Ikpa Okikpa Nkween̄mkpọ Ugwem Mè Ikwaan̄ Kiji Kubọk Ebi Eyi Karais
© 2024 Watch Tower Bible and Tract Society of Pennsylvania
OKPA ONYAN̄ 6-12
INU UNYE OTU EWE OKUP ME USEM AWAJI OKWA ITỌN̄ 127-134
Uga mè Ute—Ikup Inye Ikikpọ Chieen̄ Me Lek Nsabọn Kinyi
w21.08 5 ¶9
Mọnọ Irek Kwun̄ me Ototun̄ Ukan̄ Jioba Bene
9 Jioba inyi ebilene unye isasa ikaan̄ bọn̄, mè akpan ikwaan̄ ijejeen̄ ema ibe ema mè etọbọ ebum enyi ọmọ. Ire owu ire uga mè iyaka ire ute, ire, ọmọnọ inyinyi osisibi esese yi ibene ni? Ubọk geelek ibe ke Jioba igbana ebi osat enenen, ikanyi ema ikpele irek ilile yi. Ikakaan̄ eyi me nkeek, ebi ikikpukpo nsabọn emọnọ irek yi ema ekaan̄be ebene. Uga mè ute mikaan̄ ikpele akpan ikwaan̄ inan̄a me ubọk Awaji orere ikpukpukpo nsabọn kiban̄ sa me ‘ikekijeen̄ ema inu mè ikekiteme ema nteme eyi Jioba.’ (Efes 6:4; Ikan 6:5-7; Itọn̄ 127:3) Isasa itap ubọk inyi uga mè ute, ntitiin̄ Jioba isan̄a owuwa inu echi oyaka lek imaan̄ me lek Baibul, kubọk ikpa, fidio, okwa mè inu echi okup me emen efet isibi. Isibi utoon̄ ibe ke Jioba mè Gwun̄ kan̄ mimọnọ enyi ebi ijija ibene enenen. (Luk 18:15-17) Mgbọ geelek uga mè ute esiyaka lek imaan̄ me lek Joba mè irọ enyi efuuk kiban̄ obokọt isasa ikpọ chieen̄ me lek nsabọn kiban̄, Jioba ikibebele ejit. Mbet uga mè ute ikup ikeya si ekinyi nsabọn kiban̄ irek isasa ire okpọkọ ge me lek ototun̄ ukan̄ Jioba isire mgbọ geelek!
w19.12 27 ¶20
Uga mè Ute—Ikpukpo Nsabọn Kinyi Ibe Ema Jioba
20 Iriọọn̄ nsabọn kinyi ijaan̄. Ikpa Okwa Itọn̄ 127 isa nsabọn isa itọt me lek oraan̄. (Fuk Okwa Itọn̄ 127:4.) Ike ekisa esese esese mkpọ isa irom oraan̄ mè ike ema ekikup esese esese si me ujọnọ mè uwele, ikeya si, kpunu nsabọn iba irere inu yaage. Eya orọ ikup ufiak ibe uga mè ute etumu efieek ubọk ema ebesa ikpukpo gwun̄ kiban̄ ge ge. Olom mè nwa ge ikiluk me ido Ijeren me mgbọ keyi ebi ikọkọt ikpukpo nsabọn kiban̄ iba ibe eketọbọ ebum enyi Jioba mitumu mkpọ otatap ubọk inyi ema, ema ebe: “Eji ekisusun̄ nkween̄mkpọ Baibul me lek nsabọn kiji esese esese.” Ire ebi ibot ototun̄ ukan̄ ge ge ebetumu ifieek me ire ikup ufiak mè ifet ibe ema ekesun̄ nkween̄mkpọ me lek nsabọn̄ kiban̄ ikeyi.
Week Inu Unye Otu Ewe Okup Me Usem Awaji
it-1 543
Uti Echi Etumube Mkpọ Ofolek Me Emen Biabul
Ogwu okwa itumu mkpọ ofolek usini inu uti olifu okirọ mè mgbọ ikitumu mkpọ ofolek ebi ikitet ukpook me lek Jioba, ibe: “Bọn ebirieen̄ kwun̄ ebewawak ikana lek ikasi inorie kwun̄.” (Itọn̄ 128:1-3) Agọọk efieekbe inan̄a me lek uti olifu omimin ire echi ekisa iwop ofifi ayaya uti. Isọkọ me lek si, uti olifu okakan mekọt ikisan̄a bọn isibi me ebon kan̄ eyi okirọ ibe ema ekeluk ugwem efiin̄. Kubọk bọn uti olifu cha, bọn ebirieen̄ mekọt iwak ikana nte kiban̄, me ikirọ eyi ema ebekọt isasa irọ ibe ubelejit ikup me ototun̄ ukan̄.
OKPA ONYAN̄ 13-19
INU UNYE OTU EWE OKUP ME USEM AWAJI OKWA ITỌN̄ 135-137
“Ogwukaan̄ Kiji Îmin Igak Awaji Geelek”
it-2 661 ¶4-5
Unye, Ikwaan̄ Ukpook
Ubọk Awaji okisa ijeen̄ unye kan̄ me lek inu nrom ikup esese. Isasa ijeen̄ ibe ke ire ọmọ ore ata Awaji, moweek ibe Jioba ijeen̄ unye kan̄ me lek inu irombe. Ikirọ ikeyi me oniin̄ okup esese mè ikaan̄ mgbaan̄ me lek erieen̄ kan̄ si. (Itọn̄ 135:5, 6) Eyi irebe ibe ke ura, onyan̄ mè ntoronyan̄ ekije me ere etobe ema, eyi irebe ibe ke efet, ibot mè mbet inu okup ikecha ekisisiki ibot inyi ikan̄ okikpulu ema, eyi irebe ibe si ke akaka ituk mè ofut ekiwuwulu mè ikinan̄a me ere ge isi ofifi ere, inu chi irọrọ mkpọ ike ema ekirọ ikaso isasa isun̄ erieen̄ Awaji me mbuban̄ mgbọ geelek ebi ochicha ata ntọbọ ebum esikup ikeme ọmọ.
