Jeremías
31 “Uka tiemponsti”, sistwa naya Jehová Diosajja, “nayajj Israelan taqe familianakapan Diosapäyäwa, jupanakasti nayan markajarakïniwa”.+
2 Jehová Diosajj akham siwa:
“Espadat salvasipki uka jaqenakajj wasaran sumat uñjatäpjjänwa,
ukapachaw Israelajj mä samarañ lugar katuñatak sarnaqaskäna”.
3 Jehová Diosajj wali jayat nayar uñstanisaw akham sitäna:
“Nayajj wiñayatak munasiñampiw jumar munassma.
Ukatwa nayajj munasiñat jan jaytjasirïtajat nayan ukar irpansma.*+
4 Nayajj wasitat jumar saytʼayäma, jumasti wasitat mä markäjjarakïta.+
Israelan phuchapa, jumajj wasitat panderetanakam katjjarüta,
5 Wasitat Samaria markan qollunakapan uvasanak ayrusïta.*+
Khitinakatï ayrupkani ukanakajj achunakap manqʼasipjjarakini.+
6 Efraín qollunakankir marka uñjir guardianakajj* akham sasaw artʼapjjani:
‘¡Sarañäni, kawkjankkitï Jehová Diosasajj uka Sion Qollur makatañäni!’+ sasa”.
7 Kuna laykutejj Jehová Diosajj akham siwa:
“Jacoburojj wali kusisit cantapjjam.
Yaqha markanakat nayrankapjjatam laykojj wal kusisipjjam.+
Yatiyapjjam, Diosarojj akham sasin jachʼañchapjjam:
‘Jehová Dios Tata, markamar salvam, Israelat jiltʼirinakaru’+ sasa.
8 Nayajj alay toqenkir* oraqetpachwa jupanakar kuttʼayanëjja,+
oraqen wali jaya cheqanakapatpach jupanakar tantachtʼäjja.+
Jupanak taypinkaniw juykhunakasa, cojonakasa,+
usur warminakasa, niya ususir warminakasa, taqenis juntukïpjjaniwa.
Jupanakajj walja jaqenakjamaw akar kuttʼanipjjani.+
9 Jupanakajj jachtʼasisaw jutapjjani.+
Nayar wal ruwtʼasipjjañapkamajj nayaw jupanakar irpäjja.
Jupanakarojj jalir umanakaruw irpäjja,+
jan lanktʼasiyir pampachtʼat thak irpäjja.
Kuna laykutejj Israelan Awkipätwa, Efrainajj jilïr wawajarakiwa”+ sasa.
10 Markanaka, Jehová Diosan arunakap istʼapjjam,
jayankir islanakan uk yatiyapjjam:+
“Israelitanakar anatatki ukajj anthapjjaniwa.
Jupasti kunjamtï mä awatirejj ovej tamapar uñjki ukhamaw uñjarakini.+
11 Kuna laykutejj Jehová Diosaw Jacobur salvani,+
khitinakatï jupat sipans jukʼamp chʼamanïpki ukanakan amparapatwa salvani.+
12 Jupanakajj jutasaw Sion Qollu patjjan kusisiñat arnaqasipjjani,+
jupanakajj kʼajtapjjaniw Jehová Diosan munasiñapatsa,
granonakatsa, machaq vinotsa,+ aceitetsa,
ovejanakampin vacanakampin qallunakapatsa.+
Jupanakajj wali suma qarpat jardinar uñtasitäpjjaniwa,+
janipuniw mayampis jan chʼaman uñjasipkaniti”.+
13 “Uka tiemponsti virgen tawaqojj wali kusisitaw thoqtʼasini,
waynanakajj awkinakamp chikaw thoqtʼasipjjarakini.+
Nayasti jupanakan llakinakap kusisiñaruw tukuyäjja.+
Jupanakarojj chuymachtʼäwa, tʼaqesitanakap wali kusisiñaruw tukuyäjja.+
14 Sacerdotenakarojj walja manqʼañanak churäjja,
markajajj kuna sumanaktï jupanakar churkä ukampejj phoqtʼatäpjjaniwa”,+ siw Jehová Diosajja.
15 “Jehová Diosajj akham siwa:
‘Ramá+ markan mä aruw istʼasi, ayqotampi, wal jachañampi.
Raquelaw wawanakapatjam jachaski.+
Wawanakapatjamajj janiw chuymachtʼatäñ munkiti,
jupanakajj jan jupampëjjatap layku’+ sasa”.
16 Jehová Diosajj akham siwa:
“‘Jan jachamti, jan nayranakamajj jukʼamp jachjjpanti,
nayaw juman luratamat kuttʼayjjäma’, sistwa naya Jehová Diosajja.
‘Jupanakajj enemigon oraqepat kuttʼanjjapjjaniwa’.+
17 ‘Jutïritakejj mä suytʼäwiw jumatak utji’,+ sistwa naya Jehová Diosajja.
‘Wawanakamajj pachpa oraqeparuw kuttʼjjapjjani’”.+
18 “Cheqpachapuniw nayajj Efrainan akham sasin ayqotap istʼta:
‘Jumajj cheqañchistawa, nayajj cheqañchataw uñjasta,
jan yatichat mä torillor uñtata.
Kuttʼayanjjeta, nayasti jankʼakiw kuttʼanjjarakï,
jumajj Jehová Diosajätam layku.
19 Kuttʼanjjta uka qhepat wal chuymaj usuyasta,+
amuytʼayjjapjjetu uka qhepatjja, llakitätaj laykojj lankhu charaj nuwanoqasiyäta.
