Ebi Ijeren mikpọk ijit Jioba mè iyaka ikitọbọ ibot inyi awaji ataak. Mgbọ ebi ama Amọn esabe etim isi lek ebi Ijeren, ebi awaji ataak cha kpekọt itap ubọk inyi ema. Ebi Ijeren mibọkọ ufialek me ogbogbo acha. Me ota kan̄, ema ebebeek Jioba ibe: ‘Eji mirọ ijo inu. Soso nyan̄a eji me ubọk ebi ochicha kiji.’ Ebi Ijeren enenifiat inu ekọkọ kiban̄ cha mè iyaka ikitọbọ ebum inyi Jioba. Jioba ikaweek ibe ema ekup enye ekebọkọ ukwook.

Mgbọ egobobe Jefita ibe isa ebi Ijeren isi itim akọn̄ melek ebi Amọn, Jefita ochechieek Jioba use ibe: ‘Ire otap ubọk inyi eji etim egak, masa ene geelek odadasi inan̄a me uwu n̄a isibi inu inikwek emi inyi owu nsigwu ikom ika.’ Jioba orọrọ ibe Jefita itim igak.

Mgbọ Jefita okigwu ikom ika, adasi ene onan̄a me uwu kan̄ isibi inichichini ọmọ ire gwun̄ enenwaan̄ kan̄, orere, gaalek ibot gwun̄ ge ikaan̄be. Ogwu gwun̄ ya okekijop okwa mè ikikwak ekpete me ubọk. Keke ke Jefita oborọ ni? Ikeek use ichieekbe Awaji mè itumu ibe: ‘Jei, gwun̄ n̄a enenwaan̄, owu okpan̄ emi! Nchieek Jioba use. Eyi isibi ibe ke mbararia owu isi uwu mbuban me Silo inyi okweek me ere ya okosi ikwaan̄ onyi Jioba.’ Ire, gwun̄ Jefita otutumu inyi ọmọ ibe: ‘Nte n̄a, ire ochieek Jioba use, rọ use ya so. Ire, nye lek tele ibe nsa ebibaan̄ ebi unene n̄a nsi inyọn̄ ogoon̄ mè ngọọk ema nkweek onyan̄ iba gaalek. Nsika, mafo isi iluk me Silo.’ Gwun̄ kè Jefita isa otutuuk ugwem kan̄ isi ikwaan̄ me uwu mbuban Jioba. Acha geelek, ebi unene kan̄ mira ikisi ikpọ ọmọ me Silo.

Ogwu ibot ngwugwa Ilai ikaan̄ ibot nsabọn iba ikisi ikwaan̄ me uwu mbuban kubọk ebi ngwugwa. Ema ire Ofini mè Fineyas. Ema kpesiki ibot inyi Jioba, mirọ ebi ene ijo inu si. Ebi Ijeren esibenigwa ngwugwa inyi Jioba, Ofini mè Fineyas mira imọnọ anam eyi onwọnwọn ichit ito inyi lek kiban̄. Ilai inọ mkpọ nsabọn kan̄ ekirọ, ire, ikarọ inu geege ofolek. Ire Jioba motele ibe inu yi ikirọ ifo isi ni?

Ikerere ibe ke Samien ire sọntiik gwun̄ me lek Ofini mè Fineyas, ikagọọk ema irọ inu ema ekirọ. Jioba ibele ejit enenen me lek Samien. Me eririeen̄ ge mgbọ Samien okilaak, inọnọ ida ge okigwen ọmọ. Inanan̄a ikeke, mè ilibi isi lek Ilai mè itumu inyi ọmọ ibe: ‘Emi ire ogwu!’ Ire, Ilai ofọfọọk ọmọ ibe: ‘Nkagwen owu. Gwu kom si laak.’ Samien ogwugwu ikom isi ilaak, mè iyaka inọ ida ya si. Mgbọ Samien onọbe ida ya òso mgbọ ita, Ilai orọriọọn̄ ibe ke ire Jioba okigwen Samien. Itutumu inyi Samien ibe ire ida ya ikpọk igwen ọmọ, ifọọk ibe: ‘Jioba, tumu, ke ogwu usun̄ kwun̄ okigban̄.’

Samien ogwugwu ikom isi ilaak. Ida ya okpọkpọk igwen ọmọ ‘Samien! Samien!’ Ifọfọọk ibe: ‘Tumu, ke ogwu usun̄ kwun̄ okigban̄.’ Jioba otutumu inyi Samien ibe: ‘Tumu nyi Ilai ibe ke masut ọmọ mè ebi ototun̄ ukan̄ kan̄ osusut. Iriọọn̄ ibe ke nsabọn̄ kan̄ mekirọ inu osasak me uwu mbuban n̄a, ire, ikarọ inu geege ofolek.’ Me ewelegwe, Samien ochichili isotu uwu mbuban ike ikiwuuk lek irọ. Ire, itet ukpook itutumu inyi Ilai inu Jioba obe me itumu inyi. Eya orọ, Ilai ogwegwen Samien mè ido ọmọ ibe: ‘Gwun̄ n̄a, keke ke Jioba otumu inyi owu? Kpa nyi emi.’ Samien otutumu inyi Ilai otutuuk inu Jioba otumube.

Ike Samien okimin isibi, Jioba ikukup melek kan̄. Otutuuk ebi Ijeren ikup me otutuuk lek ijọn̄ ebi Ijeren miriọọn̄ ibe ke Jioba igobo Samien ibe ire ogwu nriran mè ogwu oyerebet si.