Ikpa Okikpa Nkween̄mkpọ Ugwem Mè Ikwaan̄ Kiji Kubọk Ebi Eyi Karais
© 2025 Watch Tower Bible and Tract Society of Pennsylvania
OKPA ONYAN̄ 5-11
INU UNYE OTU EWE OKUP ME USEM AWAJI ASAYA 17-20
“Mkpukpe Ebi Ìkifum Inu Kiji”
w18.06 7 ¶16-mwbr
‘Ama Ubọọn̄ N̄a Ikare Eyi Linyọn̄ Keyi’
16 Unwene chi ichubọk ikup ufiak! Baibul isa inyọn̄ ebilene isa itọt me lek okwaan̄ ogbururu onin̄be, eyi ikakikọt ilọkọ, okwaan̄ eyi ikakikup me esuuk. (Asaya 17:12; 57:20, 21; Ichi 13:1) Me mgbọ inu ofolek rumurumu mkpulu okirọ ibe ebi ene ekenaan̄ ejit, ekeche lek mè ekerọ esese esese chieen̄ inu afa, eji ekikukup me esuuk mè obop ge. Ike Jioba okikpọ inyọn̄ keyi eyi nche-lek okpiwa, mobele ọmọ ejit enenen ikekimun̄ obọp ge eyi okukup me etete ebi usun̄ kan̄.—Fuk Jefanaya 3:17.
w16.04 28 ¶4-mwbr
Kamọnọ Agan̄ Me Inyọn̄ Nche-Lek Owabe
4 Me agan̄ eji ekiluk, usini mgbọ ere mokọt ikup dii, ebi mkpulu si kpekisisaak eji ike eji ekitọbọ ebum inyi Jioba. Ire, ike inyọn̄ kè Setan okinu me ota, eji miriọọn̄ ibe ke inu ofolek imọmọnọ agan̄ ibokikukup unye unye. Inyọn̄ yi ijot me lek ebi ene ebi “kpebekitele ijo inyi ene” mè “ebi mêkọtbe irọ chieen̄ ijo inu geelek,” eya orọ, nche-lek ibokiwawa igbaalek. (2 Tim 3:3, 4) Me usini ido, bọn ute kiji michichini rumurumu ema kpekekeek, ofolek imọmọnọ agan̄, mije unwene ọbọkọbe irek me ekakpọge chieen̄ me irek mkpulu. Ire omun̄ inu orọrọ ikupbe ufiak ibe eji erọ inyi ntumu-mfieek kiji ibe eji kpebemọnọ agan̄ inye me mgbọ keyi ni? Ire eji ekup ikikpọ mege eji echichinibe irek eyi oboweek ibe eji emọnọ agan̄, usini mgbọ eji mekọt inan̄a irọn mè imọnọ agan̄. Ike owa ke eji ebesa ineen̄ lek inyi eji ekamọnọ agan̄ me inyọn̄ yi eyi nche-lek owabe ni? Eji ekpọ nu mkpọ ini obotap ubọk inyi eji ekọt erọ ejaan̄.
ip-1 198 ¶20-mwbr
Inu Jioba Otumube Ikeme Ebi Ido
20 Keke obonan̄a isibi me lek ni? Asaya itumu ibe: “Me ikakwun̄, uga ukpook mônunu inyi ema; ire, sabum ewelegwe, îta! Eyiyi obore mkpukpe ebi ìkifum inu kiji, mè inu ògbegbe ebi ìkichiin̄ inu kij.” (Asaya 17:14) Owuwa ene mekifum inu ebi eyi Jioba, ikirọ ema inu afa afa me lek, kpekijeen̄ ema ulibi si. Mije, ema kpere, kpeweweek si irere okpọkọ ge me lek uwu uriaak ilile echi ebi inyọn̄ keyi ekima. Ebi kpema eji mè ebi ikirọ inu afa mije uwu uriaak, ekimun ata ebi eyi Karais kubọk unọn nfan̄a-ubọk. Ire, ebi eyi Awaji mikaan̄ utoon̄-ejit ibe ke “ewelegwe” eyi ufialek kiban obota okinu ugwat ugwat.—Ebi Teselonaika Òso Iba 1:6-9; Pita Eyi Adasi 5:6-11.
Week Inu Unye Otu Ewe Okup Me Usem Awaji
w06 12/1 11 ¶1-mwbr
Inu Ekpabe Ofolek Ikpa Asaya—I
20:2-5—Ire Asaya ichubọk isa njak ije ikana acha ita ni? Usini mgbọ mokọt ire ibe ke Asaya isasan̄a ofọnti inyọn̄ kan̄ isan̄a me ikije ikana me “ikatap ata mkpọ geege.”—Samien Eyi Adasi 19:24 NWT, footnote.
OKPA ONYAN̄ 12-18
INU UNYE OTU EWE OKUP ME USEM AWAJI ASAYA 21-23
Inu Eji Ebekọt Ikween̄ Inan̄a Me Lek Mkpọ Orọrọ Sebina
w18.03 25 ¶7-9-mwbr
Nkan̄-Inu Ikijeen̄ Ima Awaji
7 Isasa imun̄ ubọk nkan̄-inu osa ikupbe ufiak ire, eji ekpọ nu ene iba ebi Jioba okan̄be inu inyi. Ene ge me lek kiban̄ ire Sebina ogwu oluk me usen kè Ogwu Ubọọn̄ Ejikaya, mè Graham, gwun̄ ute ge me ukot mgbọ keyi. Kubọk “ogwu ibot ikwaan̄ me uwu ogwu ubọọn̄”—mokọt ire uwu kè Ejikaya, Sebina ikaan̄ ikpele unye ntọ-ikọ. (Asaya 22:15) Ire, ire mkpọ nsan ibe ke Sebina ibene ikigumu lek, mè ikiweek umin inyi lek kan̄. Irọkọ udọn̄-ufuun̄ me lek ewuuk inyi lek kan̄, mè iro “ujuja uji akọn̄” inyi lek kan̄!—Asaya 22:16-18.
8 Mije Sebina okiweek umin inyi lek kan̄, Awaji isan̄a ọmọ me irek ikwaan̄, mè isa Eliakim itọ me irek kan̄. (Asaya 22:19-21) Unwene yi ibọkọ irek me mgbọ Senakerip Ogwu Ubọọn̄ Asiria obonitim akọn̄ me lek Jeruselem. Ike mgbọ ojebe, Ogwu Ubọọn̄ Senakerip iria usini ebi ibot ikwaan̄ kan̄ mè owuwa ebi akọn̄ inu me Jeruselem isasa irọ ibe lek ebi Ju iwọ, mè Ejikaya isa mije ukpook ichieek inyi ọmọ. (2 Ubọọn̄ 18:17-25) Miria Eliakim ibe isikpa usem melek ebi Ogwu Ubọọn̄ Asiria oriabe inu cha, ire, ikaje ọmọ gaalek. Ire ene iba egọọk ọmo ije, ene ge me lek kiban̄ ire Sebina ogwu okisi ikwaan̄ mgbọ keyi kubọk ogwu uti ikpa. Ire eyi ikajeen̄ ibe ke Sebina ikakpọkpọ ikinaan̄ ejit, ke isa me nsikilek ibọkọ ofifi ikwaan̄ enyibe ọmọ, ikerere ibe ikamin̄ kubọk eyi adasi ni? Ire ikeya, keke ke eji ebekọt ikween̄ inan̄a me lek mfufuk kan̄? Eji ekpọ nu mkpọ ita.