Ire, Jioba Awaji mokọt isa inu ọmọ orombe isa ijeen̄ ibe ke ire ọmọ ore ata Awaji sa me isasa ema irọ mkpọ isa irọ nkeek kan̄ me oniin̄ okukup esese me lek ubọk inu cha okisa irọ mkpọ. Owuwa mgbọ inu chi ikirọ me okike mgbọ iweekbe. Ikerere ibe ke una ibot, egwijo mè mbet inu okup ikecha ire mkpọ okirọrọ, ire, mgbọ geelek ema esirọ isasa irọ usem Jioba iso, ema ekikukup esese. (Sa tọt me lek 1 Ubọọn̄ 17:1; 18:1, 2, 41-45.) Owuwa mgbọ inu chi osisibi esese ikikup uyeke uyeke mije ubọk ema esa ikup unye unye ire (Isis 9:24) mè iyaka ire mije ema erọbe me oniin̄ mè mgbọ ojeje ntikwo me lek ubọk ema ekiwuuklek irọ.—Isis 34:10; 1 Sam 12:16-18.
w21.11 6 ¶16
Keke Ke Ima Jioba Eyi Okikup Ire Mgbọ Geelek Osibi Inyi Owu?
16 Mgbọ geelek Jioba isire Ere Ilet Lek kiji, eji ekikakaan̄ utelelek. Ire, ikikaan̄ usini usen lek kiji okiwọ, eji si kpeyaka ikikaan̄ ubelejit. Me mbet lek mgbọ okup ikeya keke ke Jioba oborọ isasa itap ubọk inyi eji ni? (Fuk Okwa Itọn̄ 136:23.) Mosa ubọk kan̄ ijibi eji ibene sọnja sọnja me irọ ibe eji eyaka ekeke me ukot kiji. (Itọn̄ 28:9; 94:18) Ubọk eyi okisa irọ eji oruru: Irọriọọn̄ ibe ke eji mekọt iyaka lek imaan̄ me lek ntap-ubọk kè Jioba ikitap ubọk inyi eji ekekeek ibe ke eji ire ebi egbanabe me irek iba. Adasi, eji mikaan̄ ere ilet lek onyeney ekakpọge chieen̄ me lek ere eji ekiluk. Òso iba, Nte kiji ogwu okaan̄ ima okup me emen inyọn̄ ikichubọk ikikpọ eji chieen̄ me lek.
Week Inu Unye Otu Ewe Okup Me Usem Awaji
w22.10 15 ¶12
“Kpọ-nu Uga Ubelejit Òkup Inyi” Ebi Ikigbe Utoon̄-Ejit Inyi Jioba
12 Jioba ijeen̄ ikpọk mbum ibe ke ọmọ ibene isaba ebi mkpulu geelek. Kpọ-nu inu njeen̄ ita. Fero Ogwu ubọọn̄ Ijipiti isa ebi eyi Jioba irọ usun̄, mè ijit owuwa mgbọ isasan̄a ema isibi me usun̄. Ire, Jioba isan̄a ebi kan̄ isibi mè irọ ibe Fero inwọ mun̄ me Okwaan̄ Anyiaan̄. (Isis 14:26-28; Itọn̄ 136:15) Belisaja ogwu ubọọn̄ Babilọn ito ijọk me ikibene lek “ikirọ ikeme Ogwukaan̄-ene òkup me emen inyọn̄” mè “ikitọn̄ ebi kè awaji alata okuket, mè alata araran̄” kpan̄asi Jioba. (Dan. 5:22, 23) Ire, Jioba isiki ogwu enerieen̄ okigumu lek ya. “Me eririeen̄ usen yaage, ekpakpan̄ Belisaja” me isa ama ubọọn̄ kan̄ isa inyi ebi Midia mè ebi Pesia. (Dan. 5:28, 30, 31) Ogwu ubọọn̄ Erọdu Agiripa I ogwu Palestine ikpan ogwu ikwaan̄ Jemis mè itet Pita itap me mkpọn̄ me nkeek ikpakpan̄ ọmọ si. Ire, Jioba ikput Erọdu ibe ikarọ inu ikaan̄be me ejit. “Ogwu osat Jioba osusulu ọmọ ito me ijọn̄,” ikwukwu.—Ikwaan̄ 12:1-5, 21-23.
OKPA ONYAN̄ 20-26
INU UNYE OTU EWE OKUP ME USEM AWAJI OKWA ITỌN̄ 138-139
Kachieek Ibe Ukpook Itet Owu Ikaan̄
w19.01 10 ¶10
Kitọn̄ Jioba me emen Ntitiin̄
10 Ire ukpook ikekitet owu mgbọ geelek osikeek ibebene ubọk ifọọk ikọ ni? Ire ikeya, ikare owu gaalek. Atikọ ire, owuwa kiji mikikaan̄ sọnja ukpook mgbọ geelek eji esikifọọk ikọ. Sabum okọt otim ogak irek yi, obodadasi iriọọn̄ mkpọ okirọ ibe owu okotet ukpook. Ire okitet ukpook ibe ke omowuuk inu obotumu mè iyaka ire ke omotumu ilọ ni? Ire okikaan̄ saasaak ibe ke ufọọk-otu kwun̄ ikpobonwọn kubọk echi ebi ofifi ife ni? Atikọ ire, ukpook cha mokọt ire ata mkpọ. Ikijeen̄ ibe ke owu ire ogwu okisiki lek mè ikimun̄ ebi ofifi ene kubọk ebi ibebene igak owu. Jioba ima eru yi si. (Itọn̄ 138:6; Filip 2:3) Ire, Jioba si iweek ibe owu okotọn̄ ọmọ mè okotap efuuk me owot bọn Nte gwun̄ irieen̄ mè ibaan̄ me nkween̄mkpọ ntitiin̄. (1 Tes 5:11) Ima owu, monyi owu si unye-ejit oweekbe.
