Jueces

6 Israelitanakasti wasitat kunatï Jehová Dios nayraqatan jan walïki uk lurapjjäna,+ ukatwa Jehová Diosajj madianitanakan amparapar paqallqo maranak katuyäna.+ 2 Madianitanakajj Israel markar wal tʼaqesiyapjjäna.+ Madianitanak kawsaw israelitanakajj qollunakansa, qollu pʼiyanakansa, jan khitin katuñjam cheqanakans imantasiñanaka* lurasipjjäna.+ 3 Israelitanakajj yapuchapjjäna ukhajja, madianitanakasa, amalequitanakasa,+ inti jalsu+ toqenkir jaqenakas jupanak contra nuwasiñatakiw saytʼasipjjäna. 4 Jupanakajj israelitanak contra nuwasiñatakiw campamentop saytʼayasipjjäna, oraqen achunakapsa Gaza markar puriñkamaw qʼal tukjapjjäna, janiw israelitanakan manqʼañapatakejj kunsa jiltʼayapkänti, janirakiw ovejasa, torosa, asnos utjkänti.+ 5 Jupanakasti uywanakapampi carpanakapampiw langostanakar* uñtat waljani jutapjjäna,+ jupanakasa camellonakapas jan jaktʼkañänwa.+ Oraq tukjañatakiw jupanakajj mantapjjäna. 6 Madianitanak kawsaw israelitanakajj pisin jakasipjjäna. Jupanakajj yanaptʼayasiñatakiw Jehová Diosar artʼasipjjäna.+

7 Madianitanak kawsasti israelitanakajj yanaptʼa mayiñatakiw Jehová Diosar artʼasipjjäna,+ 8 ukatwa Jehová Diosajj israelitanakan ukarojj mä profeta khitäna, jupasti akham sänwa: “Israelan Jehová Diosapajj akham siwa: ‘Nayaw Egipto markata, kawkjantï esclavösipkayäta uka oraqet irpsunipjjsma.+ 9 Egipto markan amparapatsa taqe tʼaqesiyirinakamatsa salvapjjsmawa, enemigonakamarojj jumanak nayraqatat alissusaw oraqenakap churapjjsma.+ 10 Nayasti jumanakarojj akham sapjjayäsmawa: “Nayaw jumanakan Jehová Diosamätjja.+ Janiw kawkjantï jakasipkta uka oraqenkir amorreonakan diosanakapar adorapjjañamäkiti”*+ sasa. Ukampis jumanakajj janiw aruj istʼapkistati’”.+

11 Uka qhepatsti Jehová Diosan mä angelapaw jutäna+ Ofrá markankir jachʼa qoqa* jakʼanwa qontʼasïna, uka qoqasti Joás sat abí-ezrita+ jaqenkänwa. Gedeón+ sat yoqapasti uvas chʼirwañ lugaranwa trigo jawqʼaskäna, madianitanakajj uka trigo jan uñjapjjañapataki. 12 Jehová Diosan angelapaw jupar uñstasin akham säna: “Jehová Diosaw jumampïski,+ guerran nuwasir chʼamani chacha” sasa. 13 Uk satasti Gedeonajj akham sarakïnwa: “Tatay perdontʼita, Jehová Diosatejj nanakampïchi ukhajja, ¿kunatsa taqe akanakajj pasapjjetu?+ ¿Kawkinkaraki nayra awkinakajajj Diosan musparkañ luratanakapat parlapkitäna ukanakasti?+ Jupanakasti sapjjänwa: ‘Jehová Diosaw Egipto markat irpsunipjjetu’+ sasa. Jichhasti Jehová Diosajj jaytanukjjapjjetuwa,+ madianitanakan amparaparuw katuyapjjetu” sasa. 14 Jehová Diosajj kutikipstasaw jupar akham sarakïna: “Chʼam katjjatas saram, jumaw Israel markarojj madianitanakan amparapat salväta.+ Nayaw jumarojj khitasksma” sasa. 15 Gedeón chachasti akham sarakïnwa: “Jehová Dios, perdontʼita. ¿Kunjamatsa nayajj Israel markar salvirista? Manasés tribu taypin familiajajj jukʼanikiwa, tatajan familiap taypins janirakiw kuna yäqat jaqëktsa” sasa. 16 Ukampis Jehová Diosajj akham sasaw jupar säna: “Nayaw jumampïskäjja,+ madianitanakarojj mä sapa jaqekïkaspas ukhamwa jumajj atipjäta” sasa.

17 Jupasti sarakïnwa: “Jumatï nayar yanaptʼitätajja, jumapuni nayamp parlaskatam yatiñatakejj mä señal uñachtʼayita. 18 Mä regalomp kuttʼaniñajkamasa nayraqatamar uka regalo apaniñajkamasa, mirä amp suma, aka cheqan suytʼita”+ sasa. Uk satasti jupajj sarakïnwa: “Kuttʼaniñamkamajj aka cheqankaskäwa” sasa. 19 Gedeón chachasti utar mantasaw mä cabritompi, niya 11 kilonak* jakʼut lurat jan levaduran tʼantʼampi wakichtʼäna.+ Canastaruw aych uchäna caldjja phukururaki. Ukatsti ukanak apasaw jachʼa qoqa* jakʼan sirvtʼäna.

