Josefu ire ene ge me lek nsabọn ebirieen̄ kè Jekọp. Ebi ngwan̄ kan̄ ebi ugane mimun̄ ibe ke ire Josefu ke nte kiban̄ oma ichit. Ire okeek ibe ke inu ya ibokukup me lek kiban̄? Ema ebebene ikikaan̄ njijọ ejit me lek Josefu, mè icha ọmọ. Mgbọ Josefu omun̄be ilaak okup uyeke uyeke, itutumu inyi ebi ngwan̄ kan̄. Ema ekekikeek ibe ke ilaak ya isibi ibe ke usen ge ke ema metọbọ ibot inyi Josefu. Eya orọ, ema echacha Josefu igbaalek!

Usen ge, ebi ngwan̄ Josefu ejeje isi ikpọ chieen̄ me lek arọọn̄ me ama ile ge okup iriak lek Sekem. Jekọp oraria Josefu ibe isi ikpọ-nu ubọk ema ekirọ. Ema ebebene chieen̄ imun̄ Josefu okinu me ujọn̄ọ ere mè ikitumu ibe: ‘Ogwu okimun̄ ilaak ya okinu o. Eji ekpan̄ ọmọ!’ Ema etetet ọmọ mè iben ọmọ itọp itap me emen udọn̄ ge odọdọk. Ire, Juda, ge me lek ebi ngwan̄ kan̄, otutumu ibe: ‘Ikakpan̄! Kpan̄asi ikeya, eji enyam ọmọ.’ Ema enyanyam Josefu akọp ikpoko alata okuket iba inyi ogwu Midia ge okinyam ewe okije iraka ikifo Ijipiti.

Ebi ngwan̄ Josefu emọmọnọ ofọnti Josefu ijiin̄ me emen eje ebot, mè isi ijet nte kiban̄ mè itumu ibe: ‘Kpọ, ire ikare ofọnti gwun̄ kwun̄ ire eyi ni?’ Eya orọ, Jekọp okekikeek ibe ke ire anam oron okpan̄ Josefu. Ejit ifieek Jekọp enenen. Kpunu ene geege okọkọt ikat ọmọ ejit.

Me Ijipiti, enyanyam Josefu inyi ogwu ilile ge ekigwen Pọtifa. Ire, Jioba ikatele Josefu. Pọtifa omumun̄ ibe ke Josefu ikisi ikwaan̄ ijaan̄ enenen, mè ire si ogwu ebekọt itoon̄ ejit me lek. Me ikafiin̄ge, Pọtifa oyayaka otutuuk inu ikaan̄be itap me ubọk Josefu ibe ikikpọ chieen̄ me lek.

Nwa kè Pọtifa omumun̄ ibe ke Josefu ijaan̄ enenen mè inye lek. Eya orọ, ikekitumu inyi Josefu egwe geelek ibe inigọọk ọmọ ilaak. Keke ke Josefu orọ ni? Ikachieek irọrọ inu nwa Pọtifa oweekbe. Itumu inyi ọmọ ibe: ‘In̄-in̄! Inu yi ilọ. Nte uwu n̄a itoon̄ emi ejit me lek, owu ire ogwu nwa. Ire ngọọk owu ilaak, nrọ ijo inu me isi Awaji!’

Usen ge, nwa kè Pọtifa otetet Josefu me ubọk unye ibe inigọọk ọmọ ilaak, ire, Josefu olilibi. Ire, nwa kè Pọtifa iyaka itumu ibe ke Josefu ibonitet ọmọ me unye igọọk ilaak mgbọ ogwu olom okabe. Ikatumu atikọ. Pọtifa inaan̄ ejit enenen mè itet Josefu itap me mkpọn. Ire, Jioba ikawuuk Josefu.

Mgbọ Josefu okupbe me mkpọn, Fero ogwu ubọọn̄ Ijipiti imun̄ ilaak ge. Ire, kpunu ogwu okọkọt ikpa mkpọ ilaak ya osibibe inyi ọmọ. Ge me lek ebi usun̄ kan̄ otutumu inyi Fero ibe ke Josefu mokọt ibum ibot ilaak ya inyi Fero. Mgbọ yaage, Fero oraria ibe esi egwen Josefu.

