Isaías
14 Kuna laykutejj Jehová Diosajj Jacobut khuyaptʼayasitapwa uñachtʼayani,+ Israelarojj mayampiw ajllini.+ Oraqeparuw jupanakarojj uttʼayani,*+ extranjero jaqenakas jupanakamp juntukëjjapjjaniwa, Jacobun utaparuw mayachasjjapjjarakini.+ 2 Yaqha markanakankir jaqenakaw jupanakarojj pachpa lugarapar kuttʼayjjapjjani, Jehová Diosan oraqepanjja uka yaqha markankir jaqenakajj sirvientenakampiru sirvientanakampiruw tukupjjani, Israelan utapankirinakaruw servipjjani,+ jupanakar esclavor tukuyapkäna ukanakarojj esclavoruw tukuyapjjani, jupanakar munkir jan munkir trabajiyapkäna* ukanakarojj munañaparuw apnaqapjjarakini.
3 Kuna uruntï Jehová Diosajj llakimatsa, tʼaqesitamatsa, wali chʼam tukusa esclavot servitamatsa samartʼaykätam ukhajja,+ 4 jumajj akham sasaw Babilonia markankir reyipat burlasïta:
“¡Yaqhanakar munkir jan munkir trabajiykäna ukajj* tukusjjewa!
¡Tʼaqesiñas tukusjjewa!+
5 Jehová Diosajj jan wali jaqenakan varapwa pʼakji,
marka apnaqerinakan thujrupwa pʼakji.+
6 Khititï markanakar wali colerat jan samartʼasa jan waltʼaykäna ukarusa,+
khititï markanakar wali colerat munañapar apnaqkäna, jan sinttʼasis arknaqkäna ukarusa tukjiwa.+
7 Jichhajj oraqpachaw wali sum samartʼasjje,
jaqenakas kusisiñatwa arnaqasipjje.+
8 Kunatï jumarojj paskayätam ukatjja enebro qoqanakas* kusisipjjewa,
Líbano qollunakankir cedro qoqanakas kusisipjjarakiwa.
Jupanakajj akham sapjjewa: ‘Jumajj jiwjjta ukhatjja,
janiw khitis nanakar khuchurejj jutjjeti’ sasa.
9 Sepulturasa* uka manqhan wal muspari,
ukhamat jumajj purkäta ukhajj jumar katoqañataki.
Sepulturajj juma laykuw jiwatanakarojj sartayi,
oraqenkir taqpach tʼaqesiyir pʼeqtʼirinakarus* sartayiwa.
Taqe markanakan reyinakaparus trononakapatwa sartayi.
10 Taqe jupanakaw parlañ qalltapjje, akham sapjjaraktamwa:
‘¿Nanakjamarakit jumajj jan chʼamanëjjta?
¿Nanakjamarakit jumajj tukjjta?
11 Jachʼa jachʼa tukutamajj Sepulturar* jaqontatäjjewa,
cuerdani instrumentonakan suynatapas Sepulturar jaqontatäjjewa.+
Mä ikiñjam aywitatat muchinak patjjaruw winktʼastajja,
laqʼonakas jumar imjjatir sabanawa’ sasa.
12 ¡Kʼajkir warawara, qhantatin wawapa,
alajjpachatwa jumajj jalaqtantajja!
¡Jumajj markanakarus atipjchiyätajja,
oraqer jaqoqanitäjjtawa!+
13 Chuymaman akham sayätawa: ‘Alajjpachanakaruw makatäjja.+
Diosan warawaranakapat sipansa jukʼamp altoruw tronoj uttʼayäjja,+
tantachasiñ qollunwa qontʼasëjja,
mä arunjja alay toqenkir* wali jaya lugaranakanwa qontʼasëjja.+
14 Qenayanakat sipansa jukʼamp altoruw makatäjja,
Jachʼa Diosjamarakïyäwa’ sasa.
15 Ukampis jumajj Sepultura* manqhar jaqontataw uñjasïta,
sepultura wali manqhakam jaqontataw uñjasïta.
16 Khitinakatï jumar uñjapkätam ukanakajja wal uñchʼukipjjätam,
jumar sum uñakipasajj akham sapjjaniwa:
17 ¿Jaqenakani oraqerojj wasarar tukuykäna,
markanakapsa tukjkäna,+
preso katuntatanakapar utar jan kuttʼayañ munkäna ukati?’+ sasa.