w23.04 21 ¶7
Ikitap Efuuk Me Owot Ge Ge Me Nkwen̄mkpọ Ntitiin̄
7 Mokọt itap ubọk me ire oyaka iwọlọ ikpọ usini ntọ-ubọk echi ewuukbe lek ige me emen ikpa Watchtower oraraka. Kubọk inu njeen̄, neen̄ lek jaan̄. (Urọk 21:5) Ire oriọọn̄ ubọk iriọọn̄ inu ekikween̄ ya ijaan̄, mofet me lek kwun̄ ikekọt ibene ubọk inyi ufọọk-otu. Ofifi si tele ibe ufọọk-otu kwun̄ ikup me mgbidim. (Urọk 15:23; 17:27) Ufọọk-otu okukup me mgbidim morọ ibe okamalak ikaan̄ saasaak ofolek inu obofọọk. Ufọọk-otu okukup me mgbidim, usini mgbọ usem ge mè iyaka ire iba, mofet ibe ebi bọn ute kwun̄ irieen̄ mè ibaan̄ egobo etet igak ufọọk-otu ojọjọn̄ọ echi oben owuwa inu. Sa me ikekinyi ufọọk-otu okukup me mgbidim mè usem eyi kwun̄, omojeen̄ ibe ke oneen̄ lek ijaan̄ mè ichubọk igobo itet ijaan̄ inu ekikween̄.
Week Inu Unye Otu Ewe Okup Me Usem Awaji
it-1 862 ¶4
Ntele-nnyi
Miweek ibe ebi eyi Karais eketele enyi ene geelek orọrọ ema ilọ ekakpọge chieen̄ me lek otu ifuk mgbọ ene ya orọbe ema ilọ. (Luk 17:3, 4; Efes 4:32; Kọl 3:13) Awaji ikakitele inyi ebi geelek ijijit itetele inyi ebi ofifi ene. (Mat 6:14, 15) Ikerere me mgbọ esan̄abe ogwu orọrọ ijo inu omimin me ntitiin̄, mekọt itele inyi ene ya ike mgbọ ojebe me ire ene ya ichubọk igwu ikom. Me mgbọ ya otutuuk ene me emen ntitiin̄ meyaka ikijeen̄ ene ya ima. (1 Kọr 5:13; 2 Kọr 2:6-11) Ire, ebi eyi Karais kpebetele inyi ebi geelek igegen ibak ikirọ ijọ inu omimin kpeweek igwugwu ikom. Mbet ebi ikup ikeya mikana ebi ochicha Awaji.—Iburu 10:26-31; itọn̄ 139:21, 22.
OKPA ONYAN̄ 27–ONYAN̄ IBA 2
INU UNYE OTU EWE OKUP ME USEM AWAJI OKWA ITỌN̄ 140-143
Rọ Eyi Obokọt Osibeek Jioba Ibe Itap Ubọk Inyi Owu
w22.02 12 ¶13-14
“Gban̄ Ikọ Ebi Ìriọọn̄ Inu”
13 Kimun̄ nteme kubọk oniin̄ Awaji okisa ijeen̄ owu ima. Jioba ikiweek inu onwọnwọn ichit isa inyi eji. (Urọk 4:20-22) Mgbọ geelek isi isa Usem kan̄, ikpa ntitiin̄ mè iyaka ire gwun̄ ute ge omimin iniin̄ ene isa inyi eji nteme, ikijeen̄ eji ibe ke ima eji. Ikpa Ebi Iburu 12:9, 10 ibe ke ikirọ ikeya “inyi inwọn inyi eji.”
14 To chieen̄ melek nteme ya, ikare ubọk esabe inyi. Usini mgbọ mokọt ikikup me lek kiji kubọk kpenyi eji nteme me oniin̄ otatat. Atikọ ibe ke ene geelek obonyi nteme mosa irọrọ inyi nteme kan̄ ifet ibọbọkọ itap. (Gal. 6:1) Ire, me ire eji ke ekinyi nteme, ikup ufiak ibe eji eto chieen̄ melek inu ekitumu inyi eji ikerere ibe ikup melek kiji kubọk ike esabe inyi nteme ya ikanwọn. Eji mekọt ikido lek kiji ibe: ‘Ikerere ibe nkama ubọk esabe inyi emi nteme yi, ire atikọ ọmọ owa me emen usem ekitumu inyi emi ni? Ire, makọt ikpo isaba ekasoge ogwu onyinyi nteme ya mè ikaan̄ oruru inan̄a me lek inu itumube ni?’ Mojeen̄ iriọọn̄-inu me ire eji ekitọ chieen̄ me lek oruru eji ebekaan̄ inan̄a me lek nteme geelek eji ebọkọbe.—Urọk 15:31.
w10 3/15 32 ¶4
Kaan Ejit Otatana Me Mgbọ Okpikup Uyọt Uyọt Yi
Ukeme okinan̄a me ubọk ebi ochicha, uyọt mkpọ, mè orukan̄ okukup unye unye ikekisisaak usini ebi usun̄ Awaji. Usini mgbọ si, lọlọ nkeek mokọt ikiniin̄ ema ejit. Ikerere Ogwu Ubọọn̄ Debit ije itibi mbet lek irek yaage, ibe: “Ogugo îsibi ita emi me lek; ukpook îtap emi mgbugba igak ejit.” (Itọn̄ 143:4) Keke otap ubọk inyi ọmọ ibe ikọt itim igak irek cha ni? Debit ikeek ubọk Awaji osabe irọ mkpọ melek ebi usun̄ Kan̄ mè ubọk ọmọ si osabe imun̄ unyan̄a Awaji. Igwu nkeek ikom me lek mkpọ Jioba orọbe mije ikpele erieen̄ kan̄. Debit ito nkeek kan̄ me lek inu Awaji orọbe. (Itọn̄ 143:5) Ubọk yaage si, ikekigwu nkeek ikom me lek inu Awaji kiji orọbe inyi eji mè ikup inye ikirọ, motap ubọk inyi eji mgbọ geelek eji esiki ichichini ntọ-mkpọ.
w15 3/15 32 ¶2
Ire Ibabat “Ogwu Òchechieek Me Lek Kè Karais” Gaalek Ijeen̄ Iriọọn̄-Inu Me Chereyi Ni?
