-nkeek isasa itap ubọk inyi ekọt eme ukeme eyi ijo ukot keyi. Eji ekimun̄ usini nyaka-nkeek chi me mgbọ eji ekifuk Baibul eyi agaga, mgbọ eji ekigban̄ usem mè iyaka ire ufọọk-otu ekinyi me nkween̄mkpọ ntitiin̄. Owuwa me lek mkpọ eji ekinọ me irek chi ikakire ayaya mkpọ isa inyi eji. Usini mgbọ eji mira iwuuk lek ikween̄ mbet lek inu okup ikeya. Ire, eyi irebe ibe ke eji ekekiwuuk mkpọ, eji miweek nyaka-nkeek ofolek nkeek, ikan, mè ntọ-ubọk Jioba. Ikup ufiak ibe eji emọnọ nyaka-nkeek Awaji ebene. Ema mikinyi eji aya efuuk sa me ikekitap ubọk inyi eji eto chieen me lek inu orọrọ eji egobobe ililuk ugwem igọọk me lek ike Awaji oweekbe. Eya orọ ogwu okwa otumu inyi Jioba ibe: ‘Ililibi igọọk nyaka-nkeek kwun̄ okitop emi me lek.’—Okwa Itọn̄ 119:24.
w10 4/15 20 ¶2
Da Chieen̄ Kwun̄ San̄a Me Lek Inu Ikike!
2 Ire, inu eji ekikpọ mokọt isak eji unan. Inu eji ekimun̄ ikikaan̄ ikpele mgbaan̄ me lek inu eji ekikeek. Inu eji ekimun̄ mokọt irọ ibe eji ebene ekekaan̄ ulọk me lek inu mè iyaka ire irọ ibe ulọk ofolek inu ya ikimin̄ me ejit kiji. Eyi irebe ibe ke eji eluk me inyọn̄ Setan okikpulu ojot melek ebi ikirọ mkpọ obotop melek kiban̄ gaalek, eji mikimun̄ owuwa mkpọ mè ikinọ owuwa usem ataak echi obokọt ifiaan̄ eji ifiin̄ ikerere ibe ke eji ekpọ mè iyaka ire igban̄ ema me sọnja mgbọ gaalek. (Jọn Eyi Adasi 5:19) Kpolọlọ ọmọ orọ ogwu okwa obeek Awaji ibe: “Da chieen̄ n̄a san̄a me lek inu ikike, mè nyi emi ayaya ugwem me oniin̄ kwun̄.”—Itọn̄ 119:37.
Week Inu Unye Otu Ewe Okup Me Usem Awaji
w05 4/15 10 ¶2
Toon̄ Ejit Me Lek Usem Jioba
2 Okpan okpan inu okup me ikpa Okwa Itọn̄ 119 ire ubọk usem mè iyaka ire etip Awaji osabe ikup me unye otu ewe ire. Usini mgbọ isasa itap ubọk inyi ebi ekikọt ibe ekọt ekekeek, ogwu ogege okwa yi ige igọọk me lek nkwa ikọ ekisa ige mkpọ me usem Iburu. Otutuuk efit mè akọp agba jaaba mè gweregwen okup me emen, ege ikpọ me lek nkwa ikọ usem Iburu. Me Iburu ukot ikaan, ge ge me lek akọp agba iba mè iba okup me emen okwa yi ikaan̄ ngwugwat jeeta obene me lek nkwa ikọ yaage. Okwa yi ikpa mkpọ ofolek ikọ, ikan, nyaka-nkeek, oniin̄, ida, oyerebet mè usem Awaji. Me emen ibot usem keyi mè eyi obogọọk, eji mekpa ikpa Okwa Itọn̄ 119 igọọk me lek Baibul eriọọn̄ ubọk ikaba usem Iburu ijaan̄. Ikekigwu nkeek ikom me lek inu ebi usun̄ Jioba me mgbọ keyi melek mgbọ oraraka ejebe itibi motap ubọk inyi eji ekenwọọn̄ okwa eyi Awaji osabe ekwukwu mbuban kan̄ inyi ibe ege mè irọ ibe ubelejit kiji me lek Usem Awaji orere Baibul ikimin.
AKỌP MÈ ONYAN̄ IBA 16-22
INU UNYE OTU EWE OKUP ME USEM AWAJI OKWA ITỌN̄ 119:57-120
Ubọk Obokọt Isa Ime Ufialek
w06 6/15 20 ¶2
“Mma Ikan Kwun̄ Iraka Iman̄!”
