Jeremías
15 Ukatsti Jehová Diosajj akham sitänwa: “Moisesampi Samuelumpis naya nayraqatar uñstanisipkpan,+ janiw ukhas nayajj aka markar sumat uñjkäti. Jupanakarojj nayan ukat apanukjjam. Sarjjapjjarakpan. 2 Jupanakatï ‘¿kunas nanakar pasapjjetani?’ sasin sapjjätamjja, jumajj akham sasaw jupanakar säta: ‘Jehová Diosajj akham siwa:
“¡Khitirutï mä jiwayir usojj waktʼani ukajja, jiwayir usumpiw jiwani!
¡Khitirutï mä espadajj waktʼani ukajja, espadampiw jiwani!+
¡Khitirutï manqʼat awtjatäñajj waktʼani ukajja, manqʼatjamaw jiwani!
¡Khitirutï preso katuntatäñajj waktʼani ukajja, preso katuntatäniwa!”+ sasa’.
3 ”‘Nayajj pusi jan waltʼäwinak* jupanakjjar apayanëjja’,+ sistwa naya Jehová Diosajja, ‘jiwarayañatakejj espada, jiwat cuerponakap qatatnaqañatakejj anunaka, jupanakar manqʼantañapatakis tukjañapatakis aycha manqʼani jamachʼinakampi salvaje animalanakampi.+ 4 Jupanakarojj oraqenkir taqe reinonakatakejj* wali ajjsarkañaruw tukuyäjja.+ Uksti kunanaktï Judá markan reyipäkäna uka Ezequías chachan Manasés yoqapajj Jerusalenan lurkäna uka kawsaw luräjja.+
5 Jerusalén marka, ¿khitis jumat khuyaptʼayasini?
¿Khitis jumat sinttʼasïtamjja?
¿Khitis kunjamäsktasa sasin jisktʼañatak jutani?’.
6 ‘Jumajj nayaruw apanukustajja’, sistwa naya Jehová Diosajja.+
‘Jumajj nayat jitheqtaskaktawa.*+
Ukatwa nayajj amparaj juma contra loqatatasajj tukjäma.+
Jumat sinttʼasiñatakejj qaritäjjtwa.
7 Aka oraqen punkunakapanwa jupanakarojj khuysöjja, ukhamat thayamp apatäpjjañapataki.
Jan wawanakan jaytäjja.+
Markajarojj tukjäwa,
thakinakap jan apanukuñ munapjjatap layku.+
8 Viudanakapajj lamar qotanakan chʼallanakapat sipansa waljapunïniwa.
Chika urunwa jupanak contrajj mä tukjiri apayanëjja, mamanak contra yoqanakap contra.
Mä akatjamatwa jupanakjjarojj wal llakisiñampi wal ajjsarayasiñampi phoqantäjja.
9 Paqallqo wawanak ususir warmejj desmayjjewa.
Janiw samsuñ puedkiti.
Urükchisa jupajj chʼamakanwa uñjasi,*
jupasti phenqʼachata, jiskʼachataw uñjasiraki’.
‘Jupanakat mä qhawq jiltʼapki ukanakarojja,
enemigonakapan espadaparuw katuyäjja’, sistwa naya Jehová Diosajja”.+
10 ¡Ay mamitaja, nayar ususitam laykojj kunakïkäjja!+
Taqe markansti nuwasiñanakan chʼajjwañanakan uñjasiyapki uka chachätwa.
Janiw nayajj kuns maytʼkti ni maytʼaskaraktsa,
ukampis jupanakajj taqeniw nayar maldisipjjetu.
11 Jehová Diosajj akham sänwa: “Nayajj cheqpachapuniw yanaptʼäma.
Nayajj cheqpachapuniw enemigo nayraqatan juma toqet saytʼasëjja,
jan waltʼäwi tiemponakana, llakisiñ tiemponakana.
12 ¿Maynejj mä hierro metala,
alay toqenkir* hierro metaläskpasa cobrëskpas jiskʼa jiskʼa pʼakjaspati?
13 Juman wali utjirinakamsa wali valoraninakamsa, enemigonakaman amparaparuw katuyäjja,+
ina ukhamak jupanakar churäjja, taqe oraqenakaman taqpach juchanakam layku.
14 Ukanakjja enemigonakamaruw churäjja,
ukhamat jan uñtʼkta uka oraqer apasjjapjjañapataki.+
Kuna laykutejj nayan colerasitajaw nina naktayi,
uka ninajj jumanak contraw nakharaki”+ sasa.
15 Jehová Dios Tata, jumajj tʼaqesitaj sum yattajja,
nayat amtasikitaya, wali amuyumpiy uñtanita.
Nayar arknaqapkitu ukanakat vengasimaya.+
Jan jupanakar pacienciampi uñjasajj nayan jiwañajatak jaytistati.
Juma laykuw taqe uka jiskʼachir arunak aguantta, uk jumajj amuyakimaya.+
16 Kunapachatï juman arunakamajj nayan ukar jutkäna ukhajja, manqʼäkaspas ukham arunakam manqʼantta,+
arunakamasti wali kusisiñaruw tukjjaraki, chuymajan wali kusisiñaparu,
kuna laykutejj nayajj juman sutim apta, ejercitonakan Jehová Diosapa.
17 Khitinakatï kusistʼañak thaqapki ukanakampejj janiw nayajj qontʼaskti, janiw jupanakampejj kusiskti.+
Niyakejjay juman munañamankstjja, nayajj sapakiw qontʼasta,
18 ¿Kunatsa llakijajj jan chhaqtirjamäki, heridajas jan qollañjamäki?
Janirakiw heridajajj jakthapkiti.
¿Jumajj jan umanïki uka uma jalsurut nayatak tuküta,
jan confiyañjamäki ukaru?
19 Ukhamasti Jehová Diosajj akham siwa:
“Jumatï kuttʼanjjätajja, sumaruw tukuyjjäma,
naya nayraqatan saytʼatäjjarakïtawa.
Jumatï jan kunatak servirïki ukat kunatï wali valoranïki uk yaqhachjjätajja,
jumajj nayan lakajäkasmas ukhamaw tuküta.*
Jupanakajj juma toqeruw kutikipstanipjjani,
ukampis jumajj janiw jupanak toqer kutikipstkätati”.
20 “Aka markatakejja, wali chʼollqhe mä cobre perqaruw tukuyäma.+
Jupanakajj cheqpachapuniw juma contrajj nuwasipjjani,
ukampis janiw jumar atipjapkätamti,+
kuna laykutejj nayaw jumar salvañatakis jarkʼaqañatakis jumampïskta”, siw Jehová Diosajja.
21 “Nayaw jan wali jaqenakan amparanakapat salväma,
tʼaqesiyirinakan amparanakapats salvarakïma”.