OSEAS
1 Oseas,* Beerí ñi fotüm, llohui Chau Jehová ñi dungun. Feichi mu Judá meu loncolerquei Uzías, Jotán, Acaz ca Ezequías. Israel mu loncolerquei Jeroboán, Joás ñi fotüm. 2 Chau Jehová, ñi hulal tañi dungun, eluhui ñi adnieafiel ta Oseas. Fei Chau Jehová feipifi ta Oseas: “Amunge, nieafimi quiñe domo pod cudumuhun mu conalu.* Fei eluaimu yall* ñi nieel caquelu pu huentru engün. Tati pu che tüfachi mapu meu pod mongen che reque feleingün, elcünufilu engün am ta Chau Jehová”.
3 Feimu Oseas femngechi femi. Niefi ta Gómer, Diblaim ñi ñahue. Quisu niepüñeñi, fei elueyu quiñe fotüm.
4 Feimu Chau Jehová feipifi: “Pichilehuechi antü mu juiciantucuafiñ Jehú ñi pu cüpanche, Jezreel tañi langümchen mu. Ca fentecünuafiñ Israel ñi ngüneniemequen. Feimu Jezreel* üituculelafimi tami fotüm. 5 Feichi antü huatrocayafiñ* Israel ñi arco Jezreel ñi laf mapu meu”.*
6 Gómer huiño niepüñeñi, fei choyüfi quiñe domo püñeñ. Chau Dios feipifi ta Oseas: “Huiño cutranpiuquehuelayafiñ Israel ñi pu cüpanche, doi mai huemünentuafiñ engün.* Feimu Lo-Ruhamá* üituculelafimi ti püñeñ. 7 Huelu cutranpiuqueyeafiñ Judá tañi pu cüpanche ca montulafiñ tañi Chau Dios Jehová ñi nehuen mu. Hueichan mu no,* pünelayafiñ arco, fütra cuchillo, cahuellu ca pu püracahuellulelu no rume”.
8 Gómer moyolhuenofilu ta Lo-Ruhamá, huiño niepüñeñi, choyüfi quiñe huentru püñeñ. 9 Fei Chau Dios feipi: “Eimün iñche tañi troquiñchengelaimün, ca iñche tamün Chau Dios ngelayan. Feimu Lo-Ammí* üituculelafimi ti püñeñ.
10 Pu Israel che alün-ngerpuaingün cuyüm reque inaltu lafquen mu raquifalngenolu. Cheu tamün feipingeel ‘Eimün iñche tañi pu che no’, feipingeaimün ‘Tati mongelechi Chau Dios ñi pu yall’. 11 Pu Judá che ca pu Israel che trapümngeaingün ca quiñeucünungeaingün. Dulliaingün inei tañi loncoleal fei engün mu ca tripayaingün ti mapu mu. Feichi antü falin antüngeai fei engün mu”.
2 Chau Dios feipi: “Feipifimün tamün pu peñi ‘Eimün iñche tañi troquiñche’.*
Ca feipifimün tamün pu lamngen ‘¡Ahuem, pu domo cutranpiuqueyengelu!’.*
2 Dalluntucufimün tamün ñuque, felei llemai, dalluntucufimün.
Iñchiu curehuen-ngehuelayu.
Fentecünupe ñi conün pod cudumuhun mu*
ca fentecünupe ñi ñihualhuentrual.
3 Femnole, müntuñmayafiñ* tañi tacun, elcünuafiñ feitichi antü reque tañi choyüngen mu.
Elcünuafiñ quiñe huellin mapu reque.*
Ancülechi mapu reque femcünuafiñ,
femngechi huihulen mu tañi layal.
4 Ca cutranpiuqueyelayafiñ tañi pu püñeñ,
pod cudumuhun dungu mu* choyüngelu engün cai.
5 Fei engün tañi ñuque coni pod cudumuhun dungu mu.*
Quisu coni yehuen dungu meu, feipilu cai:
‘Inantucuafiñ tañi pu üñam.
Fei engün eluqueneu co ca cofque.
Eluqueneu cal ufisa ca lino. Eluqueneu aceite ca tañi pütocoal’.
6 Feimu deumayan quiñe chacai* corral tañi rupanoal.
Deumayan quiñe cura malal* tañi catrütuafiel,
feimu pelayai tañi rüpü.
7 Inantucuafi tañi pu üñam, huelu ditulayafi.
Quintuafi engün, huelu pelayafi.
Fei hula feipiai: ‘Huiñoan tañi hunen füta mu.
Feichi mu doi cümelcalerquefun nga’.
8 Ngüneduamlai rume iñche tañi elufiel ti fün quetran, hue pulcu ca tati aceite.
Iñche elufiñ fentren plata,
oro cafei, quisu pünefi ñi poyeafiel ta Baal.
9 ‘Feimu huiñotuan. Fei hualüng antü meu yeñmutuan tañi fün quetran.
Ca puule ñi tungeal ofad, yeñmutuan tañi hue pulcu.
Müntuñmayafiñ ñi cal ufisa ca tañi lino, tüfa tacunierqueyu ñi triltrangcülenoal.
10 Tüfa hula tañi pu üñam ñi adquiñ mu triltrangcünuafiñ.
Quiñe huentru no rume montul-layayu iñche tañi cuhu mu.
11 Fentecünuñmayafiñ com tañi ayühun,
tañi fillque fiesta, tañi ürcütun antü,* tañi fiesta femngequelu hue cüyen mu ca com tañi falinque trahun.
12 Quisu feipi tañi anüm ofad ca tañi higuera anümca mu:
“Tüfa tañi cullitu, tañi pu üñam elueneu”.
Huelu iñche huesalcayafiñ.
Apolafiñ pichique huesaque anümca meu,
pu auca culliñ* apümcayayu.
13 Juiciantucuafiñ tañi elufiel mu chalintucun* ta Baal ñi pu adentun.*
Feichi mu adelcauquefui tañi yihul* cuhu mu ca tañi fillque llancatu mu, inantucuquefui tañi pu üñam,
huelu ngoimanentueneu’* feipi ta Chau Jehová.
14 ‘Feimu raquiduamelafiñ ñi huiñotual iñche mu,
huellin mapu mu yeafiñ,
cüme dunguafiñ ñi puhual tañi piuque mu.
15 Fei hula huiñoleltuafiñ ñi fillque anüm ofad.
Conhue reque elcünulelafiñ Acor ñi laf mapu* tañi conal maneluhun dungu mu.
Fei tüfa allcütuaeneu chumngechi ñi femün tañi huechengen mu,
chumngechi ñi femün tripalu Egipto mapu meu.
17 ‘Eluñmalayafiñ tañi üituafiel Baal ñi fillque adentun.
Huiño acordangehuelayai tañi üi engün.
18 Ñi füreneafiel tañi troquiñche, feichi antü eldungucünuafiñ pu auca culliñ,
Tati mapu mu apümcayafiñ ti arco, fütra cuchillo ca tati hueichan.*
Ca femcünuan ñi tüngcülen* mongeleal engün.*
19 Eldungucünuayu, iñche tami fütangean rumel mu.
Feipicünuayu, nor chengean eimi mu ca femayu nor dungu.
