Ijo Inu Ogwu Ubọọn̄ Debit Orọbe

Mgbọ Sọọlu okwube iraka, Debit okakana ogwu ubọọn̄. Debit ire akọp acha ita mgbọ irebe ubọọn̄. Mgbọ acha inen mè inen orakabe, Debit omumun̄ ogwu enenwaan̄ ge ojajaan̄ uja me ikakwun̄ ge ikupbe me inyọn̄ uwu ubọọn̄ kan̄. Iweweek iriọọn̄ ibe ke erieen̄ ogwu enenwaan̄ ya ire Batiseba, ke ogwu olom ire Uraya ogwu akọn̄. Debit oraria ibe esi egwen Batiseba enu me uwu kan̄. Debit ogọgọọk Batiseba ilaak, ininin̄ owot. Debit oweweek ubọk ibolet ijo inu irọbe. Eya orọ, itutumu inyi ogwu ibot ebi akọn̄ kan̄ ibe ito Uraya me isi akọn̄ mè ejuuk ọmọ gaalek etele. Mgbọ ekpan̄be Uraya me oyet akọn̄, Debit ododo Batiseba me lek nwa.

Ire, Jioba imun̄ otutuuk ijo inu cha orọrọ. Keke ke irọ ni? Jioba iria ogwu nriran Netan isi lek Debit. Netan otutumu inyi Debit ibe: ‘Ikaan̄ ogwu ubọọn̄ ge okakaan̄ owuwa arọọn̄, mè ikaan̄ si ogwu ugbọọn̄ ge okakaan̄ arọọn̄ ge gaalek imabe enenen. Ogwu ubọọn̄ ya obọbọkọ arọọn̄ ge gaalek ya ogwu ugbọọn̄ ya okaan̄be.’ Debit onanaan̄ ejit mè itumu ibe: ‘Mkpa ogbe ogwu ubọọn̄ ya!’ Netan otutumu inyi Debit ibe: ‘Owu ore ogwu ubọọn̄ ya!’ Debit ofefieek ejit enenen mè ichieek ibe ke ọmọ irọ ijo inu, mè itumu si ibe: ‘Nrọ Jioba ilọ.’ Ijo inu yi isa ogbogbo ufialek ijet Debit mè ebi uwu kan̄. Jioba isut Debit osusut. Ire, itele ibe Debit iluk ugwem mije Debit otumube atikọ mè ijeen̄ nsikilek.

Debit iweek inanama uwu mbuban inyi Jioba, ire, Jioba ikachieek ibe inama. Igobo ogwu gwun̄ Solomọn ibe inama. Debit otutumu inyi lek kan̄ ibe: ‘Uwu mbuban Jioba ibojajaan̄ mè imin enenen. Solomọn ire sọntiik gwun̄, ọmọ orọ, maneen̄ mkpọ isun̄ inyi.’ Debit obebene ikititiin̄ mkpọ Solomọn obosa inama uwu ya isun̄. Debit itap owuwa ikpoko kan̄ me lek ikwaan̄ inanama uwu ya. Igwen ebi ikakaan̄ usọ-ubọk mè ititiin̄ alata araran̄ mè alata okuket mè iria ibe esi elep uti olik me Taya mè Sidọn. Mgbọ Debit okigbet mkpa, inyinyi Solomọn ikpa onineen̄ inama uwu ya mè itumu inyi ibe: ‘Jioba obe me nge inu chi inyi owu. Jioba motap ubọk inyi owu, katet ukpook, tet lek nye mè si ikwaan̄ yi.’