2 Igbe ibe owu odo lek kwun̄ ibe, “Ike owa ke ikan Awaji osa ire inu okikat ogwu okwa ejit ni?” Inu ge otatap ubọk inyi ọmọ ire utoon̄-ejit ikaan̄be ibe ke Jioba ikaan̄ ulọk me lek kan̄. Iroriọọn̄ ikan Awaji osabe me ima inyi irọ ibe ogwu okwa ikibelejit, ekakpọge chieen̄ me lek irek oyọyọt ebi ochicha kan̄ etapbe ọmọ me emen. Imun̄ ibe ke ire Jioba okirọ ibe inu ikije ijaan̄ me lek kan̄. Ogak ge, ikekisa nteme okup me emen ikan̄ Awaji isa irọ mkpọ irọ ibe ogwu okwa iriọọn̄-inu igak ebi ochicha kan̄, ikan cha inyan̄a ugwem kan̄. Ikekisiki ibot inyi ikan Awaji inyi ọmọ esuuk mè utọnọ nkeek.—Okwa Itọn̄ 119:1, 9, 65, 93, 98, 165.
w00 12/1 14 ¶3
Ire Oma Nyaka-Nkeek Jioba Enenen Ni?
3 Nyaka-nkeek Awaji ikup me unye otu ewe enenen inyi ogwu okwa, itumu ibe: “Ǹkafiat mgbọ, ire, ǹgwagwat lek ilibi igọọk ikọ owu otọbe. Ebi ijo ife mîtip ufe ikana emi okokop, ire, ǹkabawuuk ikan kwun̄.” (Okwa Itọn̄ 119:60, 61) Nyaka-nkeek Jioba okitap ubọk inyi eji ekeme tukutuku mije ejit kiji inye ibe ke Nte kiji ogwu okup me emen inyọn̄ mokọt ifieek ogban echi ebi ochicha kiji esa ibọp ikana eji kubọk ire olik. Mgbọ kan̄ isikem, mosan̄a ogban cha ufuna eji ekọt ekerọ ikwaan̄ ilolook ata etip kiji.—Mak 13:10.
w06 9/1 14 ¶4
Inu Ekpabe Ofolek Ikpa Okwa Itọn̄ Eyi Òso Go
119:71—Kpasi ata mkpọ obokọt inan̄a me lek ibọbọkọ ukwook? Ukwook mokọt ijeen̄ eji ibe eyaka lek emaan me lek Jioba, ekeriaak uriaak mgbọ geelek, eriọọn̄ ubọk ekekween̄ Baibul mè eketap inu eji ekween̄be me ugwem kiji. Ofifi si ubọk eji esabe irọ mkpọ me emen ufialek mokọt ijeen̄ ere ge eji kpekirọ ijaan̄ eyi oboweek ibe eji eneen̄ esun̄. Eji kpebekinaan̄ ejit mgbọ eji ekibọko ukwook me ire eji etele ibe ineen̄ eji isun̄.
w17.07 13 ¶3, 5
“Ìkifieek Ejit Melek Ebi Ìkifieek Ejit”
3 Me kpunube cheche, adasi ere eji ebesi ikaan̄ ukarajit ire inan̄a me ubọk Jioba Nte kiji ogwu okup me emen inyọn̄ ogwu okikaan̄ njijin. (Fuk Ebi Kọrint Eyi Òso Iba 1:3, 4.) Jioba ogwu okikaan̄ njijin omimin ichit itumu inyi ebi kan̄ ibe: “Îre emi me lek n̄a nre ogwu òkikat enyi ejit.”—Asaya 51:12; Itọn̄ 119:50, 52, 76.
5 Eji mekọt ikaan̄ utoon̄-ejit onyenye ibe ke Jioba morọ mkpọ isasa itap ubọk inyi eji. Eya orọ, eji ekatet ikaan̄ ikpakpa ejit kiji inyi ọmọ me uriaak ofolek ufieejit eji ekije itibi. Ichubọk ire mkpọ ukarajit iroriọọn̄ ibe ke Jioba igobo itet unan eji ekije itibi mè ikinyi eji ukarajit eji eweekbe! Ire, ike owa ke ikisa inyi eji ukarajit ni?
