INU NKWEEN̄ 35
Ubọk Obosa Ikirọ Ata Ntumu-Mfieek
Otutuuk kiji mikirọ ntumu-mfieek. Owuwa me lek ntumu-mfieek chi ikikaan̄ mgbaan̄ me lek ugwem kiji mè mgbaan̄je kiji melek Jioba. Kubọk inu njeen̄, eji mekọt itumu ifieek ere eji ebeluk, ikwaan̄ eji ebesi isasa ikaan̄ ikpoko, mè iyaka ire mè ire eji mekaan̄ olom mè iyaka ire nwa. Mgbọ geelek eji erọbe ata ntumu-mfieek, eji mekọt ikaan̄ ubelejit me ugwem, mè irọ inyi Jioba ibele ejit.
1. Ike owa ke obokọt isa Baibul irọ ata ntumu-mfieek?
Sabum onorọ ntumu-mfieek, beek ntap-ubọk Jioba mè wọlọ Baibul kpọ inyi oriọọn̄ nkeek kan̄ ofolek inu oborọ ya. (Fuk Urọk 2:3-6.) Me usini irek, Jioba inyi eji ọkpọkpọ ikan eji ebegọọk. Ire ikeya, isisiki ibot inyi ikan ya ore ntumu-mfieek onwọnwọn ichit.
Ire kpunu ọkpọkpọ ikan ofolek inu ya ye? Jioba mojeen̄ owu si ‘oniin̄ oboje.’ (Asaya 48:17) Kpa ubọk ni? Onineen̄ Baibul mokọt itap ubọk inyi owu. Onineen̄ Baibul ire atikọ echi okijeen̄ eji nkeek Awaji mè ubọk ikebimun̄ mkpọ. Owuwa mgbọ, eji ekiriọọn̄ ubọk Awaji okimun̄ mkpọ eji esifuk mfufuk ge me emen Baibul. Eji esimun̄ ubọk inu okupbe me lek Jioba, eji mekọt irọ ntumu-mfieek obobele ọmọ ejit.
2. Keke ke eji ebekeek sabum eji erọ ntumu-mfieek?
Baibul ibe: “Ogwu òriọọn̄ lek ikigwugwuun̄ chieen̄ ikpọ ijọn̄, sabum ònotap ukot.” (Urọk 14:15) Eyi isibi ibe ke sabum eji eberọ ntumu-mfieek, igbe ibe eji emọnọ mgbọ esa ekeek mkpọ ofolek. Ike okikeek inu oborọ, do lek kwun̄ ibe: ‘Kpasi onineen̄ Baibul otat me lek irek yi? Kpasi ntumu-mfieek obonyi emi esuuk me ejit? Ike owa ke ntumu-mfieek n̄a obosa ikaan̄ mgbaan̄ me lek ebi ofifi ife? Eyi okukup ufiak ichit, ire morọ ibe Jioba ibele ejit ni?’—Ikan Òso Mgbọ Iba 32:29.
Jioba ikaan̄ unen itutumu inyi eji inu otatat mè inu olọlọ. Eji esiriọọn̄ ikan mè onineen̄ kan̄ ijaan̄ mè itumu ifieek igọgọọk ema, eji mekikpukpo nkeek kiji. Nkeek ire inu okup me emen kiji okirọ ibe eji eriọọn̄ mè ire inu itat sa ire ilọ. (Ebi Rom 2:14, 15) Nkeek ekpukpobe ijaan̄ motap ubọk inyi eji ekọt ekerọ ata ntumu-mfieek.
KWEEN̄ GBAALEK
Kween̄ ubọk onineen̄ Baibul mè nkeek kiji obosa itap ubọk inyi eji ekerọ ntumu-mfieek.
3. Tele ibe Baibul ikijeen̄ owu inu oborọ
Ike owa ke onineen̄ Baibul obosa itap ubọk inyi eji me mgbọ eji ekirọ ntumu-mfieek? Fit FIDIO yi, mè igbaan̄ ikpa idodo chi ogọgọọk.
Kpasi inyinyi okup unye otu ewe ke Jioba onyi eji?
Keke orọ Jioba onyibe eji unye isasa ikirọ ntumu-mfieek?
Keke ke Jioba onyi eji isasa itap ubọk inyi eji ekerọ ata ntumu-mfieek?
Inyi omun̄ onineen̄ Baibul ge, fuk Ebi Efesọs 5:15, 16. Mè igbaan̄ ikpa ubọk obokọt isa “irek geelek” okaan̄be isa . . .
ikifuk Baibul mgbọ geelek.
ikana ata olom, nwa, ute, uga, mè gwun̄.
ikisi nkween̄mkpọ ntitiin̄.
4. Kpukpo nkeek kwun̄ inyi okorọ ata ntumu-mfieek
Baibul isinyi ikan ofolek mkpọ, irọrọ ata ntumu-mfieek mokọt ifet. Ire, ire kpunu ikan ye? Fit FIDIO yi, mè igbaan̄ ikpa idodo yi ogọgọọk.
