Keke Ke Baibul Otumu Ofolek Ilaak?

Owuwa ene kpekima itutumu mkpọ ofolek ilaak. Ire, mgbọ geelek Baibul okikpa mkpọ ofolek ilaak, ikikpakpa ikpọk mbum me oniin̄ okijeen̄ ulibi. Inu ikpabe morọ eji oruru. Igbe ibe ikup ikeya mije, ire Jioba orom eji. Iriọọn̄ inu onwọnwọn ichit inyi eji. Ijeen̄ eji inu eji ebekirọ inyi ọmọ ikibele ejit mè inu obotap ubọk inyi eji ekọt enwọọn̄ ugwem ere mgbọ geelek.

1. Ike owa ke Jioba okimun̄ ilaak?

Ilaak ire uche onan̄a me ubọk Jioba. Iweek ibe enerieen̄ mè enenwaan̄ ibabat enwọọn̄ uche yi. Ikare gaalek ikakaan̄ nsabọn ke uche yi okup inyi, ire, ikinyi olom mè nwa irek isasa ijeen̄ ima me lek ge ge me oniin̄ onwọnwọn. Eya orọ Usem Awaji obe: “Bele ejit me lek nwa mgbọ nsabọn̄ irieen̄ kwun̄.” (Urọk 5:18, 19) Jioba iweek ibe ebi eyi Karais ibabat ekegbe utoon̄-ejit enyi ge ge inyi ema ekarọ ugan-nwa.—Fuk Ebi Iburu 13:4.

2. Keke ore barabat?

Baibul itumu inyi eji ibe ke “ebi barabat . . . kpebekaan̄ uche me mkpulu eyi Awaji.” (Ebi Kọrint Eyi Adasi 6:9, 10) Ebi igege Baibul agan̄ usem Giris, esa usem por·neiʹa isa ikpa inu barabat orebe. Usem yi igọbọ (1) ilaak okibọkọa irek me etete enerieen̄ mè enenwaan̄ ebi kpebat lek kiban̄, (2) ilaak okibọkọ irek me etete enerieen̄ mè enerieen̄ mè iyaka ire enenwaan̄ mè enenwaan̄, mè (3) igọgọọk anam ilaak. Eji ekirọ ibe Jioba ibele ejit mè ikirọ lek kiji oruru si mgbọ geelek eji ‘esan̄abe lek isan̄a me lek ugwem barabat.’—Ebi Teselonaika Eyi Adasi 4:3.

KWEEN̄ GBAALEK

3. Libi nan̄a me lek ugwem barabat

Ogwu enerieen̄ ge ogbegbe utoon̄-ejit ekigwen Josefu ijit ogwu enenwaan̄ ge okiweek ibe igọọk ọmọ ilaak. Fuk Ibebene 39:1-12, mè igbaan̄ ikpa idodo chi:

• Keke obieen̄ Josefu ibe ilibi?—Kpọ agba eyi 9.

• Me nkeek kwun̄, ire inu Josefu orọbe itat ni? Keke orọ ofọọkbe ikeya?

FIDIO: Ìlibi Ìnan̄a Me Lek Ugwem Barabat (5:06)

Jioba iweek ibe otutuuk kiji ejit ugwem barabat. Fuk Ebi Kọrint Eyi Adasi 6:18, mè igbaan̄ ikpa idodo chi:

• Kpasi irek obokọt irọ ibe ene irọ barabat?

• Ike owa ke obokọt ilibi inan̄a me lek barabat?

4. Omokọt ijit ntọ-mkpọ

FIDIO: Kitim Keme Ntọ-Mkpọ Sa Me Ikekifuk Baibul (3:02)

• Me mgbọ gwun̄ ute ya me fidio yi omun̄be ibe ke ekiket mè irọrọ kan̄ mokọt irọ ibe ọmọ ikayaka igbe utoon̄-ejit inyi nwa kan̄, keke ke irọ?

