Josuwa isa ebi Ijeren ije me owuwa acha, ikwu me mgbọ isobe efit acha ge mè akọp. Mgbọ ikupbe me ugwem, ebi Ijeren ekitọtọbọ ebum inyi Jioba. Ire, mgbọ ikwube iraka, ebi Ijeren ebebene ikiriaak mkpọmfaka ike ebi Kenan ekirọ. Ebi Ijeren kpeyaka ikisiki ibot inyi Jioba, eya orọ, Jioba otetele ibe ogwu ubọọn̄ Kenan ge irọ ibe ugwem iyọt me lek ebi Ijeren. Ema ekekibeek Jioba ibe itap ubọk inyi ema. Eya orọ, Jioba onyinyi ema ayaya ogwu isi ge ekigwen Barak, ogwu obotap ubọk inyi ebi Ijeren egwu ekom enu me lek Jioba.

Dibọra ogwu nriran enenwaan̄ oraria ibe esi egwen Barak inyi ọmọ ilook Barak etip onan̄a me ubọk Jioba. Itumu inyi Barak ibe: ‘Sa akọp obop ebirieen̄ gbaalek kwun̄ mè je si lek ebi akọn̄ Jabin me agba mun̄ Kison. Me ere ya, owu motim igak Sisera ogwu ibot ebi akọn̄ Jabin.’ Barak otutumu inyi Dibọra ibe: ‘Ire owu mogọọk emi isi, emi masi.’ Dibọra ofọfọọk ibe: ‘Magọọk owu isi. Ire, riọọn̄ ibe ke ikare owu obokpan̄ Sisera mije, Jioba itumu ibe ke ire ogwu enenwaan̄ ge obokpan̄ ọmọ.’

Dibọra ogọgọọk Barak mè ebi akọn̄ kan̄ ije isi inyọn̄ ogoon̄ Tabọ mè ikibem lek ikpọ akọn̄. Mgbọ yaage Sisera onọbe eyi, ineneen̄ ebi akọn̄ kan̄ melek uji akọn̄ kiban̄, ema etititiin̄ me iteke ijọn̄ ogoon̄ ya. Dibọra otutumu inyi Barak ibe: ‘Cherekeyi ke Jioba obonyi owu ntim-ngak.’ Barak mè akọp obop ebirieen̄ kan̄ enanan̄a me inyọn̄ ogoon̄ ya isibi ijọn̄ isi ichichini Sisera mè ebi ekọn̄ kan̄ inyenye lek.

Jioba orọrọ ibe mun̄ okup me Kison ibaak. Ukot uji akọn̄ Sisera okekinwaan̄ ikam me emen ibat. Sisera ojujuuk uji akọn̄ kan̄ itele mè ilibi. Barak mè ebi akọn̄ kan̄ etitim igak ebi akọn̄ Sisera, ire, Sisera olilibi! Ilibi ukot ukot isi ilet me emen uwu ọfọ ogwu enenwaan̄ ge ekigwen Jayen. Ogwu enenwaan̄ ya onyinyi ọmọ mun̄ ebe anam ibe inwọ mè isa ekwut ichit ọmọ. Ilaak obeben Sisera bak lek uwọ-lek. Jayen ojeje ususuk isi lek Sisera mè isa okpọ̀kọ ekisa igọbọ uwu ọfọ mè iyaka ire omimin igon itibi agba ibot kan̄ inwaan̄ ikam me ijọn̄.

Barak onunu iniweek Sisera. Jayen osisibi me uwu ọfọ kan̄ inikwek Barak mè itumu inyi ibe: ‘Je nin̄ uwu, ke majeen̄ owu ogwu okiweek.’ Barak oninin̄ uwu mè imun̄ Sisera okwube ilaak. Barak mè Dibọra ekekitọn̄ Jioba mije irọbe ibe ebi Ijeren etim egak ebi ochicha kiban̄. Ebi Ijeren ekukup me esuuk akọp acha ini ogọgọọk.

