Awaji Orom Inyọn̄ mè Ijọn̄

Jioba Awaji kiji orom otutuuk inu, echi eji ebekọt imun̄ mè echi eji kpekọt imun̄. Sabum irombe inu echi eji ebekọt imun̄, idasi irom owuwa ebi osat. Ebi owa ere ebi osat? Ebi osat ire ebi Jioba orombe kubọk lek kan̄. Eji kpebekọt imun̄ ema ike eji kpebekọt imun̄ Awaji. Adasi ogwu osat Jioba orombe okana ogwu ntap-ubọk inyi ọmọ. Ogwu osat ya otap ubọk inyi Jioba mgbọ irombe akpabin inyọn̄, ntoronyan̄, mè otutuuk inu geelek. Ge me lek inu cha ire inyọn̄ ijọn̄ yi, orere ujuja ere iluluk kiji.

Jioba inen̄e inyọn̄ ijọn̄ yi isun̄ ufuna anam mè ebilene ekọt eluk me emen sa me irorom ura ibe itoon̄ me inyọn̄ ijọn̄. Irom si ogoon̄, okwaan̄ ile, mè okolo.

Jioba onenitumu ibe: ‘Emi marom mbubet mè inwan̄ oron mè uti.’ Esese esese chieen̄ mfut uti, inwan̄, mè ajakajak obebene ikitibi isibi me ijọn̄. Jioba onenirom otutuuk anam​—echi okigwọk ugwọk, echi okinyinyọnọ mè unọn echi okiwulu. Irom anam echi asabọn kubọk ikpi-ejook, mè echi ilile kubọk eniin̄. Kpasi anam ke oma ichit?

Jioba onenitumu inyi adasi ogwu osat ibe: “Eji enerom ebilene me mbet kiji.” Ebilene mekup esese me lek anam. Ema mekọt irom mkpọ. Ema si mekọt itumu usem, ichak imọm, mè iriaak uriaak. Ema mekpọ chieen̄ me lek inyọn̄ ijọn̄ mè anam. Ire oriọọn̄ adasi ene Awaji orombe ni? Kè eji ekpọ-nu.