Usini mgbọ, ikerere ebi eyi Karais ikigbe utoon̄-ejit ekekirurumun̄ me lek ijo nkeek. Ike owa ke obosa ijit ikekikeek inu ikatanage? Fuk Ebi Filipai 4:8, mè igbaan̄ ikpa idodo chi:

• Keke ke eji ebekikeek mkpọ ofolek?

• Ike owa ke ikekifuk Baibul mè ikekitap lek ojot ojot me ikwaan̄ Jioba obosa itap ubọk inyi eji ekejit ntọ-mkpọ irọrọ ijo inu?

5. Onineen̄ Jioba ikisibi oruru inyi eji

FIDIO: Ikakaan̄ge Nden̄ (9:31)

• Ike owa ke ogwu nsabọn irieen̄ ya osa ije inin̄ emen ntọ-mkpọ?—Kpọ Urọk 7:8, 9.

• Igọọk me lek inu okup me ikpa Urọk 7:23, 26, ugwem barabat mokọt isa uga ufialek inu. Ire eji ikup me utana me eru, kpasi ufialek ke eji kpenin̄ emen?

• Ike owa ke ikukup me utana me eru obosa itap ubọk inyi eji enwọọn̄ ugwem ere mgbọ geelek?

Usini ene ekikeek ibe ke inu Baibul otumube ofolek ebirieen̄ mè ebirieen̄ mè ebibaan̄ mè ebibaan̄ ilalaak ikajeen̄ ima. Ire, Jioba, Awaji ima, iweek ibe otutuuk ene enwọọn̄ ugwem ere mgbọ geelek. Inyi eji egọọk eluk ugwem yi, eji kpelọlọ iluluk igọọk onineen̄ Awaji. Fuk Ebi Kọrint Eyi Adasi 6:9-11, mè igbaan̄ ikpa idodo yi:

• Me chieen̄ Awaji, ire ulọk ilaak ebirieen̄ mè ebirieen̄ mè ebibaan̄ mè ebibaan̄ gaalek ore inu ikatatge ni?

Inyi Awaji ibele ejit me lek kiji, igbe ibe otutuuk kiji erọ unwene. Ire oruru omaan̄ me lek itatap efuuk irọ unwene chi ni? Fuk Okwa Itọn̄ 19:8, 11, mè igbaan̄ ikpa idodo chi:

• Me nkeek kwun̄, ire onineen̄ Jioba ofolek ilaak ijeen̄ iriọọn̄-inu ni? Keke orọ ofọọkbe ikeya?

ME MGBIDIM

Ilaak ire uche Jioba onyibe olom mè nwa ibe ekenwọọn̄.

Idodo

• Keke ke ugwem barabat ogọbọ?

• Keke obotap ubọk inyi eji ejit ugwem barabat?

• Kpasi oruru ke eji ebekaan̄ ire eji iluk ugwem igọọk onineen̄ Jioba ofolek ilaak?

WEEK

Kween̄ inu orọrọ Awaji oweekbe ibe enerieen̄ mè enenwaan̄ edasi ebat sabum enegbaan̄ eluk.

“What Does the Bible Say About Living Together Without Marriage?” (Web article)

Kween̄ inu orọrọ mkpọ Baibul okijeen̄ ofolek enerieen̄ mè enerieen̄ mè iyaka ire enenwaan̄ mè enenwaan̄ ilalaak ikasibi ibe ke ebechacha ebi ikirọ ikeya.

“Is Homosexuality Wrong?” (Web article)

Kween̄ ubọk ikan Awaji ofolek ilaak okisa ibem eji.

“Is Oral Sex Really Sex?” (Web article)

Me ibot usem obe “They Treated Me With Dignity,” fuk mkpọ obebieen̄ ogwu enerieen̄ owuuk lek ikilaak ebirieen̄ ogbo kan̄ ibe inwene ugwem kan̄ mè irọ ibe Awaji ikibele ejit.

“The Bible Changes Lives” (The Watchtower, April 1, 2011)