9 Adasi, Sebina ichep irek kan̄. Inu orọrọ ọmọ ijeen̄ atikọ okup me lek usem yi: “Ugumulek ìkijijaka ene; ubenelek ìkida ene ito.” (Urọk 16:18) Ire okaan̄ irek ge me ntitiin̄, usini mgbọ irek eyi okirọ ibe ebi ene ekenyi owu ulibi, ire omokisa ikekisa me nsikilek ikimun̄ lek kwun̄ me oniin̄ okukup okem okem ni? Ire omokinyi Jioba itọn̄ me lek iriọọn̄-inu geelek okaan̄be mè iyaka ire inu geelek okọtbe irọ ni? (1 Kọr. 4:7) Ogwu ikwaan̄ Pọọlu ige ibe: “Ǹkitumu inyi enyi ibe, ene geege ikamọnọ lek kan̄ ubene ubene ìsaba ìraka ubọk îgbebe.”—Rom. 12:3.
w18.03 25 ¶10-mwbr
Nkan̄-Inu Ikijeen̄ Ima Awaji
10 Òso iba, sa me inyinyi Sebina nkan̄-inu onyenye, mokọt ire ibe ke Jioba ikijeen̄ ibe ke ọmọ ikamun̄ Sebina kubọk ogwu ikpobokọt inwene. (Urọk 3:11, 12) Eyi ichubọk ire ata inu nkween̄ isa inyi ebi ichechep irek ge me ntitiin̄ Jioba me chereyi! Kpan̄asi ikpọkpọ ikup inye ikinaan̄ ejit, kè ema ekup enye ekesa otutuuk efuuk kiban̄ ekesa erọ eyi ema ebekọt me ikwaan̄ Jioba igọọk me lek aya irek ema emun̄be lek kiban̄, mè ekemun̄ nkan̄-inu kubọk mkpọ okijeen̄ ima Jioba. Riọọn̄ ibe ke Nte kiji ikpọbomun̄ eji kubọk ebi kpekaan̄ ikpọchieen̄, me ire eji misiki lek me isi kan̄. (Fuk Pita Eyi Adasi 5:6, 7.) Nkan̄-inu enyibe me ima, mokọt ire oniin̄ ge Jioba okisa itap ubọk inyi eji erọ ejaan̄, eya orọ, ke eji etele ibe Jioba ikineen̄ eji isun̄.
w18.03 26 ¶11-mwbr
Nkan̄-Inu Ikijeen̄ Ima Awaji
11 Òso ita, ubọk Jioba osabe irọ me lek Sebina ire atalek inu nkween̄ isa inyi ebi enyibe unye ibe ekenyi ebi ofifi ene nkan̄-inu, kubọk ute mè uga mè ebi ugane ntitiin̄. Keke ke eji ebekot ikween̄? Ikerere ibe ke nkan̄-inu Jioba ikijeen̄ ubọk isabe icha ijo inu, ikijeen̄ si ulọk ikaan̄be me lek ogwu orọrọ ijo inu ya. Ire obonyi ene nkan̄-inu kubọk ute, uga mè iyaka ire ogwu ugane ntitiin̄, ire omogọọk akpat ukot Jioba sa me ichacha ijo inu ya, ire, ikikpọ ata inu okup me emen gwun̄ kwun̄ mè iyaka ire, gwun̄ Nte kwun̄ ni?—Judu 22, 23.
Week Inu Unye Otu Ewe Okup Me Usem Awaji
w06 12/1 11 ¶2-mwbr
Inu Ekpabe Ofolek Ikpa Asaya—I
21:1—Agan̄ owa ke ekigwen “èwê agba lek okwaan̄”? Ikerere ibe ke Babilọn ikakup iriaak lek okwaan̄ ya, ire migwen ọmọ ikeya. Eyi ire mije mun ibot ile okinan̄a me Okwaan Yuferetis mè Tigiris okiba ijot lek ijọn̄ ya acha geelek morọ ibe mun̄ irene ikana ere.
OKPA ONYAN̄ 19-25
INU UNYE OTU EWE OKUP ME USEM AWAJI ASAYA 24-27
“Awaji Kiji Ire Eyi!”
cl 15 ¶21-mwbr
“Me Atikọ Awaji Kiji Ire Eyi!”
21 Ire owuulek imun̄ sọntiik gwun̄ okiyana ubọk me lek nte kan̄ mè ikisa me unwọọn̄ mè gogolek ikitumu inyi ebi unene kan̄ ibe, “Ikpọ nte n̄a ire ya”? Ebi usun̄ Awaji mikaan̄ mkpọ echi oborọ ibe ema ekenwọọn̄ unwọọn̄ mije Jioba mè ekesa ọmọ egugo lek. Baibul itumu mkpọ ofolek mgbọ ebi ikigbe utoon̄-ejit inyi Awaji ebekitumu ibe: “Me atikọ Awaji kiji ire eyi!” (Asaya 25:8, 9) Ike okiriọọn̄ mkpọ ofolek ata eru echi Jioba okaan̄be igbaalek, ikeya ke obokimun̄ ibe ke okaan̄ ata Ute onwọnwọn̄ ichit.
w24.12 6 ¶14-mwbr
Isasan̄a Inorie Isibi Me Oniin̄ Okup Uyeke Uyeke
14 Me mgbọ itumube ibe, “nyi eji inorie chereyi, kubọk okinyi eji me usen me usen,” Jisọs itumu mkpọ ofolek mgbọ nkeek Awaji oborọ me inyọn̄ ijọn̄ yi ike ikirọ me emen inyọn̄. (Mat 6:9-11) Ike owa ke okeek ibe inyọn̄ ijọn̄ yi obokup me mgbọ ya? Baibul ijeen̄ ibe ke ge me lek nkeek Awaji ofolek inyọn̄ ijọn̄ yi ire mito ata inorie. Igọọk me lek mkpọ okup me ikpa Asaya 25:6-8, owuwa ata inorie ebi ene ebekinwọọn̄ mokup me irak mkpulu Ama Ubọọn̄ Awaji. Ikpa Okwa Itọn̄ 72:16 ibe: “Kè akpa iwa ijot ama gboi, mè inu ewopbe itibi ichit inyọn̄ ogoon̄ gbak.” Ire ikilọk owu itetem mè irie mbet lek inorie okima ichit ni? Mè iyaka ire, irie aya chieen̄ inorie me Paradais ni? Isọkọ me lek si, omorie mfut uti inan̄a me lek uko owu gaalek osabe ubọk kwun̄ iwop. (Asaya 65:21, 22) Ire inu yaage si ke otutuuk ebi ikiluk me inyọn̄ ijọn̄ yi me mgbọ ya ebenwọọn̄.