Rume piuqueyeayu* ca cutranpiuqueyeayu.
20 Feipicünuayu, rumel afcadinieayu.
Fei eimi rüfcünu llemai quimafimi ta Chau Jehová’.
21 Chau Jehová feipi: ‘Feichi antü
eluafiñ huenu ñi duamnieel.
Fei tüfa eluafi mapu ñi duamnieel.
22 Fei tati mapu eluafi ñi duamnieel tati fün quetran, ti hue pulcu ca ti aceite.
Fei tüfa engün eluafi Jezreel* ñi duamnieel.
23 Chumngechi ngan-ngequei ti fün mapu meu, ca femngechi femafiñ ta Jezreel.
Cutranpiuqueyeafiñ tati cutranpiuqueyengenolu.*
Tati pu coneltulenolu tañi troquiñche mu,* feipiafiñ “Eimün iñche tañi troquiñche”,
ca fei engün feipiaingün “Eimi iñche tañi Chau Dios”’”.
3 Fei Chau Jehová feipieneu: “Tami domo ñihuañpemequeimu, cangelu huentru piuqueyeyu. Huelu eimi huiño amunge, piuqueyetufinge. Ca femngechi Chau Jehová piuqueyeniefi tañi troquiñche Israel inaniefilu rume caquelu dios ca piuqueyequefilu rume cochü cofque nielu anquen ofad”.*
2 Feimu ngillafiñ ta Gómer, cullin 15 moneda plata ca 160 kilo* cahuella.* 3 Fei feipifiñ: “Nieayu, huelu üngümaen* fentren antü. Com feitichi antü meu conlayaimi pod cudumuhun dungu mu,* cudumuulayaimi caquelu pu huentru engün. Iñchiu ca cudumuulayayu”.
4 Ca femngechi rupayai Israel troquiñche. Fentren antü mu nielayai lonco ülmen, principe, chalintucun,* huitracünuelchi cura poyengequelu, sacerdote ca estatua ñi poyengequeel no rume.* 5 Fei afaelchi antü meu, Israel troquiñche huiñotuai, quintuafingün tañi Chau Dios Jehová ca tañi lonco ülmen David. Ca müllmüllcülen cüpayaingün Chau Jehová mu tañi cümelcayaeteu.
4 Ahuem, pu Israel che, allcütufimün Chau Jehová ñi feipin.
Chau Jehová juician dungu nielelfi pu che tüfachi mapu meu.
Ngelai rüf dungu, piuqueyehun* ca Chau Dios ñi quimün no rume tüfachi mapu mu.
2 Coila dungu mu eldungucünuquei che.
Huall püle mülei coilatun, langümuhun, hueñen ca ñihuañpen.
Pu che langümchemequei.
3 Feimu tüfachi mapu rume hueñancüleai
ca com tañi pu che epeque layaingün fente tañi ngañhuadcülen.
4 “Chem huentru no rume notucadunguquilpe* ca norümdunguquilpe caquelu huentru engün.
Tati pu notucadunguquefilu quiñe sacerdote, fei engün reque felei tami pu che.
5 Feimu mutruraimi pelon antü mu,
ti huerquen ca mutrurai pun mu reque.
Tami ñuque ñücüfcünuafiñ.*
6 Ngenolu am quimün, ñücüfcünungeai* tañi pu che.
Tami quiñepülecünufiel ti quimün,
iñche ca quiñepülecünuayu, iñche tañi sacerdotengehuelayaimi.
7 Tañi doi alün-ngen mu, doi culpaquefuingün* iñche mu.
Tañi afmatufalngen, yehuen dungucünuafiñ.*
8 Iñche tañi troquiñche ñi culpan mu* pu sacerdote iqueingün.*
Rume ayüqueingün* ñi huelulcahual pu che.
9 Tati pu che ca ti pu sacerdote
juiciantucuafiñ tañi femün mu.
Chumngechi tañi femün engün cutrancayafiñ.
10 Iyaingün, huelu tuduamlayaingün.
Conaingün pod cudumuhun dungu mu,* huelu fentren-ngelayaingün,
turpu yamquenofilu engün cai* ta Chau Jehová.
11 Ti pod cudumuhun dungu,* ti pulcu ca ti hue pulcu
huesalcaquefi ta che, fei cüpa femhuequelai cümeque dungu.
12 Tañi pu che ramtuquefi ñi pu mamüll adentun*
ca femqueingün chem ñi pengeleteu ñi retrü pelontuchequelu.
Rume ayünieingün ñi conal pod cudumuhun dungu mu,* tüfa hueluraquiduamelqueyu.
Tañi pod cudumuhun dungu mu,* eluulaingün tañi ngünenieaeteu Chau Dios.
13 Huechuñ huincul mu hulqueingün chalintucun*
ca mahuida mu füchotuqueingün chalintucun.
Feimu tamün pu ñahue pod mongen yenieingün*
ca tamün pu püñmo conqueingün ñihualuhun mu.
14 Pu huentru pemequefingün pu domo pod mongen yenielu
ca hulqueingün chalintucun quiñentrür pu domo cullingen mu cudumuuquelu.*
Feimu juiciantuculayafiñ tamün pu ñahue tañi pod cudumuhun mu*
ca tamün pu püñmo tañi ñihualuhun mu.
Tüfachi troquiñche nielai quimün, feimu huesalcalehuetuai.
15 Ahuem, Israel, conqueimi rume pod cudumuhun mu,*
Judá culpaconquilpe.
Cüpaquilmün Guilgal mu, Bet-Aven mu no rume.
Mongelechi Chau Jehová ñi üi mu eldungucünulayaimün.
16 Israel trencül piuquengetui* quiñe huapo huaca reque.*
Chau Jehová, ¿camañpeafi mai* ta Israel lelfün mu quiñe hue caniru reque?*
17 Efraín poyemequefi pu adentun.
¡Calli, fempe müten!
Tati pu ngünenielu* rume ayüquei ñi femal yehuen dungu.
19 Ti cürüf cañpüle yeayu,
ca quisu yehueai tañi chalintucun mu”.
5 “Eimün, pu sacerdote, allcütumün.
Pu Israel che, ngüneduamfimün.
Pu mülelu tati lonco ülmen ñi ruca meu, allcütumün.
Eimün juiciantucungeaimün.
Eimün huachi reque feleimün Mizpá mu,
quiñe huachi* elcünungelu Tabor mu.
2 Tañi pu caiñetuqueteu* concüleingün fütra langümuhun mu.
Com feitachi pu che norümdungumequefiñ engün.
3 Iñche quimniefiñ ta Efraín,
Israel ellcaucülelai* iñche mu.
Huelu feula, ahuem, Efraín, eluhuimi tami conal pod cudumuhun mu,*
Israel podümuhui.
4 Tañi femquen engün catrütuqueyu ñi huiñotual Chau Dios mu.
Rume illutuquefingün ti pod cudumuhun,* tüfa ngüneniequeyu engün.
Jehová, iñchiñ taiñ Chau Dios, piquelaingün.
