Kpa Ubọk Ke Nkween̄mkpọ Ebi Ata-Ikọ Jioba Obosa Isibi Owu Oruru?

Ire owuuk lek isi nkween̄mkpọ Ebi Ata-Ikọ Jioba ni? Ire okawuuk lek isi, omokọt ikikaan̄ ukpook. Omokọt ikikeek ibe: Keke okibọkọ irek me nkween̄mkpọ chi? Keke orọ nkween̄mkpọ chi okupbe ufiak? Ire ikup ufiak ibe nsi ni? Me inu nkween̄ yi, owu mokween̄ ubọk nkween̄mkpọ chi obosa itaba owu iriaak me lek Awaji mè itap ubọk inyi owu me ugwem.

1. Keke ore okpan okpan inu orọrọ eji ekigbaan̄ ititiin̄?

Kpọ ike ogwu ogege Baibul ge osabe ikpa okpan okpan inu orọrọ eji ekigbaan̄ ititiin̄: Jioba, “mâtọn̄ owu me emen ntitiin̄ ebi eyi kwun̄.” (Okwa Itọn̄ 26:12) Ubọk yaage si, Ebi Ata-Ikọ Jioba ekikaan̄ unwọọn̄ omimin mgbọ geelek ema ekigbaan̄ ititiin̄. Me otutuuk linyọn̄ yi, ema ekititiin̄ mgbọ iba me nde geelek ikitọbọ ebum inyi Awaji. Ema ekikaan̄ chinichini omimin mgbọ ita me acha geelek si.

2. Keke ke obokween̄ me nkween̄mkpọ kiji?

Me nkween̄mkpọ kiji, eji ekijeen̄ Usem Awaji “mè ikikpa iwele, inyi ebi ene ekegobo inu cha ekifuk etet.” (Fuk Neyemaya 8:8.) Osinu nkween̄mkpọ kiji, omokween̄ inu ofolek Jioba mè ukama ukama eru kan̄. Ike okikween̄ ubọk imabe owu ire, ikeya ke obokitaba lek iriaak me lek kan̄ si. Omokween̄ ubọk Jioba obosa itap ubọk inyi owu okaan̄ ujot-owot me ugwem.—Asaya 48:17, 18.

3. Kpa ubọk ke ebi obochichini me nkween̄mkpọ kiji ebesa itap ubọk inyi owu?

Jioba ibe me “eji ekekeek ubọk eji ebekisa itap ebi melek kiji efuuk me emen, inyi ema ekemun̄ ene me chieen̄ mè ekerọ ata inu, eji ekatele ikekigbaan̄ ititiin̄.” (Ebi Iburu 10:24, 25) Me nkween̄mkpọ kiji, omomun̄ ebi imama ge ge mè ikaan̄ ulọk ikwekween̄ mkpọ ofolek Awaji. Mesa Baibul itap owu efuuk me emen. (Fuk Ebi Rom 1:11, 12.) Omokọt igọọk ebi ijeje itibi mbet ufialek okebije itibi ikpa usem. Echi ore usini inu orọrọ Jioba oweekbe ibe eji ekegbaan̄ etitiin̄ mgbọ geelek!

KWEEN̄ GBAALEK

4. Nkween̄mkpọ Ebi Ata-Ikọ Jioba

Me adasi ukot, ebi eyi Karais ekigbaan̄ ititiin̄ mgbọ geelek ikitọbọ ebum inyi Jioba. (Ebi Rom 16:3-5) Fuk Ebi Kọlọsi 3:16, mè igbaan̄ ikpa idodo yi:

• Ike owa ke ebi eyi Karais me adasi ukot ekisa itọbọ ebum inyi Jioba?

FIDIO: Keke okibọkọ irek me emen Uwu Ntitiin̄ eyi Ama Ubọọn̄? (2:12)

• Ike owa ke inu okibọkọ irek me emen Uwu Ntitiin̄ eyi Ama Ubọọn̄ osa ije ikike me lek inu eji efukbe me ikpa Ebi Kọlọsi 3:16?