w25.01 28-29 ¶11-12-mwbr
Ubọk Eji Ekisa Ikaan̄ Oruru Inan̄a Me Lek Ima Jioba
11 Keek nu ubọk ugwem kwun̄ obokup me mgbọ inyọn̄ ijọn̄ yi obokana Paradais. Okpoboyaka ikisisaak lek ofolek orukan̄ mè iyaka ire mkpa. (Asaya 25:8; 33:24) Jioba mochili ubọk kan̄ iche inyi eji otutuuk ata inu geelek okilọk eji. Keke ke oboma ikwekween̄ mè iyaka ire irọ? Ire omoma ikwekween̄ mkpọ ofolek anam? Mkpọ echi ekisa ifit okwa? Mè iyaka ire, igwọgwọọk mkpọ ni? Me mgbọ ya eji meweek ebi ikigwọọk uwu, ebi ibe nama uwu mè ebi ibe ikiwop uko. Meweek si ebi ibekitem inorie, irom mkpọ ebekisa isi ikwaan̄ me uko mè ikisa ineen̄ inyọn̄ ijọn̄ yi isun̄. (Asaya 35:1; 65:21) Mije ibe ke omoluk isi ire mgbọ geelek, omokaan̄ mgbọ isa ikween̄ inu geelek oweekbe ikwekween̄.
12 Keek nu mbet lek unwọọn̄ eji ebekaan̄ ibọbọkọ itap ebi ejomobe me mkpa! (Ikwaan̄ 24:15) Keek si ubọk obosa inwọọn̄ ikwekween̄ owuwa mkpọ ofolek Jioba sa me ikekikween̄ owuwa inu irombe. (Itọn̄ 104:24; Asaya 11:9) Eyi onwọnwọn̄ ichit ire, keek nu ubọk ibosa itop ire ikekitọbọ ebum inyi Jioba me eji kpeyaka ikirọ ijo inu geege! Ire omoma ichechep otutuuk ugbana chi okinu me isi mije “irerie utop eyi ijo inu me sọntiik mgbidim mgbọ”? (Iburu 11:25) Eya ikpojeen̄ iriọọn̄-inu! Ugbana chi inwọn̄ igak inu geelek inyọn̄ yi obokọt inyi eji me mgbọ keyi. Riọọn̄ ibe ke me sọnja mgbọ eji kpeyaka ikikup ikpọ ibe Paradais inu mije, eji ebekiluk me Paradais. Otutuuk inu chi kpomofet mebe Jioba ikama eji mitele ibe Gwun̄ kan̄ inikwu mije kiji!
Week Inu Unye Otu Ewe Okup Me Usem Awaji
w24 12 24-25 ¶18-mwbr
Jioba Okimun̄ Lek Mun̄ Ito Kwun̄, mè Ikikpọ Owu Chieen̄ Me Lek
18 Usem Jioba ikat Ejikaya ejit. Eji mekọt ikaan̄ ukarajit inan̄a me emen Usem Awaji. Jioba isun̄ usem echi obokọt isuuk eji ejit me mgbọ eji ekichichini irek okifieek eji ejit. (Rom 15:4) Me mgbọ etumube inyi gwun̄ ute enenwaan̄ ge me West Africa ibe ke ikaan̄ orukan̄ cancer, eyi irọ ibe ikito ito mgbọ geelek. Itumu ibe: “Ere ge me Baibul ochubọk ikikat emi ejit ire ikpa Asaya 26:3. Ikerere ibe ke owuwa mgbọ eji kpebekọt isan̄a ufialek kiji isan̄a, ere Baibul ya irọ ibe ejit n̄a inye ibe ke Jioba monyi eji mbet lek esuuk ejit obokọt itap ubọk inyi eji ekọt ekup dii mè ekeme ufialek ya.” Ire ikaan̄ ere Baibul okisuuk owu ejit me mgbọ okije itibi irek oyoyot enenen mè ikup kubọk kpunu ikpọchieen̄ geege ge ni?
OKPA ONYAN̄ 26–ONYAN̄ IBA 1
INU UNYE OTU EWE OKUP ME USEM AWAJI ASAYA 28-29
Kisa Ukpọk-Otu mè Ejit Kwun̄ Kisa Min Jioba
ip-1 299 ¶23-mwbr
Asaya Itumu Mkpọ Ofolek “Uyeke Inu” Jioba Oborọ
23 Ebi ibot uwu uriaak me Juda ekitumu ibe ke ema mikaan̄ iriọọn̄-inu Awaji, ire, ema mitele Jioba. Ema ekijeen̄ lọlọ nkeek kiban̄ ofolek mkpọ otatat mè eyi olọlọ mè ikibieen̄ inye inu ikpak ema ekirọ mè ugwem barabat ema ekiluk echi okirọ ibe ebi ene ekayaka ikaan̄ nwọn-isi Awaji. Inan̄a me lek “uyeke inu” iborọ, Jioba mogwen ema inu me oyerebet mije ugwem isi iba kiban̄. Jioba ibe: “Ife chi ekije igbet emi lek me otu otu, mè ikimin emi me ukpọk-otu ikike, ire, ejit kiban̄ îjọn̄ọ ere me lek n̄a. Ebum ema ekitọbọ inyi emi ìre ikan ebilene ejeen̄be, eyi ema ekween̄be itap me ibot. Mije keyi, emi mâkpọk irọ ibe ife chi eriki enyinya, uyeke inu ge môkigọọk ge me udun̄; iriọọn̄-inu mônan ebi ìriọọn̄ inu kiban̄, ngobo-ntet ebi kiban̄ ìkakaan̄ ngobo-ntet môlibi ichep.” (Asaya 29:13, 14) Iriọọn̄-inu mè ngobo-ntet ebi Juda ekikeek ibe ke ema mikaan̄ mochep me mgbọ Jioba obosa ebi Babilọn ebi ikikpulu inyọn̄ me mgbọ ya inifiat ema. Ire inu yaage oro me adasi ukọt me mgbọ ebi ibot uwu uriaak ebi Ju ikikeek ibe ke ema miriọọn̄ inu erọ ibe ebi ido ya eje elọ oniin̄. Ire mbet inu yaage si oborọ me usen kiji me lek uwu uriaak ebi ikibe ke ema ire ebi eyi Karais.—Matiyu 15:8, 9; Ebi Rom 11:8.
w21.05 9 ¶7-mwbr
Kpunu Inu Geege Oboro Ibe Ebi Ata Irọrọ Enan̄a Erọn̄
7 Jisọs isa me unye-ejit itumu ikeme ugwem isi iba ebi ibot uwu uriaak me mgbọ kan̄ ekiluk. Kubọk inu njeen̄, ikpọk mbum ugwem isi iba ebi Farisi ebi ikaan̄ ulọk me lek ubọk ema ebesa igwọk ubọk kiban̄ igak ubọk ema ebekisa ikpọchieen̄ me lek nga kiban̄ mè nte kiban̄. (Mat 15:1-11) Usem Jisọs ike ebi udun̄ kan̄ chieen̄, ema edo ọmọ ibe: “Ìre oriọọn̄ ibe ke ebi Farisi mînaan̄ ejit me lek ikọ ya owu otumube?” Jisọs ofọfọọk ema ibe: “Uti geelek eyi Nte n̄a ogwu òkup me emen inyọn̄ ikasage ubọk kan̄ ìwop, mêgbaan̄ uti cha mè ugwun̄-ijọn̄ ijim isan̄a. Ìjuuk ema ìtele, mije, ema ìre ebi ǹnàan̄ ìkisa ebi ǹnàan̄ ijeen̄ oniin̄. Ire ogwu ǹnàan̄ ikisa ogwu ǹnàan̄ ijeen̄ oniin̄, ema ene iba mêgbaan̄ irọn̄ inin̄ emen udọn̄.” (Mat 15:12-14) Jisọs ikatele ibe unaan̄-ejit ebi ibot uwu uriaak me mgbọ kan̄ irọ ibe ọmọ ikatumu atikọ.
w24.06 10 ¶8-mwbr
Kweek Nye Kire Ogwu Ichen̄ Jioba Sire Mgbọ Geelek!