5 Israel tañi mallmahun mu quisu condenauquei.
Israel ca Efraín mutruringu* tañi huelulcan mu,
Judá ca femi.
6 Yefingün tañi quechan ufisa ca tañi pu culliñ ñi quintuafiel ta Jehová,
huelu pelafingün.
Chau Dios camapucünuhurquei fei engün meu.
7 Ngünencafingün ta Chau Jehová,
fotümyefingün cañpüle cüpachi fotüm.*
Petu ñi rupanon quiñe cüyen apümcangeaingün ca com tañi nieel.*
8 ¡Guibeá mu* dungulfimün ti cullcull! ¡Ramá mu dungulfimün ti trompeta!
¡Bet-Aven mu huiraraimün ñi cüpalen ti hueichan!* ¡Amulenge, Benjamín!
9 Ahuem, Efraín, llicafalngeai tami chumngeal cutrancahun antü meu.
Rangiñ Israel ñi pu troquiñche mu feipicünun chem ñi rüfcünu rupayal.
10 Tati pu cacünuquefilu cheu ñi puuquen tañi mapu, ca femngechi felei Judá ñi pu principe.
Co reque hutrunacümelafiñ engün* tañi fütra illcun.*
11 Efraín eluucülefui ñi inantucuafiel tañi caiñe,
feimu cutrancangei ca nor dungu mu pünocangei.
12 Feimu piru troquingen Efraín tañi adquiñ mu.
Ca femcünun ñi funayal Judá tañi pu che chumngechi funaquei ti mamüll.
13 Efraín pefilu ñi cutran ca Judá pefilu ñi allfen,
Efraín amui Asiria mu, fei huercülelfi huerquen quiñe fütra lonco ülmen.
Huelu tati lonco ülmen pepi tremoltulaeimünmeu,*
pepi tremoltuñmalaeimünmeu tamün allfen.
14 Quiñe hue trapial reque felean Efraín tañi adquiñ meu,
quiñe nehuen-ngechi trapial reque* felean Judá tañi pu che mu.
Iñche huirüfcayafiñ engün,* fei amutuan.
Yetuafiñ engün, inei no rume montul-layayu.
15 Amutuan, huiñotuan cheu ñi mülequefel cutrancaule hula tañi culpan mu engün.*
Fei quintuaingün tañi quellu.*
Cutrantupiuquelele engün, eluhuaingün tañi quintuaeteu”.
6 “Cüpamün, huiñotuaiñ Chau Jehová mu.
Huirüfcaeiñmu rume,* huelu tremoltuaiñmu.*
Cupafcaeiñmu rume, huelu tremoltuñmayaiñmu taiñ allfen.
2 Rupale 2 antü, huiñomongeltuaiñmu.
Ti cülangechi antü mu huitrañpüramtuaiñmu,
fei mongeleaiñ tañi adquiñ mu.
3 Quimafiyiñ ta Chau Jehová, com piuque mu eluhuaiñ taiñ quimafiel.
Rüfcünu cüpayai chumngechi fill antü hunquei.
Cüpayai iñchiñ mu troftrof mahun reque.*
Cüpayai pehu* mahun reque cülchafquefilu* ti mapu”.
4 “¿Ca chumngechi quelluafeyu, Efraín?
¿Ca chumngechi quelluafeyu, Judá?
5 Feimu huercüan tañi pu huerquen ñi huldungual juician dungu, femngechi cupafcahuaiñ reque.
Iñche tañi feipin mu langümuhuaiñ.
Tamün juician dungu pefalngeai chumngechi pengequei pulihuen tripachi pelon.
6 Rüf piuqueyen* ta ayühuelqueneu, chalintucun no.*
Tamün quimniemufiel iñche, tamün Chau Dios, ayühuelqueneu, tamün lüpümngeelchi chalintucun ayühuelquelaeneu.
7 Huelu tañi troquiñche pecan che reque quiñepülecünufingün ti eldungu.
Fei engün tañi mapu mu ngünencaeneu.
8 Galaad huaria apolei pu che mu huesa femquelu.
Rume langümchequeingün.
9 Pu sacerdote hueñefe reque feleingün üngümcülelu* ñi saltiayafiel che.
Tañi femün engün rume yehuen-ngei,
feimu rüpü mu langümchequeingün, inafül Siquem mu.
10 Yehuen dungu pefiñ Israel mu.
Tiye mu Efraín conquei pod cudumuhun mu,*
Israel podümcahui.
11 Ahuem, Judá, pepicacünulelngeimi quiñe püramquetranün.*
Iñche trahultuafiñ tañi pu che cañpüle presuyengelu”.
7 “Iñche eluulu ñi tremoltuafiel* ta Israel,
quimfalcünungei Efraín ñi huelulcan
ca Samaria ñi huesa femquen.
Ngünencan dungu femqueingün.
Pu hueñefe conturucaqueingün ca pu saltiachequelu hueñequeingün rüpü meu.
2 Raquiduamquelaingün rume iñche ñi ngoimanentuñmanoafiel* com tañi huesa femquen engün.
Tañi huesa femquen hualloñmanieyu engün.*
Iñche tañi adquiñ mu niefiñ.
3 Tañi huesa femquen mu ayühulquefingün tati lonco ülmen.
Tañi ngünencan dungu mu ayühulquefingün tati pu principe.
4 Com ñihuafengeingün.
Üicüleingün quiñe horno reque ñi üyümfiel ti cofquefe.
Fente ñi aren ti horno, ti cofquefe duamfal-lai ñi doi üyümafiel petu tañi masan, faicülele hula.
5 Taiñ lonco ülmen ñi falin antü meu pu principe cutraningün,
rume illcuingün* pulcu ñi duam mu.
Tati lonco ülmen hueniyefi pu ayentuchequelu.
6 Tañi piuque engün üicülei quiñe horno reque, ayünielu cai re huesaque dungu ñi femal engün.*
Tati cofquefe com pun umautui.
Hunlu, tati horno üicülei leuleucülechi cütral reque.*
7 Quiñe horno reque com üicüleingün.
Langümquefingün tañi pu ngünenieteu.*
Com tañi pu lonco ülmen huesa tripaingün.
Quiñe no rume quelluen pilaeneu.
8 Efraín quiñeucülei pu troquiñche engün.
Efraín quiñe cofque reque felei huaichüfrulpangenolu.
9 Pu ca cüpanche müntuñmaeyu* ñi nehuen, huelu Efraín quimlai.
Lingarcülehuei* tañi cal lonco, huelu ngüneduamlai rume.
10 Israel ñi mallmahun mu quisu condenauquei.
Huelu huiñotulaingün tañi Chau Dios Jehová mu.
Ca quintulafingün com tüfa rupalu rume.
11 Efraín quiñe huedhued paloma reque felei, nielai quimün.
Quelluen feipifingün ta Egipto. Quintuingün Asiria tañi quelluaeteu.
12 Cheu rume amule engün, tucuafiñ tañi huachi* ñi conal engün.
Üñüm reque* ütrüfnacümafiñ engün.
Norümtuafiñ engün chumngechi feipicünufiñ ti troquiñche.