• Me emen fidio yi mè iyaka ire ogugo yi, ire ikaan̄ inu omun̄be me nkween̄mkpọ kiji eyi omabe ni?

Fuk Ebi Kọrint Eyi Òso Iba 9:7, mè igbaan̄ ikpa idodo yi:

• Keke orọ Ebi Ata-Ikọ Jioba kpekibọkọ ikpoko me nkween̄mkpọ kiban̄?

Owu mè ogwu melek kwun̄ ekikween̄ mkpọ megbaan̄ ikpọ inu ebekween̄ me nkween̄mkpọ kiji eyi nde keyi.

• Me lek inu eji ebekween̄, eyi owa ke okaan̄ ulọk me lek ichit?

Ire oriọọn̄ ni?

Me jw.org, owu mokọt imun̄ mgbọ mè ere ekisun̄ nkween̄mkpọ chi me otutuuk linyọn̄.

1. Nkween̄mkpọ kiji igọbọ usem, orirom mè fidio. Otutuuk nkween̄mkpọ ikibene me lek okwa mè uriaak

2. Me usini agọọk me orirọ yi, ekekinyi ebi ikigban̄ irek ibe efọọk ikọ

3. Otutuuk ene mekọt inu—ebi ototun̄ ukan̄, ebi ikup agaga, ebi ininin̄ ugane, mè nsabọn

4. Nkween̄mkpọ Ebi Ata-Ikọ Jioba ire ikike, kpekiben alala ikana itip ikpoko si

5. Ikekinu nkween̄mkpọ iweek efuuk

Kubọk mkpọ njeen̄, kpọ-nu ebi ototun̄ ukan̄ kè Jisọs. Inyi ema ekọt esi orirọ ekirọ me acha geelek, ema ekije ije owuwa usen itibi ere ogoon̄ inan̄a me Najeret isi ire Jeruselem. Fuk Luk 2:39-42, mè igbaan̄ ikpa idodo chi:

• Ire okeek ibe moweek efuuk isasa ije ire Jeruselem ni?

• Keke orọ iboweek owu efuuk inunu nkween̄mkpọ?

• Ire inwọn ibe okosi nkween̄mkpọ ubọk geelek ibe ke moweek efuuk me ubọk kwun̄ ni? Keke orọ ofọọkbe ikeya?

• Keke orọ eji ebekisi nkween̄mkpọ mgbọ geelek?

ME MGBIDIM

Ikekisi nkween̄mkpọ motap ubọk inyi owu okween̄ inu ofolek Jioba ogbaalek, morọ inyi unene kwun̄ melek kan̄ ikinye, mè inyi owu irek ikekigọọk ebi ofifi ife itọbọ ebum inyi ọmọ.

Idodo

• Keke orọ Jioba okitap eji efuuk me emen ibe eji ekegbaan̄ etitiin̄?

• Keke ke obokween̄ me nkween̄mkpọ Ebi Ata-Ikọ Jioba?

• Kpasi ofifi oniin̄ ke nkween̄mkpọ chi obosa itap ubọk inyi owu ni?

WEEK

Keke ke oborọ ire okikaan̄ ukpook inunu nkween̄mkpọ? Kpọ ubọk ogwu owuwuuk lek ikikaan̄ ukpook osabe ibene ikima nkween̄mkpọ.

Eji Kpebekọt Iwuuk Amọn Ya (4:16)

Kpọ ubọk gwun̄ enerieen̄ ge osabe ikinwọọn̄ nkween̄mkpọ mè efuuk itapbe ikekisi.

Mma Nkween̄mkpọ Enenen! (4:33)

Kween̄ ubọk ikikup ebi ofifi ife me lek inunu nkween̄mkpọ.

“Why Attend Meetings at the Kingdom Hall?” (Web article)

Fuk ubọk ugwem ogwu afa ge osabe inwene eyi inube nkween̄mkpọ Ebi Ata-Ikọ Jioba ge.

“I Never Went Anywhere Without My Gun” (The Watchtower, July 1, 2014)