Kweek Nye Kitaba Lek Riaak Me Lek Jioba

Me otutuuk nkween̄mkpọ Baibul yi, owu okween̄ owuwa mkpọ ofolek Jioba. Mkpọ chi okween̄be irọ inyi oma ọmọ ire lek usini mgbọ ora isa lek kwun̄ inyi ọmọ mè ikaan̄ ntap-me-mun̄. Ire okarọrọ ikeya, mokọt ire ibe ke ora ikikeek irọrọ ikeya sọnja mgbọ. Ire, nje-nnyi-isi kwun̄ ikayaka me lek ikakaan̄ ntap-me-mun̄. Owu mokọt ikup inye ikitaba lek iriaak me lek Jioba ire mgbọ geelek. Ike owa ni?

1. Keke orọ obokup inye ikirọ ibe mgbaan̄je kwun̄ melek Jioba ikinye?

Eji mekup inye ikirọ ibe mgbaan̄je kiji melek Jioba ikinye. Bak me lek keke ni? “Inyi inu geege ikaben eji ìnan̄a me lek atikọ” kan̄. (Ebi Iburu 2:1) Keke obotap ubọk inyi eji ekup enye eketọbọ ebum enyi Jioba ni? Eji mekọt ikup inye me lek ikwaan̄ ilolook ata etip mè ikiweek ofifi ofifi oniin̄ eji ebesa ikisi ikwaan̄ inyi Awaji me ojot ojot. (Fuk Ebi Filipai 3:16.) Ikekitọbọ ebum inyi Jioba onwọn ichit!—Okwa Itọn̄ 84:10.

2. Keke si ke obokup inye ikirọ?

Ikerere ibe ke nkween̄mkpọ Baibul yi monita, ugwem kwun̄ kubọk ogwu eyi Karais ibokijeje inyi isi. Baibul ibe ke igbe ibe eji etap “ayaya akpalek.” (Ebi Efesọs 4:23, 24) Ike okupbe inye ikikween̄ Usem Awaji mè ikisi nkween̄mkpọ ntitiin̄, owu mokween̄ ayaya mkpọ ofolek Jioba melek esese esese eru ikaan̄be. Kiweek ubọk obosa ikigọọk akpat ukot kan̄ ijaan̄ me ugwem kwun̄. Kweek nye kirọ unwene geelek okukup ufiak ibe owu orọ inyi Jioba ikibele ejit.

3. Ike owa ke Jioba obosa itap ubọk inyi owu okaan̄ nje-nnyi-isi?

Baibul ibe: “Awaji me lek kan̄ . . . môkpọk enyi inama, mè ibene enyi igwuun̄, mè inyi enyi unye-lek, mè irọ inyi enyi ekeke enye.” (Pita Eyi Adasi 5:10) Otutuuk kiji mikichichini ntọ-mkpọ. Ire, Jioba ikinyi eji inu eji eweekbe isasa ikijit ntọ-mkpọ cha. (Okwa Itọn̄ 139:23, 24) Ichieek use ibe ke ọmọ monyi owu ulọk mè unye isasa ikup inye ikitọbọ ebum inyi ọmọ.—Fuk Ebi Filipai 2:13.

KWEEN̄ GBAALEK

4. Kweek nye kigọọk Ogwu Unene kwun̄ onwọnwọn ichit kpa usem

Uriaak mè ikwekween̄ Baibul otap ubọk inyi owu okana ogwu unene Jioba. Ike owa ke inu chi obosa itap ubọk inyi owu okup onye okotaba lek oriaak me lek Jioba?

Fuk Okwa Itọn̄ 62:8, mè igbaan̄ ikpa idodo yi:

• Inyi mgbaan̄je kwun̄ melek Jioba inye, keke ke oboma inwenwene ofolek ubọk okisa iriaak uriaak mè inu okibeek?

Fuk Okwa Itọn̄ 1:2, mè igbaan̄ ikpa idodo yi:

• Inyi mgbaan̄je kwun̄ melek Jioba inye, keke ke oboma irọrọ inyi okokaan̄ oruru onan̄a me lek nkween̄mkpọ Baibul kwun̄?