13 ¡Aungeaingün lefmaulu cai iñche mu!
¡Apümcangeaingün culpalu cai* iñche mu!
Iñche pepicaucülefun tañi montulafiel engün, huelu coilatudunguingün iñche mu.
14 Piuque mu quelluen feipilaeneu engün,
eyütulerquefuingün rume tañi cahuitu mu.
Chaftuqueneu engün.
Catrücaquefuingün ñi cuerpo ñi nieal quetran ca hue pulcu.
15 Quimeltufiñ ca yafültucufiñ engün,
huelu chaftueneu engün, quintuqueingün ñi huesa femal.
16 Cacünutuingün tañi femün engün, huelu cüme poyerpulafingün ta Chau Dios.
Manelfalngelafuingün quiñe huesa arco reque, pepicaucülenolu ñi ütrüftual flecha.
Tañi pu principe chaftudungueneu engün, fei fütra cuchillo mu langümngeaingün.
Feimu ayentungeaingün Egipto mapu meu”.
8 “¡Tami hun mu tucunge ti cullcull tami dungulafiel!
Quiñe caiñe cüpalei ñamcu reque* ñi lefcontuafiel Chau Jehová ñi ruca.
Quiñepülecünufingün tañi eldungu ca inahuelafingün tañi ley.
2 Huirarün mu feipieneu engün: ‘¡Ahuem, taiñ Chau Dios! Iñchiñ, pu Israel che, quimuhuiyiñ’.
3 Israel quiñepülecünufi cümeque dungu.
Quiñe caiñe eluupe ñi inantucuaeteu.
4 Üitufingün lonco ülmen, huelu iñche pilafun.
Üitufingün principe, huelu iñche ayülafun.
Tañi plata ca tañi oro mu deumaingün adentun,*
huelu tañi femün mu apümcangeaingün.
5 Ahuem, Samaria, quiñepülecünufiñ ti pichi culliñ tami adentucünufiel.
Rume illcutueyu.*
¿Tunteñmayaimi tami lifcületual?*
6 Tüfachi pichi culliñ Israel mu cüpai.
Quiñe artesano deumaeyu. Rüfngechi Dios no tati.
Samaria ñi pichi culliñ teifücalehueai.
7 Nganmequeingün cürüf reque,
feimu cosechayaingün cürüftucu mahun.
Quiñe lonco quetran no rume hulquelai ancülechi fün.
Choyüfule ti fün, cosechangelayai.
Huefpale rume quetran, pu ca cüpanche* lümüayu.
8 Israel apümcangeai.*
Feula quiñe falinochi fasu reque feleaingün
rangiñ pu troquiñche meu.
9 Amuingün Asiria mu quiñe auca burro reque* quisuyaulu.
Efraín culliquei domo tañi cudumuhual.
10 Pu troquiñche mu quintuqueingün tüfachi pu domo.
Feula trahultuafiñ engün.
Cutrancahuaingün feitichi fanechi cüdau tañi eluqueteu tati lonco ülmen ca tati pu principe.
11 Efraín doi deumamequerpui altar* tañi culpayal.*
Pünemequefi tañi fillque altar ñi culpayal.
12 Fentren ley dungu* huirintuculelfiñ,
huelu quisu cangentufi.
13 Eluqueneu engün chalintucun* ca iquefingün ti ilo.
Huelu iñche, Chau Jehová, ayühulquelaneu tañi femün engün.
Feula acordayafiñ tañi huelulcan engün ca cutrancayafiñ tañi culpan mu.*
Huiñotuingün* Egipto mu.
14 Israel ngoimanentufi* tañi Deumaeteu, fei deumai fillque ngillatuhue ruca.
Judá deumamequerpui fentren nehuen-ngechi huaria.
Huelu huercüan cütral tañi pu huaria mu engün,
fei apümcayafi caque quiñeque tañi adquintuhue”.
9 “Ayüuquilnge, Israel.
Ayühun mu miyauquilnge pu troquiñche reque.
Tami conün pod cudumuhun mu* püntütripaimi* tami Chau Dios mu.
Rume ayüfimi ñi cullingeel quiñe pod mongen domo com ti pünoquetranhue mu.*
2 Cheu ñi cütrüngequen ofad ca ti pünoquetranhue hul-layai iyael ñi duamnieel engün.
Nielayaingün hue pulcu.
3 Mülehuelayaingün Jehová tañi mapu mu.
Huiñotuaingün Egipto mu.
Asiria mu iyaingün tati lifngenolu.
4 Chalintuculelhuelayafingün pulcu ta Chau Jehová.
Tañi chalintucun engün* ayühuelquelaeyu,
cofque reque felei layeluhun mu ingequelu.
Com pu iyafilu ti cofque lifngehuelayaingün.
Tañi cofque engün re tañi ngüñünoal müten,
Chau Jehová ñi ruca mu conpulayai.
5 Puule tamün trahuluhual
ca tamün fiestañmayafiel ta Chau Jehová, ¿chumaimün cai?
6 ¡Ahuem! Mülen mu apümcahun, lefmahuaingün.
Egipto trapümayu, Menfis rüngaltucuayu engün.
Tremai curi, fei tacucünuafi ñi falinque fillem platangelu.
Müleai chacai* tañi tolto ruca mu.*
7 Puhuai ti antü ñi juiciantucungeal engün.
Puhuai ti antü ñi cutrancangeal engün.*
Israel quimai tüfa.
Tati huerquen hueluduamcüleai, tati huentru yeniefaluuquelu Chau Dios ñi feipin huedhuedcahuai.
Fütra culpaimi,* feimu fütra illcutuniengeimi”.*
8 Tati soltau cuidaquefilu Efraín mülefui tañi Chau Dios engu.
Quiñe huachi nüquelu üñüm,* fei reque felei tañi pu huerquen ñi rüpü.
Caiñetuhun mülei tañi Chau Dios ñi ruca mu.
9 Pu Israel che rume coningün huesaque dungu mu, Guibeá ñi antü mu reque.
Chau Dios raquiduamtucuafi tañi huelulcan ca cutrancayafi tañi culpan mu engün.*
10 “Pefiñ ta Israel ofad reque mülelu huellin mapu meu.*
Pefiñ tami pu cuifiqueche yem hune tripachi breva reque higuera anümca mu.
Huelu pemefingün Baal Peor mu,
chalintucuhuingün feichi yehuen-ngechi dios mu.*
Ünufalngerpuingün tañi piuqueyefielchi dios reque.
11 Efraín ñi afmatulngen müpütripai üñüm reque.
Quiñe domo no rume niepüñeñcülelai ca choyüquelai.
12 Tremümfile rume tañi pu pichiqueche,
müntuñmayafiñ* mülehuenole hula quiñe no rume.
Felei, aungeaingün püntütripali fei engün meu.
13 Efraín anümngefui reque carülechi lelfün mu. Tiro reque troquiquefun.
Huelu feula Efraín entuafi tañi pu fotüm ñi langümngeal engün”.
14 Ahuem, Jehová, elufinge chem tañi llohuafel engün:
ancatripape ñi püñeñ ca ancüpe ti lichi tañi moyo mu.