20 Cheqpach Diosan angelapajj akham sasaw jupar säna: “Aychampi jan levaduran tʼantʼampi katum, ukatsti khä qarqa* patjjar ucham, caldsti uka patjjar warjjatarakim” sasa. Jupasti ukhamwa luräna. 21 Ukatsti Jehová Diosan angelapajj amparapar kattʼatäkäna uka thujrun puntapampiw aychampiru jan levaduran tʼantʼampiru ayjjatäna, ukatsti ninaw qarqat* naktäna, aychampi jan levaduran tʼantʼampsti qʼal nakhantäna.+ Ukatjja Jehová Diosan angelapajj jupan nayraqatapatjja chhaqtjjänwa. 22 Ukhaw Gedeonajj Jehová Diosan angelapätap amuyäna.+

Ukatsti Gedeonajj sarakïnwa: “¡Taqe Kunjjar Munañani Jehová Dios Tata! ¡Jehová Diosan angelaparojj ajanut ajanuw uñkatta!”+ sasa. 23 Jehová Diosajj jupar sarakïnwa: “Jan llakisimti.* Janirak ajjsaramti,+ jumajj janiw jiwkätati” sasa. 24 Ukatwa Gedeonajj Jehová Diosatak mä altar ukjar saytʼayäna, uka altarajj jichhürkamaw Jehová-Salom*+ sutimpi uñtʼasi. Uka altarajj abí-ezritanakan oraqepan Ofrá markankaskiwa.

25 Uka arumasti Jehová Diosajj akham sasaw jupar säna: “Tatamankir torop katum, paqallqo maranïki uka payïri toro, ukatsti tatamankiri Baal diosan altarap tʼunthapim, uka jakʼankiri sagrado postsa apsurakim.+ 26 Jehová Diosamataki alto patjjaru perqtʼat qalanakampi altar saytʼaykäta uka qhepatjja, payïrïki uka toro katusajj sagrado postet khuchurkäta uka lawanak patjjaruw nakhantayat ofrendjam uka toro loqtäta” sasa. 27 Gedeón chachasti servirinakapat tunka chachanak ajllisajj kunjamtï Jehová Diosajj siskäna ukham luräna. Ukampis tatapan familiaparu ukhamaraki uka markankir chachanakar ajjsaratap laykusti, janiw urun uk lurkänti jan ukasti arumaw luräna.

28 Qhepür alwasti markankir chachanakajj wali alwat sartasipjjäna ukhajja, Baal diosan altarapajj tʼunthapita, uka jakʼankir sagrado postes apsuta, wasitat saytʼayatäkäna uka altar patjjarus payïri toro ofrendjam loqtata uñjapjjäna. 29 Jupanakkamaw akham sasin jisktʼasipjjäna: “¿Khitis akanak luri?” sasa. Yatjjatasasti sapjjarakïnwa: “Joás chachan Gedeón yoqapaw akanak luri” sasa. 30 Ukatwa markankir chachanakajj Joás chachar akham sapjjäna: “Yoqamarojj jiwañapataki irpsunim, jupaw Baal diosan altarap tʼunthapi, uka jakʼankiri sagrado postsa apsuraki” sasa. 31 Joás+ chachasti jupa nayraqatan saytʼasiri chachanakarojj akham sarakïnwa: “¿Baal diosatti jumanakajj arjjatasipjjta? ¿Jumanakat jupar salvapjjäta? Khititejj Baal diosat arjjataskani uka jaqejj jichha alwpacha jiwayatäñapawa.+ Jupatejj mä diosächi ukhamarak maynitejj altarap tʼunthapchi ukhajja, jupa pachpa arjjataspan”+ sasa. 32 Jupasti uka urunwa Gedeonarojj Jerubaal* sutimpi uchäna, akham sasa: “Maynitejj altarap tʼunthapchejja, Baal dios pachpa arjjataspan” sasa.

33 Madianitanakasa,+ amalequitanakasa+ inti jalsu toqenkir jaqenakasa taqeniw mayachtʼasipjjäna.+ Jezreel valle paskatasaw* carpanak saytʼayapjjäna. 34 Ukatjja Jehová Diosan espiritupaw Gedeón+ chachjjar jutäna, jupasti pututu phustʼasirakïna,+ abí-ezritanakasti+ jupan qhepap sarañatakiw tantachtʼasipjjäna. 35 Jupasti taqpach Manasés tribunkirinakaruw mensajeronak khitäna, jupanakasti yanaptʼiriw jupan ukar jutapjjäna. Aser, Zabulón, Neftalí tribunkirinakarojj ukhamarakiw mensajeronak khitäna, jupanakasti jupamp jikisiriw jutapjjarakïna.

36 Ukatjja Gedeón chachajj akham sasaw cheqpach Diosar säna: “Kunjamtï siskta ukarjamatejj naya taypi israelitanakar salvätajja,+ 37 trigo takiñ cheqaruw ovej tʼarwa* uchaskta. Tʼarwatejj sulljjatatäni, ukampis oraqejj wañakïskani ukhajja, naya taypi Israel markar salvatamwa yatëjja, kunjamtï jumajj arskta ukhama” sasa. 38 Uka arunakaparjamaw phoqasïna. Qhepür alwajj wali alwat sartäna ukhajja, tʼarwatwa sulla uma chʼirwsüna, tʼarwan sulla uma chʼirwsutapajj mä jachʼa pʼujru* plator phoqtʼañjamänwa. 39 Ukampis Gedeón chachajj akham sasaw cheqpach Diosar saskakïna: “Janikiy nayatak colerasimti, aka mayampik jumar mayiñ munsma. Mirä amp suma, nayampïskatam yatiñatakejj mä kutimpiw tʼarwamp yantʼañ munta. Mirä, taqpach oraqen sullantkipansa, tʼarwajj wañakïskpan” sasa. 40 Diosasti uka arumajj ukhamwa luräna. Oraqejj sullantatänwa, tʼarwasti wañakïskänwa.