Week Inu Unye Otu Ewe Okup Me Usem Awaji
w06 9/1 14 ¶5
Inu Ekpabe Ofolek Ikpa Okwa Itọn̄ Eyi Òso Go
119:96—Keke ke usem ‘inu geelek ikaan̄ okputut’ osibi? Ogwu okwa ikitumu mkpọ ofolek inu ikakaan̄ okputut ike ebilene ekimun̄ mkpọ. Usini mgbọ more ikaan̄ me nkeek ibe ke ubọk ebilene ekimun̄ mkpọ ososo ikaan̄ okputu. Ire, me ntikwo kan̄ ikan Awaji ikakaan̄ okputut. Mekọt isa nteme okup me emen ikan Awaji isa irọ mkpọ me irek geelek me ugwem. Baibul New International Version itap ere yi ikeyi ‘Mmun̄ ibe ke inu geelek ososo ikaan̄ ere iyaka, ire, ikan kwun̄ ikakaan̄ uyaka.’
AKỌP MÈ ONYAN̄ IBA 23-29
INU UNYE OTU EWE OKUP ME USEM AWAJI OKWA ITỌN̄ 119:121-176
Ubọk Obokọt Isa Ijit Ufieejit Ikagbege
w18.06 17 ¶5-6
Tele Ibe Ikan mè Onineen̄ Awaji Ikikpukpo Nkeek Kwun̄
5 Inyi eji ekaan̄ oruru enan̄a melek ikan Awaji, ikup ufiak ibe eji ekakpọkpọ ifuk mè iyaka ire iriọọn̄ mkpọ ofolek gaalek. Eji ebemama mè ikaan̄ ulibi melek ikan cha. Usem Awaji ibe: “Ìcha ijo inu, mè ìma ata inu.” (Emọs 5:15) Ire, ike owa ke eji ebesa ikọt irọ ikeya ni? Inu ge obotap ubọk ire ikwekween̄ ikekimun̄ mkpọ ike Jioba okimun̄. Kubọk inu njeen̄: Keek-nu ibe ke okakikọt ilaak ijaan̄. Ogwu ofia ebeke kwun̄ otutumu inyi owu usini mkpọ obokirọ, kubọk inorie obokirie, inu obokisa ikpọk lek mè usini inu obonwene me ugwem kwun̄. Me mgbọ otọbe inu cha ikpọ, omumun̄ ibe ke itap ubọk inyi owu! Usini mgbọ omotọn̄ ogwu ofia ebeke kwun̄ enenen me lek ubọk isabe itap ubọk inyi owu okọt okoluk ugwem onwọnwọn.
6 Ubọk yaage si, ogwu Ororom eji inyi eji ikan echi obokọt ibem eji isan̄a me lek unan ijo inu okisa inu me irọ ibe ugwem kiji inwọn. Keek-nu ubọk eji ekisa ikaan̄ oruru inan̄a me lek ikekigọọk ikan Awaji ofolek ikakan̄ ataak, ikekeek ene ijo, ichichiin̄ inọ, iluluk ugwem barabat, ikekirọ inu afa, mè ikekigọọk ebi ijo ekwukwu irọ mkpọ. (Fuk Urọk 6:16-19; Ichi 21:8) Mgbọ geelek eji isikimun̄ ata oruru okinan̄a isibi me lek ikekirọ mkpọ ike Jioba oweekbe, eji mekima mè ikinwọọn̄ Jioba mè ikan kan̄ me ejit kiji.
w93 4/15 17 ¶12
Ebi Ijija—Ire Keke Ke Enyi Ekilibi Igọọk?
12 Eyi okukup ufiak ichit ire, ikwekween̄ ichacha ijo inu. (Okwa Itọn̄ 97:10) Ike owa ke obokọt icha mkpọ okup me adasi kubọk ikitotop ni? Sa me ikekikeek mkpọ ibokọt isan̄a isibi! “Ikachieek ibe efiaan̄ enyi. Kpunu ogwu òbokọt ifeen̄ Awaji. Inu geelek ene owopbe, eya ke ìborọkọ. Ene geelek òkirọ inu akpalek ijo inu kan̄ okiweek, ene ya ìborọkọ mkpa kubọk mfut uko eyi ònan̄a me akpalek ijo kan̄ inu.” (Ebi Galesia 6:7, 8) Osichichini nto-mkpọ irọrọ inu akpalek kwun̄ okiweek, keek inu ibokọt isan̄a isibi—ubọk inu ya obosa inaan̄ Jioba. (Sa tọt me lek Okwa Itọn̄ 78:41.) Keek si ibe ke omokọt iniin̄ mè iyaka ire itap owot eyi okabem lek inyi mè iyaka ire ke omokọt iben orukan kubọk orukan AIDS. Keek mkpọ ofolek saasaak ejit obokikaan̄ mè ulibi obochep. Mokọt ikaan̄ usini mkpọ si onan̄a me lek ugwem barabat chi obobia ifiin̄. Gwun̄ ute enenwaan̄ ge itumu ibe: “Emi melek nlom n̄a migọọk ebi ofifi ene ilaak sabum eji enibat. Ikerere ibe ke eji mikana ebi eyi Karais me mgbọ keyi, ugwem eji elukbe me mgbọ oraraka ire mkpọ okisa ibaak mè mba-ejit inu me mbat-olom kiji.” Ofifi mkpọ eji ebekeek mkpọ ofolek si ire ke eji mekọt ichep irek kiji me ntitiin̄ mè iyaka ire mekọt isan̄a eji me ntitiin̄! (Ebi Kọrint Eyi Adasi 5:9-13) Ire utop eji ebekaan̄ me sọnja mgbọ gaalek igbe inu eji ebechep otutuuk inu chi inyi ni?