15 “Com tañi huesaque femün rupai Guilgal mu, feimu üderpufiñ engün tiye mu.
Tañi huesaque femün mu quechanentuafiñ tañi ruca mu.
Piuqueyehuelayafiñ engün.
Com tañi pu principe trencül piuquengeingün.*
16 Efraín anümca reque catrünacümngeai.
Tañi folil ancüai, hul-layai fün.
Pu domo choyürumefile engün, femcünuan ñi layal tañi poyenque püñeñ”.
17 Israel allcütulafi iñche ñi Chau Dios,
feimu quisu quiñepülecünuayu engün.
Rangi pu troquiñche mu lefmauquiyahuaingün.
10 “Israel anüm ofad reque felei. Tüfa huesañmahui* ca hulmequei fün.
Doi hulmequelu fün, doi alün-ngei tañi pu altar.
Doi cümelcalelu chem ñi hulqueel tañi mapu, doi afmatufalngei tañi huitracünuelchi cura poyengequelu.
2 Cüme piuquefaluuqueingün,
culpafe pingeaingün.
Trafocangeai tañi pu altar ca apümcangeai tañi huitracünuelchi cura poyengequelu.
3 Feula feipiaingün: ‘Yamquelafiyiñ* ta Chau Jehová, feimu nielaiñ lonco ülmen.
¿Chumafeiñmu cai quiñe lonco ülmen?’.
4 Ngünam dungu feipiqueingün. Coila dungu mu feipicünuqueingün* ca eldungucünuqueingün.
Tañi nor dungu venenongechi cachu reque felei, tremlu quetrangeelchi mapu meu.
5 Bet-Aven mu mülei quiñe pichi culliñ adentun.*
Pu Samaria che llicayaingün fei ñi duam mu.
Ti troquiñche hueñancüai ti pichi culliñ adentun ñi duam mu.
Pu sacerdote serfiniefilu pu ca cüpanche ñi pu dios ca hueñancüaingün.
Fei engün ayühulqueyu ti pichi culliñ adentun ca tañi afmatufalngen.
Huelu ti adentun cañpüle yengeai, camapuleai fei engün meu.
6 Asiria mu yengeai ñi elungeal quiñe fütra lonco ülmen.
Efraín illamcangeai
ca Israel yehuelcangeai tañi inafielchi ngülam mu.
7 Samaria ca tañi lonco ülmen rüfcünu apümcangeai.*
Quiñe pichi rou reque* ütrüftucungelu co meu.
8 Bet-Aven ñi fillque ngillatuhue famtucuquefi culpan mu* ta Israel, feimu apümcangeai.
Tañi altar mu tremai huayun ca troltro.
Pu che feipiafi pu mahuida ‘¡Ellcalmuiñ!’.*
Pu che feipiafi pu huincul ‘¡Trañmanacümmuiñ!’.
9 Ahuem, Israel, Guibeá tañi antü mu eluhuimi tami culpayal.*
Tiye mu petu femmequeingün.
Ti hueichan* com apümlafi pu norngenolu Guibeá mu.
10 Iñche dullian chumül tañi norümtuafiel engün.
Yucu reque trariñmangeai tañi epu huelulcan.*
Fei trahuaingün pu troquiñche tañi chaftuafiel.
11 Efraín quiñe pichi culliñngefui reque pepicaucülelu ca ayünielu ñi pünoquetranal.
Feimu tuculel-lafiñ yucu tañi adngechi pel meu.*
Feula femcünuan quiñe che ñi püraconcüleal Efraín mu.
Judá quetrayai. Jacob rulpayafi ti huitraru.*
12 Nganaimün nor dungu, fei cosechayaimün piuqueyen.*
Quetrafimün ti mapu,
petu mülehuele tiempo tamün quintuafiel ta Chau Jehová.
Femaimün cüpale hula tamün quimeltuaeteu ti nor dungu.
13 Huelu eimün nganimün* huesaque dungu,
fei cosechaimün norngenochi dungu
ca ifimün reque chem ñi hulqueel tamün ngünencan dungu.
Eimi quisutu maneluuqueimi müten
ca tami nien mu fentren hueichafe.
14 Pu che huiraraingün ñi hueichayafiel tami troquiñche,
fei com tami nehuen-ngechi huaria teifücangeai
chumngechi Salmán teifücacünufi Arbel ñi ruca hueichan antü mu.
Feichi mu pu ñuque ca tañi pu püñeñ apümcangeingün.
15 Ahuem, Betel, femngechi femngeaimi fente tami huesalcan.
Hunle, Israel ñi lonco ülmen rüfcünu langümngeai”.*
11 “Piuqueyefiñ ta Israel pichi huentrungelu müten.
Mütrümfiñ* tañi fotüm ñi tripatual Egipto mu.
Fentren rupa hulingün chalintucun* Baal ñi adentun mu.*
Hulquefuingün chalintucun fillque adentun mu.
3 Iñche quimeltufiñ ta Efraín ñi trecayal ca metapüramfiñ.
Huelu quimtuculaingün iñche ñi tremoltufiel engün.*
4 Quiñe llasu mu reque* piuqueyenquechi cüpalniefiñ engün. Tañi piuqueyen quiñe llasu reque felei, femngechi adniefiñ ca cüpalfiñ engün iñche mu.
Ca entuñmafiñ ti yucu tañi pel meu.*
Piuqueyen mu elufiñ iyael caque quiñeque engün.
5 Huelu eluulaingün ñi huiñotual iñche mu.
Feimu huiñotulayaingün Egipto mu, Asiria fei engün ñi lonco ülmen-ngerpuai.
6 Pu caiñe fütra cuchillo mu lefcontuafingün tañi pu huaria.
Teifücangeai tañi fillque puerta ñi tranca* ca apümcangeaingün ayünielu cai ñi huesa femal.
7 Tañi troquiñche eluuquei tañi ngünencayaeteu iñche.
Mütrümngelu engün rume ñi huiñotual tati Alüpüralelu mu, huelu quiñe no rume huitrapüralai.
8 ¿Quisucünuafeyu am, Efraín?
¿Hultucuafeyu am tami pu caiñe mu, ahuem, Israel?
¿Teifücayafeyu am Admá reque?
¿Apümcayafeyu am Zeboyim reque?
Cacünutun ñi raquiduam,
feimeu müten rume cutranpiuqueyeyu.
9 Pofo illculayan.*
Huiño apümcalayafiñ Efraín.
Iñche ta Chau Dios, huentru no,
tati Lifngechi Ngünechen rangiñcülelu eimi mu.
Fütra illcun mu chaftulayayu.
10 Inayafingün ta Chau Jehová, fei mürülai* quiñe trapial reque.
Mürül-le, tañi pu fotüm müllmüllcülen cüpayaingün conhue antü püle.
11 Tripale engün Egipto mu, müllmüllcüleaingün üñüm reque.*
Tripale engün Asiria mapu mu, müllmüllcüleaingün paloma reque.
Ca anücünuafiñ quisuque tañi ruca mu engün” feipicünui Chau Jehová.
12 “Efraín re coilatuqueneu.
