Jeremías
16 Mä kutimpiw Jehová Diosajj akham sitäna: 2 “Jan jumajj aka oraqen jumatak mä esposa thaqamti, janirak yoqanakanïkamsa ni phuchanakanïkamsa. 3 Kuna laykutejj aka oraqen nasiri yoqanakatsa phuchanakatsa ukhamarak mamanakapatsa tatanakapatsa, akham sistwa naya Jehová Diosajja: 4 ‘Jupanakajj jiwayir usunakampiw jiwapjjani,+ ukampis janiw jupanakatjam khitis jachkaniti, ni khitis jupanakar imtʼkarakiniti, jupanakajj oraq patjjan wanur uñtasitäpjjaniwa.+ Jupanakajj espadampi ukhamarak manqʼatjamaw jiwapjjani,+ aycha manqʼani jamachʼinakampi salvaje animalanakampiw jiwat cuerponakap manqʼapjjani’ sasa.
5 Naya Jehová Diosajj akham sistwa:
‘Jan jumajj maynin jiwatapat llakitäsipki uka utar mantamti,
jan jumajj ukar jachiris ni jaqet sinttʼasiris saramti’.+
‘Kuna laykutejj nayaw aka markarojj sumankañaj apaqta’, sistwa naya Jehová Diosajja,
‘munasiñat jan jaytjasirïtajsa khuyaptʼayasitajsa apaqaraktwa.+
6 Importante jaqenakasa aleq jaqenakas aka oraqenwa jiwapjjani.
Janiw jupanakajj imtʼatäpkaniti,
janiw khitis jupanakat llakiskaniti,
janirakiw khitis jupanak laykojj cuerponakap kharinoqaskaniti, ni ñikʼutanakapsa afeitaskaniti.*
7 Khitinakatï jiwiritjam llakisipki ukanakarojj janiw khitis manqʼa churkaniti,
jiwatanakapat jupanakar chuymachañataki.
Chuymachasir vinonïki uka copsa janirakiw khitis churkaniti,
tatapan jan ukajj mamapan jiwatapat umtʼapjjañapataki.
8 Ukatsti fiestanïki uka utarojj jan mantamti,
ukhamat jupanakamp manqʼañataki umañataki’.
9 ”Kuna laykutejj Israelan Diosapäki uka ejercitonakan Jehová Diosapajj akham sistwa: ‘Aka lugaranjja, jumanakan pachpa nayranakaman uñjkataw nayajj jakapkta uka urunakaman kusisiñat arnaqasitanaksa, wali kusisiñat arnaqasitanaksa, casarasir waynan arupsa, casarasir tawaqon arupsa chhaqtayäjja’.+
10 ”Kunapachatï aka markarojj taqe aka arunak yatiyäta ukhajja, jupanakajj akham sasaw jisktʼapjjätam: ‘¿Kunatsa Jehová Diosajj taqe aka jan waltʼäwi nanak contrajj arsu? ¿Kunans nanakajj Jehová Diosaj contrajj pantjasipjjta, kuna juchs nanakajj lurapjjta?’+ sasa. 11 Jumasti jupanakarojj akham sasaw jaysañama: ‘“Jumanakan nayra awkinakamajj nayar apanukupjjatap laykuwa”,+ siw Jehová Diosajja, “jupanakajj yaqha diosanakaruw arkasipkakïna, ukanakaruw servipjjarakïna, altʼasipjjarakïna.+ Nayarojj apanukupjjetänwa, janirakiw leyijs phoqapkänti.+ 12 Ukampis jumanakajj nayra awkinakamat sipansa jukʼamp jan walinak lurapjjtajja.+ Nayar istʼañat sipans sapa mayniw jan istʼasiri jan wali chuymanakamamp apayasipjjtajja.+ 13 Ukatwa nayajj aka oraqet kawkïr oraqtï nayra awkinakamasa jumanakasa jan uñtʼapkta uka oraqer alisnukupjjäma,+ ukanwa jumanakajj yaqha diosanakar uruy arum servipjjäta,+ kuna laykutejj janiw nayajj jumanakat khuyaptʼayasipkämati”’.
14 ”‘Ukampis urunakajj jakʼachasisinkiwa’, sistwa naya Jehová Diosajja, ‘ukhaw jupanakajj akham sasin jan parljjapjjaniti: “¡Kunjamtï Jehová Diosajj cheqpachapun jakkir Diosäkejja, jupaw Israel markarojj Egipto oraqet apsunïna!”+ sasa. 15 Antisas akham sapjjaniwa: “¡Kunjamtï Jehová Diosajj cheqpachapun jakkir Diosäkejja, jupaw Israel markarojj alay toqenkir* oraqetsa jupanakar anatatkäna taqe uka oraqenakatsa apanjjäna!” sasa. Nayasti oraqenakaparuw apanjjäjja, kawkïr oraqtï nayra awkinakaparojj churkayäta uka oraqeru’.+
16 ‘Nayajj walja chawlla katurinakwa jawsthapiyäjja’, sistwa naya Jehová Diosajja,
‘uka chawlla katurinakaw jupanakarojj katurapjjani.
Ukatjja walja animal katurinak jawsthapëjja,
jupanakaw sapa qollunsa, sapa jiskʼa qollunsa,
qarqanakan* kʼakʼatanakapansa katurapjjani.
17 Kuna laykutejj nayan nayranakajajj jupanakan taqe luratanakapjjankiwa.*
Jupanakajj janiw nayat imantasipkaspati,
janirakiw jupanakan pantjasitapsa nayranakajat imantapkaspati.
18 Nayraqatasti jupanakan pantjasitapatsa juchapatsa phoqatpachwa castigäjja,+
kuna laykutejj jan vidanïpki* uka ajjtaskañ idolonakampiw jupanakajj oraqej jiskʼachapjje,
herenciajarojj jupanakan ajjtaskañanakapampiw phoqantapjje’”.+
19 Jehová Dios Tata, nayan chʼamaja, imantasiñ lugaraja,
llakinakan uñjaskta uka urun escapañatak lugaraja,+
juman ukaruw markanakajj oraq tukuyanakatpach jutapjjani,
akham sapjjarakiniwa: “Nayra awkinakajajj falso diosanakar adorañwa* herenciat katoqapjje,
inamayäki jan kunatak servirïkaraki ukanaka”+ sasa.
20 ¿Mä jaqejj diosanak lurasispati?
Jupajj lurki ukanakajj janiw cheqpach diosanakäkiti.+
21 “Ukhamajj nayaw jupanakar uñachtʼayäjja,
jichha kutejj chʼamajampi wali chʼamanïtajampwa uñachtʼayäjja,
ukatsti jupanakajj Jehová sutinïtaj yatipjjani”.