Week Inu Unye Otu Ewe Okup Me Usem Awaji
w23.01 2 ¶2
Chieek Jaan̄ Ibe Ke Ikọ Awaji “Ìre Atikọ”
2 Kubọk ebi usun̄ Jioba, eji michieek ijaan̄ ibe ke ọmọ ire “Awaji ogwu atikọ,” ke ikiweek mkpọ onwọnwon ichit isa inyi eji mgbọ geelek. (Itọn̄ 31:5; Asaya 48:17) Eji miriọọn̄ si ibe ke eji mekọt itoon̄ ejit me lek inu eji ekifuk me emen Baibul obe ke “ibot ibot ikọ [Awaji] ìre atikọ.” (Fuk Okwa Itọn̄ 119:160.) Eji michieek me lek inu ene ge ogwu okikween̄ Baibul ogebe, ibe: “Kpunu inu geege orere ataak mè iyaka ire ikpoboro iso me lek inu geelek Awaji otumube. Eya orọ ebi eyi Awaji mekọt itoon̄ ejit me lek inu geelek itumube, bak me lek ema mitoon̄ ejit me lek Awaji ogwu otutumu ibe etumu.”
AKỌP MÈ ONYAN̄ IBA 30–OKPA ONYAN̄ 5
INU UNYE OTU EWE OKUP ME USEM AWAJI OKWA ITỌN̄ 120-126
Ema Esa Ito Me Chieen̄ Iwop, ire, Esa Unwọọn̄ Me Ejit Irọkọ
w04 6/1 16 ¶10
Ugbana Ikup Inyi Ebi Ikinyi Awaji Itọn̄
10 Me mgbọ eji ekanabe ebi udun̄ kè Karais, eji mibene ikitim etim ikeme Setan. Ikpa Jemis 4:7 itumu inyi eji ibe: “Ijit Yọk, ke Yọk môlibi inan̄a enyi me lek.” Ire, eyi ikasibi ibe ke ijijit Yọk ire inu ofefet. Itọtọbọ ebum inyi Awaji iweek efuuk me ubọk kiji. (Luk 13:24) Ire, Baibul ichieek eji use yi me ikpa Okwa Itọn̄126:5: “Ebi ìsasa ito me chieen̄ iwop mfut, ebesa unwọọn̄ me ejit irọkọ.” Me atikọ, eji kpekitọbọ ebum inyi Awaji ogwu ikakijeen̄ itọn̄ melek inu erọbe inyi ọmọ. Ikikpekpe “mkpukpe inyi ebi geelek ìkisa otutuuk ejit iweek ọmọ,” mè ikigbana ebi ikinyi ọmọ itọn̄.—Ebi Iburu 11:6.
w21.11 24 ¶17
Ike Owa Ke Ichechieek Kwun̄ Obosa Inye Ire Ni?
17 Ire okifieek ejit mije mkpa ogwu omabe ni? San̄a mgbọ sibi sa rọ inyi ichechieek kwun̄ melek ikpọchieen̄ ijojomo me mkpa inye sa me ikekifuk mfufuk Baibul ofolek ebi ejomobe me mkpa. Ire okifieek ejit mije esan̄abe ogwu uwu kwun̄ me ntitiin̄ ni? Kween̄ mkpọ inyi ochieek ojaan̄ ibe ke oniin̄ Jioba okisa inyi ene osusut onwọn ichit. Ufialek geelek okichichini owu, sa irek ya sa rọ inyi ichechieek kwun̄ inye. Kpa inu okup owu me ejit nyi Jioba. Kada lek kwun̄ ibọkọ, kpan̄asi ikeya, kup riaak melek bọn ute irieen̄ mè ibaan̄. (Urọk 18:1) Kirọ mkpọ echi obotap ubọk inyi owu okọt okome, ikerere ibe ke okirọ inu chi me lek ito. (Itọn̄ 126:5, 6) Kweek nye kisi nkween̄mkpọ ntitiin̄, kisibi uko mè kifuk Baibul. To chieen̄ me lek ugbana echi Jioba obonyi owu me mgbọ okup me isi. Ike okimun̄ ubọk Jioba okisa itap ubọk inyi owu, ikeya si ke ichechieek kwun̄ obokinye igbaalek.
