Ike Owa Ke Ebi Eyi Karais Ebemun̄ Miin̄ Okisa Ene?

Me otutuuk linyọn̄ yi, ebi ene mikaan̄ esese esese nkeek ofolek miin̄ okisa ene. Usini ene ekinwọọn̄ igọgọọk ebi unene kiban̄ inwọ miin̄ okisa ene usini mgbọ. Usini ene migobo ibe ke ema kpenwọ miin̄ okisa ene. Ire, usini ene ekinwọnwọ mege osa ema. Keke ke Baibul otumu ofolek miin̄ okisa ene?

1. Ire ilọ inwonwọ miin̄ okisa ene ni?

Baibul ikatumu ibe ke ilọ inwọnwọ miin̄ okisa ene. Kpan̄asi ikeya, me mgbọ ikitumu usini ata mkpọ Awaji onyibe eji, Baibul itap “miin̄ isasa irọ ejit ene ikibele” igbaalek. (Okwa Itọn̄ 104:14, 15) Usini ebirieen̄ mè ebibaan̄ igbegbe utoon̄-ejit me Baibul minwọ miin̄ okisa ene.—Timọti Eyi Adasi 5:23.

2. Kpasi nteme ke Baibul onyi ebi igogobo inwọnwọ miin̄?

Jioba icha inwọnwọ uga miin̄ mè inwọnwọ miin̄ isa. (Ebi Galesia 5:21) Usem kan̄ ibe: “Kakigbaan̄ ije melek ebi uga miin̄.” (Urọk 23:20) Eya orọ, ire eji igobo inwọnwọ miin̄—ikerere me mgbọ eji gaalek ekupbe—eji ekanwọ ire lek eji kpeyaka ikọt ikikeek mkpọ ijaan̄, ikaan̄ ntọ-ikọ inyi inu eji ekitumu mè ikirọ, mè iyaka ire ikaan̄ unye akpalek. Ire eji kpebekọt ikitọ ikọ inyi ubọk eji ekinwọ miin̄, igbe ibe eji ejit ikekinwọ miin̄.

3. Ike owa ke eji ebesa ikijeen̄ ulibi me lek ntumu-mfieek ebi ofifi ife ofolek miin̄ okisa ene?

Ogwu ikup motumu ifieek mè ire ọmọ monwọ miin̄ sa ire ọmọ ikponwọ. Eji ekatumu ikeme ogwu ogogobo inwọnwọ miin̄ okem okem, eji si ekabieen̄ ogwu obe ke ọmọ ikpobonwọ ibe inwọ. (Ebi Rom 14:10) Eji mekọt igobo ibe ke eji kpebenwọ miin̄ mè ire miin̄ eji ekinwọ ikisa ufialek ijet ebi ofifi ife. (Fuk Ebi Rom 14:21.) Eji kpebeweek ikekirọ “inu obotap ubọk inyi lek [kiji] gaalek. Ire, [eji ekerọ] inu òbokitap ubọk inyi ebi ofifi ife si.”—Fuk Ebi Kọrint Eyi Adasi 10:23, 24.

KWEEN̄ GBAALEK

4. Tumu fieek mè ire omonwọ miin̄

Ike owa ke Jisọs okimun̄ miin̄ okisa ene? Inyi omun̄ ufọọk-otu, kpọ-nu adasi inu ukechieen̄ irọbe. Fuk Jọn 2:1-11, mè igbaan̄ ikpa idodo chi:

• Inan̄a me lek inu ukechieen̄ yi, keke ke eji ebekọt ikween̄ ofolek ubọk Jisọs okimun̄ miin̄ okisa ene mè ebi ikinwọ?

• Eyi Jisọs ikabe ekanwọ miin̄ okisa ene, ike owa ke ebi eyi Karais ebekimun̄ ebi igogobo ikekinwọ?

Ire, mije ibe ke ogwu eyi Karais mokọt inwọ miin̄ okisa ene, ikasibi ibe ke itat ibe ikinwọ me irek geelek. Fuk Urọk 22:3, mè kpọ ubọk usini inu chi obokaan̄ mgbaan̄ me lek owu inwọnwọ miin̄:

• Okikọp uji mè iyaka ire, okisa okukwut isi ikwaan̄.

• Owot me lek kwun̄.

• Ogwu ofia ebeke itumu ibe okayaka inwọ miin̄ okisa ene.

• Okakikọt itet lek ikaan̄ inwọnwọ miin̄.

• Ikan ikanyi owu unye ibe okonwọ miin̄.

