Mgbọ Solomọn okanabe ogwu ubọọn̄ ebi Ijeren, Jioba ododo ọmọ ibe: ‘Ire keke ke oweek ibe nrọ nnyi owu?’ Solomọn ofọfọọk ibe: ‘Emi ire sọntiik gwun̄, nkariọọn̄ inu mbarọ. Soso nyi emi iriọọn̄-inu mbasa ikpọ chieen̄ me lek ebi eyi kwun̄.’ Jioba otutumu inyi ọmọ ibe: ‘Bak lek odobe emi iriọọn̄-inu, marọ ibe ore ogwu orọriọọn̄ inu ichit me isijọn̄ yi, mè irọ si ibe obọọn̄ ubọọn̄ enenen. Ire ogban̄ utọn̄ me lek n̄a, owu moluk ujọn̄ọ ugwem.’

Solomọn obebene ikinama uwu mbuban. Isa alata araran̄, alata okuket, uti mè ewuuk echi onwọnwọn ichit inama uwu ya. Owuwa ebirieen̄ mè ebibaan̄ ikakaan̄ usọ-ubọk esi ikwaan̄ me lek uwu ya. Mgbọ acha jaaba orakabe, esisi ikwaan̄ me lek uwu ya isan̄a mè isa uwu ya inyi Jioba. Minama ntook ngwugwa mè ito inu ebesa igwa ngwugwa me inyọn̄. Solomọn otọtọbọ ekpe me isi ntook ya mè ibeek uriaak ibe: ‘Jei Jioba, uwu mbuban yi ikamin enenen mè ijaan̄ uja igbe inu ebesa inyi owu, ire, soso bọkọ ntọbọ-ebum eji ebekinyi owu me emen uwu yi tap mè kigban̄ uriaak kiji.’ Keke ke Jioba okeek ofolek uwu mbuban ya melek uriaak Solomọn ni? Mgbọ yaage Solomọn obeekbe uriaak isan̄a, ukan̄ onanan̄a me isinyọn̄ initaka ngwugwa okup me inyọn̄ ntook ngwugwa ya. Eyi ijeen̄ ibe ke Jioba ibọkọ uwu mbuban ya itap. Mgbọ ebi Ijeren emun̄be inu yi, ema ebebele ejit enenen.

Otutuuk ebi Ijeren mè ebi iluk me ujọn̄ọ ere miriọọn̄ ogwu ubọọn̄ Solomọn kubọk ogwu orọriọọn̄ inu. Ebi ene misa ufialek kiban̄ inu me lek Solomọn ibe itap ubọk inyi ema. Ogwu ubọọn̄ enenwaan̄ Sieba si isa idodo oyọyọt inu initọ Solomọn ikpọ. Mgbọ Solomọn ofọọkbe ọmọ isan̄a, itutumu ibe: ‘Nkachieek inu ebi ene etumube ofolek kwun̄ mege ire mgbọ nnube mè inisa chieen̄ n̄a gaalek imun̄ ibe ke owu okaan̄ iriọọn̄-inu igak ubọk ema etumube. Awaji kwun̄ Jioba igbana owu enenen.’ Me oke mgbọ ya, ebi Ijeren minwọọn̄ ugwem enenen, ema si mikaan̄ ubelejit. Ire, inu monwene sọnja mgbọ.

Ebi Ijeren mikaan̄ esuuk me okike mgbọ Solomọn okitọbọ ibot inyi Jioba. Solomọn ido owuwa ebibaan̄ inan̄a me ofifi ido me lek nwa, ebibaan̄ chi ekitọtọbọ ibot inyi mkpọ ekọkọ. Sọnja sọnja, Solomọn onwenwene mè ibene ikigọọk iriaak mkpọ ekọkọ. Jioba onanaan̄ ejit enenen mè itumu inyi Solomọn ibe: ‘Magwak mkpulu ido isan̄a me ubọk ebi ototun̄ ukan̄ kwun̄, mè isa ikana inyi ene ge me lek ebi ikwaan̄ kwun̄. Ire, matele otoko ge inyi ebi ototun̄ ukan̄ kwun̄.’

Jioba irọ ibe inu yi itumube ikpọk mbum me ofifi oniin̄ si. Ogwu usun̄ Solomọn ge ekigwen Jerobuwam ikije me oniin̄ mè ichichini ogwu nriran Ayija. Ayija otataba ofọnti kan̄ igwak isibi akọp mè okpọkọ iba, mè itumu inyi Jerobuwam ibe: ‘Jioba mogwak mkpulu ido isan̄a me ototun̄ ukan̄ Solomọn mè iche isibi irek iba. Bọkọ akọp okpọkọ ofọnti chi, mije, owu obokikpulu akọp otoko.’ Ogwu ubọọn̄ Solomọn iweek ubọk ibosa ikpan̄ Jerobuwam mgbọ inọbe inu yi! Eya orọ, Jerobuwam olilibi ifo Ijipiti. Ike mgbọ ojebe, Solomọn okwukwu, ogwu gwun̄ Reyobuwam okakana ogwu ubọọn̄. Jerobuwam omumun̄ ibe ke ọmọ mokọt igwu ikom ika inu me Ijeren me mgbọ keyi.

Ebi ugane me Ijeren eteme Reyobuwam ibe: ‘Ire okirọ inu ijaan̄ me lek ebi ene, megbe utoon̄-ejit inyi owu.’ Ire, nsabọn irieen̄ ogbo kan̄ etutumu inyi ọmọ ibe: ‘Kirọ inu unye unye me lek ebi ene! Rọ ibe ema ekesi unye ikwaan̄ egbaalek!’ Reyobuwam ogbagban̄ nteme ebi unene kan̄ enyibe ọmọ mè ibene ikirọ inu ikpak ikpak me lek ebi ikikpulu. Ebi ene ebebene ikinye ibot inyi ọmọ. Ema erọrọ Jerobuwam ubọọn̄ okikpulu akọp otoko, eyi eniriọọn̄ kubọk ama ubọọn̄ Ijeren. Otoko iba kechilọ ke egwen ama ubọọn̄ Juda, ebi otoko iba chi mibieen̄ Reyobuwam inye kubọk ogwu ubọọn̄ kiban̄. Ikeya ke akọp mè otoko iba ebi Ijeren osa itọbọ ibum.

Jerobuwam ikaweek ibe ebi ikebikpulu ekesi etọbọ ebum me Jeruselem, orere, ama eyi Reyobuwam okikpulu. Ire oriọọn̄ mkpọ orọrọ ni? Jerobuwam ikifieek owot ibe ke ife cha metele ọmọ mè igọọk Reyobuwam. Eya orọ, isasa alata araran̄ itọkọ eriembuuk iba mè itumu inyi ebi ikikpulu ibe: ‘Mokisisaak enyi enenen ikekinan̄a me ere keyi ikije isi Jeruselem isi ikitọbọ ebum inyi Awaji. Enyi mekọt ikitọbọ ebum me ere keyi.’ Ebi ene ekekitọbọ ebum inyi mkpọ ekọkọ mè ikpọk iwuuk Jioba si.