Waynäkayäta uka horasan luratanakaj laykuw
nayajj phenqʼachata jiskʼachata uñjasiyäta’”.+
20 “¿Janit Efrainajj nayatak wali suma ukhamarak wali munat wawäki?+
Nayajj sapa kutiw jupar toqenoqayäta, ukhampachas jupat amtasiskaktwa.
Ukatwa nayajj jupat sinttʼasta.+
Cheqas jupat sinttʼasikipunïwa”, siw Jehová Diosajja.+
21 “Thakirojj marcanak uchasim,
señalanak uchasirakim.+
Thakim wali amuyump uñjam, kawki thaktï sarañamäki uka thaki.+
Israelan phuchapa, kuttʼanjjam. Markanakamar kuttʼanjjam.
22 Israelan apanukusir phuchapa, ¿kunapachkamas payachasiskakïta?
Jehová Diosajj mä machaq luräwi oraqen luri:
mä warmejj mä chacharuw wal thaqani”.
23 Israelan Diosapäki uka ejercitonakan Jehová Diosapajj akham siwa: “Kunapachatï jaya markar apatäpki ukanakar kuttʼayankä ukhajja, Judá oraqensa markanakapansa wasitat akham sapjjani: ‘Cheqapar jakañ lugara,+ sagrado qollu,+ Jehová Diosajj jumar bendispan’ sasa. 24 Judá oraqensa taqe markanakapansa taqenis mayakiw jakapjjani, yapuchirinakasa uywa awatirinakasa.+ 25 Nayaw qaritanakarojj chʼam churäjja, manqʼatjam aynachtʼatanakarus sistʼayarakïwa”+ sasa.
26 Ukhamaruw nayajj sartayäta, uñatatasirakiyätwa. Nayajj wali sumpun iktʼasiskatäta.
27 “Urunakajj jakʼachasisinkiwa”, siw Jehová Diosajja, “nayaw Israel markankirinakarusa, Judá markankirinakarus waljaptayäjja, nayarakiw uywanakaps waljaptayäjja”.+
28 “Kunjamtï jupanakarojj jikʼinukuñataki, allinukuñataki, tʼunthapiñataki, tukjañataki, jan walinak lurañatak uñchʼukkayätjja,+ ukhamarakiw saytʼayañataki, ayruntañataki* uñchʼukëjja”,+ siw Jehová Diosajja. 29 “Uka urunakanjja janiw akham sisjjapjjaniti: ‘Awk taykanakaw kʼaskʼa uvasanak manqʼapjjäna, ukampis wawanakaw lakanakapan jan wali saboran uñjasipjje’*+ sasa. 30 Antisas sapa mayniw juchapat jiwani. Kawkïr jaqetï kʼaskʼa uvasanak manqʼani ukhajja, jupaw lakapan jan wali saboran uñjasini”.
31 “Urunakajj jakʼachasisinkiwa”, siw Jehová Diosajja, “Israel markampisa Judá markampisa uka urunakanwa nayajj mä machaq pacto luräjja.+ 32 Uka pactojja, janiw kuna uruntï nayra awkinakamampi Egipto oraqet amparat irpsunisajj lurkayäta uka pactjamäkaniti,+ ‘nayajj jupanakan cheqpach uywiripäkchiyätsa,* jupanakajj pactoj pʼakintapjjänwa’,+ siw Jehová Diosajja”.
33 “Uka urunak qhepatjja aka pactwa Israel markampejj luräjja”, siw Jehová Diosajja. “Leyinakajsti jupanakaruw uskuntäjja,+ chuymanakaparuw qellqantarakëjja.+ Nayajj jupanakan Diosapäyäwa, jupanakajj nayan markajarakïniwa”.+
34 “Jupanakatjja janiw maynis jaqe masiparusa jilaparusa, ‘¡Jehová Diosar uñtʼam!’+ sasin yatichjjaniti. Jupanakajj jiskʼat jachʼakamaw taqenis nayar uñtʼjjapjjetani”,+ siw Jehová Diosajja. “Nayajj jupanakan pantjasitanakap perdonäwa, janirakiw juchanakapats jukʼamp amtasjjäti”.+
35 Jehová Diosajja,
khititï urun qhantʼañapatak inti churki,
khititï aruman qhantʼañapatak phajjsimpin warawaranakampin leyinakap uttʼayki,
khititï lamar qota onjjtayki, oladanak suynayki,
ejercitonakan Jehová Diosapa satäki ukajj akham siwa:+
36 “‘Uka leyinakatï jan walëjjaspa’, siw Jehová Diosajja,
‘ukhakiw Israelan wawanakapajj naya nayraqatan wiñayatak jan markäjjaspati’”.+
37 Jehová Diosajj akham siwa: “‘Alajjpachanakatï midtʼasispa, oraqen cimientonakapas uñakipasispa, ukhakiw nayajj Israelan taqe wawanakaparojj taqe kunanaktï lurapki ukanak kawsajj apanukurista’, siw Jehová Diosajja”.+
38 “Urunakajj jakʼachasisinkiwa”, siw Jehová Diosajja, “uka urunakanwa markajj Jehová Diosatak mayampi saytʼayatäni,+ Hananel Torret+ qalltasin Esquin Punkukama.+ 39 Mediñatak pitajj*+ Gareb jiskʼa qollukamaw cheqak jiytʼasini, ukatsti Goá toqeruw muyjtani. 40 Kawkirutï jiwatanakasa qhellas* wartaski taqe uka vallesa, Cedrón vallekam+ purki taqe uka oraqenakasa, inti jalsu toqenkki uka Caballonakan Punkupa+ sat esquinkamasa, Jehová Diosatakejj sagradöniwa.+ Markajj janipuniw mayampis tʼunjatäkaniti, ni tukjatäkanisa”.