Ene Jeeta Eluk Itibi Inin̄ Ayaya Inyọn̄

Nuwa mè ebi ototun̄ ukan̄ kan̄, mè esese chieen̄ anam minin̄ uji ilile ya. Jioba ogogon isotu, ibot obebene ikirep. Ibot ya irep enenen, ire lek uji ilile ya obenebe ikite. Mun̄ ochichit otutuuk inyọn̄ ijọn̄ ya. Otutuuk ebi ijo ife ekwakwaan̄ isan̄a kpai. Ire, Nuwa mè ebi otọtun̄ ukan̄ kan̄ ikup me emen uji ya miluk ugwem. Ire omokọt ikeek mbet lek unwọọn̄ ema ebekaan̄ mije ema esikibe ibot inyi Jioba ni?

Ibot ya irep akọp ikarek ini mè akọp eririeen̄ ini mè ifieek. Mun̄ obebene ikigele sọntiik sọntiik. Uji ilile ya orarak me inyọn̄ ogoon̄ ge. Ire, mun̄ ijojot otutuuk ere si, ọmọ orọ, Nuwa mè ebi ototun̄ ukan̄ kan̄ kpekọt inan̄a isibi me emen uji ya.

Sọnja sọnja, mun̄ ya ochachiaak isan̄a. Nuwa mè ebi ototun̄ ukan̄ kan̄ mikup iraka acha ge me emen uji ilile ya. Jioba otutumu inyi ema ibe ke ema mekọt isibi me emen uji ya inin̄ ere okup kubọk aya inyọn̄. Ema mibele ejit enenen ibe ke Jioba inyan̄a ema, mijeen̄ itọn̄ kiban̄ sa me igwagwa ngwugwa isa itọn̄ Jioba.

Jioba ibele ejit enenen me lek ngwugwa ya. Ichieek use ibe ke ọmọ ikpoboyaka isa mun̄ ile ifiat otutuuk inu me inyọn̄ ijọn̄ yi. Kubọk inu oriọọn̄ isa inyi use kan̄, Jioba orọrọ ibe adasi egop ubọọn̄ isibi me akpa isinyọn̄. Ire owuuk lek imun̄ egop ubọọn̄ ni?

Jioba otutumu inyi Nuwa mè ebi ototun̄ ukan̄ kan̄ ibe ekaan̄ nsabọn mè ewa ejot inyọn̄ ijọn̄ yi.