Uwu-Oket Baben

Mgbọ mun̄ ile ya orakabe, nsabọn Nuwa mè nwa kiban̄ mikaan̄ owuwa nsabọn. Ototun̄ ukan̄ kiban̄ obebene ikimin, ema ebebene ikikpọk ikana isi iluk me esese esese ere me inyọn̄ ijọn̄ yi ike Jioba obe me ema erọ.

Ire, usini ene me ototun̄ ukan̄ ya kpesiki ibot inyi Jioba. Ema etumu ibe: ‘Ngwa, eji enenama ikpele ama ge enyi lek kiji, mè enama si ikpele uwu-oket eyi inyọn̄ kan̄ mobenebe isi ichak me isinyọn̄, inyi eji esa me ikeya etaan̄ etip.’

Ema ebebene ikinama ama mè uwu-oket ya, ire, Jioba osisibi ifieek ikpukput ema mije, ikabele ejit me lek mkpọ ema ekirọ. Ire oriọọn̄ ubọk irọbe eya ni? Irọ ibe ema eketumu esese esese ida usem. Eyi irebe ibe ke ema kpeyaka ikinọ usem ge ge okitumu, ema etetet ikwaan̄ inama-uwu ya ikaan̄. Ama ile ema ekinama ya ore ere ekigwen Baben, eyi osibi “Wọlọwọlọ.” Ebi ene ebebene ikikpọk iyat mè iluk ikana otutuuk inyọn̄ ijọn̄ yi. Ire, ema ekpọkpọk ikup inye ikirọ ijo inu me ayaya ere ema esibe isi iluk. Ire, ire ikaan̄ ebi imama Jioba me etete kiban̄ ni? Eji meriọọn̄ me ofifi ibot usem.