Mgbọ akan̄ onin̄be ido Ijeren, ogwu enenwaan̄ Ijeren ge ekigwen Nomi melek ogwu olom mè nsabọn ebirieen̄ iba kiban̄ enanan̄a isi iluk me Mowabu. Ike mgbọ ojebe, nlom Nomi okwukwu. Nsabọn iba kan̄ mikaan̄ nwa si, erieen̄ ebi nwa kiban̄ ire Rufu mè Ọpa, ema ire ebi ama Mowabu. Ire, ire mkpọ nsan ibe ke bọn kè Nomi cha mikwaan̄ si ike mgbọ ojebe.

Mgbọ Nomi onọbe ibe ke akan̄ ita me Ijeren, isisibi ifieek igwugwu ikom ifo ama kan̄. Rufu mè Ọpa egọgọọk ọmọ, ire, mgbọ ema ekije me oniin̄, Nomi otutumu inyi ema ibe: ‘Enyi miluk ijaan̄ melek bọn n̄a mgbọ ema ekupbe me ugwem, enyi ire ata nwa bọn inyi emi si. Mweek ibe enyi eyaka ekaan̄ olom. Soso igwu ikom ifo Mowabu.’ Ebibaan̄ cha efọfọọk ibe: ‘Eji mima owu! Eya orọ, eji kpeweek itetele owu.’ Ire, Nomi ikpọkpọk ikup inye ikitumu ibe me ema efo. Ọpa ogwugwu ikom ifo, ire, Rufu ikachieek ifofo. Nomi otutumu inyi ibe: ‘Ọpa igwu ikom ifo igọọk ebi uwu kan̄ mè awaji kan̄. Owu si gọọk ọmọ gwu kom, mè fo gọọk ebi uwu kwun̄.’ Ire, Rufu ofọfọọk ibe: ‘Mkpabatele owu. Ebi kwun̄ mere ebi n̄a, Awaji kwun̄ more Awaji n̄a si.’ Inu Rufu otumube ikukup me lek Nomi ni?

Rufu mè Nomi ere Ijeren me mgbọ ebenebe ikirọkọ uko bali. Usen ge, Rufu ojeje ibosi ikpulu akpa erọkọbe isik me uko ogwu enerieen̄ ge ekigwen Bowaji gwun̄ kè Reyabu. Bowaji onọnọ ibe ke Rufu ire ogwu Mowabu ogbegbe utoon̄-ejit inyi Nomi. Itutumu inyi ebi ikwaan̄ kan̄ ibe ejuuk usini akpa etele me uko inyi Rufu ititiin̄.

Me ikakwun̄ usen ya, Nomi ododo Rufu ibe: ‘Uko ekene ke osi ikwaan̄ chereyi?’ Rufu ofọfọọk ibe: ‘Uko ogwu enerieen̄ ge ekigwen Bowaji.’ Nomi otutumu inyi ọmọ ibe: ‘Bowaji ire ge me lek ebi ngwan̄ nlom n̄a. Kweek nye kigọọk ebibaan̄ ikisi ikwaan̄ me uko ya kisi ikwaan̄ si, ke unan geege ikpore owu lek.’

Rufu okukup inye ikisi ikwaan̄ me uko Bowaji abayaage erọkọbe inu isan̄a. Bowaji omumun̄ ibe ke Rufu iriọọn̄ isi ikwaan̄ mè ire si ata ogwu enenwaan̄. Me ukot mgbọ ya, ire ogwu enerieen̄ ge ikwu me ikakaan̄ge gwun̄ enerieen̄, ngwan̄ ene ya mokọt ido nwa ogwu okwukwu ya me lek nwa. Eya orọ, Bowaji ododo Rufu me lek nwa. Ema ekakaan̄ gwun̄ enerieen̄ ge ekigwen Obedi, ogwu orere nte nte ogwu ubọọn̄ Debit. Ebi unene Nomi ekekibele ejit mè ikitumu ibe: ‘Jioba inyi owu Rufu, ogwu omama owu enenen, mgbọ keyi, inyi owu si gwun̄ gwun̄. Kè itọn̄ ikup inyi Jioba.’