Cheu rume pequefiñ Israel ñi ngünencan.
Huelu Judá petu miyauquei Chau Dios engu,
fei püntütripaquelai* tati Doi Lifngelu mu”.
12 “Efraín iquei cürüf.
Com antü inantucuniefi puelche cürüf.
Doi coilatuquei ca doi conquei quehuan dungu mu.
Eldungucünui Asiria engu ca yelelfi aceite ta Egipto.
2 Chau Jehová juician dungu nielelfi ta Judá,
juiciantucuafi ta Jacob tañi femün meu,
huiñoleltuafi chumngechi tañi femquen.
3 Tañi ñuque ñi pütra meu, Jacob nüñmafi tañi peñi ñi rüncoi namun.
Com tañi nehuen mu quehuai Chau Dios engu.
4 Quehuaquehuaturquefi quiñe cüme püllü, fei hueutripai.
Ngümai ca llellipufi tañi cümelcayaeteu”.
Chau Dios peeyu Betel mu, tiye mu nütramcaeiñmu iñchiñ.*
5 Fei ta Jehová, pu hueichafe* ñi Chau Dios.
Chau Jehová feichi üi mu mülei tañi acordangeal.
6 “Feimu huiñotunge tami Chau Dios mu.
Fentecünuquilnge tami piuqueyen* ca tami femquen nor dungu.
Rumel maneluhuaimi tami Chau Dios mu.
7 Huelu pu negociante nieingün huelulcalechi romana.
Rume ayünieingün ñi ngünencacheal.
8 Efraín feipicaquei: ‘Rüfcünu iñche ricungerpun.
Pen falinque fillem.
Com tañi fanechi cüdau mu pengelayai huelulcan, culpan no rume’.*
9 Feichi mülelu eimi Egipto mapu meu ta fantepu mu iñche ta Jehová, tami Chau Dios.
10 Dungufiñ pu huerquen.
Elufiñ ñi peal engün fentren afmatun dungu.
Ca pu huerquen ñi duam mu nütramcan fillque pengelün dungu.
11 Galaad mu mülei ngünencan dungu* ca coilaque dungu.
Guilgal mu chalintucungei toro.
Ca tañi altar huircolechi cura reque felei* quetrangeelchi mapu mu.
12 Jacob lefmahui Aram* mapu mu.*
Israel tiye mu cüdahui ñi curengeal.
Ñi nieal domo eluhui ñi camañafiel* ufisa.
13 Quiñe huerquen ñi duam mu Chau Jehová entufi ta Israel Egipto mu.
Quiñe huerquen ñi duam mu cuñiutucufi.
14 Efraín fütra illculcafi* ta Chau Dios.
Amulei ñi culpantucungeal tañi langümchen mu.
Illamcafi tañi Ñidol, feimu huiñoleltuayu chumngechi tañi femquen”.
13 “Dungun mu Efraín, pu che müllmüllquefui.
Falin-ngefui Israel mu.
Huelu Baal ñi duam mu culpaconi, fei lai.
Adümuhun mu deumaqueingün adentun, com tüfa ñi deumael pu artesano.
Feipiqueingün: ‘Pu huentru hul-lu chalintucun,* eluupe ñi truyuafiel* tati pu adentun pichi culliñ adngelu’.
3 Feimu pulihuen tripachi trucur reque feleaingün.
Tati ilhuen reque* pürafemquelu hunlu müten.
Quetran tripachi pinu reque* feleaingün ñi yequeteu cürüftucu mahun.
Ca huechuñ ruca mu tripachi fitrun reque* feleaingün.
4 Feichi mülelu eimi Egipto mapu meu ta fantepu mu iñche ta Jehová, tami Chau Dios.
Quimquelafimi caquelu Dios, iñche müten.
Ngelai caquelu montulchefe, iñche müten.
5 Huellin mapu meu* quimeyu, ancülechi mapu meu.
6 Tañi nien mu fentren iyael huedaingün.
Tuduamcülerquefuingün ca mallma piuquecünuhuingün.
Feimu ngoimanentueneu engün.*
7 Lefcontuafiñ engün quiñe hue trapial reque.
Quiñe fütra auca ñarqui reque* lloftuyaulu* rüpü pule.
8 Lefcontuafiñ engün quiñe osa reque ñamümlu tañi pu coñi.
Huirüfcañmayafiñ* ñi rucu engün.
Iyafiñ engün chumngechi ñi femquen quiñe trapial.
Quiñe auca culliñ* huirüfcayayu engün.
9 Feimu apümcangeaimi, ahuem, Israel.
Iñche quelluquefeyu, huelu eimi chaftumequeen.
10 Feula cai, ¿cheu mülei tami lonco ülmen tami montulaeteu tami fillque huaria meu?
Eimi feipien nga: ‘Eluen quiñe lonco ülmen ca pu principe’.
Huelu feula cai, ¿cheu müleingün tami pu ngünenieteu?*
11 Iñche illculelu* elueyu quiñe lonco ülmen.
Huelu feula tañi fütra illcun mu müntuñmayayu.*
12 Efraín tañi huelulcan ngoimanentungelayai.
Com tañi culpan* ngüneduamngei ca huirintucungei.
13 Fei tañi ñuque cutrancahuai ñi püñeñal.
Huelu quisu huedhued püñeñngeai,
puulu rume tañi choyüngeal, pilai ñi tripayal.
14 Iñche montulafiñ engün tati Rüngan* ca lan meu.
Eimi, Lan Dungu, ¿cheu mülei tami nehuen tami cutrancacheal?
Eimi cai, Rüngan, ¿cheu mülei tami nehuen tami apümcacheal?
Huelu cutranpiuqueyechelayan.
15 Efraín rayüle rume rangiñ alüpürachi cachu mu,
Chau Jehová cüpalafi puelche cürüf, cüpalu huellin mapu püle.
Tüfa ancümüñmayafi Efraín tañi rünganco* ca hufco.
Efraín tañi falinque fillem hueñeñmangeai.
16 Samaria culpantucungeai ñi chaftufiel tañi Chau Dios.
Tati pu mülelu tiye mu langümngeaingün fütra cuchillo mu,
tañi pu yall huirüfcangeaingün.
Pu niepüñeñcülechi domo huichafcañmangeai* tañi pütra engün”.
14 “Ahuem, Israel, huiñotunge tami Chau Dios Jehová mu.
Mutrurimi* tami fillque huelulcan mu.
2 Huiñotumün Chau Jehová mu, fei feipiafimün:
‘Rulpacünuñmamuiñ taiñ culpan* ca ngüneduamüñmamuiñ taiñ cüme femquen.
Fei püramyehuaiñ. Taiñ feipin hue toro reque felei tami chalintuculelfiel.
3 Asiria montul-layaiñmu.
Püracahuellulayaiñ.
“¡Tüfa taiñ Chau Dios!” pihuelayafiyiñ chem taiñ deumafiel taiñ cuhu mu,
eimi cutranpiuqueyefilu cai tati cuñifall’.*
4 Tremoltuafiñ reque* tañi feyentunon mu engün.
Iñche tañi duam mu piuqueyeafiñ,
tañi illcun* alü camapulelu cai fei engün meu.