Usini mgbọ mokọt ikup me lek kwun̄ ike ikupbe me lek Debit ogwu otumu ibe: “Jioba, fọọk emi otu ugwat ugwat; ogugo îta emi me lek; kalet lek kwun̄ me lek n̄a.” (Itọn̄ 143:5-7, 10) Me mbet lek mgbọ okup ikeya, nyi Nte kwun̄ ogwu okup me emen inyọn̄ mgbọ ibe ijeen̄ owu mkpọ nkeek kan̄ orebe isa inyi owu. Omokọt irọ ikeya sa me isasan̄a mgbọ isibi ikisa ifuk Usem kan̄ mè ikigwu nkeek ikom me lek inu okifuk. Owu moriọọn̄ inu ikan kan̄ orebe mè imun̄ ubọk isabe itap ubọk inyi ebi kan̄ me mgbọ oraraka. Sa me ikekigban̄ utọn̄ me lek kan̄, owu morọ ibe utoon̄-ejit kwun̄ me lek iriọọn̄-inu okup me lek isiski ibot inyi ọmọ inye.
Week Inu Unye Otu Ewe Okup Me Usem Awaji
it-2 1151
Iwot Ulu
Me oniin̄ eyi ogugo. Usem ataak, okifiat ene eyi ebi mkpikpak ekitumu isasa ifiat erieen̄ ebi ema ekitumu ibak ire echi esa itọt me lek iwot okinan̄a me otu ijo ulu. (Itọn̄ 58:3, 4) Ofolek ebi ikitumu ene ifiat Ikpa Mbuban̄ ibe: “Ikọ ònan̄a ema me otu ìkikpan̄ ene kubọk iwot asawọ.” (Itọn̄ 140:3; Ro 3:13) Otu alọm geelek ekisa irọ mkpọ me oniin̄ ikanwọnge kubọk itutumu ene ifiat, ilolo ene, ijejeen̄ ataak ijejeen̄ mè iyaka ire mbet inu okup ikecha ijot me lek “inu geelek môkọtbe ikpan̄ ene.”—Jemis 3:8.
ONYAN̄ IBA 3-9
INU UNYE OTU EWE OKUP ME USEM AWAJI OKWA ITỌN̄ 144-146
“Uga Ubelejit Òwa Inyi Ebi Geelek Awaji Kiban̄ Orebe Jioba!”
w18.04 32 ¶3-4
Idodo Ebi Ikifuk Ikpa Kiji Ekido
2. Usem echi okup me emen Baibul eyi ekpọkbe ige ije ikike me lek otutuuk ere me ikpa okwa itọn̄ yi. Isasa usem “mgbọ” isa irọ mkpo me agba eyi 12 isibi ibe ke ugbana ekpabe mkpọ ofolek me agba eyi 12 isire agba eyi 14 ikup inyi ebi ata irọrọ—ebi ikibeek ibe etaba ema esibi mè enyan̄a ema me ubọk ebi mkpikpak (agba eyi 11). Ubọk eji esa ikaba si inwene ubọk eji egobo agba eyi 15 itet, ere ya isa usem “uga ubelejit” irọ mkpọ mgbọ iba. Isibi ibe ke ire ife yaage ke ere yi okitumu ibe ke mekaan̄ uga ubelejit orere “ebi geelek Awaji kiban̄ orebe Jioba!” Kawuuk si ibe ke ikpa Usem Iburu ekpọbe me lek ikaba Baibul ikakaan̄ nriro ekisa ige usem, kubọk eyi okijeen̄ ibe ke usem ya ire usem ene otumube. Eya orọ, ire, ebi ikikaba Baibul cha eberiọọn̄ oniin̄ otatat isasa ikaba. Ike ema ekirọ eyi, ema mekpọ ubọk ekige okwa me Usem Iburu, inu ere Baibul ya okitumu mè ofifi ere me emen Baibul okitumu chieen̄ inu yaage.
3. Usem echi okup me emen Baibul eyi ekpọkbe ige itat me lek ofifi ere me Baibul okitumu mkpọ ofolek ugbana Awaji obonyi ebi kan̄ ikigbe utoon̄-ejit. Mije ayaya ubọk ekababe usem asher, ikpa okwa itọn̄ yi ije ikike me lek ata ikpochieen̄ Debit okaan̄be. Debit ikaan̄ ikpochieen̄ ibe ke Awaji isinyan̄a ebi kan̄ me ubọk ebi ochicha kiban̄ isan̄a ke mogbana ema melek ubelejit mè owuwa ata mkpọ. (Lib 26:9, 10; Ikan 7:13; Itọn̄ 128:1-6) Kubọk inu njeen̄ ikpa Ikan Òso Mgbo Iba 28:4 itumu ibe: “Ugbana môkup inyi nsabọn kinyi, mè ikup si me lek mfut ònan̄a me ijọn̄ kinyi, mè bọn anam kinyi, òrere bọn eriembuuk kinyi, mè bọn arọọn̄ kinyi, mè bọn ebot kinyi.” Me atikọ me mgbọ Solomọn gwun̄ kè Debit okikpulu, ebi Ijeren minwọọn̄ ikpele esuuk mè nje-nyi-isi. Ofifi si usini inu orọrọ me irak mkpulu kè Solomọn ikinyan̄a ubọk ifolek mkpulu ogwu Mesaya.—1 Ubọọn̄ 4:20, 21; Itọn̄ 72:1-20.
w22.10 28 ¶16-17
Tet Ikpọchieen̄ Kwun̄ Kubọk Ogwu Eyi Karais Nye
16 Ikpọchieen̄ iluluk ugwem ikakaan̄ge itata eji ekaan̄be ire inyinyi okukup me unye otu ewe onan̄a me ubọk Awaji. Eji ekikpọchieen̄ inwọnwọọn̄ mgbọ okup me isi onwọnwọn, mgbọ okup me isi eji echieekbe inye ibe ke ibobọbọkọ irek. Ikpochieen̄ kiji ikup kubọk iloma okirọ ibe eji ekeke enye, inyi eji mekọt ikikup ikeme ntọ-mkpọ, ime tukutuku, mè itet lek inye ikerere mgbọ eji ekweek isi me lek mkpa. Ikup kubọk okpibot akọn̄ okibem nkeek kiji inyi eji ejit inu ọlọlọ mè etet eyi otatat enye. Ikpochieen̄ kiji oyaka lek imaan̄ me lek Baibul ikitaba eji iriaak me lek Jioba mè ikijeen̄ eji ubọk isabe ima eji ire. Eji mikikaan̄ oruru enenen ike eji ekirọ inyi ikpọchieen̄ kiji ikikup ayaya mè ikinye.