8 Ebi ikitumu atikọ inan̄a me ijọn̄ ijọn̄ ejit kiban̄ kpekifiaan̄ irọ kubọk ema ekisiki ibot inyi ikan̄ Awaji me isi ebi ene, mè ekesi erọ inu ikan̄ ya obe ekarọ me nlelet. (Asaya 29:13) Ema ekijijit ikekirọ mkpọ me lek ifiọọk. Ogwu ifiọọk mokọt ibene ikikaan̄ ejit iba ofolek usini me lek ikan̄ Jioba onyibe. (Jemis 1:5-8) Mokọt ikpaka ibot inyi usini ikan̄ Jioba echi imọnọbe ibe ke ikakup ufiak. Me ire ikamun̄ unan geege onan̄a isibi me lek mkpaka ibot kan̄, eyi morọ ibe ejit inye ikekikpaka ibot me lek ikan Jioba ifo isi. Sa me ikeyi, ntọbọ-ebum kan̄ iboyaka ikana mkpọ isi iba. (Etip 8:11) Ire, eji ekiweek ikekisa atikọ irọ mkpọ me inu geelek eji ekirọ.
Week Inu Unye Otu Ewe Okup Me Usem Awaji
it “Arien” ¶1; it “Arien” Eyi 3-mwbr
Arien
(Arʹi·en) [Ntook Awaji; mè iyaka ire, Egbe Atat Awaji].
3. Erieen̄ egwenbe Jeruselem me ikpa Asaya 29:1, 2, 7. Jeruselem ore ere uwu mbuban Awaji okupbe, ire me emen uwu mbuban ya si ke ntook ngwugwa Awaji okup. Mije keya, ama ya ikup kubọk ntook ngwugwa isa inyi Awaji. Ire ama yi more okpan okpan ere ebekinyi Jioba ata ntọbọ-ebum. Ire, etip okup me ikpa Asaya 29:1-4 ire ijo etip, ikitumu mkpọ ofolek mfiat oborọn itet Jeruselem inan̄a me ubọk ebi Babilọn me acha 607 B.C.E., me mgbọ ama ya obokana ntook ngwugwa me ofifi oniin̄. Orere ama eje obokigbuk, ama ukan̄ obotaka iriọk mè ama nkwukwu ebi ekpan̄be mije mfiat ya obojot. Mikpa inu orọrọ mfiat yi orọnbe itet ama yi me agba eyi 9 isi ire 16. Ire, ikpa Asaya 29:7, 8, ijeen̄ ibe ke ebi ido cha ifafiat Jeruselem kpekọt irọ inu ema ebenbe me ejit itet.
ONYAN̄ IBA 2-8
INU UNYE OTU EWE OKUP ME USEM AWAJI ASAYA 30-32
Toon Ejit Ibe Ke Jioba Mobem Owu
w01 11/15 16 ¶7-mwbr
Jioba Ore Ere Nlet-Lek Kiji
7 Mije Jioba ore ere nlet-lek kiji, eji mekọt ikaan̄ ukarajit inan̄a me usem yi: “Awaji môsa akukọ uwop kan̄ iwele ichit owu lek; owu môlelet lek kwun̄ me irak uwop kan̄; atikọ Awaji obokwek owu lek kubọk agbọ mè mgban akọn̄.” (Okwa Itọn̄ 91:4) Awaji ikibem eji kubọk ike nga ofut okiwulu ikana ikibem nsabọn̄ kan̄. (Asaya 31:5) ‘Môsa akukọ uwop kan̄ iwele ichit eji lek.’ Ire akukọ kan̄ ke ofut okisa iwele ichit ebi bọn, me ikibeme ema isan̄a me lek mkpọ unan. Kubọk bọn ofut, eji mikaan̄ mbem me irak uwop kè Jioba mije eji enilet lek kiji me emen ata ntitiin̄ ebi eyi Karais.—Rufu 2:12; Okwa Itọn̄ 5:1, 11.
w24.01 24 ¶13-mwbr
Jioba Motap Ubọk Inyi Owu Me Mgbọ Ufialek
13 Inu eji eberọ. Tim keme nkeek idada lek ibọkọ me lek ebi ofifi ene. Mgbọ geelek eji esikida lek ibọkọ me lek ebi ofifi ene, eji kpebekikeek mkpọ ijaan̄, ibokire akpalek kiji mè ufialek kiji gaalek ke eji ebekikeek mkpọ ofolek. Ikekikeek mkpọ ikeyi si mokọt ikaan̄ mgbaan̄ me lek ntumu-nfieek eji eberọ. (Urọk 18:1) Atikọ ibe ke me usini mgbọ ke eji meweek mgbọ isasa ikup eji gaalek, ogak ge me mgbọ ijo mkpọ ge orọbe eji. Ire, me ire eji ikida lek ibọkọ me lek ebi ofifi ene, mokọt irọ ibe eji ekakaan̄ ntap-ubọk eyi Jioba obokọt isa ema inyi eji. Eya orọ, ubọk geelek isabe iyọt ire, sa ikekibọkọ itap ntap-ubọk okinan̄a me ubọk ebi ototun̄ ukan̄ kwun̄, ebi unene kwun̄ mè ebi ugane ntitiin̄. Kimun̄ ema kubọk inu Jioba okisa itap ubọk inyi owu, mije, inu ema echubọk ire ire ya.—Urọk 17:17; Asaya 32:1, 2.
w23.10 17 ¶19-mwbr
Ike Owa Ke Jioba Okisa Irọ Ibe Eji Ekeke Enye?