w01 7/15 18-19 ¶13-14
Kweek Nye Me Ikwaan̄ Irọrọkọ Inu Me Uko!
13 Inu ge obokat ejit ebi ikisi ikwaan̄ inyi Awaji ogak ge ebi ekitutuku ire usem okup me ikpa Okwa Itọn̄ 126:5, 6: “Ebi ìsasa ito me chieen̄ iwop mfut, ebesa unwọọn̄ me ejit irọkọ. Ebi ìkisa mun̄ ito me chieen̄ ibeme mfut isi iwop, ebekikọkọt okwa unwọọn̄ isa ikibeme ogbogbo akpa erọkọbe me uko ika.” Usem ogwu okwa me ere yi ofolek iwowop mè irọrọko inu me uko ijeen̄ ubọk Jioba osabe ikpọchieen̄ me lek mè igbana ebi Ju ebi inan̄a me usun̄ akọn̄ me Babilọn ika. Ema mibele ejit enenen me mgbọ esan̄abe ema isibi, ire, ema mira ikito ito me mgbọ ema ekiwop mkpọ me ijọn̄ kpeyaka ikisi ikwaan̄ me lek me akọp acha jaaba eyi ema ekupbe me usun̄. Ire, ebi ikukup inye ikiwop mè ikinama uwu minwọọn̄ mfut onan̄a me lek inu ema ewopbe mè ikaan̄ ujot-owot me lek ubọk ikwaan̄ kiban̄.
14 Eji mekọt ikito ito me mgbọ eji ekije itibi ufialek mè iyaka ire me mgbọ ebi bọn Nte kiji ekibọkọ ugwook mije ata irọrọ. (Pita Eyi Adasi 3:14) Me ikwaan̄ irọrọkọ inu me uko kiji, adasi mgbọ inu mokọt ikiyọt mije eji kpebemun̄ inu geege okinan̄a isibi me lek efuuk eji ekitap me ikwaan̄ uko. Ire, mire eji ikup inye ikiwop mè ikigwook mun̄, Awaji morọ inyi itibi, owuwa mgbọ ikiro inyi itibi igak ubọk eji ekeekbe. (Ebi Kọrint Eyi Adasi 3:6) Eyi ikpọk mbum inan̄a me lek mkpọ okinan̄a isibi me lek efuuk eji ekitap me icheche Baibul mè ikpa ntitiin̄.
Week Inu Unye Otu Ewe Okup Me Usem Awaji
cl 73 ¶15
Unye Isasa Ibem—“Awaji Ore . . . Ere Nlet Kiji”
15 Adasi, keek-nu mkpọ ofolek mbem me irek anam akpalek. Kubọk ebi ikitọbọ ebum inyi Jioba eji mekọt ikaan̄ me ejit ibe ke Jioba mobem eji kubọk urum. Ire Jioba ikabem eji Setan mogwat lek ijijaka eji. Keek inu yi nu: Mkpọ ge Setan, “ogwu òkikpulu linyọn̄ keyi,” oboma ichit ire irọrọ ibe ata ntọbọ ebum ikayaka ikup. (Jọn 12:31; Ichichili 12:17) Usini ebi mkpulu ikakaan̄ unye me linyọn̄ keyi michit ikwaan̄ kiji mè isa ijijika otutuuk kiji isan̄a. Ire, ebi eyi Jioba ekpọkpọ ikeke nye mè ikup nye ikilook ata etip mè kpewọbe lek! Keke orọ ido ebi ikakaan̄ unye kpekọt itap uyaka me lek ikwaan̄ ebi eyi Karais ebi kpewawa mè ikup kubọk kpekaan̄ inu geege okibem ema ni? Mije ire Jioba okisa ikpele uwop kan̄ ikibem eji!—Okwa Itọn̄ 17:7, 8.