17 Me emen ikpa kan̄ igebe ijet ebi Rom, ogwu ikwaan̄ Pọọlu itap eji efuuk me owot ibe: “Ìkinwọọn̄ unwọọn̄ mije ikpọchieen̄ kinyi.” (Rom 12:12) Pọọlu mokọt ikinwọọn̄ unwọọn̄ mije iriọọn̄be ibe ke ire ọmọ igbe utoon̄-ejit, ke ọmọ mokaan̄ ugwem ikakaan̄ge itata me emen inyọn̄. Eji si mekọt ikinwọọn̄ unwọọn̄ mije ikpọchieen̄ kiji, mije eji mirọọn̄ ibe ke Jioba iborọrọ use kan̄ iso. Ike ogwu okwa otumube, “uga ubelejit òwa inyi . . .ogwu ikpọchieen̄ kan̄ okupbe me lek Jioba òrere Awaji kan̄, . . . ogwu òkekeke inye me irọrọ ikọ kan̄ iso mgbọ geelek.”—Itọn̄ 146:5, 6.
w18.01 26 ¶19-20
Kpasi Mbet Lek Ima Okinyi Ene Ata Ubelejit?
19 Iso mkpọ obet lek obop acha gweregwen karake ebilene ekibọkọ ugwook. Sọnja mgbọ inyọn̄ yi eyi Setan okikpulu monu me ota. Inyọn̄ yi ijot me lek ebi ikima lek kiban̄ geelek, ebi ikima ikpoko mè ebi ikima utop linyọn̄. Ema ekito chieen̄ me lek inu oborọ ema oruru gaalek, mè ikimọnọ inu ema eweekbe kubọk inu okukup ufiak ichit me ugwem kiban̄. Mbet ebi ikup ikeya kpebekọt ikaan̄ ata ubelejit. Kpan̄asi ikeya, ikup kubọk ike ogwu okwa ogebe: “Uga ubelejit òwa inyi ene geelek ogwu Awaji kè Jekọp okitap ubọk inyi; ogwu ikpọchieen̄ kan̄ okupbe me lek Jioba òrere Awaji kan̄.”—Itọn̄ 146:5.
20 Ebi eyi Awaji mima ọmọ enenen, acha geelek si eji ekiwawa igbaalek. Eyi ire inu ge okijeen̄ ibe ke Ama Ubọọn Awaji okikpulu me mgbọ keyi, ke mosa owuwa ugbana inu me inyọn̄ ijọn̄ yi me sọnja mgbọ. Ata unwọọn̄ eyi obobabia ikinan̄a me lek ikekirọ nkeek Awaji, mè irọriọọn̄ ibe ke eji mekirọ mkpọ okibelejit Ogwu Obebene Ichit. Ebi geelek imama Jioba ebekinwọọn̄ unwọọn̄ isire mgbọ geelek! Me emen ibot usem obogọọk, eji memun̄ usini ijo eru ebi ikima lek kiban̄ gaalek ekikaan̄ mè imun̄ ubọk isabe ije ntikwo me lek echi ebi usun Jioba ekaan̄be.
Week Inu Unye Otu Ewe Okup Me Usem Awaji
it-1 111 ¶9
Anam
Baibul itumu ibe ekerọ mkpọ me lek anam me oniin̄ onwọnwon mè ikijeen̄ nsan. Jioba itumu mkpọ ofolek kan̄ kubọk ogwu okinyi ema inorie mè ikikpọ ema chieen̄ me lek. (Urọk 12:10; Itọn̄ 145:15, 16) Ikan kè Mosis itumu ibe ekekpọ chieen̄ ejaan̄ me lek anam okigọọk ene iluk me uwu. Ire emun̄ ema ejebe ichep, ebesasa ema iyaka ijet ogwukaan̄ me utelelek; me ire ema ekup me irak ulobo akpan, ema ire ebi ebetatap ubọk inyi. (Isis 23:4, 5) Mekisa anam si isi ikwaan̄ me oniin̄ okijeen̄ ima. (Ikan 22:10; 25:4) Anam megọọk ebilene itap efuuk me Usen Iwọ Efuuk. (Isis 20:10; 23:12; Ikan 5:14) Anam echi okitap ene unaan me lek ire echi ebekpakpan. (Ibeb 9:5; Isis 21:28, 29) Kpebesa ofifi chieen̄ anam itoon̄ ofifi chieen̄ anam.—Lib 19:19.
ONYAN̄ IBA 10-16
INU UNYE OTU EWE OKUP ME USEM AWAJI OKWA ITỌN̄ 147-150
Eji Mikaan̄ Owuwa Mkpọ Oborọ Ibe Eji Eketọn̄ Jioba
w17.07 18 ¶5-6
Keke Orọ Ebetọn̄ Jioba?
5 Ikare otutuuk ebi ido Ijeren gaalek ke Jioba okinyi ukarajit, ire, ikinyinyi ene ge ge si ukarajit. Ubọk yaage si ke ikup me chereyi. Ogwu okwa itumu ofolek Awaji ibe: “Ọmọ okigwa ebi inyọn̄ ogakbe, mè ikibọp unan kiban̄.” (Itọn̄ 147:3) Iin̄, Jioba ikikpọkpọ chieen̄ me lek ebi ikakaan̄ ufialek me ire me anam akpalek sa me ekikeek. Me chereyi Jioba ikaan̄ ulọk ikakat eji ejit mè ibọbọp unan eji ekikaan̄ me ekikeek. (Itọn̄ 34:18; Asaya 57:15) Ikinyi eji iriọọn̄-inu mè unye inyi eji ekọt ekeme ufialek geelek eji ekichichini.—Jemis 1:5.
