Kisa Atikọ Rọ Mkpọ Me Irek Geelek

Otutuuk ene miweek ikakaan̄ ebi unene ikisa atikọ irọ mkpọ. Jioba iweek si ibe ebi unene kan̄ ekesa atikọ erọ mkpọ. Ire, eyi ikafet me inyọn̄ eyi owuwa ene kpekisa atikọ irọ mkpọ. Kpasi oruru okinan̄a me lek ikekisa atikọ irọ mkpọ me irek geelek ni?

1. Keke ore okpan okpan mkpọ orọrọ eji ebekisa atikọ irọ mkpọ?

Mgbọ geelek eji ekisa atikọ igọọk ebi ofifi ife irọ mkpọ, eji ekijeen̄ Jioba ibe ke eji mima ọmọ mè ikaan̄ ulibi me lek kan̄. Keek-nu inu yi: Jioba iriọọn̄ otutuuk inu eji ekikeek mè ikirọ. (Ebi Iburu 4:13) Ikimun̄ eji mgbọ geelek eji egobobe isasa atikọ irọ mkpọ, ikibele ọmọ ejit si. Baibul ibe: ‘Ogwu ofiaan̄ ìre mbuban inu me lek Jioba, ire, ogwu òtatat melek kan̄ ìre mbuuruk.’—Urọk 3:32.

2. Me oniin̄ okukup ke eji ebekisa atikọ irọ mkpọ me ugwem kiji egwe geelek?

Jioba iweek ibe eji eketumu ‘atikọ enyi ebi melek kiji.’ (Jekaraya 8:16, 17) Eyi isibi keke? Ire eji ekitumu usem melek ebi uwu kiji, ebi ere ikwaan̄ kiji, bọn ute irieen̄ mè ibaan̄, mè iyaka ire ebi mkpulu, eji kpebekan̄ ataak mè iyaka ire itumu inu ikarege atikọ. Ebi ikisa atikọ irọ mkpọ kpekichiin̄ mkpọ ebi ofifi ene mè iyaka ire ifeen̄ ema. (Fuk Urọk 24:28 mè Ebi Efesọs 4:28.) Ema si ekikpekpe otutuuk otitip ido geelek ogbegbe ibe ema ekpe. (Ebi Rom 13:5-7) Me irek chi mè ofifi irek geelek, “eji ekiweek irọrọ inu òtatat me mgbọ geelek.”—Ebi Iburu 13:18.

3. Kpasi oruru okinan̄a me lek isasa atikọ irọ mkpọ?

Ebi ene metoon̄ eji ejit me lek esiriọọn̄ ibe ke eji ire ebi ikisa atikọ irọ mkpọ. Ikekisa atikọ irọ mkpọ morọ ibe otutuuk ene me ntitiin̄ ekaan̄ utelelek. Eji mekaan̄ utọn̄ọ nkeek. Eji ikekisa atikọ irọ mkpọ si “môkisa itọn̄ ijet ijejeen̄ eyi eji ekijeen̄ ofolek Awaji Ogwu Unyan̄a kiji,” mè irọ ibe ebi ene enetọbọ ebum enyi Jioba.—Taitọs 2:10.

KWEEN̄ GBAALEK

4. Ikekisa atikọ irọ mkpọ ikirọ inyi Jioba ibele ejit

Fuk Okwa Itọn̄ 44:21 mè Malakai 3:16, mè igbaan̄ ikpa idodo chi:

• Keke orọ okeekbe ibe ke ikajeen̄ iriọọn̄-inu ikekeek ibe ke eji mekọt ilet atikọ?

• Ike owa ke ikikup me lek Jioba eji esigobo itutumu atikọ, ikerere me mgbọ oyọyọt?

5. Kisa atikọ rọ mkpọ mgbọ geelek

FIDIO: Keke Okinyi Ene Unwọọn̄?—Utọn̄ọ Nkeek (2:32)

Fuk Ebi Iburu 13:18, mè igbaan̄ ikpa ubọk eji ebekọt ikisa atikọ irọ mkpọ . . .

• melek ebi ototun̄ ukan̄ kiji.

• me ere ikwaan̄ mè iyaka ire uwu ikpa.

• me ofifi ofifi irek.

6. Isasa atikọ irọ mkpọ ikirọ eji oruru

Isasa atikọ irọ mkpọ mokọt itap eji me ufialek usini mgbọ. Ire, irọrọ ikeya onwọn ichit. Fuk Okwa Itọn̄ 34:12-16, mè igbaan̄ ikpa idodo yi:

• Ike owa ke isasa atikọ irọ mkpọ oborọ ibe ugwem kwun̄ inwọn?

1. Olom mè nwa ikisa atikọ irọ mkpọ ekirọ ibe mbat-olom kiban̄ inye

2. Ebi ikisi ikwaan̄ esikisa atikọ irọ mkpọ, ebi ema ekisi ikwaan̄ inyi metoon̄ ejit me lek kiban̄

3. Ebi ikisa atikọ irọ mkpọ ekikaan̄ ata erieen̄ me lek ebi mkpulu

ME MGBIDIM

Jioba iweek ibe ebi unene kan̄ ekesa atikọ erọ mkpọ me inu geelek ema ekitumu mè ikirọ.

Idodo

• Me oniin̄ okukup ke eji ebekisa atikọ irọ mkpọ?

• Keke orọ ikajeen̄ iriọọn̄-inu ikekeek ibe ke eji mekọt ilet atikọ?

• Keke orọ obokisa atikọ irọ mkpọ mgbọ geelek?

WEEK

Ike owa ke ute mè uga ebekijeen̄ nsabọn kiban̄ ibe ekesa atikọ erọ mkpọ?

Kitumu Atikọ (1:44)

Keke orọ ikupbe ufiak ibe eji ekerọ use eji echieekbe?

Kirọ Use Ochieekbe mè Kaan̄ Ugbana (9:09)

Kpọ-nu mè ire igbe ibe eji ekekpe otitip ido, ikerere ibe ke kpekisa ikpoko cha irọ mkpọ ijaan̄.

“Taxes—Must You Pay Them?” (The Watchtower, September 1, 2011)

Keke obieen̄ ogwu enerieen̄ ge ogwu ikakisa atikọ irọ mkpọ ibe inwene ugwem kan̄ mè ikisi ata ikwaan̄?

“I Learned That Jehovah Is Merciful and Forgiving” (The Watchtower, May 1, 2015)