• Okup melek ogwu otutumu ifieek ibe ke ikpoboyaka inwọ miin̄ mije ikaan̄be ufialek inwọnwọ miin̄ isa me mgbọ oraraka.

Ire omoche miin̄ okisa ene me ijọk ido-nwa mè iyaka ire ofifi ijọk ni? Inyi omun̄ inu obotap ubọk inyi owu orọ ntumu-mfieek, fit FIDIO yi.

FIDIO: Ire Mache Miin̄ Okisa Ene Ni? (2:41)

Fuk Ebi Rom 13:13 mè Ebi Kọrint Eyi Adasi 10:31, 32. Osifuk ere chi ge ge isan̄a, igbaan̄ ikpa idodo yi:

• Ike owa ke isasa onineen̄ yi ikirọ mkpọ obotap ubọk inyi owu orọ ntumu-mfieek obobele Jioba ejit ni?

5. Tumu fieek otu ifuk miin̄ obonwọ

Ire ogobo inwonwọ miin̄ okisa ene, riọọn̄ eyi: Ubọk geelek ibe ke Jioba ikabe mè eji ekanwọ miin̄ okisa ene, ikabọkọ inwọnwọ uga miin̄ itap. Bak me lek keke ni? Fuk Osia 4:11, 18, mè igbaan̄ ikpa idodo yi:

• Keke obokọt irọ mè ire ene ikinwọ uga miin̄?

Keke obokọt itap ubọk inyi eji ekejit inwọnwọ uga miin̄? Ikup ufiak ibe eji eriọọn̄ ere unye kiji oyakabe. Fuk Urọk 11:2, mè igbaan̄ ikpa idodo yi:

• Keke orọ igbebe ibe otap okwukwek me lek otu ifuk miin̄ okinwọ?

6. Tim gak inwọnwọ miin̄ isa

FIDIO: ‘Ubọk Nkiluk Ugwem N̄a Ita Emi Efuuk Me Owot’ (6:32)

• Me emen fidio yi, ike owa ke miin̄ osa ikaan̄ mgbaan̄ me lek ubọk Dmitry okisa irọ mkpọ?

• Ire ikọt itim igak inwọnwọ miin̄ isa mgbọ yaage ni?

• Ike owa ke isa itim igak ijo eru inwọnwọ miin̄ isa yi ni?

Fuk Ebi Kọrint Eyi Adasi 6:10, 11, mè igbaan̄ ikpa idodo chi:

• Ike owa ke inwọnwọ miin̄ isa osa isak ire?

• Keke okijeen̄ ibe ke ogwu okinwọ miin̄ isa mokọt inwene?

Fuk Matiyu 5:30, mè igbaan̄ ikpa idodo yi:

• Ifefieek ubọk ene isan̄a ikijeen̄ ibe ke ene morọ usini unwene isasa irọ ibe Jioba ibele ejit. Keke ke obokọt irọ ire okirurumun̄ me lek inwọnwọ miin̄ isa ni?a

Fuk Ebi Kọrint Eyi Adasi 15:33, mè igbaan̄ ikpa idodo yi:

• Kpasi mgbaan̄ ke ebi unene kwun̄ ebekaan̄ me lek otu ifuk miin̄ okinwọ?

ME MGBIDIM

Jioba inyi miin̄ ibe esa enwọọn̄ lek, ire, icha inwọnwọ uga miin̄ mè inwọnwọ miin̄ isa.

Idodo

• Keke ke Baibul otumu ofolek miin̄ okisa ene?

• Kpasi unan okinan̄a me lek inwọnwọ uga miin̄?

• Ike owa ke eji ebesa ijeen̄ ulibi me lek ntumu-mfieek ebi ofifi ife ofolek inwọnwọ miin̄?

WEEK

Ike owa ke ebi ijija ebekọt irọ ata ntumu-mfieek ofolek miin̄ okisa ene?

Kakpọkpọ Ikikeek Miin̄ Gaalek (2:31)

Kween̄ usini mkpọ obokọt irọ isasa itim igak ufialek inwọnwọ uga miin̄.

“Keeping Alcohol in Its Place” (The Watchtower, January 1, 2010)

Ire igbe ibe ogwu eyi Karais igọọk isa ekpen̄ miin̄ kan̄ igbaan̄ ichọk me lek eyi ebi ofifi ene me mgbọ ekinwọ miin̄ ni?

“Questions From Readers” (The Watchtower, February 15, 2007)

Me ukpatu obe: “I Was a Bottomless Barrel,” fuk ubọk ogwu enerieen̄ ge osabe itim igak inwọnwọ uga miin̄.

“The Bible Changes Lives” (The Watchtower, May 1, 2012)