6 Ogwu okwa isa nkeek kan̄ ifolek mkpọ okup me emen inyọn̄, itumu inyi eji ibe ke Jioba okifuk “otu ifuk ntoronyan̄” mè “inyi ema ge ge erieen̄ iso.” (Itọn̄ 147:4) Keke orọ ogwu okwa onwenebe mkpọ ikitumu me iyaka ikitumu mkpọ ofolek ntoronyan̄ ni? Kpọ-nu inu yi nu: Ogwu Okwa mokọt isa chieen̄ kan̄ imun̄ ntoronyan̄, ire, ikariọọn̄ otu ifuk kiban̄. Ike acha okije, otu ifuk ntoronyan̄ echi eji ebekọt imun̄ ikiwawa igbaalek. Usini ene ekikeek ibe ike ire ego ego ntoronyan̄ okup me emen uwu ntoronyan̄ kiji eyi ekigwen Milky Way. Owuwa owuwa uwu ntoronyan̄ ọmọ owa me akpabin inyọn̄! Isa inyi eji, ntoronyan̄ mokọt ikup kubọk ikakaan̄ otu ifuk! Ire Awaji ikinyinyi ema ge ge erieen̄ mè iyaka ire mkpọ ebesa irọọn̄ ema. Eyi isibi ibe ke ntoronyan̄ ge ge isibi esese isa inyi Awaji. (1 Kọr 15:41) Ebilene ebi irombe igwook me inyọn̄ ijọn̄ ye? Awaji ogwu orọriọọn̄ ere ntoronyan̄ ge ge okupbe me mgbọ geelek iriọọn̄ lek kwun̄. Iriọọn̄ ere okupbe, ubọk mkpọ okikup owu me lek mè inu oweekbe me mgbọ geelek!
w17.07 18 ¶7
Keke Orọ Ebetọn̄ Jioba?
7 Ikare gaalek ibe ke Jioba ikaan̄ ulọk me lek kiji ge ge, ire, ikaan̄ unye mè ijijin isasa itap ubọk inyi eji me emen ufialek eji ekichichini me ugwem. (Fuk Okwa Itọn̄ 147:5.) Omokọt ikikeek ibe ke irek kwun̄ miyọt enenen mè iyaka ire ke akpan kwun̄ milobo enenen ibebeme. Awaji igobo irek kwun̄ itet, ‘ìkawuuk ibe ke owu ìre ntitaak ijọn̄ ikike.’ (Itọn̄ 103:14) Mije eji kpeso, eji mikirọ chieen̄ ijo inu yaage owuwa mgbọ. Eji mikifieek ejit enenen mgbọ geelek eji esitumu usem ilọ, igwat lek inaan̄ ejit, mè iyaka ire, iben ejit me lek mkpọ ofifi ene! Jioba ikakirọ ijo inu chi ge ge, ire, ubọk isabe igobo eji itet imin enenen, eji kpebekọt iriọọn̄ isan̄a!—Asaya 40:28.
w17.07 21 ¶18
Keke Orọ Ebetọn̄ Jioba?
18 Ogwu okwa iriọọn̄ mbet lek irek osibi esese ebi Ijeren ekaan̄be. Ire ema gaalek ke Awaji onyi “ikọ” kan̄ mè “ikan kan̄ mè unen oyerebet.” (Fuk Okwa Itọn̄ 147:19, 20.) Me chereyi, eji si ire ebi egbanabe irere gaalek ebi esabe erieen̄ Awaji igwen. Mije eji eriọọn̄be Jioba mè ikaan̄ Usem kan̄ eyi okisi ikwaan̄ me ugwem kiji, eji mikaan̄ ata mgbaaan̄je melek kan̄. Kubọk ogwu ogege ikpa Okwa Itọn̄ 147, ire, okakaan̄ owuwa mkpọ oborọ ibe otaan̄ ukpook otumu ibe “Ìtọn̄ Jioba!” mè otap ebi ofifi ene efuuk me owot ibe erọ ikeya ni?
Week Inu Unye Otu Ewe Okup Me Usem Awaji
w04 6/1 13 ¶ 22
Inu Nrom Okitumu Ibe Ke Awaji Mimin!
22 Ikpa Okwa Itọn̄ 148:10 ibe “Enyi otutuuk anam uwu mè anam oron, mè inu geelek òkinyinyọnọ me ijọn̄, mè unọn òwulu me inyọn̄,” itọn̄ Jioba. Owuwa aman mè unọn owulu me inyọn̄ mekirọ inu okup uyeke uyeke. Unọn ge ekigwen Laysan albatross me ebeke mokọt iwulu ijọnọ ere (me mgbọ ge iwulu ijọnọ ere iso akọp obop mile iba mè obop go [40,000 km] me akọp usen onaan̄ge gaalek). Eyi ekigwen blackpoll warbler si ikiwulu inan̄a me North America isire South America, mè okup me lek efet okowulu me mkpọ oraraka akọp mbubak mgbọ jeeta me ikpobosọọk. Ikare ekpuk okup me udun̄ kan̄ ke aligọ okisa isun̄ mun̄ ike owuwa ene ekikeek. Ire ubọk akpalek kan̄ okupbe okirọ ibe ikọt ije ujọnọ ije me ikpobonwọ mun̄. Ọmọrọ, ikake eji chieen̄ ibe ke owuwa ebi ikirom mkpọ mikiriọọn̄ ubọk ikween̄ mkpọ ofolek anam mgbọ geelek ema esiberom okwukwut mè ayaya mkpọ ge. Ene ge okige ikpa ekigwen Gail Cleere ibe: “Ire oweek irorom inu ge eyi oboro ikwaan̄ ijaan̄. . . mè ikup ijaan̄ me ere ebesa irọ ikwaan̄, omokọt imun̄ mkpọ obokpọ me lek irọ inan̄a me lek inu nrom.”
