Ubọk Uwu Uriaak Ataak Okisa Ifiat Erieen̄ Awaji

Ire Awaji ire ima, keke orọ ebi uwu uriaak ekibe ke ema michieek me lek kan̄ ekirọ owuwa ijo inu? Atikọ ire, uwu uriaak chi ire ataak uwu uriaak, ema ekirọ me ebi ene eda lek ebọkọ me lek Awaji. Kpa ubọk ke ema ekirọ eyi? Inu yi ema ekirọ ikikukup Awaji me lek? Awaji iborọ keke ofolek ataak uwu uriaak?

1. Kpa ubọk ke uwu uriaak ataak okisa ifiat erieen̄ Awaji inan̄a me lek ijejeen̄ kiban̄?

Ebi uwu uriaak ataak “mîjit atikọ eyi Awaji, mè iyaka inikichieek ikọ ataak.” (Ebi Rom 1:25) Kubọk inu njeen̄, owuwa uwu uriaak kpekijeen̄ ebi eyi kiban̄ erieen̄ Awaji. Ire, Baibul ijeen̄ ibe ke igbe ibe eji ekesa erieen̄ Awaji erọ mkpọ. (Ebi Rom 10:13, 14) Ijo inu isirọ, usini ebi ibot uwu uriaak ekibe ke ire nkeek Awaji. Ire, eya ire ataak. Ijo inu ikakinan̄a me ubọk Awaji. (Fuk Jemis 1:13.) Ire mkpọ nsan ibe ke ataak ijejeen̄ ebi uwu uriaak chi ida ebi ene ibọkọ me lek Awaji.

2. Kpa ubọk ke uwu uriaak ataak okisa ifiat erieen̄ Awaji inan̄a me lek irọrọ kiban̄?

Ebi uwu uriaak ataak kpekirọ eru me lek ebi ene ubọk Jioba oweekbe. Baibul ibe ke “ijo kan̄ [orere, uwu uriaak ataak] îwa enenen, mè itoon̄ ibene mege isi ire emen inyọn̄.” (Ichichili 18:5) Me owuwa acha, ebi uwu uriaak mikitap lek me lek rumurumun̄ mkpulu, ikibieen̄ akọn̄ inye, mè ikirọ ibe akọn̄ ikup mè iyaka ire ibieen̄ inye ibe ekpan̄ owuwa ebi ene. Usini ebi ibot uwu uriaak ekiluk ubene ubene ugwem mè ikitet ubọk ebi kiban̄ iyaka ibọkọ ikpoko. Inu chi ema ekebirọ ikijeen̄ ibe ke ema kperiọọn̄ Awaji, eya orọ, ema kpekaan̄ unen irere ebi eyi kan̄.—Fuk Jọn Eyi Adasi 4:8.

3. Ike owa ke Awaji okimun̄ uwu uriaak ataak??

Ire inu ebi uwu uriaak ataak ekirọ ikinaan̄ owu ejit, ike owa ke okeek ibe ke mokup me lek Jioba ni? Awaji ima ebilene, ire, ikinaan̄ ejit inyi ebi ibot uwu uriaak ikifiat erieen̄ kan̄ mè ikirọ ebi kiban̄ nnaan̄. Awaji ichieek use ibe ke ọmọ mofiat uwu uriaak ataak, ke “kpebeyaka ikpọk imun̄ ọmọ ofifi.” (Ichichili 18:21) Sọnja mgbọ me isi, Awaji mofiat otutuuk uwu uriaak ataak isan̄a kpai.—Ichichili 18:8.

KWEEN̄ GBAALEK

4. Ikare otutuuk uwu uriaak ke Awaji okibọkọ itap

Owuwa ene ekikeek ibe ke uwu uriaak ikup kubọk esese esese oniin̄ okisa ene isi lek Awaji. Eya ire atikọ ni? Fuk Matiyu 7:13, 14, mè igbaan̄ ikpa idodo yi:

• Keke ke Baibul okpa ofolek oniin̄ okisa ene ifo lek ugwem?

Fit FIDIO yi, mè igbaan̄ ikpa idodo ogọgọọk.

FIDIO: Ire Awaji Ibọkọ Otutuuk Uwu Uriaak Itap Ni?—Okpọkọ Me Lek (3:22)

• Ire Baibul ijeen̄ ibe ke Awaji ikibọkọ owuwa uwu uriaak itap ni?