Me emen fidio yi, keke ke gwun̄ ute enenwaan̄ ya orọ isasa ikpukpo nkeek kan̄, inyi ikọt irọ ntumu-mfieek obobele Jioba ejit?
Keke orọ eji kpebetumu inyi ebi ofifi ife ibe erọ ntumu-mfieek echi ogbegbe ibe eji gaalek erọ? Fuk Ebi Iburu 5:14, mè igbaan̄ ikpa idodo chi:
Ubọk geelek ibe ke mofet ibebe mè ebi ofifi ife erọ ntumu-mfieek enyi eji, keke ogbe ibe eji gaalek eriọọn̄ enyi lek kiji?
Kpasi mkpọ okup, echi obokọt itap ubọk inyi owu okokpukpo nkeek kwun̄ mè okorọ ata ntumu-mfieek?
Kubọk ikpa okijeen̄ ene ere, nkeek kiji ikitap ubọk inyi eji etumu efieek inu eji eberọ me ugwem
5. Jeen̄ ulibi me lek nkeek ebi ofifi ife
Esese ebi ene ekirọ esese esese ntumu-mfieek. Ike owa ke eji ebesa ijeen̄ ulibi me lek nkeek ebi ofifi ife? Kpọ-nu irek iba chi:
Irek 1: Gwun̄ ute enenwaan̄ ge okima ichọchiọọk mkpọ me isi inu ayaya me ntitiin̄ ge, me ere ichọchiọọk mkpọ me isi okisisaak owuwa bọn ute ibaan̄.
Fuk Ebi Rom 15:1 mè Ebi Kọrint Eyi Adasi 10:23, 24, mè igbaan̄ ikpa idodo chi:
Igọọk me lek ere Baibul chi, keke ke gwun̄ ute enenwaan̄ ya obokọt irọ? Keke ke oborọ ire okup melek ogwu nkeek kan̄ okisisaak mije inu okirọ, eyi ikasisaak nkeek kwun̄?
Irek 2: Gwun̄ ute enerieen̄ ge iriọọn̄ ibe ke Baibul ikakeke ikeme inwọnwọ miin̄ okisa ene me okem okem, ire, itumu ifieek ibe ke ọmọ ikpobonwọ. Enenigwen ọmọ ibe inu ere ekinwọọn̄ lek, me ere ya, inenimun̄ ebi bọn ute ikinwọ miin̄ okisa ene.
Fuk Ogwu Etip 7:16 mè Ebi Rom 14:1, 10, mè igbaan̄ ikpa idodo chi:
Igọọk me lek ere Baibul chi, keke ke gwun̄ ute enerieen̄ ya obokọt irọ? Keke ke oborọ mè ire omun̄ ofifi ene okirọ inu nkeek kwun̄ ikachieekbe ibe orọ?
Keke ke oborọ inyi orọ ata ntumu-mfieek?
1. Beek Jioba ibe itap ubọk inyi owu oriọọn̄ mkpọ oborọ.—Jemis 1:5.
2. Wọlọ Baibul mè ikpa ntitiin̄ kpọ inyi omun̄ onineen̄ otatat me lek irek ya. Omokọt ido ogwu eyi Karais omimin isoon̄ mè ikaan̄ iriọọn̄-inu ofolek inu ya si.
3. Kikeek mgbaan̄ ntumu-mfieek kwun̄ obokaan̄ me lek nkeek kwun̄ mè nkeek ebi ofifi ife.
USINI ENE EKIBE: “Okaan̄ unen irorọ mkpọ geelek omabe. Inu ebi ofifi ife ekikeek ikakup ufiak.”
Keke orọ igbebe ibe eji ekekeek ubọk inu eji ekirọ okikup me lek Awaji melek ebi ofifi ife?
ME MGBIDIM
Eji merọ ata ntumu-mfieek ire eji ikween̄ ubọk inu eji eberọ obokup me lek Jioba mè mgbaan̄ ibokaan̄ me lek ebi ofifi ife.
Idodo
Ike owa ke obosa ikirọ ntumu-mfieek obokibele Jioba ejit?
Ike owa ke obosa ikikpukpo nkeek kwun̄?
Ike owa ke obosa ikijeen̄ ulibi me lek nkeek ebi ofifi ife?
WEEK
Ike owa ke obosa ikirọ ntumu-mfieek echi oborọ ibe mgbaan̄je kwun̄ melek Awaji inye?
“Make Decisions That Honor God” (The Watchtower, April 15, 2011)
Kween̄ gbaalek ubọk Jioba okisa inyi eji nteme.
Kpọ inu otatap ubọk inyi ogwu enerieen̄ ge ibe irọ ntumu-mfieek oyọyọt.
Kween̄ gbaalek ubọk obosa irọ ibe Jioba ibele ejit mgbọ ikanyibe ọkpọkpọ ikan ofolek inu ge.
“Do You Always Need a Bible Command?” (The Watchtower, December 1, 2003)