Fero ododo Josefu ibe: ‘Ire omokọt ibum ibot ilaak n̄a ni?’ Josefu otutumu inyi Fero ibe: ‘Inorie mowa me Ijipiti me acha jaaba okinu, ire, akan̄ monin̄ me acha jaaba obogọọk. Eya orọ, gobo ene ge okakaan̄ iriọọn̄-inu ibe ititiin̄ inorie isun̄, inyi ebi kwun̄ ekakup me uraafiọọn̄.’ Fero ofọfọọk ọmọ ibe: ‘Ire owu ke ngobo! Owu more òso ene iba okakaan̄ unye ichit me Ijipiti!’ Ike owa ke Josefu osa iriọọn̄ mkpọ ilaak Fero osibibe ni? Ire Jioba orọ ibe Josefu iriọọn̄ mkpọ ilaak ya osibibe.

Josefu osasa acha jaaba ogọgọọk ititiin̄ inorie isun̄. Akan̄ oninin̄ otutuuk inyọn̄ ijọn̄ ike Josefu otumube. Ebi ene ekekinan̄a me ere geelek ikinilep inorie me ubọk Josefu. Jekọp nte Josefu, onọnọ ibe ke inorie omaan̄ me Ijipiti, eya orọ, iraria akọp nsabọn ebirieen̄ kan̄ ibe esi elep inorie me ama ya.

Nsabọn ebirieen̄ kè Jekọp ejeje isi lek Josefu, mgbọ yaage, Josefu orọriọọn̄ ema isi. Ire, ebi ngwan̄ kan̄ kperiọọn̄ ibe ke ọmọ ire Josefu. Ema etọtọbọ ibot inyi Josefu ike Josefu omun̄be me ilaak me mgbọ irebe nsabọn. Josefu iweek irọriọọn̄ me ebi ngwan̄ kan̄ mikaan̄ ochicha ejit sa minwene. Ọmọ orọ, itutumu inyi ema ibe: ‘Eraria enyi inu. Enyi ebeniweek iriọọn̄ ubọk ido kije okupbe.’ Ema ebebe: ‘In̄-in̄! Eji ire akọp mè ngwan̄ iba, eji enan̄a me Kenan. Ngwan̄ kiji ge ikwu, ogwu uchit-owot ogọọk nte kiji ikup me uwu.’ Josefu otutumu ibe: ‘Isi isa ngwan̄ kinyi ogwu uchit-owot ya inu, inyi nchieek me lek inu enyi ekitumu.’ Ema egwugwu ikom ifo isi lek nte kiban̄.

Mgbọ inorie otabe me uwu kiban̄, Jekọp okpọkpọk iria ema isi Ijipiti. Eyi mgbọ keyi, ema misa Benjamin ngwan̄ kiban̄ ogwu uchit-owot igbaalek ije. Isasa itọ ebi ngwan̄ kan̄ ikpọ, Josefu ilet ekpen̄ alata okuket me emen akpa Benjamin mè itumu ibe ke ire ebi ngwan̄ kan̄ echiin̄ ekpen̄ ya. Mgbọ ebi usun̄ kè Josefu emun̄be ekpen̄ ya me emen akpa Benjamin, ebi ngwan̄ kan̄ eririki. Ema ekekiriaak Josefu ibe isut ema osusut kpan̄asi Benjamin.

Mgbọ keyi, Josefu omumun̄ ibe ke ebi ngwan̄ kan̄ minwene. Ikayaka ikọt itet lek kan̄ ikaan̄ me isi kiban̄. Ibebene ikito ito mè ikitumu ibe: ‘Emi ire ngwan̄ kinyi Josefu. Ire nte n̄a omaan̄ me ugwem ni?’ Eyi ike ebi ngwan̄ kan̄ chieen̄ enenen. Josefu otutumu inyi ema ibe: ‘Ikafieek lek kinyi ikọ bak lek mkpọ enyi erọbe emi. Awaji iria emi inu me ere keyi ibe nnenyan̄a enyi. Mgbọ keyi, igwat lek ije isi isa nte n̄a inu.’

Ema egwugwu ikom ifo mè isi ilook nte kiban̄ ata etip yi, mè isa ọmọ inu me Ijipiti. Mgbọ ogbogbo acha orakabe, Josefu mè ogwu ute mikpọk iyaka igbaan̄ ikweek.