5 Ilhuen reque* felean Israel mu,
fei rayüleai lirio rayen reque,
ca rume foliluhuai Líbano mülechi anümca reque.
6 Tañi pichique rou* tremai.
Afmatufalngeai olivo anümca reque.
Cüme nümün-ngeai Líbano reque.
7 Huiño tüngcületuaingün* iñche tañi llaufeñ meu.*
Dapiafingün ti fün ca choyütripayaingün anüm ofad reque.
Cüme nütramyengean Líbano cüpachi pulcu reque.
8 Efraín feipiai: ‘¿Chumconcülepen am* pu adentun meu?’.*
Iñche huiñoldunguafiñ* ca cuñiutucuafiñ.
Iñche quiñe fütra enebro anümca reque felean.
Iñche mu cüpayai tami fün”.
9 ¿Inei am quimchengei? Loncontucupe tüfachi dungu.
¿Inei am cüme raquiduam niei? Quimpe tüfa.
Chau Jehová tañi rüpü norngei,
pu nor che miyahuaingün tüfa püle.
Huelu pu culpafe* mutruraingün tüfa mu.
Femngechi feipingequefui pu Hosaya pingelu. Tüfachi üi cüpa feipi “Jah montuleyu” cam “Jah montulquei”.
Cam: “Domo pod mongen yenielu, prostituta”. Diccionario mu ngüneduamnge “prostituta”.
Ca lof mu: “Familia”.
Tüfachi üi cüpa feipi “Chau Dios nganai fün”.
Ca lof mu: “Trafocayafiñ”.
Ca lof mu: “Nag mapu meu”.
Ca lof mu: “Quechanentuafiñ engün”.
Tüfachi üi cüpa feipi “cutranpiuqueyengelai”.
Ca lof mu: “Quehuan, aucan”.
Tüfachi üi cüpa feipi “iñche tañi troquiñche no”.
Ngüneduamnge ti nota mülelu Os 1:9 mu.
Ngüneduamnge ti nota mülelu Os 1:6 mu.
Cam: “Prostitutangen”. Diccionario mu ngüneduamnge “prostituta”.
Ca lof mu: “Montuñmayafiñ”.
Tüfa cüpa feipilei quiñe troquiñ mapu ñi epe mülenon che.
Cam: “Ñi prostitutangen mu”.
Cam: “Prostitucion dungu mu”.
Ca lof mu: “Huayun, püllin, huai”.
Ca lof mu: “Muralla”.
Cam: “Sabado”.
Ca lof mu: “Aucan, caita culliñ”.
Ca lof mu: “Füchotun, mañumtun”.
Ca lof mu: “Imagen”. Diccionario mu ngüneduamnge “adentun; poyeafiel coilaque dios ñi adentun”.
Ca lof mu: “Anillo”.
Ca lof mu: “Upenentueneu”.
Ca lof mu: “Nag mapu”.
Cam: “Tañi Baal”.
Ca lof mu: “Idum”.
Ca lof mu: “Huingüdquiyauquelu”.
Ca lof mu: “Quehuan, aucan”.
Ca lof mu: “Cüme felen”.
Cam: “Cuduleal engün”.
Hebreo quehun mu feipi piuqueyechen ca fürenechen afquenolu. Diccionario mu ngüneduamnge “piuqueyen afquenolu”.
Tüfachi üi cüpa feipi “Chau Dios nganai fün”.
Ngüneduamnge ti nota mülelu Os 1:6 mu.
Ngüneduamnge ti nota mülelu Os 1:9 mu.
Tüfa pünengequefui ñi poyengeal coilaque dios.
Hebreo quehun feipilei: “1 homer”. Quiñe homer feita 220 litro. Ngüneduamnge apendice B14.
Ca lof mu: “Cebada”.
Ca lof mu: “Esperaen”.
Cam: “Prostitutangelayaimi”. Diccionario mu ngüneduamnge “prostituta”.
Ca lof mu: “Füchotun, mañumtun”.
Cam: “Ti familia ñi pu dios”. Hebreo quehun feipilei: “Terafim”.
Diccionario mu ngüneduamnge “piuqueyen afquenolu”.
Ca lof mu: “Aucan, caita culliñ”.
Ca lof mu: “Idum”.
Ca lof mu: “Chaftudunguquilpe”.
Cam: “Apümcayafiñ”.
Cam: “Apümcangeai”.
Ca lof mu: “Upenentufiel mu”.
Cam: “Quimeltun”.
Ca lof mu: “Upenentuafiñ”.
Ca lof mu: “Doi yafcaquefuingün”.
Ca feipiafui chi: “Yehuen dungucünufingün iñche tañi afmatufalngen”.
Ca lof mu: “Ñi yafcan mu”.
Iqueingün tañi chalintucun culpan mu.
Tüfa mu mülei ti palabra néfesh hebreo quehun mu, alma feipingeafui huincadungun mu. Diccionario mu ngüneduamnge “mongen”.
Cam: “Prostitucion mu”. Diccionario mu ngüneduamnge “prostituta”.
Ca lof mu: “Respetaquenofilu engün cai”.
Cam: “Ti prostitucion”.
Ca lof mu: “Idolo”.
Cam: “Prostitucion mu”.
Cam: “Tañi prostitucion mu”.
Ca lof mu: “Füchotun, mañumtun”.
Ca lof mu: “Roble”.
Ca lof mu: “Sombra”.
Cam: “Prostitutangeingün”.
Cam: “Pu domo cullingen cudumuuquelu ngillatuhue ruca mu”. Tüfachi pu domo cullingen mu cudumuuquefui ñi poyeafiel coilaque dios peno.
Cam: “Tañi prostitutangen mu”.
Cam: “Prostitucion mu”.
Ca lof mu: “Yafü piuquengetui”.
Ca lof mu: “Aucan huaca reque”.
Ca lof mu: “Cuidapeafi mai”.
Ca lof mu: “Hue carnero reque”.
Ca lof mu: “Pütocofilu”.
Cam: “Prostitucion mu”.
Hebreo quehun feipilei: “Escudo”.
Hebreo quehun mu feipilei: “Red”.
Cam: “Pu trencül piuquengelu”.
Ca lof mu: “Llumcülelai”.
Cam: “Tami conal prostitucion mu”. Diccionario mu ngüneduamnge “prostituta”.
Cam: “Prostitucion”. Diccionario mu ngüneduamnge “prostituta”.
Cam: “Trananagingu”.
Cañpüle cüpachi domo ñi pu püñeñ peno, feimu püntütripalefuingün Chau Dios mu.
Cam: “Tañi mapu”.
Cam: “Guibeah”. Ngüneduamnge apéndice A2.
Ca lof mu: “Quehuan, aucan”.
Ca lof mu: “Huitrunacümelafiñ engün”.
Ca lof mu: “Lladcün”.
Ca lof mu: “Mongeltulaeimünmeu”.
Cam: “Hue trapial nielu tünai lonco”.
Ca lof mu: “Catrücayafiñ engün”.
Ca lof mu: “Yafcan mu engün”.
Hebreo quehun feipilei: “Tañi ange”.