19 Ike owa ke obosa irọ ibe ikpọchieen̄ kwun̄ inye? Kubọk inu njeen̄ me ire ikpọchieen̄ kwun̄ ire iluluk ugwem me inyọn̄ ijọn̄ yi isi ire mgbọ geelek, fuk inu Baibul otumube ofolek ubọk ugwem obokup me Paradais mè kigwu nkeek kom me lek. (Asaya 25:8; 32:16-18) Kigwu nkeek kom me lek ubọk ugwem obokup me aya inyọn̄. Kimun̄ lek kwun̄ kubọk owu ọmọ owa me ere ya. Ire ekene ke omun̄? Keke ke okinọ? Ike owa ke ikup owu me lek? Isasa itap ubọk inyi owu okekeek inu yi, kpo ogugo echi ekigwook me emen ikpa kiji ofolek ubọk ugwem mè Paradais obokup mè iyaka ire kpọ okwa okijeen̄ fidio kubọk The New World to Come, Just Around the Corner, mè iyaka ire Imagine the Time. Ire eji itet ikpọchieen̄ kiji ofolek aya inyọn̄ inye me ejit kiji, ufialek kiji ibore “sọntiik.” (2 Kọr 4:17) Jioba morọ ibe okeke onye inan̄a me lek Ikpọchieen̄ ikinyi
Week Inu Unye Otu Ewe Okup Me Usem Awaji
w24.2 26 ¶3-4-mwbr
Kaan̄ Ubelejit Ike Okisa Me Ime Ikikup Ikpọ Jioba
Baibul ibe: “Ire, Jioba òkikup ikpọ enyi, inyi ọmọ môrọ enyi nsan; ọmọ môtọbọ ijibi, mè ito enyi njijin, mije, Jioba ìre Awaji unen oyerebet. Uga unwọọn̄ môkup inyi ebi ìkikup ikpọ ọmọ.” (Asaya 30:18) Edasi itumu usem chi inyi ebi Ju ebi unye-ibot. (Asaya 30:1) Ire, ikaan̄ usini ene me etete kiban̄ ebi ikigbe utoon̄-ejit, eya orọ usem chi Asaya otumube ira inyi ema ikpọchieen̄. Usem chi yaage si ikinyi ebi usun̄ Jioba ikigbe utoon̄-ejit me chereyi ikpọchieen̄.
Eya orọ, ikup ufiak ibe eji esa me ime ekekup ekpọ Jioba mije, ọmọ si ikisasa me ime ikikup ikpọ. Ikaan̄ mgbọ ineen̄be isasa itap uyaka me lek ijo ukot keyi, ikikukup ikpọ ibe usen mè mgbọ ya ire. (Mat 24:36) Me mgbọ ya, mosibi utoon̄ inyi otutuuk ene ibe ke usem Yọk otumube ikeme Jioba mè otutuuk ebi ikitọbọ ebum inyi Jioba ire ataak. Jioba mojijaka Setan mè ebi geelek ikup me agan̄ kan̄, ire, “môrọ [eji] nsan.”
ONYAN̄ IBA 9-15
INU UNYE OTU EWE OKUP ME USEM AWAJI ASAYA 33-35
“Ọmọ Obotet Enyi Ikaan̄ Inye Me Ukot Mgbọ Kinyi”
w24.01 22 ¶7-8-mwbr
Jioba Motap Ubọk Inyi Owu Me Mgbọ Okichichini Irek Oyọyọt
7 Ufialek. Mgbọ geelek eji ekije itibi irek oyọyọt, usini mgbọ eji kpekọt ikikeek mkpọ ijaan̄ ike eji ewuuklek ikirọ. Ubọk inu okikup eji me lek mokọt ikinwene ubọk geelek kubọk uji efet okitọbọ ikana. Ana, ogwu eji ewuuklek itumu mkpọ ofolek ibe ke mgbọ nlom kan̄ Luis okwube, ke ubọk inu okikup ọmọ me lek ikpọkpọ ikinwene ubọk geelek. Itumu ibe: “Usini mgbọ ere ikinọọn̄ emi me lek, nra ibene ikitọ lek n̄a njijin mè nkenaan̄ ejit ibe ke nlom n̄a Luis ikwu.” Ofifi si, Ana ikinaan̄ ejit mije ikakiriọọn̄ mkpọ iborọ mgbọ geelek isiborọ ntumu-mfieek echi Luis ogwu olom okirọ me adasi mgbọ. Usini mgbọ ikikup me lek kan̄ kubọk ikakaan̄ ikpọchieen̄ geege. Ike owa ke Jioba okisa itap ubọk inyi eji me mgbọ geelek okikeek okiniin̄ igak eji ejit ni?
8 Inu Jioba Okirọ. Ichieek eji use ibe ke ọmọ motet eji ikaan̄ inye. (Fuk Asaya 33:6.) Mgbo geelek unye efet isikiwut me okwaan̄, mokọt irọ ibe uji ile ikisisik unye unye. Ufuna uji ile ikamalek ikisisik me isi efet, owuwa uji ile mikikaan̄ inu ge okiwọọk isibi me agba agan̄ iba me irak mun̄. Inu chi okikup me agba uji chi ikirọ ibe uji ya ikakimalek isisik, eyi ikitap ubọk irọ ibe ebi ikup me emen uji ya ekafieek owot, mè ekenwọọn̄ uran kiban̄. Ire, inyi inu chi okikup me agba uji cha ikọt ikirọ ikwaan̄ ijaan̄, uji ya ibokijeje. Ubọk yaage si, Jioba mokọt itap ubọk inyi eji ekeke enye, me ire eji ekup inye ikitọbọ ebum inyi ọmọ ikerere me mgbọ eji ekichichini ufialek omimin.
w21.02 29 ¶10-11-mwbr
Ubọk Eji Ebekọt Ikup Inye Ikikaan̄ Unwọọn̄ Me Mgbọ Eji Ekije Itibi Ufialek
10 Inu obotap ubọk: Beek Jioba ibe inyi owu iriọọn̄-inu. Ire eji iweek ikukup inye ikikaan̄ unwọọn̄ ikerere me mgbọ eji ekije itibi ufialek, eji ebedadasi ibeek Jioba ibe inyi eji iriọọn̄-inu eji eweekbe isasa irọ ata ntumu-mfieek. (Fuk Jemis 1:5.) Keke ke eji eberọ ire ikikup me lek kiji kubọk Jioba ikafọọk otu uriaak kiji ugwat ugwat ni? ikpa Jemis ibe me eji ‘ekup enye ekebeek’ Awaji. Jioba ikpobonaan̄ ejit me ire eji ekup inye ikibeek ọmọ iriọọn̄-inu. Ikpobokaan̄ uduk. Nte kiji ogwu okup me emen inyọn̄ ‘ikichichili ubọk’ me mgbọ geelek eji esibeek ọmọ ibe inyi eji iriọọn̄-inu isasa ime ufialek kiji. (Itọn̄ 25:12, 13) Ikimun̄ ufialek kiji, mè ikito eji njijin. Ikaan̄ ulọk si itatap ubọk inyi eji. Me atikọ, eyi ichubọk ire mkpọ okinyi eji unwọọn̄! Ire, ike owa ke Jioba okisa inyi eji iriọọn̄-inu ni?
