Jeremías
39 Kunapachatï Judá markan Sedequías reyipajj llätunka maranak apnaqaskäna, tunkïri phajjsëjjarakïna ukhajja, Babilonia markan Nabucodonosor* reyipaw taqpach ejercitopamp jutasin Jerusalén marka muyuntäna.+
2 Sedequías reyejj 11 maranak apnaqaskäna, pusïri phajjsit llätunka urunakaw saraqjjarakïna, ukhaw markan murallap tinkuyapjjäna.+ 3 Ukatsti Babilonia markan taqpach principenakapajj mantanisaw Chika Punku+ cheqan qontʼasipjjäna. Jupanakajj akanakänwa: Nergal-Sarézer sat samgar chachampi, Nebo-Sarsekim sat rabsarís* chachampi, Nergal-Sarézer sat rabmag* chachampi, Babilonia markan taqe mayni principenakapampi.
4 Kunapachatï Judá markan Sedequías reyipasa taqpach soldadonakas jupanakar uñjapjjäna ukhajja, reyin jardinap taypi pasasajj pä perqa taypinkir punku mistusaw arumajj markat escapjjapjjäna,+ Arabá toqer sarki uka thaki sarjjapjjarakïna.+ 5 Ukampis caldeonakan ejercitopaw jupanakar arktäna, Sedequías reyirojj Jericó markan wasar pampa oraqenakan jikjjatapjjäna.+ Jupar katuntasajj Babilonia markan Nabucodonosor* reyipan ukaruw Hamat+ oraqenkir Riblá sat cheqar apapjjäna,+ ukanwa juparojj juchañcharakïna. 6 Babilonia markan reyipasti, Sedequiasan yoqanakaparojj jupan uñjkataw Riblá sat cheqan jiwarayäna. Babilonia markan reyipajj Judá markan taqpach wali importante jaqenakaparuw jiwarayäna.+ 7 Ukatsti jupajj Sedequiasar juykhuptayasajj cobret lurat cadenanakampiw chinuntäna, ukhamat Babiloniar apjjañataki.+
8 Caldeonakajj reyin utapsa* markankir utanaksa phichantapjjänwa,+ Jerusalén markan murallanakaps tʼunthapipjjarakïnwa.+ 9 Guardianakan jilïripäki uka Nebuzaradán+ chachaw markan jiltʼapkäna uka jaqenakarusa, jupa toqet saytʼasjjapjjäna ukanakarusa, taqpach jiltʼirinakarus Babilonia markar preso katuntat apasjjäna.
10 Ukampis guardianakan jilïripäkäna uka Nebuzaradán chachajj mä qhawqha jan kunanïpkän uka wali pobre jaqenakaruw Judá markan jaytäna. Uka urunsti jupanakarojj uvas yapunakampi oraqenakampi trabajipjjañapatak* churäna.+
11 Ukatjja Babilonia markan Nabucodonosor* sat reyipajj guardianakan jilïripäkäna uka Nebuzaradán chacharojj akham sasaw Jeremiasjjat ordenäna: 12 “Jupar thaqtir saram, juparojj sum uñjarakïta. Janiw juparojj kuns kamachätati, kuntï maykätam uk churarakïta”+ sasa.
13 Ukhamasti guardianakan jilïripäkäna uka Nebuzaradán chachasa, Nebusazbán sat rabsarís* chachasa, Nergal-Sarézer sat rabmag* chachasa, Babilonia markan reyipan taqpach jilïrinakapasa, chachanak khitapjjäna, 14 ukhamat Guardianakan Patiopat+ Jeremiasar apsupjjañapataki, ukatsti jupanakajj Safán+ chachan allchhipäki, Ahicam+ chachan yoqapäkaraki uka Guedalías+ chacharuw katuyjjapjjäna, ukhamat utapar apjjañapataki. Ukhamatwa Jeremiasajj markankir jaqenak taypin jakäna.
15 Kunapachatï Jeremiasajj Guardianakan Patiopan+ preso katuntatäskäna ukhajja, Jehová Diosajj akham sasaw jupar säna: 16 “Jumajj Ébed-Mélec+ sat etíope chachan ukar sarasajj akham sanim: ‘Israelan Diosapäki uka ejercitonakan Jehová Diosapajj akham siwa: “Aka markatak nayajj arskta uka arunakaj phoqäwa, uka arunakajj jan waltʼäwitakiwa, janiw kuna sumatakïkisa. Uka urunwa jumajj phoqasitap uñjarakïta” sasa’.
17 ”‘Ukampis nayaw uka urun salväma’, siw Jehová Diosajja, ‘janiw jumajj ajjsarkta uka chachanakar katuyatäkätati’.
18 ”‘Nayaw cheqpachans jumar escapayäma, janiw espadamp jiwayatäkätati. Vidamajj salvatäniwa,+ nayaru confiyatam layku’,+ siw Jehová Diosajja”.