Ca lof mu: “Catrücaeiñmu rume”.
Ca lof mu: “Mongeltuaiñmu”.
Ca lof mu: “Fülfül mahun reque”.
Ca lof mu: “Primavera”.
Ca lof mu: “Focholquefilu”.
Diccionario mu ngüneduamnge “piuqueyen afquenolu”.
Ca lof mu: “Mülfen reque”.
Cam: “Cutranpiuqueyen”. Diccionario mu ngüneduamnge “piuqueyen afquenolu”.
Ca lof mu: “Füchotun, mañumtun”.
Ca lof mu: “Esperalelu”.
Cam: “Prostitucion mu”. Diccionario mu ngüneduamnge “prostituta”.
Ca lof mu: “Cosecha”.
Ca lof mu: “Mongeltuafiel”.
Ca lof mu: “Upenentuafiel”.
Ca lof mu: “Hueltañmanieyu engün”.
Ca lof mu: “Lladcüingün”.
Ca feipiafui chi: “Ngünencan dungu püllepalu engün, tañi piuque horno reque felei”.
Ca lof mu: “Leglegcülechi cütral reque”.
Hebreo quehun feipilei: “Pu juez”.
Ca lof mu: “Montuñmaeyu”.
Ca lof mu: “Plangcülehuei”.
Hebreo quehun feipilei: “Red”.
Ca lof mu: “Idum reque”.
Ca lof mu: “Yafcalu cai”.
Ca lof mu: “Aguila reque”.
Ca lof mu: “Idolo”.
Ca lof mu: “Lladcütueyu”.
Cam: “Culpaconnoal”.
Cam: “Quimnoelchi che”.
Cam: “Lümüngeai”.
Ca lof mu: “Aucan, caita burro”.
Diccionario mu ngüneduamnge “altar”.
Ca lof mu: “Yafcayal”.
Cam: “Quimeltun”.
Ca lof mu: “Füchotun, mañumtun”.
Ca lof mu: “Yafcan mu”.
Ca feipiafui chi: “Huiñotuaingün”.
Ca lof mu: “Upenentufi”.
Cam: “Prostitucion mu”. Diccionario mu ngüneduamnge “prostituta”.
Ca lof mu: “Hudatripaimi”.
Ca lof mu: “Lila mu”.
Ca lof mu: “Füchotun, mañumtun engün”.
Ca lof mu: “Huayun, püllin, huai”.
Ca lof mu: “Carpa ruca mu”.
Cam: “Ñi huiñolelngetual ñi femün”.
Ca lof mu: “Yafcaimi”.
Ca lof mu: “Lladcütuniengeimi”.
Ca lof mu: “Idum”.
Ca lof mu: “Tañi yafcan mu engün”.
Tüfa cüpa feipilei quiñe troquiñ mapu ñi epe mülenon che.
Cam: “Yehuen-ngechi dungu mu”.
Ca lof mu: “Montuñmayafiñ”.
Ca lof mu: “Yafü piuquengeingün”.
Ca feipiafui chi: “Doi üye püle puhui”.
Ca lof mu: “Respetaquelafiyiñ”.
Ca lof mu: “Cuyalltuqueingün”.
Ca lof mu: “Idolo”.
Hebreo quehun feipilei: “Ñücüfcünungeai”.
Ca lof mu: “Chamida reque”.
Ca lof mu: “Yafcan mu”.
Ca lof mu: “Llumummuiñ”.
Ca lof mu: “Yafcayal”.
Ca lof mu: “Quehuan, aucan”.
Cutrancangeaingün, yeafingün tüfa quiñe yucu reque.
Ca lof mu: “Aifiñngechi pel meu”.
Ca lof mu: “Rastra”.
Diccionario mu ngüneduamnge “piuqueyen afquenolu”.
Hebreo quehun feipilei: “Quetraimün”.
Hebreo quehun feipilei: “Ñücüfcünungeai”.
Ca lof mu: “Ngütrümfiñ”.
Chau Dios ñi pu huerquen ca caquelu che huercüngeingün ñi quimeltuafiel ta Israel.
Ca lof mu: “Hudatripaingün”.
Ca lof mu: “Füchotun, mañumtun”.
Ca lof mu: “Imagen mu”.
Ca lof mu: “Mongeltufiel engün”.
Femngechi llasu mu peno pu chau quimeltuquefui tañi pu yall ñi trecayal.
Hebreo quehun feipilei: “Tañi trangatranga meu”.
Ca lof mu: “Sechuhue”.
Ca lof mu: “Lladcülayan”.
Ca lof mu: “Ñahuahuai, huarülai”.
Ca lof mu: “Idum reque”.
Ca lof mu: “Hudatripaquelai”.
Tüfa Jacob ñi pu cüpanche.
Ca lof mu: “Quehuafe, aucafe”.
Diccionario mu ngüneduamnge “piuqueyen afquenolu”.
Ca lof mu: “Yafcan no rume”.
Ca lof mu: “Carpa ruca meu”.
Ca feipiafui chi: “Quiñe elcünuelchi fiesta mu”.
Cam: “Perimontun”.
Ca lof mu: “Trapümcülechi cura reque”.
Cam: “Siria”.
Hebreo quehun feipilei: “Lelfün”.
Ca lof mu: “Cuidayafiel”.
Ca lof mu: “Lladcülcafi”.
Ca lof mu: “Yafcaqueingün”.
Ca lof mu: “Estatua”.
Ca lof mu: “Füchotun, mañumtun”.
Ca lof mu: “Pechituafiel, truruafiel, trepetuafiel”.
Ca lof mu: “Mülfen reque”.
Ca lof mu: “Cachu reque”.
Ca lof mu: “Pitrun reque”.
Tüfa cüpa feipilei quiñe troquiñ mapu ñi epe mülenon che.
Ca lof mu: “Upenentueneu engün”.
Cam: “Leopardo reque”.
Ca lof mu: “Ngüneduamquiyaulu”.
Ca lof mu: “Catrücañmayafiñ”.
Ca lof mu: “Aucan culliñ, caita culliñ”.
Hebreo quehun feipilei: “Pu juez”.
Ca lof mu: “Lladcülelu”.
Ca lof mu: “Montuñmayayu”.
Ca lof mu: “Yafcan”.
Cam: “Seol”. Tüfa pengelquei cheu ñi ürcütumequen reque pu la. Diccionario mu ngüneduamnge “Seol”.
Ca lof mu: “Hufco, pozoco”.
Ca lof mu: “Huicürcangeai”.
Cam: “Trananagimi”.
Ca lof mu: “Yafcan”.
Cam: “Pu nienolu chau”.
Ca lof mu: “Mongeltuafiñ reque”.
Ca lof mu: “Lladcün”.
Ca lof mu: “Mülfen reque”.
Ca lof mu: “Chamida”.
Ca lof mu: “Cüme feletuaingün”.
Ca lof mu: “Sombra meu”.
Ca lof mu: “Coneltulepen am”.
Ca lof mu: “Idolo meu”.
Ca lof mu: “Lloudunguafiñ”.
Ca lof mu: “Yafcafe”.