11 Jioba ikinyi eji iriọọn̄-inu inan̄a me emen Usem kan̄. (Urọk 2:6) Isasa ikaan̄ iriọọn̄-inu Awaji, eji ebekikwekween̄ Baibul mè ikpa ntitiin̄ okisan̄a isibi. Ire, ikare ikpọkpọ iriọọn̄ inu okup emen gaalek, eji ebekitatap iriọọn̄-inu okup me emen Usem Awaji me ikwaan̄, sa me ikekirọ mkpọ ikitumu. Jemis ige ibe: “Ikakikpọkpọ ìgban̄ ikọ Awaji gaalek, ìkirọ inu ikọ ya okitumu.” (Jemis 1:22) Mgbọ geelek eji esikitap nteme Awaji okinyi eji me ikwaan̄, eji mikirọ mkpọ esuuk esuuk, ikikeek mkpọ ijaan̄, mè ikikaan̄ njijin. (Jemis 3:17) Eru chi ikitap ubọk inyi eji ekup enye ekekaan̄ unwọọn̄ ikerere me mgbọ eji ekechichini ufialek.
ip-1 352-355 ¶21-22-mwbr
‘Kpunu Ogwu Obobe Lek N̄a Ikanye’
21 Ire, nriran Asaya okirọ iso me mgbọ keyi. Ebi eyi Jioba me chereyi mekikaan̄ igwagwa me irek emen ekwukwu. Ema minan̄a me usun̄ ataak ijejeen̄ kubọk njeen̄ ibot ejit ikakikwu, njeen̄ Awaji ita me emen Awaji ge mè njeen̄ iwọwọp ene me ukan̄. Ema mikaan̄ ata nteme ofolek eru, echi okibem ema isan̄a me lek ugwem barabat mè ikitap ubọk inyi ema ero ata ntumu-mfieek. Mije mkpa mkpenwen kè Jisọs, ema mikaan̄ ata mgbaan̄je melek Awaji mè ikaan̄ utọnọ nkeek. (Ebi Kọlọsi 1:13, 14; Pita Eyi Adasi 2:24; Jọn Eyi Adasi 4:10) Igwagwa me irek emen ekwukwu yi si ikikaan̄ oruru me irek anam akpalek. Kubọk inu njeen̄, mije ema ekisan̄a lek me lek ugwem barabat mè inwonwo siga, ebi eyi Karais kpekiben orukan̄ echi ekikaan̄ inan̄a me lek ugwem barabat mè usini orukan̄ cancer.—Ebi Kọrint Eyi Adasi 6:18; Ebi Kọrint Eyi Òso Iba 7:1.
22 Ire, usem okup me ikpa Asaya 33:24 mokaan̄ nrọ-nso me oniin̄ omimin̄ me emen aya inyọn̄ esitim akọn̄ Amagedọn isan̄a. Me irak mkpulu ogwu Mesaya, ebilene ire ebi ebegwa me irek anam akpalek isọkọ me lek ngwa eyi irek emen ekwukwu. (Ichichili 21:3, 4) Esijijaka ijọ inyọn̄ Setan yi isan̄a, inu ukechieen̄ kubọk mbet echi Jisọs orọbe me mgbọ ikupbe me inyọn̄ ijọn̄ mobọkọ irek me otutuuk linyọn̄. Ebi nnaan memun̄ inu, ebi inan menọ ikọ, ebi akọọk meje ije! (Asaya 35:5, 6) Eyi morọ ibe otutuuk ebi inwọnwọnọ ikpele ufialek, egọọk etap lek me lek ikwaan̄ irọrọ ibe inyọn̄ ijọn̄ yi ikana Paradais.
Week Inu Unye Otu Ewe Okup Me Usem Awaji
w23.05 15 ¶8-mwbr
Kweek Nye Kije me “Oniin̄ Mbuban”
8 Usini ene mekọt itumu ibe, ‘moweek ibe ebi Ijeren enwene usini mkpọ me ugwem kiban̄.’ Ire, ire mkpọ orọrọ ebi Ijeren me mgbọ ya ikaan̄ mkpọ isibibe inyi eji me chereyi ni?’ Iin ikaan̄! Mije, eji si ekije me “Oniin̄ Mbuban.” Mè ire eji ekaan̄ ikpọchieen̄ ifofo emen inyọn̄, sa eji ekaan̄ ikpochieen̄ iluluk me inyọn̄ ijọn̄ keyi, eji ebekukup ibia me “Oniin̄ Mbuban” ike ikisa eji ije itibi paradais eyi emen ekwukwu mè ikisa eji ifo lek ugbana echi Ama Ubọọn̄ Awaji obosa inu. (Jọn 10:16) Karake acha 1919 C.E., efie efie ebirieen̄, ebibaan̄ mè nsabọn minan̄a me emen Babilọn Ama Ile, orere otutuuk ataak uwu uriaak okup me inyọn̄ ijọn̄ keyi me ibene ikije me oniin̄ ya. Usini mgbọ owu me lek ife cha. Ikerere ibe ke ebi ene ebene ikije me oniin̄ yi me acha 1919, ebi ene mibene ikwaan̄ me lek oniin̄ ya owuwa acha sabum mgbọ ya.
ONYAN̄ IBA 16-22
INU UNYE OTU EWE OKUP ME USEM AWAJI ASAYA 36-37
“Katet Ukpook Me Lek Ikọ Ya Onọbe”
it “Ejikaya” Eyi 1 ¶14-mwbr
Ejikaya
Senakerip Ikakọt Ibọkọ Jeruselem. Ike Ejikaya okeekbe ibe ke morọ, Senakerip itumu ifieek inunu akọn̄ me lek Jeruselem. Me mgbọ ọmọ mè ebi akọn̄ kan̄ ekpabe mbin akọn̄ ikana ama ile ewakbe ata mgban ikana ekigwen Lakis, Senakerip oraria usini ebi akọn̄ kan̄ mè usini ebi ibot akọn̄ kan̄ inu ibe enetumu enyi ebi Jeruselem ibe esa lek kiban̄ enyi ogwu ubọọn̄ Asiria. Ogwu okitumu ikọ me ibot ebi ogwu ubọọn̄ ya oriabe inu ire ogwu ibot ebi ikinyi ogwu ubọọn̄ miin̄, ogwu ororiọọn̄ ubọk ekitumu usem Iburu Ijaan̄. Isa me ida onyenye ikirọ Ejikaya ochak mè ikido Jioba isi. Ikigugo lek ibe ke Jioba ikpobokọt inyan̄a Jeruselem, ike awaji ebi ofifi ido kpekọt inyan̄a ebi ido kiban̄ isan̄a me ubọk ogwu ubọọn̄ Asiria.—2 Ubọọn̄ 18:13-35; 2 Mfuf 32:9-15; Asaya 36:2-20.
ip-1 387 ¶10-mwbr
Ogwu Ubọọn̄ Ge Ikaan̄ Mkpukpe Mije Ichechieek Kan̄
10 Ofifi, Ogwu ibot ebi ikinyi ogwu ubọọn̄ miin̄ ya iyaka ikeek ebi Ju ibe ke ebi Asiria migak ema me agan̄ mkpọ akọn̄ mè ebi akọn̄. Isa me ugumu lek ido ema otu, mè itumu ibe: “Mgbọ yi, na gọọk nte uwu n̄a, ogwu ubọọn̄ Asiria, fieek ubọk-nu, mè ǹnyi owu obop inyinya iba, mè ekpọ-nu mè ìre owu môkọt ikaan̄ ene iso, ebi ìbekọp inyinya cha.” (Asaya 36:8) Ire, ire ichubọk ikup ufiak me ire ebi ikikọp inyinya akọn̄ me juda miwa sa kpewa ni? In-in ikakup ufiak. Mije, unyan̄a ebi Juda ikayalek imaan̄ me lek mkpọ akọn̄ mè ebi akọn̄. Ikpa Urọk 21:31 ikpa inu ya ikeyi: “Ekibala inyinya isun̄ iban usen akọn̄, ire, ntim-mkpan̄ ìkup me ubọk Jioba.” Ogwu ibot ebi ikinyi ogwu ubọọn̄ miin̄ ya itumu si ke ugbana Jioba ikup me lek ebi Asiria ikare me lek ebi Ju. Ire ikare ikeya, ke ebi Asiria kpemekọt ibọkọ owuwa ama ebi Juda.—Asaya 36:9, 10.
