INU NKWEEN̄ 39
Ubọk Awaji Okimun̄ Eje
Eje ikup ufiak. Ire kpunu eje, eji kpebekup me ugwem. Kubọk ogwu Orom, Awaji ikaan̄ unye itutumu inyi eji ubọk ebekisa eje irọ mkpọ. Keke ke itumu ofolek eje? Ire eji mekọt irie eje mè iyaka ire, ibọkọ itap me akpalek ni? Ike owa ke eji ebesa irọ ata ntumu-mfieek ofolek inu yi?
1. Ike owa ke Jioba okimun̄ eje?
Jioba itumu inyi ebi ikitọbọ ebum inyi ọmọ me ukot ikaan̄ ibe: “Ugwem inu geelek okifuuk efuuk ikup me emen eje kan̄.” (Libitikọs 17:14) Isa inyi Jioba, eje ikeke ichit chieen̄ ugwem. Eyi ugwem orebe inu okup me mbuban, mè ire inyinyi onan̄a me ubọk Awaji, ikeya si ke eje okup me mbuban.
2. Keke ke Awaji obe mè eji ekasa eje irọ?
Jioba inyi ebi usun̄ kan̄ sabum mgbọ ebi eyi Karais ikan ibe ekarie eje. (Fuk Ibebene 9:4 mè Libitikọs 17:10.) Iyaka igon aban me lek ikan yi me mgbọ akpalek okikpọ ntitiin̄ otumube inyi ebi eyi Karais ibe: “Ikarie . . . eje.”—Fuk Ikwaan̄ 15:28, 29.
Keke ke usem ikarie eje osibi? Ire ogwu ofia ebeke itumu ibe okanwọ miin̄ okisa ene, okpobonwọ. Ire, ire omorie inorie miin̄ okisa ene okupbe me emen mè iyaka ire itele ibe esook etap me emen kwun̄ ni? Me atikọ, okpoborọ ikeya. Ubọk yaage si, ikan Awaji obe mè ekarie eje isibi ibe ke eji kpebekinwọ eje mè iyaka ire ikitaka anam ekakpan̄be ijaan̄. Eji kpebekirie inọrie geege eje okupbe me emen si.
Ofolek isasa eje irọ mkpọ me uwu ugwun̄ ye? Usini ubọk igwa-ene ije ikeme ikan Awaji. Echi igọbọ itatap otutuuk eje mè iyaka ire esese irek ini kan̄—orere, red cells, white cells, platelets, mè plasma. Ire, ofolek usini ubọk igwa-ene, ikasibi utoon̄ mè ire ije ikeme ikan Awaji sa ikaje ikeme. Kubọk inu njeen̄, usini igwagwa chi igọbọ isasa asabọn asabọn mkpọ onan̄a me lek adasi okpọkọ eje ini irọ mkpọ. Usini ubọk igwa-ene igọbọ isasa eje ene irọ mkpọ. Eji ge ge metumu ifieek inu eji eberọ me lek inu chi.a—Ebi Galesia 6:5.
KWEEN̄ GBAALEK
Kween̄ ubọk obosa ikirọ ntumu-mfieek ofolek isasa eje irọ mkpọ me mgbọ okibọkọ igwagwa.
3. Rọ ntumu-mfieek obobele Jioba ejit mgbọ okibọkọ igwagwa
Ike owa ke obosa irọ ntumu-mfieek eyi otatat me lek nkeek Jioba me mgbọ okibọkọ igwagwa? Fit FIDIO yi, mè igbaan̄ ikpa ufiak irebe irọrọ igọọk inu egebe chi.
Beek uriaak ibe okaan̄ iriọọn̄-inu.—Jemis 1:5.
Wọlọ onineen̄ Baibul kpọ mè ubọk obosa ema irọ mkpọ.—Urọk 13:16.
Week riọọn̄ ubọk igwa-ene okukup me agan̄ olukbe.
Riọọn̄ igwagwa echi okpobobọkọ.
Mun̄ ibe ke ntumu-mfieek kwun̄ morọ inyi okaan̄ utọn̄ọ nkeek.—Ikwaan̄ 24:16.b
Riọọn̄ ibe ke kpunu ene geege—ikerere nwa kwun̄, nlom kwun̄, ogwu ugane ntitiin̄, mè iyaka ire ogwu okigọọk owu ikween̄ Baibul—obotumu inyi owu inu oborọ ofolek ntumu-mfieek obosa nkeek kwun̄ irọ.—Ebi Rom 14:12.
Ge ntumu-mfieek kwun̄ tap me ikpa.
