Mgbọ eriabe ene iba me lek ebi Ijeren ibe esi ekpọ Jeriko, ema ekup me uwu ogwu enenwaan̄ ge ekigwen Reyabu. Ogwu ubọọn̄ Jeriko oweweek iriọọn̄ mè iria ebi akọn̄ ibe esi uwu Reyabu. Reyabu ilet ebirieen̄ iba cha inikpọ Jeriko me inyọn̄ otoon̄-uwu kan̄ mè itumu inyi ebi akọn̄ cha ibe esi eweek ema me ofifi agan̄. Reyabu otutumu inyi ebirieen̄ cha ibe: ‘Matap ubọk inyi enyi mije nriọọn̄ ibe ke Jioba ọmọ owa melek kinyi, ke enyi metim igak mè ibọkọ lek ijọn̄ yi. Ire, soso ichieek emi use ibe ke enyi menyan̄a emi mè ebi uwu n̄a.’

Ebirieen̄ iba cha isi ikpọ Jeriko etutumu inyi Reyabu ibe: ‘Eji ekichieek owu use ibe ke eji kpekpan̄ owu mè ebi uwu kwun̄. Tobo olik araran̄ me otu nruruk kwun̄ ke unan geege ikpore lek ene geege me uwu kwun̄.’

Reyabu osasa olik igele ema itibi me otu nruruk isiki ito me ijọn̄. Ema elilibi isi agan̄ inyọn̄ ogoon̄ mè ilet me ere ya egwe ita, sabum ema egwube ikom isi lek Josuwa. Ebi Ijeren esasaba okwaan̄ Jodan mè ibem lek ibọbọkọ lek ijọn̄ ya. Jeriko ore adasi ama ema etimbe igak. Ike Jioba onyibe ida, ebi akọn̄ mije ikana ama ya okokop mgbọ ge me usen, me otuuk usen gweregwen. Ire, me òso egwe jaaba, ema ejeje ikana ama ya mgbọ jaaba. Ebi ngwugwa ewuwut otita, ebi akọn̄ esasa ida onyenye itaan̄ ukpo. Ogọ ama Jeriko ogbugbugbọ igwook me ijọn̄! Ire, uwu Reyabu gaalek okeke ibia. Minyan̄a Reyabu mè ebi ototun̄ ukan̄ kan̄ mije ema etoon̄be ejit me lek Jioba.

Etip inu orọrọ me Jeriko itaan̄ ikana esese esese ama me lek ijọn̄ Kenan. Ebi ubọọn̄ ama cha esisibi ifieek igbagbaan̄ ititiin̄ mè itim akọn̄ melek ebi Ijeren. Ire, ebi ama Gibiọn mitọt irọrọ ofifi inu. Ema etap oka ofọnti mè isi lek Josuwa, mè itumu inyi ọmọ ibe: ‘Eji enan̄a me ido ojọjọn̄ọ ere inu. Eji minọ inu ofolek Jioba mè otutuuk mkpọ irọbe inyi enyi me Ijipiti mè Mowabu. Soso ikakpan̄ eji, ke eji mere ebi usun̄ kinyi.’

Josuwa ochechieek ikọ ema etumube mè ibe ke kpebekpan̄ ema. Egwe ita iraraka me lek, Josuwa oweweek iriọọn̄ ibe ke ife cha kpenan̄a me ujọn̄ọ ere, ke ema ire ebi Kenan. Eya orọ, Josuwa ododo ebi ama Gibiọn cha ibe: ‘Keke orọ enyi ekan̄be ataak inyi eji?’ Ema efọfọọk ibe: ‘Eji etetet ukpook! Mije eji miriọọn̄ ibe ke ire Jioba Awaji kinyi okitim etim inyi enyi. Soso ikakpan̄ eji.’ Josuwa irọ use kan̄ iso, ikakpan̄ ema.

Sọnja mgbọ iraraka me lek, ebi ubọọn̄ esese esese ama go me Kenan mè ebi akọn̄ kiban̄ esasa akọn̄ inu lek ebi Gibiọn. Ire, Josuwa mè ebi akọn̄ kan̄ ekekije ikana otutuuk eririeen̄ ya ikibem ebi Gibiọn. Etim obebene me otu ewelegwe ogọgọọk. Ebi Kenan cha ebebene ikilibi inin̄ agan̄ geelek ema eriọọn̄be. Ire, agan̄ geelek ema elibibe inin̄, Jioba ikiraria ibot mgbọlọ omimiin̄ ibot igwook ema lek. Josuwa obebeek Jioba ibe irọ me ura ikeke ibia. Keke orọ itumube ibe Jioba irọ inu ya me mgbọ iriọọn̄be ibe ke ura ikawuwuuk lek ikeke ikam me isinyọn̄ ni? Bak lek Josuwa itoon̄ ejit me lek Jioba. Ura ikachep otutuuk usen ya abayaage ebi Ijeren etimbe igak ebi ubọọn̄ cha mè ebi akọn̄ kiban̄.