ip-1 388 ¶13-14-mwbr
Ogwu Ubọọn̄ Ge Ikaan̄ Mkpukpe Mije Ichechieek Kan̄
13 Ogwu ibot ebi ikinyi ogwu ubọọn̄ miin̄ itumu ofifi mkpọ si isasa itap ebi Ju ukpook me emen. Itumu inyi ema ibe me ema ekachieek me ire Ejikaya itumu ibe: “Jioba môtaba eji isibi.” Ogwu ibot ebi ikinyi ogwu ubọọn̄ miin̄ iyaka ikeek ebi Ju ibe ke awaji ebi Sameria kpekọt ikput ibe ebi Asiria ekatim igak ama ubọọn̄ agan̄ akọp otoko. Ke kpunu awaji ebi ofifi ido si okokọt ikput ebi Asiria ebi ekakọt itim igak ido kiban̄. Itumu ibe: “Mọmọ awaji ebi Amat mè echi ebi Aripadi cha? Mọmọ awaji ebi Sefarifayim? Ìre awaji kecha îkọt inyan̄a ebi Sameria isibi me ubọk n̄a?”— Asaya 36:18-20.
14 Mije irebe ogwu okitọbọ ebum inyi ataak awaji, Ogwu ibot ebi ikinyi ogwu ubọọn̄ miin̄ yi, ikariọọn̄ ibe ke ikpele esese ọmọ owa me lek ebi Sameria ebi itetele Jioba mè ebi Jeruselem me irak mkpulu kè Ejikaya. Ataak awaji ebi Sameria kpekaan̄ unye isasa inyan̄a ama ubọọn̄ agan̄ akọp otoko. (Ebi Ubọọn̄ Eyi Òso Iba 17:7, 17, 18) Ire, ebi Jeruselem me irak mkpulu Ejikaya mitele ataak awaji cha miyaka inu ikinitọbọ ebum inyi Jioba. Ire, ebi ene ita cha ebi Ogwu Ubọọn̄ Ejikaya oriabe ibe esi egban̄ inu Ogwu ibot ebi ikinyi ogwu ubọọn̄ miin̄ ya obotumu kpekpa echi inyi ogwu ibot ikwaan̄ ya. “Ire, ema, ebi îkitumu ikọ cha inyi, ekpọkpọ iriaan̄ otu, kpefọọk ọmọ ikọ geege, mije, ogwu ubọọn̄ Ejikaya înyi ema ida ibe ekabọkọ ọmọ otu geege.” (Asaya 36:21) Eliakim, Sebina, mè Jowa minu me lek Ejikaya minikpa inu Ogwu ibot ebi ikinyi ogwu ubọọn̄ miin̄ ya otumube inyi ọmọ.—Asaya 36:22.
Week Inu Unye Otu Ewe Okup Me Usem Awaji
it “Mgbidim Okwukwut” ¶4-mwbr
Mgbidim Okwukwut
Jioba itumu inyi Senakerip Ogwu Ubọọn̄ Asiria ibe: “Emi mâsa ukọọk n̄a igọbọ owu me otu inwọm, mè isa mgbidim okwukwut n̄a ikwuk irieen̄ owu me otu, mè irọ inyi owu ògwu òkom òfo me lek oniin̄ yaage ojebe inu.” (Ebi Ubọọn̄ Eyi Òso Iba 19:28; Asaya 37:29) Sa me unye kè Jioba, Senakerip itele akọn̄ ibenbe me ejit ininitim me lek ebi Jeruselem me iyaka igwu ikom ifo Ninife, ere nsabọn kan̄ gaalek ekpanbe ọmọ. (Ebi Ubọọn̄ Eyi Òso Iba 19:32-37; Asaya 37:33-38) Jioba itatap mgbidim okwukwut me otu ebi ochicha kan̄ ikijeen̄ ibe ke ikaan̄ unye ntọ-ikọ me lek kiban̄ ike ene obokọt ikaan̄ unye ntọ-ikọ me lek anam sa me itatap mgbidim okwukwut me otu anam ya.—Asaya 30:28.
ONYAN̄ IBA 23–ONYAN̄ ITA 1
INU UNYE OTU EWE OKUP ME USEM AWAJI ASAYA 38-40
“Ọmọ Môkpukpo Arọọn̄ Kan̄ Kubọk Ogwu Òkpukpo Arọọn̄”
w23.02 2-3 ¶3-4-mwbr
Inu Baibul Okijeen̄ Ofolek Ogwukaan̄ Kan̄
3 Fuk Asaya 40:8. Me owuwa acha, Baibul ikinyi ebi usun̄ Jioba ata nteme ofolek ubọk iluk ugwem. Ire, ike owa ke eyi osa ifet ni? Mije, ifiin̄ karake egebe Baibul, mkpọ esabe ige Baibul ire mkpọ echi ikakikup ifiin̄, kpunu geege me lek mkpọ echi esa ige eyi adasi cha si okukup inire chereyi. Ire, Jioba imun̄ ibe ke miyaka ige inu egebe cha. Ikerere ibe ke ebi ikiyaka ige inu chi kpeso, ema ekiroriọọn̄ ubọk isa me ugbalachieen̄ irọ. Ofolek Ikpa Mbuban Agan̄ Esabe Usem Iburu ige, ogwu uga ikpa ge ige ibe: “Kpunu ofifi ikpa ukot ikan geege eyi ebi iyayaka ikpọk ige esa me ugbalachieen̄ ige ibet lek eyi.” Eya oro, ikerere ibe ke ege me ujọn̄ọ ujọn̄ọ mgbọ, mè me inyọn̄ mkpọ echi ikakikup ifiin̄, ikerere si ibe ke ebi iyayaka ikpọk ige si kpeso, ejit kiji inye ibe ke inu eji ekifuk me emen Baibul kiji me chereyi ire inu Jioba ogwukaan̄ okaan̄be me nkeek.
