Uru ire ama ile okukup iriak lek Baben, ere owuwa ene ekiriaak esese esese awaji kpan̄asi Jioba. Ire, ikaan̄ ogwu enerieen̄ ge me Uru okitọbọ ebum inyi Jioba gaalek. Erieen̄ kan̄ ire Ebereyam.

Jioba itumu inyi Ebereyam ibe: ‘Nan̄a tele ama kwun̄ mè ebi uwu kwun̄, mè je si lek ijọn̄ mbasa owu ijeen̄.’ Awaji ochechieek ọmọ use ibe: ‘Owu mokana ama ile, marọ ata inu inyi ogbogbo ene me otutuuk linyọn̄ yi bak me lek kwun̄.’

Ebereyam ikariọọn̄ ere Jioba oboria ọmọ isi, ire, itoon̄ ejit me lek Jioba. Eya orọ, Ebereyam mè ogwu nwa Sera, mè ogwu ute Tera, mè gwun̄ ogwu ngwan̄ Lọt esisiki ibot mè ikpulu mkpọ kiban̄ ikije ujọn̄ọ ije.

Ebereyam ire akọp acha jaaba mè go mgbọ ọmọ mè ebi uwu kan̄ erebe lek ijọn̄ Jioba oweekbe ibe ema eluk. Ekigwen lek ijọn̄ ya Kenan. Me ere ya, Awaji ochechieek Ebereyam use ibe: ‘Otutuuk lek ijọn̄ yi omun̄be okukup ikana owu, masa inyi nsabọn kwun̄.’ Ire, Ebereyam mè Sera mikan, ema si kpekaan̄ nsabọn geege. Eya orọ, ike owa ke Jioba obosa irọ use kan̄ iso ni?

Ebereyam mè Sera mibat lek kiban̄ me ogbogbo acha. Ema minan̄a itele ata uwu kiban̄ me Uru mè iyaka ikiluk me emen uwu ọfọ. Ire, Sera ikakaan̄ sasaak bak me lek itoon̄be ejit me lek Jioba.

Sera iweek ikakaan̄ gwun̄ enenen, ire lek itumube inyi Ebereyam ibe: ‘Ire ogwu usun̄ n̄a Ega iman gwun̄ inyi owu, ibokup kubọk ire eyi n̄a.’ Ike mgbọ okije, Ega omaman gwun̄ enerieen̄. Erieen̄ kan̄ ire Isimen.

Ogbogbo acha oraraka, mgbọ Ebereyam osobe akọp acha onaan̄ge mè onaan̄ge, me mgbọ Sera orebe akọp acha jeeta mè onaan̄ge, ema ekakaan̄ ebi ichen ita. Ebereyam osasa ema isi ikweek irek me irak uti ge, mè itet ema ichen. Ire oriọọn̄ ebi ema erebe ni? Ema ire ebi osat! Ema etumu inyi Ebereyam ibe: ‘Ike mgbọ keyi me acha okinu, owu mè nwa kwun̄ mekaan̄ gwun̄ enerieen̄ ge.’ Sera okukup me emen uwu ọfọ ikigban̄ mè ikichak, mè ikitumu inyi lek kan̄ ibe: ‘Mbajeje ikaan̄ gwun̄ ni, eyi nkanbe ikeyi?’

Me acha ogọgọọk, Sera omaman gwun̄ enerieen̄ ike ogwu osat Jioba ochieekbe me use. Ebereyam ogwegwen gwun̄ ya Ajiki, eyi osisibi “Imọm.”

Mgbọ Ajiki osobe acha go, Sera omumun̄ ubọk Isimen okisa Ajiki irọ mkpọ ochak. Inyi ikọt ibem ogwu gwun̄, Sera osisi itumu inyi Ebereyam ibe irieen̄ Ega mè Isimen isibi. Me adasi mgbọ, Ebereyam ikaweek irọrọ ikeya. Ire, Jioba otutumu inyi Ebereyam ibe: ‘Gban̄ utọn̄ me lek nwa kwun̄ Sera. Makpọ chieen̄ me lek Isimen. Ire, ire inan̄a me lek Ajiki ke mbarọ use n̄a iso.’