Ajiki ire akọp acha ini mgbọ idobe Ribeka me lek nwa. Ima Ribeka enenen, ike mgbọ okije, ema ekakaan̄ nsabọn iba egbaan̄be iman.

Erieen̄ ogwu ugane ire Isọ, ogwu ijija ore Jekọp. Isọ ikakimalek ikup me uwu, ọmọ ire atalek ogwu ota. Ire, Jekọp ima ikekikup me uwu.

Me ukot mgbọ ya, ire ogwu okpan ke ekinyi agan̄ ilile me lek ikpoko mè ijọn̄ mè ire nte kan̄ ikwu. Eya ke ekigwen irot. Me ototun̄ ukan̄ kè Ajiki, irot ya igọbọ si ugbana ebekaan̄ inan̄a me lek use Jioba ochieekbe Ebereyam. Isọ ikamọnọ use ya kubọk mkpọ okukup ufiak, ire, Jekọp imọnọ ibene enenen.

Usen ge, uraafiọọn̄ itaka Isọ enenen mgbọ inan̄abe me oron ika. Ikekinọ olu inorie Jekọp okitem mè ibe: ‘Che inorie araran̄ isi ya nyi emi! Uraafiọọn̄ mônikpan̄ emi!’ Jekọp obebe: ‘Manyi owu, ire, dasi chieek emi use ibe ke owu moyaka irot kwun̄ inyi emi.’ Isọ ofọfọọk ibe: ‘Irot n̄a kubọk adasi gwun̄ ikakup emi ufiak! Owu mokọt ibọkọ, mweek irerie inorie.’ Ire okeek ibe ke inu ya Isọ orọbe ijeen̄ iriọọn̄-inu ni? In̄-in̄, ikajeen̄. Isọ ifiin̄ inu onyenye otu ewe enenen bak lek alala inorie ge.

Mgbọ Ajiki okanbe enenen, irere mgbọ ibogbana adasi gwun̄ kan̄. Ire, Ribeka otatap ubọk inyi Jekọp ogwu ijija ibe ibọkọ ugbana ya. Mgbọ Isọ oweekbe iriọọn̄, inanaan̄ ejit enenen mè ikitọt ubọk ibokpan̄ ogwu ngwan̄. Ajiki mè Ribeka miweek ibebem Jekọp, eya orọ, Ajiki otutumu inyi ọmọ ibe: ‘Je si gọọk ngwan̄ nga kwun̄ Leban kweek mege ejit Isọ mosikibe.’ Jekọp ogbagban̄ utọn̄ me lek nteme ogwu ute mè ilibi mije ugwem kan̄.

Jioba ichieek Jekọp use ibe ke mobem ọmọ ike ibembe Ebereyam mè Ajiki. Jekọp iluk me ama ge ekigwen Eran, me ere ya, ikaan̄ ototun̄ ukan̄ omimin mè ibọọn̄ ubọọn̄ enenen.

Ike mgbọ ojebe, Jioba otutumu inyi Jekọp ibe: ‘Gwu kom fo ama kwun̄.’ Eya orọ, Jekọp mè ebi ototun̄ ukan̄ kan̄ ebebene ikije ujọn̄ọ ije ikifo. Me oniin̄ ema ekije, Jekọp onọnọ ibe ke Isọ mè efit ebirieen̄ ini mekinu. Jekọp ofefieek owot ibe ke Isọ monitap ọmọ mè ebi ototun̄ ukan̄ kan̄ unan me lek. Ibebeek uriaak inyi Jioba ibe: ‘Soso nyan̄a emi me ubọk ngwan̄ n̄a.’ Me ewelegwe, Jekọp oraria owuwa inyinyi ijet Isọ. Iria arọọn̄, ebot, eriembuuk, aligọ mè inyinya akpan.

Me eririeen̄ ya, mgbọ Jekọp gaalek okupbe, imumun̄ ogwu osat Jioba! Jekọp melek ogwu osat ya ekekitap àlo. Mitap àlo ya abayaage egwe owelebe. Ikerere ibe ke Jekọp isak unan, ikachieek ibe ogwu osat ya ifo. Ogwu osat ya okekitumu inyi ọmọ ibe: ‘Tele ibe mfo.’ Ire, Jekọp ofọfọọk ibe: ‘In̄-in̄, itata ogbagbana emi.’

Me ota kan̄, ogwu osat ya ogbagbana Jekọp. Jekọp onenichieek inye ibe ke Jioba ikpobotele ibe Isọ ngwan̄ kan̄ isak ọmọ unan geege me lek.

Me owelegwe ya, Jekọp obebene chieen̄ imun̄ Isọ mè efit ebirieen̄ ini melek kan̄ me ujọn̄ọ ere. Jekọp ojeje me isi ebi uwu kan̄ isi lek Isọ mè igele ibot isiki mgbọ jaaba inyi ọmọ. Isọ olilibi inin̄ Jekọp lek mè ikat ọmọ. Ebi ngwan̄ iba cha ebebene ikito ito unwọọn̄ mè irọ esuuk. Me nkeek kwun̄, ubọk Jekọp osabe irọ esuuk ikukup me lek Jioba?

Ike mgbọ ojebe, Isọ ogwugwu ikom ifo uwu kan̄, Jekọp si ofofo. Jekọp ikaan̄ akọp mè nsabọn ebirieen̄ iba. Erieen̄ kiban̄ ire Ruben, Simiọn, Libai, Juda, Dan, Nafitali, Gadi, Ase, Isaka, Jebulọn, Josefu, mè Benjamin. Ire ge me lek nsabọn chi, orere Josefu ke Jioba osa inyan̄a ebi eyi kan̄. Ire oriọọn̄ ubọk isabe irọ eyi ni? Kè eji ekpọ-nu.