18 Markanakan taqpach yaqha reyinakapajja,
jïsa, taqe jupanakajj jachʼañchataw imatäjjapjjäna,
sapa maynejj sepulturapar* imatäjjapjjänwa.
19 Ukampis jumarojj jaqtapjjtamwa, jan sepulturaniw jaytapjjtamjja,
uñisit chʼichtanir alir* uñtataw jaqtapjjtamjja,
cuerpomajj espadamp jiwayat jaqenakampi imjjatatawa,
uka jiwayat jaqenakajja mä sepulturan qalanakapjjaruw jaljjattapjje,
takichat mä jiwat cuerpor uñtasitaw jaqtapjjtamjja.
20 Janiw jumajj jupanakamp chikajj mä sepulturar imatäkätati,
kuna laykutejj jumajj pachpa oraqemwa tukjtajja,
pachpa markamankirinakaruw jiwaytajja.
Jan walinak lurir jaqenakan wawanakapan sutinakapajj janiw amtatäjjaniti.
21 Jupan wawanakapar jiwarayañatak mä lugar wakichapjjam,
jupanakan nayra awkinakapan juchanakap layku,
ukhamat jupanakajj sartasisin oraq jan katuntapjjañapataki,
janirak aka oraqjja markanakapampi phoqantapjjañapataki”.
22 Ejercitonakan Jehová Diosapajj akham siwa: “Nayajj jupanak contraw saytʼasëjja”+ sasa.
Jehová Diosajj akham sarakiwa: “Babilonia markan sutipsa, jiltʼirinakaparusa, jutïr wawanakaparusa, wawanakapan wawanakaparusa nayajj chhaqtayäwa”+ sasa.
23 Ejercitonakan Jehová Diosapajj akham siwa: “Babilonia markarojja puercoespín sat animalanakampiw phoqantayäjja, siniyanakani* mä lugararuw tukuyäjja, qʼal tukjiri pichañampiw pichanuköjja”+ sasa.
24 Ejercitonakan Jehová Diosapajj akham sasaw mä juramento luri:
“Kunjamtï nayajj amtktjja ukhamaw pasani,
kuntï nayajj amtktjja ukajj phoqasiniwa.
25 Asiria markarojja* oraqejanwa tukjäjja,
qollunakajanwa taksurakëjja,+
yukupajj markajat apaqatäniwa,
qʼepipajj markajan kallachipat apaqatäniwa”+ sasa.
26 Diosajj ukhamwa taqe uka oraq contrajj amtawayi,
ukaw taqe markanak contra loqtatäki* uka amparajja.
27 Kuna laykutejj ejercitonakan Jehová Diosapaw uk amtawayi,
¿khitirak uk jan phoqasiñapatak jarkʼaspasti?+
Amparapajj loqtatakïskiwa,
¿khitirak amparap qhepar kuttʼayaspasti?+
28 Acaz reyejj jiwjjäna uka marajja,+ Diosajj sänwa:
29 “Filistea marka, markachirinakamat jan maynis kusispanti,
jumar nuwkayätam ukan thujrupajj pʼakjasitap laykukejj jan kusisimti,
kuna laykutejj asirun* wawapatjja+ venenoni mä asiruw mistuni,+
wawapajja venenoni thoqkatasir asirüniwa.
30 Jan khiti yanapirin jaqenakan jilïr wawanakapajj sistʼasiñkamaw manqtʼasipjjani,
pobrenakasti jan ajjsarasaw iktʼasipjjani,
ukampis juman wawamarojj manqʼatwa jiwayäjja,
juma taypin jiltʼirinakajj jiwarayatäpjjaniwa.+
31 ¡Punku, jumajj wararim! ¡Marka, jumajj arnaqasim!
¡Filistea marka, taqe jumanakajj desanimasipjjätawa!
Kuna laykutejj alay toqetwa* mä jewqʼejj jutaski,
formtʼat ejercitopatjja janiw maynis qhepar quedaskaniti” sasa.
32 ¿Kamsasas markan yatiyirinakaparojj jaysasiñapa?
Jehová Diosaw Sionan cimientop uchi,+
markapan jan khiti yanapirin jaqenakasa ukanwa imantasipjjani sasaw sapjjañapa.