5. Ebi uwu uriaak ataak kpekijeen̄ mbet lek ima Awaji okaan̄be

Owuwa uwu uriaak mifiat erieen̄ Awaji me esese esese oniin̄. Oniin̄ ge osasak ema ekirọ eyi ire sa me itatap lek me lek akọn̄. Inyi omun̄ ge me lek ubọk ema esabe ikirọ eyi, fit FIDIO yi. Mè igbaan̄ ikpa idodo chi ogọgọọk.

FIDIO: Inu Ebi Church Erọbe me Mgbọ Etimbe Òso Akọn̄ Iba Me Otutuuk Linyọn̄ (2:22)

• Keke ke owuwa church erọ me mgbọ etimbe Òso Akọn̄ Iba Me Otutuuk Linyọn̄?

• Ike owa ke inu yi ema erọbe okup owu me lek?

Fuk Jọn 13:34, 35 mè 17:16. Mè igbaan̄ ikpa idodo chi:

• Me nkeek kwun̄, ike owa ke ikikup me lek ­Jioba ire ebi uwu uriaak itap lek me lek akọn̄?

• Uwu uriaak ataak irọ owuwa ijo inu. Ike owa ke osa imun̄ ibe ke ebi uwu uriaak kpekijeen̄ mbet lek ima Awaji okaan̄be?

6. Awaji iweek inyanyan̄a ebi ene isibi me emen uwu uriaak ataak

Fuk Ichichili 18:4,a mè igbaan̄ ikpa idodo yi:

• Ike owa ke ikup me lek kwun̄ irọriọọn̄ ibe ke Awaji iweek itatap ubọk inyi ebi uwu uriaak ataak ofiaan̄be?

7. Kweek nye kikween̄ mkpọ ofolek ata Awaji

Ire omotele ibe inu ebi uwu uriaak ataak ekirọ igban owu me ikwekween̄ mkpọ osilek Awaji ni? Keek-nu gwun̄ ge, ogwu ojijit ata nteme ogwu ute onyibe ọmọ. Ikpulu mkpọ isibi me uwu mè ibene ikiluk ijo ugwem. Ogwu ute ikabọkọ ijo ugwem kan̄ itap. Ire monwọn ibe efieek ute ya ikọ me lek ugwem gwun̄ mkpaka-ibot ya okiluk ni?

• Ire mogbe ibe ofieek Jioba ikọ mè otele ikwe­kween̄ mkpọ ofolek kan̄ bak lek irọrọ ebi uwu uriaak ataak ni?

ME MGBIDIM

Uwu uriaak ataak ifiat erieen̄ Awaji inan̄a me lek ataak ijejeen̄ mè ijo irọrọ kiban̄. Awaji mofiat uwu uriaak ataak isan̄a kpai.

Idodo

• Ike owa ke ijejeen̄ uwu uriaak ataak mè irọrọ kiban̄ okup owu me lek?

• Ike owa ke Jioba okimun̄ uwu uriaak ataak?

• Keke ke Awaji oborọ uwu uriaak ataak?

WEEK

Kween̄ oniin̄ iba echi owuwa uwu uriaak ekisa irọ inyi Awaji inaan̄ ejit.

“Are All Religions the Same? Do They All Lead to God?” (Web article)

Keke orọ Jioba oweekbe ibe eji ekegbaan̄ etitiin̄ etọbọ ebum enyi ọmọ?

“Is It Necessary to Belong to an Organized Religion?” (Web article)

A priest was Ogwu ibot uwu uriaak ge ikaan̄ sasaak ofolek uwu uriaak kan̄. Ire, eya ikagban ọmọ ibe ika­kween̄ atikọ ofolek Awaji.

“Why a Priest Left His Church” (Awake!, February 2015)

Me owuwa acha, ebi uwu uriaak mikijeen̄ ijejeen̄ ataak echi okirọ inyi ebi ene ekekeek ibe ke Awaji ikama eji, ke ọmo ire ogwu mkpikpak si. Kween̄ atikọ ita ofolek ijejeen̄ ataak cha.

“Lies That Make God Seem Unlovable” (The Watchtower, November 1, 2013)