Mateo

7 Gwamʉ sisawa meʼzanʉngeʼri, akimʉ í gwamʉ sisuʼ nánʉkwa. Ikʉ Niwipáw sí aʼzanuʼ neykari gaʼkʉnamʉ aya imʉ iwʉndi, nʉgaʼnoʼkwa auʼ nʉnno aʼzʉna ni. 9 «Míwiri, Niwipáw eyméy key amaseykwa: “Niwikakʉ kuʼnawakʉ zanʉn, nʉzaʼkinuga bunsi kʉkusa ú. 10 Reʼgukʉngwasi Nʉchusana naka ú. Meʼzʉna neyka kuʼnawa awiri kaʼseʼ ʉnchunha ú. 11 Iwa ɉwia zʉʼn pan niweʼkawa ú; 12 ɉʉmi meʼwesamʉ niwikawari gwamʉ niwikʉreʼsákʉchʉ ú, ɉʉmi niweʼwesamʉ kawari gwamʉ kʉreʼsagwi ukumanameʼ. 13 Ey awiri du naʼnuʼ naseʼ awanʉn niwigwaʼsuʼ nʉn awiri du arunhʉn neyka azi niwín auʼ nanʉngwasi niwinkwa ú”. 14 Ey ʉweʼri, iʼngeygwi kʉzánuga neyka gwamʉ kʉreʼsa ukumʉndi, Miwikakʉ kuʼnawa zanʉnseʼri miwikʉzánuga gwamʉ miwikʉreʼsagwi awʉngwa ni. 15 Ey ʉweʼki, aɉwa ɉina kuzanika ʉwa gwamʉ kʉreʼkumuʼ nanʉndi, Miwikakʉ miwikuzanika una neykari gwamʉ miwikʉreʼsuʼgwi nanʉngwa ni. 25 »Nʉʼn miwikeywari: inʉ ga niʼkwe, inʉ aʼga niʼkwe, inʉ ʉnkʉcho niʼkwe meʼzari puré meʼzanʉn nukuʼ nánʉkwa. Kwéy awkwa neykari zamʉ kwa mʉkʉ gwasi ingumʉ́n aʼzʉnari naʼnuʼ ki nó. 26 Kuʼnawakʉ sisío dirunʉya sékʉnʉn awʉnkeʼ, inʉ ʉnzarikuʼgwawa nariri aya ʉnkʉdowwa yuʼ neyka ni ey ʉweʼki Niwipáw kuʼnawa zanʉnseʼri zamʉ aʼkawa ʉwa ni. Ey ʉwaki, míwiri ingumʉ́n aʼzʉnari ananuʼ ki nó. 27 Ínʉri umʉngwi puré reʼkusámʉsin ingʉ mʉná nánʉkin kukwéy kʉnanʉnno. 28 Ey awi, iari inʉ ʉnkʉcho niʼkwe miweʼzari puré kaʼzano. Lirio yʉnke nuga kʉriwía awʉnkeʼ, nikuʼgwawa nariri du kawi rinhaɉʉnʉngwa aʼzanuʼ neyka ni; 29 Salomonri du kawi rinhaɉa awʉnʉngwa aʼzareʼki, eméygwi kawi du ʉnkʉkusa awkin dinhaɉuʼ nʉnna ni. 30 Niwipawri inʉ asigeʼ ʉnpuna awʉngwa kineki du kawi ɉa ʉwa gwʉn nʉndi, ey ʉwaki ikʉ ta miweʼzanuʼ neyka, miwi nʉ́nkʉri du kawi miwiɉuʼ kinanʉnno. 31 Ey ʉwameʼ “inʉ ga niʼkwe”, “inʉ aʼga niʼkwe” kwa “ʉnkʉcho niʼkwe” meʼzari puré meʼzanuʼ nʉnkwa. 32 Ikʉ Niwipáw kaʼmʉkanuʼ neykari, ema ɉuna puré aʼzari tʉga ni. Miwipáwseʼri ema ɉuna ey miwikʉɉunʉn nugin ey aʼzanʉn nuga naʼnʉnno. 33 Ey ʉwameʼ, Niwipawseʼ Reʼgukamʉ Kʉnʉna awiri nanʉyʉʼkin unisi ʉwari minsaʼgwi takʉn núkʉkwa, ey unigeʼri, yow inʉ iapanagwi awʉngwa ni. 34 Sigin zʉnʉkin puré meʼkusʉkwéy neyka chwizanika ʉwa nameʼ, sigeʼ azi nanʉnʉngwa nʉnniko meʼzari umʉngwi puré reʼkusuʼ nánʉkwa. Sigin zʉnʉkin buniʼgʉmʉ sʉmʉ kwʉya ni.