Mosis mè Erọn misi ilook Fero etip Jioba obe: ‘Ire okatele ibe ebi n̄a efo, maria ijo nson igwook me lek ijọn̄ kwun̄.’ Mgbọ yaage, ijo nson oninin̄ ijot uwu ebi Ijipiti, uwu ebi ubọọn̄ mè uwu ebi ugbọọn̄. Ijo nson ojojot otutuuk lek ijọn̄ Ijipiti isan̄a me lek Gosen, ere ebi Ijeren elukbe. Osusut eyi òso ini yi mè echi ogọgọọk ikisak unan me lek ebi Ijipiti gaalek. Fero obebeek Mosis ibe: ‘Soso riaak Jioba ibe isan̄a ijo nson yi isan̄a. Ebi Ijeren mekọt ifo.’ Ire, mgbọ Jioba osan̄abe ijo nson ya isan̄a, Fero onwenwene ejit. Ire Fero mokween̄ mkpọ inan̄a me lek inu orọrọ ni?

Jioba otutumu ibe: ‘Ire Fero ikachieek ibe ebi n̄a efo, anam okup me Ijipiti mefiak orukan̄ mè ikwaan̄.’ Me usen ogọgọọk, anam ebi Ijipiti obebene ikikwaan̄. Ire, anam ebi Ijeren geege ikakwu. Ire, Fero ikpọkpọ inye ibot, ikachieek si ibe ebi Ijeren efo.

Jioba otutumu inyi Mosis ibe igwu ikom isi lek Fero mè igwọ ntọn̄ itọp ifo inyọn̄. Ntọn̄ ya okakana mfuun̄ mè ikpọk ikana otutuuk lek efet mè igwook me lek otutuuk lek ebi Ijipiti. Mfuun̄ ya otitibi okporotu ukan̄ me lek otutuuk lek ebi Ijipiti mè anam kiban̄. Ire, Fero ikachieek ibe ebi Ijeren efo si.

Jioba okpọkpọk iria Mosis ibe isi ilook Fero etip ibe: ‘Ire ojit si itetele ibe ebi n̄a efo? Me iyakwut, ibot mgbọlọ morep igwook me lek ijọn̄ kwun̄. Me atikọ, ofit iwele kan̄, Jioba orọrọ ibe isinyọn̄ ikimumen, mè ikisook, ibot mgbọlọ okekirep. Ebi Ijipiti kpewuuk lek imun̄ mbet lek egwijo onyenye ikeya. Egwijo ya ijijaka otutuuk uti mè inu ewopbe, ire, ikare Gosen ere ebi Ijeren elukbe. Fero obebe: ‘Soso beek Jioba ibe irọ me egwijo yi ifieek, ke enyi mekọt ifo.’ Ire, mgbọ yaage ibot mgbọlọ ya ofieekbe, Fero onwenwene ejit kan̄.

Mosis otutumu ibe: ‘Mgbọ keyi, akaka ituuk motaka uko geelek egwijo ofiatbe isik.’ Efie efie akaka ituuk oninin̄ mè itaka otutuuk inu ewopbe isan̄a kpai. Fero orariaak ibe: ‘Soso beek Jioba ibe isan̄a akaka ituuk yi isan̄a.’ Ire, ikerere me mgbọ Jioba osan̄abe akaka ituuk ya isan̄a, Fero ikpọkpọ inye ibot ibia.

Jioba otutumu inyi Mosis ibe: ‘Bene ubọk kwun̄ fo inyọn̄.’ Mgbọ yaage, isinyọn̄ odudun. Ebi Ijipiti kpemọọn̄ inu geege mè iyaka ire imun̄ ene geege otuuk egwe ita. Ebi Ijeren gaalek ekaan̄ utoon̄ me uwu kiban̄.

Fero onenitumu inyi Mosis ibe: ‘Owu mè ebi kwun̄ mekọt ifo. Ire, ijuuk anam kinyi itele me ere yi.’ Mosis otutumu ibe: ‘Eji ebesasa anam kiji igbaalek ije, inyi eji mesa igwa ngwugwa inyi Jioba.’ Fero onanaan̄ ejit enenen mè itaan̄ ukpo itumu ibe: ‘Ije inan̄a me ere yi! Ire mkpọk imun̄ lek kinyi, makpan̄ enyi.’

Mosis itumu inyi Fero ibe: ‘Mkpayaka inu me isi kwun̄.’ Ire, sabum inan̄abe, Mosis otutumu inyi Fero ibe: ‘Me eririeen̄, otutuuk adasi bọn ebirieen̄ ebi Ijipiti mekwaan̄, bene me lek gwun̄ kwun̄ isi ire lek bọn ebirieen̄ ebi usun̄ kwun̄.’

Jioba otutumu inyi ebi Ijeren ibe erie inorie ge osisibi esese. Itumu si ibe: ‘Ikpan̄ orie arọọn̄ mè iyaka ire ebot ososo acha ge, mè isa eje kan̄ ichiọọk me ebek isotu kinyi. Iwọp anam ya, mè isa fituru kpunube olat me lek irie. Itap mkpukot kinyi, mè ibem lek, ke enyi menifo. Me eririeen̄ keyi, masan̄a enyi isan̄a me usun̄. Ire omokọt ikeek mbet lek unwọọn̄ ebi Ijeren ekaan̄be ni?

Me eririeen̄ ya, ogwu osat Jioba okekije ikana otutuuk uwu geelek okup me Ijipiti mè ikpan̄ adasi gwun̄ okup me uwu geelek ekachiọọkbe eje me ebek isotu. Ire, ije iraka uwu geelek echiọọkbe eje me ebek isotu. Otutuuk adasi bọn ebirieen̄ me ototun̄ ukan̄ ebi Ijipiti geelek ekwakwaan̄, bene me lek ebi ibọbọọn̄ ubọọn̄ isi ire lek ebi ugbọọn̄. Ire, bọn ebi Ijeren geege kpekwaan̄.

Fero ikayaka ikọt ime mije, gwun̄ kan̄ si ikwu. Mgbọ yaage, Fero otutumu inyi Mosis mè Erọn ibe: ‘Inan̄a ikeke, isibi me ama yi. Ije isi itọbọ ebum inyi Awaji kinyi, mè isa anam kinyi igbaalek ije!’

Me eririeen̄ ya, mgbọ onyan̄ okitoon̄ ijaan̄, ebi Ijeren ejeje isibi me ijipiti ike eneen̄be ema me ototun̄ ukan̄ mè otoko. Ema ire efit obop ebirieen̄ gweregwen mè owuwa ebibaan̄ mè nsabọn. Owuwa ebi Ijipiti si migọọk ema ije inyi megọọk ema isi itọbọ ebum inyi Jioba. Me ota kan̄, ebi Ijeren minan̄a me usun̄!

Inyi ema ekekeek ubọk Jioba osabe inyan̄a ema, ema ebekirerie inorie osibi esese yi acha geelek. Ekigwen inorie yi inorie Ijọk Iraraka.