ONYAN̄ IBA 17-23
INU UNYE OTU EWE OKUP ME USEM AWAJI URỌK 1
Ebi Ijija—Ire Ekene Ke Enyi Ebegban̄ Utọn̄ Melek?
w17.11 29 ¶16-17
Kachieek Ibe Inu Geege Iro Ibe Okabọkọ Mkpukpe Kwun̄
16 Me ire owu ire ogwu ijija okikeek ibe ke kpegobo uwu itet ijaan̄ mè iyaka ire ke nga kwun̄ mè nte kwun̄ ekibọbọp owu ye? Unaan̄-ejit kwun̄ mokọt irọ ibe obene okokaan̄ cheche me ire itọtọbọ ebum inyi Jioba ore inu onwọnwọn ichit. Ire, me ire otele ibe unaan̄-ejit kwun̄ irọ ibe okayaka ikitọbọ ebum inyi Jioba, me mgburudun̄ omomun̄ ibe ke kpunu ene geege omama owu igak nga kwun̄ mè nte kwun̄ ebi imama Jioba mè ebi ntitiin̄ kwun̄.
17 Ire ebi nga kwun̄ mè nte kwun̄ kpekan̄-inu, ire okpokeek me ire ema michubọk ima owu ni? (Iburu 12:8) Ire, usini mgbọ mokọt ire ubọk nga kwun̄ mè nte kwun̄ esa ikan-inu inyi owu onaan̄ owu ejit. Kpan̄asi inanaan̄ ejit me lek ubọk esa ikan̄-inu inyi owu, sa inyi omun̄ inu orọrọ ema ebak lek ikan̄-inu inyi owu. Eya orọ, kup dii mè jit imamalek inaan̄-ejit mgbọ esikan̄-inu inyi owu. Baibul ibe: “Ogwu òkaan̄ ifuk-ibot ìkiteten̄ ikọ kan̄; ogwu òkaan̄ ngobo-ntet ìkakikaan̄ fukufuku ejit.” (Urọk 17:27) To me isi irere ogwu omimin iniin̄ ene, ogwu obokọt ikup dii ibọkọ nteme mè ikaan̄ oruru inan̄a me lek me okpobomalek isisaak lek ofolek ubọk esabe inyi nteme ya. (Urọk 1:8) Ikakaan̄ uga mè ute ebi ichuchubọk ima Jioba ire ugbana. Ema meweek itatap ubọk inyi owu obọkọ mkpukpe eyi ugwem.
w05 2/15 19-20 ¶11-12
Bem Imaan̄ Oriọọn̄ Kwun Kubọk Ogwu Eyi Karais
11 Week ikekirọ mkpọ okibele Awaji ejit, ikare mkpọ okibele ebilene ejit. Ikukup me emen ene ikekigọọk urum ge igbaan̄ ije. Otutuuk kiji miweek unene, ikitop eji me lek si mgbọ geelek esibọkọ eji itap. Me mgbọ ene okimin iniin̄ ene, ukeme ebi otu ogbo mokọt inye eyi oboweek ene iweek irọrọ mkpọ ebi ofifi ene ekirọ mè iyaka ire ekima. Ire, ikare otutuuk mgbọ ke ebi otu ogbo mè ebi unene kiji ekiweek mkpọ oborọ eji oruru. Usini mgbọ ema ekiweek ogwu obogọọk ema irọ ijo inu. (Urọk 1:11-19) Mgbọ geelek ogwu eyi Karais isibene ikirọ mkpọ ikanwọn echi ebi unene kan̄ ekiweek ibe ọmọ irọ, ikisasa ilelet ogwu ọmọ orebe. (Okwa Itọn̄ 26:4) Ogwu ikaan̄ Pọọlu itaba eji ubọk me utọn̄ ibe: “Ikayaka ìluk ugwem ìgọọk me lek orọmijọn̄ linyọn̄ keyi ofifi.” (Ebi Rom 12:2) Jioba ikinyi eji unye eji eweekbe isasa itim igak ukeme irọrọ mkpọ olọlọ.—Ebi Iburu 13:6.
12 Mgbọ geelek ebi ofifi ene esikinyi owu ukeme ibe orọ mkpọ obojijaka mgbaan̄je kwun̄ melek Jioba, inwọn ibe okeek ibe ke igbegbe utoon̄-ejit kwun̄ isa inyi Awaji ikup ufiak igak mkpọ ebi ene ekikeek ofolek kwun̄ mè iyaka ire mkpọ owuwa ene ekirọ. Usem okup me ikpa Isisibi 23:2 ire onineen obokibem eji, ere ya ibe: “Kagọọk me lek ogbogbo ene, mè ìrọ ijo inu.” Me mgbọ owuwa ebi Ijeren ogbọ kan̄ ebenebe ikikaan̄ cheche me lek unye Jioba irọrọ inu ichieekbe iso, Kelep itetet ejit inye mijit igọgọọk nkeek ebi owuwa ene cha. Iriọọn̄ ijaan̄ ibe ke use Awaji ire mkpọ ebekọt itoon̄ ejit me lek Jioba igbana ọmọ si me lek inu ya irọbe. (Otu Ifuk 13:30; Josuwa 14:6-11) Ire okup me mbem lek ijijit ukeme ebi irọrọ mkpọ owuwa ene ekirọ inyi obem mgbaan̄je kwun̄ melek Awaji ni?
Week Inu Unye Otu Ewe Okup Me Usem Awaji
it-1 846
Mbubut
Mgbọ geelek ekisa usem “ebi mbubut” irọ mkpọ me emen Baibul owuwa mgbọ, ikimalek itumu mkpọ ofolek ebi ikikpọchieen̄ ilọ me lek ata nkeek mè ikiluk ugwem ojeje ntikwo me lek onineen̄ ata irọrọ Awaji, ikare ebi kperiọọn̄ inu. Mikisa owuwa usem Iburu ikisa itumu mkpọ ofolek mbet ebi ikup ikeya kubọk usem kesilʹ (‘ebi una ekiket’; Urọk 1:22), ʼewilʹ (“ogwu mbubut”; Urọk 12:15), na·valʹ (‘ogwu wewe’; Urọk 17:7), mè lets (“ogwu okirọ ene ochak”; Urọk 13:1). Usem Giris aʹphron ire eyi ekikaba “ogwu burubut” (Luk 12:20), a·noʹe·tos ore ‘ebi kpekaan̄ nden̄’ (Gal 3:1), mè mo·rosʹ eyi osisbi ‘ebi mbubut’ mè iyaka ire “ebi welewele” (Mat 23:17; 25:2).
