Jioba itumu inyi Mosis ibe: ‘Nene na me inyọn̄ ogoon̄, ke mage ikan n̄a me inyọn̄ akpakpa ewuuk inyi owu.’ Mosis onenene mè ikup me inyọn̄ ogoon̄ ya akọp eririeen̄ ini mè akọp ikarek ini. Me ere ya, Jioba ogege akọp ikan me inyọn̄ ewuuk mè isa inyi Mosis.

Ike mgbọ okije, ebi Ijeren ekekikeek ibe ke Mosis ijuuk ema itele. Ema etutumu inyi Erọn ibe: ‘Eji ekiweek ogwu obokisa eji ije. Rọ awaji nyi eji!’ Erọn otutumu inyi ema ibe: ‘Inyi emi alata araran̄ kinyi.’ Ibọbọkọ ikala, mè isa itọkọ mkpọ okup kubọk gwun̄ eriembuuk. Ebi Ijeren ebebe: ‘Eriembuuk yi ire Awaji kiji ogwu osasa eji inan̄a me Ijipiti isibi!’ Ema ebebene ikirie ijọk mè ikitọbọ ibot inyi inu etọkọbe ya. Ire inu ya ilọ ni? Iin̄, mije, ema michieek use itọtọbọ ebum inyi Jioba gaalek. Ire, me mgbọ keyi, ema kpeyaka irọ use kiban̄ iso.

Jioba omumun̄ inu okirọ mè itumu inyi Mosis ibe: ‘Sibi ijọn̄ si lek ebi Ijeren ke ema mekikpaka ibot inyi emi, mè ikitọbọ ebum inyi awaji ataak.’ Mosis obeben akpakpa ewuuk iba cha me ubọk mè ikisa isibi ijọn̄.

Ike Mosis okije iriaak me ere ebi Ijeren ekupbe, ikekinọ ema ekikọt mè ikijop okwa mè ikitọbọ ibot inyi mkpọ etọkọbe ya. Mosis onanaan̄ ejit enenen mè iben akpakpa ewuuk iba cha itọbọ me ijọn̄, ewuuk cha obabak mè isek. Mgbọ yaage, Mosis osisi ijijaka inu etọkọbe ya mè ido Erọn ibe: ‘Ike owa ke ebi ene esa irọ ibe owu orọ mbet lek ijo inu okup ikeyi?’ Erọn ofọfọọk ibe: ‘Soso kanaan̄ ejit inyi emi. Owu oriọọn̄ ebi ebi ife chi erebe. Ire mije ema ekiweek awaji, ke mbe me ema esa alata araran̄ kiban̄ enu, mè isa irọ inu okup kubọk eriembuuk inyi ema!’ Erọn kpomorọ inu ya. Mosis ogwugwu ikom isi inyọn̄ ogoon̄ isi ibeek Jioba ibe itele inyi ebi ife cha.

Jioba otetele inyi ebi geelek igwugwu ikom mè ibem lek isisiki ibot inyi ọmọ. Ire omun̄ mkpọ orọrọ ikupbe ufiak ibe ebi Ijeren esiki ibot enyi mè egọọk ntọ-ubọk Jioba mè Mosis ni?

Mgbọ Mosis okupbe me inyọn̄ ogoon̄ Saina, Jioba otutumu inyi ọmọ ibe inama uwu ọfọ ge osibi esese ekigwen atanga chinichini eyi ebi Ijeren ebekisa itọbọ ebum inyi ọmọ. Ema mekọt ikiben atanga ya ikana ere geelek ema ebesi.

Jioba otutumu inyi Mosis ibe: ‘Tumu nyi ebi Ijeren ibe enyi inu geelek ebekọt inyi echi ebesa inama atanga chinichini ya.’ Ebi Ijeren enyinyi alata araran̄, alata okuket, ekwe, ewuuk unye otu ewe, mè akalari. Ema minyi si inwọọn̄ ebot, ekwut lilin̄, ikpa anam, mè ofifi ofifi inu. Ema minyi mkpọ iwa enenen ire lek Mosis otumube inyi ema ibe: ‘Ikem, eji mikaan̄ inu iwa! Ikayaka isa inu.’

Ogbogbo ebi usọ ikwaan̄ irieen̄ mè ibaan̄ mitap ubọk igọọk inama atanga chinichini mè iyaka ire akpatan̄ mbuban ya. Jioba onyi ema iriọọn̄-inu esabe isi ikwaan̄ ya. Usini ene ekirọ eri mè ikilọk ekwut me mgbọ usini ene ekineen̄ ewuuk, alata araran̄ mè uti ebesa irọ ikwaan̄ ya.

Ema minama atanga chinichini ya ike Jioba otumube inyi ema. Ema milọk ujuja ekwut isotu mè iyaka ire ekwut mgban isa iche emen atanga ya isibi irek iba, orere, ere okup mbuban mè ere okup mbuban ichit. Esa uti akasia mè alata araran̄ irọ okop inyan̄a-ibot mè iyik me ere okup mbuban ichit. Ngugọọn̄ mkpukan̄ esabe alata araran̄ irom mè ikasi itoon̄-inu mè ntook ngwugwa ewọwọp okup me ere mbuban. Okwa esabe ekwe irom mè ntook ilile enamabe okup me oyet egep atanga ya. Okop inyan̄a-ibot okikeek ebi Ijeren use ema echieekbe isisiki ibot inyi Jioba. Ire oriọọn̄ mkpọ inyan̄a-ibot ore ni? Ire use echieekbe osisibi esese.

Jioba igobo Erọn mè bọn ebirieen̄ kan̄ ibe ekesi ikwaan̄ me emen atanga chinichini kubọk ebi ngwugwa. Ema ebekikpọ chieen̄ me lek atanga chinichini ya mè ikigwa ngwugwa me ere ya inyi Jioba. Erọn ogwu ibot ngwugwa gaalek obokinin̄ ere okup mbuban ichit. Ibokinin̄ mgbọ ge me acha geelek ikisi igwa ngwugwa ijo inu me ibot kan̄ mè ibot ebi ototun̄ ukan̄ kan̄ mè ibot otutuuk ebi Ijeren.

Ebi Ijeren enama atanga chinichini isan̄a acha ge eyi ema enan̄abe me Ijipiti isibi. Mgbọ keyi, ema mikaan̄ ere ema ebekisa itọbọ ebum inyi Jioba.

Jioba itatap ujamgbugbo kan̄ ijot emen atanga chinichini ya mè irọ ibe oduku inyọn̄ ikana ichit atanga ya. Mgbọ geelek oduku inyọn̄ ya okekebe me inyọn̄ atanga ya, ebi Ijeren mira ikup ibia me ere ema ekupbe. Ire, oduku inyọn̄ ya isijibi ibene, ema mira iriọọn̄ ibe ke ema menibene ije kiban̄. Ema mira ijibi atanga ya mè ebene ekegọọk oduku inyọn̄ ya.