Ike owa ke obosa ikirọ inyi nkween̄mkpọ Baibul kwun̄ ikikaan̄ oruru? Inyi omun̄ usini mkpọ oborọ, fit FIDIO yi, mè igbaan̄ ikpa idodo chi ogọgọọk.

FIDIO: Rọ Inyi Nkween̄mkpọ Baibul Kwun̄ Ikinwọn (5:22)

• Kpasi nteme me fidio yi ke oboma itatap me ikwaan̄?

• Kpasi ibot usem ke oboma ikwekween̄?

5. To inu emen ekwukwu me isi

Ikakaan̄ inu otobe me isi irọrọ me ikwaan̄ Jioba motap ubọk inyi owu okotaba lek oriaak me lek Jioba. Fit FIDIO yi, mè igbaan̄ ikpa idodo yi ogọgọọk.

FIDIO: Ugwem Onwọnwọn Ichit (3:31)

• Me emen fidio ya, ike owa ke Cameron osa ikaan̄ oruru inan̄a me lek itoto inu emen ekwukwu me isi?

Ikare otutuuk ene ebekọt isi ilook ata etip me ofifi ido. Ire, eji mekọt ito mkpọ eji ebekọt irọ itet me isi. Fuk Urọk 21:5, mè kpọ inu obokọt ito me isi . . .

• me emen ntitiin̄.

• me ikwaan̄ uko.

Ike owa ke onineen̄ okup me ere Baibul yi obosa itap ubọk inyi owu okọt orọ inu otobe me isi otet?

Inu echi obokọt ito me isi

• Irọrọ inyi uriaak kwun̄ ikinwọn.

• Ifufuk otutuuk Baibul.

• Irọriọọn̄ otutuuk ene me emen ntitiin̄ kwun̄.

• Ibebene mè ikisun̄ nkween̄mkpọ Baibul.

• Ikekigbọ oniin̄ eyi ojot mgbọ mè iyaka ire eyi mgbidim mgbọ.

• Ire owu ire gwun̄ ute enerieen̄, sa inyi okana ge me lek ebi ikitap ubọk inyi ebi ugane ntitiin̄.

ME MGBIDIM

Kweek nye kitaba lek riaak me lek Jioba mè kito inu emen ekwukwu me isi. Osirọ ikeya, omokọt inwọọn̄ ugwem ire mgbọ geelek!

Idodo

• Keke orọ obokaan̄ unye-ejit ibe ke Jioba motap ubọk inyi owu okup onye okotọbọ ebum onyi ọmọ?

• Ike owa ke obosa irọ ibe mgbaan̄je kwun̄ melek Jioba inye?

• Ike owa ke itoto mkpọ emen ekwukwu me isi obosa itap ubọk inyi owu okotaba lek oriaak me lek Jioba?

WEEK

Eyi owa ke Jioba omọnọ ibene, ntọbọ-ebum osibi esese ene erọbe mgbọ ge, sa ire igbegbe utoon̄-ejit inyi ọmọ me otutuuk ugwem ene?

Kigbe Utoon̄-Ejit Kubọk Ebereyam (9:20)

Ikerere ebi usun̄ Jioba ikigbe utoon̄-ejit mekọt ichep unwọọn̄ kiban̄. Kpọ ubọk obokọt iyaka ikaan̄.

Yaka Kaan̄ Unwọọn̄ Inan̄a Me Lek Ikwekween̄ Mkpọ mè Igwugwu Nkeek Ikom (5:25)

Ike owa ke obosa ito mkpọ emen ekwukwu me isi mè irọ itet?

“Use Spiritual Goals to Glorify Your Creator” (The Watchtower, July 15, 2004)

Keke orọ ikupbe ufiak ibe eji ere ebi eyi Karais imimin inin̄ ene, ike owa ke obosa ikọt irọ ikeya?

“Press On to Maturity—‘The Great Day of Jehovah Is Near’” (The Watchtower, May 15, 2009)