4 “Atata inu geelek, mè uche geelek ònwọnwọn isan̄a” inan̄a me ubọk Jioba. (Jemis 1:17) Baibul ire ge me lek uche onwọnwọn isan̄a Jioba onyibe eji. Inyinyi ikijeen̄ eji mkpọ ofolek ogwu onyinyi, ubọk isabe iriọọn̄ eji mè ufiak kiji ire. Ubọk yaage si ke ikup me lek Jioba ogwu onyinyi eji Baibul. Eji esikiriọọn̄ ubọk iwọlọ Baibul ikpọ, eji mikikween̄ owuwa mkpọ ofolek Jioba. Ubọk isabe iriọọn̄ eji mè ufiak kiji. Me ibot usem keyi, eji mekpa ubọk Baibul osa ijeen̄ eru ita echi Jioba okaan̄be irere: iriọọn̄-inu, uneen̄ oyerebet, mè ima kan̄. Adasi eji ekpa nu oniin̄ echi Baibul osa ijeen̄ iriọọn̄-inu Awaji.
cl 70 ¶7-mwbr
Unye Isasa Ibem—“Awaji Ore Ere Nlet Kiji”
7 Jioba isasa lek kan̄ itọt me lek ogwu okpukpo arọọn̄ irọ ibe ejit kiji inye ofolek ulọk ikaan̄be ibebem eji. (Ijikien 34:11-16) Keek nu ubọk esabe ikpa mkpọ ofolek Jioba ike ikupbe me ikpa Asaya 40:11, mè òso ibot ikpa iba me ikpa keyi: “Ọmọ môkpukpo arọọn̄ kan̄ kubọk ogwu òkpukpo arọọn̄; môsa ubọk kan̄ ikpulu bọn arọọn̄ kan̄ ititiin̄ isun̄, mè ibeen̄ ema ikọọk me isi ejit.” Ike owa ke gwun̄ arọọn̄ okisa inu ikup me ejit ogwu okpukpo arọọn̄ orere emen ofonti kan̄ ni? Usini mgbọ, gwun̄ arọọn̄ ya mokọt ije inu me lek ogwu okpukpo arọọn̄, isa ukot kan̄ igon me lek ukot ogwu okpukpo arọọn̄ ya. Ire, ire ogwu okpukpo arọọn̄ ya obogele lek isiki mè iben arọọn̄ ya ususuk ususuk ibeen̄ me ejit kan̄. Eyi ichubọk ire ata oniin̄ isasa ikpa ubọk Jioba osa ikup me mbem lek kubọk Ogwu Okpukpo Arọọn̄ Ilile isasa ibem eji!
w18.01 8 ¶4-6-mwbr
“Ebi Lek Owọbe, Ọmọ Okinyi Ema Efuuk”
4 Asaya Fuk Asaya 40:26. Kpunu ogwu okọkọt ifuk otu ifuk otutuuk ntoronyan̄ Awaji orombe. Ebi Science ebe ke okop ntoronyan̄ kiji eyi ekigwen Milky Way ikaan̄ mkpọ ososo efit ego ntoronyan̄ ini. Ire, Jioba iriọọn̄ erieen̄ ntoronyan̄ chi ge ge. Keke ke eyi okijeen̄ eji? Ire Jioba ikaan̄ ulọk me lek ntoronyan̄ echi ikakiluluk ugwem, keek nu ubọk ikimun̄ owu ogwu okitọbọ ebum inyi ọmọ, ikare mije etetbe owu me ubọk unye, ire, mije omabe ọmọ! (Okwa Itọn̄ 19:1, 3, 14) Nte kiji iriọọn̄ otutuuk inu geelek ofolek kiji. Iriọọn̄ “otu ifuk otutuuk ukut ijeek” okup eji me ibot. (Matiyu 10:30) Ogwu okwa ige ibe: ‘Jioba iriọọn̄ inu ebi ata irọrọ ekije itibi.’ (Itọn̄ 37:18) Iin̄, ikimun̄ ufialek okije itibi, mokọt inyi owu unye oweekbe isasa ime ema otutuuk.
5 Fuk Asaya 40:28. Ire Jioba ke unye okinan̄a me ubọk. Kubọk inu njeen̄, eji ekpa nu unye okinan̄a me lek ura. Ogwu Science ge okige ikpa ekigwen David Bodanis itumu ibe: “Unye okinan̄a me lek ura me mkpọ ikpan̄ chieen̄ ge gaalek iwa enenen. Iwa igak unye okinan̄a me lek ego ego bomb ekigwen atomic bomb.” Ofifi ogwu okikween̄ mkpọ ge, ibe ke unye ura okisan̄a isibi me mkpọ ikpan̄ chieen̄ ge gaalek iso mkpọ ebekọt isa inyi otutuuk linyọn̄ ukan̄ me efit obop acha iba! Ire Jioba ibokọt inyi ura mbet lek unye okup ikeya, eya isibi ibe ke mokọt inyi eji unye eji eweekbe isasa ime ufialek kiji geelek.
6 Fuk Asaya 40:29. Ikekitọbọ ebum inyi Jioba ikinyi eji ikpele unwọọn̄. Jisọs itumu inyi ebi udun̄ kan̄ ibe: ‘Iben ogbugboon̄ n̄a ìtoon̄ me oguga kinyi.’ Mè itumu si ibe: “Ire enyi inu, enyi mêkaan̄ utelelek me ibot ejit kinyi. Mije, ogbugboon̄ n̄a ìkayọt ibebeme, akpan n̄a si îfet.” (Matiyu 11:28-30) Usem chi ichubọk ire atikọ! Usini mgbọ, efuuk mokọt ita eji me owot me mgbọ eji ebesi nkwen̄mkpọ ntitiin̄ mè iyaka ire isibi uko. Ire, ike owa ke ikikup eji me lek eji esika? Efuuk ikijojot eji owot. Efuuk yi motap ubọk inyi owu obeme ufialek geelek okichichini me ugwem. Me atikọ, akpan Jisọs ifefet!
Week Inu Unye Otu Ewe Okup Me Usem Awaji
ip-1 400 ¶7-mwbr
“Ìkat Ebi N̄a Ejit!”
7 Ikare mgbọ ebi Ju enan̄abe me usun̄ akọn̄ Babilọn ika gaalek ke nriran yi oro iso. Nriran yi si irọ iso me adasi ukot. Jọn ogwu okitap ene me mun̄ ore ida ge ya “òkitaan̄ ukpo me emen èwê,” isasa irọ iso inu okup me ikpa Asaya 40:3. (Luk 3:1-6) Inan̄a me unye eyi ekwukwu mbuban, Jọn isa usem Asaya isa irọ mkpọ ofolek kan̄. (Jọn 1:19-23) Bene me acha 29 C.E., Jọn ibene ikineen̄ oniin̄ isun̄ iban Jisọs Karais. Etip Jọn olookbe irọ ibe ebi ene eweek ogwu Mesaya echieekbe me use, inyi ema mekọt igban̄ mè igọọk ọmọ. (Luk 1:13-17, 76) Inan̄a me ubọk Jisọs, Jioba mosa ebi geelek igwugwu ikom initap me emen nkan̄-lek eyi Ama Ubọọn̄ Awaji gaalek obokọt inyi ene. Nkan̄-lek inan̄a me ubọk ijo inu mè mkpa. (Jọn 1:29; 8:32) Usem kè Asaya si ikaan̄ nrọ-nso omimin̄ me mgbọ esan̄abe ebi isisik me lek ebi eken̄be aran̄ isibi me Babilọn Ama Ile me acha 1919 mè iyaka iben ata ntọbọ-ebum igwuun̄.