4. Ebi Ata-Ikọ Jioba ekiweek igwagwa onwọnwọn ichit
Ifet isusun̄ ikan Awaji ofolek eje mè ikakaan̄ igwagwa onwọnwọn ichit eyi kpebesa eje irọ mkpọ. Fit FIDIO yi.
Fuk Taitọs 3:2, mè igbaan̄ ikpa idodo yi:
Keke orọ ikupbe ufiak ibe eji ekejeen̄ ulibi mè ekup dii esikigọọk ebi ofia ebeke ikpa usem?
Ebi eyi Karais kpebebọkọ |
Ebi eyi Karais ge ge metumu ifieek |
|---|---|
A. Blood plasma |
Asabọn asabọn inu onan̄a me lek plasma |
B. White cells |
Asabọn asabọn inu onan̄a me lek white cells |
C. Platelets |
Asabọn asabọn inu onan̄a me lek platelets |
D. Red cells |
Asabọn asabọn inu onan̄a me lek red cells |
5. Mgbọ ebesa asabọn asabọn inu onan̄a me lek eje irọ mkpọ
Eje ikaan̄ esese irek ini—red cells, white cells, platelets, mè plasma. Inu chi ikaan̄ okpọkọ okpọkọ inu, echi ekigwen asabọn asabọn inu onan̄a me lek eje.c Ekisa usini asabọn asabọn inu chi igbaalek irọ ugwun̄ echi okitap ubọk igwa orukan̄ mè iyaka ire itap ubọk irọ mè eje ikayaka ikisibi ene me lek.
Ofolek asabọn asabọn inu onan̄a me lek eje, ebi eyi Karais ge ge merọ ntumu-mfieek igọọk me lek nkeek kiban̄ esabe Baibul ikpukpo ijaan̄. Usini ene mekọt itumu ifieek ijijit igwagwa geelek eyi asabọn asabọn inu onan̄a me lek eje okupbe me emen mè iyaka ire eyi oweek ibe esa eje kiban̄ erọ mkpọ. Ebi ofifi ife mekọt imun̄ ibe ke nkeek kiban̄ ichieek ibe ema ebọkọ inu chi etap.
Osikirọ ntumu-mfieek kwun̄, keek mkpọ ofolek idodo yi:
Ike owa ke mbasa itumu inyi ogwu ofia ebeke inu orọrọ njitbe mè iyaka ire ibọkọ itap usini asabọn asabọn inu onan̄a me lek eje?
IRE ENE IDO IBE: “Keke olọ me lek ibọbọkọ eje?
Keke ore nkeek kwun̄?
ME MGBIDIM
Jioba iweek ibe eji ejit isasa eje irọ mkpọ me oniin̄ ikagbege.
Idodo
Keke orọ Jioba okimun̄ eje kubọk inu okup me mbuban?
Ike owa ke eji esa iriọọn̄ ibe ke ikan Awaji obe ekarie eje igọbọ ibọbọkọ eje itap me akpalek kiji?
Ike owa ke obosa irọ ata ntumu-mfieek ofolek isasa eje irọ mkpọ me mgbọ okibọkọ igwagwa?
WEEK
Keke ke obokeek sabum onorọ ntumu-mfieek ofolek igwagwa echi oweweek ibe esa eje kwun̄ erọ mkpọ?
Keke ke obokeek mgbọ okitumu ifieek mè ire omobọkọ itap asabọn asabọn inu onan̄a me lek eje?
Keke orọ inyi ogwu ofia ebeke ge ichieek ibe ke inu Jioba otumube ofolek eje itat?
Kween̄ ubọk ebi ugane ntitiin̄ ikisi ikwaan̄ me Hospital Liaison Committee ekisa itap ubọk inyi bọn ute irieen̄ mè ibaan̄.
a Kpọ Inu Nkween̄ 35, “Ubọk Obosa Ikirọ Ata Ntumu-Mfieek.”
b Kpọ agba eyi 5 obe “Mgbọ Ebesa Asabọn Asabọn Inu Onan̄a Me Lek Eje Irọ Mkpọ,” mè Inu Egebe Me Agan̄ Ota 3, “Ubọk Igwa Ene Oboweek Ibe Esa Eje Erọ Mkpọ.”
c Usini ebi ofia ebeke ekimun̄ esese irek eje ini kubọk asabọn asabọn inu onan̄a me lek eje. Eya orọ, igbe ibe oriọọn̄ ubọk okpa onyi ogwu ofia ebeke kwun̄ ntumu-mfieek kwun̄ ibe ke okpobobọkọ otutuuk eje mè esese irek ini kan̄, orere, red cells, white cells, platelets, mè plasma.