ONYAN̄ IBA 24–ONYAN̄ ITA 2
INU UNYE OTU EWE OKUP ME USEM AWAJI URỌK 2
Keke Orọ Obokaan̄ Uyok Uyok Ejit Me Lek Nkween̄mkpọ Agaga Kwun̄?
w22.08 18 ¶16
“Ikweek Inye Ikije Me Emen Atikọ”
16 Ikare otutuuk kiji ekima ikekifuk mè ikekikween̄ mkpọ. Ire Jioba ibe me eji ‘ekup enye ekeweek’ igogobo itet atikọ echi odọdọk. (Fuk Urọk 2:4-6.) Mgbọ geelek eji esitap mbet lek efuuk okup ikeya, eji ekikakaan̄ oruru. Ofolek ikekikween̄ mkpọ agaga, Corey ibe ke ọmọ ikito chieen̄ me lek ere Baibul ge me mgbọ ge. Itumu ibe: “Ikekifuk otutuuk inu egebe me agan̄ ijọn̄, ikpọ otutuuk ere Baibul egebe me etete Baibul ofolek ere nkifuk, mè ikiwọlọ ikpọ igbaalek. . . . nkikween̄ owuwa mkpọ sa me ikekifuk mkpọ ikeyi!” Me ire eji ekikween̄ mkpọ ikeyi, sa me ire eji ekirọ ofifi ubọk, eji ekijeen̄ ibe ke eji minọnọ atikọ ibene sa me ikekisan̄a mgbọ isibi ikisa ikween̄ ema.—Itọn̄ 1:1-3.
w22.10 19 ¶3-4
Ata Iriọọn̄-Inu Okitaan̄ Ukpo
3 Iriọọn̄-inu mokọt isibi isasa mkpọ eji eriọọn̄be isa irọ ata ntumu-mfieek. Ire, ata iriọọn̄-inu igak ikeya. Baibul ibe: “Iriọọn̄-inu ìbene me lek itetet ukpook me lek Jioba; irọriọọn̄ Ogwu Òkup Mbuban, ọmọ ore ngobo-ntet.” (Urọk 9:10) Eya orọ, mgbọ geelek eji esikaan̄ ntumu-mfieek okukup ufiak eberọ, eji etele ibe nkeek Jioba orere “irọriọọn̄ Ogwu Òkup Mbuban” ire mkpọ eji ebeyaka ntumu-mfieek kiji imaan̄ me lek. Eji mekọt irọ eyi sa me ikekiwọlọ Baibul mè ikpa ntitiin̄ ikpọ. Mgbọ geelek eji esirọ ikeya, eji ekijeen̄ ibe ke eji mikaan̄ ata iriọọn̄-inu.—Urọk 2:5-7.
4 Jioba gaalek ore ogwu obokọt inyi ata iriọọn̄-inu. (Rom 16:27) Keke orọ ọmọ orebe Ere ata iriọọn̄-inu onan̄abe ni? Adasi, kubọk ogwu Orom, iriọọn̄ mè igobo itet otutuuk inu geelek ofolek inu irombe. (Itọn̄ 104:24) Òso iba, otutuuk inu geelek Jioba okirọ ikijeen̄ iriọọn̄-inu. (Rom. 11:33) Òso ita, nteme Jioba ikirọrọ ebi geelek itatap me ema ikwaan̄ oruru. (Urọk 2:10-12) Ire eji iweek ikakaan̄ ata iriọọn̄-inu, eji ebebọbọkọ atikọ chi itap mè itele ibe ema ekebem eji mgbọ geelek eji esiberọ ntumu-mfieek mè mgbọ geelek eji eberọ inu geelek me ugwem.
w16.09 23 ¶2-3
Ebi Ijija, Irọ Inyi Ichechieek Kinyi Inye
2 Kubọk ogwu usun̄ Jioba okup ijija mè iyaka ire ogwu okikween̄ mkpọ ofolek Kan̄, ire okekichichini ukeme ichechieek mkpọ owuwa ene echieekbe ni? Kubọk ichechieek ibe ke ene esibi me lek kiban̄ gaalek, kpan̄asi ichechieek ibe ke ire Awaji orom ene ni? Ire ikeya, ikaan̄ usini mkpọ oborọ isasa irọ ibe ichechieek kwun̄ inye. Adasi, ire isasa ata nkeek Awaji onyibe owu irọ mkpọ eyi obore “ikput-lek inyi owu.” Mobem owu isan̄a me lek ujọnọ ufuk-ibot inyọn̄ keyi echi obokọt ijijaka ichechieek kwun̄.—Fuk Urọk 2:10-12.
3 Ata ichechieek iyaka lek imaan̄ me lek ikakaan̄ ata iriọọn̄-inu ofolek Awaji. (1 Tim 2:4) Eya orọ, ike okikween̄ Usem Awaji mè ikpa ntitiin̄, kakpọkpọ ikifuk inyọn̄ inyọn̄. Ire, kikeek mkpọ ofolek inu okifuk inyi ‘ogobo otet’ inu okifuk. (Mat 13:23) Eji ekpọ-nu ubọk irọrọ ikeya obosa irọ ibe ichechieek kiji me lek Awaji kubọk ogwu Orom mè melek Baibul inye. Eji mikaan̄ owuwa inu oborọ ibe eji echieek me lek inu chi.—Iburu 11:1.
Week Inu Unye Otu Ewe Okup Me Usem Awaji
bhs 19 ¶10
Kweek Riaak Me Lek Jioba
10 Ike owa ke osa inikana ogwu unene Jioba? Inan̄a me lek Baibul okweeen̄be owu onu iniriọọn̄ Jioba igbaalek mè irọ unene me lek kan̄. Unene kwun̄ me lek kan̄ ikup kubọk ukan̄ eyi oboweek ibe ikup inye ikilomo. Ike ukan̄ oweekbe iye inyi ikup inye ikilomo, ikup ufiaak ibe okup onye okokween̄ mkpọ ofolek Jioba ufuna unene kwun̄ melek kan̄ ikinye.—Urọk 2:1-5.